 |
ج. 7و 8...#صرخه_مريم
__ مريم جالها حاله من الذهول بعد ما سمعت خبر وفاه اشرف، خرجت بعيد عن صراخ الموجودين، وقفت على باب الشقه، بتبصلوا اوى وهى فى حضنه بيواسيها على فراق اخوه، سألت نفسها؟
ايه غيرانه عليه!؟ طيب ما انتى عارفه انه بيخونك ومعاكى دليل خيانتهم ولا خايفه؟
خايفه لا يرميكى بعد ما خد كل اللى حيلتك، وارجع بيت امى زى ما خرجت منه، ياريت
زى ما خرجت منه على الاققل كنت معززه مكرمه
إنما هرجع ضعيفه، مكسوره الخاطر، مطلقه
مش بطولى معايا ولد وبنت، مسؤليه كبيره، تربيه
رعايه، مصاريف.
كانت تايهه، سامعه صراخ حماتها على ضناها المتغرب، اللى حتى اتحرمت من وداعه، شايفه
الدنيا كلها سوده فى عينها، رجعت من تفكيرها
على صوت بكاء انس، ضمته فى حضنها اوى، عينها بتتلفت شمال ويمين، مش شايفه غير حاجه واحده بس، عمر فى حضن فيفى.
انهارت ،الدموع نزلت من عينها كأنها نار بتاكل قلبها
فكرت، بصت لأنس اوى وبقوه، علشان خاطرك انت واختك مش هسيب حقى، لازم اضرب على الحديد وهو سخن، فتحت الفون، كلمت اختها مروه وطلبت منها تيجى وتشترى شويه حاجات من ضمنهم دفتر إيصالات امانه، مروه استغربت، سألتها ليه، قالت ان عمر هو اللى عاوزه، قفلت معاها من غير ما تقولها ان سلفها مااات
دخلت شقه حماتها قربت من عمر، شدته من القميص، بدموع تعالى عاوزاك
عمر بصلها اوى، وقته يعنى؟
مريم بغضب.. بقولك تعالى عاوزاك فى حاجه مهمه
عمر.. طيب ، انزلى وهنزل وراكى
مريم.. حاضر، متتأخرش، بداخلها، خاين، بصت لفيفى قربت منها، قربتها لحضنها، انس عازل ما بينهم، بوشوشه، البقاء لله، بسخريه، ربنا يعوضك بالاحسن منه
فيفى بانهيار.. ونعم بالله، هموت عليه، يا حبيبى يا اشرف، قعدت على الكرسى، كنت بقولك انزل
كفايه سفر، مسمعتش كلامى، خدت ايه غير انك موت بعيد عننا، موت بعيد عن حضنى يا حبيبى
عمر قرب منها، مسك كتفها، انا معاكى مش هسيبك ابدا.
__ مريم بغضب نزلت على شقتها، نيمت انس على كنبه الانتريه، قعدت جمبه، بتهز رجليها
وبتوعد.. لازم اخد منه حقى كله، غير كده مش هينفع، لو ماخدتوش دلوقتى، مش هاخده ابدا
لو عشت عمرى كله بطالب بيه مش هخده
_ افتكرت انها لازم تكلم حسام
مسكت الفون، كلمته، اتفقت معاه
على خطه لانها مش ضامنه اللى هيحصل مع عمر وخصوصا لما يشوف الفيديو، يدوب قفلت
وباب الشقه اترزع، عمر دخل عليها وبزعييق ودموع
عاوزه ايه يا مريم، فى ايه؟
مريم.. عاوزاك
عمر.. ده وقته وبصعبانيه، اخويا الصغير مات
وهو متغرب، مات ومحدش فينا ودعه
قعد جمبها وبقى يعيط جامد، حطت ايدها على كتفه، هو انت بتحب اخوك اوى كده
عمر بتوتر.. ها، ده اخويا، عارفه يعنى، انا ربيته
على ايدى
مريم..مممممم، بسخريه، بصتلوا اوى، فعلا، واضح
انك بتحبه اوى وطبطبت عليه بهمس، وبتحب مراته كمان!؟
عمر ب ارتباك.. انت بتقولى حاجه!
مريم عينها فى عينه وببرود هزت دماغها؛ بتحب مراته، انت بتحب فيفى، ومش كده بس
ده في بينكم علاقه، شاورت على اوضه نومها
السرير ده يشهد عليكم، ايه الكرسى اللى متعلقه
فوقيه، تشهد عليكم، ربنا شاهد عليكم
عمر بخضه كتم بوقها، اسكتى، انتى بتقولى
ايه يا مجنونه، كانت بتتخنق، شال ايده
مريم بانهيار.. انت خاين يا عمر ومع مين
مرات اخوك، خونت اققرب ما ليك
عمر ب ارتباك بيحاول يحضنها ويهديها، حبيبتى
انتى فاهمه الموضوع غلط، مين بس اللى قالك
كده، انا مظلوم والله
مريم متحلفش، انت كذاب يا عمر
عمر.. انا مظلوم، صدقينى، والله العظيم مظلوم
مريم.. قال للحرامى احلف قال جالك الفرج
قامت من جمبه، وبانهيار وصرراخ انا مش باقيه عليك ولا عاوزه منك حاجه، غير انك تطلقنى ب التلاته
وقبل ما طلقنى، ترد ليه 150 الف جنيه، فاكرهم
اللى اخدتهم منى علشان تكمل وتفتح بيهم المحل
خدتهم منى بدون اى ضمانات، ميراث ماما اللى فرقتو عليه وعلى اخواتى على حياه عينها
علشان كل واحده فينا تتضمن مستقبلها
مستخسرتوش فيك، وقفت جمبك، ساعدتك
وعدتنى بالربح، ولا سألت فيا، مشفتش منه ولا جنيه ، بس كنت بقول، جوزى ابو ولادى، ما المحل بتاعنا وفلوسى هى فلوسه، مش فارقه
طول ما هو بيرضى ربنا فيا وفى ولاده، عيشى يا بت وارضى واتبسطى، عيشى اللحظه
انما انت خاين، ومع مين، اققرب الناس ليك
واطى، كلب متمرش فيك اى حاجه عملتها معاك
مريم حست انه هيقوم ويمد ايده عليها
جريت شالت انس على ايدها، بصتلوا، بصت لأنس ، ابنى هو حمايتى، هيحمينى منك يا عمر، متستغربش اوى كده
عمر بتوتر.. انتى مجنونه، فى ايه، انا مش فاهم حاجه، قرب منها ياخد انس!، بعدت عنه ،كانت بتتحامى فى ابنها الطفل الرضيع
مريم.. بقولك طلقنى يا خاين، وبعد ما تطلقنى
تكتب تنازل عن ولادى ليه، وترجعلى كل جنيه
خدته منى وبتوعد، مش هسيبك يا عمر
عمر.. انتى مجنونه صح
مريم.. انا عقلت خلاص، كنت مجنونه بحبك وخفيت، قرب منها، عينه فى عينها، مش هطلقك
مريم.. خاين، واطى، جبان
عمر بانهيار وغضب.. اه خاين، اثبتى بقى
لو بنت راجل اثبتى انى خونتك، ومش هطلقك
هتفضلى كده، عايزه تعيشى، اهلا وسهلا
مش عاوزه اتجهه ناحيه باب الشقه، الباب
يفوت الف جمل، إنما مش هطلقك
مريم بداخلها.. دى اللحظه اللى انا مستنياها
مسكت الفون، فتحت الفيديو، قربت منه
وبثقه، هطلقنى غصب عنك، وهاخد فلوسى من عينك، الفيديو اشتغل، عمر وقف يتفرج
كان مذهول وهو شايف نفسه فى حضن فيفى
جرى عليها، مسكها من شعرها، بتصورينى يا بنت
الكلب
مريم.. مش انا اللى صورتك، الهانم صورتك وانت فى حضنها علشان تفضحك، بقولك طلقنى لافضحك، جريت على باب الشقه
والله لو ما طلقتنى لاطلع قدام اهلك كلهم
الفلاحين، ووريهم الفيديو
ان عمر اللى الكل بيحلف بأخلاقه عامل علاقه
ومع مين؟، مرات اخوه، اللى لسه حتى مدفنش
هتبقى فضيحتك انت وهى على كل لسان يا عمر
عمر بيشد منها الفون، هى على صرخه واحده
عمر بانهيار.. انتى عاوزه ايه دلوقتى بدل ما اقتلك
مريم.. تطلقنى ب التلاته، عاوزه 150 الف جنيه، وتنازل عن ولادى ليه، واخد العفش
كله، بصلها بغيظ
مريم.. حقى، إنما الشقه، مش عاوزاها، عيش فيها
مع حبيبه القلب
عمر بخباثه وخوف.. طيب ممكن تهدى، الدموع نزلت من عينه
قرب منها، انا مليش حد غيرك، كانت نزوه، صدقينى، بحبك انتى يا مريم، مقدرش اعيش من غيرك
مريم.. كذاب، طلقنى، يأما افضحك وابعت الفيديو بدوسه واحده للعيله كلها
عمر.. خلاص يا مريم، انا موافق على طلباتك
بس بعد دفن اشرف، ممكن، انتى شايفه البيت عامل ازاى
مريم.. هتنفذ حالا
عمر.. انتى بنت أصول مش كده
مريم بدموع، انس فى حضنها، بنت أصول اه، بس مش معاك ولا مع عيلتك، اللى متعرفش الأصول اصلا
الباب خبط، عمر ب ارتباك فتح الباب
كانت مروه باين على وشها الخوف
دخلت بلهفه، مريم كويسه يا عمر، هو فى ايه؟
مريم.. تعالى يا مروه، انا كويسه
__ دخلت مروه قعدت، شافت عمر ومريم فى مشكله، مكانتش عارفه حاجه؟
غير لما مريم طلبت منها إيصالات الامانه
مريم.. دول إيصالات امانه هتكتب على نفسك
3 إيصالات، كل ايصال ب 50 الف جنيه
عمر بزعييق.. لا مش هكتب
مريم مسكت الفون وقالت، اقسم بالله انا مجنونه
وانت عارف، دوسه واحده وهتكون فضيحتك على كل لسان انت والمحروسه
انهارت، اللى جبتها بإيدى لحد هنا
عمر بابتسامه سخريه جرى عليها، خد الفون من ايدها، اعملى بقى اللى تعمليه
ان شالله تضربى دماغك فى الحيطه
مريم.. انا مش هضرب دماغى فى الحيطه يا عمر وانت هتنفذ اللى قولتى وحالا
فون عمر رن رساله واتس
فتح الرساله، كان الفيديو، اتجنن، بقى يضرب
دماغه فى الحيط، رمى فونها على الأرض
مريم خدته، شوفت بقى مين اللى خبط دماغه
فى الحيطه يا خاين
اتصلت ب حسام، كلمته وقالت، ربع ساعه
لو متصلتش بيك، ابعت الفيديو، لكل الأرقام
اللى قولتلك عليها، قفلت معاه
انت فاكر انى هبله ولا عبيطه، الفيديو مش معايا
لوحدى، اصلى انا مأمنش لواحد خاين زيك
قعدت على الكرسى، قربت من الترابيزه
طلعت إيصالات الامانه، اكتب 3 إيصالات كل واحد ب 50 الف
عمر قعد مضى الايصالات وعملت ايصال رابع
بالمبلغ كامل
مريم.. بكره بقى ان شاء الله تجهز ال 150 الف
عمر.. ازاى؟
مريم.. مليش فيه، خدهم من وائل بسخريه هههه
اخوك الكبير
عمر.. بكره ممكن جثمان اشرف يوصل وهيكون فى دفن، انا مش هبقى فاضى
مريم.. هههههه، اشرف والله صعبان عليه، بس من رحمه ربنا عليه خده قبل ما يتصدم فيك وفى الحيوانه اللى اتجوزها، وبعصبيه، انت تفضى ليه علشان اخلص منك
عمر.. مش عارف انتى عاوزه ايه بالظبط
مريم.. اكتب تنازل عن ولادك ليه
عمر.. هما فى حضانتك عموما
مريم.. معاك مفيش امان، اكتب
عمر كتب تنازل عن ولاده، فى حاجه تانى؟
مريم.. اه اكتب تنازل بالعفش كله
عمر.. لا يا مريم
مريم.. على فكره انا حاضنه اساسا يعنى الشقه من حقى وانا مش عاوزاها فياريت تتنازل عن العفش
ويبقى كده خلصنا
عمر سامع كلامها، افتكر الفيديو، خاف، كتب تنازل عن العفش كله، انتهينا يا بنت الأصول
مريم.. غصب عنك، يلا طلقنى ب التلاته
عمر.. لا
مروه بذهول.. فى ايه يا مريم
انا مش فاهمه حاجه
طلاق ايه يا جماعه صلوا على النبى واستهدوا بالله
مريم بزعييق.. بقولك طلقنى، ماسكه الايصالات
والتنازل فى ايدها، ضمت ايدها جامد، طلقنى
عمر.. هترتاحى، انا بحبك يا مريم
مريم.. وانا بكرهه الخيانه وانت وجعتنى
انا بكرهك ومش طايقه اشوفك وشك
طلقنى
عمر.. انت طالق
مريم.. بتلاته
عمر.. طالق، طالق
مريم وقفت متنحه، حست بدوخه، مسكت دماغها
حاولت تتماسك قدامه
عمر فتح باب الشقه، خرج منهار
مروه جريت قفلت الباب، بصت وراها
شافت مريم وقعت من طولها على الأرض
جريت عليها طلعت برفيوم من الشنطه، فوقتها
مريم بدموع.. عمر خاين، كان بيخونى مع اللى ساعدتها ووقفت جمبها
مروه.. اسكتى دلوقتى، انتى تعبانه
مريم.. وجعنى، انا اتوجعت اوى يا مروه
مروه.. إن شاء الله الامور تهدى وترجعوا لبعض
مريم.. انا مش عاوزاه تانى خلاص
كفايه لحد كده، خليها تشبع بيه
مروه.. هتقولى لماما وبابا ايه؟
مريم.. هقولهم بنتكم ارتاحت خلاص
وأطلقت من الخاين، اللى كلها كام شهر ويخلى
سلفتى تبقى ضرتى
مروه.. انتى بتقولى ايه
مريم.. شوفى الفيديو وانتى هتعرفى
مروه مسكت الفون شافت الفيديو، اتجننت بقت تلطم، معقول يحصل كده، حسبى الله ونعم فيك وفيها، ربنا لا يباركلك ابدا يا جبان يا واطى
مريم.. شوفتى اللى انا فيه
مروه.. بس دلوقتى فى دفن ولسه عزا
انتى هتتصرفى ازاى
مريم.. وقت الدفن هشيل العفش كله
ومعايا الايصالات وتنازل عن ولادى، وخلاص أطلقت وبكده يبقى خلصت معاه
مروه.. استنى بعد العزاء علشان الأصول وبعدين لازم بابا وماما يعرفوا على الاققل ان اخوه مات
مريم.. مش هينفع بعد العزا هيستقوى مش هيخاف، لازم اضرب عالحديد وهو سخن
اما بقى الأصول، هما ميعرفوش عنها حاجه
مروه.. يا بنتى مينفعش
مريم.. بقولك ايه، دى حياتى وانا حره فيها
مروه بغيظ.. والبت اللى اسمها فيفى
هتعملى فيها ايه، علشان لو شوفتها هاكلها بسنانى
مريم.. دى متساواش، انا مش هعمل معاها اى حاجه، كفايه عليها اللى هتبقى فيه
المهم عندى انى خدت حقى من الخاين الواطى
ولازم اتصرف وحد يشيل العفش كله علشان يرجع بيت ماما، هو ده حقى
مروه.. هو انا ليه حاسه انك شايفه الموضوع من ناحيه الماده وبس
مريم.. علشان خسرت كل حاجه، كان لازم حقى يرجعلى، الراجل لما بيخون، صدقينى بتبقى انتهت، ده بيخونى مع مرات اخوه، طيب اربى بنتى ازاى معاه وفى حضنه
مروه.. بس ده ابوها
مريم.. خان اخوه فى شرفه، اخاف على بنتى منه
انتهت يا مروه
مروه سمعت الصراخ بره الشقه، كانت خايفه
طلبت من مريم انها تمشى معاها، واصرت ان بعد العزاء تيجى وتاخد حقها كله منه وخصوصا انها
مع تنازل من عمر، غير إيصالات الامانه
يعنى ضامنه حقها بالكامل
مريم مسكت الفون، اتصلت بنشوى سلفتها وطلبت
منها تنزل ايسل، وفعلا نزلتها
لما نزلتها شافت مريم شكلها تعبانه، مضايقه، سألتها، رددت وقالت شويه مشاكل ما بينهم
طلعت نشوى، اما مريم لمت هدومها وخدت ولادها، نزلت هى ومروه، سابت البيت وروحت على بيت مامتها
____________________
بعد مرور اسبوعين على أبطال قصتنا
مريم حكت لأهلها على كل اللى حصل
الاب كان فى ضهرها
اما الام كانت طول الوقت تعاير مريم
بإنها كانت رافضه الجوازه من الاول والسبب
انه كان بتاع بنات ولى علاقات مع ستات قبل الزواج، كان كل كلامها لوم وعتاب على مريم
انه قبلت الجوازه من الأساس
__________________
اما عمر كان طول الوقت بيقضيه فى شقته
وخصوصا بعد ما العزاء خلص
كان قافل المحل، ولما مامته واخوه ومراته سألوه
عن مريم وعيلتها ازاى محدش فيهم يعزى
وازاى مريم تمشى من البيت فى الوقت الصعب ده
كان رده ان حصل بينهم شويه مشاكل ومشيت
اما فيفى كانت قاعده فى شقتها تمثل الحزن على
زوجها المتوفى
______________________
فى نفس الوقت تقف امام باب العماره عربيتين
نقل كبيره، وراها عربيه ملاكى بها مريم، وابوها
واتنين من اعمامها علشان ياخدوا العفش
زى ما اتفقت مع عمر، مسكت الفون رنت عليه
نزل يجرى ومعاه اخوه الكبير وائل
كان واقف مستغرب لما سمع ان عمر طلق مريم
وقال انه ميعرفش، إنما الاب قال ان كل شئ
نصيب ومفيش داعى يفتحوا الموضوع من تانى
لان بنته رافضه الرجوع
وائل قرب من مريم، عمر بيحبك
مريم.. اخوك طلقنى وخلصنا
وائل.. يا بنت الناس مش هينفع كده، احنا على عمانا ومحدش فينا عارف حاجه، قوليلى حصل ايه يمكن تبقى بسيطه وتتحل
مريم.. مفيش حاجه بتتكسر وترجع تتصلح
لو سمحت يا وائل انا عاوزه اخد حقى وبس
قربت من عمر، جهزت ال 150 الف ولا لسه
عمر.. اه جهزتهم
مريم.. ههههههه كويس، شاورت للشباب اللى معاها
يطلعوا يشيلوا العفش
بصت لفوق، شافت نشوى واقفه فى البلكونه
بداخلها.. انا همشى وسايبه البيت علشان ترتاحى خالص
بقت تتدور على فيفى بس مشفتهاش
الشباب طلعوا يشيلوا العفش، طلعت وراهم جرى
وخدت شويه حاجات تخصها، دخلت المطبخ
خدت التوابل كلها ورمتها، بقت ترمى كل حاجه
زى المجنونه، الشباب فكت العفش وبقى يتشال
بسرعه غريبه، بصت حواليها شافت الشقه فاضيه
وقفت تصرخ صرخه واحده، خلاص بيتى اتخرب
بيتى وبيت ولادى، دخلت اوضه نومها، افتكرت
كل لحظه حلوه قضتها مع عمر، دخلت اوضه
الأطفال، افتكرت لما بيرجع من الشغل ويشيل ايسل، بقت تكلم نفسها، ايه اللى جرالى
انا كنت قويه، بس دلوقتى وشقتى فاضيه قدام
عينى حاسه انى ضعيفه، مش قادره اسيبها وامشى، جريت على المطبخ
انا كنت بعمل هنا احلى اكل لعمر، خرجت على باب
الشقه شافت عمر واقف وسط اخوه وامه
الام.. خلاص خربتى بيتك وبيت ابنى
منك لله زى ما خدتى كل اللى وراه
خربتى بيته حسبى الله ونعم الوكيل فيكى
مريم ساكته مش بترد
وائل.. معلش يا مريم أصلها زعلانه على خراب بيت ابنها واكيد انت فاهمه ده
الام.. جايه بنفسك لحد هنا علشان تخربى بيتنا
ان شاء الله ما تشوفى يوم راحه ابدا
مريم.. سكت امك يا عمر، انا مش عاوزه غلط
عمر.. خلاص يا امى بقى، ارجوكى
مريم قربت من عمر، فين الفلوس
عمر.. ثوانى، سابهم وطلع شقه مامته
فى الوقت ده مريم طلبت من وائل انها تسلم على فيفى، طلع جابها، نزلت معاه، كانت رجليها مكسوره
مريم بسخريه.. حمدالله على سلامتك يا ست فيفى، نشوى باصه من فوق، سامعه الكلام
فيفى.. الحمد لله انا بخير
مريم قربت منها، انا عاوزه أسألك سؤال وردى
عليه بصراحه، وانا غضبانه فى بيت ماما لما كنت والده
انتى جيتى عند العماره بس رجعتى تانى صح
فيفى ب ارتباك.. انا انا
مريم.. اه
فيفى.. انا جيت علشان احاول أصلح ما بينكم
بسس؟
مريم.. بس ايه يا بنت الكلب، خوفتى ارجع معاكى
وضربتها بالقلم، نزلت فيها ضرب
بقى وائل يحوش، مستغرب من اللى بتعملوا
فيفى.. شكلك كده اتجننتى خلاص
مريم.. انا اتجننت، ماشى يا فيفى
عمر نزل معاه الفلوس، شافهم بيشدوا مع بعض فى الكلام، قرب من فيفى وقالها تطلع شقتها
مريم اضايقت، خدت الفلوس منه
وائل.. فى ايه يا مريم، فيفى عملتلك ايه
مريم.. عملت معايا كل خير
خدت الفلوس حطتها فى الشنطه وطلعت 3 إيصالات الامانه اديتهم ل عمر
نزلت على السلم، مسكت الفون، قالت بصوت عالى
وائل، نشوى، عاوزين تعرفوا سبب طلاقى من عمر
نزلت كذا درجه لتحت وداست على الفيديو
وبعتتوا لي كل العيله واتس ساب
مشيت وسابت لعمر وفيفى الفضايح
___ بعد مرور سنه، الام تعبت وجالها جلطه فى القلب بعد ما عرفت ان ابنها كان عامل علاقه مع مرات اخوه، اما وائل خاف على مراته منه
والعيله كلها اجمعت انه لازم يمشى من البيت
خد حقه، وطردوه بعد ما اتجوز فيفى
المحل اتقفل ومع الوقت اتأجر
اما عمر كان عارف ان مريم السبب انها فضحته
بعد ما وعدته ان محدش هيشوف الفيديو
حاول ينتقم منها بس مريم كانت ناصحه
فى عز المشاكل والزحام يوم ما خدت العفش
سلمت لعمر 3 إيصالات وبس اما الايصال
الرابع كان بالمبلغ كله، كان معاها ضحكت عليه، نسيتهولى وسط المشاكل، هددته ترفع قضيه بالايصال لو مبعدش عنها وعن ولادها وخصوصا ان حالته الماديه اتدهورت، خاف منها وبعد عنها....
_________________
__ اما مريم خدت شقه فى عماره باباها، فرشت عفشها كله فيها، عاشت مع ولادها ، علشان تكون على راحتها، كانت طول الوقت ما بين شقتها وشقتهم، لحد ما فى يوم مروه اقترحت عليها تعمل مشروع، تتسلى، وفى نفس الوقت تكسب منه، فى الاول اعترضت علشان ولادها، بس قالت لها تأجر شقه وتعمل حضانه لسن الروضه واققل
مروه.. انا صاحبتى عملاه مربح جدا، بعدين مناسب ليكى لان بكده الولاد هيكونوا معاكى، مش هيبعدوا عنك
مريم.. هو مناسب فعلا وخصوصا ان الولاد هيكونوا فى حضنى، انتى عارفه انا بخاف عليهم من الهوا الطاير
__ ابتدت مريم تدرس الموضوع ووافقت، اجرت شقه وعملت اعلان لبيبهات من عمر 6 شهور لاطفال عمر 4 سنوات، وفعلا الحضانه اشتغلت
كانت بتساعدها مروه، اللى كان مريح قلبها ان الولاد معاها فى حضنها
المشروع كبر، كانت بتنبسط وتفرح، لما الحضانه تزيد طفل او اتنين، كانت تحس قد ايه
انها سعيده ومصدر امان لكل ام، منها انها بتساعد اى ام عامله وليها ظروفها ومن ناحيه تانيه بتاخد اجر على عملها
حست بذاتها وان الشغل رفع من معنوياتها
بعد ما فقدت حياتها الاسريه نتيجه راجل خاين
الوحيد اللى كانت بتتكلم معاه هو حسام بعد ما
ما اعترف لها ان اسمه يوسف مش حسام اللى كانت تقصده لما راحت المقابر كان العنوان
غلط، هو كان موجود بالصدفه عند واحد صاحبه ولما اتكلمت معاه وحكت على كل حاجه صعبت عليه، حس انها ممكن تعمل جريمه، حاول يقف معاها ويساعدها
خصوصا بعد ما سأل على حسام وساره، عرف انهم ناس مش تمام وكان ممكن مريم تروح فى داهيه معاهم بعد ما عرف ان حسام اتمسك
هو ساره قريبته فى سرقه أعضاء بشريه
كانت مريم على طول تسأله مين البنت اللى عرف منها موضوع الفيديو، كان رافض علشان متعملش
مشاكل، لأنه عارف انها متهوره
بعد الحاح منها قالها، انا عرفتها من رقم الفون
لما خدت منك رقم البنت المجهوله كلمت حد صاحبى، جابلى قرار الرقم وصاحبته كانت بنت
كلمها مع شويه تهديدات، خافت وقابلته
قالت إنها جارتها وجاره فيفى وصاحبتها، كانت بتحب اشرف من بعيد لبعيد، وفى يوم شافها، أعجب بيها وطلب ايدها، إنما مريم رشحت فيفى
رغم أنها مش مناسبه لى لان كانت طايشه
تعرف شباب كتير، رغم كده مريم جوزتها لاشرف
وفى يوم فيفى جت تزورها، عرفت انها بتكلم عمر
ولاحظت ان فى حاجه ما بينهم، حبت توجهه
مريم علشان تعرف انها اختارت لاشرف غلط
قالت إنها قربت من فيفى اكتر وعرفت كل حاجه
واتهمتها بالجنون لأنها بتصور نفسها مع عمر
من وراه، آمنت ليها وبقت تحكى معاها كل حاجه
عن علاقتها ب عمر ومن هنا ابتدت تكلم مريم
فون من أرقام غريبه علشان متعرفهاش
مريم عرفتها وقالت العيب مش منى حماتى
مكانتش موافقه لا على فيفى ولا عليها
بس كل اللى انا عملته ان فيفى يتيمه عرفت تدحلب وتتدخلى بالمسكنه، صعبت عليه
وقدرت بطريقتى اخلى اشرف وحماتى يوافقوا
كل مشكلتى انى اقنعتهم بفيفى اللى خربه بيتى
_____________________
__ بعد مرور سنتين مريم قاعده فى نادى مع ولادها، طلبت غدا وعصير، كانت مستنيه مروه
مروه جايه بتجرى مش قادره تاخد نفس
اسفه، شكلك كده اتغديتى
مريم.. اقعدى مع الولاد انا عاوزه ادخل الحمام
بسسسسرعه، خدت معاها ايسل
ودخلت، شافت بنت واقفه بضهرها، فتحت الشنطه طلعت منها فلوس، طبطبت عليها
يا انسه، البنت بصت وراها
مريم بذهووول.. مين فيفى!؟
فيفى.. الحمام فاضى يا مدام ، ادخلى، وخدت الفلوس من ايدها زى الكلبه المسعوره اللى لقت عضمه، دخلت وهى مش مصدقه نفسها من المنظر اللى شافته، لما خرجت من الحمام سألت عليها
حد معرفه، قالها ان جوزها مبهدلها وبتشتغل عليه
مدمن، عايشه معاه عافيه بالضرب، لما سألت ايه اللى جابرها عليه، قالها انها مش بتخلف
هنا مريم حمدت ربنا على كل إللى حصل لها
وعرفت قد ايه ان آخره الخيانه هلاك
بداخلها.. خسرتنى وخسرت نفسك وولادك يا عمر
خدت جزاءك انت وخرابه البيوت
خرجت لمروه وحكت لها انها شافت فيفى
منظرها كان زباله، خدت ولادها فى حضنها
انا ولادى عندى بالدنيا كلها
مروه.. ماما كلمتنى وبتقولك يلا أجهزى العريس مستنى
مريم.. انا مش هتجوز، انا عايشه لولادى وبس
قوليلها تمشيه بدل ما ابهدله زى اللى قابله
ابتسمت، فاكره لما طردت العريس البخيل كنت هموووووت
مروه.. فاكره ههههههه، بس بردوا نفسنا نفرح فيكى
مريم.. لأ
مروه.. ليه لأ
مريم.. وليه اه؟؟؟؟
بس مش معنى كلامى انى مش هتجوز لا طبعا
انا عايشه لاولادى بس لو لقيت فرصه مناسبه مع الوقت يتحول لحب حقيقى هوافق لان مش معنى انى مريت بأول تجربه فى حياتى وفشلت يبقى
كله زى بعضه لا فى تجارب تستاهل ان نحارب علشانها ❤️
تمت قصتنا بحمد الله ❤️
#صرخه_مريم
#بقلمى_كوكى_سامح
#الاخيره
كل سنه وانتم طيبين وبخير ❤️ عام دراسى جديد وان شاء الله يكون سعيد عليكم بالتوفيق للجميع 💙
اسفه على التأخير😘 بس انا عارفه انتوا حبايبى مش بتزعلوا 😘😘
وطبعا مش هتكلم على التفاعل❤️
ولا علشان الأخير مش هتتفاعلوا هزعل كده يلا ادعمونى بلايك و 20 ملصق😻
اما الفانز الصامت زعلانه منكم 😕
لو التفاعل عجبنى هنزل الروايه الجديده بكره 💪
تعليقات
إرسال تعليق