 |
دار الايتام
الفصل 35_36
بعد مرور حوالي ساعه
مسك ليل موبايله..
ليل... الووووو
.........ايوه ياليل.
ليل... انا وصلت فينك.
....... مستنياك في المكان زي ما قولتلك..
....... انا داخل عليكي.
عشق... كانت حاسه ان في حاجه والميتنج ده بالنسبالها غريب...لكن فضلت تستنى وتعرف لما توصل...
وصل ليل..اخيرا ركن عربيته ورا عربيه كان في ناس في المكان شغالين...
نزل ليل من عربيته ونزلت عشق...
واتفاجأت بواحدة بتقرب منهم بابتسامه وكل تركيزها على ليل وهو مبتسم وشكله مبسوط..
وقفت..ادامه...وهي مبتسمه عمرك ما اتأخرت عن مواعيدك..وقربت منه باسته
قرب منها ليل سلم عليها وباسها...
ليل... مقدرش اتأخر عليكي ياريما.❣️
عشق...💔💔💔
ريما... كنت فكراك مش هتيجي وتشوف المكان زي ما قولتلي
ليل....من امته وليل مبينفذش كلامه
صحيح... دي عشق ياريما اتعرفتو على بعض قبل كده في الشركة.
ريما...اه بس ملحقتش اتعرف...هاي ياعشق..
عشق..بابتسامه بسيطه...هاي.
ريما....ايه رأيك في المكان..
ليل... حلو زي صاحبته..
ابتسمت..ريما بإحراج..
اما عشق...فكانت حاسه انها في مكان صغير والدنيا بتضيق عليها..كانت حاسه ان في وجع في قلبها مش قادرة تحدده
ابتدا ليل وريما يلفو في المكان وعشق ماشيه معاهم حاسه انها بتسحب في رجلها.. شايفه ليل ماشي ولا كأنه في الدنيا شيفاه مبسوط وبيضحك وكأنها مش موجوده..
ليل....عشق ايه رأيك في المكان..
عشق...كويس..
ليل... ريما تحبي تبدأي امته
ريما...الوقت اللي يناسبك
ليل... الوقت اللي يناسبك انتي ياريما هنفذ فيه على طول
ريما ..والله انا فاضيه اي وقت ان شاءلله من بكره...بس انا الاسبوع الجاي مسافرة هأعد كام يوم بره مصر ايه رأيك لما ارجع احسن...بس لو طبعا حابب تبدأ في اي وقت ومش هيفرق وجودي عادي ابتدي.
ليل... لا خليها لما تيجي عشان انا كمان مسافر الاسبوع الجاي..ومن ناحية وجودك يفرق فا اكيد هيفرق لازم تكوني موجودة...
ريما...ايه الصدفه دي رايح فين..
ليل...عندي صفقة في المانيا.. مسافر الخميس
ريما... مش معقول انا كمان مسافره المانيا وبردو يوم الخميس
ليل..ايه ده بجد
ريما...اه والله
ليل... طب ما تقولي مسافره امته يمكن نطلع على نفس الطيارة
ريما...لا مش للدرجادي انا مسافره على طيارة 9 الصبح..
ليل... بابتسامه خساره انا طيارتي على 10بليل.
ريما... كده هوصل قبلك...مسافر لوحدك..
ليل... لا عشق مسافرة معايا..
ريما...اااه وبصت لعشق... يابختك ياعشق هتسافري مع ليل..
عشق... بسخرية... لو تحبي نبدل المواعيد واسافر انا الاول واستناكم هناك.
ليل...😡
ريما..... مع اني حساكي بتتريقي بس ياريت ينفع
عشق...على فكرة انا حقيقي مش بتريق
ريما...لا ياستي شكرا انا هوصل قبلكم وبصت لليل.. بس ياريت تكون فاضي عشان اشوفك هناك.
ليل...اكيد هشوفك...طبعا بس حاولي ترجعي معانا بقى
ريما... هظبطها متقلقش..
ليل... ان شاء الله عموما احنا كده متفقين اول ما نرجع هنبتدي شغل على طول..
ريما... تمام.
ليل... انتي وراكي ايه الوقت.
ريما... ورايا حاجات كتير بخصوص المكان هنا هخلصها وبعد كده مش ورايا..
ليل... لو فاضيه بليل اشوفك.
ريما... طبعا فاضيه ياريت.
ليل... خلاص لو يناسبك الساعه 10هعدي عليكي..
ريما... يناسبني جدا..
ليل... خلاص 10بالدقيقة هكون عندك.
ريما... هستناك..
ليل... انا مضطر امشي الوقت عشان ورايا شغل
ريما... تمام وانا كمان هروح اخلص اللي ورايا
ليل.....قرب منها وباسها. اشوفك بليل..
ريما... ان شاء الله... وكملت بابتسامه هستنى بليل يجي بسرعه
ابتسم. ليل لريما...سلام
ريما... سلام..
وكل واحد فيهم راح على عربيته واتحركوا...
اعدت عشق جمبه وهي من جواها هتنفجر ونفسها بس تيجي فرصه تأعد فيها لوحدها عشان تخرج فيها الشحنه اللي جواها والوجع اللي هي حاسه بيه...
اما ليل. فاكان حاسس باللي هي بتمر بيه بس مكنش مديها اهميه ...
ليل...بعمليه... عشق عايزك تشرفي عالمشروع بتاع ريما ده بنفسك..
عشق...حاسه بكل كلمه بتطلع منه كأنها سكينه بتغرز في قلبها....عشق لنفسها تستاهلي ياعشق..سمحتي لنفسك تحبي حد مش ليكي سمحتي لنفسك ان حبك ليه يظهر واللي حواليكي يحسو بيه سمحتي لنفسك تتعري ادامو وتباني ضعيفه ويعرف انك بتحبيه. مقدرتيش تكذبيه حتى لما قالك مرتين انك بتحبيه مقدرتيش تقوليله لا مبحبكش مقدرتيش تنطقي وخلتيه يستقل بيكي...تستاهلي ياعشق كنتي بعيد عن الحب ووجع القلب كنتي بتنصحي البنات فالاول انهم ميعملوش كده وانتي نفسك وقعتي فالحب. والحب مش ليكي ياعشق...انتي جيتي الدنيا دي عشان تشقي وتتعبي فيها مش عشان تحبي وتتحبي ..
ليل... عشششششق.
عشق...هاا
ليل... بكلمك على فكرة
عشق... اسفه مخدتش بالي في حاجه
ليل... كنت بقولك عايزك تشرفي على مشروع ريما بنفسك..
عشق...انا
ليل...اه انتي في حاجة غريبة..
عشق...لا خالص تمام...
رجعت عشق بصت عالطريق تاني...
اما ليل.. فكمل سواقه
وبعد فتره بسيطه... وصلو الشغل...
وطلعو عالمكتب... وكان الكل مشغول وكأن محدش حس بوجودهم من كتر الشغل اللي كان عندهم
دخلت عشق على مكتبها. وفضل ليل دافن نفسه فالشغل طول اليوم ومتلاشي تماما عشق..
..........................................
سهام...وقفت على باب الاوضه تخبط على باب اوضة نور قلقت لما لقتها مصحيتش كل ده..لما ملاقتهاش بترد فتحت الباب...مكنتش فالاوضه...
حست سهام بالقلق... لكن اطمنت لما لمحت خيالها عالكرسي في البلكونه..
دخلت سهام البلكونه...لقت نور نايمه...نومه متعبه جدا...
سهام...ايه ده نور انتي نايمه.. نور نور نور
نور...فتحت عينها براحه..
سهام...انتي نايمه هنا من امته..
نور... بتقوم براحه من الكرسي وهي جسمها مكسر...حضرتك هنا من امته
سهام... انا لسه داخله يا حبيبتي خبطت كتير بس انتي مردتيش فا قلقت وفتحت عليكي...والصبح بردو خبطت عليكي عشان تفطري معانا مردتيش
نور... اسفه يا طنط مسمعتش وواضح اني نمت من امبارح هنا
سهام...انتي من امبارح نايمه كده يانور. وده ينفع يابنتي تتعبي من النومه دي كده
نور... محستش بنفسي والله... وكملت بحزن... نوح رجع
سهام... اشفقت عليها... لا يانور مرجعش لسه وموبايله مقفول. بس ليل قاللي انه هيعرف هو مختفي فين ويطمنا عليه...
نور....مش هيرجع طول ما انا موجودة ياطنط...انا لازم امشي عشان نوح يظهر ويرجع.
سهام... تمشي تروحي فين ايه العبط اللي انتي بتقوليه ده ده بيت جوزك يانور.. وبعدين مين قال انه مختفي عشان انتي موجودة هو تلاقيه بس حابب يهدي ويفكر بالعقل مع نفسه...
نور... جوزي!!! مؤقتا ياطنط نوح حسم الأمر خلاص وهو قالها بنفسه ادامكم انه هيضغط على نفسه انه يفضل معايا لحد ما يمر كام شهر ويسبني.
سهام... كلام كلام يا نور قاله وقت غضب وعصبيه. بس نوح بيحبك وهيرجع نوح ميقدرش يستغني عنك ياحبيبتي..انتي مشوفتيش كان عامل ازاي لما كنتي بتعامليه وحش...
نور...وهو الوقت حابب يردهالي. يمكن هو مجروح بس انا كمان كنت مجروحه وكان غصب عني. هو حضرتك شايفه اني كنت غلط او بالغت في رد فعلي.
سهام...لا يا نور ورد فعلك طبيعي جدا واي حد في مكانك كان عمل كده..بس هي دي دماغه وتفكيره بقى هنموته ولا نستحمله زي ما استحملنا..
نور...بس هو مش هيسامحني
سهام... لا هيسامحك يانور لازم يسامحك وعلى فكره بقى على اد ما انا قلقانه عليه ومش مطمنه وهو بعيد كده
على اد ما انا واثقه ان اعدته لوحده دي هتديه فرصه يفكر ويعيد التفكير. في اللي قاله ويعرف انه كان غصب عنك وان الموضوع مش موضوع ثقه ويعرف ان رد فعلك وصدمتك دي كانت غصب عنك...
نور.... بارتياح من كلام سهام... يعني حضرتك شايفه انه ممكن يسامحني..
سهام... انا متأكده يانور....يلا بقى تعالي قومي خدي شاور عشان تفطري وتأعدي تذاكري.
نور... حاضر.
سهام...يلا ياحبيبتي انا هنزل ابلغهم يحضرولك احلى فطار ..
نور... ربنا يخليكي ليا ياطنط.
سهام... ويخليكي ليا يا احلى نور....
نزلت سهام..وخدت نور غيار ودخلت تاخد شاور بعد ما حست بالارتياح من كلام سهام..
.......................................
جاسر.... هو الاسبوع ده فاضي ولا انا متهيألي..
تمارا... فاضي ايه بس يا جاسر...ما الجدول ادامك اهو مليان مواعيد ولا انت غاوي تعب.
جاسر..لا والله مش حكاية غاوي تعب بس حاسس ان الجدول فاضي فعلا
تمارا..انهرده في ميتنج بليل وبكرة في اتنين وبعده اتنين وباقي الايام ما بين اتنين وواحد اهو
جاسر... ماشي.. الميتنج الساعه 8
تمارا....لا الساعه 9 انت مالك مش مركز كده ليه..
جاسر... لا والله مركز بس يمكن المواعيد كلها دخله عندي في بعضها... المهم طمنيني بدأتي مذاكره ولا لا
تمارا ...لسه والله ياجاسر وحاسه اني قلقانه مش عارفه حاسه اني نست كل اللي كنت مذكراه.
جاسر.... متقلقيش ياحبيبي ده بس عشان بقالك كتير
مذاكرتيش... لو محتاجه اي حاجه عرفيني لو في ماده مش قادره تخلصيها عرفيني واجبلك حد كويس يساعدك.
تمارا... لا مش مستاهله
جاسر... تمارا لو محتاجه... تاخدي اجازه من الاسبوع ده معنديش مشكله. ولو على تظبيط المواعيد احنا مظبطين الاسبوع ده والاسبوع الجاي ظبطيه بس وبردو سيبيهولي
وبلاش الاسبوع ده تيجي الشركة ولا تحضري معايا اي ميتنج.
تمارا... لا طبعا كفايه عليا الاسبوعين بتوع الامتحانات...وبعدين انت عايز تخلص مني ولا ايه
جاسر... طب انا لو عليا مسبكيش حتى في البيت...اكيد لا طبعا بس عايزك تلمي الترم وتاخدي وقتك.
تمارا... لا متقلقش انا هقدر اظبط الدنيا.
جاسر...ان شاء الله ياحبيبي تعدي السنه دي بتقدير حلو كمان
تمارا... يارب ياجاسر..
جاسر...ان شاء الله يا قلب جاسر.. بقول ايه.
تمارا... هااا
جاسر.... مفيش..
قاطعته تمارا... اتلم ياجاسر.🤨
جاسر... وهو بيضحك على فكرة بقى انتي بقيتي قليلة الادب ودماغك دي شمال
تمارا...😳انا بردو
جاسر...ايوه انتي انا اقصد يعني مفيش فنجان قهوة
تمارا.... ماشي ياحبيبي هعملك حاضر. لو اني عارفه انك مكنتش تقصد كده..
جاسر... بابتسامه. بحبك يا رخمه
تمارا... بضحك...وانا بموت فيك ياقلب الرخمه😍
....................................
زهره...ادم...ادم..
ادم. ..........
زهره...اددددم
ادم...ايه في ايه مالك بتزعأي كده ليه
زهره... بنادي عليك وانت مش بترد🙄
ادم...معلش سرحت شويه ايه في حاجة.
زهره... ادم راجع كده الحساب ده
ادم...خير في ايه
زهره... في غلطه في الحساب ده انا راجعته مرتين ونفس الغلطه لقتها..
ادم...ازاي انا مراجع حساب الصفقه دي كويس
زهره... طيب شوفها كده. انا واثقه ان في غلطه في الحساب.
ادم...اد ايه.
زهره... نص مليون🙄
ادم...نعم لا طبعا اكيد حسبتي غلط استحاله اغلط في رقم كبير كده وريني كده
زهره... اتفضل..
مسك ادم الورقه وفضل يعيد الحساب..
اعدت زهره ادامه على مكتبه...مستنياه لحد ما يخلص..
عدى حوالي خمس دقايق. وادم مركز
ادم.....حط ايده على وشه..
زهره... ايه
ادم... فعلا في غلطه...انا ازاي مخدتش بالي
زهره...مش قولتلك انا راجعتها مرتين والله.
ادم...كويس انك خدتي بالك كانت هتبقى مشكله..
زهره... مالك ليه مش مركز
ادم...مش عارف حاسس اني مش مظبوط فعلا .
زهره... طيب لو حابب تاخد بريك وتفصل شويه سيب وانا اكمل
ادم... لا مش مستاهله بس عايزك تراجعي ورايا بقيت الورق. عشان شكلي كده عكيت.
زهره... في حاجة مضيقاك..
ادم... لا خالص بس دماغي مشغوله شويه زهره انا
زهره... مالك يا ادم.
ادم... محتاج اتكلم معاكي.
...........
زهره... طيب اتكلم انا سمعاك.
ادم... مش هينفع هنا يا زهره. انا محتاج اشوفك بره ينفع
زهره... سكتت وبتفكر
ادم... لو مش هينفع مش هزعل بس انا حقيقي محتاج اتكلم معاكي
زهره... ماشي يا ادم موافقه..
ادم... ابتسم
زهره... امته
ادم... لو فاضيه انهرده... تمام
زهره... طيب تمام...
ادم.... يلا روحي شوفي اللي وراكي...وانا هراجع عالورق تاني وبردو انتي راجعي اللي معاكي.
زهره... حاضر...
..........................
نور... دافنه نفسها في المذاكره وبتحاول تشغل نفسها وكلام سهام كان مطمنها...
ليل بيحاول ينشغل في شغله عشان ميفكرش في عشق...
عشق....بتحاول تشغل نفسها بالشغل لكن مش قادرة توقف تفكير في كل حاجه بتحصل حواليها مش قادرة توقف وجع قلبها اللي حاسه بيه حتى لو دقايق...
جاسر...وتمارا... مشيو عشان الميتنج...
لسه مفيش اخبار عن نوح مختفي من امبارح....
خبط باب مكتب...ليل..
ليل....ادخل.
دخل ادم...
ادم..... ايه الاخبار
ليل... تمام. خلصت ولا ايه..
دار الايتام
البارت السادس والثلاثون...
مسحت عشق دموعها بوجع...بعد انهيار كانت محتاجاه عشان ترتاح... لفت ضهرها عشان ترجع. واول ما لفت..
حست.. بقلبها هيخرج من مكانه...لما شافته واقف وراها من غير ولا كلمه ولا هي كانت حاسه بيه...من صدمتها فقدت النطق...
ليل... بابتسامه حب... ولما يشيل حبي من قلبك ياعشق..
اعمل انا ايه في حبك اللي في قلبي...
شدها ليل من ايدها وسط الشارع... وكأنه في العالم لوحده ولا هامه اي حد...وخباها جوه حضنه...وانهارت عشق.....
وانهارت كل قوه فيها بمجرد ما خدها في حضنه. وشافته ونسيت كل حاجه مزعلاها منه...وعلى اد ما الحرام والحلال مبدأ عشق إلا انها في اللحظه دي بالذات كانت محتاجه حضنه عشان تقدر تسيطر على إنهيارها...
حط ليل دقنه على راسها..وحضنها بكل قوته وكأنه بيخبيها جوه ضلوعه...وبيطمنها. وبيأكد لها بدقات قلبه اللي كان هيخرج من ضلوعه بمجرد ما حضنها وشاف دموعها وانهيارها...
ليل...ششششششش كفايه عياط دموعك غاليه عليا اوي ياعشق...
بعد فتره من انهيار عشق. حس ليل انها هديت. واتحول انهيارها لصوت بكاء ضعيف...
خرجها ليل من حضنه...فضلت عشق منزله وشها لتحت.. وبتسمعه ومش بتقول ولا كلمه.
رفع ليل وشها بايده. مسح دموعها براحه...
ليل...العيون دي متعيطش ابدا....مسكها من ايدها وراح اعد بيها جوه عربيته....
ليل.... انا مش هعاتبك على اللي قولتيه عشان عارف انه حقك وعارف انتي كنتي حاسه بأيه..بس ده ميمنعش اني زعلان منك عشان قدرتي تدعي الدعوه دي عايزه حبي يتشال من قلبك ياعشق...من يوم ما شوفتك وقولت عليكي ذكيه ودايما بتحسي بحاجات وبتطلع صح.. وبتصدقي احساسك لدرجة اننا احنا كمان بنصدقك اشمعنى المرادي مصدقتيش احساسك ياعشق...ازاي مقدرتيش تتأكدي من حبي ليكي...وانا عارف وواثق انك عارفه اني بحبك...
بس بردو مش هاجي عليكي وهعذرك عشان الظروف اللي كلنا بنمر بيها صعبه وعشان تصرفاتي معاكي...
وعشان ولا مره قولتلك فيها اني بحبك ياعشق..
بس انا الوقت بقولهالك ياعشق...بحبك ومقدرش استغني عنك ومش عايز اي حاجه في الدنيا غيرك انتي ..
انا مكنتش ناوي اقولك حاجه زي دي الوقت ياعشق ولا كنت ناوي افتحلك قلبي...بس مقدرتش اضغط عليكي اكتر من كده مقدرتش اشوفك في الحاله دي واسيبك مقدرتش ماخدكيش في حضني ياعشق....
مكنتش عايز اتكلم عشان خايف عليكي عايزك تفضلي بعيد مش عايزك تتأذي ولا يحصلك حاجه بسببي ولا تدفعي تمن غل وحقد وكره شخص تاني...
بس الوقت مبقاش ينفع مبقاش ينفع اشوفك بتنهاري واسكت ولا ينفع اسمعك بتدعي ربنا انه يشيل حبي من قلبك. عشان مش من حقك تدعي الدعوه دي حبك ده انا استنيته طول حياتي قلبك ده من يوم ما شوفتك وهو ملكي ياعشق مش من يوم ما شوفتك بس من يوم ما جيت انا وانتي الدنيا دي واحنا لبعض...عشان كل ده ياعشق انا لازم احكيلك حاجات كتير لازم اعرفك كل حاجه..خبيتها عنك عشان خايف عليكي..
بس قبل ما تعرفي اي حاجه عايزك تعرفي حاجه واحده بس... عشق في قلب ليل. وعمرها ما هتطلع منه...
ومينفعش يا عشق تكوني بتستمدي مني قوتك زي ماقولتي قبل كده وانا اللي اضعفك بأيدي
انا كنت ناوي اكمل لوحدي بس جه الوقت انك تكملي معايا
وتساعديني ..وجه الوقت اللي لازم تعرفي فيه ان اللي بيحصل حوالينا من اول موت حاج محمد لحد اللحظه اللي احنا فيها دي لعبه...بكره بليل هنتجمع كلنا عشان اكشف كل حاجه ادامكم في حاجات هتسمعيها انتي والبنات هتوجعكم اوي..بس لازم تسمعوها عشان اللعبه خلصت خلاص يا عشق....المهم جاهزه تسمعي اللي خبيته عليكي انتي والبنات...ولا لا...
عشق.........سكتت شويه ورفعت وشها لليل وهزت راسها بنعم....
ليل.... يبقى بكرهه معادنا يا عشق..
عشق.....خرج صوتها اخيرا بضعف.....وريما؟؟؟
ليل.... هتعرفي كل حاجه في وقتها ياعشق...
عشق...بس في حاجه انت لازم تعرفيها..مقدرتش اقولهالك
ليل...حاجه ايه...
عشق....شاهي!!!
ابتسم...ليل...مالها..
عشق....شاهي مش زي ما انت فاكر....
ليل....عارف
عشق...😧عارف ؟؟؟عارف ايه.
ليل... عارف انها جاسوسه وان وراها حد وعارف كمان اللي انتي عملتيه في تليفونها...
عشق....عارف مين قالك
ليل.... مااحنا قولنا نستنى بقى وهتعرفي كل حاجه...
عشق....بس في حاجه كمان انت متعرفهاش ولا حد يعرفها..ومرضتش اقولهالك امبارح لما عرفتها عشان مكنتش هتصدقني
ليل....استحاله مصدقكيش يا عشق...
عشق.....يمكن مكنتش تصدقني بس الوقت لازم تعرف ولازم تصدقني
ليل...انا مصدقك من غير ما تقولي ياعشق...
عشق....انت عرفت اللي عملته في موبايل شاهي. واكيد عرفته من ادم او جاسر او نوح...بس اللي متعرفهوش اني عرفت مين صاحب الرقم...
ليل.....مين؟
عشق....ريمااا
ليل....بابتسامه وازاي اتأكدتي.
عشق...باحراج...مش مهم المهم اني عرفت.
ليل...وانا لازم اعرف..
عشق...امبارح لما دخلت تغسل وشك لحد ما الم حاجتي.. موبايلك رن... ويعني فضول مش اكتر بصيت لقيتها ريما بس لفت نظري الرقم خصوصا اني حفظته لما خدته من موبايل شاهي. ولانه رقم مميز عرفته بسرعه...
ليل.....بابتسامه... بتفتشي ورايا 😉
عشق...باحراج...ابدا والله قولتلك صدفه وفضول وبعدين موبايلك كان عالمكتب.
ليل... وانا مش زعلان على فكره وراضي..وعايز اقولك كمان اني عارف انها ريما
عشق....يعني ريما ورا اللي بيحصل ده
ليل... يعني بس مش لوحدها ياعشق...وطبعا مش هقول اكتر من كده عشان في مفاجآت كتير بليل مش عايز احرقها الوقت. ويلا عشان تطلعي تجهزي للشغل..
عشق....حاضر.
ليل... بابتسامه.عشق. اسف على كل حاجه وحشه حصلت واسف على اي وقت كنتي حزينه فيه بسببي يمكن لما تعرفي تعذريني..
عشق....بابتسامه وانا مش زعلانه خلاص
ليل... مش تستني تعرفي يمكن تفضلي زعلانه ومتعذرنيش
عشق.... مش محتاجه اني اعرف خلاص
ليل.... بحبك ياعشق..
ابتسمت عشق باحراج وبعدت عينها عن عينه..
ابتسم ليل... ودور العربيه ولف بيها ونزلها ادام البيت...
ليل.....تطلعي واول ما تدخلي تعرفيني
عشق....حاضر
ليل... يلا بسرعه السواق قرب يجيلكم انا هروح بسرعه اغير هدومي وهاجي وراكم عالشركه.
عشق... تمام...سلام
ليل... سلام
نزلت عشق....وراحت على المدخل...ووقفت..وبصتله...
عشق... يمكن وقت ضعفنا بنتمنى حاجات وبندعي ربنا بيها بس من جوانا قلبنا بيبقى بيردد عكس الدعوه دي بالظبط زي الام اللي بتدعي على ولادها وهي من جواها بتقول بعد الشر...
عشق....بحبك ياليل..ولفت ودخلت بسرعه ركبت الاسنسير وطلعت...
ابتسم..ليل. ورفع قلبه رايات الحب..والاستسلام....
.............
عشق.....رنت عليه...فتح ليل على طول...
انا طلعت..
ليل....وانا بحبك اوي
عشق....وهي مبتسمه...ومش عارفه ترد..
ليل...عشق....اوعي تبعدي عني ابدا خليكي دايما معايا
عشق...انا معاك ياليل...
ليل... متتأخريش عشان هتوحشيني الشويه دول.
عشق....بابتسامه احراج حاضر..
ليل.... سلام ياعشق ليل.
عشق...ابتسمت عاللقب. كانت حاسه انها طايره في السما وبعد ما كان حزن الدنيا ماليها قدر ليل يمحي كل الحزن ده في ثواني ويزرع جواه فرحه وسعاده وحب
عشق....سلام..
............قفلت عشق....مع ليل... ودخلت الشقه كانت تمارا وزهره لسه صاحيين...
صرخت زهره اول ما شافت الباب بيتفتح.
عشق....بس بس في ايه
زهره...وهي حاطه ايدها على قلبها...حرام عليكي قلبي وقع يا عشق. فكرت حد بيفتح علينا..
تمارا...انتي كنتي فين ياعشق..
عشق...وهي بتاخد نفسها بتنهيده طالعه من القلب..
رفعت تمارا حاجبها...ده ايه التنهيده دي كمان ان شاء الله كنتي فين🤨🤨🤨
زهره....ايوه صح كنتي فين بدري كده ونزلتي امته اصلا وازاي اصلا تنزلي لوحدك...
عشق... هقولكم على كل حاجه بس خلوني بس اروح اغير هدومي دي بسرعه عشان لو السواق جه نمشي على طول..
زهره... السواق زمانه قرب خليكي انتي مش لابسه..اهو
عشق... ثواني والله مش هتأخر وجريت على الاوضه وسابتهم
تمارا... باصه عليها باستغراب..
زهره...مالها البت دي امبارح كانت مش كده ايه اللي بدلها كده.
تمارا... 🤔🤔🤔اقطع دراعي ان ما كان الحوار ده وراه ليل.
زهره...تفتكري..
تمارا...افتكر طبعا مش شايفه العصافير اللي فوق راسها والقلوب اللي جوه عنيها...😉
زهره....تصدقي شكلها كده...
بعد خمس دقايق خرجت عشق ...
عشق...السواق اتصل
تمارا...لا وتعالي كده اعدي هنا... احكيلنا ايه اللي حصل...
عشق...وهي تمارا بتشدها...طيب براحه براحه هقولكم
واعدت عشق حكتلهم كل حاجه ....
تمارا.... انا قولت ايه مش قولت بيحبك يا مغفله قولت ولا مقولتش.
عشق...وهي بتضحك قولتي
زهره...يعني اعترف اخيرا ليل...
عشق...ايوه..
فضلو البنات يتنططو ويصرخو بفرح مع بعض..
حضنت زهره وتمارا عشق...كانو طايرين من الفرحه...
تمارا... يعني كده ريما ورا اللي بيحصل ازاي
زهره...زي الناس ما اهي باينه اهي..وادام ليل اعترف يعني كده كان عامل تمثيليه على ريما...
تمارا... صراحه لو كان ليل فعلا حنلها وحن لحبه ليها كان نزل من نظري.
عشق....هو بيقول اننا كلنا هنتجمع بكره بليل
تمارا... عندهم. ولا فين
عشق... معرفش مسألتهوش بس تقريبا اه..
زهره...طب بقولكم ايه يلا السواق بيرن وانا كنسلت عليه...تعالو ننزل ونكمل كلام تحت..
عشق...يلا
نزلو البنات مع بعض وركبو ...عشان يروحو عالشركه...
...................
وصل ليل الڤيلا طلع خد شاور ونزل على طول. تحت.
سهام.... ليل
ليل... صباح الخير يا امي
سهام...كنت فين ياحبيبي. انت منمتش
ليل...لا يا امي انا لسه جاي من بره..
سهام...مش معقول كده ياليل انت بقالك يومين مطبق يا حبيبي كده تتعب
ليل... معلش يا امي غصب عني في حاجات كتير شغلاني وبحاول اضبطها وخلاص قربت من كل حاجه يا امي.
سهام....خلي بالك من نفسك يا ليل عشان خاطري. انا قلقانه اوي.
ليل.. متقلقيش يا امي والله كله هيعدي. وهنشم نفسنا متقلقيش..
سهام... طب ونوح.
ليل... قولتلك متقلقيش بقى صحيح... بكره كلنا هنتجمع هنا. اعملي حسابك.
سهام... ماشي ياحبيبي..
ليل... هو ادم فين...
ادم....انه اهو مين بيسأل عليا.
ليل... ايه مش يلا
ادم... طب مش هنفطر
ليل... انجز مفيش وقت افطر في الشركه
ادم...طب اشرب قهوه عشان افوق منمتش كويس.
ليل... اشرب في الشركه... بردو وبعدين ما كان على مزاجك قلت النوم ولا ايه.
ادم....بتسلمني تسليم اهالي...ماشي ياعم..
عموما... انا كنت عايز اتكلم معاكم في حاجه..
ليل... عارفها..
ادم...لاوالله عارفها
ليل... انت عبيط ولا ايه مش عارف مين هو ليل السيوفي ولا ايه.
ادم...لا يا اخويا عارف..وايه رأيك.
سهام...هو في ايه ورأيه في ايه...
ليل.... ادم عايز يرتبط بزهره يا امي...
سهام...زهره..ده بجد.
ادم...اه بجد يا امي.. ايه رأيك..
سهام... هي جميله ومحترمه والشهاده لله انا بحبها هي والبنات اوي
ادم....وانت ياليل..
ليل... انت عارف ان انا كمان معنديش اعتراض المهم عرفت رأيها...
ادم...انا مرضتش اخليها تقول حاجه...غير لما تفكر..بس مبدأيا كده انا واثق انها موافقه
ليل... بسخريه.. واثق جامد اوي..
ادم... وهو بيعدل هدومه طبعا واثق وانا وحش ولا ايه
سهام...ده انت قمر ويابختها بيك...
ليل...لا والله..يابختها بيه..
ادم...كفايه نفسنه بقى وغيره.
ليل...انا اغير منك انت
ادم...طبعا .
ابتسم...ليل وخده في حضنه مبروك يا اخويا. مقدما هي فعلا مش هتلاقي في طيبة قلبك. ولا انت هتلاقي واحده في اخلاقها يا ادم حافظ عليها..
ادم... وانت ايه بقى
ضربه ليل على دماغه خليك في خالك يالا ادامي عالشركه...سلام يا امي.. ومتنسيش بكره بليل
سهام...سلام ياحبايبي حاضر يا ليل
ادم ..وهو ماشي جمب ليل هو ايه اللي بكره بليل..
ليل... الكل هيجمع بكره ..هكشف كل حاجه..
ادم...انت بتهزر. فجأه كده..
ليل... مش فجأه ولا حاجه بس تقدر تقول جه الوقت ودقت ساعه الصفر يا ادم.
ادم...بقلق... ربنا يستر..طب هتعمل ايه مع جاسر..
ليل... بحزن مش عارف يا ادم اول مره احس اني مش قادر افكر وخايف عليه اوي..
ادم...وانا كمان خايف عليه ..طب ما نأجلها يوم ولا اتنين كمان.
ليل... مبقاش ينفع يا ادم كل ما بنأجل مصايب جديده بتظهر وانا خلاص مبقتش قادر ولا عندي استعداد اخسر اي حد فيكم...وكفايه اوي اللي حصل في نور ونوح الفتره دي...
ادم....بس الحمد لله عدت على خير واطمنا على نور.
ليل...بس اللي حصل مأثر فيهم يا ادم الفضيحه اللي حصلت هتتنسي بس اكيد معلمه فيهم واللي عملها كان قاصد يسوء سمعة عيلتنا كان قاصد يدمر علاقتهم كان قاصد يبوظ حياتنا..كان قاصد يشغلنا باللي حصل عشان يضرب ضربه تانيه..
ادم....انا مش شاغلني بس غير جاسر....انت متخيل جاسر وتمارا صدمتهم هتبقى عامله ازاي وخايف علاقته بتمارا تتوتر..
ليل... هتعدي بأذن الله واحنا مش هنسيبه.هنفضل معاه لحد ما يعدي الفتره دي على خير.. الخوف فعلا ان علاقته تتوتر بتمارا...بس ان شاء الله هنقدر نسيطر عالموقف
ادم...يارب..
ليل....بس بكره مفيش حاجه هتتقال ادامهم على الموضوع ده...
ادم... تمام
ليل...يلا بينا بقى عشان احنا كده متأخريين.
ادم...يلا بينا.
ركب...ليل وادم وراحو عالشركه...
..........
وصل ليل وادم الشركه...وطلعو على مكاتبهم...
ابتسم...ليل اول ما شاف عشق...بس محبش يوترها وكمل بعمليه....وفضل يسألها على كذا حاجه في الشغل.. عشان تفك وتقدر تتعامل عادي...وفعلا عشق فصلت وبقت تتكلم في الشغل عادي لكن كان ليل ملاحظ فرحتها ولمعة عنيها وحماسها وتغيرها وكأنها فتحت بعد فتره وهي مطفيه...
ليل.... تمام كده هي واقفه عالامضاء وبعد كده جاسر يستلم مننا.
عشق...ايوه كده تمام.
ليل... خلاص يبقى تبعتلهم انهرده عالايميل بتاعهم اننا موافقين عالصفقه..وبلغيهم اننا هنوقع الاتفاق بكره..
عشق...خلاص تمام.
وفضل ليل وعشق يتكلمو في الشغل وابتدت عشق تكلمه في حاجات في الصفقه وليل بيسمعها. رفعت عشق عينها وهي بتتكلم لقت ليل باصصلها ومبتسم وعينه مركزه على ملامحها وهي بتتكلم..
عشق...ابتسمت باحراج. وكأن نظرته دي لجمت لسانها وقفت عشق عن الكلام...
ليل....وقفتي كلام ليل ..
عشق....ابتسمت ونزلت عينها واضح انك مش مركز.
ليل...انا مين قالك انا مركز اوي..
عشق...طيب كنت بقول ايه..
ليل...بابتسامه بتختبريني.
عشق...يعني مش انت بتقول مركز اوي.
ليل...انا مكدبتش وحقيقي مركز فيكي ياعشق.
عشق....نزلت عنيها طيب ممكن متركزش معايا وتركز في الشغل عشان متوترنيش
ليل...وهو مبتسم... هحاول اصل انا هعترفلك بسر محدش يعرفه.
رفعت عشق عينها...سر ايه..
ليل...اصل انا بحب اشوفك وانتي متوتره اوي..
عشق...وشها احمر...طيب انا هقوم بقى وكمل لوحدك..
مسكها..ليل. وهو بيضحك..طب خلاص خلاص هسكت والله
عشق...لا اتكلم بس في الشغل ومتركزش معايا تاني.
ليل..حاضر...تؤمري بأي حاجه تانية
عشق...لا..
................
اما عند زهره وادم... كان الوضع مختلف... ادم كان بيحاول يتصنع الجديه عشان زهره متفكرش انه بيضغط عليها كان حابب يسبلها مساحه كافيه عشان تقدر تفكر من غير اي ضغط.. مع انه كان واثق انها موافقه. بس كان منتظر يسمعها منها...
ادم...خد ورق وراح بيه على مكتب زهره..
ادم...زهره من فضلك انا مراجع الورق ده..كويس بس عايزك تراجعي عليه مره كمان..
زهره...تمام اخلص بس الورق ده واراجعه.
ادم...لو قربتي تخلصي تمام بس لو لسه ادامك شويه ياريت بس تراجعي ده ضروري عشان اسلمه تاني لليل.. عشان ده بتاع صفقه المنتجع بتاع هادي..
زهره... تمام يبقى هراجعه هو الاول لان ده انا لسه بادئه فيه..
ادم...خلاص تمام...لما تخلصيه.. هاتيهولي .
زهره...حاضر هبدأ فيه الوقت على طول.
ادم..اوك اسيبك انا بقى عشان تركزي.
زهره...اوك..
مشي ادم.....وحست زهره بالراحه انه كان طبيعي عشان تقدر تكمل شغلها من غير توتر...
.........
عشق....كده احنا تقريبا متفقين وخلصنا هبعت بقى الايميل الوقت عشان ابلغهم.
ليل...تمام...
عشق...تحب تشرب حاجه..
ليل...لو مش هتعبك يبقى قهوه.
عشق...حاضر....ليل صحيح...هو انت ملاحظتش ان شاهي مش على مكتبها او مجتش اصلا..
ليل...لا لاحظت.
عشق...يعني هي مش مستأذنه منك انها تاخد اجازه.
ليل...لا
عشق...طب وتفتكر ده عادي..
ليل...لامش عادي بس متقلقيش انا مسيطر وهتعرفو كل حاجه بكره زي ما اتفقنا...
عشق..تمام ومشيت على مكتبها
خبط الباب في اللحظه دي..
ليل...ادخل...
دخلت تمارا..
ليل...تعالي ياتمارا..عشق على مكتبها.
تمارا... بس انا جيالك ياليل..وكان ظاهر على وشها القلق..
ليل.....بقلق خير يا تمارا...
تمارا...الساعه اتنين وجاسر مجاش. بكلمه موبايله مقفول...
ليل..باستغراب... هو من الصبح مجاش.
تمارا...لا
ليل...وايه اللي مسكتك ده كله..
تمارا... انا قولت يمكن في مشوار او حاجه بس المفروض اننا عندنا اتنين ميتنج منهم ميتنج الساعه 4 وانا مش عارفه اوصله عشان كده جتلك
ليل....غريبه جاسر عمره ما اتأخر عن شغله انا كنت فاكره في المكتب. ومركزتش خالص انه معداش عليا انهرده..
عشق...تمارا...خير
تمارا...جاسر من الصبح مجاش وموبايله مقفول
عشق...طيب يمكن في الشركه مع مستر سراج
ليل...جاسر مببرحش هناك كتير. انا ونوح اللي ديما نروح...
عشق...طيب يمكن راحت عليه نومه او تعبان
ليل...لحد الوقت...
مسك ليل موبايله واتصل...كان مقفول...
ليل...موبايله مقفول بردو..
عشق...طيب اتصل على طنط منى في الڤيلا او مستر سراج اكيد يعرفو فين.
ليل...تمارا... هو امبارح لما وصلك اتأكدتي روح ولا لا...مش بتدخل بس يعني عشان اكون متطمن.
تمارا...لا ابدا ياليل عادي...هو ايوه كلمني. بليل لما روح وكلمني تاني بعد ما طلع عشان ينام..
ليل...طيب الحمد لله
عشق ..في ايه.
ليل... بطمن يا عشق ان مفيش حاجه حصلت
تمار....بخوف هو ممكن يكون في حاجه وحشه حصلت.
ليل...لا متقلقيش...انتي كلمتيه الصبح.
تمارا...انا بكلمه من ساعة ماجيت مقفول موبايله..
رن..كتير ليل على تليفون منى والدت جاسر...وقبل ما يفضل ردت...
مني....الوووو
ليل...الووو ازيك يا طنط عامله ايه
مني...الحمد لله يا ليل.
ليل...هو جاسر فين ياطنط... مجاش الشغل لحد الوقت وبكلمه تليفونه مقفول....
منى........اللي كنت خايفه منه حصل يا ليل.
ليل...بانت عليه ملامح الصدمه😳. ازاي.
منى.................
ليل..وبعدين..؟؟؟
منى................
ليل...يعني هو معرفش غير كده وبس...ولا عرف حاجه تانيه
مني....لا خالص ياليل هو معرفش غير كده بس.. وطلع من البيت الصبح... وحاولت اكلمه كتير بس مبيردش...وبعدها قفل موبايله بس انا توقعت انه راح الشركه..
ليل....لا مجاش للاسف.
منى...طيب وبعدين يا ليل... انا قلبي مش مطمن وهموت عليه...
ليل... اطمني يا طنط متقلقيش انا هعرف مكانه بس لما الاقيه مش هعرفه اني عرفت اي حاجه....هفهمه انك قولتيلي ان حصل خلاف بينكم .
مني....طيب ياليل طمني متسبنيش كده عشان خاطري.
ليل...هطمنك متقلقيش والله...يلا سلام وهرجعلك تاني
منى....سلام ياحبيبي...
.......
تمارا...في ايه جاسر كويس؟؟؟,
ليل.... ايوه متقلقيش هو متعصب شويه بس هيظهر..متخانق بس في البيت.
تمارا..... ده اللي انت هتضحك بيه على جاسر لما تلاقيه ياليل....جاسر فيه ايه؟؟؟
مرر...ليل ايده على وشه بقلة حيله ونسي انهم سمعو مكالمته..
ليل.... تمارا اطمني والله هو كويس
تمارا...كويس ازاي انت مشوفتش وشك اتغير ازاي لما كلمت مامته....
ليل... بعصبيه.... يووووه تمارا اطلعي من دماغي الوقت...
سكتت...تمارا ودموعها في عنيها وعصبيه ليل اكدتلها ان في حاجه كبيره..
عشق....ليل ممكن تهدا. تمارا... سبيه يهدي شويه وهو هيقولك اكيد او يمكن جاسر يظهر الوقت ويفهمك هو خصوصا ان عندكم اجتماعات بره الشغل انهرده...
تمارا....بحزن...بعد اذنكم..
ليل....تمارا..استني....
وقفت... تمارا...وبصتله...
ليل...انا اسف متزعليش لو اتعصبت بس انا مشدود شويه... عايزك بس تتأكدي ان جاسر كويس والله العظيم.
ويمكن زي ما سمعتي ده الكلام اللي هقولهوله لما اشوفه..بس هو فعلا في مشكله عند جاسر في البيت... كل الحكايه اني مش عايزه يعرف اني عرفتها...فهمتيني..
تمارا... طيب انت تعرف مكانه.
ليل....حاليا لا بس هعرف وبسهوله كمان هو اكيد مختفي عشان يهدي اعصابه مش اكتر...
تمارا... طيب والميتنج..هيجي.
ليل...لا ياتمارا مظنش...
تمارا...يعني اعمل ايه الوقت الغي.
ليل...لا طبعا متلغيش...كل حاجه هتمشي زي ما هي...
تمارا...طب والميتنج مين هيحضره معايا.
ليل... ادم هيجي معاكي..هو فاهم في شغلكم وكتير حضر مع جاسر..
تمارا... تمام...
ليل... انا هبلغ ادم عشان يعمل حسابه...
تمارا...طيب..بعد اذنكم...
وخرجت...تمارا...بحزن من مكتب ليل...
فضلت عشق باصه لليل بتسٱله بنظرتها..
بصلها ليل... متسألنيش عن اي حاجه الوقت بكره هتعرفو كل حاجه... عايزك بس متسبيش تمارا...مفهوم.
عشق.. حاضر....
عدى الوقت بسرعه خرج ادم مع تمارا وحضرو اول ميتنج وخلصوه وطلعو بعدها على الميتنج التاني...وكل ده وتمارا ميأستش انها تتصل بجاسر... وتجرب يمكن يرد وتطمن عليه....
خلص اليوم بسرعه....
كان اليوم مشحون بالتوتر...
روحو البنات...
وحاولت عشق وزهره يأكلو تمارا بس هي كانت رافضه...ودخلت تنام...
اما ليل. وادم... فابعد ما ادم رجع من الاجتماع... اختفو في مشوار مهم🙄
وبعد فتره رجعو في وقت متأخر
وكانت نور... في انتظار ليل..
ادم...مساء الخير... يانور
نور...مساء الخير يا ادم..
ليل... ايه اللي مصحيكي لحد الوقت يا نور..
نور...كنت عايزه اتكلم معاك..ممكن
ليل...طبعا يانور
ادم...طيب انا هطلع انا بقى عشان مش قادر وعايز انام
ليل...تمام.
ادم...تصبحو على خير.
نور..وليل وانت من اهله...
ليل... تعالي اعدي يانور...
راح ليل اعد على الكنبه بتعب اعدت ادامه نور... وهي متوتره ومحرجه...
ليل... خير يانور في ايه...
نور....خير بس يعني
ليل...عايزه تعرفي وصلت لنوح ولا لا...صح
نور...بحزن هزت راسها..
ليل...اطمني يانور...نوح كويس
نور...بلهفه عرفت مكانه..
ليل...من يوم ما مشي وانا عارف مكانه يانور.
نور...انت بتقولي كده عشان اسكت.
ليل.. بأبتسامه بكدب يعني
نور...لا والله مقصدش اقصد انك بتريحني خصوصا يعني انك قولت لطنط اول ما تعرف حاجه هتطمنا ...
ليل.... لا يا نور مش بقول كده عشان اريحك نوح كويس والله العظيم بس زي ما قولنا قبل كده هو زعل شويه وحابب يهدا مش اكتر وهيرجع يا نور قريب كمان..
نور...يعني انت بتشوفه.
ليل...مش بالظبط بس هو كويس
نور..نزلت دمعه منها غصب عنها...
ليل... ليه الدموع دي يانور..
نور....خايفه يبعد عني وانا مصدقت اكون معاه ياليل...
طبطب ليل على ايدها. متقلقيش يانور نوح مش هيسيبك وميغركيش الكلمتين اللي قالهم دول... هو يمكن حابب يعرفك هو حس بايه... وكمل بابتسامه بس الواد ده بيحبك.. وهو مصدق اكتر منك انه يكون معاكي ده طلع واقع وانا معرفش...
ابتسمت نور على كلام ليل..
ليل....ايوه كده اضحكي ومش عايزك تعيطي تاني ابدا... وعايزك تجمدي كده 🤨🤨🤨ولما يرجع متحسسهوش انك مصدقتي اتقلي 😉 وربيه شويه عشان انا متغاظ من الواد ده اوي...اتفقنا..
نور....بس هو يرجع..
ليل... ادام بس هو يرجع يبقى مش هتتقلي 😏
ابتسمت...نور لا متقلقش يرجع بس عشان اطمن عليه... وبعدها هعمل االي انت قولت عليه..
ليل...ايوه كده لازم يبقى وراية رجاله..بقولك ايه ماما قالتلك حاجه على بكره...
نور...قالتلي ان كلهم هيتجمعوا بكره عشان انت عايز تقول حاجه..
ليل...تمام كويس يعني عندك خلفيه...
نور...ايوه.
ليل...طيب انا هطلع بقى عشان بقالي يومين منمتش ومش قادر.
نور... ماشي انا كمان هطلع انام..
ليل...تمام يلا..
طلع ليل ونور...
نور...تصبح على خير.
ليل...وانتي من اهل الخير..
دخل ليل ونور كل واحد فيهم الاوضه بتاعته...
ليل خد شاور.. وراح عالسرير...
ومسك موبايله كلم عشق...
عشق...بصوت نايم الووو
ليل....انتي نمتي..
عشق...لسه نايمه انت فين
ليل... انا في البيت خلاص
عشق....طيب ممكن تنام بقى
ليل...انا فعلا هنام لاني فاصل خالص... تمارا كويسه..
عشق...مش اوي مضايقه اوي ومن ساعة ما جينا دخلت اوضتها ومرضيتش تتعشى..
ليل...سبيها براحتها بكره كل حاجه هتبقى تمام...
عشق...يارب..
ليل...يلا روحي كملي نوم..
عشق...وانت نام يلا.
ليل...حاضر هنام...عشق..
عشق....ايوه..
ليل...بحبك.
عشق...بابتسامه...وانا كمان..
ليل....تصبحي على خير يا حبيبي.
عشق...وانت من اهل الخير...
..........
فضلت تمارا صاحيه مش عارفه تنام... ولا جايلها نوم من غير ما تطمن على جاسر...
كل ما تتصل مقفول...
بعتتله تسجيل بصوتها. وكان واضح على صوتها جدا انها معيطه..جاسر...مش عارفه انام من غير ما اطمن عليك... حاولت انام بس مش قادره اغمض عيني...انت وحشتني اوي... اليوم من غيرك وحش .
مش عيزاك تكلمني بس طمني عليك حتى لو ڤويس او بمسدچ انك كويس....انت عودتني انك تبقى موجود في يومي عودتني انام كل يوم على صوتك ...عشان خاطري طمني عليك.
قفلت تمارا.... الموبايل ومسحت دموعها وفضلت اعده عالسرير وشويه وتقوم كانت هتتجنن من القلق...وفجأه رنت موبايلها. جريت عليه واول ما شافت اسم جاسر فتحت بسرعه...
تمارا...جاسر.. انت كويس انت فين طمني عليك..
جاسر....اهدي انا بخير. ياحبيبي..
تمارا...طب انت فين روحت قولي مالك.
جاسر...لا انا مش في البيت...
تمارا...امال انت فين
جاسر...انا عايز اشوفك حالا ياتمارا انا تحت البيت..
تمار ا...😳😳😳تحت بيت ايه هنا
جاسر...ايوه ياتمارا.. تحت عايز اشوفك حالا انزليلي مفيش وقت
تمارا....طيب طيب انا هلبس بسرعه وانزلك...
قفلت تمارا...معاه... ولبست بسرعه وفتحت الباب براحه ونزلت وثواني وكانت تحت لمحته تمارا من بعيد اعد جوه العربيه بيشرب سجاير وملامحه فيها حاجه غريبه..
لفت تمارا... بسرعه وراحت ركبت جمبه.....
اول ما ركبت.... خدها جاسر بدون مقدمات في حضنه...ولاول مره تمارا تبادله الحضن لفت ايدها على رقبته وحضنته جامد...كانت هتموت من القلق عليه...
جاسر...اسف يا حبيبي لو قلقتك....غصب عني
تمارا... وهي بتخرج من حضنه... مش مهم انا المهم انك ادامي وبخير...مالك وليه قافل موبايلك ومختفي.
جاسر... مش مهم الوقت ليه... المهم اللي جاي عشانه....
تمارا... بقلق.... ايه هو
جاسر.... انتي بتحبيني ياتمارا.؟؟؟
تمارا...انت جاي تسألني الوقت إذا كنت بحبك ولا لا با جاسر...
جاسر...ردي عليا يا تمارا. من فضلك...
تمارا....طبعا بحبك يا جاسر...ومقدرش اتخيل حياتي من غيرك...
جاسر.... يعني مستعده تعملي اي حاجه عشان تفضلي معايا...
تمارا.... اي حاجه يا جاسر...بس افضل جنبك...
جاسر....حتى لو قولتلك اني هسافر بكره الصبح بره مصر ومحتاجك معايا... تمارا.. لو موافقه هنطلع. على اي مأذون فاتح ونكتب كتابنا وتبقي مراتي على سنة الله ورسوله ونسافر...الصبح مع بعض..
تمارا😳😳😳😳😳انت بتقول ايه
جاسر...ايه مش عايزه تبقي مراتي..
تمارا... مقصدش كده بس ليه وليه نعمل كده الوقت ومن غير اي حد معانا وليه نسافر...وسفر اي اللي جه فجأه كده .
جاسر... ردي عليا يا تمارا موافقه تكملي عمرك معايا...
تمارا... لما ترد على اسئلتي ياجاسر..
جاسر...هرد على كل حاجه. انتي عايزه تعرفيها... بس مش الوقت ...لان مفيش وقت اصلا....
تمارا... وابتدت تتعصب شويه... هو ابه اللي مش وقته...ومفيش وقت... تختفي من الصبح ومعرفش عنك حاجه ولما تظهر عالفجر. تقولي يلا نتجوز عشان الصبح نسافر لا طبعا لازم اعرف في ايه...
جاسر...حاجات كتير حصلت ياتمارا وسواء وافقتي تيجي معايا او لا... انا الصبح هسافر وهكون بره مصر...
تمارا... يعني ايه وليه طيب حد يعرف انك هتعمل كده
جاسر...لا يا تمارا محدش يعرف مفيش حد يعرف غيرك انتي بس..
تمارا... طب براحه بس عشان انا حاسه ان دماغي وقفت طيب هتسافر وترجع امته..
جاسر .... سكت شويه وبصلها... مش راجع تاني ياتمارا..
تمارا... يعني انت جاي وطالب مني اننا نتجوز واني اسافر معاك..طب انت وعندك سبب تاعبك اوي لدرجه انك بتاخد قرار غلط وقت غضب ومش قايل لحد وواضح ان مش فارق معاك حد يعرف اولا. مش هامك مين يضايق او لا بسبب قرارك..ده انت جاي واخد قرار يا جاسر... بس انا مش زيك يا جاسر... انا عالاقل في هنا اخواتي اسبهم وامشي في لحظه كده أخرجهم من حياتي عشان اسافر معاك...ويارتني عارفه السبب لا انا مطلوب مني انفذ اللي انت عايزه وانا ساكته... وابيع كل اللي حواليه عشان بس ابقى معاك...
جاسر...انا مقولتش تبيعي حد يا تمارا... وا نا مش ببيع حد بردو واظن ان انتي اول حد فكرت فيه وجتلك عشان معنديش استعداد اخسرك او اسيبك...
تمارا...وهي دموعها نازله انا قولتهالك قبل كده انت اناني اوي يا جاسر.انت جاي وعارف من جولك اني مش هوافق...على طلبك...لانه مرفوض بالنسبالي... انا يمكن يا جاسر... معنديش اهل معنديش عيله معنديش ام واب... بس انا عندي اصل يا جاسر... ولايمكن اسيب اخواتي لا يمكن اسيب عشق وزهره... الحاجه الوحيده اللي طلعت بيها من الدنيا...الحاجه الحلوه اللي في حياتي....
لايمكن ابيعهم عشانك يا جاسر حتى لو مش هعرف اعيش من غيرك بس لا يمكن ابيع اخواتي ابدا....انا مش زي اهلي اللي رموني يا جاسر... انا لو عملت اللي انت عايزه انت المفروض تخاف مني...ومتثقش فيا اللي تبيع اخواتها وعشرة عمرها ومعروف عنها كمان ان ملهاش اصل ولا فصل...يتخاف منها ياجاسر...وانا مش كده....
فتحت الباب... عشان تنزل..
جاسر....تمارا....طيب استني انا هقولك واحكيلك على كل حاجه...
بصتله تمارا...وهي دموعها نازله ومبتسمه....مش هتفرق كتير ياجاسر وفر كلامك و سواء عرفت او معرفتش طلبك مرفوض.بالنسبالي... ومتفتكرش اني حتى لو عرفت السبب اني هوافق ...
نزلت... تمارا من العربيه...وهي بتمشي بسرعه ركبت الاسانسير. وطلعت...
اما جاسر... فضل يمرر ايده بعصبيه على وشه وعلى شعره بغضب ...عارف ان هي عندها كل الحق ويمكن يكون احترمها اكتر وكبرت في نظره اكتر بس مكنش عنده اختيار..... دور من تاني العربيه... ومشي...
طلعت تمارا... ودخلت اوضتها من غير ما حد يحس....وانفجرت من العياط.....
ودماغها وقفت عن التفكير... ولقت نفسها من غير ما تحس
.. بتتصل على ليل..
مسك ليل موبايله رد من غير ما يشوف مين...كان مقتول من النوم
ليل....الووووو.
تمارا... بصوت عياط....ايوه ياليل..
اتفزع ليل لما سمع صوت العياط..وفلحظه فكرها عشق..
ليل...عشق....
تمارا...انا تمارا يا ليل..
ليل...تمارا...وبص في الساعه...خير ياتمارا في ايه في حاجه حصلت ولا ايه...
تمارا... بانهيار... جاسر هيسافر ياليل...
ليل... نعم بتقولي ايه... هيسافر فين وليه..
معرفش....هو جالي وطلب مني اني اسافر معاه كان مستنيني اوافق عشان نطلع على اي مأذون ونتجوز واسافر معاه...
ليل.... اعد على حرف السرير يسمعها وهو بيمسك وشه بايده...طب ممكن تهدي بس...الكلام ده حصل امته..
تمارا..... هو جالي تحت. وانا نزلتله لما كلمني. يعني من خمس دقايق طلعت...
ليل...قالك هيسافر امته...
تمارا.....قال الصبح
ليل... طيب انتي ردك كان ايه يا تمارا..
تمارا.... رفضت طبعا يا ليل... مهما كنت بحب جاسر بس انا استحاله اسيب عشق وزهره انا يمكن معنديش اصل بس اتولدت وهما اصلي يا ليل. عشق وزهره الاصل اللي فضلت طول عمري ادور عليه...
ابتسم....ليل.. متقلقيش يا تمارا... مش هيسافر... ومش هيسيبك ومش هتسيبي اخواتك... انا قايم اروحله الوقت..
وبكره... كل حاجه هتخلص...عايزك تنامي وترتاحي شويه... عشان بكره في حاجات كتير هتتقال محتاجه الكل يكون مرتاح...
تمار....انت عارف مكانه..
ليل...ايوه عارف مكانه... ومتقلقيش عليه...
تمارا...طيب ممكن تبقى تطمني..
ليل..حاضر..ياتمارا..هطمنكمتقلقيش..
يلا سلام.
تمارا...سلام...
.........
اعد ليل... عالسرير سرحان. وعينه كلها غموض...
وكلم نفسه بصوت مسموع...
الحقيقه دايما صعبه وبتوجع...بس احيانا بتريح...
وجه الوقت اللي الكل هيرتاح فيه....
قام ليل... يلبس وينزل...🙄🙄🙄
روعه
ردحذف