مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت❤بقلم سولييه نصار❤

-انتي اكيد ابوكي تاجر مخ*درات صح ؟!

-عشان يعني جاب النوع ده ...علي أساس كناية اني سطلتك بجمالي...معاكستك قديمة وسخيفة زيك يا نرم !

قولتها ومشيت من جمبه ....كنت في فرح ايمان صاحبتي لما قابلت الشخص السمج ده وفضل طول الفرح ماشي ورايا ...هو ما شافش بنات حلوة قبل كده ولا ايه ...

دخلت الحمام ولما طلعت لقيته في وشي

-بخ 

-سلاما قولا من رب الرحيم ....انت تاني عايز مني ايه 

-نتجوز

ضحكت بتريقة وقولت:

-انت عبيط صح 

- لا ماما بتقولي اني اهبل 

- لا انت فعلا مخك ضارب ولو مبعدتش من طريقي انا هصوت وألم عليك امة لا اله الا الله فاهم ولا لا 

- لا مفهمتش 

-انت مستفز ...ابعد عشان اطلع 

- لا 

فجأة وبكل قوتي رفعت رجلي وكنت لابسة كعب وغرزتها في رجله ...

صرخ وبعد استغليت الفرصة وجريت...لفيت وانا بضحك وطلعت لساني وقولت:

-ادي اخرة اللي يلعب مع هدي القناوي يا كذا نوفا 

وجريت وانا بضحك 

............

روحت الصبح البنك اللي بشتغل فيه وعرفت أن مديري القديم مشي النهاردة هيجي مديرنا الجديد ...

بصيت لصاحبتي وقولت :

-اي شغل الروايات ده ...طبعا المدير هيكون وسيم والبنات تموت عليه بس اكيد هيختارني كمني عيوني زي الغزال وعسلي وشعري بيطير رغم اني محجبة يعني 

ضحكت مودة وقالت :

-يخربيت عقلك ...وطبعا انتي هتكوني اتخانقتي معاه وهو هيحطك في دماغه عشان ينتقم 

-بس فيه مشكلة 

-ايه هي 

-انا الاسبوع ده اتخانقت مع طوب الأرض ...امبارح بس اتخانقت مع ستة ونص  تلات شباب ونص وراجل عجوز واتنين ستات مكانوش عايزين يخلوني اخد دورهم في فرن العيش 

-اه يا مفترية 

قالتها مودة وهي بتضحك وكملت:

-الا قوليلي مين النص شاب اللي اتخانقتي معاه

-واحد عاكسني في فرح ايمان  مظنش انه هو ده باينه شحات ونرم 

- المدير اهو يا هدي واقف قدامنا

بصيت وياريتني ما بصيت لقيت الشحات النرم واقف قدامنا وعلي وشه ابتسامة سمجة

-شحات ونرم ده انتي قلبك جامد يا هدي 

-يا مرك يا هدي 

قولتها وانا بلطم 

ضحك هو وبعد وهو بيعرف نفسه علي نفسه 

-ازيكم انا الياس النجار المدير الجديد...بتمني نكون علي توافق مع بعض دايما ونحترم بعض ...

بصلي بإبتسامة فخوفت....خلاص هيطردني ...ده اكيد هيعمل العجايب فيا ....ممكن يتجوزني ويعذبني زي الروايات اللي قريتها وبما اني حظي زفت مش هيحبني ولا يعوضني ...ياربي ايه النحس ده !!

روحنا كلنا علي الشغل وانشغلت ونسيت الموضوع ...مرت الايام وعلاقتنا كانت محدودة بس لسه كنت خايفة منه ...لحد في يوم رجعت البيت لقيت بابا مقابلني بإبتسامة وقال:

-متقدملك عريس

-مين يا بابا 

-إلياس النجار !!!

-ده اكيد هينتقم مني 

قولتها وانا بلطم

يتبع 

#كنة_النجار 

#سولييه_نصار

الجزء الثاني🥰شكرا لتفاعلكم السكر🥺بقلم سولييه نصار🥰

-ليه ؟

-ليه ايه يا هدي الراجل عايز يتجوزك. ..اعجب بيكي وطلبك 

-هو يعني مفيش غيري تتدبس يا بابا مش موافق 

-تتدبس ايه يا بت ده جواز ...هدي حبيبتي انتي قربتي تكملي التلاتين ولحد دلوقتي اي حد يتقدملك يمشي ...ابوس ايديكي متطفشيش العريس ده 

-يا سلام هو انا اللي بطفش برضه ولا مراتك المحترمة هي اللي بتطلع فيا العبر عشان محدش يكمل معايا 

-اتكلمي عن امك بطريقة احسن من كده ...هي المرة اللي فاتت مكانش قصدها 

-دي مش امي 

صرخت وكملت:

-امي ماتت ...دي مرات ابويا اللي انت فرضتها عليها لا انا بحبها ولا هي بتحبني ...دي شيطانة 

ضربني بالقلم وزعق 

-انتي  متربتيش واتفضلي ساعدي امك عشان الناس جايين النهاردة ويا ويلك يا هدي لو العريس ده هرب منك ساعتها هرميكي لخالتك واتبري منك 

دموعي نزلت وانا بمشي من قدامه ...كنت لسه هدخل اوضتي لقيت مرات ابويا واقفة ومبتسمة ابتسامة صفرا وقالت :

-مبروك يا عروسة تتهني بإذن الله 

-وانتي تتحشري مع ابو لهب في النار بإذن الله يا بعيدة 

-طب خافي مني بقا النهاردة 

قالتها وراحت المطبخ 

دخلت اوضتي وانا بمسح دموعي من جهة الياس اللي عايز يتقدملي ومش عارفة نيته ايه ومن جهة تانية اخت ابو لهب في الشر ...ياربي هو انا الاقيها منين ولا منين ...بس لحظة ليه زعلانة كده كده مرات ابويا هتطفشه وانا في الامان الياس مش هيطولني ولا حاجة وقدام بابا هتبقي مرات ابويا السبب عشان ابويا هيحس أنها مستقصدة تعمل كده ...

غيرت هدومي وروحت اساعد الحية اللي ابويا بلانا بيها الهي تتشوي في نار جهنم البعيدة يارب

......

بالليل

مسكت صينية العصير وانا مبتسمة وماشية براحة ...قدمتها لإلياس وأمه وأبوه ...

-ما شاء الله عروستنا جميلة اووي

ابتسمت بكسوف وروحت اقعد كنت مرتاحة لان مرات ابويا ولأول مرة هتعمل حاجة حلوة عشاني ...ياااه اخيرا هتكفر عن ذنوبها الكتير في حقي انا مش مصدقة نفسي ... ضيفتهم الكيك اللي انا عملته وطبعا هتقول أنها هي اللي عملاه نسيت نفسها بت لواحظ كانت فاكرة الكيكة فونشة مواعين ...بس يالا كله يهون عشان اخلص من السمج اللي طلعلي في البخت فجأة

-الله حلو الكيك ده يا مدام ملك 

ملك مين والله الاسم خسارة فيها مكانوش سموها تس تس انا التعبان  لايق عليها اكتر 

ابتسمت حماتي نفس الابتسامة الصفرا اللي في يوم هكسر سنانها بسببها وقالت :

-دي من عمايل ايد هدهد حبيبتي 

ايه ...لا بتعمل ايه البلوة دي ... هتبوظ الخطة بعدين هدهد مين بس هي جبتني من حديقة الحيوان !

-عروستنا بتعرف تعمل حلويات كمان 

-اومال هدهد شاطرة اوووي يا مدام كاميليا في الطبيخ وشغل البيت وحتي ناجحة في شغلها اووي بجد ابنك محظوظ بيها ...لو عندي ابن كنت جوزته ليها 

لا شكرا اكيد كنت هنت*حر قبل ما اتبلي بحد من جينات بت لواحظ ...بس هي بتعمل ايه ...ايه ضميرها صحي فجأة !!

كملت حماتي كلامها وقالت :

-هدي صحيح مش من دمي  بس والله انت بعتبرها اكتر من بنتي ....هي إنسانة طيبة عمرها ما عاملتني بطريقة وحشة ولا انا

وهنا استحضرني مشهد لما  مسكنا في بعض انا وهي وشدينا شعور بعض لحد ما جه ابويا ضرب*بنا بالحزام ...لا الست دي مش طبيعية ...دي اتلبست ...اكيد اتلبست يخربيتها هتدبسني في الياس يا مرك يا هدي عملتي ايه عشان المصايب دي كلها 

ابتسمت ام الياس وأبوه وقالوا بطيبة :

-احنا عجبتنا هدي اووي ويشرفنا أنها تبقى كنتنا

-يالهووي يالهووي 

قولت في سري وانا بفتكر كل الروايات اللي قريتها ...انا انتهيت 

-يبقي نقرأ الفاتحة 

قالها ابويا بصوت عالي 

-لااااااااا

قومت وانا بصرخ 

بصلي بابا بغضب. قال:

-فيه حاجة يا هدهد 

-اه...لا ..اه...انتوا نسيتوا حاجة 

-ايه هي 

-تاخدوا رايي 

نار طلعت من عيون ابويا وقال :

-ليه يا هدهد عندك مانع 

خوفت وانا بهز راسي واقول:

-ربنا ما يجيب موانع يا حاج نقرأ الفاتحة 

علي روحي 

كملت بصوت واطي ...وقعدت وانا بلطم ...بصيت لمرات ابويا لقيتها بتبصلي بإنتصار ...بنت كوم الشكاير دي دبستني!

يتبع 

#كنة_النجار

#سولييه_نصار

الجزء الاخير❤شكرا على تفاعلكم السكر ❤بقلم سولييه نصار❤

-ليه عملتي كده ؟!

زعقت فيها بعد ما الضيوف مشيوا 

بصلي ابويا بغضب وحيرة ....

بس انا مهتمتش كنت متضايقة ...هي ليه عايزة تبوظ حياتي بالشكل ده انا عملتلها ايه ...ليه الحقد ده 

بصتلي بإبتسامة نصر وقالت:

-مالك يا هدهد بس الحق عليا اني خليت حد يقبل بيكي بدل ما انتي قاعدة زي البيت الواقف ...يعني مفروض تفرحي ان اخيرا حد رضي بيكي 

-شايف يا بابا كلامها ...شايف بتقول ايه 

-تستاهلي لانك متربتيش

قالها ابويا بعصبية فاتكلمت هي :

-عندك حق هي فعلا متربتش والحق عليك انت وامها....

وشي احمر من الغضب ...دي جابت سيرة امي بت لواحظ وساعتها محستش بنفسي الا وانا بجيبها من شعرها ......بقلم سولييه نصار 

.....

بعد شوية كنت قاعدة علي الانترية وشي احمر لما. ابويا ضربني قلم لاني مديت ايدي علي مراته

مرات ابويا كانت قاعدة بعيد وهي بتبصلي بشماتة ...

-انا تعبت منك ومن قلة ادبك

-انت مش شايف

-اخرسي

زعق فسكتت ...قال بعصبية :

-انا مستنية اليوم اللي هتغوري من وشي فيه ...اعملي حسابك فرحك علي الياس بعد شهر 

قومت وانا بقول ببكا:

-حرام عليك انت ايه قلبك حجر ..معقول ست تخليك تعامل بنتك الوحيدة كده ...انا عملتلك ايه ...عملت ايه لده كله ...يارب اموت وارتاح منكم 

ضربني بالقلم لحد ما بوقي نزف وقال:

-انتي قليلة الرباية 

دموعي نزلت فقال :

-اتفضلي روحي علي أوضتك 

راحت وهي مكسورة ....ابتسمت ملك بشماتة وافتكرت لما سمعت هدي بتكلم صاحبتها وبتقولها انها مش عايزة الياس ولو مرات ابوها طفشته هتبقي عملتلها خدمة !

......

كنت في اوضتي وانا بعيط ...بعيط علي اكتر انسان حبيته وهو بابا ازاي فجأة نسي كل حبه ليا بسبب ملك ...ازاي حبها اكتر مني. ...كنت مقهورة وقررت اتقبل قدري واتجوز إلياس رغم ثقتي انه هيكسرني ...بس انا كده كده مداس علي وشي وممسوح بكرامتي الأرض 

....

مرت الايام واتخطبت انا والياس...طول الفترة دي كان بيعاملني كويس وبيهتم بيا ...اكيد عايز يوقعني في الفخ عشان يصدمني ليلة دخلتنا يارب يعني امشي من وش الحرباية مرات ابويا وادخل بيت الكوبرا انا ربنا يتولاني ....

اخيرا جه يوم فرحنا ...كنت متوترة جه قرايبي عشان نروح الكوافير ....وقفني ابويا لحظة وحب يتكلم معايا

....

-هدي انا عارف اني قسيت عليكي ...بس كان لازم اعمل كده عشان مؤخرا انتي زودتيها ...بقيتي تتطاولي علي واحدة في مقام امك 

بصيتله وانا مدمعة وقولت:

-امي عمرها ما سخنتك عليا ...امي عمرها ما قللت مني....امي عمرها ما بكتني...بس هي عملت يبقي هي مش امي ...امي عمرها ما هتخليك تكرهني بالشكل ده 

-لا انا ...

قاطعته ودموعي بتنزل :

- عارفة اني بقيت عبأ عليك ...عارفة انها قدرت تكرهك فيا وانا بحييها علي ده ...انا ماشية يا بابا خلاص ارتاح مش هعمل مشاكل خالص وانت عيش مع مراتك وافرح ...

بعدين سيبته ومشيت...كان لازم اقول كده...كان لازم افضي قهرتي ....

....

خلص الفرح ولسه هروح حضني بابا جامد وقال :

- علي فكرة انا بحبك .

حاولت امسك نفسي بالعافية وبعدت وانا بقول بأدب:

-شكرا ليك 

وبعدين مشيت ....

.......

-اتفضلي يا عروسة برجلك اليمين 

يارب استر يا تري هيضربني الاول ولا يكهربني المعتوه ده 

دخلت وانا بترعش....هو انا لو هربت دلوقتي  هيحصل حاجة ....

ابتسم الياس وهو بيقرب وقال:

-مبروك يا عروستي.

انت بتقرب ليه يا جدع انت ...

-النهاردة ليلة دخلتنا هكون بقرب ليه بذكاء اهلك 

-وايه يعني...الياس لو قربت خطوة واحدة انا ...انا 

-هتعملي ايه يعني 

-قعدت علي الأرض وانا بندب وقولت:

-هعيط ...لو قربت هعيط...

وبدأت فعلا اعيط ...قعد جمبي وهو مخضوض وقال:

-مالك ...بتعيطي ليه 

-عشان انت هتضربني

- انا 

-ايوة وهتكهربني 

-انا؟!

-وكمان هتشغلني خدامة

-انا؟!!مين قالك الكلام الفارغ ده 

-الروايات 

-الله يخربيت الروايات وسنينها اللي بوظت دماغ البنات 

- انا هفهمك

-ارغي

-اصل انا شبه ابطال الروايات ..قمر ما شاء الله 

-يا سلام علي التواضع

-وماما اتوفت

-الله يرحمها 

-وابويا جابلي حرباية علي أساس انها مرات ابويا

-يا ساتر يارب 

-وطبعا زي ما انت عارف انها هتبدأ تغير مني وهتقلب حياتي لجحيم وانا في يوم هتخانق مع شاب وسيم ...طبعا الحاجة الوحيدة اللي متغيرة انك شبه لواحظ ام ملك ولا تمت بالوسامة بصلة 

-انتي حلال فيكي.الضرب 

-خليني اكمل 

-حاضر ...

-طبعا هتخانق معاك.وانت تتوعدني 

-اسمها تتوعدلي

-مش مهم ...المهم انك بقا هتبقي مديري في الشغل وترسم عليا الحب وتتجوزني وبعدين ليلة الدخلة اكتشف حقيقتك المريرة

-اني مصاص دماء مثلا 

-لا انك اتجوزتني عشان تنتقم 

ضحك كتير ...قعد يضحك لفترة طويلة بعدين سكت ويصلي وقال:

- ايه رايك في حدوتة احسن ...شاب وسيم زيي كده شاف بنت في فرح وراح علطول اتقدملها وفضل يعاكسها واكتشف أن البنت دي مجنونة ...عجبته اكتر والفرحة مكانتش سيعاه لما عرف انها بتشتغل عنده ...ساعتها استغل الفرصة واتقدملها واتجوزوا...عاهد نفسه وأهله ان البنت دي بس هتكون كنة النجار...البنت دي يا هدي هي الوحيدة اللي قدرت تحرك قلبي وسيطرت عليا ...البنت دي انتي 

دموعي نزلت فمسحها وكمل: 

-كل اللي شوفتيه في حياتك من عذاب انا هعوضك عنه ...انت بحبك يا كنة النجار❤

-وانا كمان شكلي هحبك رغم انك شبه لواحظ ام ملك 

ضحك وضحكت معاه ...الحياة فجأة ممكن تضحكلنا بس الصبر 

تمت 

#كنة_النجار

#سولييه_نصار

بارت اضافي❤شكرا على تفاعلكم السكر ❤بقلم سولييه نصار❤

مرت الايام بسعادة ....الياس خلاني اسعد واحدة في الكون ...عرفت الحب معاه  وعشقته....هو كان النور في حياتي ...خلاني متفائلة وبحب الحياة ....تأثيره علي حياتي كان واضح جدا ...السعادة اللي كنت فيها كانت باينة اووي بطريقة خلت مرات ابويا تغير ...وطبعا كان لازم تبوظ حياتي وفعلا خططت بطريقتها الشيطانية ...في يوم كنت عندهم بزور بابا ...بابا شكله حس بغلطه معايا وبدأ يعاملني كويس بس هي كانت لسه معاملتها سيئة وبقت أسوأ لما شافتني مبسوطة وعرفت ساعتها انها ناوية تعمل عملة سودا من عمايلها...وكنت مجهزة نفسي 

.....

في يوم كنت واخدة اجازة وبحضر أكلة الياس المفضلة لما ملك اتصلت بيا وصرخت انها راحت بيت أهلها وبابا تعب هناك وهي لوحدها وطلبت اجيلها بسرعة ...

........بقلم سولييه نصار 

بعد نص ساعة 

جريت علي بيتهم عشان بابا ...قلبي كان بينبض بخوف ...خبطت علي الباب جامد فتحلي اخوها الصغير 

رجعت بخوف وقولت :

-بابا فين 

بصلي من فوق لتحت وقال :

-ابوكي جوا ادخلي 

كنت مرعوبة بس دخلت 

لقيته بيقفل الباب بالمفتاح ومقرب مني 

-فين بابا؟!!

قولتها وانا برجع لورا وعيوني مدمعة

-بابا ايه دلوقتي بس 

قالها وقرب مني ...

جريت وانا بصرخ مسكني من ايدي جامد وكتم بوقي وقال:

-اهدي يا فراولة صدقيني هتنبسطي 

دموعي نزلت وانا بدعي ربنا يخلصني من المصيبة دي 

فجأة الباب اتفتح ودخل الياس وقعد يضرب فيه زي المجنون...ووراه كان ابويا ...كان باين عليه الحزن والالم والندم ...

الشرطة  جات اخدت اخو ملك اللي طلع عنده سوابق وهربان من الأحكام 

....

ابويا رجع البيت معايا ومع إلياس كان قافل علي ملك الباب فتح الباب واشتغل ض*رب فيها ...حوشت منه بالعافية....زعق بصعوبة :

-تغوري من البيت ده وتتنازلي عن حقوقك والا والله يا ملك اقت*لك...عايزة تسوئي سمعة بنتي ...بنتي انا ...دي هدي أشرف من عيلتك كلها يا اللي اخوكي طلع سوابق ...بس الحق عليا اني دخلتك  بيتي وحبيتك 

كانت بتترعش وبتبكي وقالت:

-هطلع هطلع بس. بلاش تضربني ابوس ايديك انا اسفة ....

-انتي طالق ...اطلعي برة مش عايزة اشوف. وشك تاني لو شوفتك والله هقت*لك ....

......

بعد ما طلعت مسك ابويا ايديا وكان هيبوسها ...بعدتها بخضة وانا بقول وانا ببكي :

-بابا انت بتعمل ايه 

بوست ايده وقولت وانا بعيط :

-متعملش كده تاني 

-سامحيني يا بنتي انا ...

حضنته وقالت:

- انا عمري ما زعلت منك عشان اسامحك 

حضني فابتسمت اخيرا خلصت من الافعي اللي في حياتي...

.....

-الياس حرام عليك بقالنا ساعتين راجعين من عند بابا وانت رافض تتكلم معايا 

بصلي بغضب وقال:

  افرض حصلك حاجة ...انتي عصيتيني يا هدي ...قولتلك متروحيش

مسكت ايده وقولت:

- كان لازم اعمل كده عشان اخلص منها ...انا كنت عارفة انها هتعمل حاجة وفعلا اتوقعت ان اتصالها فخ عشان كده اتصلت بيك عشان تتصل ببابا وتتأكد انه بخير وتقوله اني اتصلت بيك عشان اقولك علي كلام ملك. ساعتها لما بعت رسالة روحت وانا مطمنة انك هتلحقوني

- بس انا رفضت ...انتي لما صممتي وافقت ...انا خوفت عليكي 

بوسته علي خده وقالت 

- خلاص بقا يا ليلو سامحني 

-ايه الاسم المايع ده انتي رجعتي تقري روايات تاني ....عموما هسامحك لو بوستيني علي الخد التاني عشان بيغير 

ضحكت وبوسته علي الخد التاني فقال:

-لو مسمعتيش كلامي تاني 

-هتعمل ايه 

-هخليكي تبوسيني بوستين واسامحك اصلي انا في الثبات علي المبدأ مش قد كده ❤

تمت 

#كنة_النجار

#سولييه_نصار

اهو بارت إضافي اي خدعة شير بقا تقديرا ليا