مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

القصه كامله زي ماوعدتكم ياريت اشوف دعمكم

قصة (غرفة حماتي ) كاملة

حماتي ست مش طبيعية وليها عادة غريبة جدا ..

و دايما كل يوم اسمع من غرفتها بليل صوت حاجه بتخبط جامد

انا سلمى 27 سنه متزوجه من شهرين .. قضيت شهر العسل.. أول شهر فسح انا وزوجي أحمد

اللي اتعرفت عليه من ست شهور وكان جواز صالونات كان معرفه واحده صديقة والدتي

وثاني شهر بعد شهر العسل رجعت اعيش في بيته لانه وحيد أهله ووالده متوفي وعايش مع حماتي بس

انا ماكنش قدامي حل غير اني اقبل انها تعيش معانا .. وخصوصا الشقه باسمها

وهوا لسه بيكون نفسه لحد ما يجبلي شقه بس وعدني وقالي لو حسيتي انك مضايقه قوليلي وناجر شقه بعيد عنها بس انا مش عايز اسيبها لوحدها بصراحه انا عارفه ظروف احمد وعارفه اني مش هينفع اقوله سيب والدتك تعيش لوحدها

فقبلت بالامر الواقع .. بس عليها تصرفات غريبه بدات تظهر .. لدرجه بعمل الاكل في مرة وروحت اعمل حاجه ورجعت لقيتها فاتحه غطاء الحله وبتحط ملح كتير على الاكل .. شوفتها سكت قولتلها في حاجه ياماما الاكل كان ناقصه ملح اتخضت لما شافتني وقالتلي اه الظاهر كده

بدوق بعدها الاكل لقيته مالح جدا .. بقيت ادخل الحمام تقعد تخبط عليا بعدها بدقيقه عايزة ادخل الحمام

بقيت في كل حاجه بعملها او مكالمه من صحباتي الاقيها عماله تحوم حواليا عشان تسمعني بقول ايه؟

الوضع بقى صعب اوي بصراحه وانا اتخنقت منها وكل ما اقول حاجه لأحمد يضحك يقولي معلش لسه ما اتعودتش عليكي بس بعد كده هتحبك وهتحبيها

بس اللي غايظني بجد انها كل يوم الساعه 12 بليل بالدقيقه تطلع تجري على غرفتها .. واسمع صوت تخبيط مش ده بس الغريب .. وكمان احمد ساعات كتير بيخش معاها غرفتها ويبات معاها ويطلعلي تاني يوم الصبح

اللي مخليني مستغربه ان غرفتها مقفوله بالمفتاح دايما والمفتاح في سلسله في رقبتها مش بتقلعه ومش بتخليني اخش غرفتها انضفها خالص.. واحمد بس اللي بيخشها ينضفها

برغم اني ساعات بلاقي ريحه وحشه اوي في البيت برغم اني لسه منضفه لدرجه هي عشان تفتح باب غرفتها لازم تتاكد اني مش واقفه قريب منها

لدرجه مرة سالت احمد على موضوع الاوضه ده قالي بقولك ايه ؟ انتي مالك ومالها هي بتخاف على فلوسها وحاجاتها وليها خصوصيتها انتي مالك ؟

وقعد يزعق جامد جدا فيا وكانت اول مره يزعقلي من ساعه ما اتجوزنا .. زعلت يومها جدا وقعدت اعيط من الخضه في تحول شخصيته معايه وبسبب الطريقه والعصبيه الاوفر على سؤال عادي

وبعدها هوا جه يصالحني وجابلي شكولاته كتير وقالي معلش كنت متوتر من الشغل وما تزعليش مني

بس الغريب انها لما بتنزل لازم تأمن ان الغرفه مقفوله كويس .. بصراحه بدات اطنش واكبر دماغي لاني كلمت أمي يومها قالتلي ما تحطيش عقلك بعقلها ودي ست كبيرة جدا فالسن وحافظي على بيتك عامليها كعيل صغير

بصراحه سمعت كلام أمي وانا بثق فيها وخليتها تدعيلي .. وبعد اسبوع تقريبا بدات اسمع صوت التخبيط بيزيد

احنا السرير في اوضه نومي لازق في الحيطه الفاصله مابين غرفتي وبين غرفة حماتي .. وانا بنام ناحيه الحيطه لدرجه في يوم حطيت ودني عالحيطه سمعت صوت التخبيط

وخايفه اسئل احمد ايه صوت التخبيط ده يتنرفز عليا زي المرة اللي فاتت .. لحد ما في يوم وانا بجيب طلبات للبيت وكنت بكلم ماما في التليفون لقيت البواب بيقولي أزيك يا استاذه عامله ايه ؟

قولتله انا كويسه ياعم صابر .. قالي واخبار الاستاذ احمد ايه ؟ قولتله تمام ياعم صابر

قولتله الله يسلمك ..قالي ابقى سلميلي على الاستاذة .. قولتله الله يسلمك..قالي بقى لها فتره مش بتاجي هنا والله كانت ست كمل ومحترمه

سيبته وطلعت وانا بكلم ماما وقعدت افكر البواب كان بيقول ايه تاني يوم نزلت اشتري حاجات وسالته قالي لا اتخلبطت مابين عمارتك وعمارة الاستاذ سعيد في الرابع

نمت يومها وصوت التخبيط بيزيد في الحيطه جنبي وموترني والصوت عمال يزيد عمال يقرب عمال يقرب .. وكان احمد يومها نايم في غرفه حماتي والموضوع ده برده بدا يتكرر كتير ومضايقني لحد مالقيت حاجه غريبة جدا لما الصوت وقف

قومت من السرير بسرعه وولعت نور الغرفه ومسحت عيني مش مصدقه اللي انا شايفاه قدامي لقيت ..

------------------------------------------------------------------------------------------------

لقيت صوباع طالع من الحيطه بعدها دخل ولقيت حاجه زي مفتاح عمال يحفر بيه عشان يوسع الفتحة كل ده شيفاه وانا مسبهله ومخضوضه وبعدها لقيت الفتحه وسعت وراحت الايد راميه مفتاح قلبي كان بيدق جامد ساعتها مش عارفه ايه ده ؟!!

قربت من المفتاح اللي وقع على سريري وخدته وقومت بكشاف الموبايل منوره جوه الفتحه دي لقيت حاجه بتتحرك جوه لحد ما شوفت منظر خلاني صرخت جامد ورميت المخدة مكان الفتحة ولقيت احمد جوزي طالع من غرفة حماتي بسرعه وجالي قالي في ايه ؟!!

بصلي لقى وشي احمر وبتنفس جامد .. جه قالي مالك ؟! قعدت افكر شويه قبل ما اتكلم واحكيله قولتله انا شوفت كابوس .. قعد يطبطب عليا وجابلي كوبايه مياه وقالي معلش انا مضطر اروح لامي اقعد معاها النهارده قولتله ماشي بعدها سبني ودخل تاني

وانا قاعده على طرف السرير خايفه اشيل المخدة واشوف الست اللي شوفتها جوه كان منظرها مرعب وشها متبهدل ومتجرح وشعرها منكوش وحالتها تصعب على الكافر وتحت عينيها سواد رهيب .. انا لسه مش مستوعبه ايه ده اللي موجود في بيتي .. ومين الست المرعبه اللي قاعده في غرفة حماتي دي وازاي احمد بيدخل الغرفه وفي واحده تانيه ؟!

وازاي اصلا واحده عايشه معانا في شقتي معرفش هي مين ؟ فضلت طول الليل نايمه بعيد عن الحيطه ونايمه في الطرف اللي اقدر منه انزل من السرير بسرعه فضلت كده لحد الصبح ونمت .. صحيت تاني يوم حماتي بتصحيني بغشوميه وبتقولي اصحي بقى بقينا في الضهر .... عشان تلحقي تعملي غدا قبل ما احمد يرجع

قومت بسرعه وانا دماغي مصدعه وما نمتش كويس وحاسه اني مرهقه ذهنيا وجسديا عملت غدا بسرعه وحماتي كانت قاعده في الصاله وجريت على اوضتي وانا مقرره اعرف في ايه ؟ قفلت باب الاوضه بتاعتي بالمفتاح وبعدها طلعت عالسرير سمعت صوت خروشه قلبي اتقبض تاني لحد ما جمدت قلبي وشيلت المخده

لقيت الست دي ماسكه مفتاح تاني بتوسع بيه الفتحة .. بصيتلها وقولتلها انتي مين ؟ فضلت بصالي شويه وبعدها دمعة نزلت من عينها وقالتلي انا لبنى مرات احمد الاولى ؟!

قولتلها مراته ازاي وقاعده بتعملي ايه في اوضه حماتي ؟ قالتلي انا محبوسه ومش عارفه اهرب بقى لي أربع شهور .. قولتلها هما حابسينك هنا ليه اصلا .. قالتلي عشان كنت عايزة اتطلق بعد ما عرفت ان ..... سمعت صوت باب الشقه بيقفل عرفت ان احمد جه قومت مغطيه الفتحه بالمخدات وعملت نفسي نايمه

دخل عليا احمد قالي انتي لسه نايمه ولا ايه ؟ قولتله لا صحيت من بدري وعملت غدا بس حاسه اني تعبانه شويه من امبارح .. ماردش ودخل الحمام واتغدينا واحمد نام معايه اليوم ده وكان بيحاول يقرب مني وانا ببعد لحد ما راح في النوم وانا عماله افكر في الجنان اللي عمال يحصل من امبارح ومستنيه بكره بفارغ الصبر

تاني يوم صحيت واحمد بيلبس ونازل اول ما نزل طلعت الصاله لقيت حماتي قاعده عملت الفطار وفطرنا وحماتي نزلت بعد ما قفلت باب الغرفه .. انتهزت الفرصه ورجعت على الاوضه وشيلت المخدات مالقتهاش فضلت انده يالبني لحد ما لقيتها ظهرت من تحت كانت نايمه على الارض تقريبا برغم اننا الصبح بس المكان عندها ضلمة كحل

قالتلي انا نفسي اشم هوا نضيف فتحت الشباك وجيبت المروحه على الفتحه عشان تدخلها هوا لقيتها مبسوطه وقالتلي بقولك ايه ما تيجي تقعدي معايه .. قولتلها هما حبسوكي ليه الاول قالتلي تعالي اقعدي معايه .. قولتلها حماتي قافله الباب بالمفتاح قالتلي المفتاح اللي ادتهولك امبارح ده مفتاح الغرفه

قلبي هنا اتنفض معرفش ليه وجسمي كله نمل كنت سامعه صوت دقات قلبي .. المفتاح فين انا شيلته في الدرج عندي دورت عليه وجبته .. وبعدها قولتلها ادخلك دلوقتي .. قالتلي تعالي .. انا كنت خايفه جدا وخصوصا ان حماتي ترجع في اي وقت هي ساعات بتطول بره بالساعات وساعات ترجع على طول

قولت خلاص انا هأمن نفسي واقفل الترباس واهي لو سالت قفلتيه ليه هقولها كنت بنضف وخوفت تخشي تتزحلقي فقفلته عشان اعرف لما تيجي وانبهك ان الارضيه مبلوله وقومت جايبه مياه بصبون ورمياها على ارضيه الصاله والطرقه وجبت المساحه عشان عندنا الارض سيراميك وقومت قافله الترباس

مسكت المفتاح وقلبي بيدق وقفت قدام غرفتها .. وقومت مدخله المفتاح وبلف لقيته بيفتح فعلا فتحت وحطيت ايدي على الاكره وهي بترتعش بعدها افتكرت اجيب الموبايل بتاعي روحت جيبته ورجعت وقومت فاتحه الاكره وانا حاسه ببروده الحديد بتجري في اطراف صوابعي من الخوف

دخلت شميت ريحة قذره جدا ولعت النور .. لقيت اقذر منظر ممكن تشوفوا في حياتك .. لقيت كميه عضم متعلقه في اكياس قماش ورسومات كتير وارقام على الحيطان واكتشفت ان غرفتها كبيره وفيها سرير يشيل اتنين بالعافيه ..وكميه عضم متعلقه وفي تلاجه صغيره روحتلها بفتحها لقيت اكياس فيها دم قومت قافلها بسرعه عضم في كل حته وفي فحم وسكاكين وكتب كتير ورقها اصفر ومتخيطه .. وخرز واحجار غريبه والحيطان بقت بني على اصفر من القذاره قلبي مقبوض بشكل غير طبيعي والشباك مقفول وعليه ورق كرتون قديم عشان يمنع نور الشمس تخش

ولقيت في الحيطه اللي لازقه في غرفتي حاجه مش دولاب لقيت في ثلاث غرف حديد جنب بعض حاجه مريبه كل باب منهم من جوه مساحته تقريبا متر في متر .. روحت على اخر باب جنب الحيطه بتاعتي قولت اكيد لبنى هنا .. قولتلها لبنى انتي هنا قالتلي ايوه الباب ده ما بيفتحش من جوه بيفتح من بره بس لسه هحط ايدي عالاكره

لقيتها بتقولي يلا بسرعه افتحيلي ..عايزة اخرج قلبي خاف اكتر هي محبوسه وانا لو فتحتلها ممكن .. فجأة لقيت الجرس بيرن والباب بيخبط جامد لقيت جسمي بينتفض جريت وقفلت النور وبعدها قفلت الباب مش فاكره قافله تكه واحده ولا تكتين تقريبا كانو اتنين وبعدها جريت وشمرت هدومي وقومت فتاحه الترباس وخدت المساحه ومدتلها ايدي وقولتلها هاتي ايدك عشان ما تتزحلقيش

مسكت ايدي وباين عليا اني متوترة وبترعش قالتلي انتي قافله الترباس ليه قولتلها عشان خوفت تتزحلقي لما ترجعي فقولت اقفله عشان ترني الجرس واجي انبهك .. قالتلي ماشي دخلت المطبخ تشرب ميه عشان راجع الظهر في الحر وانا ماشيه في الطرقه وبمسح لقيت المفتاح اللي لبنى ادتهولي انا نسيته في الباب بتاع غرفه حماتي قلبي كان هيقف جريت بسرعه و خدت المفتاح في ايدي وبصيت لقيت حماتي لسه طالعه من المطبخ

دخلت اوضتي وشيلت المفتاح في الدرج لقيت فتحه الحيطه مكشوفه رميت المخدات عليها انا مش هعمل كده تاني انا حاسه اني بخاطر بحاجه كبيره جدا .. حماتي قعدت في الصاله وانا كملت تنضيف ومسح ومشفت الارضيه

وبعدها دخلت غرفتي وقفلتها بالمفتاح وكلمت لبنى قالتلي مافتحتليش ليه حرام عليكي قولتلها حماتي رجعت فجأة كان لازم اخرج بسرعه .. قولتلها حبسوكي ليه قالتلي عشان في يوم حماتي نسيت مفتاح غرفتها وانا دخلتها ورجعت لقتني في غرفتها .. عيني برقت وفضلت اعيط لاول مره من الخوف قالتلي الست دي بتعمل اعمال سوحر اسود ومطلوبه في المحكمه وهي ضاربه بطاقه وعايشه بعيد عن الناس بقى لها كتير

انا عرفت كل ده لما قلبت في الورق بتاعها وقولتلها احمد لما بيبات عندك في الغرفه بيعمل ايه ؟

لقيت باب الغرفه بتاعتي حد بيحاول يفتحه قولت ثواني بغير لقيت احمد بيقولي افتحي .. غطيت الفتحه وجريت فتحت الباب احمد اول ما بص في وشي قالي مالك ؟ وترني اكتر قولتله مافيش حاجه قالي بقى لك يومين وشك متغير ومش على بعضك مالك ؟

قولتله مافيش حاسه اني تعبانه .. شوية قالي اوديكي لدكتور تكشفي قولتله لا دا ارهاق من شغل البيت بس قالي معلش وارتاحي وبعدها سالني الغدا ايه ولا كان في حاجه اتغدينا وانا عماله افكر اني اهرب من الشقه دي ..

بس مش هينفع امشي قبل ما اعرف الحكايه ايه من لبنى .. تاني يوم كلمت لبنى قولتلها ردي عليا بسرعه قالتلي مش هقولك بيعمل ايه غير لما تفتحيلي الباب قولتلها مش هينفع غير لما تحكيلي كل حاجه عشان اثق فيكي قالتلي وانا مش هحكي قولتلها براحتك

وعدى يوم واتنين من غير ما اكلمها وببقى نايمه ساده الفتحه بالمخدات جنبي ومرعوبه في نفس الوقت بس مع الايام لقيتها بتنده عليا واحمد في الشغل فكلمتها قولتلها عايزة ايه ؟ قالتلي حرام عليكي عايزة ابص عالشارع من البلكونه اكل اكله نضيفه اشرب حاجه ؟ جهزيلي طيب اي اكل ودخلهولي الاوضه بلاش اخرج منها نفسي اكل

بصراحه فكرت قولت خلاص هعملها اكل ولما حماتي تنزل هدخلهولها قولتلها بقولك ايه هديكي كميه صغيره تاكليها بسرعه قبل ما حماتي تشوف الاكل معاكي قالتلي ماشي .. وفعلا بقيت اجهز الغدا بدري كل يوم تحسبا ان حماتي تنزل في اي وقت لحد ما في يوم نزلت ماكنش ينفع اقفل الترباس ساعتها

لانها هتشك فنزلت جري للبواب وقولتله لما تشوف حماتي داخله العماره رنلي على رقمي وادتهوله ... قالي ليه قولتله عاملالها مفاجئه بس اوعى تقولها او تقول لاحمد قالي ماشي واديته 200 جنيه فرح بيها قوي وطلعت جري فوق وقفلت الباب وخدت موبايلي وجبت الاكل ودخلتلها الاوضه

حطيت الاكل على الارض وسمعت لبنى بتقولي افتحي يلا .. لسه بحط ايدي على الاكره سمعت صوت خبطه عاليه اوي من الباب اللي جنبها .. فرجعت لورى اربع خطوات بسرعه لقيت الباب بيخبط تاني جامد وسمعت صوت لغوشه من جوه ولبنى بدات تعلي صوتها وتقولي افتحي .. والباب بيرزع اللي جنبها وهي تصرخ وتقولي افتحي بسرعه

روحت شايله الاكل من على الارض وطلعت وقفلت باب الغرفه ورجعت الاكل مكانه وجريت على غرفتي وحطيت المخدات عالفتحه .. وطلعت قعدت في الصاله لقيت باب الشقه بيفتح لقيتها حماتي بصيت على موبايلي البواب مارنش عليا وهي رجعت استغربت جدا .. دخلت الحمام بعدها دخلت غرفتها ولقيت بعدها البواب بيرن عليا بيقولي معلش ياست الكل شوفتها والموبايل كان فاصل شحن حطيته في الشحن وكلمتك قومت قافله السكه في وشه

يعني لو ماكنتش طلعت وفضلت معاها كان زماني دلوقتي مش عارفه كان ممكن يحصل ايه فيا عدى اليوم ده وانا قاعده طول اليوم في الصاله مع حماتي وهي مستغربه لحد رجع احمد وبليل احمد بات عند حماتي وانا نايمه على السرير لقيت المخدات بتتهز عرفت ان لبنى بتحركها بصوباعها شيلت المخدات قالتلي انا هقولك احمد بيبات هنا يعمل ايه

قولتلها وطي صوتك دا عندك جوة قالتلي هوا بيساعدها في دبح الاعمال الكبيرة والغرف اللي جنبي دي كلها حيوانات وانا شايلني لعمل ويهدبحوني .. بعدها سكتت وسمعت صوت باب غرفه حماتي بيفتح قفلت الفتحه وعملت نايمه واحمد بات معايه تاني يوم احمد نزل الشغل وحماتي كانت في الصاله كالعاده ساعتها انا قررت اني لازم اهرب ومارجعش تاني دخلت خدت دش ودخلت غرفتي اغير هدومي وقبل ما انزل قولت اعرف لبنى ما تتكلمش معايه عشان هبقى مش هنا فتفضح نفسها ...

شيلت المخدات وقولتلها لبنى انا نازله وهرجع متاخر ما تكلمنيش غير لما اندهلك لقيت حماتي اللي بترد عليا من الفتحه بتقولي حاضر ما تتاخريش .. نطيت من السرير وشعر راسي وقف من الخضه وبعدها جريت على باب اوضتي فتحت الباب لقيت حماتي واقفالي بالسكينة

قالتلي انتي مش هتروحي في حتى ارجعي اوضتك رجعت الاوضه وقالتلي هاتي موبايلك رفضت لقيتها بتزعق وانا اترعبت رغم انها ست كبيرة لكن جسمها كبير وعفيه .. ادتلها الموبايل وقامت سحباني من دراعي وفتحت الغرفه اللي فيها لبنى لقيتها فاضيه ... وراحت رمياني فيها وقافله الباب لقيت النور اللي كان داخل من فتحة غرفتي بصيت منه

فجأة حسيت باحساس لبنى وهي محبوسه ... انا هعيش طول عمري في الضلمه دي .. طب ولبنى راحت فين ؟؟

اكيد قتلوها طب هما عرفوا منين ؟ البواب قال لحماتي ولا العفاريت بلغتها ؟ ولا شافت الفتحة اللي عند لبنى ؟ انا مفتاح غرفة حماتي في جيبي الارض من تحتي رمل وحاسه اني في مكان مكتوف في فتحه في الحيطه فوق بدخل هوا من الشارع اخر طوبه مش محطوطه العماره شكلها قديم جدا بس هما اللي داهنين الشقه من جوه فباينه جديدة

بعد شويه لقيت حماتي بتبصلي من الفتحة وقامت حاطه ايدها في الفتحة بمونه اسمنت ورمل وبتقفل الفتحة هنا انا اتجننت وفضلت اخبط وارزع وانا بخبط اكتشفت الغرفه حيطه الغرفه الحديد اللي جنبي فيها فتحه حماتي دخلتلي منها اكل في كيس وميه في كيس

انا هتجنن بقى لي 3 ساعات جوه وعماله يغمى عليا من ضيق التنفس .. انا اللي عملت في نفسي كده كان لازم اهرب لما جتلي الفرصه من بدري فضولي خلاني اقعد برغم كل اللي انا شايفاه ده .. يارتني هربت لبنى وهربنا سوى انا وهي

يارتني كنت اتصرفت اسرع من كده .. يومها بليل سمعت صوت احمد بيكلمها وانا بنده عليه الغرفه متقفله وصوتي واصل بالعافيه .. الغريب اني سمعتها بتقوله عايزة اشوفلك عروسه جديده وهوا بيختار معاها ؟

انا مش مصدقه بجد هوا عادي كده اختفي وفي نفس اليوم يشوف عروسه جديده .. افتكرت ساعتها والدي وقد ايه هوا واحشني لانه متوفي من فتره وافتكرت والدتي اللي كان لازم ابلغها بكل ده من بدري وفعدت افكر قد ايه انا غبيه بجد اني ما اتصرفتش بسرعه

فضلت انده على احمد مافيش رد ..انا مش عارفه انا سامعاه بره وهوا مش سامعني ليه ؟ فضلت على الحال ده فترة كبيرة ..كبيرة اوي وحماتي الاكياس اللي بتدخلي فيها الاكل بدون ذكر تفاصيل برجعهلها تاني

عايشه وبتمنى الموت مش عارفه عدى قد ايه عليا وانا مختفيه ايام او يمكن اسبوع او اسابيع او شهر او شهور

مابقتش بعد بقيت قاعدة اقصى طموحي انام وجسمي مفرود مش متكوره زي الجنين في الارض .. نفسي اشوف نور الشمس من مكان غير اخر طوبه في السقف عايزة نور الشمس يلمسني

بعد فتره مش حسباها سمعت صوت من الحيطه اللي جنبي واحده بتهز وتضحك مع احمد.. مابقتش مصدقه بقيت امشي ايدي على الحيطه لحد ما مسكت مكان خشن اكيد ده فرق المونه عن الحيطه فضلت اكحت فيه بمفتاح غرفه حماتي اللي كان معايه من ساعتها اكحت فيه كل يوم كل يوم كتير اوي

لحد ما اخيرا وصلني النور ولقيت بنت جميله نايمه ندهت عليها بصيتلي وصرخت وطلعت تجري في الصاله وبعد شويه رجعت وقالتلي انتي مين قولتلها انا سلمى مرات احمد .. اتخضت ومشيت معاها زي ما لبنى عملت معايه بالظبط واديتها المفتاح وقعدنا كذا يوم نتملم وقولتلها نفسي في اكله حلوه وحددتها من غير ما ازن عليها انها تفتحلي عشان ما تخافش زي ما لبنى خوفتني من اصرارها انها تفتحلي

قالتلي ماشي وقولتلها على خطه بمسح الشقه دي وسمعتها بتمشي لحد ما وصلت ورى الباب وندهت عليا كانت احسن ممره في حياتي اسمع فيها اسمي وهي بتقولي سلمى انتي ورى الباب ده قولتلها اه جبتيلي الاكل

قالتلي ايوه ثواني فتحت الباب لقيت النور داخل في عيني كنت هطير من الفرح قومت وانا عضمي كان مكسر تقريبا ومش عارفه امشي لقيتها بتقولي انتي رايحه فين قولتلها تعالي معايه مسكت ايدي قالتلي انتي رايحه فين تعالي مش هتاكلي قولتلها مش عايزة اكل تعالي نهرب قالتلي مش هينفع

قولتلها لو ما طلعتيش معايه دلوقتي هتعيشي بقية عمرك في الصندوق ده وهتتمني انك هربتي معايه دلوقتي انا الموضوع ده حصل معايه قالتلي انا خايفه قولتلها ما تخافيش وسحبتها من ايدها وكل قوتي بحاول امشي وصلت لباب الشقه لسه بفتح لقيت الجرس بيرن لقيت البنت اتوترت وبتعيط وبتقولي ارجعي بسرعه قولتلها مش هرجع

روحت المطبخ جيبت بخاخ معطر الجو وولاعه وقولتلها افتحي الباب قالتلي هتعملي ايه قولتلها افتحيه اول ما فتحت الباب لقيت حماتي في وشي شافتني صعقت قومت مولعه الولاعه ورشيت البخاخ نار في وشها وجسمها فضلت تحاول تطفي هدومها وتصرخ بكل قوتها لحد ما وقعت من سور السلم بصيت عليها من فوق لقيتها ميته ومغرقه الارض دم والنار لسه ماسكه فيها

لقيت البنت بتبصلي ومرعوبه لقيت اهل العماره طالعين على صوت صريخ حماتي وصوت وقوعها واتلمو عليا ودخلتهم الشقه معايه والناس والبواب افتكروني وورتهم الاوضه بتاعة حماتي وشكلها عامل ازاي ؟

وانها بتعذب الناس ازاي ؟ وببص اخيرا على غرفتي وهي مفتوحه في النور اللي كنت محبوسه فيها لقيت الحيطه بتاعتها مليانه طلاسم الظاهر هي دي اللي بتمنع صوتي يطلع بره الغرفه

ساعتها البوليس جه واتصلت بامي اللي شافتني وقالتلي كانوا قالولنا انك هربتي ومارجعتيش وعدى تقريبا شهر عشان المحضر وكل حاجه تتقفل وتخلص وطلعت منها بكل سهولة

الغريب ان احمد ما ظهرش كل ده وفضلوا يدوروا عليه في كل حته مش لاقيينه .. الموضوع ده بدا يلعب في دماغي بعد ما الحكايه خلصت بثلاث شهور .. ساعتها قررت ارجع بيت حماتي الي كانت الشرطه قافلاه من ساعتها

روحت البيت على الساعه 7 بليل كده .. دخلت البيت والمفتاح القديم كان شغال لقيت الشقه متربه ومتبهدله .. روحت على غرفة حماتي واكتشفت ان عمري ما فتحت الغرفتين التانين .. قومت فتحت باب الغرفه التانيه لقيتها مليانه عضم متحلل ومليان دود قفلتها بسرعه .. حطيت ايدي على اكره الغرفة الثالثه وفضلت شوية

قلبي كان بيدق لحد ما فتحت الباب لقيت غرفه نضيفه فيها رم بس ولقيت حاجه بتلمع على الارض لقيت نسخة من خاتم الجواز بتاعي انا واحمد بقلب في الرمل لقيت اكتر من خاتم قلبي بيدق وانا بقلب لحد ما ايدي جت على حاجه ناشفه مسكتها وطلعتها لقيتها كتاب اصفر

حطيته في شنطتي ونزلت بتسحب بسرعه روحت فتحته لقيت مذكرات حماتي .. كاتبه فيها كل حاجه تخص السحر والتعاويذ وكاتبه مأساتها اللي كانت بتعانيها من العيشة وحيده بعد موت احمد ابنها .. هنا بجد قلبي وقف تقريبا .. وانه لما مات قررت تحضر جن في روح احمد عشان يحركه ويعيش معاها والجن ده عشان يتغذى لازم روح بتضحي بيها كل اربع شهور يعني ثلاثه في السنه

والا احمد مش هيتحرك تاني ويعيش معاها هي كاتبه حاجات كتير عن احمد ابنها اللي مات من قهرته على بنت كان بيحبها وهي غدرت بيه ومارضتش تتجوزه بدات الحكايه بانها ترجع احمد بالجن ويخطف البنت دي عشان تحبسها وتعذبها وتاخد روحها قربان للجن

انا بقرأ الكلام ده وانا مش مصدقه اني كنت بتعامل مع جني مش مع انسان وان حماتي بتعذب كل البنات عشان تنتقم لروح ابنها اللي اكيد باللي عملته ده هوا ماكنش هيقبل بيه ولا البنات التانيه ليهم ذنب

خدت الكتاب وحطيته عندي عشان اتخلص منه بس بعد كده قررت احتفظ بيه وارجع شغلي اللي سيبته من ساعة ما اتجوزت وارجع امارس حياتي عادي واخرج مع صحباتي وماما مصممه تشوفلي عريس جديد واني لازم اعيش حياتي وانسى اللي فات وهي عندها حق طبعا بس انا كرهت كل حاجه انا عايزة اعيش حياتي بس مع امي حتى لو لوحدنا

بس انا ساعة ما اتجوزت كانت امي خايفه اني اعنس وعايزاني انسى مأساة موت والدي اللي كان اقرب حد ليا لو معايه والدي عايش معانا انا ماكنتش اتجوزت يمكن دا التشابه الوحيد بيني وبين احمد ان والدنا متوفي

بس في يوم من كتر ماحاسه اني هتجنن من التفكير ومن كتر ما والدي واحشني طلعت الكتاب من الدرج وشوفت فيه التعويذه اللي حماتي جابت بيها روح احمد تعيش معاها عشان استحضر بيها روح والدي وجهزت كل حاجه وكان فاضلي روح القربان اللي هقدمه للجن اللي بيشترط فيها انه يكون انسان وهنا وقفت وفضلت اافكر

تمت ... النهاية

رايكم يهمني