 |
سكريبت❤
-انا حامل يا قاسم
مسكني من دراعي جامد وقال :
-نعم يا روح أمك حامل من مين يا بت .
عيوني دمعت وقولت :
-هكون حامل من مين يعني؟ منك
زقني وضحك :
-لعبة جديدة من العابك القذرة صح؟
-لا والله أنا حامل منك.
-أنا مليش دعوة يا حبيبتي... دي شيلتك انتي شيلها... ما انتي لو كنتي محترمة مكنتيش سلمتيني نفسك
بصتله بصدمة وقولت:
-أنت بتقول ايه احنا متجوزين وأنت جوزي
-اثبتي
-نعم!!
-اثبتي إني جوزك...
-الورق....
قاطعني وهو بيضحك :
-آه قصدك ورقتين العرفي اللي أنا قطعتوهم...
-أنت قطعتهم بجد
-أيوة... يعني اللي في بطنك ده تروحي تلبسيه لحد غيري... وأنا بصراحة كده مش فاضيلك يا قطة... فرحي بعد أسبوعين علي ندي
-فرحك علي ندي.
-آه ندي صاحبتك وأهي واحدة شريفة مشيها مش بطال زيك.
قعدت أبكي وأنا حاسة نفسي في كابوس... بصيتله وأنا بقول :
-قاسم أبويا هيقتلني ابوس ايديك اتجوزني بس شهرين... واكتب ابننا بإسمك وبعدين طلقني.. ابوس ايديك
-وأنا أيش عرفني أن ده أبني... لا مؤاخذة يعني ما يمكن زي ما سلمتيني نفسك... روحتي سلمتي نفسك لحد تاني... آسف مش واحدة زيك اللي تشيل اسمي.
ضربته بالقلم فمسك شعري وقال:
-أنا تضربيني بالقلم يا حقيرة...
راح ضربني قلم وجرني من شعري فتح الباب ورماني برة البيت وقال :
-اطلعي برة واياكي أشوفك قدامي تاني شوفي مغفل تاني يشيل فضيحتك...
........
مشيت في الشارع وأنا ببكي وذكرياتي مع قاسم بتمر قدامي... فاكرة ايام أول سنة في الكلية لما كان بيحوم حواليا.... عمل المستحيل عشان يقربلي.... عشان كده زق عليا ندي جارتي وصاحبتي اللي في سنة تالته نفس السنة اللي هو فيها وحاولت تقنعني بيه لحد ما لينت دماغي وقبلت أتكلم معاه والكلام جاب خروج... والخروج جاب تجاوزات كتيرة مننا... حاولت أوقف بس لما لقاني هبعد عرض عليا يتجوزني عرفي وبعد زن كتير منه ومن ندي وافقت... وياريتني ما وافقت أهو اتفضحت وهفضح أهلي...
طلعت بيتنا لقيت أمي بترتب البيت..
-فيه ايه يا ماما؟!
-صاحب اخوكي عصام جاي يتقدملك
اتصدمت وقولت بعصبية :
-هو ايه ده أنا مش موافقة أصل... آه
وقبل ما اكمل كلامي لقيت أخويا ماسكني من شعري جامد وبيقول :
-بتقولي ايه يا روح أمك... ليه هو احنا مستنين إذنك... خالد بيحبك وهيحطك في عينيه ولا انتي شوفتيلك شوفة في الكلية
ارتبكت وقولت:
-لا بس.
-من غير بس... الراجل جاي النهاردة عايزك تلبسي هدوم كويسة ومتعمليش مشاكل عشان نخلص منك ولا انتي مش عايزة تخففي الحمل عن ابوكي الغلبان ده
-كنت خففته أنت وروحت اشتغلت بدل ما أنت عايش عاله عليه.
ضربني بالقلم لحد ما وقعت علي الأرض.. كان هيكمل ضرب لولا أمي مسكته وقالت:
-مش وقته يا ابني.
بصلي بغضب وقال:
تجهزي النهاردة واياكي تعترضي علي أي كلمة تتقال والله يا رانا اقتلك انتي فاهمة!!
هزيت رأسي وأنا بعيط
.........
بالليل...
كنت بترعش وأنا بقدم القهوة ليهم.
-اللهم بارك زي القمر والله يا رانا يا بخت خالد بيكي.
قلبي اتحرق وحسيت بالذنب... أنا مينفعش اخدعهم.... يارب اعمل ايه اهلي لو اكتشفوا هيقتلوني...
قعدتني أم خالد جمبها وبدؤا يتكلموا ويتفقوا وأنا كل ده باصة علي الأرض بحاول أمنع نفسي بالعافية إني أبكي
رفعت عيني بالصدفة وبصيت علي خالد لقيته باصص عليا بس بسرعة حط عينه في الأرض واتكسف
قرينا الفاتحة وطلب خالد من بابا وعصام أننا نتجوز بعد شهر وقال أن شقته جاهزة ومفيش داعي اجيب حاجة... وافق بابا واخويا وأنا حسيت إني خلاص انتهيت
.....
مرت ايام الخطوبة علي خير.... خالد كان شاب كويس جدا ومحترم عمره ما فكر يلمس أيدي حتي... علطول بيجيبلي هدايا وبيهتم بيا... اتمنيت إني أكون قابلته قبل قاسم.... كذا مرة حاولت أقوله الحقيقة بس مقدرتش خوفت... وكل ما الأيام تعدي كل أما أخاف أكتر
......
جه يوم فرحنا.... خالد عملي فرح كبير... وعزم كل قرايبه... كان طاير بيا وده خلاني أحس بالذنب أكتر
-اتفضلي يا عروسة
دخلت وانا مرعوبة.
بصلي خالد وأبتسم وقال :
-ادخلي الأوضة دي هتلاقي اسدال البسيه واتوضي عشان نصلي عايزين نبدأ حياتنا بالصلاة عشان ربنا يبارك فيها..
هزيت رأسي ودخلت لبست واتوضيت
طلعت كان هو كمان غير هدوموا وصلينا.... بعد ما خلصنا قعدت علي السرير وأنا بترعش... قرب مني وقلع حجاب الاسدال وهو بيلمس شعري وبيقول :
-تعرفي أنك جميلة اووي يا رانا... أول مرة شوفتك طار عقلي ودخلتي قلبي ... كنت بحلم بيكي.. أنا طلبتك من ربنا يا رانا... كنت بطلبك منه كل يوم وكل ساعة... رانا أنا بحبك اووي..
دموعي نزلت... مسحها براحة ولسه هيقرب مني اغمي عليا!!
......
في المستشفي.
كان واقف قدام أوضة الكشف وهو متوتر لما طلعت الدكتورة... قرب منها بسرعة وقال:
-طمنيني يا دكتورة مالها رانا
ابتسمت الدكتورة وقالت:
-ألف مبروك المدام حامل!
يتبع
الجزء الثاني ❤شكرا علي تفاعلكم السكر❤💥
كنت قاعدة علي السرير وأنا ببكي بحرقة بعد ما جينا من المستشفي.. كان خالد واقف وبيبصلي بحزن وكسره وقال :
-انتي غلط
-أنا اتجوزت مش زنيت!
-اتجوزتي؟!
حطيت وشي في الأرض وقولت :
-اتجوزت عرفي.
-بس ده حرام.
حطيت أيدي علي وشي وابتديت أبكي واقول :
-هو اقنعني وقالي حلال وعادي..
قالي بس نخلص كلية وهيتجوزني علطول بس لما حملت اتخلي عنه واتجوز صاحبتي وقطع ورق الجواز
هز خالد راسه.... كان مصدوم وأنا مقدرة وضعة كويس.... حسيت نفسي انتهيت خالص أكيد خالد هيفضحني وخلاص كده اهلي هيقتلوني.
بصلي وقال:
-احنا مظع جوازنا باطل... شرعا جوازنا باطل.
بصتله بصدمة وقولت :
-هتقول لأهلي؟
سكت وبصلي بشفقة فرحت قدامه ومسكت ايده وكنت هبوسها بس بعدها بسرعة فقولت :
-ابوس ايديك متفضحنيش... أهلي هيقتلوني... أنت عارف طبعهم كويس.
-وليه مفكرتيش في ربك ونفسك وأهلك وانتي بتعملي كده.... ليه ترخصي نفسك بالطريقة دي... ليه... انتي ناقصة ايه عشان تتجوزي بالطريقة المهينة دي
-حبيته.... للأسف حبيته.
-يقطع الحب اللي يخليكم تتنازلوا بالشكل ده.... أنا مش هفضحك بس بكرة نروح ونسأل شيخ ويقولنا نعمل ايه
هزيت رأسي وأنا بمسح دموعي.... فاخد مخدة وقال :
-نامي انتي هنا واقفلي علي نفسك بالمفتاح عشان ترتاحي... أنا هنام برة
بعدين طلع وسابني... دفنت رأسي في المخدة وبدأت أبكي...
........
تاني يوم...
جه اهلي واهلوا عشان يطمنوا علينا... هو كان بعيد عني وزي ما وعدني مقالش لحد علي حاجة... ساعتها وثقت فيه واتمنيت بجد لو كنا اتجوزنا في ظروف غير دي كنت هشيله جوا عيني
مشيوا اهلي وطلب مني ألبس عشان نروح للشيخ.
......
راح لشيخ يعرفه ويثق فيه... وطلب منه أن الموضوع يفضل سر
كنت قاعدة قدام الشيخ وإنا مكسوفة من نفسي... حاسه اني واحدة معنديش أخلاق لا احترام.... وصعب عليا خالد... ذنبه ايه يتحمل حاجة زي كده
حكاله خالد بالتفصيل كل اللي حصل وطول الوقت الشيخ كان بيبصلي وأنا حاطة عيني في الأرض.
-لا حول ولا قوة إلا بالله انتوا جوازكم باطل يا بني.... مينفعش الحامل تتجوز حتي تضع سواءكانت متجوزة عرفي أو رسمي.
-طيب والولد اللي في بطني
-الأول عايز أسألك سؤال؟
-اتفضل.
-كان فيه شهود يشهدوا علي جوازك....
-لا
-لا حول ولا قوة إلا بالله اومال تزوجتوا ازاي
-هو قالي....
-يا بنتي اللي خلاكي تثقي فيه جوازك منه كمان باطل وكده يعتبر أن انتوا زنيتوا.
حطيت أيدي علي بوقي وقعدت أبكي.
بصله خالد وقال:
-طب الحل يا شيخ؟!
-الولد بالظروف دي مش هينسب للزاني هينسب لأمه أو الفراش بس حاليا هي مش متجوزاك يبقي ينسب ليها وبعد ما تضع وتتوب يحللها الزواج منك.
..........
بعد ما رجعت البيت
دخلت اوضتي وقفلت عليا الباب وقعدت أبكي... خبط خالد علي الباب وقال :
-هنلاقي حل يا رانا بس انتي متبكيش
-أنا خلاص انتهيت.... انتهيت يا خالد يارب اموت وارتاح... يارب
بعدين فضلت أبكي وابكي... وقعدت اقول:
-يارب ساعدني.. يارب اغفر لي.
نمت وانا مش حاسة بنفسي فصحيت علي ألم شديد في بطني وفي ظهري شفت أثر دم فصرخت:
-خالد الحقني!!!
جه خالد وقعد يكسر الباب لحد ما اتكسر وساعتها اغمي عليا.
.......
فوقت بعد شوية لقيت نفسي في اوضة غريبة وخالد قاعد جمبي بصلي بشفقة وقال:
-الجنين مات.
عيوني دمعت فكمل :
-جبتك عيادة واحد صاحبي أثق فيه مقدرتش اوديكي المستشفي... هو عمل اللازم هنبات هنا النهاردة وبكرة هنطلع
هزيت رأسي وغمضت عيني ونومت
......
تاني يوم رجعنا للبيت بالليل ... قعد خالد جمبي وقال :
ارتاحي دلوقتي في البيت وأنا هبات برة مع حد من أصحابي بس اقفلي الباب كويس.
-أنا خايفة يا خالد... خليك هنا ونام في الصالة وأنا هقفل علي نفسي الباب.
-تمام خلاص.
-خالد
-نعم
-أنت ناوي تعمل معايا ايه؟! هترجعني لأهلي. -لا لو رجعتك دلوقتي الناس هتتكلم... أنا هكتب عليكي تاني بعد أسبوع اكون جمعت شهود اثق فيهم وانتي كده كده بالغة تقدري تزوجي نفسك. (بقلم سولييه نصار )
-وبعدين
-نقعد مع بعض فترة وهنتطلق
بكيت وقولت:
-هو ده اللي انت عايزة
-أيوة.
-تمام تصبح علي خير.
روحت اوضتي وقفلت عليا الباب وقعدت أبكي.
......
مرت الأيام وخالد بعيد عني.... طول اليوم برة ويجي آخر الليل وبعدين ينام.
مر أسبوع وكان هيكتب عليا خلاص... طلعت اجيب شوية طلبات وأنا ماشية خبطت في واحد ولسه هعتذر قولت بصدمة:
-قاسم.
أبتسم وهو مش مصدق :
-رانا... أنا كنت بدور عليكي... أنا هعترف بالطفل
يتبع
#الغفران
#سولييه_نصار
تفاعلوا كويس عشان هنزل البارت الأخير ❤
الجزء الاخير ❤شكرا لتفاعلكم السكر
بعدت عنه وقولت :
-أنت بتقول ايه؟
قرب وقال :
- رانا أنا ندمت علي اللي عملته.... ندي مطلعتش محترمة... اكتشفت ده ليلة دخلتنا وعرفت أن ده ذنبك بعدين دورت عليكي وعرفت أنك اتجوزتي... طمنيني جوزك عملك مشاكل
-بالعكس اللي اتجوزته طلع ارجل منك يا قاسم سترني في الوقت اللي انت رميتني فيه... فبجد شكرا للظروف إلى عرفتني وشك الحقيقي...
-طب وأبني
-ابنك مات يا قاسم أنا اجهضت.. والحمد لله ربنا رحمني منك (بقلم سولييه نصار)
ولسه همشي لقيته بيقول:
-علي فكرة أنا معايا لسه ورق العرفي مش قطعته يعني انتي مراتي.
ابتسمت بتريقة وقولت:
-الورق ده بله واشرب ميته يا قاسم احنا جوازنا باطل يا حبيبي عشان مكانش فيه شهود..
اتوتر فعيوني دمعت وقولت بحزن:
-كنت عارف أن جوازنا باطل ورغم كده كملت.... كنت عارف أن ده زنا ومهمكش.... حرام عليك ليه عملت فيا كده... ليه أنا اذيتك في ايه؟
- أنا آسف يا رانا
-مش عايزة أشوف وشك تاني.
بعدين مشيت وسبته.
.....
روحت علي البيت لقيت اهلي جيت اتكلم أخويا عصام قرب مني وقعد يضرب فيا جامد وهو بيزعق :
-آه يا رخيصة يا كلبة تفضحينا بالشكل ده تسلمي نفسك بالرخيص.... عرفي اتجوزتي عرفي وكنتي حامل...
قرب خالد وقعد يبعده ويقول:
-عصام كفاية هي لسه تعبانة.
زقه عصام وقال :
-لا راجل اووي يا اخويا... واحد غيرك كان قتلها وخلصنا من عارها لكن أنت خرع.... بس بسيطة أنا هدفنها وهي حية... رانا خلاص ماتت بالنسبالنا... وهناخد عزاها...
شدني عصام من شعري وقال:
-أنا تيجي واحدة زي ندي وتعايرني بماضي أختي الزبالة وديني يا رانا لاقتلك...
شفت أمي وابويا بيبكوا ومعملوش حاجة... بس خالد وقف قدامه وقال:
-لو عملتلها حاجة أنا هبلغ عنك البوليس سيبها فورا
-خالد بتبيع صاحبك.
-أنا خايف عليك وبعزك.... أختك غلطت صحيح بؤس متصلحش الغلط بغلط أكبر... بطل غباء... بدل ما تفضحها وتملي الدنيا أسترها
-ومين هيرضي بيها بعد قذارتها؟
بصلي خالد وقال من غير تردد:
-أنا هتجوزها.... هنعمل عقد جديد... بمهر جديد ونعمل حفلة صغيرة بيننا واخدها علي بيتي.
-أنت هترضي بال...
-أيوة أنا راضي بيها وهحميها.. خدها معاك البيت دلوقتي وبالليل هجيب الشيخ تاني ونكتب الكتاب... بس والله يا عصام لو اذيتها أو عملتلها حاجة أنا اللي هقف في وشك.
-أنت ليه متمسك بيها دي زانية... هترضي بواحدة اتلمست قبلك.
-رانا تابت يا عصام ومينفعش نقفل الباب في وش التائب بالعكس مفروض ناخد بإيده... أنت غلطت في حق بنت قبل كده يا عصام واتلمت الفضيحة وربنا سترك
-أنا راجل هي ست
-ربنا مبيفرقش بين راجل وست التوبة للكل.
سكت عصام واخدوني أهلي للبيت.
....
بالليل جه خالد ومعاه الشهود وكتبنا الكتاب وسط أهلي وعملنا تجمع بسيط واخدني لبيته...
مرت الأيام عادية كان خالد بيعاملني بإحترام بس مقربش مني... وأهلي كانوا مقاطعيني... كنت حاسة إني وحيدة... كنت بروح الكلية وأرجع أخلص البيت والأكل واذاكر... أما قاسم كان بيشوفني من بعيد بس مفكرش يقربلي... كنت بشوف في عيونه حزن علي حالي
....
كان يوم عيد ميلادي محدش افتكره كالعادة... رجعت من كليتي متأخر ودخلت البيت فاتصدمت لما لقيت الكل متجمع عشان عيد ميلادي أهلي وأهله وخالد... قرب خالد وحضني وقال:
-كل سنة وانتي أجمل حاجة جات حياتي.
مكنتش مصدقة نفسي حاسة إني بحلم سلموا عليا أهل خالد ووقفت قدام اهلي بخوف لقيتهم كلهم قربوا عليا وحضنوني.. كنت بعيط مش مصدقة أنهم سامحوني.... حسيت اخيرا أن ربنا سامحني وقبل توبتي واداني السعادة... حسيت بحب اهلي اللي عمري ما حسيت بيه واللي روحت ادور برة عليه... كنت فاكرة أنهم مبيحبونيش بس طلعوا بيحبوني... بصيت لخالد وانا ببكي فرسملي قلب علي الهوا وقال بصوت واطي :
-بحبك
رسمت أنا كمان قلب في الهوا وقولت بصوت واطي:
-وأنا كمان بحبك❤
تمت
#الغفران
#سولييه_نصار
ونلتقي في سكريبت جديد
تعليقات
إرسال تعليق