 |
سكريبت ❤
-عايزة اشتغل رقاصة.
-افندم!
بصيتله ببرود وقولت :
-ده شرطي يا استاذ تامر لو عايز تتجوزني تحترم رغباتي كأنثي وأنا هحترم رغباتك يعني تشغلني رقاصة وأنا هخليك تخوني تلات مرات في الأسبوع.
-انتي مجنونة أكيد!
-خلاص خليهم أربع مرات في الأسبوع إن شالله ما حد حوش.
قام متعصب وقال:(بقلم سولييه نصار )
-لا ايه الجنان ده انتي مش طبيعية وأنا مستحيل اتجوز واحدة زيك
وبعدين سابني ومشي فرحت قولت:
-أنت اللي خسران كنت هخليك تخوني خمس مرات في الأسبوع... رجالة نكد بصحيح!
-سااااارة
سمعت بابا بيزعق فلطمت وقولت:
-بيدور عليا... بيدور عليا
بعدين استخبيت تحت السرير...
جه ابويا وهو ماسك الخرطوم وبيزعق :
-اطلعي يا بت من عندك
-لا مش طالع
-يا بت ده تالت عريس تطفشيه... انتي ناوية تعنسي وتقعديلي في البيت اطلعي يا بت
-قولتلك مش طالع... وروق نفسك يا حجوج هنخسر بعضنا عشان واحد إسمه تامر اومال لو اسمه جاسر كنت هتعمل ايه.
نزلي تحت السرير فصرخت وقولت:
-لا يا بابا عيب علي سنك تنزل تحت السرير عشان تضربني..
سحبني من شعري وقال :
-أنا هوريكي يا سارة.
صرخت قبل ما يضربني حتي
بصلي بصدمة وقال:
-هو أنا لسه لمستك يا زفته أنت
-حرررام يا بابا كفاية تعذب ولية مسكينة زيي ولا كمني أمي ميتة ومليش لا حبيب ولا قريب ولا حتي غريب يسأل فيا يخربيت الزولم.
قام وقال:
-حسبي الله ونعم الوكيل فيكي يا شيخة يارب تتجوزي بسرعة عشان تغوري من وشي
وبعدين سابني ومشي وهو بيشتمني أصل ابويا بيحبني اووي... اتصلت بصاحبتي ريم
-أيوة يا ريم... لا يا روحي طفشته متقلقيش... يا بنتي جواز ايه بس أنا بتاعة الكلام الفاضي ده... يعني اتجوز عشان آكل راجل غريب وارتبله بيته ليه فاتحاها جمعية خيرية... يالا اسبقيني علي النادي وأنا هحصلك... باي يا مزة.
......
كنت راكبة عربيتي وسايقة بسرعة وأنا بدندن مع اغنيتي المفضلة لما فجأة خبطت واحد بالعربية... وده الموقف اللي قلب حياتي كلها!!
طلعت من العربية وأنا متعصبة لقيت اللي خبطته واقع علي الأرض
-انتي يا غبي انت مش تحاسب كسرت عربيتي!
بصلي بفضب وقال :(بقلم سولييه نصار )
-أنا اللي أحاسب برضه انتي غبية انتي اللي خبطتيني.... ده أنا هوديكي في ستين داهية.
-ده أنا اللي هوديك في داهية أنت كسرت عربيتي ولازم تدفع فلوس التصليح.
جه شرطي وهو بيقول :
-حسام باشا أنت كويس؟!
بصلي بغضب وقال :
-يا بنتي انتي مجنونة مش واخدة بالك انتي بتكلمي مين؟! ده حسام باشا!
خرست خالص وفي عقلي كنت بستوعب اللي عملته
يا ليلة سوحة أنا خبطت ضابط شرطة! ده أنا هتنفخ
عينيا دمعت وروحت وأنا بحاول اساعده بس زق أيدي فقلت:
-لا مؤاخذة يا سعادة البيه متأخذنيش حقك عليا. زعق :
-معتز خد البت دي علي البوكس.
-يالهووي يا لهووي هيحبسوكي يا نوسة
.........
في قسم الشرطة
-يخربيت الزولم اللي في البلد دي أنت اللي خبطت عربيتي وأنا هتحبس واتسجن.... حرااام خبط حسام علي المكتب وقال:
-هو أنا لسه عملت حاجة يا بنتي؟!
-ليه هو انت ناوي تعمل ايه اكتر من كده.
حطيت أيدي علي بوقي :
-ليه هو انت ناوي تعمل فيا ايه... ناوي تعمل فيا زي ما أستاذ سيف الحديدي علم في آدم في المسلسل هتجيبلي كلاب بوليسي.
بصلي بصدمة فبكيت وقولت:
-ليه يا باشا كده حرام عليك ليه. بتعمل فيا كده ولا كمني مليش حبيب ولا قريب ولا غريب يسأل عليا... ولا عشان أمي ميتة وأبويا بيعذبني ويطفي سجاير في رقبتي...
-معتز تعالي وخد البت دي الحبس!
يالهووي... يا باشا اصبر بس هنتفاهم ما وانت كويس وزي الجن أهو.
-معتز!!!
-طيب خلينا نتفق ايه رأيك أصلح غلطتي واتجوزك أنت عارف أنا نص مصر بتجري ورايا عشان تتجوزني وأنا مطنشاهم.
-أنت يا زفت يا معتز خد البت دي علي الحجز. مسكني معتز فقولت :
-لو اتجوزتني هخليك تخوني تلات مرات في الأسبوع.
-علي الحبس يا بت.
-طب تسع مرات والله ده عرض حلو وبسمسم
اخدني معتز بالعافية وقال:
-الله يخربيتك تعالي.
مشيت ورا معتز وشوفت في طريقي عم محسن صاحب بابا وهو محامي .
-سارة
-الحقني يا عم محسن هيحبسوني اتصل ببابا بسرعة.
سحبني معتز ورماني في الحبس!
.......
بعد ساعة تقريبا
دخلت مكتب الضابط ولقيت بابا ... حضنته وأنا ببكي وأقول :
-بابا الحقني أنا اتبهدلت.
-أهدي يا سارة.
طلع الضابط عشان يسيبنا لوحدنا
-بابا طلعني من هنا أبوس ايديك الضابط اللي هنا رخم.
-ششش اسكتي يا بت انتي مبتتهديش
-طيب أمتي هتطلعني.
-مش دلوقتي.
-تقصد ايه بالكلام الماسخ ده يا شكري.
-والله يا سارة يا بنتي أنا شايف أن السجن فرصة ليكي عشان تتربي!
-بابا!
-تمام هطلعك بس بشرط
-اشرط
-تتجوزي
-ايه
-القرار قرارك لاما تتجوزي لاما اقعدي هنا في السجن!
يتبع
#أحببت_مجنونة
#سولييه_نصار
تفاعل حلو عشان أنشر الجزء الاخير❤
الجزء الاخير❤
-ده انت ما صدقت بقا تخلص مني
-ايه الذكاء ده يا سارة ازاي عرفتي إني نفسي أخلص منك..ذكاءك ابهرني المرة دي عشان انتي طول عمرك غبية ومبتفهميش
-يا بابا حرام عليك تستغل ظرف زي كده عشان تجوزني
-بصراحة مكنتش عايزة اعمل كده بس انتي اللي وصلتيني لكده بجنانك وعنادك.... يا بنتي لازم تتجوزي دي سنة الحياة
-يعني الكون هيقف لو ما اتجوزتش.
-لا بس حياتك هي اللي هتقف متخليش غلطتك مع عماد تأثر عليكي بالشكل ده.
عيوني دمعت فمسك أيدي وقال :
-أنا مش عايزة ازعلك.... بس مقدرش أشوفك بتدمري حياتك واسكت.... ها قولتي ايه
-هو قدامي حل تاني هوافق علي العريس اللي هيجي بس مليش دعوة لو هو اللي رفضني.
-لا متقلقيش
......
بعد يومين...
كنت واقفة قدام المرايا ومتشيكة عشان أقابل عريس الغفلة...
دخل بابا اوضتي وقال:
-يالا يا سوسو العريس جه
طلعت وأنا ماسكة صينية القهوة وأول ما شوفت العريس اتصدمت :
-هو انت
أبتسم حسام وقال:(بقلم سولييه نصار )
-آه انا
سندت القهوة علي الترابيزة وزعقت :
-هو انت جاي ليه هنا.
-جاي عشان انتي تصلحي غلطك وتتجوزيني عشان اخونك تسع مرات في الأسبوع.
سمعت أبويا بيضحك وقال:
-نسيت أعرفك حسام باشا صدقي ابن صاحبي انتي متعرفيهوش وهو كمان مكانش يعرفك غير لما جيت القسم واهو الراجل أعجب بيكي وقرر يتجوزك... هسيبكم عشان تتعرفوا علي بعض!
سابنا بابا لوحدنا وطلع بره
رفعت رأسي وقعدت علي الانتريه وأنا بقول :
-علي فكرة يا باشا أنت غلطت غلطة عمري لما جيت تتقدملي عشان طبيعتك كضابط مش هتتقبل رغباتي كأنثي فيميسنت.
-وايه هي رغباتك يا فيميسنت
-يعني مثلا أنا حابة اشتغل.
-معنديش مانع أنا مش ديكتاتوري ومؤمن جدا بدور المرأة في المجتمع العملي.
-رقاصة
-افندم
-عايزة اشتغل رقاصة... ومش كده وبس أنا بشرب بانجو.
بصلي بغموض وقال:
-ما تقومي تهزي.
-ايه؟!
-ايه يا سوسو مش انتي حابة تبقي رقاصة عايز أشوف رقصك يالا قومي هزي...
-أنت مجنون.
-تحبي تشربي سجاير معايا طيب ولا تضربي بانجو.
-ايه... ايه... ايه الكوسة دي أنا مفروض اطفشك.
-ليه تطفشيني؟!
-عشان أنا مش بتاعة جواز
-والسبب؟!
-كنت بحب واحد وخانني مع قريبته... ومبقتش بثق فيكم.
-طيب ما تديني فرصة.... نعمل خطوبة ونشوف ولو مرتاحتيش ننفصل بهدوء ايه رأيك!
سكت كنت حاساه مختلف وقلبي لأول مرة من زمان يحس بالأمان ده عشان كده وافقت.
........
بعد خمس سنين
كنت علي البحر أنا وحسام ومحمد ابني اللي عنده سنة ونص وبابا... كان حسام بيلعب مع محمد في المية وأنا قاعدة جمب بابا وحاطة رأسي علي كتفه
-مبسوطة يا سارة
-اووي يا بابا
-ايه الجواز طلع حلو ولا لا
-طلع حلو مع اللي يحبنا ويفهمنا ويحترمنا ويثق فينا ونثق أن عمره ما هيجرحنا.... فعلا مش كل الرجالة عماد.
بعدت شوية وبصتله وأنا بقول:
-بعد ربنا سبحانه وتعالي أنت كان ليك الفضل أنك خلصتني مع عقدي وقربتني من حسام... فشكرا جدا يا بابا...
حضني وقال:
-انتي بنتي روحي وسعادتك من سعادتي أنا فرحان أنك فرحانة...
-الله الله أنا كده هغير يا عمنا
قالها حسام وهو شايل محمد... فقولت :
-بابا الحب الأول يا حسام متنساش
-مقدرش أنسي حمايا الغالي اللي عرفني علي بنته المجنونة.
قعد حسام جمبي وابتسم فقولت بمناسبة جمعتنا دي ايه رأيكم ناخد صورة حلوة.
الكل وافق فطلعت موبايلي وقولت:
-يالا كله يقول بطييييخ
الكل:بطييييخ
واخدنا الصورة وكانت أجمل صورة اخدها جمب أكتر تلات رجالة أنا حبيتهم في حياتي بابا حسام ومحمد..... جميل أنك تحفظ ذكرياتك مع اللي بتحبهم وبيحبوك والأجمل أنك تعرف أن الحياة مبتوقفش علي غلطة عملناها ولا جرح اتجرحناه... لأن الحياة بتجرحنا وبعدين ترجع تصالحنا
تمت
#أحببت_مجنونة
حلوة يا حببتي من توفيق لتوفيق
ردحذف