مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

عزيزي الزوج..💟💟

عايز تعرف ليه مراتك ضاربة بوز و منكدة عليك؟؟

بتحاول تفهم الكائن الفضائي اللي عايش معاك و مش عارف..!!!

محتاج حد يترجملك ليه #الست ممكن وهي في عز لحظات روقانها و استمتاعها فجأة صوتها يجيب اخر الشارع..؟؟

مش عارف ليه ممكن الست تقعد تزن علي خروجة قبليها بأسبوعين و لما انت اخيرا توافق تقولك مش عايزة اروح..؟

#آدم وحواء هتقدملك #خدمة_مجانية... هتديك الكتالوج في شوية نقط..

اول حاجة لازم تراقب هي بتعمل ايه طول النهار بيوصلها لكدة..

اصلها بتصحي مع اول واحد بيصحي و بتنام مع اخر واحد ينام.. وفيه تلت اربع فواصل في النص مع كل عيل بيقلق.. و بتفضل نايمة علي سيفها طول #الليل عشان لو زقت الرجل اللي علي وشها دي هيصحي..و يصحيك

اصلها بتتشقلب طول النهار علي الفطار و الغدا و العشا عشان العيال ياكلو...بتعمل طيارات و حركات بوشها عشان يفتحو بقهم.. و بعد كل وجبة لازم تغير هدومها.. و هدوم العيال.. و تمسح الارض و تغسل الكنبة.. و دي بتبقي اقل خساير..

لو فكرت تشرب كوباية شاي دي بيبقي ليها ستراتيجية معينة.. خطة مسبقة و تكنيك معين..لازم تأمن المكان و تراعي قواعد السلامة و الصحة المهنية...طبعا بتكون كوباية الشاي بردت خلاص... و دي برضه اقل خساير..

فكرة انها تدخل الحمام لوحدها دي مرفوضة تماما لازم علي الاقل في عيل بتاخده علي حجرها.... تقريبا بيأمنها..

و لوفكرت تاخد دش بتبقي رجل جوا البانيو و رجل برة... شعرها.. لا طبعا هتسرحه ليه ده مش من الضروريات..

اصلها خلاص مبقتش تسمع لا ام كلثوم ولا حليم و لا منير و لا عمرو.. و بقت طول النهار بتسمع جدو علي و كوكو واوا....مسلسل ايه ولا حتي اخبار.. #التليفزيون ده معمول عشان سبيستون و mbc3..

#الموبايل..لا ده زعيم العصابة محتكره و كل الابليكشنز اللي عليه كلها بقت رسم و بازل و تلوين و حيوانات..

علي اد ما بيبقي نفسها تخرج و تتفسح.. بس لما بتفتكر البهدلة اللي هتشوفها و هي خارجة بالعيال... و الجوع اللي هيجوعوه فجأة.. و ان الخروجة اصلا هتبقي كلها في الحمام.. وانها هتكمل بقيت الخروجة شايلاهم عشان اكيد هيناموا او يتعبوا.. بترجع في كلامها و تقعد في #البيت بكرامتها..

اصلها طول النهار بتدور علي حاجات مش لاقياها كانت مخبياها من العيال و نسيت مكانها..

طول النهار بتنصف و تروق و مفيش فايدة..

طول النهار بتزعق و بتجري عشان تلحق مصايب..

طول النهار بتحل في مشاكلهم و تفصل و تحوش بينهم..

طول النهار مستنياك تيجي تطبطب عليها و تقولها ربنا يخليكي لينا 😊

اقولك علي حاجة..

كلمها مرتين تلاتة بس قولها وحشتيني.. هتفرق معاها كتير اوي..

ابعتلها مسج حلوة.. خرجها في الاسبوع ساعتين منغير العيال..

اقعد معاها ساعتين بس كل يوم اسمعها.. خليها تتكلم وانت بصلها باهتمام..

هاتلها اي حاجة في ايدك وانت مروح تبقي ليها هي مش للعيال...

اقطفلها وردة من الجنينة.. فل من اللي بيتباع في الاشارة... كيس لب...شيكولاتة

والله انا عملت الي عليه وانتم احرار يسعد صباحكم بكل خير احبابي

💚💜♥️💓💙برنس ♥️💓💙❣️💔