 |
البارت 13✨
زين: ينهار مش فايت، كل ده حصل امته؟؟
#...........
زين: سلام سلام انا هتصرف
خديجه: حصل إيه؟؟
زين: مشكله في المعدات بتاعت الشغل
خديجه: طيب هتعمل ايه؟؟
زين: محمد هيرجع من السفر بكرا وهنتكلم وهتتحل بإذن الله
خديجه: معلش يازين لغبطلك شغلك
زين بإبتسامة: فداكي اي حاجه يا ديجا
وبعدين انتي باين عليكي إنك عاوزه تنامي
ف ريحي نفسك شويه علشان الطريق طويل
خديجه: لا لا انا مش عاوزه انام
زين بهزار: هصدقك واكدب عنيا حاضر
قعدنا نتكلم شويه وانا بقاوم النوم بس مقدرتش ونمت ومحستش بأي حاجه
زين: خديجه خديجاااااااااا
خديجه بخضه: إيه في إيه كنت باخد قيلوله
زين بضحك: دي غيبوبه مش قيلوله
خديجه: اصل نمت ساعتين بس امبارح
زين: طيب فوقي كده وكلي حاجه قربنا نوصل
_______________________________
حمزه: انتي إيه إللي طلع السفر في دماغك دلوقتي؟؟
ياسمين: ماما وحشتني
وانا زهقت من القعده لوحدي وانت مشغول علي طول
حمزه: إيه الجديد ما انا علي طول مشغول
ياسمين: ايوه بس مكنتش بتشتغل في البيت...وكمان انت رفضت إني اشتغل و...
حمزه: اوعي تكوني بتعملي المشكله دي علشان تفتحي موضوع الشغل تاني
ياسمين: انت قصدك اني بتحجج صح!!!
لاحظ إنك بتكبر الموضوع وانت بتتناقش هااا
حمزه: طيب ما تروحي تقعدي مع زين وخديجه
ياسمين: ما زين سافر مع خديجه أصلا
حمزه: اممم علشان كده طلعت في دماغك فكره السفر صح؟
ياسمين: لا ياحمزه مش صح، انا زهقت من الروتين ومن شغلك إللي مش بيخلص
اخر مره خرجتني كان امته هاا
حمزه:........
ياسمين: طبعاً مش هترد ما انت اهم حاجه عندك الشغل وبس... ده انت حتي بطلت تتكلم معايا وتسمعني
حمزه: اسمع ايه؟؟
عاوزني أسمع كلامك عن الجيران وصاحبك وكورساتك!!! دي حاجات هايفه ومتهمنيش
ياسمين بحزن: عندك حق
اللي الحاجات اللي بتفرحني وتزعلني ومهمه عندي متهمكش... انت صح
حمزه بهدوء: خلاص هنفذلك إللي انتي عاوزه وهاخد اجازه يومين وهسفرك
مبسوطه كده؟
ياسمين: مش مهم بقا.... تصبح على خير
________________________________
منار: انا لازم أمشي دلوقتي
عبدالله: ليه!! لسه بدري
منار: عندي كذا حاجه عاوزه اخلصها... سلام
دخلت البيت وكان بابا بيتكلم مع امي وشكلهم بيتكلمو في موضوع مهم
علي: تعالي يابنتي عاوزك في موضوع
منار: موضوع إيه يا بابا
علي: عبدالله طلب إيدك مني
حاولت ابين اني عاديه وادري فرحه قلبي اللي باينه علي ملامحي اصلا
منار: طب وحضرتك رأيك إيه
علي: عبدالله زي ابني وبحبه طبعآ
لكن موضوع الجواز ده رائيك انتي كمان مهم
منار: هو محترم جداً ومتدين واخلاق وحنين علي امه واخته بس برضو لازم افكر
علي بإبتسامة: هستني ردك عليا بكرا
كان لازم استني لحد ما عمتي تفوق من تعبها شويه، وكمان مابنش إني هموت عليه اوي يعني
زين وخديجه وصلو واطمنو علي مامتها وارتاحو من الطريق وبعد كده وصل حمزه وياسمين علي بيت زين علشان يرتاحو من السفر
خديجه: طمنيني عليكي يا أمي
سميره بتعب: احسن دلوقتي الحمدلله
خديجه: وانا هفضل قاعده كده واخد بالك من علاجك ومن اكلك وهتبقي احسن كمان
سميره: متقلقيش عليا
خديجه بهزار: مقلقش ازاي يعني وانتي مش بتاكلي كويس كده
وكنتي بتتريقي عليا هاااا...بصي مش هسيبك غير لما تجري ورايا زي الأول
سميره بضحك: اطلعي برا يابت
سمعنا صوت ناس جت ف خرجت اشوف مين
لقيت خالتي وبناتها منه و هاله
وياسمين وحمزه
سلمت عليهم وقعدنا كلنا ومنار كانت موجوده
منه: بإذن الله هتكون احسن وانا هاجي كل يوم اقيس الضغط والسكر واطمن عليها بنفسي
عبدالله بإبتسامة: معلش يا منه هنتعبك معانا.... بس احنا عندنا كام دكتوره يعني
منه بكسوف: ربنا يخليك يا عبدالله ربنا يعلم انها غاليه عندي زي ماما بالظبط
زين: وانتي دكتوره ايه
منه: دكتوره صيدلنيه بس كان نفسي اكون مهندسه
حمزه بهزار: قولي الحمدلله ده ربنا رحمك
منه بضحك: هي صعبه اوي كده
زين بهزار: والله حتي شغلها صعب
عبدالله بضحك: بس انا بحبها
لو كنتي دخلتي كنت هساعدك
منار بصوت واطي: هو اخوكي بيساعد كل الناس كده
خديجه: مش عارفه
خديجه بصت ل ياسمين وقالتلها: هو اخوكي جاي يتطلع كبته من شغلها هنا ولا إيه
ياسمين: وانبي سبيني لما اشوف اخره استاذ حمزه إللي مش مبطل ضحك ده
خديجه: وانتي اي اخر اخبارك بقا يا منوش
منه: والله خالتك عاوزه تخلص مني بس انا برفض العرسان
منار: ليه كلهم مش عاجبينك يعني!!!
منه: اصل انا عاوزه واحد چينتل مان كده ياخدي القاهره
وبصت علي زين وعبدالله وكملت كلامها: ويكون دمه خفيف و بينا حاجات مشتركه
منار بغيظ: لما اقوم اخد عينها دلوقتي هيجري حاجه يعني!!!
خديجه بصوت واطي: اهدي بس علشان انا بفكر امو_تها إزاي دلوقتي
ياسمين: مالكم هتولعو كده ليه!!
حمزه: طب افرض قالك متشتغليش بقا هتعملي ايه
منه: هوافق طبعاً
انا أصلا مبحبش اتعب نفسي
ياسمين: هتسكتو البت دي ولا اقوملها انا
خديجه: اهدي يا حبيبتي هتولعي ليييه
ياسمين: انتي بتردهالي مااااشي مااااشي
منار: اصبرو انا هتصرف
ياسمين: ورينا
منار: اه صح يا منه عمتي كانت بتسأل عليكي علشان تسألك علي حاجه
منه: طيب هدخل اشوفها
هي دخلت وكل هما قعدو ربعو إيدهم وبصو بشر
حمزه بصوت واطي: هي اختك بتبصلي كده ليه يا زين
زين: مش عارف
بس هي اختك بتبصلي كده ليه يا عبدالله
عبدالله: مش عارف برضو
بس سبحااااانه دي نفس بصه منار ليا
خديجه بصوت واطي: تيجي ننفذ خطه 601
ياسمين: خطه ايه دي!!
منار: مش مهم هنقولك بعدين
اتفقنا يا ديجا
خديجه: ربنا معاهم بقا
منه: إيه رأيكو في المفاجأة دي يا جماعه
خديجه ومنار بدهشه:................
#يتبع
البارت 14 ✨
منه: إيه رأيكو في المفاجأة دي يا جماعه
خديجه ومنار بدهشه: كريم!!!!!
كريم: ايه رأيكم في المفاجأه دي
خديجه: حمدلله علي السلامة، مفاجأة حلوه طبعا
منار: اي المفاجأة الحلوه دي انت جيت امته؟؟
منه: هو وصل امبارح ولما عرف أن خالتو تعبانه قال لازم يجي يطمن عليها
استوب كده نعرف مين كريم... " ابن خاله خديجه... 28 سنه خريج تجاره وسافر الكويت يتشتغل وبينزل اجازات مش كتير
طويل وجسمه رياضي ومختلف عن شباب العيله لأنه ابيض وعينه سودا حاجه احمد عز كده*
زين بصله من فوق لتحت باستغراب: متعرفناش، مين الاستاذ
خديجه: ده كريم ابن خالتي بس هو دايما مسافر... اكتر واحد دمه خفيف
زين: اهلاً
منار: هو فعلا بيحب الهزار وجدع مع كل الناس
عبدالله: علي فكره انتي معملتيش حاجه نشربها ولا هنقضيها كلام ولا إيه
كريم: وانتي اي اخبارك يا ديجا لسه شاطره في كليتك ولا لأ
قبل ما ارد لقيت زين اتكلم: اكيد لسه متفوقه وانا مش هسمح بإقل من كده دي مراتي برضو
خديجه بعند: انا بحب دراستي ودي ملهاش علاقه بإننا كاتبين الكتاب
وكريم عارف عني كده
كريم: اه طبعاً من زمان وانا بذاكرلك وانتي ذكيه
ياسمين همست ل خديجه: خلي بالك علشان زين بيطلع نار من عينه وودنه كمان
خديجه: احسن احسن يستاهل
ما كان قاعد بيتكلم مع ست منه ومبسوط اوي
كريم: اه صح يا خديجه معرفتنيش بالأنسه
كان باصص علي ياسمين وحمزه بصله بغيظ وقال: ياسمين تبقا مراتي واخت زين
كريم: معلش مأخدتش بالي من الدبله
بس هما شكلهم صغيرين في السن ومحدش يتوقع انهم متجوزين
زين: وانت بقا مفكرتش تتجوز ليه
كريم: لسه بدور علي بنت الحلال إللي تستحمل شغلي وسفري
منار بهزار: ومين بقا هتوافق إنك تتجوزها وتسافر؟؟
كريم: عادي ممكن تسافر معايا
منار: إذا كان كده يبقا يبختها بقا
عبدالله بحده: يابختها ايه!!
دي بهدله ومفيش استقرار وبعدين ده انتي بتقولي عاوزه اتجوز جنب اهلي ولا غيرتي كلامك دلوقتي؟؟
قبل ما ارد عليه ام كريم( سعاد) قالت أن الغدا جاهز ف الرجاله هايروحو ياكلو مع بعض والبنات مع بعض
خديجه: بصو انا عاوزكم هادين وثبات انفعالي رهيب مع شويه تجاهل كمان
ياسمين: يعنى مش هنعاتبهم علي كلامهم مع اللي اسمها منه!!!
خديجه:ولا كأن حاجه حصلت
احنا هنخليهم هما إللي يفتحو الموضوع مش احنا
منار: يعني اصدر الوش البار*د
خديجه: ايووه بالظبط كده
ياسمين: اتفرجو عليا بقا في الامبالاه
خديجه: إبهروني
خلصنا الاكل وعملنا الشاي والحلويات
زين دخل يسأل علي الشاي وهما سابونا خرجو
زين بحده: جهزتي الشاي
خديجه بهدوء وشبه ابتسامه: دقيقه ويكون جاهز
هو واقف باصص عليها وهي عامله نفسها مش مركزه معاه
خديجه: هو حمزه سكره خفيف ولا مظبوط
زين بغيظ: زياده
عملت نفسي مش واخده بالي من اسلوبه
زين: وانتي عارفه كريم بيحب السكر ايه؟
رديت عليه ببرائه: اه بيحبه مظبوط
زين: اه ما انتي حافظه بيحب ايه وبيكره ايه وكان بيذكرلك كمان
خديجه: طب وانت متعصب ليه؟؟
زين: انا مش متعصب انا مستغرب من كلامك معاه وانا مش حابب كده
خديجه بعصبيه: وانا بكلمه في حدود الأدب وبحكم انه ابن خالتي
زين بنرفزه: طب ما انتي زعلتي لما اتكلمت مع منه في حدود الأدب برضو
خديجه بهدوء: ومين قالك إني زعلت ما انا بكلمك عادي اهو ومش مضايقه
زين: يعني أنتي متضايقتيش من كلامي معاه؟؟؟
خديجه: لأ خاااااالص، انت كنت بتكلمها عن الشغل ف عادي يعني هزعل ليه!!!!
زين بعصبيه: ماشي ياخديجه
هاتي الشاي
خد الصنيه وخرج وانا فكرت في الكلام تاني هو فعلاً كلمها في الشغل وصعوبه هندسه وكده انا بقا كنت هولع ليه لما شوفته بيبتسم وبيتكلم معاها!!!!
عقلي: طب ما هو كمان اتعصب لييه لما كلمتي كريم!!!!!
وانا بفكر دخلت منار وياسمين وبدءنا نتكلم عادي و منار قالت هتدخل الحلويات
قبل ما تدخل وقفها عبدالله: أهلا بالاستاذه اللي حبت السفر فجاءه
منار: انا!!!!!
مين قال كده
عبدالله: ما انتي اللي قولتي يابخت إللي هتتجوزه علشان هتسافر والكلام الفارغ ده
منار: عادي في بنات بتحب السفر
انت مالك بقا؟
عبدالله: بس انتي قولتي عاوزه تفضلي هنا مع اهلك
منار: ايوه قولت كده.... بس هيحصل ايه يعني لو غيرت رائي مثلا!!!!
عبدالله بنرفزه: وتغيري رائيك ليه ومن امته الكلام الجديد ده بقا
منار بهدوء: هو انت يهمك في حاجه اغير رأيي ولا لأ
كان نفسي في الوقت ده يقولي اه يهمني لأن طلبت إيدك من ابوكي...يحسسني أنه عاوزني وشاريني بجد مش مجرد بنت خاله وهيتجوزني وخلاص... كنت عاوزه اشوف نص حبي ليه في عينه... يقولي انتي تهميني
عبدالله: انا مستغرب تغير رأيك
انتي لما بتقولي حاجه صعب تغيرها ومحدش بيقنعك بحاجه غير لما تفكيري فيها كويس
هاتي إللي في إيدك يا منار وادخلي جوا
برضو مقالش تغير رائي يهمه ولا لأ.... اه لو تعرف إني من ساعه ما قلبي عصاني وحبك وبقيت بعمل حاجات منغير تفكير ولا حتي بهتم عقلي مقتنع ولا لأ......
خديجه: مالك مكشره ليه
منار: محدش هيمو_تني من الغيظ غير اخوكي
خديجه: هو ده الثبات الانفعالي إللي اتفقنا عليه!!!
منار: ما انا كنت هاديه قدامه بس بغلي من جوا
ياسمين: يارب اعرف اعمل كده
طلعنا قعدنا واطمنت علي ماما واخدت العلاج ونامت وياسمين قالت هتتطلع تتمشي قدام البيت شويه
حمزه: اهلا انسه ياسمين
حاولت اكتم ضحكتي واتكلمت بهدوء: سايبهم وجاي هنا ليه
حمزه: شوفتك خارجه برا البيت فقولت اشوفك لو عاوزه حاجه
ياسمين: لا مش عاوزه حاجه
انا مبسوطه بالجو ف قولت اشم هوا شويه
حمزه: اممممم انا افتكرت اضايقتي من كلام منه
ياسمين: واضايق ليه؟
هي شايفه أن قعده البيت احسن من الشغل هي حره في وجه نظرها
يمكن لو انا في ظروف مختلفه كنت قولت زيها كده برضو
حمزه: ظروف مختلفه إزاي يعني؟
ياسمين: يعني لو جوزي بيقعد معايا وبيهتم بيا
او مش بيضايق من كلامي وبيهتم بالحاجه اللي تخصني مهمها كانت تافهه بالنسباله كنت هشغل نفسي معاه ومش هفكر في الشغل علشان املي وقتي
حمزه: انا مش بهتم بيكي ولا بهتم بالحاجه إللي تخصك ي ياسمين؟؟؟
ياسمين بدموع: اه ياحمزه
انت قولت أن كلامي معاك إزعاج وان الكورسات والكتب بتاعتي حاجات هايفه
وأنك مش فاضي للحاجات دي
حمزه بهدوء: انتي عارفه اني مش بحب اشوفك بتعيطي ودموعك غاليه عليا
ياسمين: المره دي انت السبب في دموعي
حمزه: طول عمري بحب اسمعك وبسأل عن تفاصيلك وبحبها
دايما شايفك انجح واحده وبتطوري من نفسك وفخور بيكي
هتنسي كل ده وتفتكري كلام قولته في لحظه زعل وضغط شغل؟؟!
ياسمين: يمكن علشان اول مره تحسسني أن حياتي ملهاش لازمه
حمزه: أنا إللي حياتي ملهاش لازمه منغيرك ومنغير ضحكتك وصوتك في يومي
صدقيني مكنش قصدي الكلام يوصلك بالمعني ده
كلامه مسح كل الزعل وطبطب علي قلبي ورجعت فرحانه تاني وبشكر ربنا علشان رزقني بيه....بس برضو عملت نفسي زعلانه عشان كنت غيرانه اووي من كلامه مع البنت دي.... رغم انه كان بيتكلم قدامي يعني مش قصده حاجه وحشه
لكن ده ميدهوش الحق يضحك معاها
قبل ما اقول اي حاجه زين نادي عليه
حمزه بهزار: هروح اشوفه عاوز ايه
واجي اشوف القمر حجي لسه زعلان ليه
بيعرف يفرح قلبي بكلمتين والله.....
اتتفقو اننا هنقعد مع بعض في البيت، الرجاله هتنام تحت والبنات هتكون في الدور التاني
هما قعدو مع بعض والبنات طلعو مع بعض يكملو سهرتهم فوق
ياسمين: احنا هنفضل ماشين بخطه التجاهل والامبالاه دي؟؟؟
منار بتفكير: ما تجي نلاعبهم بطريقتنا؟
خديجه بصت لمنار وقالت بحماس: والله فكره حلوه... تعالي نلاعبهم بطريقتنا
ياسمين: ناوين تعملو ايه؟!
خديجه: هفهمك كل حاجه بس عاوزكي تطلعي جدعه معايا وتقوليلي نقطه ضعف زين
ياسمين بهزار: يعنى عاوزني اطلع جدعه معاكي وابيع اخويا!!!!
خديجه: دي حاجه صغيره خالص مش هتبعيه اوي يعنى
منار: طب وانتي هتطلعي جدعه معايا برضو وتقولولي نقطه ضعف عبدالله صح؟؟
خديجه بهزار: استغفر الله العظيم، سامحني يارب
هقولك وامري لله
منار: كده فل اووووي...يلا نبدء
عرفنا نقطه ضعف كل واحد فيهم وبدءنا الخطه......
تاني يوم حضرنا الفطار وخلصنا وقولت ل زين اني عاوزه في حاجه
خديجه: شايف المروحه إللي فوق دي
زين: اه...مالها
خديجه: بقالها فتره مش شغاله مش عارفه ليه.... وطبعاً انت مهندس كهربا شوف مالها بقا
زين: ايوه انا مهندس كهربا مش صبي كهربائي، انتي واخده بالك!!!
خديجه: برضو هتعرف فيها
يلا وريني شاطرتك يا هندسه
بدء يبص للمروحه بقلق وانا عرفت من ياسمين أنه بيخاف من المرواح السقف علشان قبل كده كانت هتقع عليه وكمان مبيحبش يمسك حاجه فيها كهربا وهو واقف علي مكان عالي
زين بقلق: امسكي السلم كويس هاا
خديجه: عنيا طبعاً
زين: مش مرتاحلك والله
حاولت اكتم الضحك واتكلمت عادي:
عيب عليك يا زين
فك دايره المروحه وهو واقف علي السلم
زين: الاسلاك كلها متوصله في مكانها اهي
هي مش شغاله ليه بقا
خديجه: هروح اشغلها علشان نشوف هتشتغل ولا لأ
زين بزعيق: يخرب عقلك هتشغليها ازاي وانا واقف كده
هزت السلم شويه وقالت بهزار: اوعي تكون خايف... والله شكلك خايف
زين: لا لا مش خايف
مستحيل اشغلها طبعا بس علشان هو متوتر ف قلقان زياده ومش عارف يركز
زقيت مج كنت حاطه في الأرض فهو خاف ومسك في السلم جامد وانا بضحك علي ملامح وشه
خديجه: ما الهندسه صعبه يا حبيبي صح هاا
زين: يابنت اللذينه بتردهالي صح
مااااشي يا خديجه لما انزلك
خديجه: ولا هتعملى حاجه
زين: باااس اثبتي بقا علي الجرائه دي وانا هنزلك وهتشوفي هعملك حاجه ولا لأ
______________________________
عبدالله: منار انا عاوز اقولك حاجه
منار: حاجه إيه
عبدالله بتوتر: اصل انا بصراحة كده
منار: هااا
عبدالله: انتي سألتيني امبارح انا اضايقت ليه من كلامك مع كريم صح
منار: حصل
عبدالله: انا اضايقت علشان....
علي: الحقني يا عبدالله بسرعه
البيت كله جري علشان يشوفو حصل ايه
#يتبع
#لعبه #القدر
#موني
قولولي رأيكم وتتوقعو أيه اللي هيحصل معاهم؟؟
تفاعل حلو وهنزل البارت 15
تعليقات
إرسال تعليق