 |
الواحد والعشرون والثاني والعشرون 😲😲
فؤاد ينظر الي رضوي نظرة ليست ببريئة تصاحبها ابتسامه خبيثة ورضوي في دهشة من زيارته الغير متوقعة
فؤاد .. ازيك يا مدام رضوي.. اخبارك ايه دلوقتي ؟!
رضوي لا تجيب
فؤاد يقترب من رضوي ورضوي الي القط الذي يحمله ويبدوا عليها الخوف الشديد
فؤاد .. روح انت يا عاطف
عاطف متردد ولا يريد المغادرة
فؤاد .. ايه مالك يا عاطف ؟! مش سامعني ولا ايه ؟!
عاطف .. لا سامعك يا باشا .. بس بصراحة خايف اسيبك معاها لوحدك دي حالتها بقت صعبه اوي!! .. تصدق سيادتك بتقول اننا عايزين نفطرها صراصير وفيران ؟! وقامت راميه صينية الاكل ع الارض زي ما سيادتك شايف كدا !! بقي دا بالذمه يا ناس صراصير وفيران ؟!!
فؤاد .. معلش.. حالا تبقي زي الفل .. اتفضل انت بقي من غير مطرود
عاطف .. اللي تشوفه سيادتك .. ع العموم انا هستني بره جمب الباب ولو حسيت سيادتك ان الحالة هتشتغل معاها اندهلي علطول والحقنه جاهزه اهه معايا
رضوي .. لا ان شاءالله مش هنحتاجك في حاجة
وبعد ان ينصرف عاطف .. فؤاد يقوم بوضع القط علي سرير رضوي
رضوي بغضب ونبرة حادة .. شيل القط ده من هنا !!
فؤاد .. حاضر .. بس متعصبنيش نفسك
فؤاد يحمل القط مرة اخري
رضوي .. انت جاي ليه ؟!
فؤاد مندهش من السؤال .. جاي اسلم عليكي !!
رضوي .. تسلم عليا بصفتك ايه ؟! انا معرفكش ولا انت تقربلي ولا حتي جيراني ولا زميل ليا في الشغل !! يبقي جاي هنا بصفتك ايه ؟!
فؤاد .. بس احنا نعرف بعض كويس يا مدام رضوي وفيه بينا عيش وملح !!
رضوي .. احنا مفيش بينا حاجة .. واتفضل امشي من هنا حالا .. وبحذرك اهوه ملكش دعوة ببناتي خالص .. انت فاهم ؟!
فؤاد .. انتي ليه بتعامليني بالاسلوب ده ؟! مع اني همي مصلحتك دايما وبناتك معتبرهم زي بناتي واكتر !!
رضوي .. انا محصليش اللي حصلي ده غير لما ظهرت انت في حياتي ؟!! انت عايز مننا ايه انا وبناتي ؟! انت مين اصلا وطلعتلنا من انهي داهية ؟!
فؤاد .. داهية ؟!! يا ستي الله يسامحك .. ع العموم انا مقدر ظروفك وعارف ان تصرفاتك دي غصب عنك .. بس عايز اقلك علي حاجة .. لو عايزة تخفي والكابوس دا ينزاح عنك بالكامل يبقي تمضي ع العقد ده وتديني البنات
فؤاد يخرج لها العقد من حقيبته
رضوي .. ابعد الورقة دي عني انا مش هامضي علي حاجة !!
فؤاد .. ليه بس يا بنت الناس ؟! ليه دماغك ناشفة كده ؟! ليه عايزة تحرميني من البنات وتحرميهم هما كمان مني ؟! دا انا بحبهم وهما كمان بيحبوني اوي
رضوي .. انت بتتكلم زي ما تكون ابوهم ؟!
انت ليه مصر تاخد بناتي من حضني غصب عني ؟!
فؤاد .. ما انا هادفعلك مقابل متحلميش بيه ابدا !!
رضوي .. في داهيه انت وفلوسك يا اخي !! بس بناتي ميبعدوش عني لحظة واحدة !! وبعدين انت شخص ميريحش ؟! انسان غامض ومريب !!
فؤاد .. يعني دا اخر كلام عندك ؟!
رضوي .. ايوة اخر كلام عندي واديني بحذرك للمرة التانية ابعد عني انا وبناتي لأحسن وديني لأقتلك .. عارف يعني اقتلك ؟! هاقتلك واشرب من دمك كمان .. الا بناتي .. انت فاهم ؟!
فؤاد يبتسم ساخرا .. فاهم طبعا .. بس خلي العقد ده احتياطي معاكي .. جايز تغيري رأيك ولا حاجة !! وع العموم الف سلامة ومع تمنياتي بالشفاء العاجل ..
فؤاد يغادر الغرفة وينصرف .. بعدها تدخل ام نيفين قائلة
ام نيفين .. رضوي حبيبتي .. الف سلامة عليكي يا ختي .. ان شالله اللي كارهينك وحاسدينك هما اللي يقعدوا قعدتك دي
ثم تقبلها
رضوي .. ازيك يا سهير
ام نيفين .. انا بخير ياختي .. المهم انتي طمنيني علي صحتك .. مالك وشك بهتان ليه كده ؟! شكلك مش بتاكلي خالص يا عيني ؟!
ثم تلمح صينية الطعام علي الارض فتندهش
ام نيفين .. ايه ده !! اللي وقع صينية الاكل دي ع الارض ؟!
رضوي .. دا مش اكل !! دي صراصير وتعابين وفيران ؟!
ام نيفين .. فين ياختي التعابين والصراصير اللي بتقولي عليهم دول ؟!
رضوي بعصبية شديدة .. اهم قدامك ولا انتي كمان هتستعبطي زيهم ؟!
ام نيفين .. هاستعبط ليه بس ياختي .. اهدي طيب .. ربنا يشفيكي يارب
رضوي .. والحيوان التاني جاي عشان يعصبني اكتر !!
ام نيفين .. مين ده يا رضوي؟!
رضوي .. الحيوان اللي اسمه فؤاد ؟! هو انتي ماشفتهوش وهو خارج ولا ايه ؟!
ام نيفين .. لا ماشفتهوش والله !! هو كان هنا ولا ايه ؟!
رضوي .. ايوه كان هنا ولسه خارج حالا وانتي دخلتي وراه علطول ازاي بقي ماشفتهوش ؟!
ام نيفين .. صدقيني ياختي ما شفته !! انا هاكدب عليكي ليه بس ؟!
رضوي .. طيب خلاص اسكتي
ام نيفين .. حاضر .. سكت اهوه
رضوي .. بقلك ايه يا سهير
ام نيفين .. نعم يا رضوي
رضوي .. احنا مش رحنا لشيخ قبل كده تبعك وقال ان معمولي عمل واللي عاملاهولي البت نجلاء مرات محمد شاكر البقال ؟!
ام نيفين .. ايوه هو قال كده فعلا !!
رضوي .. وقال كمان ان العمل هو سبب كل اللخبطة اللي انا فيها دي ؟!
ام نيفين .. ايوه قال كده .. وقال ان العمل مدفون في مكان بعيد اوي ولازم يتجاب عشان يتفك ؟!
رضوي .. خلاص يبقي لازم اعرف مكان العمل دا فين واجيبة عشان ارتاح واخلص من العذاب اللي انا فيه ده
ام نيفين .. طب واحنا هاتعرف مكانه منين ؟! اما الشيخ نفسه معرفش يوصل لطريقة ؟!
رضوي .. ما هي دي مهمتك انتي بقي .. تتدحبلي ع البت نجلاء وتعرفي دافنه العمل فين !!
رضوي .. بس البت نجلاء بت لئيمه ومش سهله وانتي عارفاها وما اظنش انها هتقولي مكان العمل بكل بساطة يعني
رضوي .. اعملي محاولة يا سهير عشان خاطري ولو عرفتي توقعهالي في الكلام وقلتيلي العمل مدفون فين انا هاجيبلك هدية كبيرة اوي
ام نيفين .. من غير حاجة ياختي والله .. دا احنا اخوات يا رضوي واللي بينا كبير اوي .. انا هاعمل محاولة مش هاخسر حاجة جايز نعرف فين مكان العمل ده .. ينتقم منها ربنا البعيدة ويودقها من نفس الكاس اللي انتي دايقة منه ده
وفجأة يرن تليفون سهير والمتصل سلمي
ام نيفين .. دي سلمي بنتك .. الو .. ايوه يا سلمي
سلمي تصرخ هي واخواتها البنات ويستغيثون ب سهير
سلمي .. الحقيني يا طنط بسرعة ارجوكي !!
ام نيفين قلقة بشدة .. فيه يا سلمي يا حبيبتي ؟! بتصرخوا ليه يا بنات ؟!!
حدثت كارثة لم تكن متوقعة ؟؟!
توقعاتكم ايه.؟؟
الثاني والعشرون 😲😲
رضوي بقلق شديد .. فيه ايه يا سهير ؟! مالهم البنات ؟!
سهير .. مش عرفة يا رضوي ؟! سمعاهم بيصرخوا !! انا رايحة اشوف ايه ؟!
رضوي .. بناتي !! انا جاية معاكي
سهير .. تيجي فين بس يا رضوي ؟!
رضوي .. انا لازم اجي معاكي اشوف بناتي حصلهم ايه ؟!
سهير .. انا هاشوف ايه الحكاية ورجعالك تاني
رضوي .. لا .. انا قلت هاجي معاكي يعني هاجي معاكي !! انا عايزة اشوف بناتي واطمن عليهم بنفسي
سهير .. اطمني ان شاءالله خير .. مفيش حاجة
رضوي بعصبية شديدة .. انا لازم اروح بنفسي واشوف بناتي مالهم يا سهير
سهير .. ما هو اكيد مش هيسمحولك تخرجي من هنا !!
رضوي .. انا هاخرج غصب عنهم .. يلا بينا
وفجأة يدخل عاطف التمرجي فيشاهد رضوي متوجهه نحو الباب مع سهير
عاطف .. رايحة فين يا ست رضوي ؟!
رضوي .. رايحة اطمن علي بناتي !!
عاطف .. تتطمني علي بناتك ؟! هو انتي فاكرة نفسك قاعدة في لوكاندة ولا ايه ؟! منين ما تحبي تمشي نقلك مع السلامة ؟!،انتي هنا في مستشفي يا مدام !!
رضوي .. اوعي بقلك من سكتي .. عايزة اشوف بناتي بيصرخوا ليه ؟!
عاطف .. بقلك ايه متتعبنيش معاكي اومال وارجعي لسريرك
رضوي .. بقلك اوعي من سكتي احسنلك يا حيوان انت !!
عاطف .. مادام وصلت للغلط يبقي تعالي بقي .. امشي انتي يا مدام ( يقصد سهير )
سهير تنصرف وعاطف يمسك رضوي ويقيد حركتها ويجذبها نحو السرير ثم يدفعها ع السرير قائلا
عاطف .. ناوية تعدي يومك معايا انهارده ولا ايه حكايتك بالظبط ؟!
رضوي تنظر اليه في غضب شديد تستنكر معاملته لها وعاطف يقلق
عاطف .. ايه بتبصيلي كده ليه يا ست انتي ؟!
وفجأة رضوي تنقض عليه وتعض ذراعة بأسنانها بكل قوة وعاطف يصرخ مستغيثا ب اسماعيل زميلة
عاطف .. اه يا بت العضاضة !!الحقني يا اسماعيل ..
اسماعيل يأتي مسرعا فيشاهد هذا الموقف ويحاول انقاذ ذراع عاطف من بين اسنان رضوي
اسماعيل .. ابعدي عنه يا وليه انتي !! بقلك سيبي دراعة يخرب بيتك !!
عاطف .. اديها الحقنه بسرعة يا زفت !!
اسماعيل .. هي فين الحقنه دي ؟!
عاطف .. في جيبي اهه .. بسرعة يا زفت
اسماعيل .. حاضر
يأخذ اسماعيل الحقنه المهدئة ويحقن بها رضوي ولم تمر سوي ثوان معدودة بعدها تفقد رضوي السيطرة علي نفسها وتخر قواها تدريجيا وتترك ذراع عاطف الذي كادت تلتهمه .. ثم تسقط علي السرير فاقدة للوعي
عاطف مندهشا بشدة بعد ان رأي ذراعة بحالة سيئة بعد ان غرست فيه اسنان رضوي
عاطف .. اسفخس عليكي !! كنتي هتاكلي دراعي يا بت المفجوعة !! طب ورحمة امي لأكتفك في السرير .. روح هات الحبل ياض يا اسماعيل بسرعة
اسماعيل .. حبل ايه بس يا عاطف ؟! هو انت هتكتفها بحق وحقيق ؟!
عاطف .. اومال بهزار يا غبي ؟! روح هات الحبل بقلك
اسماعيل .. طب مش تقول للدكتور الاول ؟!
عاطف.. بقلك ايه دا شغلي وانا خر فيه .. انا بقالي ١٥ سنه بتعامل مع مجانين وكل حالة وليها طريقتها معايا .. ودي حالة خطرة !! انت مش شايف كانت هتاكل دراعي ازاي بت المفترية ؟! امشي انجر بسرعة هات الحبل
اسماعيل .. حاضر .. انا مالي بقي .. منك للدكتور
عاطف ينظر الي رضوي وهي فاقدة للوعي ويقول بسخرية
عاطف .. دا انتي هتشوفي ايام سودا معايا يا بنت الرفدي انتي !!
ونذهب الي سهير التي ذهبت مسرعة الي شقة رضوي لتنظر ماذا حدث لبناتها وعندما تصل الي الشقة تجد الباب مفتوح فتدخل في حذر شديد وهي تنادي قائلة
سهير .. سلمي !! يابنات انتوا فين ؟!
سهير تشاهد محتويات الشقة مبعثرة في كل مكان وفرش الانترية ممزق والكراسي مقلوبه بعيدا عن بعضها
سهير .. ايه اللي لخبط كيان الشقة بالشكل ده ؟! يابنات انتوا فين ؟!
وفجأة تسمع سلمي تستغيث قائلة .. الحقينا يا طنط سهير احنا هنا
سهير تسمع استغاثة سلمي وتدرك انها من احدي الغرف وتذهب ناحية تلك الغرفة التي صدر منها صوت سلمي فتفاجأ بأن البنات الثلاثة يقفون بجوار بعضهم في احد زوايا الغرفة وهم في حالة من الخوف الشديد يختبئون خلف بعضهم البعض
سهير .. مالكم يا بنات في ايه ؟!
سهير تلمح القط جيمي يقف امام البنات مكشرا عن انيابة وهم ينظرون اليه في خوف شديد
سهير بعد ان عرفت انه القط الذي مزق وجه ابنتها .. ايه ده ؟! هو الملعون ده بيعمل ايه هنا ؟! هو ده اللي مخليكم خايفين كده وبتصرخوا بالشكل ده ؟!
سلمي .. اوعي تقربي منه يا طنط .. دي كان هايعور سهام !!
سهير .. كمان ؟! يعني مكفهوش اللي عمله في وش بتي ؟! دا انا هاقطعك بالشبشب انهارده .. تعالي يا روح امك هنا
وفجأة ينقض عليها جيمي ليمسك ببطنها فيغرس مخالبه داخلها فتخرج احشائها الي الخارج في منظر صادم للجميع ..
ونذهب الي رضوي والتي استعادة وعيها فوجدت نفسها مقيدة بالسرير فأخذت تصرخ قائلة
رضوي .. انتوا يا بهايم ياللي هنا ؟!
يأتي عاطف وقد ربط يده بشاش بسبب عضة رضوي ويتحدث بكل برود
عاطف .. فيه ايه ؟! مالك عاملة شبورة ليه من الصبح ؟!
رضوي .. انتوا ايه اللي عاملينه فيا دا ؟!
عاطف .. ربطناكي عشان تبطلي عض يا مفترية .. يا اكلة لحوم البشر !!
رضوي .. انت تفكني دلوقتي حالا .. انت سامع ؟!
عاطف .. لا مش هافكك .. وهتفضلي مربوطة كده بالسرير لحد ما تتعلمي الادب
رضوي .. يابني آدم انت بقلك فكني عاوزة اروح الحمام!!
عاطف .. لا مش هتروحي الحمام .. اعمليها علي روحك !!
رضوي .. انت انسان سافل وحقير ومعندكش دم !!
عاطف .. طب ورحمة امي هاسيبك كده مربوطة في السرير لحد ما لسانك ده يتعلم الادب .. سلام
ثم يخرج ويغلق الباب ورضوي تصرخ قائلة
رضوي .. تعالي هنا يا حيوان انت .. عايزة اروح الحمام فكني حرام عليك !!
عاطف لا يجيب ورضوي لا تستطيع ان تحتمل اكثر من ذلك فتبول علي نفسها .. ثم تنظر الي ما فعلت رغماً عنها فتبكي منهارة من شدة الاسي والحزن !!
ماذا حدث بعد ذلك ؟
البارت الثالث وعشرون والرابع وعشرون من هنا
تعليقات
إرسال تعليق