مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت❤بقلم سولييه نصار❤كامل 

-نادر انت لسه بتحبني صح ؟!

قولتها وانا عيوني مدمعة ...بصلي وقال:

- هي  الحالة اشتغلت ولا ايه يا شروق 

-بجد يا نادر انت لسه بتحبني ...مبتفكرش تتجوز عليا عشان اتأخرنا في الخلفة سنتين 

ابتسم وقال:

-طبعا بحبك يا شروق ...انا ليا غيرك ...وبكرة هنخلف وتبقي احلي مامي...يالا روحي جهزي الغدا

قومت وانا مبتسمة وقولت :

-عينيا يا حبيبي 

-تسلم عينيكي 

روحت احضرله الغدا وانا مبتسمة...نادر هو حب حياتي ...حب الاعدادي والثانوي والجامعة ...اتخطبنا في تانية جامعة واتجوزنا بعد التخرج ....عشنا اجمل ايام حياتنا مع بعض بس الخلفة اتأخرت وده اللي خلانا نقلق...روحنا  الدكتور واكتشفنا اني عندي مشكلة (تكيس ) ومن هنا ابتدت فترة العلاج اللي طولت بشكل غريب ...والخوف من ان نادر يمل ويسيبني او يسمع لكلام أهله ويتجوز...وده أثر علي حياتي معاه ....بقيت شكاكة زيادة عن اللزوم وده خنقه مني .....

.....

بعد ما اكلنا قربت منه وقولت :

- نادر ايه رايك يا حبيبي نخرج النهاردة انا وانت نغير جو ...نروح مطعم او سينما اي حتة

-معلش يا حبيبتي اجليها

قالها وهو باصص في التليفون ...دموعي نزلت وقعدت ابكي وقولت :

- نادر لو عايز تطلقني طلقني ...انا مش حابة اكون عبأ عليك 

-انا عملت ايه دلوقتي

-مبقتش مهتم بيا 

-يا حبيبتي انا ورايا شغل عشان كده صعب النهاردة ....عن اذنك انا خارج دلوقتي 

وخرج بسرعة ...دموعي نزلت وانا بقول :

-اكيد بيخوني....اكيد 

اتصلت بزينب بنت خالتي وصاحبتي وطلبت منها تيجي 

......

بعد نص ساعة كنت جمبها وانا ببكي 

-يا شروق يا حبيبتي كفاية صداع ...احنا لسه متأكدناش 

-لا يا زينب انا متأكدة هو اكيد متجوز عليا 

-شروق متجننيش يعني بيخوني ولا اتجوز عليكي ارسيلك علي حاجة !!!

مسحت دموعي وانا بقول :

- نادر بطل يحبني يا زينب ...كل حياته شغل شغل...تخيلي النهاردة رفض نطلع سوا ....يبقي اكيد بيخوني 

-يخربيت امك يا شروق الراجل عشان مطحون في الشغل طلعتيه خاين  

-يا زينب ما هو 

-اسكتي يا شيخة افتكرتك مسكتي عليه حاجة 

مسكت زينب ايدي وقالت:

-يا شروق ....نادر بيحبك ...بيحبك اووي ده اتحدي أهله عشانك انتي بس بطلي الوسوسة اللي في دماغك دي!!!

-افرض حب يتجوز عليا 

-لما يتجوز عليكي ابقي عيطي ونكدي علينا براحتك لكن دلوقتي ارحمي الراجل ابوس ايديك 

ابتسمت فمسحت دموعي وقالت :

-انا رايحة شغلي دلوقتي يا مجنونة ....يا ريت لما تخضيني المرة اللي جاية يكون بسبب سبب يستاهل ماشي 

-ماشي يا زوز 

حضنتني وقالت:

-يالا باي 

وبعدين مشيت 

ضحكت علي نفسي دايما بعمل كده اشك في المسكين وزينب تهديني حقيقي الله يكون في عونهم بسببي

.......

في شقة في مكان راقي ...كانت حاطة رأسها علي كتفه وقالت:

-شروق بدأت تشك فيك يا حبيبي وانا مبقتش قادرة استحمل اكدب اكتر 

بصلها نادر وقال:

-زينب استحملي شوية 

- نادر انا خايفة ....خايفة شروق تكرهني دي زي اختي .

حضنها وقال :

-خلاص يا حبيبتي اديني اسبوع وهقولها علي جوازنا !!

يتبع 

#زوجة_زوجي

#سولييه_نصار

لو لقيت تفاعل حلو نكملها النهاردة

الجزء التاني ❤شكرا على تفاعلكم السكر❤بقلم سولييه نصار❤

-انا خايفة اخسرها ....شروق اكتر من اختي احنا اترلينا سوا يا نادر ساعات بحس بتأنيب الضمير لاني بخونها ....بقيت مش قادرة ابصلها واتعامل معاها 

قالتها زينب وهي بتبكي

مسح نادر دموعها وقال:

-احنا اتجوزنا علي سنة الله ورسوله ...احنا مبنعملش حاجة غلط 

- بس 

- من غير بس يا زينب الشرع حللي أربعة من حقي اتجوز وهنعلن جوازنا قريب ....شروق بتحبني وبتحبك حتي لو زعلت هتزعل شوية وتتقبل الموضوع ...انتي عارفاها قلبها طيب 

سكتت زينب...ايوة هي عارفة كويس طيبة قلب شروق وعشان كده ضميرها بيعذبها وهي بتخونها مع جوزها ....شروق متستحقش ده ابدا منها ولا منه ...احيانا بالقرف من نفسها لما تكلم شروق وهي مع نادر....بس للاسف حكم قلبها ...قلبها اختار نادر. دونا عن غيره ...هي حبت نادر قبل شروق بس نادر محبش الا شروق ...ورغم أن نادر اتجوزها بس هي عارفة انه برضه مبيحبهاش وأنها وسيلة عشان تجيب عيل وهي مش معترضة بس ضميرها بيوجعها في كل مرة تشوف شروق او تتكلم معاها ...شروق بتحبها اووي زي اختها واكتر كمان بس في اليوم اللي هتعرف فيه شروق جوازها من نادر هتكرهها اكيد ....مسجت دموعها وهي بتدعي انها متخسرش شروق....

.....

مرت الايام بيني وبين نادر في ملل نوعا ما...كنت حاسة بالزهق...لا معايا عيال اتلاهي فيهم ولا شغل ...نادر رافض تماما اشتغل بس انا قررت بعد عيد ميلاد زينب هكلمه بس دلوقتي الاهم عيد ميلاد اختي وصاحبتي 

-ندورة 

-اسم الدلع ده انا بخاف منه احكي عايزة كام 

-تلات الآلاف جنية 

-ليه المبلغ ده يا شروق 

-عيد ميلاد زينب يا نادر بعد يومين ولازم اجهزله 

اتوتر نادر وقال :

- هو انا كمان هصرف علي قرايبك

-ايه اللي انت بتقوله ده يا نادر ....زينب اختي مش بنت خالتي بس ....هي أقرب واحدة ليا هي توأم روحي 

-يا شروق انا

-اسكت يا نادر متتكلمش...تجاوزاتك كترت معايا ...لحد زينب  وستوب متنساش هي ايه بالنسبالي ...انت وهي أقرب اتنين ليا....انتوا عيلتي   وزي ما بحتفل بعيد ميلادك هحتفل بعيد ميلادها. ..وشكرا يا نادر مش عايزة فلوس انا هتصرف

وبعدين مشيت من جنبه...كنت  متضايقة منه ...مش عارفة ليه بقا ينفر من زينب كده وده زاعجني اووي مبحبش اسمع كلمة في حقها ....هي كويسة وبتعاملني زي اختها مش ده رد الجميل ابدا

.....

بعد نص ساعة دخل عليا الأوضة لقاني بطلع دهبي ...قال بهزار:

-ايه ناوية تهجي من البيت 

-لا هبيع دهبي عشان اعمل عيد ميلاد اختي ولا الحوجة لحد

ضحك وقال :

-دخلي دهبك يا عبيطة وخدي الفيزا اهي يا اخر صبري واعملي عيد ميلاد 

قربت وحضنته وانا بقول بطفولة :

-هييييه...ربنا يخليك ليا يا نادر 

...........

بعد يومين ....

كان كل حاجة جهزت ...التورتة الكبيرة وعليها اسمها وصورتنا احنا الاتنين  ...البيت مزين وهدايا كتير ليها...كنت فخورة وانا ببص علي التجهيزات ....اكيد هيعجبها عيد ميلادها ...فاضل بس اتصل بيها....وقبل ما امسك التليفون لقيته رن برقم غريب فتحت لقيت صوت راجل بيقول :

-انتي مدام شروق

-ايوة انا 

-جوزك ومراته التانية عملوا حادثة وهما دلوقتي في المستشفي!!!

يتبع 

#زوجة_زوجي

#سولييه_نصار

تفاعل جامد عشان انزل الباقي ❤

الجزء الثالث❤شكرا على تفاعلكم السكر❤بقلم سولييه نصار❤

روحت المستشفي جري ....عقلي مش مستوعب اللي سمعته ....جوزي عمل حادثة هو ومراته...مين مراته ...انا بس اللي مراته ....حسيت عقلي هينفجر من التفكير  ... روحت علي الإستقبال  وانا بسأل عن جوزي

-مساء الخير ...جه هنا واحد عمل حادثة اسمه نادر ثروت 

-ايوة يا مدام جات بسيطة متقلقيش...شوية رضوض الحادثة مش خطيرة ....هي  بس مراته  اتكسرت ايديها ...الحمدلله انهم كانوا  رابطين الحزام ...بس دلوقتي اطمني هما  تمام وممكن كمان يخرجوا النهاردة 

- مراته...مراته مين 

قولت وانا مبهوتة ...قلبي كان بيدق جامد ...وعيوني دمعت 

بصتلي موظفة الريسيبشن وبصت في الورق وقالت:

-ايوة مراته زينب محسن 

رجعت ورا بصدمة ...زينب ...اكيد ده هزار ....هما الاتنين بيهزروا معايا هزار سخيف...زينب متعملش كده فيا دي اختي ...توأم روحي ....اكيد في حاجة غلطت ...بصيت ليها وقولت :

-وهما فين دلوقتي 

طلعت السلم وانا شبه ميتة ....نادر وزينب...اقرب اتنين لقلبي ....نادر انا شكيت فيه ...لكن زينب ...زينب متعملش كده ...زينب بتحبني ...دخلت الأوضة لقيتهم زينب متسطحة ونادر قاعد علي الكرسي باين عليه التعب ...بصولي الاتنين  بصدمة فقربت علي زينب وقولت بدموع  :

-قالولي حالتك خطيرة  كويسة؟!

- شروق

قالتها وهي بتعيط ....كان باين عليها الندم بس ابتسمت وبصيت لنادر المصدوم وقولت:

-انت اكيد روحت لزينب عشان تجيبها لحفلة العيد ميلاد اللي انا عملاهالها ....اكيد بوظت المفأجأة كالعادة 

نادر بص في الارض فبصيت علي زينب. اللي بتبكي وقولت :

- عارفة يا زوز عملتلك حفلة كبيرة اووي ....جيبتلك الشنطة اللي كان نفسك فيها ...يوم ما بصيتي عليها عرفت انك عايزاها ...عشان كده اتفقت مع صاحبة المحل انها تحجزهالي

- شروق كفاية 

قالتها ببكا ..

-انتي بتق*تليني بالطريقة دي ...ابوس ايدك كفاية

مسحت دموعي وقولت بضحك:

-تحت بيقولوا ان انتي ونادر متجوزين...دوول مجانين ومضحكين اووي ...ميعرفوش انك اختي ومستحيل تخونيني ...انتي عارفة انا اشك في ناظر انه يتجوز عليا ...بس انتي لا زينب ...انتي عيلتي ...توأم روحي ...انتي الاخت اللي طلعت بيها من الدنيا 

- انا اسفة  ....انا اسفة

-شروق 

قالها نادر فبصتله بغضب وقولت :

-لو سمحت متتدخلش بين اتنين اخوات 

سكت نادر بتوتر فبصيت لزينب وقولت:

-ليه عملتي كده ؟

-حبيته...لأني حبيته يا شروق....حبيته حتي من قبلك 

-لو كنتي قولتيلي كده قبل ما اتجوزه عمري ما كنت هفكر ارتبط بيه يا زينب ...لو اعرف ان اختي بتحب الراجل اللي انا بحبه كنت سيبته لاني مرضاش اننا نفترق...لانك انتي عندي اغلي منه وهو عارف ده كويس ...بس هو عندك اغلي مني عشان كده اختارك صح 

- انا مستعدة لأي عقاب يا شروق ...لو عايزاني اتطلق منه واختفي من حياتكم هطلق وأبعد بس سامحيني

لسه هرد عليها دخل الدكتور. علينا ....مسحت دموعي بسرعة وانا ببص للدكتور ...ابتسم الدكتور وقال :

-نتيجة التحاليل طلعت واللي شاكك فيه حصل...مبروك يا مدام زينب انتي حامل!!!

يتبع 

الجزء الاخير ❤شكرا على تفاعلكم السكر❤بقلم سولييه نصار❤

-حامل 

قولت بصدمة وعيوني دمعت....قلبي كان بيتقطع وانا بشوف فرحة نادر اللي مقدرش يخبيها...بس زينب كانت عينيها عليا 

اتكلم الدكتور وكمل وقال:

-الحمدلله ان الحادثة كانت بسيطة ومن لطف ربنا ان الجنين حاليا كويس بس طبعا تتابعي مع أخصائي نساء وولادة 

- اكيد يا دكتور هنتابع 

قالها نادر بلهفة وجعت قلبي ...زينب كانت بتبصلي هي وبتبكي ...اللحظات اللي تمنتها...اخدتها زينب....خرج الدكتور فمسحت دموعي وانا ببتسم وبقول لنادر :

-الف مبروك يا نادر يتربي في عزك إن شاء الله

-شروق 

بصيت لزينب وقولت :

-اكيد واضح دلوقتي مين اللي لازم يمشي دلوقتي 

بصيت لنادر تاني وقولت  :

-بتمني ان ورقة طلاقي توصلني بسرعة انا اللي هطلع من حياتكم 

-شروق متتهوريش ....ومتنسيش ان الشرع حللي الجواز تاني 

-انا مش متهورة ولا متضايقة ...بس زينب اختي يا نادر يظهر اللي انت اللي نسيت وانا مينفعش اعيش علي ذمتك وانت متجوز اختي 

-شروق 

قالتها زينب وهي بتبكي بس انا مشيت ...كان لازم امشي كان لازم ابعد ...شعور صعب ان اللي كنت بتعتبرهم عيلتك يخونوك في اللحظة دي بتتساءل ان لما عيلتك تخونك...انت بعدين هتأمن لمين ...هتثق في مين ....معقول الدنيا وحشة كدة مكنتش مصدومة من نادر قد صدمتي في زينب اللي فضلتها علي نفسي تعمل كده ....

مرت الايام وتم طلاقي من نادر ...بسهولة اووي معيشتش جو الروايات انه يترجاني او يبكي ...يظهر اني مش بطلة الرواية شكلها زينب ...زينب يوم طلاقي اتأسفت مليون مرة ...اتمسكت بيا ...قالتلي هي كمان عايزة تتطلق منه بس انا رفضت...رفضت واختفيت من حياتهم ...بش مكرهتهومش معرفش ليه ....روحت اعيش مع جدتي وقررت ابدأ حياتي من هناك ...علي كل حال الحياة مش بتوقف علي حد ....

.......

بعد شهور 

جالي اتصال من نادر!!!...غريبة اووي بس قلبي انقبض لما افتكرت ده ميعاد ولادة زينب...رديت بسرعة لقيت نادر متوتر وهو بيقول ان زينب  ولادتها اتعسرت وعايزة تشوفني ....

وقعت التليفون علي الأرض ودموعي نزلت ...من غير تردد لبست هدومي زي المجنونة وعقلي بيفكر في أسوأ الأحداث

-يارب احفظها يارب 

قولتها وانا ببكي 

-بسم الله الرحمن الرحيم مالك يا شروق 

-تيتة زينب بتولد وحالتها خطر ...

لسه همشي ...مسكت ايدي بقسوة وقالت:

-نعم يختي مش دي اللي دمرت حياتك ...

بعد وانا بقول وانا بمسح دموعي:

- زينب اختي يا جدتي وانا مستحيل اسيبها في وضع زي كده 

بعدين جريت زي المجنونة 

......

وصلت للمستشفي وشوفت نادر متوتر ...الدكتور قابلني وقال :

-انتي شروق

-ايوة ...زينب 

- هي عايزة تشوفك دلوقتي 

-حالتها ايه يا دكتور 

بصلي الدكتور بأسف وقال:

-بصعوبة انقذنا الجنين بس وضعها  ما زال  في خطر....هي مصممة تشوفك انتي   ومش قادرين نسيطر عليها 

..

لبست الهدوم الخاصة بأوضة العناية ودخلت..

.لقيتها نايمة علي السرير ...اجهزة كتير حواليها 

- زينب 

قولتها وانا ببكي 

-بصتلي بتعب وقالت:

-ربنا بياخد حقك ...انا هموت

دموعي نزلت وانا بقول :

-بطلي هبل يا بت انتي بعيد الشر عنك اومال مين هيربي ابنك 

-بنتك ...انا جبت بنت ووصيت نادر يسميها شروق 

قربت منها ومسكت ايديها وعيطت:

-ايه الاسم القديم ده يا بت يا زينب يا اختي سمي الاسماء الحلوة اللي طالعة الايام دي 

-لا حبيت بنتي تطلع زيك ....طيبة زيك يا شروق 

شدت علي ايدي وقالت:

-وصيتي بنتي يا شروق انتي ربيها...اعتبريها بنتك 

-وانتي روحتي فين ...ربنا يطول في عمرك وانتي تربيها

ابتسمت بتعب وقالت:

-ممكن احضنك يا شروق....من زمان محضنتكيش 

قربت وحضنتها وانا ببكي...مكنتش متقبلة انها تموت خالص ....هي مهما حصل اختي اللي انا بحبها

-سامحيني يا شروق

-مسامحاكي بس انتي قومي بالسلامة 

فجأة ايديها نزلت والجهاز صفر ...حضنتها وصرخت جامد ......

........

بعد خمس سنين 

كنت واقفة قدام المقبرة وانا بقرا الفاتحة لزينب ...خلصت وبصيت لشروق بنتي الصغيرة بحب ....شروق كان امل جديد ليا بعد ما زينب ماتت ...انا اللي ربيتها واعتبرتها بنتي  ...كانت تعويض كبير للي حصلي....للاسف مرجعتش لنادر...هو حتي مساهمش في تربية شروق مجرد بيجي يزورها  علي فترات وبيصرف عليها ...بعد عنها بس  رغم كده  بيحاول يرجعني  ويقرب من بس انا رافضة تماما ...وانا واثقة انه بعد النهاردة مش هيحاول تاني ...

-خلصتي يا شوشو

-ايه الاسم اللوكال ده يا مامي ناديني شوجر

-شوف البت 

مسكت ايديها وقولت:

-طب يالا يا لمضة هنمشي 

-ايوة اكيد رايحة تشوفي الدكتور بتاعي الحلو اللي عنده غمازات زيي 

بصتلها بصدمة وقولت:

-بنت عيب 

-تيتة قالت انه طلب يتجوزك...انا موافقة عليه عشان تجيبلي أخ زيه 

-يخربيت لسانك ..مربية حرباية يا ربي 

-هتوافقي صح 

-لسه بفكر 

-بتفكري في أيه يا ماما انتي كل لما بيكلمك وشك بيحمر...وافقي وافقي حد لاقي

نزلت لمستواها وقولت:

-بت انا شاكة فيكي انتي عندك كام سنة 

-ستين سنة 

ضحكت وهي ضحكت ...قربت وباست راسي وقالت:

-انا بحبك اووي يا مامي

عيوني دمعت وافتكرت زينب وحضنت شروق وقولت:

-وانا كمان يا قلب مامي ❤

تمت

#زوجة_زوجي

#سولييه_نصار

حبيت المرة دي اتكلم عن حب انا بحترمه وبقدسه حب الصديقة والأخت...وملقيتش مثال للحب ده زي شروق .  محظوظ اللي في حياته انسانة زيها❤❤