 |
قصة وردتي
الفصل الاول
بابتي
لف وهو طالع السلم وبصلها وابتسم - صباح الفل يا وردتي
- زعلانه منك كتيير
- ليه بس كده
بحزن- مين اخدك مني يا سي حمزة ومبقتش بلمحك حتي لدرجادي نسيت بنوتك
- هو انا اقدر بس مشغول شويه حقك عليا
- لا بردو زعلانه ومخصماك كمان
ابتسم ونزل السلمتين اللي طلعهم وشد راسي وباسها - حقك عليا يا ست البنات انا عارف اني قصرت معاكي بس معلش نعوضها اجهزي ونخرج
بفرحة - ايووه كده احلي بابتي ده ولا ايه
" انا ورد في رابعه جامعه من يوم ما فتحت عيوني علي الدنيا وانا مش شايفه غير حمزة ابن عمي كان ليا كل حاجه اخ وصاحب واب كمان بسب وفاة بابا وانا طفله وانه وصاه عليا لانه اكبر مني ب ١٢سنه وفعلا اتعلقت بيه لدرجة انه بقوله يا بابا بس زي ما اتعلقت بيه كده اتعلقت بيه كحبيب ايوه انا حبيت حمزة حبيت حنيته اللي طول عمره مغرقني بيها وخوفه عليا حبيت احساسي بالامان معاه واللي لو عشت عمر فوق عمري مش هلاقيه مع غيره حبيت غيرته عليا من الهوا حبيت احتوائه ليا حتي وقت الخناق وده الشخص الوحيد اللي اتمني عمري كله ابقي جمبه "
لبست وفضلت مستنيه حمزة ينزل
" انا حمزة مهندس مدني بحب او بعشق ايهما اقرب بعشق ورد بعشق ضحكتها اللي بتاخد قلبي في كل مره بشوفها بعشق عيونها اللي لون البحر تغرقك جواهم بعشق برائتها اللي بتسرقك بعشق كل تفاصيلها بس للاسف مش هينفع فرق السن اللي بينا مانعني اني اقولها وهيفضل هو الحاجز اللي بينا للاسف ورد شايفاني كأب ليها بتستخبي فيه عمري ما حسيت انها ممكن تشوفني غير كده دي يدوبك من كام شهر كانت بتقولي يا ابيه وشويه يا بابا لان انا اللي مربيها من وهي عندها ٦سنين وكنت ساعتها في اولي جامعه فافعلا مستحيل تشوفني غير كده وبدئت اهو ابعد خطوة خطوة مش قادر اعلق قلبي اكتر من كده وانا عارف ان هيجي اليوم اللي واحد تاني هياخدها مني "
نزلها - ها يلا
نطت اتشعلقت في ايده - يلا طبعا
راحو في كافيه هادي وبصاله ومبتسمه - تعرف انت وحشتني قد كدهو
ضحك - يا بكاشه
- مش مصدقني يا موزي
ضحك - يا بت اتلمي ايه موزي دي بلعب معاكي انا احترميني شويه دانا زي ابوكي
- ابويا ايه يا عم انت صدقت متحسسنيش انك عندك ٦٠سنه كده
- دانا لو مربي كلب هيحترمني اكتر من كده وكان زمانه طمر فيه التربيه عنك
ضحكت - يا شيخه تربيه سودا اللي معايرني بيها دي طول عمري
ضحك وشويه وجت بنت عليهم * حمزه أيه الصدفه الحلوة دي
ابتسم - ازيك يا كارولين عامله ايه
* تمام ايه فينك يابني مبتجيش ليه موحشتكش
- لا طبعا وحشاني
ورد بصاله اللي هو كمل كمل دانت ليلتك بلاااك
* مين دي اوعي تكون اتجوزت ودي مراتك
ورد لقت نفسها بترد عليها - ايوه فعلا اتجوز عقبالك بقي وكده
* الف مبروك ربنا يسعدكم
ورد بابتسامه صفرا - ميرسي
مشيت البنت ومسكت ورد السكينه وقربتها من وشه - مين الحربايه وجه البرص دي وعايزة منك ايه وتعرفها منين
ضحك - اهدي يا امي ونزلي السكينه
- انطق بدل مادخلها من زورك اطلعها من بطنك
- واحده كانت معايا في الشركة اللي شغال فيها
- اه وايه العشم اللي واخدها ده
ضحك - اصلها بعيد عنك كانت معجبه
سكتت شويه - طب وانت ؟
- امممم غيرانه ؟
- لا وهغير ليه انا خايفه بس تاخدك مننا مش اكتر خايفه ارجع لوحدي خايفه اتيتم منك انت كمان
اتنهد - متخافيش حتي لو عمري ما هسيبك
سكتو وفضلت ورد تفكر هل بجد ممكن يجيي اليوم اللي واحده تاخده منها ويبعد
- ورد هو انا بالنسبالك ايه ؟
- ها .. ا ا انت حاجات كتير صاحبي واخويا و بابا ا ا انت حمزه 💙
سكت وفضل يفكر واتأكد ان تفكيره صح وان ورد مش شايفاه غير اخ كبير واب
عدا اليوم وعدت ايام مبنتقابلش فيها غير كل فين وفين وكان عندي فرح لازم احضره وطبعا رد ماما المعتاد قولي لحمزه لان سيادته ولي امري في كل حاجه
طلعت علي شقة عمي وفتحتلي مرات عمي وقالتلي انه في البلكونه دخلت بهدوء وحطيت ايدي علي عيونه ابتسم من غير ما يشوفني وشد ايدي وباس كف ايدي من جوا 💛ومش هقدر اوصفلكم الحركة دي عملت ايه فيا وفي قلبي ووشي بقي الوان من كتر الكسوف بس حقيقي بياخد قلبي بكل حركة بيعملها معايا
بتوتر وكسوف - ع ع عرفتني ازاي
ابتسم وهو بيكمل شغل علي اللاب - انا اعرفك من وسط الف يا وردتي
اتكسفت اكتر بكتييير وهو ضحك علي منظري وقال- ها بقي مش هتقوليلي طالعه ليه
- خدمة صغنونه قد كدهو
- مش مستريحلك
ضحكت - اممم عندي فرح واحده صحبتي ولازم اروحه
من غير ما يبصلي اصلا وهو باصص في اللاب - لا
اتعصبت - ليه لا وبعدين سيب الزفت ده وبصلي بدل ماحرق قلبك عليه دلوقتي وانت عارف مجنونه واعملها
قفل اللاب وبصلي بصة رعبتني كده - صوتك يوطي وانتي بتتكلمي معايا انتي سامعه
بصيت في الارض وأنا مخنوقه - اسفه
- ثانيا ايه عايزه تروحى وترجعيلنا زي كل مره بخناقة ومحضر تحرش
- ابدا والله والله هحاول اروح وارجع في سلام
- اممم
ببرأة الاطفال - عشان خاطري يا بابتي
- هاجي معاكي وهى ساعة زمن ونرجع
بفرحة - بجد انت احلي حمزة في الدنيا
- بس اللي اوله شرط اخره نور يا روحي يعني مثلا لبستي حاجه كده ولا كده هجبهالك نصين وانتي لابساها لمحت بس نقطة ميك اب علي وشك هخلي وشك شوارع ويبقي قابليني لو في دكتور في مصر عرف يخيطهولك تاني امين
- يالهوي ده اسلوب كلام بشمهندس قد الدنيا يععع سرسجي اوي
- بتقولي حاجه سيادتك
ضحكت - بقول سرسجي بس قمر يبشه 😂
ضحك - ٧ونص تكوني جاهزة
ضحكت- حمااامه
"انا كحمزه حقيقي مبقدرش ارفضلها طلب لأجل اشوف الضحكه اللي بتنور ملامحها ولمعة عيونها من الفرحة حقيقي لو عشت عمر فوق عمري اوصف في جمال ملامحها وهي مبسوطه عمري ما هقدر اوفيها حقها من الكلام حقيقي ابسط تفاصيلها ملفتة وبتاخد قلبي احنا اب وبنته واللي بينا اكبر من انكم تفهموه 💜💜"
نزلت اجري وانا فرحانه وبشوف هلبس ايه وطلعت فستان قريب لقلبي باللون البيبي بلو ولبست عليه تربون نفس اللون وحطيت ميك اب هادي محلي ملامحي حقيقي كان شكلي سندريلا جدا 💙
خرجتله وكان واقف فضل باصصلي شويه وبعدين شاورلي اني اقرب
بخوف - اني اسف
- الكام شعرايه اللي برا دول بيعملو ايه بيشمو هوا
- اصل التربون بيتلبس كده
- هتدخليهم بما يرضي الله ولا ادخلهم بما لا يرضي الله
- يوووه
- والهباب اللي في وشك مش نبهت انه ميتحطش
- يا حمزة ده فرح وبعدين ده هادي جدا
- انتي ست البنات من غير ما تضربي فرشه واحده في وشك
بفرحة - بجد ...طب كده وحشه
ابتسم - جدا ...اممم انتي كده سيندريلا قلبي 💙
اتكسفت جدا ووشي جاب الوان من كلامه وتصرفاته اللي بتاخد قلبي دي - طب عشان خاطري عديها المرادي ويلا نمشي
مسكت في ايده ونزلو وقبل ما يدخلو القاعه قال - وسطك الحلو ده هيتهز هزة هقطمهولك عينك القمر دي بصت علي حد او حد بص عليكي هعميه وهحولك و لو فكرتي تتحركي من جمبي طول الفرح همسح بيكي بلاط القاعه اللهم بلغت
ضحكت- عنيف اوي
" كنت عايزه اقوله فالوقت ده اسيبك ايه ياهبل ده انا بستني الوقت اللي بقضيه معاك عشان اشبع من ملامحك واغذي روحي بحبك اللي بيجري جوايا وانت مش حاسس 💛 وبعدين عمال تهددني وانت اصلا احن انسان علي وش الارض دانت بتخاف عليا من الهوا أصلا 😂💙"
- سرحتي في ايه
- لا معاك اممم ما تيجي نرقص معاهم سلو
- اممم قومي
ضحكت بفرحة وقومت وروحنا جمب العريس و العروسه ومسك ايدي ورقصنا ودي كانت اول مره نرقص فيها سوا عن فرحتي وانا بين ايديه مثلا والضحكه مش مفارقة وشي وهو كمان كان باين علي ملامحه الفرح
وضحك وهمسلي - وكبرتي يا صغنن وبقي بيترقص معاكي بعد ما كنت بشيلك من قفاكي بايد واحده
ضحكت - شوفت الدنيا
ضحك وبعدين بصتله اوي وقولتله - انا بالنسبالك ايه او شايفني ايه
سكت شويه ورد - اممم شايفك بنوتي اللي بخاف عليها شايفك الصغنن بتاعي اللي ملوش غيري شايفك صحبتي اللي وقت خنقتي بجري عليها شايفك وردتي اللي مش من حق حد ياخدها مني 💙
ضحكت وميلت دماغي علي كتفه واحنا بنرقص وحسيت ان في امل يحس بيا
خلص الحلم ااجميل ده وروحنا ونمت علي طول بس صحيت علي حاجه مكنتش متوقعه اسمعها صوت زغاريط كتير جايه من شقة عمي
- احيه ليكون اللي في بالي لالالا اكيد اترقي بس ولا حاجه
شديت الاسدال لبسته وطلعت اجري - خير يا مرات عمي
وهي بتزغرط وعيونها مليانه فرح - عقبال ما نفرح بيكي يا ورد قراية فاتحة حمزة انهارده
يتبع
الجزء الثاني
شديت الاسدال لبسته وطلعت اجري - خير يا مرات عمي
وهي بتزغرط وعيونها مليانه فرح - عقبال ما نفرح بيكي
يا ورد قراية فاتحة حمزة انهارده
..سمعت الجمله دي ومحستش بنفسي غير وانا بفتح عيني علي سرير حمزه وهو قاعد جمبي بيفوقني ببرفانه وعمي ومراته واقفين
حمزة بخوف قالي - ورد ورد انتي سمعاني طب كويسة طيب طمنيني يا ورد
فضلت بصاله شويه وساكته وقومت براحه عشان انزل عشان معيطش قدامهم وبصوت مهزوز قولت - متقلقوش انا كويسه
عمي رد وقال - اقعدي انتي رايحه فين استني اما نشوفلك دكتور يطمنا عليكي
ابتسمت بكسرة وانا ببص لعمي - مش مستاهله يا عمو انا كويسه جدا ...بعد اذنكم ومبروك يا عريس
نزلت واول ما قفلت باب شقتهم ورايا قعدت علي اول سلمه قابلتني قعدت وعيطت بكل الكسرة إللي جوايا عيطت علي حلم عمري اللي اتبخر قدامي في يوم وليله وعلي قلبي اللي اتداس عليه برجله وعلي كسرتي من اقرب انسان ليا كسرتي اللي مفيش منها قومة 💔
نزلت شقتنا عشان محدش يشوفني بمنظري ده ماهو مش هيبقي جرح وكمان ذل نزلت وفضلت في اوضتي بعيط بكل ما فيا ياااه لدرجادي هو ممثل شاطر امبارح بس كان محسسني اني ملكت الدنيا كلها وانهارده اخد مني كل حاجه بلا استثناء حتي روحي اخدها 💔
شويه ولقيت ماما داخله - يلا عشان تروحي معانا نقرا فاتحة حمزة
الكلمة دي كفيلة تحرق قلبي وتموت كل حاجه حلوه فيا بصوت مكسور رديت - مش قادره بعد اذنك اخرجي محتاجه انام
- خلاص اما حمزة ينزل يبقي يتصرف هو معاكي
خرجت وسابتني وانا مستنيه نزوله في اي لحظة وللاسف سمعت صوت نزوله بزغاريط مرات عمي وامي وجع قلبي لا يحتمل في الوقت ده يااااه عمري ما تخيلت اني هعيش اللحظة دي وهعيش وجع قلبي ده ومن حمزه
دخل عليا اوضتي مره واحده وجابني من قفايا بهزار - هتلبسي وتيجي بما يرضي الله ولا اخدك عند الناس بالبيجامه كده بما لا يرضي الله
دموعي قدامه مقدرتش احبسها اكتر من كده وقولت بصوت مليان وجع - حمزه لو سمحت انا تعبانه ممكن تسبني
اتخض عليا وحضني - ورد مالك يا ورد
سحبت نفسي من حضنه - معلش يا حمزه سبني هنام شويه وهترجع تلاقيني تمام
- متأكده لو تعبانه بجد فكك من المشوار ده وتعالي نروح للدكتور
كان نفسي اقوله متروحش كان نفسي اقوله انت مش لغيري خليك جمبي هموت لو بعدت بس للاسف ده اختياره - لا متشكرة انا تمام روح انت عشان متتأخرش
شد راسي باسها وطبطب عليا- خلي بالك من نفسك
مشي وقعدت انا لوحدي في البلكونه وشريط عمري معاه بيجري قدام عيوني يااه لدرجادي انا كنت واهمة نفسي بحلم حلم جميل وفوقت منه علي كابوس بشع
فضلت في مكانها بتفتكر كل ضحكة ضحكوها سوا كل لحظة خوف جريت فيها علي حضنه كل لحظة جريت فيها و استخبت فيه من الدنيا وكل لحظة قالت فيها حمزة غير حمزة عمره ما هيسبني واهي انهارده قراية فاتحته🙃 غلبها النوم من كتر العياط ونامت في مكانها علي الكرسي في البلكونه.
رجعنا وقولت اطمن عليها دخلت عليها لقيتها ملاك نايم ابتسمت وقومت شايلها مدخلها علي سريرها وبلمس دماغها لقيتها سخنه جريت علي مرات عمي - مرات عمي الحقيني بكمادات بسرعه ورد سخنه جوا
جريت جابتله طبق مايه بتلج ودخلت معاه وقعدو جمبها يعملولها كمادات - غبيه يا ورد طول عمرك غبيه مش لو سمعتي كلامي وروحنا للدكتور مكنش ده حصلك
- مكنش عايزة تشغلك بقي يا حبيبي مانت عريس
- عريس ايه وزفت ايه كله الا ورد احنا هنهزر
ابتسمت - تعرف يا واد يا حمزة انا حقيقي مطمنه علي ورد طول مانت معاها وحيات ورد عندك اوعي بعد ما تخطب وتتجوز تسيبها دي غلبانه وملهاش حد غيرك من بعدي
- اسيب مين دانا اسيب روحي وعمري ومسبهاش ورد دي الحاجه الحلوه اللي في حياتي اللي بتضيع طعم التعب اللي فيها ورد الحضن الحنين بعد القسوة
- حبيبي تدوم ليها اخوها وصاحبها وسندها
- يلا روحي ريحي شويه وأنا هفضل جمبها لغايه اما السخونيه تنزل
- طيب يا حبيبي خلي بالك منها
خرجت وسابتهم وهي في عالم تاني عماله تخترف باسمه - حمزة
- جننتي حمزة يا وردتي
وبعدين مسك ايدها - انا اسف عارف انك اكيد مضايقه ان في حد هيشاركك فيا وغيرانه بس انا متأكده ان دي غيرة بنوته علي ابوها او اخوها الكبير مش أكتر بس تعرفي هقولك سر
قرب من ودانها وهي نايمة - انا عمري ما حبيت ولا هحب غيرك يابنوتي 💙 انتي ساكنة روحي قبل قلبي 💙
بعد شويه عنها - بس مش هينفع انتي عارفه فرق السن اللي بينا كام ١٢سنه يا ورد مش هستحمل اقولك وترفضي حبي عشان كبير عليكي ولا هستحمل برضو تقبلي لمجرد انك متعلقه بيا كأب واخ كبير وبعدين ترجعي تندمي فيما بعد عشان كده اختارت ابعد بالشكل ده اختارت ابعد عشان اديكي حق انك تدوري علي شريك لحياتك مناسب تختاريه انتي بكل ما فيكي بس انا واثق انها مهما دورتي عمرك ما هتلاقي حد بيحبك ربع عشقي ليكي 🙂💙
قرب اكتر من ودانها وهي نايمة - بحبك يا وردتي 💙
صحيت الصبح لقيته نايم علي الكرسي جمب السرير وماسك ايدي وببص لقيت كمادات فوق دماغي فهمت اني تعبت وكالعادة هو اللي سهر جمبي فضلت بصاله شويه بتأمل ملامحه وهو نايم وابتسمت ايوه ابتسمت وقررت اني هعافر وارجعه ليا لوحدي سحبت ايدي منه وقومت - انت يا اخ انت ي باشا
بنوم- اممم
- قوم مش فاتحينها ملجئ هنا قوم نام في بيتكم
- فكريني اما اصحي اقصلك لسانك ده
- قوم مش عيب عليك تبقي خاطب ونايم في اوضه واحده تانيه وربنا اصورك وابعتها لخطيبتك وافضحك
استغل غيرتها- خلاص انا الم هدومي واروح عند خطيبتي انام عندها ولا تقولي نايم عندي ليه ولا بتاع
- نام نامت عليك جاموسه عاميه 😂
- الله علي تربيتي يا ناس يا زين ما ربيت والله لو كلب كان اتربي عنك 😂
- يا شيخ انت هتفضل تذلني بتربيتك ليا كانت تربيه سوداااا
- اااه قلبي بنتي بتغلط فيا يا ناااس
- بس يا اوفر
ضحك - خضتيني عليكي بليل يا كلب البحر انتي
- لا متخافش يا بابا قاعده علي قلبك متخافش
ضحك وخرج وانا فضلت مكاني بحاول اتناسي عشان اعيش بضحك وابين اني عادي وقلبي بينزف من الوجع
يوم خطوبته انا اللي طلعتله بدلته بنفسي روحي كانت بتطلع مع كل زغروطه منهم مع اني كنت حالفه اني هعافر ومش هسيبه لغيري بس مش قادرة مش قادرة اروح خطوبته واشوف غيري في حضنه وقررت اني هروح فكالعادة لبس ونزل - وحيات امي يا ورد ما هنزل من غيرك
- تعبانه يا حمزة روح انت
- ورد البسي احسنلك
- يا حمزة
بجديه - ورد يلا مبكررش كلامي كتير
دخلت البس وانا حالفه لاحرق دمه لبست فستان سيلفر ضيق من فوق ومنفوش شويه من نحت وطرحه بنفس اللون واتوصيت جدا بالميك اب عشان احرق دمه
- يلا انا جاهزة
- ايه القرف اللي في خلقتك ده
- عاجبني
- غوري امسحي القرف ده بدل مامسحهولك بايدي
- وانا مش ماسحه زفت وانت ملكش حاجه عندي
محستش بنفسي غير وانا واخده السلم جري وهو بيجري ورايا زي كلب سعران شايف حتة لحمة - وحياااات امك خلااص معلش
وهو بيجري وراها - وحيات امي ما هسيبك يا ورد
وفي عز مانا بجري في الشارع وبضحك علي شكله وهو بيجري ورايا لبست في واحد طول بعرض برفع راسي لقيته مراد ابن عمتي - والنبي يا مراد خبيني منووو
شدني ورا ضهره وقال لحمزة - ايه يا حمزة احنا هنلعب بتجري وراها في الشارع
حمزة بصلي بصة وانا ورا ضهر مراد وشدني - وانت ايه اللي حشرك بيني وبينها ياريت تخليك في نفسك ومتلمسش حاجه متخصكش تاني
ضحك مراد وقاله - علي اساس تخصك انت
قرب منه اكتر - جدا واللي هيقرب منها هدفنه
وشدني ومشينا وانا مبسوطه هو بجد غار من مراد يالهوي حمزة بيغير عليا كنت عايزة اضحك باعلي صوتي من الفرحة بس خوفت من عنيه اللي بتطلع شرار من الغيرة وقولت ادلع عليه شويه وقبل ماشوف غيري بيدلع عليه وببرأه وطفولة قولتله- بابتي
مردش عليا فكنت بضحك من جوايا - طب رد عليا طب
- انتي تسكتي خالص مسمعش صوتك
- انت زعلان بجد
- بقيتي بتستخبي مني في حد تاني يا ورد لدرجادي انا بقيت ولا حاجه بالنسبالك وبتخافي مني
- انا لو هخاف من العالم كله عمري ما هخاف منك انت أماني يا حمزة انت الطف حاجه مرت علي قلبي 💙 حنية الدنيا اللي في عيونك مطمناني من زمان 💜 دانت بابتي ياولا 😂💙
ابتسم ابتسامة خطفت قلبي الحيوان اللي مش عارف يقسي عليه 😂💙
وصلنا وراح ياخد عروسته في اللحظة دي وجع الدنيا كله اتجمع في قلبي والدموع اتجمعت في عيني واول ما شوفته داخل بيها الدنيا وقفت بيا لاول مره مبقاش عارفه اجري علي حضنه واعيطله
قعدو في كوشتهم وانا قررت استجمع قوايا واسلم عليها واهو اخد حقي شويه
- مبروك يا ابيه
بصلي - ابيه ماكنا بطلنا ابيه
ضحكت كده وبصيت للعروسه - مبروك يا طنط
لقتها شهقت كده وكانت هتقوم تاكلني - ايه طنط دي يا بتاعة انتي
بصيت لحمزة ببرأه كده وطفولة عشان اغيظها - هو أنا قولت حاجه غلط لطنط يا بابتي مش هي كبيرة وهتبقي مراتك يعني لازم احترمها
حمزه كان فاهم اني بعمل كده من غيرتي وكاتم ضحكته بالعافيه- روحي العبي بعيد يا ورد دلوقتي
معرفش ليه اضايقت ساعتها اللي هو من اولها بيبعدني عنه وحيات امي لاولعك
خدت طول الخطوبه رقص مع البنات وهو يبرقلي وأنا ولا هنا ومتجاهله وجوده واما جت وقت الرقصه السلو مراد طلب مني نرقص سوا ووقفنا جمبهم ورقصنا وكل ما مراد يقولي حاجه اعمل نفسي بضحك عشان اغيظ حمزة لغايه اما قرب مني اكتر واحنا بنرقص وهمسلي - تتجوزيني 😍
تعليقات
إرسال تعليق