 |
#اسكريبت
_انتى طالق
_اي الكلام دا يا زين
_زي ما سمعتي انتى طالق ارجع البيت ملاقكيش فيه
_اي دا انت خدت الفلوس بتاعت الورث صح برافو يا زين انا كدا بقيت افراج والحمد لله خلصت منك ومن همك
ومن النكد بتاعك والاهمال والبرود بتاعك دا واحسن انك طلقتنى انا ميشرفنيش اعيش مع واحد انانى زيك..
_اي اللي بتقوليه دا يا بت انتى
امشي يلا اطلعى برا من هنا ومش عاوز اشوف وشك تاني
قامت دخلت الأوضه وقالت:يعني انا ماسكه فيك وبعيط وبقولك والنبي متطلقنيش
زين وهوا مستغرب طريقتها وقوتها قدامه حاول يثير غضبها:على فكره انا هتجوز
_اتجوز حد حايشك يلا بقى طرقني علشان امشي من هنا
دخلت وجمعت هدومها
وخرجت ملقتهوش حست بالحزن ونزلت دمعه خادعه من عينيها افتكرت أيامهم سوا هوا اه كان متجوزها غصب عنه لكن مكنتش تتخيل أنه يطلقها بالسهولة دي خصوصا انها كانت بدأت تحبه بصت بألم لأركان الشقه اللي قضت فيها تلات شهور من غير حياة كان دائما بيتجاهلها وعمرة ما حس بيها وشالت شنطتها بخيبة أمل وبعدين خرجت من البيت وراحت لبيت اهلها..
خبطت البيت وامها فتحتلها
ساره بابتسامه:ازيك يا ماما
امها باستغراب:ازيك يا حبيبتي اي جابك في وقت زي دا وفين جوزك واي الشنطه دي
ساره وهى تمثل بلامبالاة:عادي يا ماما اتطلقت
امها يخضه:يا مصيبتي ازاي يبنتي اتطلقتي ازاي وزين دا بيحبك
_يعني عوزاني امسك فيه واقوله والنبي خليني
_اكيد انتى السبب
ساره بصتلها باستغراب وحزن :اه انا السبب انا هدخل الاوضه ارتاح شويه
دخلت الأوضه وهى بتمنع نفسها من الانهيار
*انا السبب!؟
انا عملت اي غير اني كنت بحاول أقرب منه وهوا ولا كان معبرني كانت معاملته جافه كسرني وكسر قلبي حياتى مبقاش ليها طعم انا كان مالى بوصية أبوه ...
افتكرت اول يوم جواز..
Flash back
كانت ساره قاعده يوم الفرح كانت مبسوطه زي اي بنت
زين دخل وشافها وكان راسم علي وشه البرود
زين:ساره انا عاوز اتكلم معاكي
ساره بانتباه:اتفضل
زين بصلها واتنهد:انا انا متجوزك غصب عني
ساره :ازاي مش فاهمه
_يعني ابويا لما مات كتب في وصيته اني لو متجوزتكيش
خلال شهرين من موته املاكه كلها هتتوزع على الناس الغلابه وانا تعبت في الشركه والشغل ومكنتش منتظر كدا ونفذت الوصيه بتاعته بس اوعدك يا ساره خلال تلات شهور اول ما كل حاجه تبقى باسمي هطلقك ...
ساره بصتله بصدمه:انت ازاي اناني كدا ازاي كدا انا بكرهك يا زين بكرهك ربنا يسامحك يا خالى ويرحمك
وقامت من قدامه بغضب ودخلت الأوضه...
Back .
أعدت عيطت تندب حظها..
امها دخلت عليها وبدأت تعيط..
_اه يا خيبة املك يا سميره في بناتك اه ياني عليا
ساره:في اي يا سميره ما تهدى يروح زين يجي ازين منه ولا تزعلى انا نفسي مش زعلانه لأنه واحد انانى ومش بيحب الا نفسه وانا مكنش يشرفني اكمل حياتى مع واحد زي دا
دخلت ندى بنت عمها اللي اول ما سمعت خبر طلاق ساره طلعت جري علشان تشمت فيها..
_اي دا ساره اي اللي جابك عندنا
ساره بمرح:اصلي اتطلقت يا ندى مش تباركيلي عقبالك بقى تتجوزي وتطلقى كدا علشان نبقى اسره مع بعضينا
ندى :انتى هبله اي الكلام اللي بتقوليه دا وبعدين هتلاقيه زهق منك ومن طريقتك دي فطلقك
ساره بلامبالاة:روحي اساليه اهو عندك وغمزتلها بخبث.
مانتوا كدا كدا عارفين عن بعض كل حاجه
ندى بتوتر:اي اي الكلام دا يا ساره
ساره:اي يا حبيبتي على فكره انا مش زعلانه انتى زي اختى برضو وانتو الاتنين عينه واحده متفرقوش كتير عن بعض
ندى زهقت من كلامها أو بمعنى أصح معرفتش ترد عليها
سميره بغضب:اي الكلام اللي قولتيه لبنت عمك دا
ساره:انتى شايفاها جايه تشمت فيا ازاي وكأن العرسان عليها طوابير بنت المقشفه
سميره:يبنتى بطلي طريقتك دي هتلاقيه طلقك بسبب دبشك دا
ساره يزهق:طيب يا امى ممكن تسيبيني لوحدي بقى ..
سميره حست ببنتها وقربت منها وحضنتها
_انا عارفه انك موجوعه وبتتماسكي علشان متنهاريش
ساره بدأت في البكاء واستسلمت في حضن امها اللي حست فيه بالأمان
_حطم اي ذره حب جوايا ليه من اول يوم دخلت بيته انا بكرهه يا ماما وبكره اي حاجه كانت ربطانى بيه
سميره بدموع:لي يا ابن اخويا تحطم بنتى كدا ربنا يسامحك انا كنت بعتبرك ابني اللي مخلفتهوش
بعد اسبوع ساره مكنتش بتخرج برا الاوضه وكانت بتمثل الامبالاة قدامهم كلهم وبتضحك وتهزر كاعدتها..
وفي يوم سمعت صوت زغاريط جايه من تحت من شقه عمها..
سميره وهى داخله :الحقى يا بنتى زين وندى خطوبتهم النهارده..
#اسكريبت
#البارت_الثاني
#انساني
سميره وهى داخله :الحقى يا بنتى زين وندى خطوبتهم النهارده..
ساره سمعت الخبر وكأنها عارفه أن كل دا هيحصل
ساره وهى تمثل الامبالاة: عادي يا ماما مالك مخضوصه كدا لي الاتنين ما شاء الله لايقين على بعض وانا فرحانه ليهم
سميره بغضب:فوقي بقى اي اللي بتقوليه دا
ساره:في اي انتى عارفه انا كمان هنزل اباركلهم عادي
_يبنتى انا عارفه انك بتمثلي الشجاعه بس مش كدا خدى موقف
_ماما ممكن لو سمحتى تخرجى برا علشان هلبس وانزل ابارك لابن خالي وبنت عمى اكيد هيفرحوا..
هبه اخت ساره جت هى متجوزه في بلد تانيه وكل فتره بتيجي تطمن على امها
هبه باستغراب:هي اي الزغاريط اللي عند عمى دي هوا في حد حن على ندى وبصلها ولا اي
ساره:حبيبتي يا هبه عامله اي مفيش اصل زين طلقني ورمرم
هبه حضنتها حضن اخوي: الحمدلله يا حبيبتي اي انتى عامله اي صدقيني والله ميستاهلكيش وقولتلك مليون مره لكن انتى الحب كان اعمى
ساره:ملهوش لزوم الكلام دا يا هبه
وبصتلها بخبث
_متيجي نبارك لبنت عمنا
هبه بادلتها البصه وضحكوا
سميره:ربنا يستر اصل انتوا الاتنين لما يتتجمعوا ابليس بيخاف
البنتين ضحكوا ونزلوا مع امهم تحت
دخلوا شقه عمهم اللي كان فيها الجيران متجمعه على صوت الزغاريط
ومنهم اللي مستغرب ومنهم اللي بيضرب كف على كف ومنهم فرحان ومنهم شغال نم على العروسه وكمان لانهم كلهم عارفين أن زين كان متجوز بنت عمها!!!
ساره وهبه دخلو يزغرطوا
ندى بصتلهم بصدمه وحست أن نهايتها قربت وكمان زين يصلهم باستغراب وخصوصا لساره اللي حس أنه مش فارق معاها نهائي
ساره قربت عليهم بفرحه :الف مبروك يابنت عمى الف مبروك يا ابن خالى والله فرحتلكوا جدا فعلا فعلا لايقين على بعض اوووي
تعالى يا ندى بالحضن
حضنت ندى
وهمستلها
_الف مبروك يا عروسه هى الدنيا كدا مش دايمه النهارده في ايدك وبكرا في ايد غيرك حافظى عليه بقى علشان متجيش واحده تخطفه منك انتى عملتى كدا بكرا تلاقى اللي تعمل فيكي ومبروك مره تانيه يا بنت عمى
ندى بصتلها بغيظ وسكتت
زين كان باصصلها وكأنه اول مره يشوفها
مراقب كل حركاتها وضحكتها وكلامها وجنانها اول مره يعرف انها بالجمال دا
ولا علشان دلوقتي هى بعيد عنه
ساره وقفت جنب هبه وفضلوا يضحكوا ويتنمروا عليهم
شافت بنت عمها بتجيب الشربات ودي العقربه الكبيره
ساره غمزت لهبه
هبه راحت لمرات عمها
_هاتى يا مرات عمى انا هديهم الشربات روحي شوفي المعازيم انتى
مرات عمها بصتلها بشك وبعدين شافت حد بينده عليها وراحتله
هبه راحت ناحيه ندى وزين ولسه هتقرب منهم
عملت نفسها بتقع وهوب الشربات وقعت كلها على ندى
وندى صوتت وعيطت
ندى:مش تحاسبي يا أم غل
هبه:انا بغل ربنا يسامحك
ساره قربت منهم
ندى بصتلها
_انتى اللي عملتى كل دا علشان متغاظه انى خدت حبيبك
منك وانك كنتي استبن عقبال ما ياخد الورث ويتجوزني انا
مش متقبله انو يكون بيحبني انا ومش طايقك انتى
زين:ندى اي الكلام دا
ساره بصتله بسخريه:وهوا مين السبب في كل دا مش حضرتك
ندى:ملكيش دعوة بيه كلميني انا علشان انا عارفه الحقد والغل اللي جواكى
ساره:انا مش هتكلم انا هعمل كدا
وهوب مسكت ندى من شعرها ونزلت فيها ضرب
و.....
#الاسكريبت
#البارت_الثالث
#إنساني
وهوب مسكت ندى من شعرها ونزلت فيها ضرب
وهبه وافقه حاسه بالفخر من اختها
وزين حاش ساره عنها وبعدها
زين بعصبية:اي الي انتى بتعمليه دا انتى مجنونه
ساره:باخد حقي يا استاذ زين علشان انت السبب في كل اللي بيحصل دا اللي كان المفروض ياخد العلقه دي هوا انت مش هى
وبصت لندى بغل
_متفكريش اني ضربتك انى غيرانه منك علشان اتجوزتي اللي كان جوزي لانى اكتر واحده مبسوطه انى اتطلقت منه انتى خدتي الحاجه اللي استعملتها لانك طول عمرك بتعملى كدا ...انا ضربتك علشان قلة ادبك ولو كنتي قولتى كلمه زياده كنت هدفنك مكانك انا عامله حساب لعمى اللي هوا للاسف متعبش في تربيتك...
هبه:خلاص يا ساره هي متستاهلش تتكلمى معاها اصلا
وخدتها ومشيت
طلعوا فوق وأمهم وراهم
سميره بغضب:انتى اي اللي عملتيه دا انت. مفكره نفسك كدا انتى خدتي حقك بالعكس انتى قللتي من نفسك ومن قيمتك وكرامتك وظهرتي انك غيرانه
ساره بلامبالاة:اهم حاجه انى خدت حقي انا لو كنت عشت عمري كله مكنتش هاخد حقي وانا مش ضعيفه يا امى انتى اكتر واحده عارفه انى مش بخاف مش بخاف من حد
سميره :ربنا يهديكي يا بنتى
هبه بضحك:بس انتى اي يبت يا ساره رنتيها علقه محترمه عجبتيني
ساره بضحك:مش كدا برضو
بقى بنت المقشفه دي تعمل معايا انا كدا اللي كانت مش لاقيه حد يبصلها وراحت كلمت خطيبي قبل كدا وفركشت الحكايه وبعدها سابته وراحت لزين لما لاقتني هاجوزه!
هبه:هى طول عمرها كدا عندها مرض انها تاخد الحاجه الي انتى مستعملاها بتغير منك
عارفه لو انتى اتخطبتي لواحد احسن من زين هتروحله
ساره ضحكت:هههههههه ربنا يستر يلا اهى خدت اللي ربنا قدرني عليه العقربه بنت العقربه...
سميره دخلت لساره
_عمك يا بنتى برا عاوز يكلمك
ساره خرجت لعمها اللي شافت الدمعه في عنيه
_انا اسف يا بنتى على اللي حصل دا والله انا مقدرتش عليها هى وامها وانا لحد دلوقتي مش موافق عالجوازه دي
ساره:انا عارفه يا عمى انك ملكش اي ذنب واحنا الاتنين بناتك بس عوزاك تفهمها انها لو لعبت معايا تاني انا هندمها واوي كمان ومش هكتفي بعلقه بس
العم:حاضر يبنتي
ومشي عمها
ساره:اي يا سميره مش عملالنا محشي ولا اي ولا البت هبه هتروح على لحم بطنها
سميره:اعمل اي مش بعرف ازعل منك يلا علشان ناكل
في صباح يوم جديد
ساره قامت بكل نشاط واريحيه
لبست هدومها وخرجت
سميره :رايحه فين
_رايحه ادور على شغل يا سوسو مش هفضل قاعده كدا
_طيب يا بنتى ربنا معاكى
بس طلب
_اي يا سوسو
_لو شوفتي ندى أو زين ملكيش دعوة بيهم يا سارة
_متقلقيش يا ست الكل هم مش في دماغى اصلا
_شاطره يا حبيبتي عقله
_تربيتك يا سوسو
ساره نزلت من البيت بخبث
وركبت تاكس وراحت لمكان ما..
ساره نزلت من العربيه
ودخلت الشركه اللي قدامها بخبث وابتسامه ماكره..
طلعت فوق على مكتب المدير
السكرتيره:مين حضرتك
ساره بصتلها من فوق لتحت:انا ساره بنت عمت استاذ زين
_طيب ثوانى حضرتك هديله خبر
ساره استنت ولسه علامات الخبث على وشها
_اتفضلي يا فندم
زين حس بفرحه أن ساره موجوده واتخيل انها جياله علشان تعتذر منه عاللى حصل امبارح وأنها عوزا ترجعله وتفضي اي خلافات
زين لما شافها امبارح ندم أنه سابها
فعلا الواحد مبيحسش بقيمة الحاجه الا لما تضيع منه...
ساره دخلت بكل ثقه وقعدت قدامه وحطت رجل على رجل
_احم جايه ليه يا ساره
_جايه استلم حقي المحامي كلمنى قالي اجي استلم حقي اللي كتبه خالي ليا
زين بصدمه:اي!
#يارا_عبد_السلام
تعليقات
إرسال تعليق