مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

#الجزء_السادس_والسابع_الأخير

مدونة #موسوعة_القصص_والروايات 

اتصدمت وانا بستوعب اللي قلته واللي خرج من غير إرادة مني. ....انا اعترفتلها بحبي !!!معقول ؟! كانت هي بتبصلي بذهول ...هزت راسها  بعدين بصتلي ببرود وكانت هتمشي مسكتها من ايدها وقربتها مني وقولت:

- انا فعلا بحبك....مش لعبة ...انا اكتشفت ده لما حسيتك بتضيعي مني ...متحملتش ...شهد اديني فرصة تانية 

-سيب ايدي يا امير 

- شهد افهميني

زقتني وصرخت :

-انت عايز مني ايه 

- انا بحبك 

ضحكت بتريقة وقالت وهي بتعيط :

-حب ؟!حب ايه يا استاذ انت دمرتني...دمرت حياتي وسعادتي ...انت انسان معقد فضيت كرهك وانتقامك فيا انا مع اني مليش ذنب 

-امك 

زقتني وهي بتصرخ:

-امي وأبوك اتجوزوا ...صحيح ظلموا امك بس انا ذنبي ايه ....قولي ذنبي ايه ليه بتاخدني بذنبهم هما اذا كانت امك اللي اتأذت عاملتني زي بنتها .محقدتش عليا حتي ميرا ...مفيش غيرك ...مفيش فرصة الا وكنت تجرحني وتأذيني ورغم كده قلبي حبك ...كنت هتجنن ازاي قلب. يحب اللي أذاه يا امير.

قلبي وجعني وانا شايف دموعها ....يعني انا في الأخير  اللي غلطان بصتلها وانا ببرر:

-ابويا سابنا....احنا اتحرمنا من حنانه ...لما اشوفه بيربي بنت مش بنته انا ايه هيكون وضعي 

- مش ذنبي يا أمير مش ذنبي ان ابوك سابك ...انا مالي....حرام عليك كفاية ...

مسحت دموعها وبصتلي وقالت :

-بعد ما نرجع مش شهر العسل تطلقني ...وخليك مع سها ...وانا مش هقول لامك اي حاجة 

قربت منها ومسكتها وقولت :

- انا بحبك انتي. مش سها ....جوازي من سها كدب انا اصلا متجوزتهاش 

- وانا بطلت احبك ....حبي ليك انتهي يا امير 

وبعدين سابتني ومشيت من قدامي ومن المطعم كله 

.......

-الا قولي انت جمالك ده رباني ولا فلتر 

قالتها سها وهي هايمة ومبتسمة زي الهبلة

ضحك حسن فقالت سها :

-يخربيتك عسل اووي

- انتي بتعاكسيني ولا ايه 

-اعمل ايه ما انت حلو وبسمسم

ضحك وبصلها فقالت:

-لا تتطلع فيني هيك عيونك حلوين اسم الله

- سها انتي متجوزة ميصحش اللي بتعمليه

لسه هترد وتقوله الحقيقة لقتني مسكتها من قفاها...البنت دي ناوية تفضحنا النهاردة  وقولت:

-يالا هنمشي

-امشي انت يا اخويا الجو عندي طراوة.

قرصتها جامد وزعقت :

-يالا نمشي يا بت 

قامت معايا بس وقفت لحظة وقالت :

-طب أخد رقم تليفونه 

 امشي والا وديني هكسر راسك 

-خلاص خلاص مش هاخد الرقم لاحسن كمان يفتكر اني مدلوقة ولا حاجة عليه لازم اتقل 

..........

بعد ما وديت سها اوضتها روحت لشهد

-خلاص يا امير ده قراري النهائي انا عايزة اتطلق 

- شهد ...ابوس ايديكي اديني فرصة طيب ....والله ما فيه حاجة بيني وبين سها ...

-ميهمنيش برضه مش عايزة اكمل والا 

-والا ايه 

-هقول لماما صفية علي كل حاجة وهي تتصرف معاك

بصتلها بحزن وقولت :

- ده اخر كلام عندك 

-ايوة 

قربت منها وقولت بعناد:

- وانا مش هطلقك...انا بحبك ولو وصلت احبسك هنا هحبسك

وبعدين سيبتها ومشيت 

.......

تاني. يوم ...

روحت أوضة شهد عشان اتكلم معاها مرة تاني ...دخلت واتصدمت باللي لقيته ...لقيت امي ...كانت حاضنة شهد وبتبكي...اول ما شافتني بصتلي بغضب وقامت وضربتني قلم وهي بتقول بنبرة مفيهاش نقاش :

-انت هتطلق شهد يا امير وحالا من غير اعتراض او كلام !!!

يتبع 

الجزء الاخير ❤شكرا على تفاعلكم السكر ❤❤بقلم سولييه نصار❤❤

-ماما 

-اخرس...اخرس يا امير ...خيبت املي فيك ...انا كنت حاسة انك ناوي تكسرها...بس.مقدرتش أقف في طريق سعادتها لانها للاسف حبت واحد شراني زيك 

دمعت عيون امي وقالت :

-ليه كده يا امير ...دي تربيتي ليك تكسرها...دي يتيمة ملهاش غيرنا ليه تعمل كده 

حطيت وشي في الارض وانا مكسوف ....عيوني دمعت مكنتش قادرة اواجهها .

-اومال فين صاحبة الصون والعفاف سها هانم ..ده انا جايبلها ابوها عشان يلمها ...مصدقتش لما حسام صاحبك قالي علي خطتكم المنيلة

- يا ماما 

-اتصل بيها 

زعقت فيا فاتصلت بسها عشان تيجي 

....

بعد شوية كان صوت قلم جامد طبع علي وش سها من ابوها ...حطت سها ايدها علي خدودها وبكت ..مقدرتش تتكلم 

-ادي اخرة تربية امك ...طلعتلي واحدة فلتانة ورخيصة 

-طيب كنت ربتني انت بدل ما مشغول بمراتك التانية يمكن كنت اطلع محترمة 

شد شعرها  وزعق :

-وكمان ليكي عين تردي عليا  ...انا هقتلك 

جات امي ووقفت بينها وقالت :

-بنتك صحيح غلطت يا استاذ أشرف بس غلطك انت ووالدتها اكبر ...معلش كنتوا فين لما سافرت مع واحد غريب  ها 

-ايوة صح كنتوا فين 

صرخت سها بطريقة فزعت امي 

-بسم الله الرحمن الرحيم مالك يا بنتي ..مش كده 

قالتها امي فزقتها شوية سها وهي بتمسح دموعها وبتقول :

-لا انا من النهاردة مش هسكت عن حقي يا طنط ..كنت فين يا بابا..وامي كانت فين ...انتوا مهتمتوش بيا ...محبتونيش ...انت انشغلت بمراتك وروحت تربي عيالها وامي انشغلت بجوزها وراحت تربي عياله وانا بنتكم راميني عند جدتي زي الكلبة عايشة زي اليتيمة وانا ليا اهل....انتوا بتكرروا غلط ابو امير ...بتزرعوا فيا  نفس اللي اتزرع في امير ....حد فيكم فكر فيا ...فكر انا محتاجة ايه 

-وانتي محتاجة ايه يعني الفلوس بتوصلك اول بأول 

- انا مش عايزة فلوسكم انا عايزاكم جمبي ...عايزاكم تحبوني...تسألوا عليا ...تعرفوني الصح من الغلط ....ولو عايزين تض*ربوني كمان لو غلطت اض*ربوني معنديش مانع بس خليكم جمبي  وحبوني...

مسحت دموعي وانا مش متخيل ان سها شايلة كل ده في قلبها ...طول عمري بشوفها شيطان بس النهاردة بصيتلها بطريقة مختلفة ...سها ضحية زيي  ...بس  ده معناه اننا نأذي غيرنا عشان اتأذينا والجواب كان لا 

قرب والد سها وحضنها وهي بتبكي ...بعدت ومسحت دموعها فقال :

-اوعدك مش هسيبك ابدا 

ابتسمت وقالت :

-او ممكن تجوزني وتخلص مني 

-ايه 

-قريب شهد يا بابا صاروخ ...جوزني يالا ليه 

قرصها ابوها في كتفها فصرخت ..مقدرتش اسيطر علي نفسي وضحكت بصراحة ...سها حطت حسن في. دماغها الله يكون في عونه 

......

بعد نص ساعة كنا لسه واقفين بعد ما سها وأبوها مشيوا ...كانت عيني علي.  شهد اللي باصة علي الأرض ...وكانت رافضة تبص عليا حتي 

- ماما انا بحب شهد ...عارف اني غلطت ومستعد اعمل اي حاجة عشان اصلح غلطي 

-هي  اللي تقرر تسامحك ولا لا 

بصتلها بتوسل ...فهي بصتلي وعيونها مدمعة وقالت :

- ماما صفية انا عايزة اتطلق منه !!!

.......

اتطلقنا انا وشهد بعد توسلات كتير مني انها تديني فرصة تانية ...بس مستسلمتش ...ايام واسابيع مرت وانا بترجاها ترجعلي...عملت كل حاجة ممكن حد يتخيلها ...حلفتلها علي. المصحف اني بحبها ...

لحد ما في يوم طلبت من اختي ميرا انها تجيبها علي البحر ...

كنت في المركب مستخبي لما جات ميرا وشهد ...ركبت الاول شهد ومدت ايديها عشان تركب ميرا بس طلعت باليخت...اتخضت شهد وهي بتبص حواليها ...جيت من وراها وقولت بتدوري عليا ...بصتلي بغضب وقالت :

-كان لازم اعرف انها خطة سخيفة من خططك وقف إليها ورجعني والا هنط في البحر 

- شهد انا بحبك ...مضيعيش كل حاجة 

- انت اللي ضيعت كل حاجة لما كسرتني يوم فرحنا...رجعني يا امير وانساني 

عيوني دمعت وقولت :

- ده قرارك النهائي 

-ايوة هو 

- تمام 

........

مرت الايام وانا فاقد الامل ...كنت مكتئب في اوضتي. جات ماما وقالت:

-ايه استسلمت بسرعة كده 

-هي بطلت تحبني اعمل ايه اجبرها

-هي بتعشقك بس انت محاولتش كفاية ...حاول تاني 

.. . .

بعد اسبوع كان فرح سها وحسن اللي حقيقي صعبان عليا شاب زي الورد يتورط مع المصيبة دي صحيح هو مش وسيم ده يدوب عيونه بني واسعة وعنده غمازات بس يعتبر زي الورد برضه ....باركت ليهم وغمزت ليا سها ....مسكت المايك ووقفت جمبهم وانا بقول :

-في يوم حبيت بنت زي القمر ...حاولت كتير أكرهها واكسرها عشان اثبت اني مبيحبهاش جرحتها كتير وبكتها بس اكتشفت أني بجرح نفسي انا اكتر ...هي سابتني دلوقتي وانا استاهل بس انا لسه بحبها ...بحبها وهموت من غيرها وكل اللي طالبة فرصة واحدة بس وانا اوعدها اني هسعدها وعمري ما ابكيها

بصيت لشهد اللي بتبكي وقولت:

- انا بحبك يا شهد عارف اني متساهلكيش بس بحبك اووي وهموت من غيرك اديني فرصة تانية .

هزت رأسها وهي بتمسح دموعها فقولت بسرعة :

-تتجوزيني 

ضحكت بدموع وقربت مني وهي بتقول :

-ايوة 

صقف الكل وانا شيلتها ولفيت بيها ...كنت فاكر  هوقعها في شباكي بس هي اللي وقعتني في شباكها وكانت احلي وقعة بصراحة ❤

تمت 

#وقعت_في_شباكه

#سولييه_نصار

وبكده خلص الاسكريبت يا سكاكر تفاعلكم كان جميل اووي فشكرا لانكم دايما متفاعلين💙❤