 |
سكريبت ❤
-بقولك طلع متجوز تلاتة الحيوان خدعني واتجوزني وقال أنه مش متجوز
-ما يمكن نسي متظلمهوش.
-بتقولي ايه يا رانيا انتي عبيطة.. نسي ايه هما فرد شراب دوول بشر.... ستات هو ظالمهم وبيعاملهم زي الجواري!!
-بس ده شرع ربنا
زعقت وقولت :
-ما دام شرع ربنا ليه مقاليش الحقيقة.... ليه استغفلني وقالي أنه عازب هو ربنا شرع الكذب وأنا معرفش
قمت وبصتلها بغضب وقولت :
-بعدين انتي ازاي واقفة معاه... أنا أختك مفروض تقفي معايا أنا.
-أصل.... أصل
-فيه ايه يا رانيا انطقي
متكلمتش.... الشك زاد جوايا... برودها مش طبيعي
-أنا كنت عارفة أنه متجوز تلاتة
-نعم
-أهدي بس.... اسمعيني وافهميني
-لحظة لحظة... انتي كنتي عارفة أنه متجوز تلاتة ورغم كده استغفلتوني انتي وهو... صح الكلام ده
-منار اسمعيني بس
-انطقي يا رانيا صح ولا غلط
-صح.... بس اسمعي مبرراتي الأول.
زقيت ايدها وصرخت:
-اسمع ايه وزفت ايه... اسمع أن اختي اتفقت تجوزني لواحد متجوز تلاتة.... تقلي مني بالشكل ده.... تخليني اتصدم صدمة عمري لما اعرف أن البيه متجوز تلاتة يوم الصباحية... لا وجايين يباركولي إني بقيت من حريم الاستاذ.... أنا تهينيني الإهانة دي
-يا منار ما هو متزعليش مني بصراحة انتي قربتي تتمي التلاتين ومحدش كان بيتقدملك خالص عشان كده لما أنور جه قلنا نخبي عليكي
-انتوا مجانين صح... أنا لسه عندي سبعة وعشرين سنة!! حتي لو عندي خمسين ملكومش حق تدمروا حياتي كده
طلعت لأمي وأنا ببكي كنت منهارة... مش قادرة اصدق أن عيلتي تعمل كده فيا
-انتي ازاي تعملي فيا كده... ازاي تكوني عارفة أنه متجوز تلاتة وتجوزيني ليه ازاي تكدبوا عليا وتخدعوني كده...
قامت ماما وقالت بتوتر:
-اسمعيني بس
-اسمع ايه وزفت ايه... انتوا كدابين متفرقوش حاجة عن الحيوان اللي اتجوزته.
قرب اخويا الاصغر مني وضربني قلم وقال:
-اتكلمي مع أمك عدل يا منار بدل والله اكسر عضمك.... وهترجعي بيت جوزك وتحطي جزمة في بوقك كمان... الراجل متجوز مش كفر يعني بلاش الافورة الكدابة دي مش علي آخر الزمن واحدة زيك هتعارض شرع ربنا.
-أنت بتمد إيدك عليا يا ياسر
-واكسر دماغك كمان... اسمعي طلاق مش هيحصل يا منار وهترجعي لبيت جوزك
-مش هرجع يا ياسر
ضربني بالقلم وزعق :
-يالا يا بت جهزي نفسك والا هطحنك دلوقتي.
........
بعد ساعة كنت ببكي وأنا قاعدة في بيت أنور لما أخويا قال :
-خلاص يا أبو نسب هي عقلت... بس انت راضيها برضه الموضوع صعب عليها.
-متقلقش يا ياسر منور في عينيا.
مشي ياسر وقرب أنور مني وقال :
-ايه بقا يا عروسة خلاص فكيها وليا عليكي هعملك شهر عسل معملتهوش لحد من مرتاتي التلاتة.
بصتله وقولت :
-ممكن أنام
-نعم!!
-معلش يا أنور حابه أنام دلوقتي تصبح علي خير..
ونومت وسيبته بس في عقلي فكرة واحدة ازاي أعلمه الأدب
.........
تاني يوم...
صحيت لقيت دوشة... طلعت من اوضتي ولقيت مرتات جوزي التلاتة قاعدين.. دورت علي أنور وملقيتهوش
-بتدوري علي جوزك يا عروسة... هو راح يجيبلنا فطار .... تعالي اقعدي متخافيش مش هناكلك...
ابتسمت وقررت استخدام سلاحي الا قوي واللي هو الهدوء... قربت وقعدت جمبهم وقولت:
-سوري المرة اللي فاتت متعرفناش كويس اساميكم ايه.
ضحكت واحدة منهم وقالت:
-السهوكة دي تستخدميها مع غيرنا يا حبيبتي لكن احنا مش هنرتاح إلا لما نطردك من حياة أنور وناخده منك
-خدوه
-ايه
قالوها التلاتة بصدمة فقلت وأنا حاطة رجل علي رجل :
-أنا مش مهتمة بأنور خالص بس اهلي أجبروني ارجعله... هو خدعني زي ما خدعكم بس الفرق ما بيننا أنكم استسلمته للأمر الواقع لكن أنا لا... أنا هعاقب أنور علي اللي عمله وعليا وعلي اعدائي.
واحدة بصتلي وقالت:
-واحنا هنسيبك تعملي كده مثلا.
-أيوة لأن ببساطة أنا مش عدوتكم بالعكس أنا جاية انقذكم... ايه اللي قدمهولكم أنور بالضبط... لا الحب ولا الاحترام ولا العدل... بالعكس كدب عليكم وحطكم قدام الأمر الواقع وانتوا سكتوا.... انتوا فاكرين أنه لو طلقني الموضوع هيخلص بالعكس هيتجوز تاني وتالت لأن ده مرض فيه....
كلهم سكتوا وبصولي بفضول... واحدة فيهم اتشجعت وقالت :
-هتعاقبيه ازاي.
-هقولكم!
يتبع
الجزء التاني❤بقلم سولييه نصار❤شكرا لتفاعلكم السكر❤❤
جه أنور من برة لقانا قاعدين وبنضحك... وقف مستغرب وهو ماسك الأكل... بصيتله بخبث وقولت :
-تعالي يا بيبي مرتاتك طلعوا زي العسل بجد شكلنا هنبقي أصحاب اووي.
ضحك بتوتر وقال :
-بجد مبسوط أنكم اتفقتوا
-طبعا يا بيبي هنتفق... احنا ستات زي بعض... بعدين تعالي يا أنور واحضرنا بقولهم أنك هتاخدني هاني مون في مكان فاخر وعايزاهم يجوا معانا رافضين... أنا اقنعت سلمي أقنع انت هبة ونيرمين... بجد يا جماعة هيكون حاجة لطيفة لو روحنا كلنا سوا
-مينفعش يا منار.
قالها أنور بسرعة وهو متوتر
ابتسمت بخبث وقولت :
-ليه بس كده يا حبيبي أنا كان نفسي اتعرف أكتر بيهم ونكون سوا ولا أنت رأيك ايه... بليز يا حبيبي وافق مش انت قلتلي أنك عايزاني اعتبرهم أخواتي أهي فرصة ولا أنت مش عايز تجيبهم معانا.
-لا... لا طبعا يجوا .
ابتسمت وغمزت ليهم وأهي أول خطة نجحت
........
اخترنا أنا وسلمي وهبة ونيرمين أفخم فندق في شرم لشهر العسل وحجزنا جناح كبير... كنت فرحانة فيه وأنا بشوفه محتاس... كان متوتر دايما وهو بيشوف الفواتير العالية... قررت استفاد من الجواز ده بأقصي درجة... اشتريت كل اللي نفسي فيه... اتحدنا أنا وهما وقدرنا نخليه يشحت
جالي في يوم وقال :
-حبيبتي أنا مضطر اقطع شهر العسل أنا سيكا كده وهشحت مصاريفكم كترت اووي
قمت وأنا متعصبة وقولت:
-يعني مش كفاية خدعتني كمان عايز تقطع شهر العسل بتاعي... لا وألف لا يا أنور
-حبيبتي مبقاش معايا فلوس كفاية... لاحظي إني فاتح تلت بيوت غيرك.
--والله مش مشكلتي... مش قد الجواز متتجوزش
-احترمي نفسك يا منار أنا لحد دلوقتي ساكتلك -لا يا حبيبي وريني هتعمل ايه.
سكت فضحكت وقولت :
-أنا مش زي نسوانك يا بابا تقدر تكسرني لا فوق أنا اكسرك واكسر عشرة زيك... فوق كده واعرف أنت بتكلم مين
-ماشي يا منار
اتصدمت.. مش دي خطتي كنت عايزة استفزة بحيث يضربني وبكده أرفع عليه قضية... بس للاسف خطتي فشلت..
....
في نفس اليوم بالليل كنا في مطعم الفندق... طلبنا أنا والبنات أكل كتير.... حسيته هيموت من الغل بس طنشته... لمحت بعيني واحدة بتحاول تلاغيه وهو معانا... عملت نفسي مش واخدة بالي ... وفي مخي كونت خطة تاني.... بصيت لأنور بلطف وقولت :
-حبيبي شكلك تعبان روح أنت وأنا عليا الحساب المرة دي..
أبتسم براحة ومشي بسرعة.. وبعد دقيقة بالضبط خرجت وراه....
لو مشت الأمور زي ما أنا عايزة هقدر انتقم منه بطريقة أبشع...... بعد نص ساعة قمت.... كنت متوقعة هيكون فين.... روحت الجناح... وفتحته وشوفتهم... ابتسمت بخبث ورجعت بلغت جوز الست وأمن الفندق.
...
بعد شهرين
كنت قاعدة في النادي أنا والبنات وبنضحك ونهزر... رجعت راسي وأنا بفتكر الفضيحة الكبيرة اللي حصلت لأنور لما جوز الست شافها معاه في الجناح.... الأمن طرده بره لفندق وأنا وسلمي وهبة ونيرمين رفعنا عليه قضية زنا وكسبناها واخدنا تعويض كمان... من سوء حظه وحسن حظي أن اللي معاه كانت متجوزة وإلا مكنتش هقدر أرفع عليه القضية.... بفتكر اليوم اللي أخويا جالي أثناء القضية
فلاش باك
-وكمان عايزة تفضحي جوزك يا بنت...
ولسه هيضربني بالقلم مسكت ايده وقولت :
-لو فكرت تمد إيدك تاني هحبسك زيه.
رجع بصدمة وقال:
-هتحبسيني
-أيوة يا ياسر هحبسك واخليك تتذل عشان اطلعك عشان كده يا شاطر روح لأهلك وقولهم يعتبروا بنتهم ماتت أنا رايحة أعيش مع بابا في الإسكندرية
طلع بسرعة وهو متعصب.... كان فاكر إني هخاف منه بس لا أنا المرة دي مش هخاف من حد مش هسمح ليهم يعاملوني كأني سلعة اللي هيجي عليا هكسره
باك
سلمي:مش قادرة أنسي نظرة أنور في المحكمة لما كلنا وقفنا جمبك... الغبي أفتكر أننا هننسي عمايله لأننا بنحبه... بس ده غلطنا احنا اتنازلنا عشان كتير.
مسكت هبة أيدي وقالت بحب :
-شكرا يا منار ابن علمتينا أن مفيش حد يستحق نضحي عشانه... لأن لما بنتنازل هما بيستغلوا ده
بصتلي نيرمين وقالت:
-شكرا لأنك فهمتينا أن مفيش راجل يستحق نتخانق بسببه
ضحكت وقولت :
-أنا دايما بقول حكمة حلوة لو قلبك مات
كملوا هما :
-متجيش علي أربعة اخوات ❤
وضحكنا كلنا واتناقشنا في المشروع اللي هنفتحه بفلوس التعويض اللي اخدناها من أنور.. أصل التعويض كان كبير سيكا يالا ربنا ميوقعش راجل الوقعة اللي وقعها أنور معانا
تمت
#انتقام_منار
#سولييه_نصار
تعليقات
إرسال تعليق