 |
اسكريبت لسه جديده حالا
#سكريبت❤
-كرم أنا بحبك.. بحبك اووي.
قلتلها وانا بمسك ايديه بحب... لقيته فجأة اتعصب وزقني وزعق :
-ايه اللي انتي بتقوليه ده انتي اتجننتي.
دمعت وقولت :
-ليه يا كرم أنا غلطت في ايه بس.... أنا حبيتك.
-اللي بتقوليه ده في حد نفسه غلط انتي أختي ومستحيل أفكر فيكي بطريقة تانية.
-لا أنا مش أختك يا كرم أنا بنت عمك .
-أيوة انتي بنت عمي اللي اتربت معايا... واللي أنا بعتبرها أختي... يعني مش هشوفك غير كده.
-ليه يعني حابة اعرف السبب.
بصلي بتريقة وقال:
-يعني انتي مش عارفة السبب... ايه مبصتيش علي نفسك في المرايا... شوفي شكلك عامل ازاي ولا وشك ولا جسمك... حبيبتي لما أجي اتجوز هتجوز واحدة تقول للقمر قوم وأنا اقعد مكانك مش هتجوز واحدة شبه صاحبي.
-أنا شبه واحد صاحبك يا كرم.
بصلي وضحك بتريقة:
-ده حتي صاحبي أحلي منك.
عيوني دمعت وجريت من قدامه ودخلت اوضتي
وقفت قدام المرايا وأنا ببص علي شكلي.... جسمي المليان والنضارة اللي واكلة نص وشي ولبسي المبهدل والواسع... قولت لنفسي :
-فعلا عنده حق أنا وحشة... مين المغفل اللي هيبص لوحدة زيي... مفيش حد... مفيش حد هيحبني...
مسحت دموعي وانا باخد قراري أنا هسافر واروح لعمتي لندن وأكمل دراستي هناك
........
رجعت من ذكرياتي وأنا واقفة قدام باب فيلتنا.... أخيرا بعد سنتين رجعت لبلدي مع عمتي....
مسحت دموعي وقولت لعمتي :
-مش قادرة اصدق جدي خلاص ممكن يسيبنا.
مسكت عمتي أيدي وقالت :
-خلي أملك في ربنا كبير يا ندي... جدك قوي وشدة وتزول إن شاء الله... يالا ندخل.
........
-أمتي هتقول لجدك علينا يا كرم عشان تيجي تخطبني؟!
بصلها كرم بعصبية وقال :
-هو انتي جاية عشان تزوري جدي ولا نتكلم علي خطوبتنا؟!! هو ده وقته يا ليلي.
-اووف بقا... اقعد ماطل كده لحد ما أضيع منك.
ولسه كرم هيرد فجأة اتصنم مكانه وقال:
-أحمر علي أبوه يا صواريخ
وقفت مكاني لما شوفت كرم بيبصلي بإنبهار... طبعا معرفنيش لما اتغير خسيت واتغير شكلي وقلعت النضارة.
قرب من عمتي وقال:
-الاه مين الصاروخ دي يا عمتي خلفتيها أمتي دي وفين برعي؟!
-مين برعي يا واد؟
-ندي من غيرها أنا مسميها برعي.
بصتله بغضب فضحكت عمتي وقالت وهي بتشاور عليا :
-أهي دي برعي يا حبيبي... دي ندي بنت عمك يا كرم معقول معرفتهاش.
بصلي بصدمة وقال :
-انتي برعي؟!
مردتش عليه وطلعت عند جدي اطمن عليه... بص كرم لعمتي وقال:
-برعي بقا صاروخ يا عمتي.
ضربته عمته علي كتفه وقالت :
-اتلم يا واد دي بنت عمك
..........
شوفت جدي وقلبي وجعني بسبب حالته كان باين أنه تعبان اووي.... جدي لسبب مجهول طلب يجمعنا كلنا أنا وعمتي وكرم... هو ملوش غيرنا لأن اهلي وأبو كرم ماتوا أما أمه اتجوزت وبعدت عشان كده دايما بيقول احنا أسرته الوحيدة....
مسكت عمتي أيده وقالت:
-اؤمر يا بابا كنت عايز مننا ايه؟!
بصلها جدي بتعب وقال:
-عايزك تقعدي هنا جمبي لحد ما أموت يا كؤثر.... مش عايزاكي تبعدي عني... خلاص أنا قربت وعايز أشبع منك.
بكت عمتي وقالت:
-متقولش كده يا حبيبي.
بصلي جدي وقال :
-واخر طلب ليا أن ندي حفيدتي تتجوز كرم!
اتصدمت وقولت :
-كرم مين يا جدي؟!
-ايه يا ندوش نسيتي ابن عمك حبيبك كرم أنا... متقلقش يا حاج أنا موافق.
قمت وزعقت :
-بس أنا مش موافقة ومستحيل اتجوزه...
بصتله وقولت :
-نجوم السما اقربلك يا كرم من أنك تتجوزني.
يتبع
#انت_جميلة
#سولييه_نصار
تفاعل حلو عشان انزل البارت التاني دلوقتى بس بوصل 1000 كومنت
حالا
#الاخيره
الجزء الثاني ❤شكرا لتفاعلكم السكر زيكم❤❤
-لا يا عمتي متحاوليش مش هتجوزه مش هتجوزه.
ضربتني عمتي علي كتفي وقالت:
-مش ده كرم اللي كنتي هتموتي عليه... ده اللي قررتي تخسي بسبب كلامه... ده اللي سيبتي مصر بسببه وكنتي كل يوم بتبكي بسببه.... ايه اللي اتغير دلوقتي حابة افهم.
بصيت لعمتي وقولت :
-أنا لما قررت اتغير اتغيرت عشان نفسي... عشان ابقي فخورة بنفسي مش عشان إنسان سطحي زيه.... فمستحيل اقبل اتجوزه مستحيل يا عمتي.
-ولا حتي عشان جدك. (بقلم سولييه نصار )
بصيت لعمتي بحزن وقولت:
-ما هي دي المشكلة يا عمتي... هي دي المشكلة.
.......
-أنت حيوان
-متشكرين يا آنسة.
زقته ليلي وقالت :
-أنت ازاي كده... لا بجد ازاي كده بعد ما وعدتني أنك هتتجوزني دلوقتي هتتجوز بنت عمك!
-بصراحة يا ليلي البت صاروخ أكتر منك... أنا مستحيل اتجوزك بالكرش ده.
ضربته ليلي بالقلم وقالت:
-أنا غلطانة إني عبرت واحد زيك ويارب قريبتك دي متعبركش.... أنت بتتنك علي ايه ده انت فيك كل العبر... ايه جمالك مقوي قلبك اتنيل يخي ده انت شبه البرص...
بعدين مشيت وسابته.
.......
-فهمت ليه يا جدي مش عايزة اتجوزه.
مسك جدي أيدي وقال بتعب:
-اديله فرصة تانية يا بنتي
-لا يا جدي كرم ده إنسان سطحي لو تخنت بعد الجواز أو حصلي حاجة في وشي هيطلقني فورا... أنا مش هستحمل اتجوز واحد تفكيره كده.
-يا بنتي
مسكت ايده وقولت :
هعمل اختبار ليه لو نجح هوافق عليه.
.........
-ليه عايز تتجوزني يا كرم؟!
أبتسم وقال برة:
-يعني انتي بنت عمي وأنت أولي وخسارة أطلع..... ثانيا انا عارف أخلاقك كويس جدا.
-طيب وشكلي.
-أنا مش سطحي يا ندوش.
-أسمي ندي
-افندم
-بقولك أسمي ندي مبحبش حد يدلعني.
-حاضر... المهم زي ما قولتلك أنا مش سطحي يعني الجمال مش مهم عندي اووي.
ضحكت بتريقة وقولت:
-الله ماكانت اخلاقي قدامك من سنتين وانا اللي جيتلك واهانتني.
-بس... بس
-أنت لسه هتبسبس... كرم أنت أكتر إنسان سطحي شوفته في حياتي... أنت لما شوفتني اتغيرت بقيت هتموت عليا.
-الإنسان من حقه يختار الشكل اللي يحبه... خليكي صريحة يا ندي انتي بشكلك زمان كان مستحيل حد يبص في وشك اصلا... أنا كنت بعتبرك راجل وكل أصحابي كده كنا بنقول عليكي دايما برعي... فأزاي كنتي عايزاني اتجوزك.... الراجل عايز دايما مراته تكون جميلة.
-طيب والست؟!
-مش فاهم.
ربعت ايدي وقولت:
-والست مش من حقها تشوف جوزها وسيم.
-لا مفروض الست متبصش علي الجمال... ما دام الراجل محترم ويكفي بيته خلاص.
-وده في شرع مين يا ابن عمي.
-مش في شرع حد بس أنا مؤمن بكده... مالك بالشكل ما دام الراجل محترم وهيصونك وبعدين أنا وسيم جدا ايه المشكلة .
-اسمع بقا اللي أنا مؤمنة بيه... ما دام أنت بتقول الشكل مهم يبقي أنا كمان الشكل مهم عندي بس مش الأهم للأسف... أنت وسيم جدا يا كرم مقدرش أنكر... بس الأهم عندي مش موجود عندك
-واللي هو؟!
-الأخلاق.... ممكن تقولي فين البنت اللي أول ما دخلت لقيتها معاك وبتسألك أمتي هتكلم جدك.
-انفصلت عنها.
-انفصلت عنها لما شوفت الاجمل منها صح... معني كده لما تلاقي الاحلي مني هتنفصل عني؟
-أيوة .. ايه... لا
-ودي تاني حاجة أهم من الشكل مش موجودة عندك وهي الأمان
ابتسمت بحزن وقولت:
-كنت بتقولي من شوية أنك أنت واصحابك بتتريقوا عليا صح... يعني حتي لو محبتنيش أنا بنت عمك ومن لحمك ودمك... زي أختك يا أخي في راجل محترم يخلي رجالة غريبة تتريق علي اخته!
-أنا....
-ودي تالت حاجة مش موجودة عندك الرجولة.. كرم أنا لو فضلت أعد في سلبياتك مش هنخلص للصبح... ببساطة أنت مش معاك ألا وش وسيم بس وللأسف ده مش كفاية ابدا عشان اتجوزك أنا آسفة.
وبعدين سيبته ومشيت وانا مرتاحة ومقتنعة بحاجة واحدة أن مش كل حاجة بتلمع هي ماس.... كرم بيلمع من برا اووي بس لما تقرب بتشوف السواد.... سواد أخلاقه... سواد صفاته وسواد تفكيره...
أنا دلوقتي اقتنعت بحاجة أن ربنا مخلقش حد وحش انتي جميلة سواء كنت طويلة أو قصيرة... تخينة أو رفيعة سمرا أو بيضا عيونك ملونة أو سوده ... كل واحد فينا عنده جمال خاص وجمال مميز عشان كده لازم كل واحدة تشوف نفسنا جميلة لأنها لو اقتنعت أنها جميلة العالم هيشوفها جميلة... انتي جميلة مهما كنتي بجمالك الداخلي والخارجي❤👑
تمت
#أنت_جميلة
#سولييه_نصار
وبكده انتهي الاسكريبت ❤
تعليقات
إرسال تعليق