مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

سكريبت جديد❤كامل 

زوجه بالإكراه 

بقلم سولييه نصار❤❤

-انتي ازاي عايزاني اتجوز عليكي واحدة تانية انتي مجنونة ؟!

قالها زياد وهو متعصب 

-اومال عايزني اعمل ايه يا زياد اشوف ثروة جدك بتروح مننا ....هو عايز حفيد وهيديله كل ثروته ...دي فرصتنا الوحيدة 

بصلها بذهول مش مصدق ان مريم حب حياته تبقي جشعة كده لدرجة تجوزه واحدة تاني عشان يخلف 

كملت مريم كلامها وقالت :

- انا عشت هنا خدامة لجدك يا زياد عشان يحن في يوم وبكتبلي ثروته بدل ما احنا عايشين هنا زي الخدام عنده 

-ايه اللي انتي بتقوليه ده يا مريم ...جدي طول عمره بيعاملك زي بنته 

ضحكت بسخرية وقالت:

-زي بنته صح ؟! اتاريه فكر يكتبلنا ثروته ...ده شارط اجيبلك حفيد ..وانا بصراحة مش هتحمل احمل وارضع واربي...ومش عايزة جسمي يبوظ عشان كده الموضوع بسيط احنا هنجيب بنت تتجوزها وتخلف منها وبعدين نمشيها

-نعم يختي ومين دي اللي هترضي تسيب ابنها ...

-مش هتسيبه طبعا ...هخليها معانا تربيه بس هتكتب الابن بإسمي طبعا 

-مستحيل 

-لاما تعمل كده يا زياد يا تطلقني

-مريم انا بحبك انتي ...ازاي عايزاني المس غيرك ...هتستحملي 

-ايوة هستحمل ملكش دعوة 

-بس انا لا ...مش هستحمل اشوف غيرك 

-وانا مش هسمح ان الثروة تضيع مننا بسبب تفكيرك ده

مسك زياد ايدها وقال:

- يا مريم يا حبيبتي ...انتي تقدري تخلفي ما تجيبي عيل لينا تربيه سوي 

- يا حبيبي قولت مستحيل ...انا مش هبوظ جسمي وحياتي بالشكل الاهبل ده ...اتجوز وهنقول لجدك اني عندي مشاكل في الخلفة تمام 

-اووف يا مريم 

مسكت مريم ايده وقالت:

-لو سمحت يا حبيبي...اعمل ده عشاننا وانا عندي البنت المناسبة 

بصلها زياد واقتنع بعيدا عن ثروة جده هو نفسه في ابن يشيل اسمه بس مريم رافضة بتاتا....واحد غيره كان طلقها ...بس للاسف هو بيعشقها....بيعشقها اكتر من اي حياته ..بس اكتر حاجة جرحته انها مبتغيرش عليه ...كتير حس انها مبتحبهوش واتجوزته عشان الثروة  ...كتير حس انها وخداه وسيلة عشان تحقق أحلامها ...ودلوقتي بدأ يتأكد!!

......

-نعم عايزاني اتجوز جوزك ؟!!انتي بتهزري  يا مريم صح ؟!

-لا بتكلم بجد والله ...انا جاية اطلب ايدك لجوزي يا آية ...وانا هلاقي احسن منك فين يعني 

بصتلها بصدمة...مريم هي بنت خالتي ...اللي هي اصلا مش بتستلطفني ...اللي هي عمرها ما عزمتني في بيتها عشان خايفة علي جوزها مني....مريم زي كتير شايفة الست المطلقة بطريقة مش كويسة ...شايفة اني ممكن اخطف جوزها منها ...تفكير عقيم ...بس الغريبة دلوقتي انها عايزاني اتجوز جوزها ...دي اكيد اتجننت

-ها يا آية قولتي ايه تتجوزيه

-اطلعي برة يا مريم يا حبيبتي...هتلاقي علي يمينك عيادة دكتور نفسي روحيله عشان مخك خلاص طار

-هديكي مليون جنية

-ايه.

-هديكي مليون جنية يا آية ...بالفلوس دي تقدري تدفعي ديونك وتكسبي حضانة ابنك من طليقك ويرجع لحضنك قولتي ايه !!

يتبع 

الجزء الثاني❤شكرا على تفاعلكم السكر ❤❤بقلم سولييه نصار❤❤

سكت وانا بسمع كلامها ...المبلغ كان مغري ...مش عشان انا طماعة ...بس مبلغ زي ده هيغير حياتي...لما اتجوزت كرم كنت بحبه لدرجة غبية...وللاسف سحبتله قرض عشان مشروعه من غير اي ضمانات منه ....والمشروع نجح ولما نجح رماني بديون كبيرة للبنك ...ديون انا مش عارفة اسددها من فين ...عشان كده كان صعب اخد حضانة الأولاد لان ظروفي المادية سيئة جدا ....بس مبلغ زي ده هيغير حياتي ...وهيحل كل مشاكلي....وهقدر ارجع ابني لحضني 

-ليه عايزاني اتجوز جوزك ؟!!

ابتسمت بإنتصار زي ما تكون كانت متأكدة من موافقتي

-لاني عايزة طفل 

-افندم 

-عايزاكي تخلفي من جوزي 

-وانتي متخلفيش منه ليه يعني ؟

-وابوظ. جسمي؟

بصتلها بصدمة وقولت:

-انتي اكيد مجنونة يا مريم صح ....هتخلي جوزك يتجوز عليكي عشان يخلف من غيرك ...فيه ست تقبل كده ...هو فيه اصلا واحدة مش عايزة يبقي ليها ولاد من الراجل اللي بتحبه....ده فيه ناس هتموت علي ضفر عيل وانتي بتقولي ابوظ جسمي؟!ممكن ترجعي رشاقة جسمك تاني بس الاطفال نعمة مترفضهاش

اتاوبت مريم دليل علي الملل وقالت:

-خلصتينا من المحاضرة بتاعتك السخيفة...طيب اسمعي ...انا مش عايزة أطفال يا ستي ...مش بتحمل زنهم ولا هقدر اتحمل ان اشيل عيل في بطني تسع شهور واسهر واستحمل القرف ده ...ليه استحمله وانتي موجودة يا روحي ...ومتقلقيش هدفعلك المبلغ اللي وعدتك بيه 

قومت وانا متعصبة منها وقولت :

-اطلعي برة يا مريم 

-آية 

-بقولك اطلعي برة ...الله يعين جوزك عليكي ده انتي بجد مت*خلفة!!!

بصتلي من فوق لتحت بقرف وقالت :

-انتي اللي هتندمي يا ايه ...لما تتحبسي وابنك ياخده جوزك ويتحرق دمك 

-غوري اطلعي برة 

صرخت فيها بإنهيار ...انا عارفاها انها خبيثة شوية لكن انها تبقي مجنونة بالشكل ده ....لا جديدة دي ...بعد ما مشيت حطيت ايدي علي وشي وقعدت ابكي ....اكتر ناس بستحقرهم اللي بيستغلوا مصايب الناس بالشكل ده ...للحظات ادتني مريم حلم ...اديتني حل لكل مشاكلي .

.بس مش انا اللي احل مشاكلي بالشكل ده مش هسمح اكون مجرد رحم بيتأجر...اكون زوجة للبيع ...انا مش كده !!!

.........

تاني يوم لبست هدومي عشان اشوف ابني حسب اتفاقنا انا وكرم. ...رغم اني  شبه مفلسة الايام دي الا اني اخدت اخر فلوس في البيت واشتريت هدية لكريم....كريم ابني الجزء الحلو الوحيد في حياتي ..

بعد ما اشتريت الهدية بصيتلها بحب ...ابني بيحب الطيارات  اوي ..كان دايما بيقولي نفسه يبقي طيار ...دموعي نزلت وانا بلعن كرم اللي خانني ومنع ابني عني....اخد روحي ولو متصرفتش قريب في موضوع الديون هتحبس وياخده للأبد....روحت للشقة وخبطت فتحتلي واحدة غريبة 

بصتلها بصدمة وقولت :

-فين كرم

-كرم مين ...قصدك استاذ كرم النجار جوزي 

-هو كرم اتجوز 

قولتها وانا مكسورة ...رغم اللي عمله انا لسه بحبه !!!

-ايوة يا قلبي اتجوزني ...انتي بقا طليقته صح ...

-ايوة ....وجاية اشوف ابني كريم واخده عشان نتفسح شوية 

-ممنوع يا شاطرة

زقيتها وانا بصرخ :

-ايه هو اللي ممنوع؟!ده ابني انتي فاهمة ...ابني 

طلع كرم وهو بيبصلي بغضب وقال:

-ايه جابك هنا ؟!

- جاية اشوف ابني يا كرم 

-لا خلاص كان زمان يا حبيبتي انسي كريم ...رضوي هي اللي هتربيه...ابني من حقه تكون امه محترمة مش واحدة ممكن قريب تتسجن 

-وانا هتسجن ليه ؟!مش عشانك انت ؟! انا اخدت قرض عشان مشروعك وانت بعتني

لسه هيقفل الباب في وشي زقيت الباب وانا بصرخ:

- انا عايزة اشوف ابني

زقني كرم وقال :

-انسي كريم خلاص يا حلوة مبقاش ابنك ...

وبعدين قفل الباب في وشي 

قعدت اعيط  واصرخ .

بعد شوية خرجت من العمارة وانا بطلع تليفوني ...اتصلت بمريم وقولت:

- انا موافقة اتجوز جوزك!!!

يتبع 

#زوجة_بالإكراه

#سولييه_نصار

تفاعل جامد عشان انزل كمان بارت ❤❤

الجزء. الثالث ❤شكرا على تفاعلكم السكر  ❤بقلم سولييه نصار❤

-لو وافقت علي جوازي من جوزك يبقي ليا شروط

قولتها وانا بمسح دموعي ...ابتسمت وقالت:

-قولي شروطك

- ابني اللي هخلفه  هيعيش معايا

ضحكت مريم وقالت:

-ومش عايزة جوزي علي البيعة كمان ؟!انتي بتستهبلي يا روح امك ؟!!

-مريم 

-بلا مريم بلا قرف ...انتي عايزة تبوظي اللي هعمله عشان عواطف غبية ...ابنك ده هيكون ابني....لانه هيكون السبب اني اورث ملايين ...انا مس هضيع الملايين دي !!!

-يبقي خلاص يا مريم انسي.

ولسه هقوم مسكت ايدي وقالت :

-استني بس يا هبلة انتي  

زقيت ايدها وقولت :

-انتي مجنونة يا ست انتي...طيب انتي قلبك حجر انا لا ابني مش هيبعد عني 

-هديكي مليون ونص 

-حتي لو مليار مقبلش اني اسيبلك جزء مني 

ولسه همشي تاني مسكت ايدي وقالت بعصبية:

-خلاص مش هبعدك عن ابنك بس تعيشي معانا بعد ما تولديه ويطلقك جوزي

-وأعيش بصفتي ايه 

-دادة تربيه ...انا طبعا مش هتحمل زن العيال ولو عايزة تجيبي ابنك التاني جيبيه واهو شغلانة وفلوس وسكن وخلي الغلابة تأكل 

قهرني تكبرها عليا ....بس معنديش حل تاني للاسف 

-موافقة !

-تمام كتب الكتاب بعد يومين.

-بس 

- من غير بس يا آية انتي وافقتي يبقي خلاص 

..........

مرت اليومين بسرعة ...مريم شرطت ان كتب الكتاب يكون بسيط جدا وبالفعل زياد نفذ طلبها ...باين انه بيحبها اووي ....احيانا كتير بيشفق عليا لانه وقع في ايد مريم ...هزيت راسي وانا يخرج الأفكار دي وقولت في نفسي :

-وانتي مالك يا آية انتي جاية عشان حاجة معينة وخلاص ....متنسيش انتي هنا عشان ترجعي ابنك بس ملكيش دعوة بأي حاجة تاني ...

جه المأذون وكتبنا الكتاب

بعد ما خلص ابتسمت مريم وقالت :

-يالا يا عرسان علي اوضتكم 

بصتلها بصدمة ...معقول مش غيرانة علي جوزها ؟!!!معقول مفيش اي حزن أو ندم وهي بتقول كده ....هزقت نفسي مرة تانية وانا بقول في نفسي.:

-وانتي مال اهلك انتي ملكيش دعوة 

مسك زياد ايدي فاترعش جسمي وطلع بيا علي الأوضة .....خوفت جدا وفكرت اتراجع بس افتكرت كريم وقررت اكمل في الخطة زي ما هي 

.......

مرت الايام والاسابيع مع زياد ومريم...زياد غير مريم ...زياد انسان محترم ولطيف معايا ...بيعاملني بإحترام وبيسمع مشاكلي ....بدأت اميل ليه للاسف ....وكل يوم كنت بلوم نفسي وبحاول ابعده عن تفكيري بس بفشل ....مفيش حد عاملني بإحترام قبل كده ...دايما كنت البنت المنحوسة والزوجة المنبوذة لكن مع زياد كنت بحس بيشوفني كأنسانة ليها حق زي اي انسانة في الدنيا دي ....

جه اليوم واللي اكتشفت فيه اني حامل ...مريم طارت كن الفرحة ...اول مرة اشوفها فرحانة كده ....دخلنا البيت زغرطت وحضنتني وهي بتقول :

- انتي حققتي اهم حلم في حياتي الثروة خلاص هتكون لينا هنصرف براحتنا...

مسكت ايد زياد وقالت:

-كده مفيش عائق ولا حجة لجدك خليه ينقل الثروة دلوقتي

بصلها زياد وهو متضايق ...طلعت انا علي اوضتي وسيبتهم شوية 

.....

-زياد امتي هتقوله ...ايه رايك نتصل بيه دلوقتي 

- هو ده اللي همك الفلوس

-اومال ايه هيهمني غيرها ...احنا من غير فلوس منسواش

-والحب والمودة ؟!مش مهمين

-حبيبي متبقاش درامي الحب ده حلو في الروايات في الافلام لكن في الواقع الفلوس هي اللي بتحكم ...انت معاك فلوس الناس هتبصلك ...مش معاك هيبقي ملكش لازمة

-مريم انتي اتجوزتيني ليه ؟!

-عشان انت محترم ...مركزك كويس هتعرف تعيشني

-ولو مكنش معايا فلوس كنت هتتجوزيني؟

-لا طبعا يا بيبي عايزني اشحت معاك يعني 

- انتي بتحبيني يا مريم 

-اه طبعا ايه السخافة دي 

-تقبلي تعيشي معايا من غير ثروة جدي....انا مش عايز الثروة هخليه يتبرع بيها

- انت اتجننت صح ؟!

-يبقي أنتي مش بتحبيني !

-اووف بطل سخافة 

قعد.زياد يهزها وقال:

- انتي عمرك ما حبتيني...عمرك صح 

زقته وزعقت :

-ايوة انا مش بحبك ...مش بحبك واتجوزتك عشان فلوسك!!!

يتبع 

#زوجة_بالإكراه

#سولييه_نصار

كده فاضل بارتين شوية هنزلهم بإذن الله ❤

الجزء الرابع ❤❤شكرا على تفاعلكم السكر❤❤بقلم سولييه

حطت مريم ايدها علي بوقها زي ما يكون عرفت هي قالت ايه في عصبيتها...ابتسمت وقالت بتوتر:

-حبيبي احنا ليه بنتخانق  انا والله بحبك عشان دايما بتنفذ طلباتي لكن مش تتغابي وتقول مش عايز الثروة....ثروة زي دي هترفعنا فوق فوق اووي ...انا مخدمتش جدك عشان سواد عيونه يعني

-انت افتكرت انك بتحبيه عشان كده ساعدتيني في خدمته وفي وده

-وانا هحبه علي ايه ...هو مفروض يحبني ويديني ثروته عشان انا متجملة عليه بخدمتي ليه ...وبدل ما يكتبلي الثروة عايز يكتبها لحفيده ورغم كده جيبتله حفيد اهو 

-آية اللي جابت مش انتي 

-يا حبيبي آية مجرد أداة ...لكن هي مش هتبقي ليها اي لازمة في حياة البيبي....هي بس هتبقي الدادة بتاعته لان الغبية بتقول مش عايزة تبعد عن ابنها 

-عشان هي واحدة سوية يا مريم عندها غريزة الام قوية ....مش زيك عمتها الفلوس 

-وعشان هي كده شوف هي فين وانا فين ...قبل ما تيجي هنا كانت مجرد شحاتة ابنها ضاع منها وجوزها رماها ...لكن انا في مستوي كويس مع راجل بيحبني ...عايشة حياتي احسن منها مليون مرة ....يبقي انا اللي صح 

هز زياد رأسه وقال:

-مفيش فايدة فيكي يا مريم الفلوس عمتك بس هتيجي في يوم وتخسري كل حاجة بما فيهم انا وساعتها متلوميش الا نفسك 

-قصدك ايه 

-مريم انا بفكر  جديا في الطلاق ...مش قادر اعيش في الوهم اكتر من كده ...انا حبيتك ...عشقتك بس انتي لا ...كل اللي همك الفلوس ...جشعك خلاني انفر منك ...صحيح بحبك بس بطلت احترمك

ضحكت مريم بتريقة وقالت:

-برافو يا زياد ...لا حقيقي برافو تمثيلية حلوة اووي ....هي الفلتانة اللي فوق لفت عليك بالسرعة دي ....هي اللي اقنعتك تطلقني وتلهفوا الفلوس لوحدكم

-احترمي نفسك دي قريبتك وبعدين اية ملهاش علاقة 

-لا الكلام ده قوله لحد غيري ....انا مريم يا زياد ...عارفاك ...انت شايفلك شوفة...وقررت تبدلني بالشحاتة دي اللي انا كنت بديها هدومي القديمة

بصلها بغضب وقال عشان يغيظها :

-خلاص يا مريم اعتبريني هدوم قديمة وارميني ليها 

ابتسمت بشر وقالت:

-خلي جدك يتنازلي عن الثروة وغور انت وهي ...بس طبعا متنساش المؤخر 

-بجد مش قادر اصدق ...انتي ازاي كده ؟!

- انا اللي مش قادر اصدق ازاي الفلتانة دي لعبت عليك ....ليه حق  جوزها يرميها تلاقيها شم....

ضربها بالقلم جامد وقال :

-دي مراتي زيك فاحترميها

- انت بتضربني يا زياد عشان واحدة زي دي ؟!

-وخدي الكبيرة بكرة هجيب المأذون ونطلق واديكي حقوقك وهعيش معاها ....واخبطي دماغك في الحيط يا مريم

بعدين سابها وطلع ....وشها احمر من الغضب...الشياطين كانت بتلعب في دماغها ...آية قدرت تسرق حياتها ...وهتأخد الثروة لوحدها هي و زياد ...بس لا يا هي اللي تاخد الثروة لاما محدش هيلحق منها حاجة ...

طلعت السلالم بسرعة وراحت أوضة آية ...

......

كنت بصلي وبدعي ربنا يتمملي علي خير لما لقيت حد شدني من شعري جامد ...صرخت لقيت مريم بتزعق فيا:

-وعاملالي فيها الخضرا الشريفة يا روح امك ...بي الحق عليا اني دخلت واحدة فلتانة زيك بيتي

- مريم فيه ايه انتي اتجننتي

شدتني من شعري وقالت :

-هتشوفي الجنان علي اصله 

وبعدين طلعنا من الأوضة وانا بصرخ  ...

- انا هعرفك ازاي تحاولي تحطي ايدك علي فلوسي وجوزي

قالتها مريم بجنون بعدين زقتني جامد ووقعت علي السلالم....راسي اتخبطت علي الأرض وآخر حاجة حسيت بيها الم شديد في بطني والدم مالي وشي !!

يتبع 

#زوجة_بالإكراه

#سولييه_نصار

كده فاضل الجزء الاخير يا سكاكر❤❤

الجزء الاخير ❤شكرا على تفاعلكم السكر ❤بقلم سولييه نصار❤

فتحت عيني بتعب كنت حاسة بألم في كل جسمي ...فجأة افتكرت اللي حصل ....اقتكرت مريم لما زقتني علي السلالم ....فتحت عيوني بصدمة ...ابني اكيد حصله حاجة ....قمت وصرخت ....جه زياد بسرعة وحضنني...بعدت عنه وانا بقول بجنون:

-ابني يا زياد ....ابني حصله ايه 

بصلي بحزن فمسكته من قميصه وقولت :

-قولي ...انطق

-انتي اجهضتي البيبي 

دموعي نزلت وقعدت اصرخ جامد ....صحيح معداش عليه شهر في بطني بس ده حتة مني ...حتة من روحي قبل مت تكون من جسمي ودمي ....حضني زياد جامد وانا ببكي ...نومني علي السرير وهو بيقول بحزن :

-ارتاحي انتي دلوقتي ...وضعك كان خطير بس الحمدلله قدروا ينقذوكي ..بس البيبي مات 

دموعي كانت بتنزل لوحدها ....بصتله وانا بقول :

- هي ليه عملت كده يا زياد ...هي اللي سعت عشان الطفل ده اللي خلاها تقتل ابني ليه ...وفلوس ايه اللي قالتلي حاطة ايدي عليها ...مش فاهمة 

اتنهد وقال :

- مريم كانت عايزة البيبي عشان الفلوس ولما قولتلها هطلقك قالت تخرب الليلة كلها ويبقي لا هي ولا انا 

بصتله بصدمة وقولت :

-تطلقها؟!!ليه تطلقها ؟!انت بتحبها وهي كمان...

-هي مبتحبنيش وانتي عارفة كدة كويس ...مريم بتحب فلوسي ولما واجهتها ما انكرتش

مسحت دموعي وقولت:

-وطبعا كنت انا الضحية الوحيدة اللي اشترتوني بفلوسكم ...تعالي يا آية اتجوزي جوزي وخدي مليون جنية وقبلت عشان الحوجة مرة ...والفقر قاسي ..بسبب اني بموت كل يوم وابني مش في حضن ...بموت وانا عارفة ان ابني في حضن ست غيري بيقولها امي. ...وخلاص. اللي انتوا عايزينه مني بس. الهانم مش عايزة ابني فرمتني من فوق السلالم زي  لعبة ملهاش لازمة....انا مش لعبة ...اه بعت نفسي ليكم بس هي استغلت حاجتي ...استغلت حقارة طليقي معايا ....وفي الاخر قتلت ابني 

حطيت ايدي علي وشي وبدأت ابكي ...طبطب زياد عليا وقال :

- انا هعوضك

بعدت ايدي وانا بقول :

-هترجعلي ابني اللي مات يعني؟!

-هرجع حقك ....مريم هتتعاقب...ده وعد يا آية ...

كل اللي عملته مريم فيكي هتاخد عقابه 

......

وزياد نفذ وعده رفعنا قضية علي مريم ...وبشهادتي قدرنا نثبت جريمتها(شروع في قتل ) ...زياد مترددش انه يستخدم كل محامينه عشان يجيبولي اقصي عقوبة ليها واللي كانت السجن المؤبد ....يوم نطق الحكم مكنتش عارفة افرج لان حقي وحق ابني رجع ولا ابكي واحزن عشان حياة مريم اتدمرت بالشكل ده ..قلبي كان واجعني عليه لدرجة طلبت من زياد يتصرف ويخرجها بس رفض وقال دي اخرة الطمع 

.....

بعدها عشت مع زياد في بيته كزوجة ..

زياد اعترف انه بدأ يميل ليا وعايز يعيش معايا كل حياته ...حتي جده حبني ...وقدرت اسدد ديوني 

....الحاجة اللي كانت ناقصاني هي ابني بس في يوم حصلت حاجة عمري ما اتخيلها....كرم اتسجن بسبب تجارته في المخدرات تحت اسم شركته الصغيرة ...واضطر ساعتها يتنازل عن حضانة الولد ...كنت مذهولة وانا بشوف حقي بيرجع.لحد عندي ..صحيح ربنا دخلني اختبارات كتير بس عوضني بطريقة انا مكنتش اتخيلها ابدا ...زوج محب وابني في حضني وديوني سددتها...والخبر الأخير ناوية اشاركه دلوقتي مع  جدي وزياد 

.....

-خير يا ايوش جامعانا كده ليه 

ابتسمت لجدي وزياد وقولت :

-فيه خبر حلو ليكم

- ايه هو 

- انا حامل 

- ايه 

قالوها الاتنين سوا 

- انا حامل

قرب جدي وباس علي راسي وعيونه مدمعة وقال :

- انا مبسوط ان هيبقالي حفيد غير كريم ...انا هكتبلك ثروتي كلها يا آية ...كل حاجة هتكون ليكي 

- لا يا جدي 

- لا ايه في حد يرفس النعمة 

- انا مش برفسها...بس حابة نستخدمها في حاجات احسن 

بصلي زياد بفخر فقال جدي :

-زي ايه مثلا 

-في ناس كتيرة مديونة يا جدي ...فيه ناس مهددين بالسجن لا مدفعوش وده مسبب ليهم رعب احنا لازم نساعدهم مش ربنا بيقول بسم الله الرحمن الرحيم (إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ فَرِيضَةً مِنَ اللَّهِ وَاللَّهُ عَلِيمٌ حَكِيمٌ ﴾ فيه ناس كتير محتاجة الفلوس دي اكتر مننا احنا...والغارمين برضه يا جدي متعرفش اصحاب الديون بيكونوا مهمومين ازاي ...خايفين في كل. وقت  يدق فيها باب بيتهم انا عشت الرعب ده ومش عايزة حد تاني يعيشه 

-بارك الله فيكي يا بنتي....انتي جوهرة والله يا آية ...ايه رايك تتطلقي من حفيدي وتتجوزيني انا.

- ايه يا جدي يا جدي مالك عايز تاخدها مني وقدامي طب احترم وجودي 

ضحكت انا وجدي عليه ...بصلي جدي وقال :

-حاضر يا آية هخصص  نص فلوسي الصدقات بس الباقي ليكي انتي و زياد وكريم وحفيدي اللي جاي فاهمة ...

هزيت راسي فقال بحماس:

-انا رايح العب مع كريم شوية عن اذنكم

مشي جدي فقرب زياد مني وقال:

-شكرا 

- علي ايه 

- علي انك دخلتي حياتي يا آية ...علي انك حبتيني ...انا بشكر ربنا كل يوم عليكي ...انتي جوهرة فعلا 

ابتسمت بكسوف فشالني وقال :

-ما تيجي نلعب شوية 

-زياااااد بطل قلة أدب 

ضحكنا انا وهو ولف بيا ...الحياة اخيرا بقت حلوة ❤

تمت 

#زوجة_بالإكراه

#سولييه_نصار

شكرا علي تفاعلكم السكر يا سكاكر ويارب دايما تكونوا متفاعلين كده ❤