 |
سكريبت ❤
-أنت اتجننت جاي تقولي هتجوز وكمان عايزني أرقص في فرحك؟!!
بصلي ادم بتريقة وقال :
-وفيها ايه يا حبيبتي ما انتي كنتي بترقصي قبل كده؟! نسيتي أصلك يا ميرا... ما انتي كنتي رقاصة قبل ما نتجوز وخبيتي عليا وعملتي فيها الخضرة الشريفة
كنت هضربه بالقلم بس مسك أيدي وقال بعصبية:
-اياكي وإلا هكسر ايديكي.
زقيته وأنا ببكي وقولت:
-طلقني.
ضحك بسخرية وقال:
-نجوم السما اقربلك يا حبيبتي.... مستحيل اطلقك....
-هرفع قضية خلع. (بقلم سولييه نصار )
-هتخسريها وحتي لو كسبتيها مش هتقدري تاخدي ابننا.... ايه هتقدري تعيشي من غير ابنك.
-أنت حيوان!
-صدقيني مش أكتر من واحدة اوهمت واحد أنها شريفة عشان يكتشف بعد ما اتجوز وخلف منها أنها كانت رقاصة رخيصة بتشتغل في الكباريهات.
بكيت وانا بقول :
-حرام عليك انا توبت ربنا بيتقبل التوبة أنت مين عشان تعايرني بالماضي.
مسك شعري جامد وعينيه مدمعة وقال :
-كنتي قادرة تقولي الحقيقة... ليه بتخدعيني... ليه!! أنا حبيتك أكتر من نفسي.... حققتلك اللي نفسك فيه... افتكرتك ملاك.
زقني ووقعني علي الأرض ومسح دموعه بسرعة وقال :
-من هنا ورايح انتي هتبقي مجرد خدامة وبس خدامة ليا ولابني ولمراتي.. مراتي الجديدة اللي أكيد هتكون أشرف منك ومن عيلة محترمة مش واحدة كانت دايرة علي حل شعرها زمان.
سابني ومشي وأنا قعدت أبكي.... أسرتي السعيدة اللي بنيتها جه الماضي بتاعي ودمره.... يارب أنا توبت وقررت مرجعش تاني ليه الناس مش بترحم.... ليه مش بتنسي... ليه مش بتغفر وتسامح زيك.... أنا الظروف اجبرتني ابقي رقاصة أنا عارفة أن ده مش مبرر بس أنا توبت والله توبت...
قعدت أبكي كتير وبعد نص ساعة استغفرت وقومت وغسلت وشي واتوضيت وصليت.... قعدت علي السجادة وأنا بدعي أن ربنا يهدي جوزي ويسامحني.
....
تاني يوم
-قومي.... انتي يا ست قومي يالا.
فوقت من النوم لقيت آدم في وشي لابس كويس ومكشر
-فيه ايه؟
-فيه أن حماتي وخطيبتي برة وحضرتك نايمة
-ايه
-جاتك أوه فزي اعمليلهم حاجة يشربوها
-أنت اتجننت يا آدم.
مسكني من شعري وقال :
-لو محترمتيش نفسك لسانك ده هقصه... فزي يالا
بكيت وانا بقول بخوف :
-حاضر.
.....
جهزت العصاير والكيك وطلعت عشان اضايفهم.. كنت حاسه بنار في قلبي... جوزي بيضيع مني وبيتي بيتدمر.... ده جاب اللي هيتجوزها هنا وناوي. يخليني أعيش خدامة ليهم.... يارب مليش غيرك
طلعت علي الصالة واتصدمت لما شوفت العروسة... طلعت.....
يتبع
#انتقام_عاشق
#سولييه_نصار
تفاعل حلو بقا عشان انزل كمان بارت❤
الجزء التاني❤شكرا لتفاعلكم السكر❤😍
مكنتش مصدقة اللي شايفاه قدامي.... وعرفت أن الماضي بتاعي هيفضل يلاحقني... جوزي هيتجوز أكتر واحدة بتكرهني.... جوزي هيتجوز الست اللي سابها جوزها بسببي... كارمن!!... بصتلي كارمن بسخرية وضحكت بإنتصار وهي بتحط رجل علي رجل....
-ما تتحركي فيه ايه قدمي العصير للضيوف
هزيت رأسي وقدمت ليهم العصير وأنا حاسه أن حياتي بتتدمر.... وأن الغلطات اللي أنا عملتها زمان والناس اللي ظلمتهم عشان مصلحتي رجعوا عشان ينتقموا مني.
دخلت بسرعة الأوضة وحطيت أيدي علي بوقي وبدأت أبكي... أنا افتكرت أن خلاص الماضي بتاعي مات وهقدر أعيش حياتي كويس... بس الماضى رجع يلاحقني تاني.... قعدت علي الأرض وأنا بفتكر كارمن البنت الحلوة اللطيفة اللي كانت متجوزة عزت شاب وسيم وغني بس فاسد.... كان علطول يجي عندنا الكبارية... كان كل البنات هناك حواليه بسبب جماله وفلوسه بس أنا الوحيدة اللي لفت نظره... عرض عليا الجواز ولقيتها فرصة حلوة عشان أطلع من المستنقع اللي أنا فيه ولما عرفت مراته كارمن جات الكباريه تترجاني.. (بقلم سولييه نصار )
فلاش باك
-ابوس ايديكي متخربيش بيتي جوزي عايز يسيبني عشانك متتجوزيش عزت ارفضيه... أنا ست زيك ازاي تبني سعادتك علي تعاستي.
قلبي حن للحظات بس افتكرت أن عزت هو أملي الوحيد عشان أطلع من هنا... ابتسمت وقولت:
-انتي مش أول ولا آخر واحدة هتكون ليها ضرة... الرجالة عينيهم زايغة مفروض تكوني اتعودتي علي كده بالذات لو متجوزة واحد صاحب مزاج زي عزت متقلقيش مش هخليه يسيبك ولا يظلمك أنا مرضاش بالظلم.
عينيها دمعت وهي بتبصلي وقالت:
-يعني مفيش فايدة
هزيت كتفي وقولت :
-جوزك هو اللي جري ورايا مش أنا ولو مكنتش أنا هيتجوز عليكي غيري فاحمدي ربنا.
قعدت تبكي قدامي وانا ببصلها ببرود... صحيح من برة كنت باردة بس من جوا كنت بتقطع.... كان نفسي تفهم أن مش بإيدي .. مش بإيدي ابقي كده... بس الحياة اللي عيشتها. هي اللي علمتني ابقي كده عشان لو مبقتش أنانية هيتداس عليا
باك.
مسحت دموعي لما لقيت ابني مسك ايدي لسه هشيله بس شهقت لما لقيتها قدامي.... كانت بتبصلي بسخرية وحقد ... عينيها فيها حقد يخوف لدرجة ابني اللي كان جمبي مسك فيا جامد... قربت مني وهي بتبص لابني وقالت:
-ابنك جميل زيك يا ميرا ولا اناديك بإسم دلع زمان يا لولو... مش ده اللي كان عزت بيناديكي بيه
-انتي عايزة مننا ايه يا كارمن؟
مردتش عليا ولا بصت عليا حتي.... عينيها كانت علي ابني...
-تعرفي يا ميرا أنا كنت حامل لما عزت سابني بسببك.
-أنا حاولت معاه عشان ميسبكيش
قلت بسرعة وأنا بتمني أنها تصدقني بس مهتمتش بيا وكملت كلامها :
-بس للاسف اجهضت بسبب الضغط النفسي... تخيلي لو عزت مسابنيش بسببك كان ممكن اولد الطفل ده وكان أو كانت هتبقي أكبر من ابنك...
-أنا... أنا
بصتلي بحقد وقالت :
-عشان كده انتي لازم تتعاقبي.... زي ما اخدتي جوزي وابني زمان.
ابتسمت بشر وكملت:
-أنا كمان هاخد جوزك وابنك.
يتبع
#انتقام_عاشق
#سولييه_نصار
ونكمل بكرة متنسوش ارائكم ولايكاتكم عشان تشجعوني ❤
الجزء الاخير ❤
بصتلي كارمن والدموع بتلمع في عينيها.... حطيت وشي في الأرض...أنا والله مكنتش عايزة اذيها.... لو كنت اعرف أنها حامل كنت بعدت عن جوزها خالص... قربت منها وقولت :
-لو كنت اعرف .
-ايه كنتي هتسيبي جوزي.
بكيت وقولت :
-أيوة كنت هسيبه في حاله كنت هرفضه.... أنا بس كنت زي الغريقة.... كنت عايزة أي حاجة تطلعني من المستنقع ده... مفكرتش إلا في نفسي.... بس حسي بيا افهميني... اسمعي مبرراتي... أنا مخترتش أكون رقاصة بس تخيلي تتولدي وسط أب وام اجبروها تبقي رقاصة تخيلي أبويا يخليني ابقي رقاصة لا همه عرضه ولا شرفه واللي يسوي واللي ميسواش يتطاول عليا.... ولما كنت برفض كنت بضرب واترمي في أوضة ضلمة بالأيام من غير أكل.... كتير حاولت أهرب بس كانوا بيجبوني... حاولت أكلم البوليس بس محدش ساعدني... ده مش مبرر إني اكمل واتقبل بس والله أنا حاولت أطلع من الحياة دي من غير ما أذي حد بس فشلت والحل الوحيد كان إني الاقي عريس واتجوز.
-وملقيتيش إلا جوزي؟!.
-هو اللي جالي... حاول معايا كتير... اداني وعود كتير بالأمان... قالي أنه عارف إني مبحبش الحياة دي.... قالي أنه هيطلعني من هنا وأنا استغليت الفرصة... بس بعدين هو اللي اتراجع وساعتها أنا قدرت أهرب بعيد عن أهلي وعملت حياة جديدة لحد ما قابلت آدم.
دموعها نزلت وقالت:
-مستحيل اسامحك يا ميرا مستحيل... وهاخد ابنك وجوزك... هعيشك اللي عيشته.
بعدين سابتني ومشيت.... قعدت علي الأرض وفضلت أبكي وأنا حاضنة ابني.... حسيت إني وحيدة... وأن حياتي خلاص انتهت
.........
مر أسبوعين وكان ميعاد الفرح بعد يومين روحت اتكلم مع آدم لآخر مرة
-خير جاية ليه؟
-حابة اتكلم معاك
-عن ايه إن شاء الله خلاص كلامنا انتهي لما اكتشفت كدبك
-اسمعني لمرة أخيرة وبعدين قرر
سكت ومتكلمش بصيتله وبدأت اتكلم :
-محدش عاقل بيختار حياة وحشة زي اللي كنت عايشاها يا آدم.... محدش بيختار يكون وحش بإرادته... وأنا والله كنت كل ما أرقص بحس بنار في قلبي وقهر... قهر من اهلي اللي بدل ما يحموني تخلوا عني واجبروني اشتغل شغلانة زي كده.... قهر أن محدش في يوم وقف جمبي.... قهر كل أما أشوف واحد ملوش لازمة ليه حق بلمسني ويتطاول عليا وأنا مش قادرة أنطق.
مسحت دموعي وكملت :
-بس لما لقيت الفرصة هربت... هربت بعيد وعملت حياة جديدة... توبت والتزمت... قولي يا آدم من أول ما اتجوزتني عمرك شوفت حاجة مني وحشة.... أنا أهو أم ابنك قدرت اربيه ولا لا.... أنا مش وحشة بس الظروف خلتني كده.
-مستنياني أشفق عليكي مثلا
-لا يا آدم بس طالبة منك بحق العشرة لو مكانش الحب وبحق لو شوفت يوم حلو معايا تطلقني ومتحرقش قلبي وتتجوز واحدة تاني وانا علي ذمتك.... ومتهينش التوبة بتاعتي لأني واثقة أن ربنا غفرلي من زمان... هو الوحيد اللي سامحني لكن انتوا مش هتسامحوني وهتجلدوني دايما بسبب الماضي.
قولت كلامي ومشيت من قدامه.
........
تاني يوم.
جات كارمن بيتنا كانت حابة تتكلم مع آدم.. ومعايا أنا!
قعدت وانا متوترة عشان اسمع كلامها.
بصتلي وابتسمت وقالت:
-أنا كرهتك يا ميرا ولحد دلوقتي مسامحتكيش بس انتي عملتيلي أكبر خدمة في حياتي لما خلصتيني من عزت... لما بفكر الحالة التعيسة اللي وصلتلها لما كنت متجوزة واحد زي عزت بتاع ستات علطول بيهينني وبيضربني... بستغرب ازاي كنت متمسكة فيه... ازاي سمعت لقلبي ودوست علي كرامتي علشانه.... وازاي أنا عايزة ادوق واحدة تاني نفس اللي دوقته.... لما بفكر بشوف أنك صحيح غلطتي في حقي بس كمان انقذتيني عشان كده أنا بشكرك.
بصتلي بصدمة فضحكت وقالت:
-لما فكرت في كلامك امبارح حسيت أن قلبي وجعني... ليه احنا كبشر مبنقبلش اللي بيتوب وسطنا.؟ ليه مبندهوش فرصة بدل ما يرجع تاني لأخطائه.... ربنا بيقبل توبة العبد فمين احنا عشان نرفض التوبة دي ونعامله بإحتقار.... إذا كان الله المنزه عن أي غلط قبل توبته احنا كبشر مليانين أخطاء ازاي نزايد ونعترض...
بكيت فقربت مني وحضنتني وقالت:
-انتي شجاعة لأنك وقفتي الغلط...محدش ليه أنه يحاسبك علي ماضيكي.
مسحت دموعي وقلتلها بصوت واطي :
-شكرا.
-يعني خلاص اتصافينا؟
ضحكت وانا بقول :
-طبعا
-يعني هتحضري فرحي؟
اتصدمت وبصيت لآدم هي مش مفروض سامحتني.
ضحك آدم وضحكت هي وخرجت دعوة من شنطتها وقالت:
-دي دعوة فرحي بس طبعا مش من آدم... أنا هتجوز واحد تاني.
كنت لسه متنحة لما كملت كارمن :
-أنا اصلا مخطوبة لصاحب أخويا الكبير وجوازي من آدم كان لعبة عملناها عليكي عشان ننتقم منك وعرفنا اننا غلطانين وبنعتذر ليكي.
اديتني الدعوة وقالت:
-هزعل لو مجيتيش.. وبالتوفيق في حياتك.
لسه هتمشي حضنتها وقولت:
-وبالتوفيق ليكي في حياتك الجديدة بتمني تلاقي السعادة اللي ملقيتهاش مع عزت.
بعدت وابتسمت ومشيت.
قرب مني آدم وحضني هو وابننا.
احيانا بنقف في طريق سد وبنقول هي دي النهاية بس سبحان الله ربنا بيدبرها من عنده بطريقة تخلينا مندهشين بس ليه نندهش اللي خلق الكون ده كله ودبره قادر يدبر امورنا ببساطة... هو دايما بيدينا الفرص اللي تخلينا نقرب منه أكتر واكتر.
تمت
#انتقام_عاشق
#سولييه_نصار
تعليقات
إرسال تعليق