 |
البارت السابع والثامن
عشق الزين
صباحا فى بيت الجارحى
زين بيحاول يقوم من غير ما ليليان تحس ...بس حست بيه قامت وعنيها كلها نوم
ليليان : هو احنا امتى ؟.
زين : احنا الصبح نامى ... نامى ومتروحيش الجامعه انهاردا شكلك تعبان
ليليان :. ماشى
زين : ليليان قبل ما تنامى ... اسم صاحبتك ايه بالكامل
ليليان : اسمها سارة عبد الله .......
*****************
فى الشرقيه
يوسف : بقولك الموضوع يخلص ومحدش يحس بيه .... اصلا فى العريش الامور مش متظبطه فى الامن ماشى
مجهول : متقلقش يا يوسف بيه الموضوع هايخلص وهاتسمع خبر الراجل دا .... مهما كان هو مين دا مياخدش فى ايدينا غلوة
يوسف قفل معاه ولف اتكلم مع ابوة اللى مستنيه بفارغ الصبر
عاصم : ها ؟ هايخلص امتى ؟
يوسف : يابابا الناس دى ليك انك تقولهم وهما عليهم امتى وازاى ملناش دعوة
شاكر دخل عليهم وهما سكتوا
شاكر : ايه سكتوا ليه ياعاصم انت وابنك
عاصم : لا سكتنا ولا حاجة .... دى امور عائليه بقا يا اخويا
شاكر : اه ..... وبعدين بقا ياعاصم فى البت المخفيه دى الموضوع بيزيد وبيطول ومحدش عارف هى فين
عاصم : والله انا مش ساكت حتى الواد يوسف قالب الدنيا عليا زى مايكون فص ملح وداب
شاكر : لو مكنتش امى بس كتبت كل حاجة باسم فارس وفارس استنصح وكتب هو كمان كل حاجة باسم بنته مكنش دا كله حصل
عاصم : بطل بقا تفتح فى ام السيرة دى كل شويه عفاريت الدنيا بتتنطط قدامى كل ما افتكر اللى حصل
شاكر : اعمل ايه ياعنى بلاش اتكلم مع حد ...... حتى ابنى ربنا مخيبنى فيه مش شايل الهم معايا زى يوسف ابنك ماهو شايله معاك
يوسف بخبث : احسن ياعمى عبد الرحمن قلبه ضعيف وطيب وبعدين دا دكتور فى الجامعه خليه هو فى شغله وانا معاكوا اهو مكانه ..... واول ما اوصل للبت هانجيبها ونجوزهاله على طول خليه نايم فى العسل كدا
عاصم ابتسم على ذكاء ابنه اللى قدر يثبت عمه ويسكته
*****************
فى القاهرة
زين فى عربيته رايح على الشركه وامرهم يطلع على مكان الاول قبل الشركه والمكان دا كان مخزن قديم
زين : الحيوان دا فين
واحد من رجاله زين : متكتف جوا وعمال يصوت زى النسوان
زين دخل لعمر لقاه مرمى على الارض ومتبهدل من كتر الضرب
عمر بغضب : انت مش عارف اللى عملته دا هايحصلك ايه بسببه
زين بتريقه : ايه اللى هايحصلى احكيلى كدا عشان اتخيل
عمر زعق : ابويا مش هاسيبك يا حيوان
زين عينه احمرت : انا حيوان !!!؟ وابوك مين دا اللى مش هايسيبنى ؟ طب تصدق والله لاجيب ابوك هنا قدامك ويشوفك وانت بتنضرب ياروح امك ويترجانى وانا هارفض ايه رايك ؟. بس لازم تتربى الاول بس على ايدى
زين قرب منه ومسكه من هدومه ووقفه : انت عارف قربت من مين ؟ انا اقولك قربت من مراتى ؟ عارف انا ممكن احرق اللى يبصلها ويفكر فيها ؟ عارف بقا انت عملت ايه انت مسكتها و ضربتها كمان لا وبتعترف وجرئ .... انت بقا متخيل انا هاعمل فيك ايه انت وابوك انا هاحرقكم مش هاخليكم تسوووا حاجة ... مفترى انا صح
زين قرب من ودانه : انا كل ما افكر اضربك مالقيش مكان اضربك فيه بس الصراحه رجالتى عملوا اللى عليهم وزيادة ..... انا مش هاضربك انا لايمكن اوسخ ايدى فى واحد زيك صايع وبعدين انا مش عيل علشان العب مع عيل زيك انا هالعب مع ابوك راجل وانا راجل
زين زقه على االارض ونادى على رجالته : الواد يتمنع عنه الاكل والشرب وابقوا سلموا عليه كل نص ساعه مثلا
*********************
فى شركه الجارحى
زين دخل الشركه والغضب لسه جوا واقسم انه هايعاقب كل الى غلط اليوم دا
سهيله شافته كدا وخافت وارتبعت منه منه : استر يارب
زين :اهلا سهيله هانم اهلا
سهيله : احم زين ب....
زين : هشششش اسكتى اسكتى خالص ..... بقا انتى يا حيوانه حد يتصل بيا يقول عاوزنى ضرورى تردى على لسانى ومن دماغك
سهيله : ياباشا حضرتك كنت فى اجتماع مهم وانا خفت اقولك تعاقبنى وتزعقلى .... ارجوك يا باشا انا غلطت سامحنى وبعد كدا لو غلطت تانى وكررتها عاقبنى زى مانت عاوز
مراد دخل وانقذ سهيله من غضب زين
مراد : زين عاوزك
زين : اخرجى ودا اخر انذار ليكى وخليكى فاكرة انتى اللى حكمتى على نفسك
سهيله خرجت بتتنفس : الحمد لله يالهوى كنت هاموت الحمد لله عدت على خير
عند مراد وزين
مراد : انا سالت على البت دى وهى كويسه مفيش عليها اى غبار وامها بتشتغل فى مدرسه وابوها محاسب فى دبى وواخد اخوها معاه .... الدنيا تمام متقلقش
زين :تمام كدا .... عملت ايه فى موضوع الليثى
مراد : انت مقرتش الجرايد اسهم شركاته وقعت فى الارض
زين : ملحقتش كنت بصبح على ابنه
مراد: تلاقيه جاى دلوقتى يترجاك على ابنه عمله
زين : انا مبعملش كدا عشان حد يترجانى انا بعمل كدا عشان ابنه غلط مع اللى مينفعش حد يغلط معاها وبعدين ابنه مش متربى فقولت اتولى المهمه دى واربيه انا
مراد : ههههههههه ياجدع اقنعتنى والله
سهيله خبطت ودخلت : زين باشا رجل الاعمال محمد الليثى عاوز حضرتك ضرورى
زين : خليه يدخل
مراد: العب يا كبير
زين : طيب طير انت بقا ... علشان العب براحتى .
الليثى دخل وكان مرتبك ومش عارف يقول ايه .....زين الجارحى مش ممكن يسامحه ابدا ولا هو ولا ابنه
محمد الليثى : باشا انا جاى اعتذرلك على اللى عمله ابنى اعتبره عيل وغلط
زين: اممممممم اعتذراك مقبول
محمد الليثى بفرحه : بجد يا باشا ده ولد صايع تلاقيه بس ميعرفش انها مرات حضرتك
زين : يعرف ولا ميعرفش مش فارقه ..... بس قولى انت جاى عشان افرج عنك ابنك وارحمه من اللى بعمله فيه ولا عشان الاسهم بتاعت شركاتك اللى وقعت .... بس مظنش انك تفكر فى مصلحه ابنك ... انت لو بتفكر للحظه فى مصلحته مكنش دا بقا حاله
محمد الليثى : ياباشا العقاب شديد اوى عليا وعلى ابنى
زين : لا بالعكس انا شايفو عادى جدا .... طب اقولك انا ممكن درجات العقاب عندى توصل للقتل بس انا مرضتش حرام دا شاب بردوا وزى مانت قولت صايع وعاوز يتربى ... وانا ربيته بما فيه الكفايه
محمد الليثى : بس ياباشا.....
زين : خلاص المقابله انتهت واللى عنده قولته فرصه سعيدة
محمد الليثى بغل : انا اسعد ياباشا .... متشكر
زين بابتسامه صفرا : لا العفو على ايه بس
*****************
فى بيت الجارحى
ليليان : صباح الخير يا دادة
دادة سميحه : هههههه صباح الخير ايه يس قولى مساء الخير دا كله نوم
ليليان : مش عارفه جسمى متكسر ... يمكن من جو الاكشن اللى عشت فيه امبارح .... هو زين فين
دادة سميحه : زين خرج من الصبح راح الشركه
ليليان : طيب هاروح اذاكر بقا شويه .... الا قوليلى يا دادة هو انتى معاكى تليفون اعمل مكالمه
دادة سميحه باستغراب : عاوزة تكلمى مين ؟
ليليان: هاكلم سارة صاحبتى هاشوف عملت ايه فى الجامعه انهاردا
دادة سميحه : امممم خدى اهو
ليليان: شكرا يا دادة
ليليان اخدت التليفون وراحت طلعت الكتاب اللى سارة كاتبلها فيه رقمها واتصلت بيها
سارة : الو
ليليان : الو ازيك يا سوسو
سارة : ليليان يخربيتك بتكلمينى من فون مين اوعى يكون المز
ليليان : ههههههه لا ياختى مش المز لسه مجاش .... دا تليفون دادة سميحه
سارة : الله عندكو دادة زى الناس الاغنيا هههههههههه
ليليان : ههههههههههعه والله انتى هبله.... قولى انتى عملتى ايه فى الكليه انهاردا
سارة : عملت كل خير ومادة الدكتور نادر مسكها دكتور ارخم منه وقال ايه ياختى عاملين امتحان فيها بكرا
ليليان : يادى النيله ....انا مفهمتش حاجة فى المادة دى امتحان ايه بس
سارة : بقولك ما تكلمى زين يكلمهم يلغى الامتحان.... لا اقولك كلميه يلغى المادة اصلا
ليليان : انتى هبله ههههههههه يلغى ايه بس
سارة : اشطا خلينا نسقط هههههه دا حتى السقوط جميل ولذيذ
ليليان بضحك : ههههه انتى بتضحكى ولا همك حاجة
سارة : ياختى اضحكى محدش واخد منها حاجة
ليليان: صح... انا هاقفل واشوفك بكرا فى الامتحان
******************
ليليان قفلت التليفون لفت لقت زين واقف وراها حاطط ايدة فى جيبه
زين : كنتى بتكلمى مين ؟
ليليان اتوترت من موجودة المفاجئ : كنت بكلم سارة بسألها على المحاضرات
زين : اممممممم وجبتى التليفون منين
ليليان : تليفون دادة سميحه
زين : طب وكلمتيها ليه مش منبه عليكى هاسأل عليها الاول
ليليان : وسألت ؟ كويسه صح ؟ والله هى طيبه وجدعه
زين : امممم كويسه
ليليان : الحمد لله اكلمها عادى صح
زين : اه صداقه جامعه وبس يا ليليان
ليليان : اه طبعا انت هاتقولى صداقه جامعه وبس
زين : طيب عندك امتحان بكرا
ليليان : اه امتحان فى مادة وحشه كدا معرفش متسربعين على ايه
زين : بعد العشا تعالى على المكتب اشرحلك فيها علشان تعرفى تنجى فيها.... انا مش هاقبل بالسقوط ابدا
ليليان : ولا انا على فاكرة سقوط ايه بس وانا بتاعت الكلام دا
زين : اه منا واخد باللى
****************
فى ملهى ليلى
مراد : ايه دا يا كوكو الحلاوة دى انتى شقلبتى المسرح رقص
كوكو واحدة بترقص فى البار : ههههههههه عسل يامراد باشا
مراد : والنبى انتى اللى عسل مش يالا بينا ياقمر بقا
كوكو : اه يالا طبعا..... الا قولى يا باشا هو زين باشا مش هاتجيبوا معاك مرة
مراد : هههههههه لا زين ايه بس ... زين الجارحى مالوش فى الشمال
كوكو : وانت ليك بقا فى الشمال يا باشا هههههه
مراد : ههههههه انا ليا فى الشمال واليمين .... انا ليا فى كل حاجة
مراد اخدها وركب عربيته وهو ماشى لمح بنت بتجرى من مجموعه شباب وقف العربيه ونزل راح ناحيتهم والبنت جريت عليه واستخبت فى ضهرة
واحد من الشباب:. احسنلك سيبها هى كدا دخلت عداد فى الموت
مراد : عداد موت ... واحسنلى .... انت عارف الاول بتكلم مين يا توتو
واحد من الشباب: طب عرفنا يا شبح
مراد طلع مسدسه وضربه فى رجله : عرفت يا توتو
كلهم جريوا واخدوا صاحبهم وخافوا منه
مراد لف ومسك ايديها وراح عند عربيته : اركبى
البنت بصت فى العربيه لقت واحدة قاعدة افتكرت انها مراته: ماشى هاركب شكرا
البنت دى كانت سارة صاحبه ليليان
سارة: احم انا متشكرة جدا
مراد : العفو .... بعد كدا متمشيش فى شوارع ضلمه وفى وقت زى دا
سارة : احم ماشى .... ممكن حضرتك توصلنى لاى اقرب شارع عمومى وانا هاكمل
مراد : لا قولى عنوانك فين انا هاوصلك
سارة : لا والله حضرتك كتر خيرك وعلشان معطلكش انت والمدام
كوكو : اووووف طيب يالا ياختى انزلى ضيعتلنا الليله
مراد: اخرسى يا حيوانه ... انتى مين اذنلك تتكلمى اصلا
كوكو : يالهوى انت بتقلب فى ثانيه ليه اهو انا مبحبكش علشان القلبه دى مالكش امان
مراد وقف العربيه
مراد بحدة : طب انزلى بقا يا روح امك مش عاوز اوريكى القلبه اللى بجد
كوكو وهى نازله : ياخويا انت حر انت الخسران
سارة : احم هو انت ازاى تسمح انها تنزل كدا ... انا السبب اناوعملت مشكله بينكم ... روح نادى على مراتك وانا هانزل
مراد استغرب : مراتى ايه دى واحدة شاقطها .
سارة مصدومه: شا... ايه يا عنيا
مراد : قطها .....شاقطها
سارة : اه يا سافل يا قليل الادب شاقط واحدة ومخلينى اركب معاك وعاملى فيها شهم ايه كنت عاوز اقضى معاكوا الليله
مراد باستفزاز : لو انتى موافقه معنديش مانع .
سارة بغيظ : لا فعلا معنديش... طب تعال بقا .
سارة مسكت مراد من رقبته وعضته فيها جامد
مراد حس بوجع فى رقبته: اه يابنت العضاضه سيبى
سارة سبته وخرجت من العربيه جريت باقصى سرعتها
مراد : اه يابنت العضاضه دى ورمت هو يوم اسود اصلا .... اكيد زين اللى باصصلى فيه
*****************
فى بيت الجارحى
ليليان خبطت ودخلت المكتب لقت زين قاعد وقدامه اوراق بيرجعها
ليليان : ممكن ادخل ؟
زين : مانتى دخلتى اصلا مالوش لزمه تستأذنى
ليليان محروجه منه : احم هى عادة فيا معلش استحملنى
زين قام من على المكتب راح عندها ومسك ايديها واخدها وقعدها على كنبه صغيرة تاخد شخصين وقعد جنبها
زين : ادينى الكتاب
ليليان ادته الكتاب وكانت متوترة جدا علشان قاعدة جنبه بالطريقه دى وفى نفسها : يا نهار اسود هاركز فى كلامه انا ازاى دلوقتى
زين بضحك : متخافيش هاتركزى ههههههههه
ليليان مصدومه : انت سمعت ؟!
زين شدها لحضنه ولف ايدة حواليها وبايدة التانيه مسك ورقه وقلم وبدء يشرح طبعا زين كان قاصد يخليها تتوتر وهو فرحان بقربها منه
ليليان فى الاول مكنتش مركزة بس بعد كدا حاولت واخدت على الوضع وفهمت كويس منه
بعد فترة
زين : ها ؟ فهمتى حاجة ؟
ليليان : اه طبعا فهمت .. بجد انت شرحك جميل ... هو انت ليه مبقتش دكتور فى الكليه
زين : علشان انا مش عاوز ابقا دكتور
ليليان : انت غريب بجد فى حد ميحبش يبقا دكتور فى الجامعه
زين : اه فى انا...... زين الجارحى
ليليان : هههه مغرور اوى
زين : عادى .. مش غرور
ليليان : انت بتخاف تضحك
زين : انتى ليه بقيتى تسالى كتير ... يالا علشان تشربى اللبن وتنامى
ليليان : يالهووى عليا وعلى اللبن فى يوم واحد
زين بحدة : ليليان
ليليان :سكت
*****************
ليليان : زين ممكن تليفونك اتصل بسارة .. نسيت اسالها الامتحان الساعه كام
زين قاعد جنبها على السرير: هاتكلميها دلوقتى ... الوقت اتأخر
ليليان : لا عادى بتسهر
زين : انتو اتصاحبتوا لدرجه انك عرفتى انها بتسهر
ليليان بضيق : خلاص مش عاوز اكلمها
زين : خدى كلميها
ليليان اتصلت على سارة
سارة بتنهج من الجرى : الو
ليليان:سارة مالك بتنهجى ليه كدا
سارة : اصل روحت اجيب لماما دوا من الصيدليه
ليليان : دلوقتى .... الوقت متأخر
سارة : اعمل ايخ كنت لازم انزل وفى شباب جريوا ورايا وفى واحد انقذنى منهم وكنت بحسبه محترم طلع قليل الادب البجح بيقولى فى وشى انه شاقط واحدة
ليليان : نهار اسود وعملك حاجة
سارة : لا متخفيش عضته وجريت غاظنى اوى بس ايه. امور موت خسارة فى الشقط
ليليان : ههههههه مجنونه الحمد لله انك كويسه .... كنت عاوزة اسألك الامتحان دا الساعه كام
سارة : الساعه ٢
ليليان:. ماشى اشوفك بكرا باى
ليليان ادت التليفون لزين
زين : فى ايه مالها صاحبتك
ليليان حكتله وزين ساكت مبيردش عليها
ليليان : لا انت مبتخافش تضحك وبس لا انت بتخاف تتكلم كمان
زين : اممممم بخاف على بوقى يوجعنى
ليليان : لا بجد اتكلم زينا زى الناس العاديه دى حتى فى رياضه اسمها رياضه الكلام
زين: امممم طب تعرفى من وقت ما عرفتك وانا بتكلم كتير
ليليان بفخر : طيب كويس علمتك حاجة ههههه
زين شدها لحضنه : تعالى نامى بقا مش كل شويه اصحى من النوم على صوت كوابيسك دى
ليليان : اسفه مش بايدى الكوابيس دى
زين : نامى وبطلى اسف وشكر كتير
******************
فى الجامعه تانى يوم
سارة: لا قوليلى بجد انتى بتذاكرى من ورايا ازاى حليتى كدا
ليليان : هههههههه والله دا زين اللى شرحلى
سارة : طيب زين دا ليه ميبقاش دكتور ويشرحلنا دا يبقا شرح زى العسل بس تصدقى ممكن نسقط بردوا هانركز فى حاجات تانيه
ليليان اتخيلت زين واقف بيشرح بوسامته وهيبته وشعره اللى بيجننها حست نار فى قلبها : لا كدا احسن خليه بعيد احسن
سارة : اوووو الله اكبر ايه دا ليليان هانم شايفه بتطلع قلوب من عنيها
ليليان : ههههههه مجنونه وربنا عليكى كلام
سارة : اه ياختى اضحكى ليكى حق ..... هو انا مش هاقع على واحد زى زين الجارحى
ليليان بخفوت : تؤتؤ زين الجارحى واحد وبس
**************
فى شركه الجارحى
زين : تمام كدا ياعلى اظن احنا متفقين على البنود
مراد : بس اهم حاجة عندنا الالتزام بمواعيد والبنود
على الباشا رجل اعمال: عيب يا مراد مش على الباشا الى يتقاله كدا
فى الوقت دا ليليان خبطت ودخلت
زين بصلها بحدة علشان دخلت ولقى على بيبصلها اوى
زين بحدة : فى حاجة يا على شايفك بتبص جامد
على الباشا : لا يا زين باشا دا انا ببص على الجمال الربانى دا .... اصل ياباشا الجمال ربنا خلقه علشان نتأمله
مراد بخفوت : الله هاتولع
ليليان اتحرجت جامد ووشها بقا احمر
زين باصلها تخرج وخرجت فعلا وزين قام ولف وراح عند على
زين شدو من قميصه: حسك عينك اشوفك بتلمحها بطرف عينك هانسى اى حاجة ولا شراكه ولا حتى معرفه قديمه
على الباشا : اهدى بس يا زين هى تخصك فى ايه مش دى سكرتيرتك بردوا
زين فهم انه شافها قبل ما يدخل
زين : لا هى مش سكرتيرتى .... هى مراتى
على الباشا بضيق : انت اتجوزت مبروك .. مكنتش اعرف انها مراتك
زين زقه على الكرسى : اديك عرفت
************************
فى الشرقيه
توحيدة : ايمان شوفى مين بيخبط
ايمان : حاضر
ايمان فتحت : عبد الرحمن ايه اللى جابك
عبد الرحمن : ممكن ادخل اقابل مامتك
ايمان فتحت الباب علشان تدخله : ماما تعالى
توحيدة : فى ايه مين اللى جاى
عبد الرحمن : انا يا حجه ممكن ادخل ؟
توحيدة بضيق : تعال يابنى اتفضل
دخلو الصالون
توحيدة : ايمان اعملى شاى
ايمان بارتباك من زيارة عبد الرحمن : حاضر يا ماما
توحيدة بتنهيدة : خير يابنى
عبد الرحمن : انا عارف انك مش طايقنى .... بس انا مخترتش اهلى يا حجه انا عارف انك مش بتحبيهم وليكى حق بس مش لازم كلهم يبقوا شياطين زى ما كان فيه ليليان طيبه وهى من نفس العيله وعمى فارس الله يرحمه وجدتى فى انا كمان والله يا حجه انا بحب ايمان اوى ياحجه ايمان دى حبى دى كبرت على ايدى انت ليه عاوزة تحرمينى منها لمجرد ان ليا اب وعم تفكيرهم فى الفلوس انا ماليش دعوة بيهم صدقينى انا شاريها والله وعندى استعداد احارب الكل علشانها
الحجه توحيدة : كلام جميل اوى ... والكلام دا مجتش تقوله لابوها ليه لما كان عايش ليه استنيت لما مات
عبد الرحمن : اقسملك بالله ان كان كل تفكيرى ان اساعد ليليان واخلص من موضوعها وكان عندى امل ان ابويا ينسى الفلوس بهروبها بس للاسف منسيش ....يا حجه انا اللى هربت ليليان ليله كتب الكتاب وجبتها على هنا لعم حسن .... وايمان عارفه دا كويس ... والله بتمنى ان ليليان تفضل هربانه اهو تبعد عن القرف اللى هنا
توحيدة : اهو اديك قولت قرف وزفت وحقد انا ايه اللى يخلينى اوافق على جوازك من بنتى
عبد الرحمن : اللى يخليكى توافقى حبى ليها ولو كان على القرف احنا مش هانعيش هنا. احنا هانسافر انا وايمان وانتى امريكا انا مقدم على بعثه وانشاء الله يوافقوا
توحيدة قلبها رق علشان شافت الحب فى عنيه ولهفته فى الكلام وانه عاوز يقنعها باى طريقه
توحيدة :طيب تقدر تقولى هاتقنع ابوك ازاى هو وعمك
عبد الرحمن : انا راجل مش عيل علشان استنى موافقه ابويا انا اصلا مش هاقوله ولا هاعرفهم حاجة مش عاوز حاجة تمنعنى عن ايمان.... بس امى عارفه وموافقه وهتيجى معايا وقت كتاب الكتاب انشاء الله لو وافقتى
توحيدة كلام عبد الرحمن عاجبها : طيب ادينى فرصه افكر وارد عليك
عبد الرحمن : ربنا يخليكى ياحجه ... وصدقينى مفيش حد هايحب ايمان زى .... وزى ما ليليان قطعت علاقتها معاهم انا كمان هاقطعها
عبد الرحمن مشى وايمان جت جرى على امها : شكرا يا ماما انك ادتيله فرصه وسمعتيه
توحيدة بهدوء : بتحبيه يا ايمان
ايمان : ياااااه ياماما بحبه بس ... انا كبرت على حبه ليا والله هو طيب اوى ومش ذنبه ان له اهل زى دول
توحيدة : هاعمل استخارة واقولك قرارى
ايمان بفرحه : ماشى يا ماما
******************
يوسف كان نازل من عند توحيدة وفرحان لانه حس ان توحيدة مالت لكلامه واتفاجئ من وجود يوسق تحت البيت
تيوسف : ايه يا عبد الرحمن كنت بتطمن على الحجه توحيدة ولا على ايمى
عبدالرحمن : اخرس متجبش اسمها على لسانك الوسخ دا .... مالكش دعوة بيها احسنلك
يوسف : ماشى ياعم الغيور
عبد الرحمن : انا ماشى من وشك
عبد الرحمن مشى ويوسف فى سرة : انا سايبك بمزاجى يا عبد الرحمن الكلب علشان لما الهانم تظهر تبقا لوحدى وبس
****************
فى شركه الجارحى
ليليان : زين باشا انا خلصت
زين : هو انا مش قولت قبل كدا بلاش باشا دى
ليليان لقته متنرفز حبت تهدى الوضع : حاضر بشمهندس زين
زين : يالا انا هاخدك تروحى معايا انا مشيت كريم من زمان
زين اخدها ووقفوا فى الاسانسير وليليان عماله تاكل فى شفايفها ودى عادة فيها لما بتوتر وهو مش على بعضه
زين زقها وسندت على المرايه وقرب منها باسها باسها بغل كل ما يفتكر كلام على الباشا عليها ليليان حاولت تاخد نفسها مش عارفه
ليليان : اه زين اوعى ... ابعد
زين بعد شويه وبعصبيه : اياكى اشوفك بتعملى الحركه الزفت دى تانى
ليليان هزت راسها وقلبها بيدق بعنف منه
**************
مساء فى بيت الجارحى
على السفرة
زين : عملتى ايه فى الامتحان
ليليان بخفوت : الحمد لله
زين : كويس
ليليان حاطه وشها فى الطبق ومش عارفه ترفع وشها
زين : ارفعى وشك
ليليان رفعت وشها وزين باصلها لقى شفايفها ورامه وحمرا فضل باصص عليهم وبيتنفس بصعوبه وليليان اتكسفت وعملت نفس الحركه لا اراديا
زين بحدة : قومى نامى
ليليان : ها ؟
زين بنرفزة: بقولك قومى من وشى
ليليان عيطت واتنرفزت : هو انت كل شويه تعاملنى كدا وتتعصب عليا.... انت غريب بجد ..... بص انا مخاصمك مش تكلمنى
زين :نعم.... ايه مخاصمك دى ؟!!.
ليليان عيطت : مخاصمك يا زين واياك تيجى ورايا واياك تقولى اشربى اللبن وربنا مانا شاربه بس ها.
وجريت وراحت على الاوضه ونامت على السرير وقعدت تعيط هى ليه مش فاهمه هو ليه كدا ليه بتحسه فيه حنيه الدنيا كلها وليه بتحسه قاسى وقلبه حجر وجارح زى اسمه بالظبط
***********
تانى يوم
فى الجامعه
ليليان : سارة انا هامشى بقا اتأخرت على الشركه
سارة : ماشى روحى انتى ومتنسيش تفكرى نخرج مع بعض يوم
ليليان : ماشى هافكر وارد عليكى
*************
فى الشركه
ليليان : انسه سهيله بشمهندس زين جوا
سهيله بسخريه : اه موجود ادخلى ... انتى هاتتبسطى اوى
ليليان بصتلها من فوق لتحت : مجنونه دى ولا ايه
خبطت ودخلت لقت واحدة واقفه جنب زين وبتتكلم فى شغل ايه دا لحظه دى بتتكلم فى شغلها مين دى
ليليان : بشمهندس زين
زين : اهلا يا ليليان
ليليان بصت على الواقفه جنبه باستفهام
زين بابتسامه : دى نورا سكرتيرتى الجديدا
ليليان : احم ..مكان سهيله
زين : لا مكانك انتى
ليليان : امال انا هاروح فين
زين : انتى مرفودة.
ليليان برقت مصدومه: نعم ... مرفودة ؟!
زين ببرود : اه ... استغنيت عن خدماتك .
ليليان : استغنيت عن خدماتى ... انت بتهزر يا زين .
زين : وانا اهزر معاكى ليه يا هانم ....... وبعدين اسمى بشمهندس زين
بعدها زين جاله تليفون ورد عليه ووقف واداها ضهرة وقعد يتكلم ونورا قعدت تبص لليليان بتهكم واضح
ليليان واقفه دموعها نازله فى سرها : استغنيت عن خدماتى ورفدنى مستنيه ايه تانى يا ليليان لا لا لازم امشى انا مش هاتزل تانى ولا انت هاتشوف وشى تانى يا زين حتى لو رجعت لاهلى
وجريت تعيط ونزلت شارع
لقت كريم فى وشها : مالك ياهانم ... حضرتك كويسه
ليليان بصتله : انا مش هانم ومالكش دعوة بيا اللى مشغلك رفدنى تقدر ترتاح
ليليان مشيت فى شارع بتعيط :
كان لازم تفهمى يا ليليان
بعد موت عم حسن ان الدنيا بتديكى انذااار مفيش حد هايفضل جنبك للابد ... واهو زين كمان استغنى عنك
للمتابعه اترك تعليق
البارت الثامن
عشق الزين
فى شركه الجارحى
زين : سهيله ..... ليليان فين ؟.
سهيله :معرفش خرجت وقالت هاتروح الحمام
زين: ماشى لما تيجى دخليها على طول .
سهيله : اوك
سهيله خرجت ونورا قابلتها فى وشها
نورا : ليه قولتيله انها راحت الحمام ؟
سهيله بمكر : فتحى دماغك دى معايا اصل مش ناقصه .... عاوزنى يا ابله اروح واقوله دى خرجت معيطه علشان يجرى وراها
نورا : اه يا لئيمه انتى عاوزة تكسبى وقت تكون هى مشيت وغارت فى داهيه
سهيله : ايوة الله ينور عليكى فتحى دماغك الحلوة دى معايا .
********************
فى الشارع
ليليان ماشيه تايهه مش عارفه هى رايحة فين ولا اصلا هى فين حست بوجع الوحدة والخوف .... الخوف مالى قلبها طيب تعمل ايه تروح فين عقلها مش ساعفها ولا عارفه تفكر كل اللى هى بتفكر فيه كلام زين ليها
سارة فاجأه جت قدامها وافتكرت انها حفظت رقمها
راحت عند كشك صغير وطلبت منه تعمل مكالمه تليفون
ليليان : لو سمحتى عاوزة اعمل مكالمه ضرورى
صاحبه الكشك : اتفضلى يابنتى
ليليان : الو
سارة : ليليان ؟. ايه دا كل شويه ارقا... ايه دا هو انتى بتعيطى
ليليان عيطت: تعااليلى يا سارة انا محتاجكى اوى
سارة : طيب انتى فين ؟.
ليليان سألت صاحبه الكشك على مكانها وقالت لسارة
سارة : مسافه السكه متخافيش .
*****************
فى شركه الجارحى
زين : اهلا بالباشا انت فين من امبارح.
مراد : راحت عليا نومه
زين : والله انك بارد ...وكمان ..
زين لاحظ العضه اللى فى رقبه مراد
زين : نهارك اسود انت وصلت للمرحله دى .
مراد باستغراب: مرحله ايه؟!!!.
زين : ايه دا اللى فى رقبتك دا يا استاذ
مراد حط ايدة على العضه : اه مش تفكرنى .... دى نار قايدة فيها.....بتوجع اوى
زين اتعصب من برودة : انت اتجننت يامراد ازاى تسمح لواحدة تعمل معاك كدا انت مبقتش تركز ولا ايه فوق لنفسك من القرف اللى انت فيه
مراد: براحه يا زين .... انت فاهم ايه دا انا اتخانقت مع بنت واخدتنى على خوانه وعضتنى بنت ال ... لو اشوفها بس
زين : مين دى اللى اتخانقت معاك ... وازاى تاخدك على خوانه وبعدين ايه دا طب البس حاجة تدارى الفضيحه دى
مراد: موضوع كدا هابقا احكيهولك بعدين.... وبعدين محدش له عندى حاجة براحتى البس اللى يعجبنى
زين ومراد بيتكلم افتكر ليليان اللى اتأخرت قام وقف مرة واحدة
زين زعق : سهيله
سهيله دخلت على صوته : ايوا يا افندم
زين : ليليان فين
سهيله : احم معرفش مجتش .
زين طلع يجرى ونزل تحت الشركه وسأل الحراسه : كريم فين
واحد من الحراسه : كريم مشى اخد المدام وروحها
زين نوعا ما بقا اهدى شويه : طيب اطلع على البيت
مراد : زين فى ايه جرتنى وراك ... رد عليا
زين : مراد انا لازم امشى كمل انت مكانى
مراد : ليه هى ليليان فين؟.
زين : رفدتها .
مراد: ايه.... رفدتها ليه وازاى وامتى
زين : بعدين بقا .... سلام
*********************
عند سارة وليليان
سارة : تعالى يابنتى متتكسفيش... ماما مش موجودة بتزور صاحبتها وهتتأخر
ليليان بتعيط وعينها ورمت ومبقتش عارفه تاخد نفسها كويس
سارة : اهدى يا حبيبتى كدا هايجرالك حاجة علشان خاطر ايه دا كله
ليليان :ياريت يجرالى حاجة انا بقيت اكرة نفسى
سارة : لا اخص عليكى متقوليش كدا دا انتى اختى وحبيبتى وربنا يعلم من اول يوم شوفتك فيه وانا حبيتك اوى
ليليان : وانتى كمان كدا والله ... بقيتى اكتر من اختى. علشان كدا فكرت فيكى اول واحدة
سارة : ها؟ احكيلى فى ايه ؟
ليليان : زين رفدنى واستغنى عن خدماتى
سارة : ايه طيب ازاى .... اقصد عملتى حاجة غلط مثلا
ليليان : لا يا سارة معملتش اتفأجت لما دخلت بواحدة معاه ولما استفهمت لقيتها سكرتيرة الجديدة مكانى وقالى استغنيت عنك ورفدنى
سارة : طيب ايه مقالكيش اسبابه
ليليان : مستنتش جريت ومشيت اتخنقت
سارة : ليه مستنتيش تعرفى اسبابه ايه ...ليه مشيتى بسرعه
ليليان : لا طبعا ... عاوزة يقول ايه عليا ضعيفه ... دا كان بيكلمنى بطريقه وحشه جدا .... انتى عاوزنى استنى واروح البيت ويقولى انتى طالق
سارة : لا انتى خفتى تروحى يقوم يطلقك خفتى يسيبك
ليليان : انا مكرهتش فى حياتى قدة ..... انا عمرى ما هارجعله وكل اللى انتى بتقوليه غلط ف غلط انا مروحتش علشان مينفعش يفضل يكسرنى اكتر من كدا
سارة : هو كان كسرك قبل كدا فى ايه...؟
ليليان اتعصبت : سارة انا ليه حاسه انك بتدافعى عنه .... لو سمحتى هى ليله هاقضيها عندك وارجع على الشرقيه
سارة: يالهوى ترجعى لاهلك يا ليليان .... ترجعى بعد كل اللى حكتهولى .... ترجعى بعد ماقدرتى تهربى تروحى برجلك تانى
ليليان بشجاعه مزيفه : محدش فيهم يقدر يقربلى ..... وبعدين انا خلاص تميت السن القانونى وورثى بقا بتاعى محدش يقدر يمضينى على حاجة حتى لو كان على موتى
سارة : ماهما هايموتوكى فعلا علشان يورثوكى ....اهدى كدا امسحى دموعك دى وتعالى نامى شويه ولما تصحى قررى هاتعملى ايه وانا معاكى فى اى حاجة
*********************
فى بيت الجارحى
زين : دادة سميحه
دادة سميحه : اهلا يابنى امال فين ليليان
زين : ليليان!!!! .. هى مجتش
دادة سميحه : لا يابنى مجتش. وقلقت عليها بس قولت اكيد معاك
زين اتعصب وطلع تليفونه وجاب رقم كريم
زين : الو
كريم : ايوا يا باشا
زين بحدة : ليليان هانم فين ؟ وانت فين ؟
كريم : طلعت منهارة من الشركه بعد ما وصلتها بربع ساعه ولما سألتها انتى رايحة فين زعقتلى وقالتلى انك رفدتها واصرت تمشى لوحدها وانا والله حاولت الحقها بس ضاعت منى واختفت
زين بحدة : ومتصلتش ليه
كريم : تليفونى باظ والله ياباشا وبصلحه
زين قفل معاه واتصل على مراد
مراد : ايه يا زين ؟.
زين : بسرعه ادينى عنوان سارة صاحبتها
مراد : سارة مين !!!.... اه صاحبه ليليان طيب اقفل هابعته فى مسج
**************
عاصم : اخيرا ظهرتى يابنت فارس لا وايه جايه برجليكى .
ليليان بعصبيه : مالكش دعوة بيا .. محدش له دعوة بيا واييااااك تفكر تضربنى تانى
عاصم : لا وايه كمان ايه جايه بتخربشى . ..... انا مبسوط اوى انا انهاردا اسعد يوم فى حياتى دا ليله ليلتك انهاردا..... يوسف انت مش كنت عاوزها براحتك اهى عندك عاوز اسمع كل خير
عاصم خرج وليليان خافت وعرفت انها اكبر غلط عملته فى حياتها انها فكرت ترجع
يوسف : اخيرا يا ليلو جتيلى .... انتى جيتى علشان بتحبينى صح
ليليان : انا بكرهك ومبكرهش حد قدك
يوسف : وانا بحبك وبموت فيكى وبتمناكى فى كل لحظه تعالى يا قلبى
ليليان : ابعد هاموتك يا يوسف لو قربت منى
يوسف مسكها وقلعها طرحه وفضل يقطع فى هدومهاوهى بتصرخ جامد
ليليان : الحقونى
ليليان بتصرخ جامد : زييييييييييين
ليليان فاقت مرة واحدة وسارة بتهديها
سارة : اهدى يا ليليان دا اكيد كابوس
ليليان بتاخد نفسها : كابوس وحش اوى يا سارة
.. اكيد ربنا بيدينى انذار علشان مروحش لاهلى
فى الوقت دا رن جرس الباب
سارة : هاروح افتح تلاقيها ماما ونسيت المفتاح كالعادة
سارة فتحت اتفأجت بزين واقف قصادها
زين : ليليان فين ؟
سارة : احم اتفضل حضرتك
زين : ميصحش ادخل ومامتك مش موجودة ... لو سمحتى قولى لليليان تجهز علشان نمشى
ليليان خرجت مندفعه : انت عاوز ايه ها .... انت مش رفدتنى خلاص خلصنا كل واحد فى حاله ..
زين ببرود: البسى طرحتك كويس وهاستناكى تحت .. متتأخريش
وسابها ونزل وليليان اتغاظت من برودة فى سرها : ايه يا ليليان مستنيه يصالحك ببوكيه ورد
سارة : ليليان خدى نصحيتى ليكى روحى معاه واسمعى كلامه واحكمى عليه
ليليان بنرفزة : شوفتى جاى يكلمنى ازاى
سارة : معلش..انتى لو اتأخرتى ثانيه هايطلع وهايطربقها على دماغنا
ليليان حست ان كلام سارة صح زين وقت غضبه بيتحول تماما
****************
فى بيت الجارحى
زين بصوت جهورى : انتى ازاى تسمحى لنفسك انك تمشى من دماغك كدا ايه مالكيش راجل.
ليليان : مش انت اللى قولتلى مستغنى عنك
زين : انتى مجنونه انا استغنيت عنك فى الشغل مش فى حياتى شغلى حاجة وحياتى حاجة
ليليان : لو اللى انت بتقوله صح .... كنت المفروض تفهمنى تقولى مش عاوزك فى الشغل وتقولى اسبابك ... انت عاملتنى وحش اوى يا بشمهندس زين
وقالت كلامها الاخير بتريقه
زين بنرفزة : انا معملتكيش وحش دى طريقتى وانتى عارفه كدا كويس ..... ومش زين الجارحى اللى بيوضح اسباب لحد
ليليان زعقت : وانا مش جاريه عندك
زين بحدة : الزمى حدودك علشان لو غضبى طالك هتخافى منى
ليليان بصريخ: بطل تهددنى بقا
زين خرج من الاوضه قبل ما يعمل حاجة ويندم عليها وراح اوضه الرياضه يطلع غيظه فيها احسن
*****************
فى الشرقيه
توحيدة : ايمان هاتى رقم عبد الرحمن
ايمان : احم ماما هو انتى خلاص قررتى
توحيدة : ايوا وهاتسمعى وانا بكلمه
توحيدة اتصلت على عبد الرحمن
عبد الرحمن : الو
توحيدة : ازيك يابنى
عبد الرحمن بفرحه : اهلا يا حجه ها؟ قررتى ؟
توحيدة : ايوا يابنى انا موافقه .. بس لسه موافقه قريبى االلى فى سعوديه زين هاتصل بيه ينزل فى اى وقت
عبد الرحمن : براحتك ياحجه المهم موافقتك.
توحيدة : لا المهم موافقه قريبى دة دا الكل فى الكل
عبد الرحمن : تمام ... ممكن ابقا اجيب امى وتقعد معاكوا شويه
توحيدة بتنهيدة :. ماشى يابنى تشرف فى اى وقت
*****************
عند عاصم ويوسف
عاصم : ها ؟ الراجل دا متصلش
يوسف : لسه مستنى اتصاله اهو
تليفون يوسف رن
يوسف : الو عملتوا ايه ؟
: اتصاب ونقلو العنايه المركزة
يوسف : هو انت باعتلى واحد حمار مش عارف الفرق بين الاصابه والموت
: متقلقش الامور تعدى ..... وهو فى المستشفى هانخلص عليه
يوسف : عاوز اسمع المرة الجايه كل خير علشان مزعلكش
يوسف قفل معاه وقعد متنرفز
عاصم : ابن الكلب هرب حتى من الموت ... يوسف عزت لو فاق هانروح فى داهيه
يوسف : متقلقش يابابا ... لو هما مش عرفوا هاروح بنفسى واخلص عليه
******************
فى بيت الجارحى
زين بيلعب رياضه وكانه بينتقم منه نفسه وكان متعصب وعلى اخرة تليفونه رن وكان رقم توحيدة قلق جدا : هو يوم مش باين اصلا
زين : الو
توحيدة : ازيك يا بنى
زين : الحمد لله ياحجه توحيدة اخبارك انتى
توحيدة : انا كويسه .. بس فى عريس كان جاى لايمان يوم الجمعه وكنت عاوزك تقعد معاه يابنى علشان انت راجلنا بعد حسن الله يرحمه
زين بهدوء : الف مبروك انشاء الله هاجيلكوا
توحيدة : بس انا يابنى معرفاهم انك عايش فى السعوديه ومحاسب ومتجوز ومخلف تؤام
زين : ههههههه ايه دة كله يا حجه ليه كدا
توحيدة : علشان اهل ليليان سألوا عليك وشكوا فيك ولازم اللى يتكلم معاهم يتكلم بثقه ويألف حوار عليهم
زين : ايوا مفهوم تمام...... مفيش مشكله
توحيدة : ليليان اخبارها ايه وحشتنى اوى
زين بتنهيدة : كويسه
توحيدة : شكلها مجنناك معلش استحملها والله هى غلبانه وبتتاخد بكلمه الحلوة
زين : ربنا يهديها
زين قفل مع توحيدة واتنهد ووقف يفكر يحل مشكلته ازاى معاها
دادة سميحه : زين يابنى .... رد عليا
زين فاق على صوتها : احم معلش يا دادة .... فى حاجة
دادة سميحه : ايوا مراد تحت وعاوزك
زين : طيب تمام هانزله ... لو سمحتى يادادة جهزى العشا لليليان وكوبايه اللبن قبل اى حاجة
********************
فى المكتب
مراد : ايه يا زين انت قلقتنى ولا فهمتنى اى حاجة ومشيت ومبتردش على فونك
زين : متقلقش يا صاحبى الامور تمام
مراد : ايه سبب المشكله دى وليه رفدت ليليان
زين : كدا رفدتها كدا عادى ياعنى ايه اللى فى الموضوع غريب
مراد : ايه الغريب انت بتهزر ..... انت رفدتها فاجأه ومن غير اسباب وجبت مكانها واحدة وانت اصلا مكنش عندك سكرتيرة شخصيه انت اخترعت الشغلانه دى ليها علشان تكون جنبك
زين ببرود : حبيت يكون عندى سكرتيرة شخصيه حبيت الوظيفه دى
مراد : زين بطل البرود دا .... انا فاهم كويس ليه رفدتها علشان على الباشا صح كلامه عصبك ... بس انت لو اى حد فكر يعاكسها قدامك ايه هاتقتلها وتخلص منها على كدا
زين بعصبيه : اى حد يا مراد يعاكسها قدامى هانسفه .... لو كنت سبتها وعلى الباشا فضل كل مرا يجى علشان خاطرها هاتبوظلى كل حاجة هاتبوظلى اللى بخططله من سنين عارف هاتبوظو ازاى لما تلاقونى قتلته قدامكوا كلكو
مراد : انا عارف كويس انك مبتحبوش بس..
زين قطع كلامه وهو متعصب : انا مبحبوش بس .... قول انا بكرهه .. قول انا عايش بس علشان انتقم منه واحرق قلب ابوة
مراد : طيب اهدى يا صاحبى دا مش حل انك تعيش علشان تنتقم طيب وزمان كنت ساكت ..... دلوقتى بقا فى ليليان
زين : مراد متمثلش المثاليه عليا ... انت لما مراتك وابنك اتقتلوا قصاد عنيك منمتش قبل ما تصفيهم كلهم صح
مراد :. زين انا قتلتهم علشان شوفتهم وهما بيموتهم قصاد عينى ليا حق .. بس انت بقا عدواتك مع على الباشا مبنيه على الباطل
زين بعصبيه : ومين قالك انها مبنيه على الباطل ... ومين قالك انى مشوفتش ابوة واحنا بنموت انا وابويا وامى وهو بيضحك ومبسوط و مين قالك ان ابويا متحايلش عليه علشان ينقذنا قبل ما العربيه تولع بينا وانا شوفته بيضحك وبيقوله موووووت بقا ياعز انت وابنك ومراتك انا اللى دبرت الحادثه دى وبتمنى اشوفك وانت بتموت واديك اهو خلاص كلها ثوانى وتسافر فوووق ومترجعش تانى وسابه ومشى ...... انت عارف ان كلامه لسه بيتكرر قدامى وكانه امبارح وفى ودانى على طول مين قالك ان مكنتش صاحى وشايف الموت ومستنيه وانا طفل صغير مفهمش حاجة .... لولا عم حسن لما كان ماشى بالصدفه هو اللى انقذنى يامراد كنت موت
ولما حاول ينقذ ابويا العربيه خلاص كانت هاتولع وعم حسن اخدنى وجرينا...... عارف ياعنى ايه اشوف ابويا وامى يتحرقوا قدام عينى والنار بتحرقهم وبتحرق قلبى. ..... ودا كله مش عاوزنى انتقم منه ومن ابنه
لولا عم حسن اللى خدنى بيته وربانى وعاملنى كانى ابنه ومقصرش معايا لحظه وكان راجل فقير محلتوش حاجة..... والتانى وهو ابنه مترمغين فى فلوسى وفلوس ابويا ..... الفلوس السبب اللى كانت فى موت ابويا وامى وهاتبقا السبب فى موتهم
مراد اتنهد : اخيرا يا زين اتكلمت .... دا انا كنت بعانى معاك علشان تتكلم وتقول اللى جواك
زين : وادينى اتكلمت هاتعمل ايه؟
مراد : هاقف جنبك يا صاحبى وهانوقع على الباشا وابوة
زين : فهمت ليه عاوز ابعد ليليان .... ليليان هى الحاجة الوحيدة اللى فاضللى هى الوحيدة اللى ممكن احارب الدنيا كلها علشانها ... انا كنت قافل قلبى ومش راضى افتحه علشان الانتقام مالينى ... بس هى جت وفتحته ودخلت وعمرها ما هاتطلع ابدا منه يا مراد
مراد : ربنا يخليهالك يا زين ومايحرمكوا من بعض ابدا يا صاحبى ..... وتجيبوا مراد الصغير قريب
زين : ههههههههه مظنش مراد تانى مش كفايه واحد
مراد : ههههه انت الخسران هو انا فى زى اصلا..... انا هامشى بقا
***************
عند ليليان ودادة سميحه
دادة سميحه : يالا يا ست البنات قومى علشان تاكلى
ليليان : مش عاوزة حاجة
دادة سميحه : لا كدا غلط يا ليليان انت باين عليكى التعب وبعدين زين هايزعل
ليليان بعصبيه : ما يزعل انا مالى وبصى متجييش سيرته قصادى
دادة سميحة : طب وطى صوتك يابنتى بلاش مشاكل .... اشربى اللبن ونامى
ليليان مسكت الكوبايه ورمتها فى الارض كسرتها من كتر العصبيه والغيظ منه
زين كان تحت وسمع حاجة بتتكسر خاف وجرى على ليليان يكون جرالها حاجة ودخل لقاها واقفه بكل عصبيه وبتعيط وبتتحداه فى نفس الوقت وكوبايه اللبن مكسورة
زين بحدة : اخرجى برا يا دادة حالا
دادة سميحه : يابنى انا اللى كسرتها وقعت غصب عنى
ليليان بعند : لا انا اللى كسرتها وكويس ان مكسرتش الصينه كلها
دادة سميحه خافت من ردة فعل زين : يالهوى ....
زين بصوت مخيف : اخرجى برا يا دادة وبسرعه
دادة سميحه خرجت ومنظر زين ميبشرش بالخير ابدا وليليان بعد ما كانت بتتحداه بقيت ميته فى جلدها من الخوف
زين : تعالى هنا قربى
ليليان بتبعد : لا لا لا انت دا هاتضربنى
زين بصوت عالى : ليليان تعااااالى هنا فورا
ليليان بخوف : قولتلك لا......
&&&&&&&&&&&&
للمتابعه اترك تعليق
تعليقات
إرسال تعليق