 |
رواية فتاة نصف الليل الجزء الرابع
للكاتبة/حنان حسن
بعدما قابلت الدكتور تامر
(الطبيب النفساني)
عرفت منه
ان امل راحتلة..
وعرفتة علي نفسها
بانها (انا)
وللاسف... اتبعت معاه اساليب قذرة
ومش بس كده
لا.... دي كمان معاها فيديوهات
ضغطت عليه بيها
عشان يتجوزها
وللاسف... عقد الزواج كان باسمي
يعني انا دلوقتي
متزوجة من الباشا....
ومن الدكتور تامر
في وقت واحد
يعني انا كده ممكن اتسجن
ده غير الفضايح
الي في الفيديوهات
لان امل شبهي..
وصورة طبق الاصل مني
ينهار مش فايت
طب وبعدين؟
هعمل ايه؟
لو الباشا عرف...
موضوع زواجي من الدكتور تامر؟
ولا شاف الفيديوهات دي؟
هثبتلة ازاي؟
ان في واحدة اسمها امل...
هي الي بتعمل كل ده؟
ده حتي مفيش اي دليل
ان امل موجودة فعلا
ولقيت نفسي بنتفض
من مكاني
وبقول...
انا لازم اقول للباشا علي امل
واعرفة كل الي حصل
.. وحالا
ورجعت اقول لنفسي
بس ممكن الباشا ميصدقنيش
وخصوصا... ان مفيش اي دليل
علي وجود امل
وفكرت شوية
وبعدين
قلت...
يبقي لازم الاول
اثبت ان امل موجودة فعلا
عشان....
لما اشرح للباشا الي حصل يصدقني
بس اثبت ازاي انها موجودة؟
وفضلت افكر
اثبت ازاي؟
ان امل موجودة؟
اثبت ازاي؟.. اثبت ازاي؟
ومرة واحدة
نورت في راسي فكرة
وهي...
اني انتظر اول ما امل
تظهر تاني
واتصور انا وهي سيلفي
واسجل كلامي معاها كمان
عشان الباشا...
لما يشوفنا احنا الاتنين
مع بعض
يصدق انها شبهي فعلا
ويتاكد من كلامي لما يسمع التسجيل
بس ياتري امل هتظهر امتي؟
وفضلت ادعي
ان امل تظهر بسرعة
عشان اتصور معاها واثبت برائتي
لكن امل مرجعتش ولا ظهرت
فكان لازم... الجأ للحل التاني
وهو... اني اتطلق من واحد من الازواج
وطبعا... عشان الدكتور رافض يطلقني..
وبيساومني..
وبيطلب مني اني ارجعلة الفيديوهات الاول
والا... مش هيطلقني
فا كان الحل..
اني اطلب الطلاق من الباشا
المهم...
اني لما رجعت البيت
لقيت الباشا بيباركلي علي كتب الكتاب
ساعتها كنت عايزة
اقولة...
انك اتجوزت واحده تانية خالص
غير الي دخلت عندك الاوضة
لكن...
مكنش هيصدق ولا كلمة
من الي هقولة
طيب وبعدين
منا لازم اتطلق من الباشا لاكتر من سبب
اولا...
ان الباشا قامةكبيرة
وليه اسمة... وسمعتة
الي هيتلوثوا
بمجرد ما حد يشوف الفيديوهات
ده غير الفضيحة
الي هتحصلة
لما الناس يعرفوا
ان زوجتة بتجمع بينة وبين زوج تاني
يا نهار مش فايت
لا انا بحب الباشا
ولا يمكن اعرض اسمة... وسمعتة لكدة
ده غير
اني لازم اتطلق منه اصلا
لاني كده متزوجة اتنين
في وقت واحد
لكن ازاي اخلي الباشا يطلقني؟
ده بيقول انه بيحبني
وفي اللحظة دي
مكنش في حل غير
اني اعمل اي حاجة تزعل الباشا مني
عشان اتطلق منة
وفكرت اني....
اديلة فكرة وحشة عني
عشان... يطلقني
وانتهزت فرصة ان الباشا بيسالني
وبيقولي...
احكيلي عن نفسك شوية يارنا؟
فا قلت...
انتهزها فرصة واحاول اقفلة مني
فا قلتلة...
بصراحة...
انا نفسي اقولك الماضي بتاعي كلة
بس خايفة تغير فكرتك عني وتسيبني
رد الباشا
وقال..
ايه الي بتقولي ده يا رنا؟
انتي عبيطة ولا ايه؟
اسيبك ازاي؟
دنتي روحي
قلت.. طالما كده بقي يبقي اسمع
انا بصراحة...
كان ليا علاقات متعددة
كتير
قبل ما اقابلك
بصلي الباشا ولقيت ملامح وشه اتغيرت
وسالني
علاقات سطحية يعني
ولا حاجة تانية؟؟
قلت..
لا سطحية ايه؟
انا معرفش اعمل علاقات سطحية؟
انا علاقاتي كلها
علاقات وطيدة
رد الباشا بغضب
وسالني
قال...
خلاص عادي
طالما كانت علاقات محترمة
مش مشكلة
وبصلي الباشا
وسالني بقلق
وقال...
مش هي برضوا كانت علاقات محترمة؟
قلت..
والله بالنسبة لكل للرجالة الي عرفتهم في حياتي
فا 2 في المية...
منهم بس
هما الي كانوا محترمين
الباقي بقي الله يمسيهم بالخير
كانوا بيعشقوا الشقلبظات
اتعصب الباشا عليا
وصرخ في وجهي
وقال.. اسكتي بقي خلاص
مش عايزاسمع حاجة
قلت.. ايه ده انت زعلت؟
بالله عليك ما تزعل
العلاقات دي كلها
كانت ايام ما كنت بشتغل في الملهي الليلي
يعني فترة وراحت لحالها
بصلي الباشا بدهشة
وبعدين مسكني من ايدي بقوة
وسالني
قال.. تعالي هنا
انتي قولتي ايه دلوقتي؟
قلت..
في ايه بحكيلك عن ذكرياتي
بصلي الباشا بدهشة
وسالني
قال...
هو انتي كنتي بتشتغلي في ملهي ليلي؟
قلت... ايوه
وايه المشكلة؟
طالما شغلانة شربفة؟
رد الباشا
وقال..
شريفة ازاي يعني؟
كنتي بتشتغلي ايه هناك؟
بتمسحي الحمامات مثلا؟
قلت... لا حمامات ايه؟
انت بتطمن نفسك؟
دنا كنت وحش الصالة
والكل بيجي عشان يشوف رقصي
يعني الضغط كلة كان عليا و......
وفي اللحظة دي
قاطعني الباشا
وقال
كفااااااية
مش عايز اسمع
قلت...
لا يا باشا
واضح كدة
انك مستعر من الماضي بتاعي
وانا كرامتي متسمحليش
اني اتجوز حد بيستعر مني
والحل دلوقتي
ان كل واحد يروح لحالة
طلقني يا باشا
بصلي الباشا
وقالي..
كان لازم افهم كده
لما شوفتك اول مرة
وشوفت جرائتك
وفجاءة
جذبني الباشا من ذراعي تاني بقوة
وقال محذرا
انا كان ممكن اطلقك حالا
لكن انا مش هعمل كده
الا لما اتاكد
من كلامك ده بنفسي
ومن هنا لغاية ما ده يحصل
لازم تعرفي
انك انتي دلوقتي زوجة ضابط شرطة
يعني لازم تنسي كل الماضي القذر بتاعك
وخدي بالك
اني هبدء احاسبك من هنا ورايح
علي كل كبيرة...
وصغيرة
ولو لاحظت عليكي حاجة
او سمعتك بتجيبي سيرة الكباريهات
والماضي بتاعك تاني
انا هوريكي الوش التاني
وساعتها هتندمي
قلت.. وليه ده كلة؟
يا باشا
رحم الله امرء عرف قدر نفسة
وانا بصراحة
روح الفرفوشة الي جوايا
مسيطرة عليا
و ممكن تغلبني في اي وقت
يعني مفيش فايدة فيا
احنا نتطلق احسن
والافضل اننا...
نسيب بعض بالمعروف
طالما استحالت العشرة بينا
رد الباشا
وقالي... عشرة ايه يا متخلفة انتي
الي استحالت؟
احنا لسة متجوزين علي الورق من يومين
قلت...
لا مهو باين اننا ميولنا مختلفة
وواضح ان جوازنا اتكتب عليه الفشل
فا احسن حل اننا نتطلق
رد الباشا بغضب
وقال..
بقولك اخرسي خالص
انا في كل الحالات هطلقك
بس عايز اتاكد بنفسي
ان كانت الظروف القاسية الي انتي عيشتيها
هي الي اجبرتك تشتغلي الشغلانة دي
ولا انتي سافلة بطبعك؟
وبتعشقي القذارة؟
وفي اللخظة دي
قرب مني الباشا وهو بيرمقني بنظراتة الغاضبة
وقال...
وياريت متطلعيش قذرة بطبعك
لاني ساعتها انا هقتلك بايدي
قلت..يلهوي
يعني انا لو طلعت قذرة بطبعي
هتقتلني ؟
بصلي الباشا بصة احتقار وتركني ومشي
وبعدما الباشا مشي
فضلت اعيط واكلم نفسي
واقول...
ياربي علي الهبل الي انا عمالة اعملة
انا سخنت الباشا
وقلبتة عليا..
لدرجة انه بيهدد بقتلي
ودلوقتي...
الباشا مغلول مني
وهددني
وقالي..
اني لو طلعت قذرة بطبعي هيقتلني
انا حتي مش فاهمة الجملة
ياربببي
طيب انا هعمل ايه دلوقتي؟
وفضلت افكر.... وافكر
لغاية ما كنت هتجنن
ياتري مين امل دي؟
وطلعتلي منين؟
هي فعلا بني ادمة؟
وشخص موجود فعلا؟
ولا شخصية انا ابتكرتها
من نسج خيالي
المريض؟
ورجعت اقول..
لا مش ممكن تكون
من نسج خيالي
لان كده هنبقي انا... وامل شخصية واحدة
ولو ده حقيقي
هيبقي انا الي قتلت نوسة ودوسة
وده مش حقيقي
لان امل قالت
ان هي الي قتلت نوسة ودوسة
و الطب الشرعي اثبت
ان بصماتي غير بصمات الجاني
يعني استحالة امل دي
تكون انا
طيب لما هي مش انا
امال تطلع مين؟
وفكرت شوية
وقلت...
يمكن تكون اختي التؤام؟
وتاهت من ماما زمان
زي الافلام العربي؟
اه وليه لا؟
ممكن فعلا تكون اختي التؤام
وطلعت اجري بسرعة
علي ماما
وسالتها
قلت.. ماما
قالت.. نعم يا قلب ماما
قلت... هو انتي لما ولدتيني؟
ولدتيني لوحدي؟
ولا كان ليا اخت تؤام؟
ضحكت ماما
وقالت..
هو انا قادرة عليكي؟
لما اقدر علي اتنين من عينتك؟
اتدايقت من سخرية ماما
وقلت..
لو سمحتي يا ماما ردي
عليا...
وجاوبيني
انتي وانتي بتولديني
مكنش في اخت ليا تؤام تاني؟
وتاهت منك وهي صغيرة ولا حاجة؟
ردت ماما بحسم
وقالت.. لا طبعا
تفتكري يعني لو ليا بنت وضاعت مني
هنساها... وهسكت؟
وهعيش حياتي عادي كدة؟
دنا كان زماني مت بحسرتي عليها
يا حبييتي انا مخلفتش غيرك انتي
وانتي الي ليا في الدنيا
وسالتني ماما
وقالت...
بس انتي ليه بتسالي السؤال ده؟
قلت.. مفيش مجرد سؤال
ردت ماما
وقالت
لسة موضوع الي اسمها امل دي شاغل دماغك؟
قلت... لا خالص
ردت ماما
وقالت..
طيب اقعدي بقي عشان اجيبلك حاجة تاكليها
قلت.. لا مش عايزة
انا هدخل انام
وسيبت ماما في المطبخ
ورجعت لغرفة النوم
الي بنام فيها
انا وماما
وقفلت الباب عليا من جوه
عشان اقعد براحتي في غرفتي
وبالفعل...
لبست بيجامة عارية الاكتاف
واستلقيت علي السربر
وبمجرد ما حطيت راسي علي المخدة
فضلت الافكار تروح وتيجي في راسي
لغاية ما روحت في النوم
وبعد شوية
صحيت علي ايد بتصحيني من النوم
في الاول
افتكرتها ماما
لكن لما صحيت من النوم
اتفاجئت انها امل
فا فرحت جدا انها رجعت تاني
وفضلت ادور بايدي
علي الموبيل
جنبي علي السربر لغاية
ما لقيتة
وعملت نفسي بشغل الكشاف
وشغلت جهاز التسجيل
عشان اسجل كلامنا مع بعض
وبعد ما شغلت التسجيل
سالتها؟؟
قلت..ازيك يا امل؟
انتي كنتي فين؟

ردت امل
وقالت.. انتي كنتي مستنياني ولا ايه؟
قلت.. ايوه ياامل طبعا
قالت.. ليه؟
قلت.. عشان وحشتيني
ابتسمت امل
وقالت... ماشي
انتي كمان وحشتيني علي فكرة
قلت.. ممكن نبقي اصحاب؟
قالت.. ممكن
قلت... طيب ممكن بقي
اخد صورة سيلفي مع صديقتي؟
قالت... طبعا ممكن
وبالفعل اتصورت انا
.. وامل
صورة سيلفي
وتركت الموبيل يسجل
وبدات اسجلها
وانا فرحانة اني بسجلها
وكنت هسالها عن الفيديوا بتاع الدكتور
لكن لقيتها
سبقتني في الكلام
وقالتلي...
انا نفذتلك طلبك..
وساعدتك..
وجوزتك للدكتور تامر
ممكن بقي توفي بوعدك
وتساعديني اني اتجوز الشخص الي بحبة
انا كمان؟
رديت بغضب
وقلت...
لا طبعا مش هساعدك
قالت.. ليه؟
اولا... انتي ليكي اساليب مش محترمة
بتتبيعيها عشان...
ترتبطي بالشخص الي انتي عايزاه
وانا عمري ما هعمل زيك
وثانيا..
انا عايزاكي تعطيني الفيديوهات
الي انتي ماسكاها علي الدكتور تامر
ردت امل بغضب
وقالت..
ملكيش تطلبي
وانامش ملزمة اني اجيبهم
قلت...
لا وحياة خالتك
انا لازم اخد الفيديوهات
دي
وارجعها للدكتور
عشان احل مشكلتي
ردت امل بعصبية
بقولك ايه
انا مش جاية دلوقتي
عشان نتكلم في فيديوهات
انا جاية دلوقتي
اطالبك انك توفي بوعدك...
وتيجي معايا
نقابل الراجل الي انا بحبة
وتساعديني
عشان اتجوزة
قلت...
لا طبعا مش هيحصل
وانا مش علي استعداد
اني اتورط في جوزاة ثالثة
ردت امل بنبرة تحدي
وقالت
لو موفتيش بوعدك
هقلب عليكي
وهخلي حياتك جحيم
قلت...
اعملي الي انتي عايزاه
بس الاول
هاتي الفيديوهات
ردت امل
وقالت..
مفيش فيديوهات
طالما رفضتي توفي بوعدك
مسكت ايديها بالقوة
وقلت...
مش هتخرجي من هنا
لغاية ما اخد الفيديوهات
فا دفعتني امل بكل قوتها
ولما وقعت علي الارض
قدرت امل تخرج من الغرفة قبل ما امسكها
فا خرجت اجري وراها
ولمحتها نزلت من علي السلم
فا نزلت وراها
ولما شافتني بجري وراها
دخلت غرفة البواب
فا دخلت وراها بسرعة
لكن لما بصيت في الغرفة
ملقتش حد
و لما دققت النظر علي السرير
لقيت حد نايم تحت الغطا
فا عرفت انها مختفية مني تحت الغطاء
فاقررت ارفع الغطا
لكن قبل ما امسك طرف الغطا
سمعت صوت اقدام
وكان في حد جاي علي غرفة البواب
الي انا واقفة فيها
وانا لابسة بيجامة النوم العريانة
ومره واحدة
شوفت خيال شخص
جه وقف علي باب الغرفة
بتاعة البواب
ولما دققت في الشخص الي
وقف علي باب الغرفة
اتفاجئت...
بانة...(الباشا)
ولقيتة بيبصلي
وعنية بتطق شرار
وكنت عارفة انه هيسالني
انتي هنا ليه؟
وقبل ما اتكلم
ا و... ابرر انا هنا ليه
لقيتة بيقولي
ايه الي منزلك هنا باللبس العريان ده؟
قلت..
انا كنت جاية هنا عشان امسكها
رد الباشا
وقالي...
وياتري قدرتي تسيطري علي مشاعرك
وتمسكيها ولا لسة؟
للدرجادي انتي رخيصة؟
قلت.. لا.. لا
مشاعر ايه الي جاية امسكها؟
انا بتكلم عن النصابة دي
ورفعت الغطا بسرعة
لكن اتصدمت لما شوفت بعيني
ان الي تحت الغطاء
هو...
خالد ابن عم عثمان
الطباخ
فا بصيت للباشا
وسالتة
وقلتلة...
اظن دلوقتي
انا لوحلفتلك مية يمين
اني قاعدة في غرفة خالد... وعلي سريرة... ولابسة اللبس العريان ده
عشان امسك واحدة صاحبتي؟
مش هتصدقني؟
هز الباشا راسة
وقالي...
واضح فعلا ان القذارة في طبعك
قلت.. ايه ده؟
هي الجملة دي معناها كدة؟
وفي اللخظة دي
فضلت اتحايل عليه...
واستعطفة
وقلت..
لالالا بالله عليك اصبر انت فهمت ايه؟
انا جايه هنا امسك امل
بس هي هربت
وانا معايا الدليل
وكل الكلام متسجل بيني وبينها
حتي الصورة بتاعتي انا وهي....
موجودة علي الموبيل
بتاعي
اتفضل تعالي معايا في غرفتي
وانا اوريك الادلة
في الموبيل
وبالفعل
رجع الباشا معايا
للغرفة
وانا كنت خايفة... ومرعوبة احسن يكون الموبيل
مسجلش حاجة
واطلع كدابة
وساعتها الباشا طبعا هيفرمني
لكن اديتلة الموبيل
وقلت...
الي يحصل يحصل بقي
وبالفعل...
اخد الباشا الموبيل
وفتحة..
ولقيتة بص في الموبيل شوية
وبرق عنية اوي
وقال.....مش ممكن؟
قلت...
في ايه؟
قال..........
لو عايز باقي احداث القصة
صلي علي رسول الله
وطبعا مش هننسي نضع عشر ملصقات مع متابعة للمدونة
 عرفت منه ان امل راحتلة.. وعرفتة علي نف…){kind=link}
تعليقات
إرسال تعليق