 |
القصه كامله من الاول عايزه تفااعل عالقصص الكامله شجعونا ياجماعه 😘
_راحة فين يعسل.
=لو سمحت انا لسة معزلة جديد و مش عارفة فين البيت.
_لا ده انا انديلك المعلم هيما امعلم هيما امعلم هيما.
طلعلك بقى واحد من تحت العربية متبهدل فحم بس عضلات و حوار جامد جامد يعني جيه بصلي من فوق لتحت كدة.
-انتي مين يكتكوتة.
=ها؟
_دي يا معلم لسة جاية جديد و شكلها مش عارفة الشقة.
-طب اخلع انت ياض روح أقف في الورشة.
_عينيا يا معلم.
-انتي بقى الست مرام.
=اه اه و لحظة...انت عرفتني منين؟
-هيما يعرف كل حاجة يبت يلا اوريكي الشقة.
=ما هو انا لازم افهم مش اي حد يقولي تعالي اوريكي الشقة اجي كدة انا مش هبلة.
-نفخ و شكله اتعصب و جز على سنانه....قدامي يا كتكوتة عشان ورانا اكل عيش.
و لاني اللي قادرة على التحدي و المواجهة كنت في ديله مبشيش على خطوة معداش عليها بتقولوا اية؟ معنديش ثبات على الوقف... طب انا همشي دلوقتي و بكرة هثبت جامد اوي.
-بصي دي شقتك و ده المفتاح.
=شكرا.
كان هيمشي راح لف.
-صح ما تبقيش تخرجي من الشقة بليل.
=لا بقولك اية مش عشان وصلتني الشقة كدة خلاص و تعملي دور سي السيد و الحب من أول النظرة و الجو ده مليش فيه و انا اخرج و اطلع براحتي.
-ببرود...خلصتي؟
=باستغراب...اية؟
-كدة يبقى خلصتي بصي يا كتكوتة عشان انا على اخري انا كنت بقولك متخرجيش عشان النهاردة الجمعة العمارة هتتنضف من فوقها لتحتها و لو طلعتي ممكن تقعي تكسري و اشيل ذنبك عايزة تطلعي اطلعي و ياريت تهدي على نفسك كدة و كلي عيش ها...كلي عيش.
سبني و مشي و انا بدور على كرامتي اللي يلاقيها يقولي بس هي تقريبا اللي عدى عليها دي المهم دخلت الشقة و لسة بلف و لقيتلك تراب و حشرات و بسم الله ماشاء الله حاجة نيلة انا هنضف ده كله!؟ دي الشقة اللقطة يا ام عبده؟؟
نضفت اما اتهد حيل حيلي و مش قادرة أسند طولي حرفيا و في حشرات تقريبا كان ممكن العلماء يكتشفوها...نمت دخلت في غيبوبة حاجة في الرينج ده و صحيت تاني يوم علشان خاطر انا وركنيج وومن جامدة (working women يعني) و بعون الله بشتغل كاشير قد الدنيا بتخانق مع العملاء على الفكة و شكرا.
_صباح العسسسل.
اية ده هو ده بيكلمني ده بيتكلي علي السين انا يتكلي على السين...لفيتله.
=افندم.
_اية يعسل مالك.
=اية العشم ده هو انا اعرفك.
_انا محسن الجزار.
=و بعدين؟!
كان هيرد بس جيه هيما احم...قصدي المعلم ابراهيم.
-جرا اية يا محسن مالك.
_مفيش كنت بسأل العسل على حاجة.
-ابقى اسألني انا يخويا.
_و انت مالك انت هي مامنعتش.
كان هيرد بس روحت أدخلت بعصبية.
=اية يعم نافخ نفسك لية ده انا من الصبح مش طايقاك انت مفكارني من ميامي يلا ولا مفكارني كيوت ده انا هخليك فرجة للشارع.
_و على اية يعم الطيب احسن انا ماشي ، ببرطمة...بقى دي الحريم دي.
اتعصبت و كنت هنط عليه بس ابراهيم مسكني.
=سمعتك يلا سمعتك انا حريم سبني سبني بقولك مش هعمله حاجة هعرفه غلطه بس.
زقني لورا جامد كدا.
-اية يختي اهدي فرهدتيني و انا قولت البت جاية جديد و رقيقة.
=دي باربي اللي رقيقة بقولك اية عديني انت كملن عشان شغلي.
-شغل اية معندناش نسوان بتشتغل.
=يادي النيلة هو يقولي حريم و انت تقولي نسوان ثم انت مالك.
-بلا مالك بلا بتاع خدي الميتين جنيه دول و كل يوم هديكي مصروفك انجري على البيت.
=لا طبعا انت مين عشان تصرف عليا.
-بت انتي انجزي عشان ورايا شغل و اعملي حسابك الساعة سابعة هقفل الورشة و هاجي عشان اعرف حكايتك.
=تيجي فين يجدع انت.
-هعدي عليكي نخرج و افهمي الكلام صح.
=طيب حاضر.
-شاطرة يا كتكوتة.
سابني و مشي و انا روحت و حرفيا مش عارفة انا عملت كدة لية لية اسمع كلامه و لية اخد فلوس و لية اخرج معاه ده اية الليلة السودة دي مش هخرج يعني مش هخرج.
معلش ياجماعة كنت بلبس عشان اخرج معاه من باب الفضول، فضول؟! فضول اية ده هو اللي هيعرف حكايتي فككم ياجماعة بصراحة كدة انا عايزة انزل لية معرفش...
نزلت كان واقف على العمارة بيكلم واحدة ضاربة اوكسجين شامين معايا؟ في ريحة شياط اوعى تفهموني صح و تقولوا انها مني قربت اسمع بيقولوا اية.
_ازيك يا هيما.
مدتش للولا فرصة يرد صراحة ولا اراديا كدا روحت رديت.
=باستنكار ...مين هيما؟ المعلم ابراهيم بقى هيما!
-مرام انتي جيتي امتى؟
=اسكت انت.
_نظرة شاملة كاملة من فوق لتحت....اممم انتي بقى ميرام.
=باستفزاز...لا انا مرام ميرام ده كريم لخشونة ركبك.
_شايف يا هيما.
=ما هو انا نفسي اشوف هيما ده بس معلش هنخرج دلوقتي و بكرة هشوفه جامد اوي.
_مين هيخرج؟
=انا و ابراهيم سوري قصدي هيمااا.
شديته من ايده و مشيت اتعصبت هي ناقصة حرقت دم و في نص ما انا بمشي و متعصبة وقفت و انا مالي؟ انا مالي؟ ما يولعوا مش يكمن بيحبوا بعض....لحظة بيحبوا بعض لفيتلوا و شكله كان هيتكلم قاطعته بحدة.
=انتم بتحبوا بعض؟
-اتخض...مين؟
=انت و الأستاذة.
-و افرض اية المشكلة؟
=ما تردش على سؤالي بسؤال.
-ردي الأول مضايقة لية.
=مش مضايقة.
-ردي.
=مش مضايقة.
-ردي.
=بزعيق...معرفش.
-ابتسم...متعرفيش اية؟
=اتوترت من ابتسامته و بعدت عيوني عنه....معرفش.
-طب يلا نخرج عشان نتكلم.
=يلا.
-قدامي يا كتكوتة.
=متقولييييش كتكوووتة.
ضحك و مشي قدامي يحلاوة يولاد ده بيضحك لا و مش اي ضحكة دي ضحكة حلوة تخطفك كدة تحسسك انك....لحظة بس كدة انا ماااالييي ها انا ماااليي.
-مرااااام.
=اية اية في اية؟
-بقالي ساعة بكلمك.
=معلش سرحت.
-اللي بيسرح بيبقى بيحب.
=مش شرط ممكن يكون بيفكر هيتغدي اية.
-تصدقي أن انا غلطان انتي مش عميقة ولا تستاهلي حكم.
=ولا متصدعنيش.
-المعلم ابراهيم يتقاله ولا؟
=التواضع يااا.
-المهم بقى نسيبنا من الكلام ده.
=اية المهم.
-احكيلي اية اللي رماكي علينا؟
=بقرف مصتنع....رماني اية الألفاظ دي.
-بت متقرفينيش و ارغي.
=احم انت قفوش على فكرة.
-قف اية يعنيا.
=هحكيلك يجدع خلاص.
-ارغي.
=بص بقى انا اسمي مرام اتربيت في ملجأ مش هقولك الحياة كانت بمبي بس احني كنا تحت مزاجهم لو جم رايقين بيسبونا في حالنا جم متنكدين بيطلعوا عيننا.
-عارف عارف و بيطفوا السجاير في قفاكوا كدة.
=لا كان ممنوع التدخين.
-بجد؟
=اه.
-يعني مش بيطفوها فيكو.
=لا لو دخلوا بيها هيتهزقوا ممكن اكمل بقى.
-انا اسف كملي.
=بس بقى لما تميت ال18 سنة الشجاعة خدتني و هربت روحت عند واحدة كانت بتشتغل هناك بتنضف و كدة كنت متفقة معاها.
-دي اللي هي أم عبده؟
=بالظبط في الأول جابتلي شقة إيجار جمب الشغل...
-قاطعني...بتشغلي اية؟
=بتكبر مصتنع...كاشير قد الدنيا.
-بضحك...مش قادر كاشير بتاع خد بالباقي مستيكة.
=بضيق..خلاص بقى.
-بيكتم الضحك...اسف كملي سبتي الشقة لية؟
=إيجارها كان عالي حبة عليا و كان بياخد تلت تربع مرتبي فهي قالتي على الشقة دي و بسكدا.
-متجوزتش ولا اتخطبتي قبل كدة؟
=اتخطبت.
-بعصبية...نعاام يعني انتي مخطوبة.
=و سبته بامانة سبته.
-هدي حبة...لية؟
=كان عامل انه خاطبني جميلة و المفروض احمد ربنا عليه و انا محدش يشوف نفسه عليا.
-كويس.
=اني سبته؟
-ابتسم...انك عارفة قيمة نفسك.
اتبسط اوي معنى كدة اني غالية عنده روحني البيت و من ساعتها و احنا قريبين اوي من بعض كل يوم يديني مصروفي بعد ما رفض اني اشتغل و بكلمكم من أعماق حبه و بقولكم بركوا لاختكم وقعت وقعة تقيلة فيه.
بس فيه حاجة غريبة بقاله يومين بيبعد عني و النهاردة مجاش زي كل يوم الصبح يديني المصروف قلقت مش بعد ما احبه يبعد مش هقدر استحمل كدة قررت اروحله افهم جايز عملت حاجة.
=مجتش لية النهاردة تديني مصروفي.
-عادي.
=اية هو اللي عادي.
-محسن متقدملك.
=محسن مين؟
-الجزار.
=انت بتتكلم جد.
-و اية الهزار فيها.
=انت موافق؟
-و اية يخصني.
=صح عندك حق.
-انتي موافقة؟
كنت هقول اه عشان اغيظه بس بصراحة خوفت يطلع مبيحبنيش و البس انا.
=لا.
-حسيته فرح...بجد.
=ابتسمت...و اية الهزار فيها.
-بتقلديني يكتوكتة.
=انا مش كتكوتة.
-ضحك...رفضيه لية؟
=يعني مش عارف.
-حابب اسمعها.
=طلعت لساني...ملكش دعوة و هاتلي مصروفي.
-امسكي.
=هخلع بقى.
-في حفظ الله، ابتسم...يكتكوتة.
تاني يوم جيه بيخبط على الباب طلعت جري فتحت.
-العمر لحظة و الكتوتة مش ملاحظه.
=مين قالك مش ملاحظة.
-بقولك اية ما تتجوزيني.
=ابتسمت..لية؟
-عشان تاخدي المصروف في بيتنا بقى.
=بس انا مسكنش في اي حتة.
-عايزة تسكني فين؟
=في قلبك.
-يكتكوتة ده انت مربعة جوا اسمعها بقى.
=ضحكت...بحبك.
-بحبك اوي يكتكوتة قلبي.
NoNa M Khaled
تعليقات
إرسال تعليق