 |
#اسكريبت كامل ♥️♥️#Nourseen_Hamdy
_انا مش هتجوز واحد اصغر مني!
- ايه التفكير دا يا ملك، ايه المشكلة يعني المفروض انك متعلمة وفاهمة ان دا عادي جدا ؟
_ دا بالنسبالي عيل وعمر جوازنا ما هينجح
- انا مش بقول كدة عشان إياد اخويا بس هو بيحبك وراجل صدقيني، فكري بس
وبعدين يا ملك دا هما سنتين في ايه؟
_ يووه انا ماشية
************************************************
أنا مش عارفة دينا مش عايزة تفهمني ليه هي مش قادرة تفهم ان الراجل اللي ف عمر الست بتبقى دماغها اكبر منه اصلا ما بالك لو اصغر منها يعني حتى لو بيحبني زي ما بتقول جوازنا عمره ما هينجح..
_ايه يا ملك كل دا تأخير المدير اتعصب انهارده وعرف انك اتأخرتي
- هي ناقصاه دا كمان غصب عني كان في زحمة جدا
_ ربنا يستر ويعدي اليوم على خير
قعدت ع المكتب بتاعي وانا خايفة يعمل مشكلة
دخل علينا المكتب وهو شكله متعصب
_ ايه يا أستاذة ملك كويس انك افتكرتي ان عندك شغل
رديت وانا متوترة : اا... انا اسفة.. ك.. كان في زحمة جدا والله وو..
_ خلااص بلاش مبررات كتير مخصوملك يومين ولو اتأخرتي تاني هيبقى في رد فعل اوحش
كنت حاسة ان عايزة افتح دماغه تعبت من ان حد يتحكم فيا بالطريقة دي ومطلوب مني اسكت ومنطقش
منى زميلتي ف الشغل طبطبت عليا : متزعليش خير يا ملك معدتيش تتأخري وخلاص
_ انتِ عارفة انا نفسي اسيب مهنة المحاماة دي خالص وافتح مشروع لوحدي بجد نفسي اوي يا منى
- مشروع زي ايه
_ مش عارفة..
نزلت م الشغل ورحت قعدت ع الكافيه اللي متعودة اروحه
كنت قاعدة بقرأ ف رواية وبشرب نسكافيه لحد ما خدت بالي ان شخص قعد قدامي
بصيت بعصبية : انت مين وازاي تقعد كدة
كان شاب وسيم شعره اسود وعيونه سود بردو، قمحاوي شوية وابتسم فغمازته ظهرت : انا إياد ، زوجك المستقبلي
عرفت انه اخو صاحبتي اللي كانت بتكلمني عنه كانت أول مرة اشوفه، نفخت بضيق : زوجي المستقبلي مين هي ناقصة جنان
_ممكن اعرف سبب رفضك يا ملك
- بص يا استاذ إياد كل واحد وليه اراءه ومعتقداته الخاصة ف الحياة انا بالنسبالي مقدرش اتجوز واحد ف سني اصلا هحس ان تفكيري اكبر منه مع احترامي ليك طبعا بس دا طبيعي ومعروف اكيد، فمش هيبقى في توافق بينا وعمرنا ما هننجح ف جوازنا
رجع راسه ورا ومرر ايده ف خصلات شعره : مين قالك كدة بقى انا مش هتناقش معاكي ف الحوار دا كتير بس بما انك انسانة متعلمة ومثقفة لازم تحكمي ع الحاجة لما تجربيها وتديها فرصتها الاول وانا مش بطلب منك غير انك تديني فرصة اثبتلك انك هتبقي سعيدة معايا، انتِ مسألتيش نفسك امتى حبيتك وليه مصمم عليكي انت بالذات
_مش عايزة اعرف انا مش مقتنعة باللي بتقوله
على صوته :ممكن تسمعي للآخر
كنت هاخد الشنطة واقوم امشي بس هو منعني وكمل بهدوء : بصي يا ملك انا من زمان بشوف فيكي حاجة مشفتهاش ف غيرك كنت بحبك ف صمت محدش يعرف اصلا وبتابع اخبارك ف كل وقت بفرح بنجاحك وبزعل اما احس انك مضايقة ومش قادر اهون عليكي حسيت ان شخصيتك مناسبة معايا جدا بعيدا عن السن اللي مش شايفه مشكلة اصلا انت مش محتاجة ان اقولك ان الرسول عليه الصلاة والسلام بنفسه اتجوز السيدة خديجة وحبها وهي حبته وجوازهم كان ناجح جدا فلو سمحتي اديني فرصة اثبتلك دا ولو مرتحتيش انا مش هجبرك تجوزيني
مكنتش قادرة اخد قرار ساعتها ولا عارفة اقوله رد فضلت ساكتة وهو مركز معايا
_ها قلتي ايه يا ملك
بتردد: ه.. هفكر
ابتسم بثقة : هتوافقي
-جايب الثقة دي منين
_احنا مش اي حد ولا ايه يا باشا
ضحكت : باشا!
*************************
روحت البيت وكنت بفكر ف اللي قاله حسيت ان قلبي ارتاحله بس خايفة افشل مش عايزة افشل ف جوازي طول عمري عندي فوبيا م الموضوع دا عشان كدة مش هتسرع ابدا مهما حصل
قلعت الطرحة وسبت شعري حطيت ميك اب وبصيت لنفسي وانا مبسوطة ،لما بيبقى مزاجي حلو بعمل كدة ،سمعت صوت مسدج ع الواتس لقيت رقم غريب باعت
" انتِ دواء الجروح وضماد الجريح انتِ هواء الروح وبنظرة منكِ استريح، انتِ وطني الذي بحثت عنه بعد غربة طالت لسنوات طوال، ولن اتركه حتى لو كلفني الأمر أن يصبح عمري بأكمله نضال"
حطيت ايدي على قلبي وابتسمت كلامه لمسني من جوا بس استوعبت الموقف وكلمت نفسي بصوت: ايه دا بقاا احنا متفقناش على كدة انت هتخليني احبك بالسرعة دي ولا ايه لا مش انا لاء
اهدي وخدي شهيق وزفير شهيق وزفير
جالي مسدج تانية : مبترديش ليه اوعى يكون الشعر اللي مألفه معجبكيش، كاتبه ليكي على فكرة
ضحكت ورديت ع المسدج : شكرا، انت بتكتب شعر بجد؟
- شكرا! هتموتيني ناقص عمر بس تمام، ايوا يا ستي بكتب شعر وبألف كتب وروايات شوفي صفحتي هتلاقي كل دا
_ بجد برافو طب وعلى كدة بتنزل كتاباتك ف معرض الكتاب ولا لسه
- ايوا بنزل واتمنى العرض الجاي ف روايتي الجديدة تبقى معايا هناك
ابتسمت : ان شاء الله
أنا هقفل عشان عندي شغل بدري
_ ماشي تصبحي على خير يا ملك
-وانت من اهله
اتهدت براحة واتغطيت ونمت
صحيت الصبح وصليت، لبست جيبة سمرا وبلوزة بسيطة نبيتي ولبست الطرحة ونزلت الشغل
وصلت المكتب بدري وكان مزاجي حلو ف اليوم دا
منى شافتني ولاحظت اني مبسوطة انهارده : يارب دايما يا ملوكة اسمه ايه بقى
ضحكت : هو مفيش حاجة هتبسطني غير لو ارتبط ولا ايه وبعدين انت عارفة ان مليش ف جو الارتباط وكدة بس يعني بشوف الدنيا عشان لو خير هيبقى في نصيب
_ بجد دا انتِ لازم تحكيلي الحكاية م الاول بقى
- ماشي يلا بينا
************************
عدى اسبوعين كنا بنتكلم كتير وكل يوم كان بيثبتلي اني كنت غلط لما حكمت عليه بالرفض ف الاول حاسة اني هوافق عليه خلاص وماما طبعا كانت عارفة كل دا
******************************
جالي مسدج ع الموبايل بليل : " خلي بالك من إياد عشان دا بتاع بنات ومبيحبكيش بيتسلى يومين زيك زي غيرك ولو مش مصدقة روحي ع العنوان دا....بكرا الساعة 3"
مكنتش عارفة اروح ولا لاء خفت اوي يطلع كلامه صح يعني بعد ما حسيت ان في شخص بيحبني بجد يحصل كدة لاء اكيد كذب
قررت اروح وخلاص وكنت طول ما انا ف الطريق بدعي يكون غلط وصلت ولقيت إياد قاعد بس صدمتي الأكبر ان لقيته قاعد مع منى! وفجأة مسكت ايده ساعتها قريت منهم
وهو شافني واتخض فقام من مكانه واتكلم بتوتر : لا يا ملك متفهميش غلط والله مافي حاجة بينا انا.. معرفهاش
حاولت معيطش بس عيني كانت مليانة دموع بصيت لمنى لقتها بصت ف الارض وبعدين اتكلمت: انا اسفة يا ملك بس احنا بنحب بعض من زمان ولما عرفت الموضوع منك مقدرتش اكسر فرحتك ساعتها بس كان لازم اعرفك وتفوقي قبل ما يضحك عليكي زيي عشان كدة بعتلك رسالة امبارح
إياد زقها بعصبية : انتِ بتقولي ايه يا متخلفة انتٌ يا ملك مصدقهاش دي كذابة وو...
ضغطت على أيدي بعصبية : مشوفش وشك ف حياتي تاني
قلتها وجريت بأقصى سرعة وركبت تاكسي
وصلت البيت ورجلي معدتش قادرة تشلني اول ما دخلت وقعت ع السرير، ندمت اني دخلته حياتي كنت صح ف الاول انا غلطت ولازم اتحمل نتيجة غلطي المشكلة ان منى صاحبتي من زمان صدقت كلامها بس مش قادرة اسامحها، من اول يوم ليه مقالتليش مش هقدر اتعامل معاها تاني مش هقدر خسرت حبيبي وصاحبتي ف يوم واحد..!
فضلت اسبوع مبروحش الشغل فكرت اسيبه خالص مكنتش عارفة هشتغل فين تاني بس مش هعرف اكمل ف المكان دا، اخت إياد كانت بتتصل بيا كتير هي صاحبتي بردو بس مردتش عشان كنت عارفة ان هو عايز يوصلي من ناحيتها،
نزلت عشان أقدم استقالتي وكنت متأكدة ان المدير اساسا مش هيبقى طايقني عشان غايبة بقالي اسبوع
وصلت ومرضتش ادخل المكتب بتاعي عشان عارفة انها هتبقى فيه بس من سوء حظي قابلتها
كنت هكمل مشي بس هي وقفتني : ملك استني
_ عايزة ايه؟
- مش عايزاكي تزعلي مني هو مكنش يستاهلك وربنا يعوض عليا انا كمان متخليش حاجة تفرقنا احنا صحاب من زمان
_ صحاب! كان ممكن تقوليلي من يوم ما وريتك صورته وبعتلك الاكونت بتاعه بس انت سبتيني لحد ما اتعلق بيه وبعدين فكرتي تقوليلي وكمان بطريقة مقززة
_يا ملك اسمعيني اناا...
بعصبية : منى ابعدي من وشي احسنلك
رحت قدمت استقالتي ومشيت معرفش ليه اتخنقت ف العياط لما شفتها افتكرت اليوم دا مع اني منستوش ولا لحظة مكنتش اعرف ان حبيته كدة امتى وازاي اتعلقت بيه وف الآخر طلع وهم
********************************
كنت سهرانة بقرأ ف الشات بتاعنا انا عملتله بلوك من يومها قرأت الشعر اللي كان بيكتبه وصوره ف كل مرة عمل فيها انجاز اللي كان بيبعتهالي ويحكيلي قصة كل صورة قرأت كلامه عن شخصيته ومواقفه وهو صغير مع أهله اللي كانت بتضحكي والحاجات المتشابهه بينا اللي بتفرحني، اول ما سمعت صوته ف الريكورد انهارت مش قادرة وحشني بطريقة غير طبيعية يارتني ما علقت نفسي بيه..
ماما دخلت عليا ف الوقت دا فمسحت دموعي بسرعة
- ملك البسي وتعالي في ضيوف برا ولاد خالي مجوش من زمان وعايزين يشوفوكي تعالي يلا
قالت كدة وخرجت وانا مكنتش ف المود اللي يؤهلني اشوف انسان اصلا نفخت وغسلت وشي ولبست وطلعت برا
اتصدمت لما شفت إياد هو اللي قاعد ف الصالون
بعصبية : ماما انتِ بتضحكي عليا خليه يطلع برا لو سمحتي
- يا بنتي إياد فهمني كل اللي حصل اديله فرصة بس تسمعيه وانتِ تفهمي
_ يا مامااا
- انا هدخل اعمل حاجة يشربها وهو هيفهمك الموضوع دا كان عايز يجي وابوكي موجود عشان يتقدم بس انا قلتله يتكلم معاكي الاول ويفهمك عشان عارفاكي متسرعة
قعدت وانا مش طايقة نفسي كان واحشني اوي بس جرحي وجعني اكتر لما شفته
بصلي بحزن : انا آسف صدقيني مفيش بيني وبينها حاجة والله العظيم ما اعرفها يا ملك انا جالي مسدج بليل أن في شخص محتاج يقولي كلام مهم جدا ولو منزلتش هيرش ف وشك ميا نار ساعتها قلبي وقف ونزلت بسرعة ع العنوان اتفاجئت بيها انها الشخص دا وقالتلي انها بتحبني وانك متستاهلنيش وفجأة مسكت ايدي ساعتها انتِ وقفتي قدامي وهي عملت كدة لما شافتك اكيد
مكنتش قادرة أصدق اللي بيقوله :انت بتقول ايه ومنى هتعمل كدة ليه دي صاحبتي من زمان وعمري ما شفت منها حاجة وحشة انت كداب
_انا مش كداب يا ملك وهثبتلك بنفسي
فتح ريكورد بصوت منى متسجل :عايز تعرف عملت كدا ليه؟ انا مش وحشة زي ما انت متخيل بس ملك دايما كدة عايزة تنجح وتبقى احسن مني بقت تترقى اكتر وانا زي ما انا حتى لما حكتلي عنك ف الاول مكنتش عايزاك وبتقول حجج فارغة ساعتها جبت الاكونت بتاعك وحبيتك وقلت هي متستاهلش اصلا انك تحبها انت تستاهل حد يحبك بجد زيي صدقني انا بحبك يا إياد وهسعدك ف حياتك "
دموعي نزلت من عيني وانا مصدومة : ليه كدة انا عملت فيها ايه عشان تعمل فيا كدا انا كنت بحبها من قلبي وبساعدها ف اللي تحتاجه ليييه
إياد : اهدي يا ملك عشان خاطري انا مقدر احساسك دلوقتي بس الخيانة ممكن تيجي من اكتر ناس انتِ واثقة فيهم وبتحبيهم في ناس كتير قلوبهم مريضة وللأسف الطيبين اللي زيك هما بيبقوا الضحية بتاعتهم ومش معنى كدة ان كل الصحاب قلوبهم مريضة انتِ اللي بتختاري واديكي اتعلمتي لما تيجي تختاري صاحبة قريبة منك بعد كدة مدخلهاش حياتك الا ما تتأكدي من مواقف حلوة عملتها معاكي ومن تصرفاتها مع غيرك كمان
رديت بعياط : بس انا مكنتش اعرف كل دا انا حبتها من قلبي ودخلتها حياتي من غير حاجة وكنت فاكرة ان هي كمان بتحبني عشان عمري ما عملتلها حاجة وحشة كانت هي أقرب واحدة ليا يا إياد معدتش عندي صحاب..!
بصلي بحنية : وانا صاحبك وحبيبك وابوكي وكل اللي انتِ عايزاه متعيطيش بقى دي متستاهلش حتى تعيطي عشانها ربنا بيحبك عشان بينهالك على حقيقتها يا ملك، يلا بقى عشان ورانا حاجات كتير
- حاجات ايه
_ تحضيرات الفرح يلا بسرعة
ضحكت وهو ضحك
**************************
-ماما انا عايز اخرج بقى
_ حاضر يا عمر بليل هنروح لتيتا
- لا يا ماما انا عايز اروح ف حتة تانية كل مرة نروح لتيتا زهقت
_ وعايز تروح فين يا سي عمر
- اممم بصي نروح الملاهي ايه رأيك
_ اسأل بابا فاضي انهارده ولا لاء
سألته وقالي موافق
بصوت واطي : يووه هو دا وقت ملاهي ماشي يا إياد
- طيب يا عمر ثواني
دخلت اوضتنا وإياد كان قاعد ع السرير ماسك الموبايل
_إياد هو انت قلت لعمر انك فاضي وهنروح الملاهي
- ايوا يا حبيبتي فيها ايه؟
_ يا إياد انا تعبانة مكنش ليا مزاج اروح انهارده حاسة ان جسمي مكسر خالص م الشغل
_ عشان خاطر عمر بقى يا ملوكة وبعدين مش انتِ اللي كان نفسك تفتحي مشروع وفتحناه مع بعض فين روح الاسترونج اندبدنت وومن اللي كنتي عاملاهالي
- ابنك طلباته متعبة زيك ثم اني مازلت سترونج اندبدنت وومن بس اتفرهدت
_ انا بردو اللي متعب ماشي يا ست الاسترونج الفرهودة
كنت واقفة وهو قام من مكانه وقرب مني وسند ايده ع الحيطة اللي ورايا : بس تعرفي ان كان احلى قرار خدته ف حياتي عمر حبي ليكي ما قل كان كل يوم بيزيد اكتر واثبتيلي انك احلى زوجة ف العالم
ريحة البرفيوم بتاعه كانت زي السحر بالنسبالي غمضت عيني ورديت : انا اللي كنت هبلة لما قلت ان ممكن جوازنا يفشل انا مفيش حاجة نجحت ف حياتي اكتر من وجودك فيها عوضتني عن كل حاجة يا إياد بحبك من هنا لكل السنين الجاية واوعدك هفضل دايما محافظة ع البيت دا ومش هسمح لحد يبعدنا عن بعض
_طب قوليلي هحبك اكتر من كدة ايه
ضحكت وعمر دخل
_ بتعملوا ايه يا بابا
بعدت شوية وكنت بضحك جامد : انا راحة اعملكوا فشار
_ بابا كنتوا بتعملوا ايه
- فشاار بقى كدة سيباني ليه يعني مااشي مردودة على فكرة
_ايه يه حبيبي كنت بقنعها توافق ع الملاهي!
************************
#Nourseen_Hamdy
تعليقات
إرسال تعليق