مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت❤بقلم سولييه نصار❤

-حسام عايزة اجابة محددة انت خنتني ولا لا ؟!

-ايوة 

ضميت ايدي ومبنتش كسرتي ليه لاني عمري ما ابين ضعفي لأي حد ...بصلي بتردد وكمل

- انا عايزة افسخ الخطوبة يا تسنيم 

عيوني دمعت بس مسكت نفسي بالعافية ....اللي مريت بيه علمني مبقاش ضعيفة قدام حد حتي لو قدام اللي بحبه اكتر من حياتي...ابتسمت برسمية وقولت :

-طبعا حقك 

بص حسام للارض وقال:

- انا اسف يا تسنيم مقدرش استحمل 

رفع عينيه  وكلامه كان زي السكينة في قلبي :

-انا مش مضطر ...مش مضطر اتحمل مرضك ...مش مضطر اتحمل تقصيرك في البيت ولا مضطر اتحرم من الاطفال لان امهم مش فاضية ودايما في جلسات الكيماوي...ولا مضطر استحمل تقصيرك في حقي لانك تعبانة ولا مضطر اتحمل شعرك الخفيف ولا جمالك اللي هيروح ولا مضطر اخاف من موتك المحتمل كل يوم ....تسنيم انا عايز ست كاملة تهتم بيا مش انا اللي اهتم بيها 

كلامه دبحني حسيت قلبي اتفتت خلعت دبلتي ودموعي نزلت غصب عني وقولت بصوت منهار:

-كان ممكن تقولي مش هقدر اكمل من غير ما تجرحني بالشكل ده .

وبعدين قومت ومشيت من قدامه ....كنت ماشية في الشارع وانا منهارة وبعيط...انا تسنيم اللي قررت عمري ما ازعل علي حد ...كنت دايما بقول ان محدش هيقدر يكسرني بس حسام بكلامه دبح*ني مش كسرني بس...انا اللي حلفت اني عمري ما هبكي قدام راجل دلوقتي انهارت قدامه....بعد ما ابويا رماني بعد موت ماما واتجوز قررت اني هعتمد علي نفسي واكون اقوي ومش هدخل حد في حياتي بس حسام كسر القاعدة دي قدر يسرق قلبي. ...قدر يديني الحب اللي انا مستنياه ومحتاجاه...حبيته اكتر من حياتي واتخطبنا بس من شهر اكتشفت أني عندي نفس مرض ماما breast cancer ده المرض اللي ماتت بيه وشكلي انا كمان هموت بيه ...من وقتها حسام اتغير وبعد عني ....كذا مرة اكتشف انه بقا يكلم بنات غيري ...لحد ما واجهته النهاردة...واكتشفت حقيقته البشعة ...طلعت تليفوني عشان اتصل بصاحبتي لقيت تليفونها مغلق 

-اووف يا دينا ده وقته 

....

روحت علي البيت قابلت جدتي اللي بصتلي بشفقة وقالت :

-حسام كلمني وقال ..

مقدرتش تكمل وعيونها دمعت وقالت :

-ابكي يا بنتي ...ابكي هترتاحي

- لا يا جدتي ميستاهلش دموعي ...انا هتعالج وهخف وهكون احسن ..مش هموت ومش هسيبك

بكت فقربت منها ومسكت ايديها وقولت :

- انا هحارب عشانك ...هعيش عشانك ...اكتشفت أن محدش حبني قدك 

مسحت دموعها وابتسمت فبوستها علي خدها وقولت :

-معلش يا حبيبتي انا هنام دلوقتي تعبانة ..

-اتفضلي يا حبيبتي وارتاحي

دخلت اوضتي ونومت ومردتش افكر في اي حاجة ...الكبرياء احيانا بيكون لعنة ...انا واحدة قررت طول حياتها متبكيش علي راجل ومش هبكي دلوقتي ...اللي مضايقني الكلام اللي قاله ....كلامه ده جرحني بشكل عمري ما هسامحه عليه ابدا

......

مرت الأسابيع والدكتور وبدأت  جلسات العلاج ..بس الغريب أن دينا صاحبتي اختفت بس في يوم اتصلت بيا صديقة من بعيد. وقالتلي علي الكارثة!!

........

كنت واقفة قدام القاعة وانا مكسورة من جوا بش من برة كنت باردة...دخلت بثقة ...صحيح كنت باهتة لابسة. فستان محتشم شعري خفيف بس ابتسامة سعيدة مرسومة علي وشي ...وشي كان بيبتسم بس جوايا كنت بتحرق!!! كل الناس اتصدموا....دينا وحسام اللي كانوا بيضحكوا وشهم بهت قربت وحضنت دينا وبعدت. قولت :

-مبروك يا صاحبتي 

- تسنيم 

طلعت من شنطتي هدية وقولت :

- انا وعدتك اني هجيبلك ساعة زي بتاعتي لما عجبتك لما تتجوزي واهو  وفيت بوعدي 

بصت للارض وحسام كان مصدوم ...ابتسمت شكله كان متوقع اني هنهار واجي اعمله فضيحة هنا بس هو اقل من كده بكتير 

قربت من حسام وقولت:

-مبروك يا عريس ...متخافش مش هعمل بلبلة ....البلبلة دي للناس اللي تستاهل مش انتوا ...انت بس جاية اقولكم واقول الف مبروك .

وبعدين مشيت من القاعة وطلعت وانا كاتمة دموعي بالعافية فجأة حسيت اني الدنيا بتلف بيا ...الضغط العصبي كان شديد محستش بنفسي الا وانا واقعة علي ايدين واحد وسمعته قبل ما يغمي عليا بيقول :

-يا خبر دي اغمي عليها حد يجيب بصلة يا جماعة!

يتبع 

الجزء التاني ❤شكرا على تفاعلكم السكر❤بقلم سولييه نصار❤

-عاصي فيه ايه ومين دي ؟

قالها صاحبه وهو شايفه قاعد جمب واحدة مغمي عليها 

-هات بصلة يا نادر 

-بصلة من فين يا عبيط انت 

- يا عم مش شايف ان البنت اغمي عليها ...ولا اقولك شكلها ماتت اعملها تنفس صناعي 

-تنفس ايه يا مجنون انت ابعد كده .

طلع نادر قزازة مية من شنطته ورشها عليها ...

صرخت وانا حاسة بحاجة ساقعة علي وشي .

.لقيت شابين قاعدين جمبي ...صرخوا هما كمان ورجعوا ورا 

-انتوا مين وعملتوا فيا ايه 

رد عليا الشاب اللي كان قاعد جمبي.

-عملنا فيكي ايه يا آنسة .. انتي اغمي عليكي ووقعتي عليا ...ربنا ستر مكسرتيش ايدي والا كنت ...ايه ده 

قطع كلامه فجأة وهو بيكلمني وقال وهو مبتسم :

- هو لون عينيك حقيقية اول   مرة اشوف  اللون  الرمادي ده 

-ايه الجنان ده انت بتهزر ...

قولت وانا متعصبة وبعدين قومت ومشيت جري علي بيتي ....انا فيا اللي مكفيني مش ناقصة هبل انا 

بص عاصي علي الأرض لقاها وقعت محفظتها ...ابتسم واخدها مسكه نادر من كتفه وقال:

-انت بقيت حرامي ولا ايه ...اجري ورا  البنت أديها محفظتها

-لا انا هحتاجها

-هتحتاجها في ايه 

-هتعرف بعدين 

.....

في القاعة ...

كانت دينا سرحانة ...عيونها مدمعة ....حست  للحظات انها واحدة خاينة سرقت حبيب صاحبتها...بس حسام اللي سابها وهي مشاكلها اكبر من انها تفكر فيهم دي واحدة بتواجه الموت ...هزت دماغها عشان تطرد الأفكار دي وابتسمت لحسام ومسكت ايده وقالت:

-حبيبي متخليش حاجة تعكر فرحتنا ...تسنيم هتبقي كويسة ومش هتفكر فينا تاني احنا في ايه ولا في ايه 

ابتسم حسام وباس ايدها وقال :

-عندك حق 

...........

روحت علي البيت ومن تعبي نومت علطول ...

.....

تاني يوم روحت جلسة العلاج انا وجدتي بس روحنا مكتب الدكتور المعالج الاول عشان ابلغه قراري 

-ها يا تسنيم ايه اللي عايزة تبلغيني بيه 

-دكتور انا حابة اعمل العملية

-بس انتي بتستجيبي للكيماوي يا تسنيم ملوش لازمة العمليات ...انتي حالتك مش صعبة ولا حاجة 

-بس انا 

-اسمعيني يا تسنيم لما احس انك محتاجة جراحة يبقي ماشي بس خلينا ننهي كورس العلاج ونشوف الأخبار ايه تمام 

هزيت راسي وقولت :

-ماشي 

فجأة دخل حد من غير ما يخبط ...بصيت لقيته الشاب الاهبل بتاع امبارح 

-عاصي بتعمل ايه هنا ؟!

بصلي الدكتور بإعتذار وقال :

- ده عاصي اخويا 

ابتسمت جدتي ليه بس فضلت مكشرة وانا بفتكر كلامه الوقح وتغزله في عيوني 

-اسف يا عادل كنت عايزة استشيرك في حاجة ...عموما انا هطلع دلوقتي انت كمل 

وطلع بسرعة ...بجد مكنتش مصدقة ان واحد محترم زي دكتور عادل اخو ده !!

.......

خلصت جلسة الكيماوي وروحت البيت وانا ميتة من التعب ....الدنيا دارت بيا ونمت تاني 

........

صحيت بالليل وطلعت علي البلكونة لقيت اخو الدكتور واقف تحت عمارة بيتي ...بصتله بصدمة لقيته طلع حاجة من جيبه....كانت المحفظة بتاعتي ...ازاي وصلت لايده....من غير تفكير نزلت وانا متعصبة ...يعني وقح وحرامي كمان ....ابتسم لما شافني ولسه هيتكلم ضربته بالقلم!!

يتبع

الجزء الثالث ❤شكرا على تفاعلكم السكر ❤بقلم سولييه نصار❤❤

-يعني مش كفاية انك وقح كمان حرامي ....

بصلي بغضب وقال :

-ما تحترمي نفسك وافهمي الاول 

اتعصبت ولسه كنت هضربه بالقلم تاني بس مسك ايدي وقال :

-بلاش تهور واسمعي 

نطر ايدي واداني محفظتي وقال:

- انا مسرقتش حاجة محفظتك وقعت لما اغمي عليكي 

بصتله وانا مش مصدقاه فقال :

-حابة تصدقي براحتك مش حابه براحتك...اصل انا مش غبي اسرقك واجي ارجعلك المحفظة ولو مش مصدقة عدي فلوسك وانا اهو واقف 

اتوترت واتكسفت...ازاي اجرح حد من غير ما اتأكد ....بصيتله وقولت :

-بجد انا اسفة يا استاذ ...سامحني 

-اعتذارك مقبول بس بشرط 

-افندم !!!

-في فيلم حلو في السينما بكرة رومانسي كوميدي نوعي المفضل وحابب حد يحضره معايا واصحابي كلهم مش فاضيين ايه رايك تعملي معروف وتحضريه معايا 

-انت بتهرج....انا اطلع معاك علي أساس ايه 

-علي أساس انك عايزاني اقبل اعتذارك 

-إن شالله ما قبلته حتي ...ايه البلاوي دي ياربي

-خلاص انا مش مسامحك علي الجرح الكبير اللي سببتيه في قلبي وخلي ضميرك يعذبك  بقا ...عموما ده رقم تليفوني لو غيرتي رأيك ...الفيلم لذيذ هتحبيه

وبعدين مشي بعد ما اداني ورقة مكتوب. عليها رقمه 

هزيت راسي وقولت :

-ايه المصايب دي يا ربي بس ...

وكنت هقطع الورقة بس في اخر لحظة تراجعت وطلعت البيت 

......

تاني يوم 

مكانش عليا جلسات وكنت فاضية وحاسه بالملل فجأة جه في بالي ...وفورا طلعت تليفوني وبعتله رسالة...بعدها بدقيقة رد عليا لم كان السينما والساعة ...قفلت التليفون وانا مش مصدقة ازاي انا تسنيم اللي كنت دايما بحكم عقلي اتهور واروح سينما مع حد معرفهوش اصلا...بس رغم كده كنت حابه اروح ....

.......

بعد ساعات كنت جمبه في السينما وانا بضحك ..

الفيلم كان جميل وغيرلي مودي وهو كان شخص لطيف ...

....

بعد الفيلم شكرته بأدب وكنت همشي بس طلب. مني نقعد علي كافية وللمرة التانية بتنازل وبوافق

....

-بس انتي احلي وانتي مسالمة كده ...امبارح افتكرتك من مصاصين الدماء وبصراحة كنت ههرب...

ضحكت عليه وقولت:

-مودي متعدل دلوقتي فمش هحاسبك علي المعاكسة القديمة دي 

-طيب الحمدلله اصل انا بخاف منك 

-ليه بقا 

-يعني اول مرة زعقتيلي وتاني مرة ضربتيني بالقلم ايدك سابقاكي ما شاء الله 

- انا بجد بعت

-متعتذريش عادي كلنا معرضين لسوء التفاهم 

-بس انا مش كده ...ولا عمري كنت كده ...

ومن غير ما احس حكيتله علي كل حاجة ...مرضي ..تخلي خطيبي عني ....وجوازه من صاحبتي ...لقرار اني اتغلب علي المرض ده مهما حصل

بعد ما خلصت ابتسم وقال:

-مفروض تفتخري بنفسك ...قليل جدا اللي يقرر يحارب مرض زي ده 

-اي انسان عاقل هيفضل انه يحارب 

-والعاقلين قليلين 

مرت اسابيع وانا وعاصي بقينا اصحاب ....رغم تلميحات جدتي اني بحبه بس كنت قافلة الباب ده نهائي ....انا مش مستعدة اتعلق بحد تاني ....الحقيقة ان عاصي كان اكبر داعم ليا في العلاج ...مهتم بصحتي النفسية ...حتي أخوه لاحظ اني بتحسن بشكل سريع ولو فضل التحسن ده لاخر الكورس هتكون النتيجة هايلة...في يوم كنا انا وعاصي قاعدين في الكافيه بتاعنا المفضل ..كان اليوم ده غريب عينيه بتلمع وهو بيبصلي...ضحكته كانت مشرقة ...وده وترني

..بصلي و  ابتسم  وعينيه لمعت وقال :

- من اول ما شوفتك في اليوم اللي اغمي عليكي وانا حاجة اتحركت في قلبي ...عارف ان ممكن تفكري اني سخيف او بهزر بس اللي حسيته معاكي في الأوقات القليلة اللي شوفتك فيها محستهوش ابدا في حياتي 

قمت وانا متوترة ...لا ده اكيد بيهزر...انا مستحيل اقبل بده مستحيل اتجرح تاني ....طلعت من الكافية فطلع ورايا ومسك ايدي ...زقيته وانا بقول :

-عايز ايه يا عاصي 

عيونو لمعت وقال : 

- انا بحبك وعايزك تحبيني !!

........

-طلقني يا حسام 

-ايه !!!عايزة تتخلي عني يا دينا ...في الظروف دي بعد ما عرفت ان عندي كانسر ....ده انتي مراتي مفروض تقفي جمبي 

- وانا مش مضطرة 

-افندم 

- انا مش مضطرة يا حسام...مش مضطرة استحمل مرضك ...ولا مضطرة اخدمك وانت مش قادر تقوم ....مش مضطرة اعيش مع راجل مش بيهتم بيا لانه مشغول بصحته ولا مضطرة استحمل شعرك اللي هيخف ولا جمالك اللي هيروح ...ومش مضطرة استني موتك وانا خايفة ومرتاحة في نفس الوقت خايفة من لقب أرملة وهرتاح من خدمتك ...انا مش من النوع اللي هجري بيك في جلسات الكيماوي ...انا عايزة جوزي يدلعني...فطلقني 

كان متغاظ وهو بيسمع نفس الكلام اللي قاله لتسنيم ....والكلام ده دب*حه من جوا ...فجأة مسك شعرها وبدأ يضرب فيها بغيظ

يتبع 

الجزء الاخير ❤شكرا على تفاعلكم السكر❤بقلم سولييه نصار❤

كنت قاعدة في اوضتي وانا بعيط ....بعد ما اعترف سيبته وجريت ...هربت منه ومن نفسي ...انا مينفعش احب تاني ....مينفعش اتجرح تاني عشان كده كان لازم ابعد....ابعد عنه لاني بدأت اميل ليه ...انا حبيت مرة واتكسرت ومش ناوية اتكسر تاني ...جات جدتي وشافتني ببكي ...حضنتني من غير ما تسألني وطبطبت عليا وزي ما تكون فهمت وقالت :

- مش كل الرجالة حسام 

- لا كلهم حسام يا جدتي ...كلهم خاينين وانا مش هسلم قلبي لحد يكسره. ....انا هعيش عشان نفسي وبس ...لا عاصي ولا غيره هيكون في حياتي 

-يا بنتي 

-لو سمحتي يا جدتي ...محدش عاش اللي انا عشته...محدش اتجرح قدي ...انا خطيبي سابني واتجوز صاحبتي ...ازاي امن لحد تاني ...لا مستحيل !

-يا بنتي 

-لو سمحتي يا جدتي ممكن نقفل الموضوع ده ..

-براحتك يا حبيبتي 

حضنتها تاني وانا بقول ان كده احسن بكتير...الحب مجبليش الا وجع...وكل الرجالة خاينين وعاصي مش استثناء 

....

مر يومين وانا ماشية في العلاج عادي ....عاصي رن عليا كتير مردتش.... جه وقف تحت بلكونتي برضه برضه مطلعتش ... اتشجع شوية وطلع البيت ...طلب من جدتي انه يقابلني بس انا رفضت ...كنت مصممة اقطع معاه نهائيا ....اقطع معاه لان لو حبيته هتدمر وانا مش عايزة اتجرح تاني كفاية اللي حصلي 

....

في مركز الشرطة ....

كانت ام دينا بتصرخ في حسام وبتلطم ....

-بنتي في المستشفي بسبب يا بعيد ..حسبي الله ونعم الوكيل 

الضابط جه وفصلهم عن بعض وزعق:

-هي زريبة يا استاذة ...ده مركز شرطة وده متهم هنا وحق بنتك هيجي 

بكت امها وقالت:

-ف*قع عيون بنتي يا بيه ...خلاها بعاهة مستديمة ...ابوس ايدك جيبلي حقها ...ابوس ايديك يا بيه...

دموع حسام نزلت ...خلاص كده مستقبله وحياته اتدمرت غير. مرضه اللي مش عارف هينجي منه ولا لا ...وساعتها افتكر تسنيم ده ذنبها ...كما تدين تدان .

......

كنت طالعة من جلسة العلاج الكيماوي وانا منهكة فجأة شوفته قدامي ...مسكت ايد جدتي وسرعت عشان نمشي بس عاصي وقف قدامي 

-ابعد لو سمحت 

-لا

-ايه البرود ده 

-اهو كده 

- عاصي 

-تعالي معايا بس 

-لا مش هاجي 

-قدامك حلين لاما تيجي معايا لاعملك فضيحة هنا قولتي ايه ...

-اوووف 

-اهو كده تعجبيني

قالها وابتسم ياربي ايه المجنون  ده بقا انا تسنيم العاقلة اتجوز مجنون زي ده ...

............

وصلنا جدتي للبيت وروحت معاه ...كان بيلف بالعربية ...لف كتير لدرجة افتكرت انه مش عارف يروح فين....بعدين وصلنا كافية اول مرة اشوفه كان علي البحر  ...الكافية كان شكله جميل اووي اهدني وقعدني علي ترابيزة جمب البحر كنت منبهرة بالجمال والبساطة دي ...

-عجبك المكان

-ايوة حلو اووي 

-مش احلي منك 

بصتله ولقيته مبتسم وعينيه بتلمع 

-انت عايز مني ايه يا عاصي 

-انتي عارفة انا عايز ايه ...انا بحبك 

-وانا لا 

-كدابة 

-افندم 

-انتي كدابة يا تسنيم ...عينيكي بتلمع ليا دايما والعيون مبتكدبش 

-مش ذنبي انك موهوم يا عاصي 

- ليه مش عايزة تديني فرصة 

-لاني مش عايزة اتجرح تاني يا عاصي واللي بيحب بيتجرح..

-انا عمري ما هجرحك 

-كلكم بتقولوا كده ...كلكم كدابين 

-مش كل الناس زي بعضها ....انا مش زي خطيبك القديم 

-لا انتوا صنف واحد 

الفرحة في عينيه اتطفت وقال:

-يعني مش هتديني فرصة 

-اسفة يا عاصي 

انا جرحته عارفة بس اتجرحت اكتر منه ...انا حبيت عاصي بس مقدرش اسلم تاني لراجل....مقدرش اثق في راجل...انا قدري اعيش وحيدة 

............

مرت الايام وعاصي بطل يتصل ...ولا حتي بيقف تحت بلكونتي للفجر...خلاص يأس مني ...مفروض ارتاح ...بس كنت متضايقة اووي انه مش حاول اكتر  ...هزيت راسي. وانا مستغربة من تفكيري ...لا كده احسن مش ناقصة وجع قلب 

..........

في يوم كنت عند الدكتور بتاعي واخو عاصي ...فقال الدكتور :

- كده خلصنا كورس العلاج بس هنعمل تحاليل شاملة ونشوف الأخبار ايه تمام 

هزيت راسي وانا مبتسمة بتوتر  ...بتمني ان السرطان يكون اختفي 

-متقلقيش يا بطلة انتي عملتي اللي عليكي ..المهم دلوقتي انا بشكل شخصي عازمكم علي مناسبة خطوبة في العيلة 

ابتسمت وقولت:

-خطوبتك يا دكتور صح 

-لا خطوبة عاصي اخويا ...اخيرا قرر يرحمنا ويدخل القفص برجليه...

وشي شحب ...وعيوني دمعت ...مسكت نفسي بالعافية وانا بقول بصوت مخنوق :

-الف مبروك!

.......

هيخطب...هيخطب ...الاستاذ من ايام يقولي بحبك ودلوقتي هيخطب ...هق*تلك يا عاصي ...يا جبان ...انت جرحتني زيه 

بعتله رسالة انه يجي علي الكافية اللي علي البحر فورا ....

بعد نص ساعة كان وصل ...كان متوتر وهو شايفني برة الكافيه علي البحر 

- تسنيم في....

ولسه هيتكلم مسكت الطوب وقعد ارميه عليه 

-مالك يا تسنيم هي الحالة اشتغلت 

-اه يا خاين وديني لأم*وتك

وجريت وراه وانا ماسكة الطوب وهو جري قدامي ...اللي قاعدين علي الكافية كانوا بيبصوا علينا بصدمة وعاصي بيزعق وهو بيجري:

-طب انا عملت ايه لده كله عملت ايه 

وقعت علي الأرض وانا بنهت ....حطيت ايدي علي وشي وبكيت ...قرب مني وقعد جمبي وقال:

-طيب انا عملت ايه ممكن اعرف ؟!

بصتله وانا ببكي وقولت:

- من ايام تقول بتحبني وتخليني احبك  وجاي دلوقتي تخطب 

-اخطب ...انا هخطب...اول. مرة اسمع الموضوع ده ...مين قالك الكلام الفاضي ده ؟!

-اخوك 

فجأة بدأ يضحك وقال:

-يخربيت عقلك يا عادل 

-انت بتضحك علي ايه ؟!!!!

-اصل بعد ما انتي رفضتيني قولت لعادل وكنت مك*سور فهو قالي هيتصرف ...بس جدع بصراحة...بسبب الكدبة دي انتي اعترفتيلي بحبك 

ضربته علي كتفه وقولت:

-مين قال اني بحبك اصلا 

ولسه هقوم ...مسك ايدي وقال :

-ما خلاص حبك بان يا مانجا هو دخول الحمام زي خروجه 

-علي فكرة انا مش بحبك 

-وانا كمان بحبك اوووي❤بينا علي المأذون

تمت 

#ليتها_تحبني

#سولييه_نصار

والاسكريبت القادم بإسم رحاب إن شاء الله ❤