 |
البارت الاول والثاني /الروايه دى حلوه جدا جدا جدا
نونا يا حبيبتي ريحى نفسك جواز مش متجوز
ياسليم يبنى حرام عليك هو انا مش من حقى افرح بيك زى اى ام ف الدنيا وبعدين هو انت هتتجوز اى حد دى بنت عمك
ياماما يا حبيبي بنت عمى على عينى وراسي بس معلش يعنى مش سليم الأسيوطى اللى يتجوز فلاحة من الأرياف
"ثوانى بقا نعرف مين سليم دا شاب وسيم بس مغرور
عنده 25 سنة وماسك الشركه بتاعت والده وبتاع بنات
وعايش حياته بالطول والعرض زى ما بيقولوا"
-مالهم بس أهل الريف ياحبيبى دول احسن ناس
-اه ومين يشهد للعروسه
-يبنى بلاش مناهده واسمع الكلام والله ما هتلاقى زيها دى ادب وجمال
-يا ماما جواز مش هتجوز ها
وهنا بيتدخل عبدالله والد سليم
-ومالهم الفلاحين يا سليم ومش عاجبينك اهل الريف ف ايه ولا نسيت ان اصلك منهم هو عشان اتولدت واتربيت هنا خلاص هتقللل من قيمة الناس وتشوف نفسك
-يابابا انا مقولتش كدا بس هى دى الحقيقة هما جهلة وراجعيين والتخلف هناك ملهوش حدود ولا تعليم ولا تحضر ولا حاجه خالص البنت عندها ميكملش 15 سنة وتلقيها شايلة بدل الطفل اتنين واللى زيها لسه بيجليها فساتين وبتلعب وكمان تلاقيهم بيلبسوهم شوال كدا وولا دخول ولا طلوع وحابسينهم كأنهم عبيد ليه دا كله يعنى مش هو دا الريف اللى عايزنى اتجوز منه
-لا يا بمشمهندس مش هو واللى متخلف ف تفكيره انت مش هما عشان الاحترام مش رجعيه ومش معنى انهم بيحافظو على بناتهم ومش بيسيبوهم ف الشوارع والكباريهات اللى بتسهر فيها مع عاهرات لحد الفجر يبقوا جهلة،،، واللبس المحترم والمحتشم دين واخلاق يا سليم بيه مش تخلف والبنطلون مش هو التحضر
-نرمين بتتكلم: ياسليم يبنى صوابعك مش زى بعضها وبرضوا الناس مش زى بعضها انت معاك حق فيه فعلا بنات بتتجوز ف سن صغير بس دى كانت عادات وبدأت تتغير بس مش معنى انك شايف حاجة وحشه هناك يبقى الكل وحش او يبقوا متخلفين زى ما بتقول
-نهاية الكلام انت هتتجوز بنت عمك وهننزل بكرا عشان كتب الكتاب ومش عايز كتر كلام يا سليم
-يابابا اسمعنى بس
سابهم عبدالله ومشى
-ماما اعملى حسابك جواز مش متجوز
-يبنى ربنا يهديك ابوك مش هيسكت مش عايزين مشاكل انت مش هتخسر حاجه عشانى انا يبنى سافر بس معانا بكرا
-يانونا انتى مش فاهمانى ليه بس انا والله خايف ع البنات انتى متعرفيش دا ممكن يحصل أزمة قومية لو سليم الأسيوطى اتجوز
-ليه يا لمض إن شاء الله هتتسبب ف مجاعة
-لا يانونا بس ف قلوب بنات كتير هتتكسر وبصراحة بقا انا اصلا بحب ها
-عشان خاطري ياسليم سافر بس معانا بكرا
-يووه عشانك بس يا نونا هاجى وامرى إلى الله
_____________________________________________
ف مكان تانى وبالتحديد ف مكان ريفى بس مش ف الصعيد نفسها يعنى بنوتة بتقرأ قرآن بصوت ملاكى وبتدخل عليها امها
-نغم يا حبيبتي بتعملى ايه
-بتوقف نغم قراءه وبترد تعالى يا أمى اتفضلى
-عايزه اتكلم معاكى يا حبيبتي ف موضوع
-أكيد يا ست الحبايب اتفضلي
-يا نغم يبنتى احنا من يوم الحادثه اللى حصلت وخسرنا أبوكى واخوكى الله يرحمهم وانا مليش غيرك ف الدنيا وعايزه اطمن عليكى...وبدأت تبكى
-مالك بس يا ماما فيكى ايه يا حبيبتي اللى حصل دا كان نصيب واحنا ملناش اننا نعترض قدر الله وماشاء فعل
-ونعم بالله يبنتى بس انتى لازم تتجوزى يا نغم ولازم اطمن عليكى قبل اموت
-بعيد الشر عنك يا ست الكل وبعدين جواز ايه بس قولى بقا انك عايزه تخلصى منى صح ها قولى اعترفى
-بابتسامه بتتكلم ناديه وبتقول: عمك عبد الله كلمنى يانغم وطالب ايدك لابنه سليم
-نغم باستغراب عمى؟! ودا فين دا ياماما عمرك ما قولتيلى إن ليا عم
-ليكى يا حبيبتي بس هو سافر من زمان واتجوز واستقر ف القاهره ومن وقتها مجاش تانى
المهم يا نغم هما جايين بكرا يبنتى ودا ابن عمك يعنى هيخاف عليكى وهيصونك ولو مت هبقى مطمنه عليكى وكمان متعلم دا مهندس يعنى انسان محترم
-حاضر ياماما اللى ربنا عايزه يكون
ورجعت تانى للقراءه بس ثوانى ولقت نفسها بدأت تسرح وتقول يا ترى الأيام مخبيه ايه يا نغم
"نغم بنت بسيطه ومتدينه إلى حد كبير ومنتقبه عندها عشرين سنه"..... بقلمي شيرين ذكى
________________________________________
الصبح بدرى نرمين بتصحى سليم
-ياحبيبى قوم بقا هتتأخر على عروستك
-سليم بنوم بيقولها بتكلمى مين ياماما
-يا حبيبى بكلمك انت هكلم مين بس
-سليم بدأ يفتح عينيه : هو انتى لابسه ورايحه فين يا نونا
-يادى النيله عليا ياسليم حرام عليك اللى بتعملوا فيا يبنى قوم هنتأخر ع الناس
-يوووه حاضر يا ماما حاضر
-وبالفعل وصولوا للقرية ودخلوا البيت ونادية أم نغم رحبت بيهم وطلعوا الأوض عشان يرتاحوا
على العشا بيتكلموا
- نرمين : امال عروستنا فين يا ناديه مش هتسلم علينا
-معلش يا أم سليم هى ف المسجد اصل عندها دروس هناك وكمان هى بتحفظ الاطفال قرآن
-عبد الله: ماشاء الله ربنا يبارك لك فيها يارب
بتدخل نغم وتقول السلام عليكم ورحمه الله وبركاته
-بيردوا السلام وبتسلم على عمها اللى اول مره تشوفه ومرات عمها وبترفع النقاب عادى لان سليم اصلا مكنش موجود هو نايم من وقت ما رجعوا
-نرمين : ماشاء الله عليكى يا نغم ربنا يحفظك يبنتى
-نغم : تسلمى يا مرات عمى ربنا يبارك ف عمرك
نازل سليم من على السلم وبتلمحه نغم وبتلتفت قبل ما يشوفها وبتنزل النقاب
-سليم: يا نونا انتى فين
-تعالى يا آدم احنا هنا
-بتستأذن نغم وبتطلع اوضتها
-عبدالله: شوفى يا مرات اخويا احنا طالبين ايد نغم لسليم هو ابن عمها وهيصونها ويحافظ عليها واحنا مش هنلاقى احسن منها لينا
-ناديه : اكيد يا ابو سليم ربنا يتتم بخير بس فيه حاجه عايزاكم تعرفوها......
********************************************
عدى حوالى اسبوعين ونغم وسليم ما شافوش بعض ولا مره ولا حتى صدفه هى بتقضى يومها عادى اغلبه ف المسجد وف مساعده والدتها وهو ينام طول النهار ويفتح نت طول الليل
-بعد ماعدى الأسبوعين كانت كل حاجه جاهزة لكتب الكتاب وبالفعل كتبوا الكتاب وقرروا بقا انهم ينزلوا القاهره
-نرمين ؛ مبروك ياحبيبى والله نغم ست البنات يا سليم
-سليم: نغم دى مين يا ماما
-نرمين بفزع: يادى الفضايح يبنى حرام عليك نغم دى مراتك ياسليم امال انت كنت بتكتب كتابك على مين
-اه هى اسمها نغم طيب ماشى والله كويس إن الفلاحين بيسموا نغم ودى انهى واحده عشان مش عارف
-اه ما انت مش شفتها خالص بص هى منتقبة فاكر يوم ما جينا وانت نزلت وهى استاذنت ومشيت اهى هى دى نغم
-اه وهى لبسه نقاب ليه بقا لازم وحشها انا عارف ياماما من الاول انى هدبس
-ابدا والله يبنى دى زى القمر
-سليم بتريقة اه منا عارف دى تلاقيها أمر بالستر،،،،، بس والله احسن برضو عشان مش عايز اشوف شكلها ويلا نرجع بقا عشان اتخنقت وسابها ومشى
-بعد ما نغم ودعت والدتها نزلت وركبوا العربيه واتحركوا ونرمين وعبدالله راحوا الفيلا ونغم وسليم راحوا شقتهم
-سليم مش مهتم لوجود نغم وبعد ما دخلوا البيت هى دخلت اوضه النوم وغيرت هدومها وصلت وهو ف اوضه تانيه غير هدومه وبعدها فونه رن بيرد سليم
-الو
-مبروك ياسليم بيه مش كنت تقول كنا هنفرح معاك
بس اعمل حسابك مش هايدى الدسوقى اللى يتلعب بيها يابشمهندس....سلام...... بقلمي شيرين ذكى
-سليم يا هايدى استنى اسمعينى.....بس كانت قفلت
-سليم لنفسه منا اللى جبته لنفسي ادينى هخسر حبيبتي عشان حته البتاعه اللى جوه دى
-دخل سليم بغضب اوضه نغم ومن غير مايبص ناحيتها بيقولها بصى يا اسمك ايه،،، انتى اه بنت عمى وعلى راسى بس انا اتجوزتك عشان خاطر اهلى ودا اللى ليكى عندى لكن حياتي ملكيش دخل بيها ولا ليكى دعوه بيا.....
-بتلتفت نغم وبتقول لعلمك انا كمان وافقت عشان خاطر امى ومتقلقش انا مش هدخل ف حياتك...هى بتتكلم وسليم متنح وبيبصلها
-نغم كانت لبسه بجامة زهرى بنص كم وهى ملامحها جميله جدا ومش بتحط اى ميك اب وعيونها خضر
-سليم بيفوق من ذهوله وبيقول يخربيت جمال أمك هو انتى كدا ازاى دا انتى حورية......
#حورية_أخذت_بيدى_إلى_الله
البارت_التانى
التفاعل يا جماعه لو سمحتوا ولو القصه مش عجباكم نوقف النشر ونشوف قصه تانيه
-سليم: يلهوى يخربيت جمال أمك هو انتى ازاى كدا انتى بجد حوريه....هو انتى حقيقى ولا ديكور..بجد صاروخ
-نغم: ها هو انت بتقول ايه مش فاهمه منك حاجه
-سليم: طيب انا همشى قبل ما اعمل اللى ف دماغى وهتبقى مشكله....
سليم كانت دى أول مرة ف حياته كلها يشوف نغم ومن الآخر أول مرة يشوف بنوتة جميلة بالشكل دا وبدون أى
ميك اب فجتله حاله ذهول وفضل متنح فترة بيبصلها بس بعد شوية اتمالك نفسه وخرج من اوضتها
-سليم ف الاوضه التانيه بيكلم نفسه،،،،،هى البت دى بجد ولا ايه حكايتها هو فيه كدا دا انا تقريبا كنت بشوف ف الليله الواحدة بالخمسين بت ف الديسكو وف الشارع وف كل حتة طيب لما هى حلوه وجميله كدا لابسه نقاب ليه وبعدين جمال من نوع مختلف انا اول مره اشوف حد كدا.....فاق سليم من شروده وتفكيره وقال لا بس انا بحب هايدى انا مالى بيها بكره هصالح هايدى ونرجع لبعض ومليش دعوه بدى خالص وانا كدا كدا فى دماغى خطة اخلص بيها منها بس مش دلوقتي عشان ابويا......
_________________________________________
&يوم جديد على ابطالنا&
-صحى سليم من النوم ولبس وخرج نزل الشركة بدون اى اهتمام لوجود نغم او بمعنى أصح هو بيحاول يهرب من عينيها....نزل سليم الشركة وبمجرد ما وصل نادى على السكرتيرة وقالها تنادى على المهندسه هايدى طبعا هى نفسها هايدى اللى كلمته امبارح اللى هى حبيبته وشغاله معاه ف الشركة واللى برضو طمعانة فيه
-الباب خبط ودخلت هايدى وبتقول: حضرتك طلبتنى يا بشمهندس اى خدمة
-سليم: بمشهندس اه دى زعلانه بقا ويومنا طويل
-هايدى: هو حضرتك عايزنى ف حاجه ولا اروح اكمل شغلى
-سليم:-اه طبعا عايزك يا دودى هو انا اقدر استغنى عنك وبعدين ايه حكايه بشمهندس دى تعالى بس هو انتى لسه زعلانه وشدها من ذراعها قربها منه والله كنت هقولك بس مش ادتينى فرصه خالص
-هايدى:-تقولى ايه يا سليم بعد كل اللى بينا رايح تتجوز
-سليم:-يا هايدى اسمعى بس الجوزاه دى كلها فيك اصلا انا ولا كنت عايزها ولا اعرفها بس ابويا ضغط عليا ولو مكنتش وافقت كنت هخسر الشركة كدا
-هايدى ف بالها بتقول تخسر الشركة امال انا بعمل كل دا ليه
-سليم:-يا هايدى والله مكنت اعرفها دى بنت عمى مش من هنا من الريف اصلا وكانت دى اول مره اشوفها ف حياتى كلها اصلا
-هايدى:-اه من الريف فلاحة يعنى ماشى ياسليم انا هصدقك اما نشوف اخرتها
-سليم:-اخرتها فل يا قلب سليم استنى بس عليا انفذ اللى ف دماغى واخد الشركة وهخليها ترجع بلدهم
-ضحكت هايدى بصوت عالى ماشى يا سولى
-سليم:-ايوا بقا دى قالتلى سولى يعنى البطل رضى عنى خلاص
-هايدى بدلع:-اه ياحبي هو انا ليا غيرك
-سليم:-يبقى هنسهر النهارده صح بقالى كتير مسهرتش ومخنوق اوى من الكام يوم اللى غبتهم
-هايدى:-خلاص ياسولى نتقابل النهارده
-خرجت من مكتبه وسليم كان مبسوط إنه عرف يصالحها
بعد شوية خبط على المكتب
طق طق طق ادخل
-سليم سمع صوت عماد ومعرفش يمسك نفسه وقال:- طبعا ياض ادخل
-هو:-ياعم انا كنت داخل انت فاكرنى هستأذن
-سليم:-يخربيتك وحشتنى ايه الغيبه دى
-هو:-انت كمان يا كابو وحشتنى واخدوا بعض بالحضور عامل ايه من غيرى يلا
-سليم:-اتجوزت ياخويا متسافرش تانى
-هو:-وسع وسع بقا كدا نونا تجوزك وانا لأ طيب بس انا اروحلها
-سليم:-يعنى دا كله اللى همك دى دبستنى مش جوزتنى
-هو:-اشطا وربي فرحان فيك عشان تهمد وتسيبك من اللى اسمها هايدى دى
-سليم:-ملكش دعوه بهايدى ياعماد دى حبيبتي وعمرى ما هتخلى عنها انت فاهمنى
-عماد:-حبييتك تانى ياسليم ياض انت مش اتجوزت
-سليم:-ياعم جواز ايه دا على الورق بس عشان خاطر ابويا
-عماد:-المهم انك اتجوزت قبلى بس اما اروحلك بس يا نونا
-سلسم:-طيب روح ونتقابل بالليل
-عماد:-تمام ياصاحبى سلام
-سليم:-سلام... بقلمي شيرين ذكى
"دا عماد ابن خال سليم يعنى عمته تبقى نرمين هو وسليم صحاب من وهما عيال ومعاه ف الشركه بس كان مسافر ف شغل وبيكره هايدى بشكل مش طبيعي لانه عارف حقيقتها وعارف عنها حاجات كتير هنعرفها قدام شويه"
_____________________________________________
ف الفيلا نرمين وعبدالله بيتكلموا
-نرمين:-بجد يا عبدالله مكناش هنلاقى زى نغم ابدا جمال واخلاق والله سليم محظوظ بيها ربنا يهنيهم
-عبدالله:-بس خايف عليها من ابنك يا نرمين البت مؤدبه ومتربيه وهو صايع واخلاقه زفت وهيجيلها كل يوم الفجر من الديسكو والاماكن المعفنه اللى بيروحها
-نرمين:-بكره يعقل ويسيبه من الكلام دا ويبقى احسن واحد ف الدنيا وانا متأكده إن نغم هتغيره
-عبدالله:-والله دا نفسي بس بجد مش عايزينه يظلمها معاه دى يتيمة دا غير الامانه اللى امها حملتهالنا كمان والسر اللى قالته
-نرمين:-اه والله معاك حقك دا لو عرفت هتتعذب وتتعب جامد اوى
-عبدالله:-احنا نستنى شويه وبعدين نبقى نقولها
-سليم قضى يومه ف الشركة عادى وبعدين رجع البيت مشفش نغم بس لقى أكل جاهز ومحطوط على السفره وكان جعان اوى فأكل وبعدها سمع صوت من اوضه نغم وفضوله كان هيموته فراح قرب من الاوضه وسمع صوت نغم وهى بتقرأ قرآن وصوتها ف منتهى الجمال فمعرفش يمنع نفسه وفضل واقف فتره يسمعها بس شويه ونغم انتبهت إنه دخل الشقه فقامت
-نغم:-عايز حاجه او محتاج حاجه اجهزهالك
-سليم:-لا شكرا بس مين قالك تجهزى اكل
-نغم:-دا واجب عليا وكان لازم اعمل كدا
-سليم:-طيب وجبتى فلوس من فين
-نغم:-انا معايا فلوس انا اصلا بشتغل
-سليم بصدمة:- تشتغلى ايه
-نغم:-انا بعمل شغل اون لاين عن طريق النت وبعدين انا متعلمه على فكره ودارسه العلوم الشرعية واخدت سنتين ف كليه دراسات اسلاميه بس الحادثه اللى حصلت لابويا واخويا خلتنى سبت الكليه عشان خاطر ماما كانت محتاجنى بس رجعت اتابع الدراسة اون لاين
-سليم مستغرب نفسه هو انا ليه بيسألها ليه مهتم ومبسوط كدا انه بيسمعها وبعدين قالها تمام بس متجبيش حاجه من معاكى تانى اللى تحتاجيه قوليلي عليه وانا هسيبلك كل يوم وكمان ولو عايزه تكملى دراستك عادى انا ممكن بسهوله اخليكى تقدمى
-نغم:-انا فعلا كنت عايزه بس هنا كل الجامعات مختطلتة وعشان كدا هدرس اون لاين وافضل برضو اشتغل
-سليم:-تمام لو احتاجتى حاجه قوليلي
-نغم:-أكيد تسلم بعد اذنك وسابته ودخلت وهو عينه عليها
-دخل سليم اوضه بيفكر ف نغم وافتكر صوتها وهى بتقرأ قرآن وكان مبسوط وبعدها قال هنام شويه عشان ميعاد هايدى بالليل وفعلا نام..... بقلمي شيرين ذكى
-نغم كانت ف الحمام بتستحمى بس مره واحده صرخت جامد وقالت الحقنى ياسليم الحقنى،،،،صوتها كان جامد لدرجه سليم قام من نومه مفزوع وجرى على مكان الصوت لاقها ف الحمام
-سليم:-مالك يا نغم فيه ايه
-نغم:-اااااه الحقنى الحقنى ياسليم الحقنى وبتصرخ وتتنهد
-سليم:-يبنتى مالك فيكى ايه طيب افتحى طيب؟!!!!
-شويه وصوت نغم اختفى وسليم بينادى مش بترد وقلق جامد وكسر الباب ودخل لقى نغم مرميه على الأرض ومش عليها حاجه غير فوطة........ وسليم بصلها وتنح...#يتبع
ياترى مالها نغم حصلها ايه وسليم هيفضل متنح كدا كتير ولا ايه ظروفه؟! دا اللى هنعرفه ف البارت الجديد؟!!!
-الرواية مش عليها تفاعل فلو مش عجبتكم هوقفها😔💔
#حورية_أخذت_بيدى_إلى_الله
البارت الثالث من هنا هنا هنا هنا
تعليقات
إرسال تعليق