مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

🌹سكريبت💖 كامل ❤️

-لسه مكويتيش القميص الازرق ليه .

زعق فيا فقومت وانا تعبانة وقولت :

-حاضر يا مهدي فورا ...بس لاحظ اني لسه راجعة من جلسة الكيماوي وتعبانة .

اتوتر للحظة بس قال :

-تمام يالا اكوي القميص 

كويتله القميص بسرعة واديتهلوله ...لبسه بسرعة وضبط نفسه ....مسكت ايده وقولت بحنان :

-القميص هياخد منك حتة يا مهدي طول عمرك حلو في اللون الازرق 

نظراته اتغيرت وحسيته اتوتر وقال :

-شكرا يا خلود 

- يالا عشان متتاخرش علي صحابك انبسط النهاردة انت الايام اللي فاتت تعبت من كتر الروحة والجاية علي الدكاترة ...انا اسفة 

مسك ايدي وباسها وقال :

-خلي بالك من نفسك انا احتمال ابات عند حسين 

-براحتك يا حبيبي 

مشي وقعدت علي الانتريه وانا تعبانة ...حاسة عينيا زايغة....من شهرين تقريبا اكتشفت ان عندي Breast cancer ومن ساعتها حياتي اتقلبت مش حياتي وبس حياة مهدي جوزي ...كنا مخططين نخلف بس بسبب المرض ده صرفنا نظر بقينا نجري بين الدكاترة والمستشفيات...الدكتور حاول يقنعني اني اعمل عملية عشان يحد من انتشار المرض بس رفضت لو عملت عملية جسمي هيتغير  ...انوثتي هتبقي ناقصة ...مش عايزة اظلم مهدي معايا هو ملوش ذنب ...حبيبي اتحملني كتير اووي 

.ابتسمت وانا بفكر اني محظوظة جدا بيه ....

سندت راسي علي الانتريه  غمضت عيني ولسه هروح في النوم تليفوني رن ...قمت ومسكته ولقيت رحاب صاحبتي مرات حسين ...

-ازيك يا رورو اخبارك ؟

-فين مهدي يا خلود

بانت عليا الحيرة وقولت :

-انتي مش عارفة ولا ايه ...هو قال هيسهر مع حسين واحتمال يباتوا مع بعض ...عاملين زي قعدة شباب ...حسين مقالكيش

سكتت رحاب بس كنت سامعة صوت توترها

-رحاب فيه ايه قلقتيني ؟

سكت شوية وقولت بخوف :

-مهدي حصله حاجة !!!

- زي الجن متقلقيش.

-اومال فيه ايه انطقي خضتيني

-انا ...

-رحاب بجد انا تعبانة متتعبنيش اكتر وقولي فيه ايه ؟!!

-خلود جوزك مش مع حسين 

قلبي دق بخوف وقولت :

-اومال هو مع مين ...انطقي

-انا عرفت من حسين ان ...ان 

زعقت:

-رحاب حرام عليكي متقطعيش في الكلام قوليلي فين مهدي 

-انا عرفت من حسين ان النهاردة كتب كتابه علي بنت خالته !

حسيت ان الدنيا بتلف بيا ...ده اكيد هزار سخيف ...مهدي ميعملش كده ...لا يعمل ...ميعملش ليه ...انا بقيت بقايا انسانة كل حاجة جوايا اتحطمت...وهو ليه حق ...ليه حق يشوف واحدة غيري ...دموعي نزلت  لوحدها 

-خلود انتي معايا

مسكت دموعي بسرعة وقولت :

-كتب الكتاب في بيت العيلة صح 

-انتي ناوية تروحي

-لازم اباركله

-خلود بلاش ...ميستاهلش هو ...

-متشتمهوش يا رحاب حقه يتجوز....متقلقيش عليا انا متقبلة قدري كويس سلام .

.......

بعد ساعة ...

كنت واقفة قدام بيت العيلة ...كنت متزينة كويس دخلت وانا بترعش وبحاول اسيطر علي دموعي ...دخلت وسط الناس وكل اللي يشوفني يتصدم لحد ما هو شافني...مقدرتش ساعتها امسك دموعي قربت منه وقولت:

-الف مبروك يا حبيبي 

-خلود !!

-القميص هيأكل منك حتة ...طول عمره الازرق بيليق عليك .

بلع ريقه بتوتر وقال:

-اسمعيني 

بصيت للي هيتجوزها وقولت:

-حتي عروستك حلوة وزي القمر .

بكيت وكملت :

-احلي مني .

عيونه دمعت ودموعه نزلت ...مسحت دموعه وقولت :

-متعيطش ومتزعلش ده حقك ...حقك تكون أسرة ...انا خلاص انتهيت ...بقيت مجرد جثة ...والبشر مبيعشوش مع جثث وعشان ارحمك انا بطلب ان المأذون اللي هيكتب كتابك يطلقنا!!

يتبع

الجزء التاني شكرا لتفاعلكم السكر😍😍😍بقلم سولييه نصار💖

-انا اسف انا اسف 

قالها وهو منهار...مسك ايدي وكمل:

-مش هكمل ويالا نروح البيت وننسي كل حاجة 

-مهدي انت اتجننت

صرخت امه فيه...بس مهتمش بيها ...عينيه كانت عليا انا ...ابتسمت بضعف وقلت:

-وتسيب عروستك يوم كتب كتابها دي مش من اخلاقك ....ودي بنت خالتك برضه وانا مرضاش اكسر فرحة واحدة ..مقدرش 

قربت صفية بنت خالته مني وزعقت:

-ولما انتي مش عايزة تكسري فرحتي ليه جيتي ولا حابة تعملي الشويتين بتوعك....بجد مش قادرة اصدق انك حتي في اخر لحظات عمرك خبيثة ومكارة...يا ستي صفي نيتك ده انتي كلها شهور وتقابلي وجه كريم 

-صفية 

زعق مهدي 

رجعت مصدومة وقلبي وجعني...صحيح انا راضية بقضاء ربنا بس كلامها عن موتي المؤكد خوفني ...وزلزل ارادتي وثقتي اني هخف .

بصيت لمهدي المتوتر ...قرب مني وقالي :

-اسف اسف .

- انا ...

مسحت دموعي بسرعة وقولت ؛

- انا همشي دلوقتي ...انت اكتب الكتاب....وابقي نأجل الطلاق

-خلود 

-لا يا مهدي انت وعدت اوفي بوعدك ...اتجوزها وطلقني ...حتي لو متجوزتهاش برضه هتطلقني 

اتصدم من كلامي .

مسك ايدي وقال :

-يالا هنطلع من هنا 

مسكت امه ايده وصرخت :

- بنت خالتك يا مهدي حرام عليك ...هتكسرها بالشكل ده 

بصيتله وقولت :

-امك عندها حق ...متكسرهاش ....انت كسرتني بلاش تكرر الغلط ده .

دموعه نزلت وقال:

-متسبنيش يا خلود ...انا غلطت عارف بس...

مسك ايدي وقال :

-خلينا ننسي كل حاجة وتسامحيني ايه رايك 

-مينفعش ....صدقني مينفعش ...فيه حاجات منقدرش ننساها...انا عمري ما انسي انك سيبتني في عز تعبي وروحت تتجوز ....مش هنسي انك مستحملتنيش حتي شهرين ....مش هنسي انك خليتني اكوي القميص الازرق ولبسته عشان جوازك...دي حاجة عمرها ما تتنسي يا مهدي 

غمضت عيني وانا بعيط ...اتمنيت اني اكون في كابوس...مرضي كسرني شوية بس لقيت مهدي جمبي....بس تخلي مهدي عني نهاني خالص. !!!

- انت ليه متمسك بيها يا مهدي ....مش عارفة هي شايفة نفسها علي ايه ...ده حتي الخلفة ابني اتحرم منها بسببك.....بيدفع فلوس كتير في علاجك....رايح جاي في المستشفيات عشانك...ده حتي شغل البيت يا حبيبي بيساعدك فيه  ....يا ستي اتقي الله بقا وخليه يعيش حياته ...مش كفاية انه مطلقكيش ...ده انتي ناكرة للجميل....مهدي هيتجوز صفية وانتي عايزة تغوري غوري وارحمينا من قرفك ده 

خلصت ام مهدي كلامها وبصت لمهدي وقالت:

- كفاية كده يا مهدي ....انت استحملتها كتير وهي مبتقدرش طلقها واخلص منها واتجوز اللي احسن منها ...اتجوز واحدة تقدر تخدمك وتجيبلك عيال مش واحدة انت بتخدمها وكمان بتتنك

بصيت لمهدي اللي عينيه اتغيرت كأنه واحد تاني .

كلمات امه اثرت فيه جامد  وقال :

- انا بجد خاب املي فيكي يا خلود ...بعد تضحيتي دي مستكترة عليا الفرح !!!

-تضحيتك ؟!

-قولتها وانا بضحك ودموعي بتنزل

-ايوة تضحيتي ...انا ضحيت كتير عشانك بس برضه انا راجل ومحتاج أطفال 

مسحت دموعي وقولت :

-تفتكر لو انا اللي سيبتك يا مهدي بعد ما تعبت بشهرين كانوا هيقولوا حقها ولا هبقي قليلة الأصل 

سكت ومردش 

ابتسمت وقولت:

-اسمع كلام امك وطلقني يا مهدي انتوا عندكم حق وانا غلطا..

 - انتي طالق !

يتبع 

الجزء التالت 💖شكرا علي تفاعلكم السكر 💖بقلم سولييه نصار💖

دموعي نزلت وصوت بكايا علي ...انا حتي مكملتش جملتي وطلقني...للدرجة انا رخيصة بالنسباله...صحيح انا عايزة اطلق وأبعد عنه ..بس افتكرت انه هيتمسك بيا بس طلعت غلطانة ...ولاول مرة من زمان احس اني وحيدة مليش حد انا فعلا مليش حد الا مهدي ....

بصتلي امه بإنتصار وقالت :

- ما خلاص يختي مش طلقك يالا روحي وبلاش الدراما دي ...واحدة زيك مفروض تحمد ربنا ان فيه راجل قبل بيها بوضعها لكن جحودك ده خلاكي تخسري كل حاجة .

مسحت دموعي وبصيت لمهدي بحزن ...هو برضه كان حزين ....حسيته ندم بس طبعا مش هيتراجع ولا انا كمان ....ابتسمت ابتسامة خفيفة وقولت :

-الف مبروك يا مهدي ربنا يسعدك ويتمملك بخير .

وبعدين مشيت ...مشيت وانا مش عارفة اروح فين حتي ....اكيد مش هرجع البيت ....مشيت لساعات في الشارع وانا بعيط .....كنت حاسة بخيبة امل كبيرة ....حسيت ان الكل اتخلي عني ....قعدت علي البحر وانا بعيط ....فجأة لقيت حد بيناولني منديل وقال :

-الدموع والحزن ميلقوش علي واحدة جميلة زيك 

بصيت ولقيت شخص غريب كان بيبصلي وهو مبتسم ابتسامة لطيفة ....كشرت في وشه وقمت ومشيت 

.........

بعد نص ساعة كنت قدام بيت رحاب خبطت عليها...فتحت رحاب الباب ...

- انا اسفة ...انا 

دموع رحاب نزلت وقالت وهي بتفتح ايديها :

-تعالي 

من غير تفكير حضنتها وانا ببكي ....كنت محتاجة ابكي واتكلم ...كنت محتاجة افضي حزني وخيبة املي  

......

بعد شوية كنا قاعدين انا وهي علي الانتريه ...كانت وخداني في حضنها وانا بحكي :

-مقدرتش استحمل يا رحاب وفورا طلبت منه يطلقني .....امه حسستني اني وحشة وانانية...انا مش وحشة يا رحاب بس يحط نفسه مكاني لو هو بعد الشر عليه كان تعبان زيي وانا اتخليت عنه الناس هيشتموني ولا يبررولي زيه ...ليه احنا اللي مطلوب مننا نضحي ونسكت ونستحمل ونحافظ ونحب ونهتم ولو معملناش كده نبقي وحشين لكن هما لو معملوش كده يلاقولهم ميت مبرر ...مش مصدقة انهم طلعوني انا اللي غلطانة في الاخر 

-اهدي يا خلود والله ما يستاهل....مفيش حد يستاهل دموعك 

- انا وحيدة يا رحاب ...وحيدة اووي حاسة الدنيا كلها اديتني ضهرها....

- وانا فين يا عبيطة مش انا اختك ...انت معاكي يا خلود للنهاية وهتخفي وهتبقي زي الفل ...ده وعدي ليكي 

......

تاني يوم انا ورحاب روحنا المستشفي ...المرة دي انا وافقت اعمل العملية ....فدكتوري حولني علي جراح شاطر وكانت الصدمة ان الدكتور ده كان هو نفسه اللي قابلني علي البحر !!!

بعد اسبوعين تقريبا ...كنت جاهزة للعملية ...الغريب ان مهدي مفكرش حتي يسأل فيا مع ان حسين جوز رحاب يبقي صاحبه وكأني مكنتش مراته في يوم ...بس مش مهم انا قررت اقطع صفحة مهدي للأبد...

كنت علي سرير العمليات بقرا قرآن ...اياد قرب مني وهو مبتسم ابتسامته اللطيفة اللي ابتسمهالي علي البحر وقال :

- انتي قوية وهتخرجي من هنا منتصرة متقلقيش بس ثقي فيا ....

ابتسمت وقولت :

- انا واثقة 

.......  

-بعد خمس شهور 

-يعني ايه يا دكتور انا عقيم...ازاي ده مراتي حامل 

قالها مهدي وهو متعصب فاداله الدكتور التحاليل وقال:

-والله يا استاذ مهدي التحاليل اهي وبتقول انك عقيم يعني مستحيل تخلف عايزنا نعيد التحاليل مفيش مشكلة .

دمعت عيونه وهو مش مصدق ...معقول اللي في بطنها مش ابنه ....معقول صفية بتخونه !!!

يتبع 

#ليتها_تغفر

#سولييه_نصار

 تفاعل قوي عشان انزل اخر بارت