 |
الحلقة الخامسة من الجزء الثاني
المشوة
قام زي المجنون للزعيم يضرب فيه ويضرب ويضرب عايز يقتله
اخيرا شد الغطا من علي وشه واتفاجئ ان زعيم العصابه هو ابوه
ادهم رجع لورا خايف مخضوض
ادهم: انت؟؟؟
ابوه: ايوه انا امال كنت فاكر مين؟؟؟
ادهم: وقتلتها ليه؟؟؟
ابوه: علشان اوجعك
ادهم: لا حرام عليك لأ لأ لأ لأ
لااااااااااااااااااااااااا
ادهم. ادهم. ادهم. ادهم
ادهم: لألأ لأ لأ
::حبيبي اصحي مالك في ايه؟
ادهم: لأ ارجوك لأ لأ
::: ادهم حبيبي اصحي مالك ادهم
صحي ادهم زي المجنون بينهج وبيتلفت حواليه
ليلي: مالك اهدي ده مجرد كابوس
ليلي قدامه اهي ماسكه وشه بايديها
ادهم مش فاهم هو دلوقتي بيحلم ولا اللي فات حلم؟؟ فين الحلم وفين الحقيقة؟؟
بس مش مهم المهم ان حاليا ليلي بين ايديه
ادهم: انتي كويسه فيكي اي حاجه هاه؟؟ بطنك وريني بطنك
ليلي: ادهم انا كويسه
ادهم بصوت عالي: وريني بطنك
رفعت قميص نومها ورته بطنها
ليلي: اهي
ادهم حط ايده علي بطنها مفيش دم
ادهم: مفيش دم انتي كويسه صح انتي كويسه؟ ؟
فضل يردد انتي كويسه وهو واخدها في حضنه
زي ما يكون خايف انه يطلع بيحلم فيلحق يشبع منها قبل ما تختفي تاني
اخيرا بدا يهدي الكابوس انتهي
ليلي: ادهم مالك؟
ادهم: هو انا صاحي دلوقتي ولا نايم وبحلم انك مراتي وانك حاليا في حضني؟؟؟
ليلي: انا اهو في حضنك؟؟؟ اللي فات كان كابوس يا حبيبي حاول بقي ترتاح شويه
كل ده علشان زعلتني
ادهم: انا مقدرش ازعلك اصلا
ليلي: انا بحبك قوي
اخدت راسه علي صدرها وضمته جامد قوي
ليلي: ودلوقتي نام في حضني واهدي واوعي تخاف انا جنبك وعمرك ما هتخسرني ما تخافش ابدا
حاول ادهم ما ينامش لانه خايف يصحي ما يلاقيش ليلي جنبه او تتطلع وهم بس النوم غلبه ونام
صحي من نومه وملقاش ليلي جنبه
ادهم: ليلي ___ ليلي
طلعت ليلي من الحمام
ليلي: انا اهوه مالك صوتك عالي كده ليه؟
اول ما شافها اخد نفس بصوت عالي ونام تاني علي السرير لما اطمن انها موجوده وانه مش حلم
ليلي جت جنبه
ليلي: مالك في ايه؟ نفس الكابوس تاني؟
ادهم: متشغليش بالك المهم انك جنبي وانك بخير _____ اصلا الكابوس ده ما بيفارقنيش بس المره دي باضافات جديده المهم ما علينا سيبك من الموضوع ده قومي نفطر ونخرج مش جعانه؟؟
ليلي: جعانه طبعا
ادهم ضحك وهيا
خرجوا وفطروا بس ادهم كان مختلف بيضحك كتير منطلق كده
ليلي: احكيلي بقي
ادهم: احكيلك ايه؟
ليلي: الكابوس ولا ده كان حجه بس علشان تشوف بطني
ادهم ضحك بصوته كله ودي كانت اول مره ليلي تشوفه بيضحك كده او يمكن تكون دي اول مره ادهم يضحك كده
ادهم: اولا انا مش محتاج اتحجج وبعدين انا لو هتحجج علشان اشوف حاجه مش هتبقي بطنك
ليلي: ايه اللي انت بتقوله ده انت قليل الادب علي فكره
كانت بتتكلم بهزار طبعا
ادهم: وان مكنتش هقل ادبي معاكي هقله مع مين هاه؟ لو مضايقه انا ممكن اقل ادبي مع واحدة تانيه عادي يعني
ليلي: ن____عم. ده انا اقتلك بص بس لواحده تانيه وشوف انا هعمل فيك وفيها ايه
ادهم: لا يا قمر انا اصلا مكتفي بالقمر اللي معايا ما تقلقيش
ليلي: المهم بقي احكيلي
ادهم: احكيلك ايه؟
ليلي: تاني هنعيد تاني
ادهم: سيبك انتي المهم اكلتي خلاص؟ تعالي نتمشي شويه
خرجوا بيتمشوا وادهم واخدها في حضنه ومنطلق جدا ومختلف جدا
كان الاول بيهتم بالناس وشكله ايه وما ينفعش ياخدها في حضنه او يقرب منها لكن دلوقتي بيعمل كل ده
ليلي: انت النهارده مختلف
ادهم: مختلف للاسوأ ولا الاحسن؟؟
ليلي: للاحسن طبعاً،،،، حساك كده مشرإب
ادهم: مش ايه؟
ليلي: ههههههه قصدي منفتح منطلق كده يعني
ادهم: اممممم شوفي يا ستي الحكايه ومافيها ان الحياه اقصر من ان الواحد يعمل حساب لكل واحد او انه ميعش كل لحظه بلحظتها
بس فأنا قررت اعيش كل لحظه معاكي استمتع بيها
ليلي: والقرار ده بعد كابوس امبارح،،،، مش هتقولي بقي الكابوس ده كان ايه؟
ادهم: انتي ليه شاغله بالك بالموضوع ده؟
سيبك بقي وبعدين ايه الفضول ده كله؟ حلم وخلاص
ليلي: ماشي يا ادهم
طول اليوم وليلي كل شويه تسأله وهو برضه مش عايز يقولها
مش عايز يفتكر الحلم او اي حاجه فيه بس هيا فاكره انه بيرخم عليها وخلاص
اخر الليل وهما مع بعض فجأه ليلي
ليلي: عايزه اعرف حلمت بايه؟
ادهم: تاني انتي ما بتمليش؟
ليلي بعدت عنه شويه
ليلي: انت مش عايز تقولي ليه يعني؟
ادهم: انا مش عارف انتي مهتمه كده ليه
ليلي سكتت وما ردتش
ادهم: ولا انتي قصدك يعني اني مش قرب منك غير لما تعرفي؟؟؟ امممم
قام ادهم وقف وبيلبس هدومه وده جنن ليلي لانها متخيلتش رد فعله ده ابدا
ليلي: انت رايح فين؟
ادهم:رايح مطرح ما رايح نامي انتي
ليلي: ادهم ادهم
مردش عليها وسابلها الاوضه كلها وخرج يتمشي علي البحر
ساعات بيحس بحب ليلي وساعات بيحس انه مجرد تجربه جديده بالنسبالها او حاجه بتتسلي بيها وبكره تزهق
ساعات كتير بيحس انها ما بتفهموش او ما بتحسش بيه
ليلي في الاوضه رايحه جايه بتفكر تروحله ولا تطنشه... هيا عايزه تعرف كل حاجه تخصه الصغيره قبل الكبيره مش جريمه يعني
"لا بس انا غلطانه زودتها شويه "
راحت ليلي تدور عليه لحد ما شافته قاعد علي الشط
ليلي: بقي القعده لوحدك احلي من القعده معايا؟؟؟؟
ادهم :________
ليلي: فاكر لما كنا بنسرق الحظات علشان حتي نلمح بعض؟؟
ادهم: فاكر بس ساعتها مكنتيش بتشرطي عليا كان اهم حاجه عندك اني تشوفيني مش دلوقتي انتي في حضني وبتفكري ازاي تلوي دراعي... انا اه بحبك بس ما بيتلويش دراعي ومش الموضوع اللي في دماغك ده اللي هيلوي دراعي نهائي
مش دي دخلتي ابدا
ليلي: انا مش قصدي كده ابدا وعلي فكرة انا كنت واخده الموضوع بهزار انت قلبته جد زي حاجات كتيره ابقي بهزر فيها ومره واحده الاقيك قفشت
ادهم: اولا ده مش هزار ما ينفعش ابقي معاكي ومره واحده الاقيكي بتشرطي عليا كده
ثانيا انا يا ستي راجل معقد وما ليش في الهزار وانتي عارفه كده كويس لاعمري هزرت مع حد ولا حد هزر معايا فمبفرقش بين الهزار والجد
ليلي: طيب علي العموم يا سيدي حقك عليا ما تزعلش مني مش ههزر بالطريقه دي تاني ومش هخرج بره الموضوع تاني خلاص بقي مش بحبك تزعل او تضايق مني
قعدت وراه واخدته في حضنها وهيا بتكلمه
ليلي: حقك علي قلبي
ادهم: خلاص
ليلي: مش باين عليك انه خلاص
ادهم: لا عادي بس مخنوق شويه
ليلي: ينفع افضل معاك ولا عايز تبقي لوحدك
قامت وقعدت قدامه
ادهم: انا عمري كله لوحدي خليكي طبعا
شدها قعدها علي رجليه وفضلوا قادين ساكتين باصين للبحر وهو ضاممها في حضنه
ادهم: هو انتي ليه مصره تعرفي حلمت بايه؟
ليلي: لانك امبارح قمت زي المجنون خايف قوي قوي وبعدين النهارده كنت مختلف قوي وبعدين احنا اتفقنا نتشارك في كل حاجه
ادهم: انا مش قصدي اني اخبي عليكي بس مش عايز افتكره وانتي كل شويه مصره تفكريني بيه
ليلي: انا اسفه مفكرتش كده خلاص انساه
وبعدشويه وهما ساكتين
خبي وشه في رقبتها واخد نفس طويل
ادهم: حلمت يا ليلي اني صحيت من نومي في شقتي وما لقتكيش جنبي ورحت الشغل لقيت مديري بيكلفني بالمهمه بتاعت بلدكم نفس الكلام كله بيتعاد وبعدها اكتشفت ان مهمتي لبلدكم كانت حلم وانتي حلم وحبنا حلم ورحت بلدكم
ليلي: ووقعت في حبك من تاني
ادهم: لأ..... كنتي مخطوبه لحمدي وبتحبيه وقعدت في بلدكم حاولت اقرب منك بس ما عرفتش كل حاجه حصلت عدتها الا حبك وفي الاخر لما قابلت رئيس العصابه معرفتش انقذك منه
ليلي: اغتصبني؟؟؟؟
ادهم: لا بس قتلك... ضربك بالسكينه في بطنك وموتي بين ايديا
ليلي: علشان كده قمت تصرخ وشفت بطني
ادهم: كنت عايش كل لجظه كانها حقيقه حسيت بكل لحظه في الحلم ده وفي الاخر رئيس العصابه طلع ابويا وقالي انه قتلك علشان انا بحبك..... علشان يضمن اني افضل حزين لاخر لحظه في عمري لانه عارف ان موتك معناه موتي انا
ليلي لفتله وضمته
ليلي: ادهم حبيبي بصلي.... محدش هيقدر يبعدني عنك ابدا ابدا انا في حضنك وهفضل علي طول في حضنك
عدي الليل وعدي شهر العسل ورجعوا بلدهم
تاني يوم سهرانين واخر الليل ادهم ساب ليلي وقام الحمام ولما خرج بيلبس
ليلي: سيادتك رايح فين؟
ادهم: رايح شغلي
ليلي: انت مش واخد بالك الساعه كام؟
ادهم: الساعه 4 انتي بقي مش واخده بالك ان قدامي 6 ساعات علشان اوصل يعني هوصل علي 10 وهكون متأخر حوالي ساعتين
ليلي: امممم بس انا مش عايزاك تروح خليك ما لحقتش اشبع منك شهر العسل عدي بسرعه قوي
قامت وحضنته ومتشعبطه في رقبته
ليلي: خليك النهارده وروح بكره
ادهم: حبيبه قلبي انا اجازتي خلصت من اسبوع فات ومش هينفع اتاخر اكتر من كده وبعدين انتي عارفه ان انا لو بايدي مش هتحرك اصلا من جنبك بس لازم اشتغل
ليلي: طيب هترجع امتي؟
ادهم: والله ما اعرف انا عندي راحه ساعتين الظهر بس ممكن ما اخدهمش واخرج بدري اخر النهار بس حتي لو خلصت بدري واتحركت هوصل هنا الفجر هطلع تاني امتي؟
ليلي: انا مقدرش يعدي يوم ما اشوفكش فيه ماليش دعوه اتصرف هتوحشني
ادهم: سيبها للظروف يدوب كده الحق اتحرك سلام
فضلت متشعبطه فيه وهو مش عارف يسيبها ولا عايز يسيبها بس لازم يروح شغله
فضل طول النهار في شغله وكان هيموت وينام ولو حتي ساعه بس مفيش وقت
اخيرا خلص بدري علي الساعه 6 استأذن مديره يمشي وطبعا لان مديره عارف الشروط اللي عليه وافق يمشيه بدري
وقاله انه لازم يشوف حل للموضوع ده لان كده مش هينفع
راح شقته وقال يريح شويه واتصل بليلي
ليلي: لا زعلانه زعلانه كتير كمان
ادهم: ليه بس وانا اقدر علي زعلك
ليلي: ما افتكرتنيش النهار كله ولا عبرتني
ادهم: قلبي انتي بس ما فضيتش لحظه ويدوب داخل البيت حالا
ليلي: ايه ده كمان روحت البيت :؟؟؟؟ يعني انا طول النهار هموت عليك وبعد الدقايق علشان تخلص وتيجي وانت خلصت ورحت بيتك وانا اخبط دماغي في الحيط ولا في اي اعتبار لمشاعري ولا انك واحشني ولا اني هموت واخدك في حضني لا سعلانه
ادهم: سعلانه؟؟؟؟ طيب انا هموت وانام حتي ساعه
ليلي: فكر كده للحظه تنام ساعه وتيجي هنا متأخر ولا تيجي هتوصل هنا علي 12 وتبقي في حضني الليل كله وهدلعك اخر دلع
ادهم: هتدلعيني؟؟
ليلي: هدلعك بس انت تعال
ادهم: المشكله هوصل مش هيبقي فيا نفس اتنفس اصلا
ليلي: خلاص يا ادهم براحتك.... يالا سلا م
ادهم: ليلي استن___-_-
قفلت السكه وعرف ادهم انها زعلت
"عقله : نام انت محتاج تنام
قلبه: وتسيبها زعلانه تقدر؟؟؟
عقله: هيا المفروض تقدر تعبك وكان المفروض تقولك ريح النهارده
قلبه: هيا بتحبك وانت واحشها هو انت محدش يحبك تشتكي ولما حد يتعلق بيك برضه تشتكي؟؟؟ مش تحمد ربنا عليها وعلي حبها ليك؟؟؟
عقله: طيب هتروح وهتوصل نص الليل تقعد ساعتين وما تضحكش علي نفسك انك هتنام هترجع امتي وبكره مش هينفع تتأخر علشان الاجتماع اللي وراك
قلبه: انت لسه هتفكر وتضيع وقت قوم روح لحبيبتك وما تنساش انها لسه عروسه ومحتاجه جوزها يدلعها انت وافقت علي شروط ابوها وهيا قالتلك متوافقش يبقي مش ذنبها قوم
طبعا ادهم قام ووصل علي اخره فضل الساعتين في حضنها هيا واحشاه وهو واحشها وما نامش طبعا وعلي الساعه 3 قام علشان يلبس
ليلي: انت هتسوق ازاي وانت ما نمتش
ادهم: سيبيها علي الله... وبعدين انا بطبق باليومين مش اول مره يعني
ليلي: طيب ما تروحش
ادهم: تاني؟؟؟ مش هينفع
وفضل ادهم رايح جاي يطبق باليومين ويريح يوم وطبعا ولا عارف يبسط ليلي او يرضيها ولا عارف يدي شغله حقه
ومهما يعمل ليلي زعلانه وعايزاه يفضل اكتر
وشغله كل يوم يتخانق مع مديره
جتله مهمه يسافر فيها بره مصر وطبعا ليلي كانت هتجنن انه كمان هيسافر
سافر وفضل شهر غايب ورجع واخد اسبوع اجازه ليلي كانت طايره بيه
خلصت الاجازه ورجع نفس الوضع القديم بيسافر ويرجع وكل ما يتقابل مع ابوها بيتخانق معاه
عدي كذا شهر ليلي حاليا كل يوم بتتخانق مع ادهم ومديره بيتخانق معاه وابوها مش سايبه في حاله
اخر مره اتقابلو فيها كان يدوب ادهم داخل من السفر
ام ليلي: حمدلله علي السلامه يا حبيبي
ادهم: الله يسلمك يا ست الكل
ام ليلي: انت هتخلص كده يا ابني ريح وتعال خميس وجمعه كفايه
ليلي: وانا اقعد طول الاسبوع لوحدي عايزاني اتجنن صح؟
ادهم: سلامتك من الجنان يا قمر
راح واخدها في حضنه
عم محمود: اضحك عليها بقي بحضن وكلمتين
ادهم:اهلا ازي حضرتك ما اخدتش بالي من حضرتك
عم محمود: وانت تاخد بالك ليه اصلا؟ .... هو انتو ما بتخلفوش ليه؟ ولا انت معيوب ولا ايه؟
ام ليلي: ايه اللي انت بتقوله ده يا حج؟
عم محمود: ايه اللي بقوله بقالهم اكتر من 7 شهور متجوزين
ادهم: لا اطمن انا مش معيوب بس اللي اعرفه انه علشان يحصل حمل اصلا لازم يكون في استقرار واحنا ابعد ما يكون عنه
عم محمود: اه انت عايز تقول ان انا السبب
ادهم: طبعا حضرتك السبب
عم محمود: وليه متبقاش انت معيوب
ادهم: افندم؟؟ معيوب ؟؟؟ انا مش هرد عليك
ليلي: ممكن تسكتو انتو الاتنين بقي بابا كفايه لو سمحت
عم محمود: ايوه طبعا ما انتي لازم تبقي في صفه خلاص بقيتي مراتي لكن ما عدتيش بنتي
ادهم: انا تعبان وعايز ارتاح بعد اذنكم
عم محمود: علي فكره انا لسه ما خلصتش كلامي معاك
ادهم: اتفضل قول حضرتك عايز ايه؟
عم محمود: تروح تعمل تحاليل
ادهم: انت بتتكلم بجد؟ ؟
ام ليلي: بس بقي يا حج انت زودتها قوي انت مالكش دخل بالموضوع ده هما حرين مع بعض
عم محمود: ما اطمنش يعني علي بنتي ومستقبلها
ادهم: وده اللي هيطمنك عليها حاضر هروح بكره اعمل التحاليل بعد اذنكم انا طالع انام وما تصحينيش
سابهم وطلع
ليلي: انت هتفضل لحد امتي تعامله كده؟
ابوها: انا عملت ايه؟ انا عايز اطمن عليكي غلطت
ليلي: اسلوبك نفسه انا وهو كان ممكن نتفق ونروح نكشف مع بعض بس مش كده
ابوها: وياخدك في حضنه ويضحك عليكي بكلمتين ويخلص الموضوع على كده
ليلي: انا بجد مش عارفه اقولك ايه؟
ابو ليلي اصر تاني يوم يروح مع ادهم وهو هيعمل التحاليل وكملو خناقهم مع بعض
ادهم عمل التحاليل وروح ابو ليلي وسافر من غير ما يرجع البيت وطبعا ليلي مقدرتش تلومه
طلعت بعدها نتيجه التحاليل وابوها اللي راح بنفسه يستلمها واتفاجئ لما شاف النتيجه
للمتابعه اترك تعليق
الحلقة السادسة من الجزء الثاني
المشوة
ابو ليلي جاب تحاليل ادهم واتفاجئ انها سليمه جدا
عرضها علي كذا دكتور وكلهم اكدولو ان التحاليل سليمه وانه ممكن يخلف عادي
طبعا ادي التحاليل لبنته ومرضيش يتواجه مع ادهم نهائي
عدي كام شهر وجه شهر رمضان وده اول رمضان يعدي عليهم
عم محمود عازم العيله كلها عنده اول يوم
ادهم اخد اجازه اول يوم علشان يقضيه مع مراته وطبعا ليلي عايزه تروح لابوها علشان تقابل العيله كلها ويفطروا مع بعض
ليلي: ادهم هنفطر النهارده عند بابا
ادهم: ده مين قال كده؟
ليلي: بابا عازم العيله كلها وقالنا
ادهم: قالك انتي ما قاليش انا
ليلي: وانا ايه وانت ايه؟
ادهم: انتي بنته لكن انا واحد مش بيطيقه ابدا
ليلي: لا متقلش كده،، المهم نفطر هناك
ادهم: عايزه تروحي انتي روحي افطري مع عيلتك واتبسطي
ليلي: ده اول رمضان لينا يبقي نفطر مع بعض
ادهم: طيب خليكي هنا ونفطر مع بعض
ليلي: ادهم احلي حاجه في رمضان اللمه والعيله والكل يتجمع
ادهم: وعلشان كده بقولك روحي افطري معاهم
فضلت ترغي في الموضوع ده كتير وهو رافض يروح
مامت ليلي كلمتها تاكد عليها فقالتلها ان ادهم مش عايز يجي وانها لو هو مجاش هيا كمان مش هتيجي
مامت ليلي كلمت ادهم وفضلت تترجاه يجي يقضي معاهم اول يوم وطبعا تحت الحاحها وافق يروح
راح علي الاذان بالظبط وقعدوا يفطروا الكل متجمع بيهزر وبيضحك وادهم في النص حاسس انه غريب عن الناس دي
نظرات ابوها ليه خلته يندم انه وافق يجي
خلصوا فطار وقاموا وقعدوا الرجاله كلها مع بعض
ادهم الكل بيحترمه جدا وبيتكلم معاه بحساب الا حماه طبعا
ومن ضمن الحوار اللي كانوا بيتكلموا فيه
عم محمود: يا اخي في ناس كده بارده ما بتحسش نهائي
اخوه: فعلا في ناس بتبقي الواح بعيد عنك
عم محمود: الواحد من دول يبقي عارف انه مش مرحب بيه وان محدش طايقه وبرضه يجي ويقعد وياكل ويشرب ولا كأن البيت بيته ومع ان محدش عزمه بس تقول ايه برود
اخوه: الدنيا يا ما فيها المهم عملت ايه في الموضوع اللي قلتلك عليه
كملوا هما حوارهم وادهم قاعد حاسس ان كل كلمه كانت موجه ليه
وكان نفسه يضرب نفسه انه سمع كلام مراته وجه
استأذن وقام علشان يمشي طبعا ليلي طلعتله
لقته ماشي فخرجت وراه
ليلي: انت رايح فين السهره لسه طويله؟!
ادهم: انا همشي خليكي براحتك
ليلي: مالك في ايه؟
ادهم: وانتي بيهمك مالي ولا بفرق معاكي اصلا؟؟
ليلي: ادهم في ايه؟ مين اللي ضايقك؟
ادهم: ياتري مين ممكن يكون ضايقني؟؟ ما تشغليش بالك وادخلي سلام
ليلي: ادهم قولي الاول اتخانقتو ليه؟
ادهم: نفسي تحسي بيا مره وتعملي حساب لمشاعري... قولتلك مليون مره مش عايز اكون في مكان وجودي فيه مش مرغوب واخدت عهد علي نفسي اني مش هقعد في بيت اهله رافضيني وانتي مصره ديما تحطيني في الوضع ده
ليلي: مين قال ان وجودك مش مرغوب فيه
انت بيتهيألك
ادهم: فعلا بيتهيألي ان ابوكي بيكرهني وبيتهيالي انه مش طايقني تصدقي انا اصلا بتبلي عليه
ليلي: يوه يا ادهم بقي انا ما صدقت اخدت يوم اجازه وبعدين شويه وهنصوم تاني يبقي تفضل معايا
ادهم: طيب قولي لنفسك.... يالا بيتنا ونسهر مع بعض
ليلي: مش علشان انت مجربتش احساس العيله ولمتها يبقي تحرمني انا منها
ادهم اتصدم بكلامها
ادهم: ايه اللي بتقوليه ده؟ احرمك من عيلتك؟؟؟ لا يا ستي ولا احرمك ولا تحرميني سلام
ليلي: ادهم استني مش قصدي ادهم استني لو سمحت ادهم
ادهم سابها وخرج ومردش عليها
وهيا حست ان التعبير خانها مكنش قصدها ابدا تجرحه كده وتعايره بموضوع العيله
شويه وقررت تحصله علي البيت وتسهر معاه
راحت البيت لقته فاضي اتصلت بادهم رد عليها وقالها انه سافر لان وراه شغل
وطبعا ده كان كلام مش اكتر
حاولت تصالحه بس رفض يسمعها
اخد اسبوعين من غير ما ينزل واخيرا نزل
ليلي: اخيرا افتكرت ان ليك حد هنا؟
ادهم: انا قلت اسيبك تشبعي عزومات انتي وعيلتك وبعدها ابقي اجي بدال ما احرمك من العيله ولا ايه؟
ليلي: انا مكنش قصدي انا التعبير خاني مش اكتر اسفه
ادهم: ولا خانك ولا حاجه انا فعلا ما اعرفش جو العيله ولا العزومات ولا ليا فيه وانا صغير كنت بعيد عن جو العيله تماما حتي اكلي كان لوحدي ومكنش مسموحلي اشاركهم اكلهم ولما روحت لعيلتي اللي اتبنتني برضه مكنش مسموحلي اشاركهم ففعلا ما اعرفش جو العيله بس عمري ما فكرت احرمك منه ابدا
انا اصلا متمرمط وطالع عيني في السفر رايح جاي علشان ما تبعديش لحظه عن عيلتك يبقي ما تجيش في الاخر تقولي بحرمك منهم
ليلي: مكنش قصدي وبعدين انت ايه اللي زعلك وخلاك مشيت
ادهم: ما سالتيش ابوكي ليه؟
ليلي: سالته وقال انه مكلمكش
ادهم: هو فعلا ما كلمنيش هو بس كان بيرمي الكلام والحدق يفهم كان بيتكلم عن الناس البارده اللي تدخل بيت وهيا عارفه ان وجودها مش مرغوب فيها وتاكل وتشرب
ليلي: ممكن ما يكونش قصده عليك
ادهم: احنا هنضحك علي بعض ولا ايه؟
المهم اقفلي الكلام بقي
سابها وطلع اوضته المسافات بتبعد بينهم والحواجز بتتحط بينهم ومحدش فيهم قادر يعمل حاجه
خلص رمضان وجه العيد وطبعا ليلي مع اهلها والمره دي ادهم رفض نهائي يروح معاها
راح بس الصبح سلم علي حماته وعيد عليها ومشي وليلي قضت يومها مع عيلتها واخر النهار روحت ولامت ادهم انه مكنش موجود معاها
بتعدي الايام والفجوه بتوسع اكتر واكتر وابو ليلي بيبعد بينهم اكتر واكتر
الحب اختفي
كانه مكنش موجود اصلا وفضلت بس المشاكل والخناق ولوم وبس
لحد في مره ليلي كانت عندها حفله كبيره في شغلها وهيا كانت المسؤله عن تنظيمها
شغلت جزء كبير جدا من وقتها
كانت كل شويه تاكد علي ادهم انه لازم يكون جنبها في الحفله دي لانها مهمه بالنسبالها جدا
وادهم في كل مره بياكدلها ان مفيش حاجة ممكن تأخره عنها ابدا
ادهم في اليوم اللي قبل الحفله استأذن بدري وطبعا اخد اليوم اللي وراه اجازه علشان يقدر يقضيه مع مراته
راكب عربيته وسايق رايح لمراته كان تعبان جدا فكر كذا مره يقف يريح شويه وبعدها يقول لا كل ما يوصل بدري احسن محدش يضمن الطريق لانه لازم يكون موجود
واخيرا التعب اتمكن منه ونام للحظات وهو سايق وطبعا اللحظات دي كانت كفيله بانها تقلب عربيته
ادهم يدوب غمض عنيه اتفاجئ بعربيه نقل قدامه وبزماره عاليه
حاول يفادي العربيه بس لانه سايق بسرعه جدا العربيه اتقلبت منه واتدحرجت كذا مره علي الطريق قبل ما تستقر
صاحب العربية النقل وقف بسرعه وراح خرجه بره العربيه
ادهم كان بيقاوم انه يفضل فايق وعمال يردد اسم ليلي وانه لازم يروح وما يتاخرش
صاحب العربيه طلب الاسعاف ونقلوه لاقرب نقطه اسعاف يسعفوه وبعدها يحولوه لاقرب مستشفي
فاق ادهم وهو في المستشفي بص حواليه لقي النهار طلع قام بسرعه بس الدكتور مسكه
الدكتور: انت فاكر نفسك رايح فين؟
ادهم: انا لازم امشي حالا
الدكتور: انت هتخش العمليات حالا لانك عندك نزيف داخلي
ادهم: انا كويس ولازم امشي
الدكتور: حاليا بس خلال فتره بسيطه جدا هتبدا تنزف وهتوصل لمرحله صعب ساعتها انقاذك
ادهم: مش مهم انا لازم امشي
الدكتور: وانا قولتلك لا
ادهم: انت ملكش حق تققر نيابه عني همشي علي مسؤليتي
الدكتور: براحتك بس البوليس اللي بره ده هتعمل في ايه؟
ادهم: هتصرف
وفعلا ادهم خرج علي مسؤليته
وقابل بتوع البوليس وقال ان هو اللي غلطان وهو مسؤل لانه نام وقابل السواق واعتذرله ولسه هيمشي لقي سواق النقل مستغرب
السواق: هما سمحولك تخرج؟
ادهم: انا سمحت لنفسي... ممكن اسالك انت كنت رايح فين
السواق كان رايح نفس بلد ليلي وادهم طلب منه يوصله في طريقه
السواق وافق بس طول الطريق خايف علي ادهم وحاسس انه هينهار في اي لحظه
علامات الالم كانت باينه في كل ملامحه
في كل مطب العربيه بتاخده
السواق: اتمني انها تستاهل
ادهم: مين هيا؟
السواق: اللي انتي هتموت نفسك عليها؟؟؟ ليلي اعتقد كنت بتردد في اسمها وانا بسحبك من العربيه
ادهم: دي مراتي وكان عندها اليوم مهم وانا وعدتها اني هكون موجود بس للاسف بقينا الظهر اهوه وانا مقدرتش اكون معاها
السواق: بس دي ظروف خارجه عن ارادتك وهيا اكيد هتقدر
ادهم: اكيد طبعا بس كنت حابب اكون معاها وانفذ وعدي ليها مش اكتر وبعدين مش عايزاها تتخض لو حد قالها اني عملت حادثه
سكت ادهم بعدها والسواق كمان سابه يرتاح شويه قبل ما يوصل
ليلي استنت ادهم طول اليوم وبتتصل بيه بس تليفونه مقفول لانه اتكسر في الحادثه
طول اليوم ابوها بيقنعها ان ادهم مش بيحبها وانه بس مصدق انه لقي واحده بتحبه مش اكتر وكل اللي بيعمله ده حركات يضحك عليها بيها
ليلي بتحاول ما تفكرش في كلام ابوها بس الزن الكتير بياثر طبعا
الحفله خلصت وادهم ما ظهرش ولا حتي اتصل بيها
وابوها في كل لحظه بياكدلها انه لو بيحبها كان ساب الدنيا كلها علشان يجيلها
اخيرا علي العصر كده ادهم وصل
السواق صحاه وقاله انه وصل البلد وصفله ادهم البيت ووصله وجاه ينزل مقدرش يتحرك
السواق نزله وسنده وعرض علي ادهم يوصله المستشفي بس رفض وخاف علي شعور ليلي لو دخل وحد مسنده
اصر يدخل لوحده واول ما دخل كانت ليلي قاعده هيا وابوها مستنياه
ويدوب خطي خطوتين ليلي وقفت وبصتله
ليلي: هو طلب وحيد طلبته منك واترجيتك تكون موجود ووعدتني وخليت بوعدك
ادهم: اكيد كان خارج ارادتي والا كنت هاجي
ليلي: ماهو طبعا لازم يكون خارج ارادتك لان انا مش في اولوياتك شغلك اهم مني مليون مره انا اطلع ايه جنب مسؤليات ظابط المخابرات اللي امن البلد في ايده؟؟؟؟ ايوه انت شغلك مهم بس انا انانيه وعايزه اكون انا رقم واحد في حياه جوزي وللاسف ده مش بيحصل
ادهم: ليلي عمر ما شغلي جه قبلك ابدا انتي فعلا ليكي الاولويه
ليلي: تصدق صح ماهو باين
ادهم: طيب اعرفي الاول ايه اخرني
عم محمود: تسمع ايه؟ حجه جديده وسبب جديد واهو اي كلام تضحك عليها بيه
ادهم: انا عمري ما ضحكت عليها بكلام وبعدين لو سمحت ما تدخلش بينا
عم محمود: مش هتدخل.... انا مستنيكي بره
اخد شنطه في ايده وخرج
ادهم: ايه الشنطه دي؟ ومستنيكي ليه؟
ليلي: علشان انا تعبت استناك تعبت والنهارده انت جبت اخرها
ادهم: تعبتي؟؟؟؟ انتي اللي تعبتي؟؟؟؟ ده علي اساس ان ده بمزاجي مش ابوكي اللي فرض علينا الوضع ده؟ ؟
ليلي: وانت وافقت
ادهم: ودلوقتي بتلوميني اني وافقت علي شروط ابوكي!؟؟؟
ادهم كان خلاص هيوقع من طوله ومش قادر يتنفس بس مرضيش يضعف قدامها
ليلي: كان ممكن تشوف اي حل تاني بس المهم انت النهارده اتخليت عني كنت محتجالك وملقيتكش
ادهم: النهارده بس مكنتش جنبك وانتي كام مره محسيتيش بيا وماوقفتيش جنبي
ههههه ده انتي دلوقتي مش حاسه بيا
امشي ياليلي براحتك مش همنعك
وقف ادهم علي جنب لحد ماهيا خرجت ومشيت وهو وقع علي الارض
ليلي مشيت بتعيط وابوها بيقنعها انها عملت الصح وان الخطوه دي كان لازم تاخدها من زمان وانها مش المفروض تندم
وبعدين هو شويه وهيجيلها يبوس ايديها ويترجاها ترجع وساعتها تبقي ترجعله بس يكون عرف قيمتها
ادهم واقع في الارض وشريط حياته كلها بيمر قدامه وحس انها خلاص النهايه وفجأه شاف ظل فوقه
للمتابعه اترك تعليق
الحلقه السابعه من الجزء الثاني
المشوة
ليلي مشيت بتعيط وابوها بيقنعها انها عملت الصح وان الخطوه دي كان لازم تاخدها من زمان وانها مش المفروض تندم
وبعدين هو شويه وهيجيلها يبوس ايديها ويترجاها ترجع وساعتها تبقي ترجعله بس يكون عرف قيمتها
ادهم واقع في الارض وشريط حياته كلها بيمر قدامه وحس انها خلاص النهايه وفجأه شاف ظل فوقه
لقي ادهم ناسي ادويته اللي اخدها من المستشفي فرجع علشان يديهاله
اول ما وصل لقي الباب مفتوح ويدوب وقف قدامه لمح ادهم علي الارض بينزف من بقه
طلب الاسعاف بسرعه وجم اخدوه علي المستشفي ودخل العمليات علي طول بسبب النزيف الداخلي
ليلي طول الليل بتستني تليفون من ادهم يحايلها او يكلمها او يقولها اي حاجه بس استنت واستنت واستنت
والصبح قررت انها تروح تلم هدومها واول ما وصلت بيتها الجيران اتلموا عليها يطمنو علي ادهم منها
حد من الجيران: صباح الخير يا ليلي طمنينا جوزك عمل ايه دلوقتي قلقنا عليه ؟؟
ليلي: جوزي؟؟؟؟ ليه هو ماله؟؟؟
حد تاني: بعد ما مشيتي الاسعاف جت واخدوه
ليلي: اخدوه؟؟ اخدوه فين؟ هو ماله؟
حد: هو انتي معرفتيش؟؟؟ احنا ما نعرفش بس شفناه والاسعاف شايلينوه
ليلي بصت لابوها اللي جه معاها بصه لوم وعتاب عمره ما هينساها
وجريت علي المستشفي وطبعا ابوها اللي وداها
وصلت وعرفت انه لسه مخرجش من العمليات ومعرفتش اي حاجه عنه
كل اللي عرفته كان من السواق اللي كان قاعد مستنيه يطمن عليه
حكالها السواق كل حاجه من اول الحادثه لحد ما وصله لباب بيته
السواق: طول الوقت كان كل همه انه يجي لمراته علشان يكون معاها
ليلي فضلت تعيط وتعيط
ليلي: لو جراله حاجه عمري ما هسامح نفسي ولا هاسمحك ابدا
عم محمود: وانا اعرف منين انه كان عامل حادثه؟؟
ليلي: كان لازم التمسله عذر لانه عمره ما اتاخر عليا ابدا بمزاجه
عم محمود: ولما انتي عارفه كده سمعتيني ليه؟ الا اذا كنتي انتي مش واثقه فيه يبقي ما ترميش غلطك عليا
ليلي: فعلا عندك حق ده كان غلطي اني سمعتك او اديتك فرصه تتدخل في حياتي
بس من هنا ورايح مش هسمحلك تدخل بينا تاني ابدا
ادهم خرج من العمليات وكانت حالته حرجه بس الوقت كفيل بعلاج كل الجروح
بدا يتحسن بس رافض يتكلم نهائي مع ليلي
ما بيردش عليها نهائي ومهما تعمل بيبعدها عنه
اخيرا خرج من المستشفي وليلي معاه في اوضه نومهم
بيحاول يقلع هدومه فقربت تساعده فرفض
ادهم: طول عمري لوحدي وحتي لما بتصاب ببقي برضه لوحدي فمش محتاج مساعدتك
ليلي: ادهم ارجوك سامحني
ادهم: اسامحك علي ايه بالظبط؟ علي عدم احساسك بيا نهائي ولا علي بعدك عني ولا علي تفضيلك كل لحظه ومناسبه انك تقضيها مع عيلتك وتسيبيني لوحدي ولا علي انانيتك في كل لحظه ولا عدم احساسك بوجعي وانا بنزف ولا انك مديتينيش فرصه حتي اقولك انا اتاخرت ليه
ليلي ردها كان عياط متواصل
ادهم: اي حد بيبقي راجع من سفر بيخلوه ياخد نفسه الاول وبعدها بيتكلمو لكن انتي ما استنيتيش حتي ادخل من الباب كاني عدو مستنياه مش جوزك اللي كل يوم والتاني بيسافر 6 ساعات رايح وزيهم راجع علشان بس يقضي ساعه او ساعتين معاكي
ليلي: ارجوك سامحني..... سامحني علي كل حاجه وانا اوعدك اني هغير كل حاجه
كل حاجه هتتغير
ادهم: وانا حاليا معنديش استعداد لاي شيئ
ارجوكي انتي سيبيني لوحدي علشان ارتاح
ليلي: ارتاح بس خليني جنبك
ادهم: لو هتصري انك تفضلي هنا هسيب البيت كله وامشي فما تجبرينيش اعمل ده
ليلي: ادهم انا
قاطعها: خلاص يبقي امشي انا
ليلي: لا استني همشي
مشيت ليلي وكل يوم تجيله وهو يمشيها تاني لحد ما اتحسن
ليلي: كفايه بقي كده
ادهم: كفايه ايه؟
ليلي: كفايه بعد
ادهم: انا مسافر النهارده
ليلي: هاجي معاك
ادهم: لا يا ليلي اسف بس محتاج فتره لوحدي
ليلي: وانا مش عايزه الفتره دي
ادهم: مش بقولك انانيه كل اللي بتفكري فيه نفسك وبس وانتي عايزه ايه
ليلي: لو حبي ليك انانيه يبقي ايوه انانيه
ادهم: لا مش الحب يا ليلي انانيه في مشاعرك اللي انتي عايزاه مهم لكن اللي غيرك عايزه مايهمكيش
ليلي: انا عايزه افضل معاك
ادهم: وانا محتاج فتره لوحدي وربنا يسهل
ليلي: فتره قد ايه؟
ادهم: الله اعلم بعد اذنك
سابها ومشي وهيا فضلت تراجع كل اخطائها
وكل حاجه عملتها
___________-________-_________-_______
في مكان تاني بعيد قاعده حنان في جنينه سرحانه ومحستش بجوزها وهو داخل
حسين: حنان
حنان: انت جيت من امتي؟
حسين: بقالي كتير واقف وبكلمك ومش بتردي سرحانه في ايه كده؟ ولا اقولك ما ترديش اكيد سرحانه فيه
حنان: انت عايز ايه مني دلوقتي؟؟؟
حسين: عايزك انتي ترجعيلي عايز مراتي
حنان: وانا عايزه ابني تقدر ترجعهولي؟؟؟
حسين: تاني ابنك؟
حنان مردتش عليه وسكتت
حسين: المهم النهارده السنويه بتاعت آيه بنتنا هتروحي معايا نزورها ولا لأ
حنان: هروح
راحو الاتنين وفضلو واقفين علي قبر بنتهم اللي ماتت صغيره بعد صراع طويل مع المرض ومهما ابوها حاول يعالجها الي ان فلوسه كلها مانفعتوش وما ساعدتوش
واقف ودمعه نزلت من عينه
حنان: ايه ده؟ هو انت بتحس زي باقي البشر
حسين: دي بنتي حبيبتي. عايزاني ايه؟
حنان: ماهو كان ابنك برضه؟
حسين: لا مش ابني
حنان: ابنك
حسين: تاني ابني؟؟؟؟
حنان: تاني؟؟؟؟ تاني وتالت والف ومليون انت بعدتني عن ابني وانا مش هسامحك ابدا
حسين: انتي اللي مش هتسامحيني؟؟؟؟ انتي؟؟؟ طيب وخيانتك ليا وابنك ده؟ ده تسميهم ايه؟ ؟ ادهم مش ابني
حنان: انا عمري ما خنتك وادهم ابنك
حسين: مش عايز اسمع اسمه ولما تحلفيلي ميت سنه مش هصدقك انتي حملتي فيه وانا مسافر يبقي ابني ازاي هاه؟ ؟ ولا انتي شايفاني عبيط
حنان: انا حملت فيه بعد رجوعك من السفر وهو اتولد بدري عن معاده
حسين: الدكتور قال انه مولود كامل وفي معاده
حنان: وانا قولتلك ان عمري ما خنتك ابدا
حسين: وابن عمك اللي جه وانا مسافر وبات في بيتي وانا مش موجود كان بيعمل ايه؟ ؟
حنان: وانا قلتلك مليون مره انه وصل بالليل من البلد ووقع علي السلم وهو داخل البيت جايب الحاجات اللي اهلي باعتنهالي ولما وقع رجله اتجزعت ومقدرش يتحرك وطلبتله الدكتور كشف عليه وقال ما يتحركش وتاني يوم الصبح اخواته وصلو بدري وخدوه البلد
حسين: وانتي متخيله اني مصدق الحوار ده كله وبعدين احمد قالي انكم سهرتو مع بعض
حنان: احمد كان عيل صغير
حسين: احمد وكان عيل صغير والخدم كانوا اجازه ليه اليوم ده؟ وقميص النوم اللي كنتي لابساه ومعاد الولاده نفسه
حنان: انا مديتهمش اجازه هيا الظروف جت كده ان في كذا حاجه حصلت
ومكنتش لابسه قميص نوم لما قابلت ابن عمي
مهما اقولك انت اخدت القرار
حسين: الخدم كل ظروفهم اتفقت انهم ياخدوا يوم اجازه
حنان: معرفش يا حسين صدقني
حسين: انا مش مصدقك وبعدين احمد شافك خارجه من اوضته اخر الليل بقميص نوم وزعقتيله ودخلتيه اوضته وقولتيله ما يطلعش منها ابدا
حنان: انا اخر الليل روحت عنده علشان اديله الدوا بتاعه لانه كان تعبان جدا وكنت برضه بهدومي وبعدين انت عارف ان احمد بيكدب كتير من صغره كان بيعمل العمله ويلزقها لاخوه وما تقولش انك مكنتش عارف انه بيكذب
حسين: هيتهمك ليه بحاجه زي دي انتي امه ممكن يكدب مع ادهم لكن معاكي كان صغير وكان لسه مفيش ادهم اصلا
حنان: هو كداب بطبعه ما اعرفش بس هو كداب وبعدين انت تصدق مين؟ ؟ انا حبيبتك
حسين: انتي وجعي
حنان: انت وجعتنا كلنا بايدك وحرمت ابنك منك وحرمتني منه
حسين: قولتلك ما تقوليش ابني
حنان: هفضل اقول لحد ما اموت انه ابنك وانت هتعرف الحقيقة في يوم وساعتها حتي الندم مش هينفعك
حسين: مش هندم ابدا
حنان: هو انت مش واخد بالك من اللي انت فيه
حسين: ايه اللي لنا فيه؟؟؟ انا احسن من الناس كلها
حنان: انت عمرك ما عشت يوم مبسوط حتي لما كنت بتعذبه ماكنتش مبسوط وبعدها مرض بنتك و سفرك بيها من بلد لبلد وحتي ابنك الكبير اللي انت علي طول بتفضله طلع ما بيخلفش يعني عمر ما هيكون عندك حفيد يورث امبراطوريتك دي كلها
كل ده ذنب عيل صغير بدال ما تحضنه عذبته
حسين: ولو الزمن رجع تاني هعيد كل ده
سابها ومشي وهيا دعوه جوه قلبها ان ابني ربنا يعوضه عن كل حاجه
________-_________-_________-_________-____
ادهم الايام بتعدي وحاسس ان في حاجز بينه وبين حبيبته ولا قادر يتجاهله ولا قادر
يتخطاه ويروحلها
وليلي بتحاول تقرب منه اكتر واكتر وبتحاول ترجع لليلي اللي هو حبها وعشقها
ليلي اللي كان اهم حاجه عندها راحته وسعادته وبدأت تراجع في كل حاجه حصلت وفعلا حست بنفسها قد ايه كانت انانيه في كل حاجه وندمت وقررت انها تغير كل حاجه
اخيرا ادهم الشوق والحنين لنصه التاني اتغلب علي الحاجز وقرر يسافرلها فاخد اجازه يومين وسافر ووصل اخر الليل
فكر انه يدخل يريح لحد ما يطلع النهار وبعدها يتصل بليلي تيجي من بيت ابوها
مكنش يعرف ان ليلي طول الوقت في بيتها مستنياه يدخل من الباب
دخل لقي كل حاجه مكانها هو فعلا محسش البيت ده قوي بس برضه عاش فيه لحظات جميله مع حبيبته
طلع علي فوق وفتح باب اوضه النوم واتفاجئ لما لقاها نايمه
فضل واقف يتامل فيها،،، عمره ما هيجي يوم يتعود فيه علي وجود الملاك ده في حياته
ليلي اجمل من انها تكون حقيقه موجودة في حياته
مكنش عا رف يعمل ايه يصحيها ولا يدخل جنبها وينام ولا ايه بالظبط؟ وفي نفس الوقت خايف انها تتفاجئ بوجوده
غير هدومه وراح جنبها ونادي عليها براحه
ادهم بهمس: ليلي..... ليلي انا جيت
ليلي فتحت عينيها مش مصدقه انها سامعه صوته لفت وشها براحه ولقته جنبها
ليلي: اخيرا يا ادهم اخيرا
رمت نفسها في حضنه لانها كانت حاسه انها محرومه من كل حاجه وفجأه ملكت كل حاجه
ليلي: وحشتني وحشتني وحشتني
ادهم: ولما انا بوحشك بتبعديني ليه عنك؟؟؟
سؤاله مكنش سؤال كان عتاب بين احباب
ليلي: مش هبعدك تاني ابدا ابدا استوعبت الدرس كويس
ادهم: ده مكنش درس انا ما بعدتش علشان اديكي درس انا بعدت علشان انتي بعدتني
انتي جرحتيني
ليلي: اسفه يا اغلي من روحي ده مش هيتكرر تاني ابدا من هنا ورايح مش هضغط عليك تاني ومش هطلب حاجه فوق طاقتك وهسمعك انت وبس
ادهم: وحشتيني
ليلي: ولما وحشتك ليه بتتكلم لحد دلوقتي
ادهم ابتسم واتكلم معاها بلغه تانيه هيا وهو مفتقدينها جدا
طلع النهار وابو ليلي راحلها زي كل يوم بيحاول ياخدها بيته وهيا بترفض
دخل البيت ونادي عليها بس ماردتش استغرب لانه كل يوم بيلاقيها محضره الفطار ومستنياه يفطروا مع بعض
طلع علي فوق يشوفها نايمه ولا ايه واول ما فتح الباب اتفاجئ بانها نايمه في حضن حد
كان هيجري يشدها لان وش اللي نايم معاها مش باين
عم محمود: ليلي ليلي؟؟؟ هيا وصلت لكده ؟؟؟ انتي يابت اصحي قومي بدال ما اقتلك وانتي كده انتي واللي معاكي ده فزي
ليلي وادهم صحيوا علي صوت ابوها بيزعق
ادهم دخل راسه تحت المخده وساب ليلي لابوها
واخد قرار انها لو سمحتله يدخل بينهم هيمشي بس المره دي من غير رجعه
ليلي: في ايه يا بابا صباح الخير صوتك عالي ليه؟؟
عم محمود: في ايه؟؟؟ يابرودك يابت فزي قومي من السرير
ليلي مش عارفه ابوها متنرفز كده ليه
ليلي: اهدي بس انت وقولي في ايه؟
عم محمود: قومي من السرير حالا
ليلي: في ايه؟ مش هينفع اقوم قدامك فهمت
عم محمود: هيا وصلت انك تجيبي راجل البيت ويابجاحتك بتتكلمي كده عادي انتي عايزه القتل انتي واللي جنبك ده؟
ليلي تنحت لتفكير ابوها ومردتش
وادهم خرج من تحت المخده
ادهم: راجل غريب؟؟؟؟؟ هيا وصلت انك بتفكر ان بنتك جايبه راجل غريب البيت ونايمه معاه؟؟؟
عم محمود: هو انت؟؟؟؟
ادهم: ومش عارف ازاي فكرت انه ممكن يكون مش انا؟؟؟ ولا انت تعرف عن بنتك انها ممكن تنام مع راجل غريب؟؟
عم محمود: اخرس
ادهم: اخرس؟؟؟ مش انا اللي من دقيقه كنت بتهمها انها نايمه مع راجل غريب
عم محمود: ماتخيلتش ان سيادتك رجعت واتفاجئت بوجودك مش اكتر
ادهم: امم واديك عرفت انه انا اتفضل بره بقي لو سمحت
عم محمود: افندم؟
ادهم: واحد ومراته نايمين في سريرهم حضرتك واقف ليه؟ ولا عايز تتفرج؟
ليلي اتكسفت من كلام ادهم وابوها معرفش يرد فخرج
ادهم وهو خارج: ماتنساش تقفل الباب تحت كويس وراك
وهو خارج رزع الباب وراه
ليلي: انت مجنون
ادهم: انا برضه؟ المهم سيبك انتي كنا بنقول ايه؟
ليلي: كنا نايمين ما بنقولش
ادهم: وقبل ما نام نكمل كلامنا قبل النوم
ليلي: ادهم استني
ادهم: استني ايه؟ مالك
ليلي: بابا تلاقيه زعل
ادهم تنح: بابا؟؟؟
وقف وقام وسابها
ليلي: ادهم استني في ايه؟
ادهم بيلبس هدومه ومردش وداخل الحمام
ليلي: في ايه؟
ادهم: مفيش هدخل الحمام
ليلي: مكنتش عايز الحمام من دقيقه
ادهم: ده من دقيقه
سابها ودخل وهيا قامت ولبست واتصلت بابوها
ليلي: بابا متزعلش من ادهم
عم محمود: وانتي بيهمك زعلي وبعدين ادهم عندك يبيقي طظ في ايه حاجه تانيه هو كفايه
ليلي: لا طبعا ما تقولش كده طب بقولك ايه ارجع نفطر احنا التلاته مع بعض وحاول انت وادهم تفتحوا صفحه جديده مع بعض
ارجوك يابابا لو مش هتحبه حب حبي انا ليه علشان خاطري
عم محمود: ولو جوزك قلب وشه ولا قال كلمه كده ولا كده؟
ليلي: بابا مش جوزي اللي بيقول كلام كده ولا كده تعال وانا هجهز الفطار لحد ما ترجع
نزلت ليلي تجهز الفطار وادهم خرج من حمامه ملقهاش في الاوضه
لبس هدومه ونزل لقاها في المطبخ والفطار بدا يجهز وفهم ان دي تعويض ليه انهم يفطروا هما الاتنين مع بعض
ابتسم وجه من وراها ضمها
ليلي: يارب تكون جعان
ادهم: ميت من الجوع
طيب خد الاكل علي السفره وانا هكمل الباقي
ادهم بيساعدها في حط الاكل علي السفره واستغرب انها عامله كميات كبيره
وفجأه جرس الباب ضرب
ليلي: بابا وصل افتحله يا ادهم
ادهم: بابا؟؟ الفطار ده علشان بابا؟؟
ليلي: ده علشانا كلنا افتحله يالا
ادهم واقف مش عارف ينطق ولا يتحرك بس حاسس انه هينفجر من الغيظ
ليلي جريت تفتح هيا
ليلي: انت معاك مفتاح يابابا ادخل علي طول
عم محمود: اه علشان جوزك يقولي تاني عايز اتفرج صح؟؟
ادهم: الكلام ده كان في اوضه النوم مش هنا اتفضل ده بيتك
قعدوا كلهم يفطروا بس التوتر مالي الجو
ابو ليلي بدا يتكلم هو بنته في مواضيع ادهم ميعرفش يشارك فيها
عم محمود: ايه رايك بمناسبة رجوع جوزك نطلع كلنا بكره رحله عند البير ونقضي اليوم ونشوي ونتبسط بقالنا كتير قوي معملناش كده
ليلي فرحت جدا بالفكره
ليلي: فكره تحفه ايه رأيك يا ادهم؟
ادهم مش مركز اصلا معاهم
ليلي: اده___ م ادهم يا ابني رحت فين؟
ادهم: هاه سوري بتقولي ايه؟
ليلي: بقولك ايه رايك؟
ادهم: رايي في ايه؟
عم محمود: هو اصلا مش معانا ولا مهتم بينا اصلا ولا بوجودنا
ليلي: في الرحله؟؟ بابا اقترح نروح كلنا عند بير الجبل ونقضي اليوم هناك ونشوي وكده هيبقي يوم جميل
ادهم سكت وبصلها مفيش اي شيئ اتغير ابوها بس بيغير اسلوبه وبيتدخل بطريقته بس بدال ما يبعدهم بالخناق بيبعدهم بطريقه مختلفه
ليلي: هاه يا ادهم؟ ارجوك
ادهم: ترجوني ايه؟ فين اصلا بير الجبل ده
عم محمود: في المكان اللي ليلي كانت فيه مع رحله المدرسه
ادهم: ساعت ما اتحبست والصخور وقعت علينا وكنا هنموت احنا الاتنين؟؟
ليلي: هو ده بس يا ادهم المكان جميل وخساره ا نك ما تشوفوش تعالي شوفه معايا واوعدك هنتبسط كتير
ادهم: ربنا يسهل بعد اذنكم
ويدوب هيمشي
عم محمود: هو محدش علمك انها تبقي قله ذوق لما يكون حد ضيف بياكل معاك وتقوم انت الاول وتسيبه
ادهم وصل لقمه غضبه وليلي حست ان الوضع هيتازم اكتر
ادهم: اولا لأ محدش علمني
ثانيا مكنتش اعرف ان سيادتك ضيف ولو حضرتك ضيف يبقي تعامل علي هذا الاساس بعد اذنك
سابهم ومشي
صمت شويه
عم محمود: شايفه قله ذوقه وطريقه رده انا ممكن ارد عليه ووقفه عند حده بس انا ساكت علشانك انتي
ليلي: انا اسفه يابابا اعذره المكان له ذكريات وحشه معاه و بعدين انت برضه اسلوبك معاه؟؟
عم محمود: اسلوبي انا؟ وتصرفاته هو ايه ما بتشوفيش انا اهوه بحاول معاه وهو اللي رافض بمد ايدي وهو بيرفضها اعملوه ايه بقي؟
ليلي: خلاص جهز انت للرحله وانا هقنعه وهنيجي ان شاءالله
ابوها مشي وهيا استنت جوزها لحد مارجع
كانت في المطبخ ودخل عندها ماكس
ليلي: اهلا بيك جعان؟ اتفضل اكلك اهوه ياتري صاحبك فين بقي؟
طلعت لقته في اوضه النوم بيغير هدومه
ليلي: اخيرا جيت هو انت راجع بعد الغيبه دي كلها علشان تبقي بعيد كده؟؟؟
ادهم: ومرجعتش برضه علشان اول يوم افطر مع ابوكي وتاني يوم اقضيه مع عيلتك؟؟؟
ليلي: ادهم ارجوك بابا بيحاول حاول انت كمان
ادهم: هو فعلا بيحاول بس بيحاول يبعدنا الهدف واحد والطريقه اختلفت
ليلي: لا بقي لا يا ادهم لو في حد غلطان النهارده يبقي انت مش هو
ادهم: انا؟؟؟ غلطان في ايه بقي؟
ليلي: طردك ليه الصبح وبعدين في الفطار اسلوبك برضه مش حلو وهو كان عنده حق وبعدها بتقوله اتعامل علي اساس انك ضيف لا طبعا بابا عمره ما هيكون ضيف في بيتي
ادهم: امممم طيب يا ستي حقك علي راسي انتي وابوكي بس زي ما ابوكي قالي محدش علمني الذوق
بس يا ستي امبارح بس كنتي بتوعديني ان محدش هيدخل بينا والصبح الاقي ابوكي بيفطر معانا وبيجهزلنا رحله
ليلي: ده مش تدخل وانا عند وعدي بس هو بيحاول يقرب منك ارجوك ارجوك يا حبيبي تعال نبدأ كلنا صفحة جديده مع بعض
النهارده الصبح انا طلبت من بابا يرجع وهو علشاني مستعد يبدأ معاك صفحه جديده يبقي انت كمان علشاني ابدا معاه
نفسي انتو الاتنين تبقوا كويسين مع بعض
علشان خاطري انا،، بكره خلي اليوم بتاعي
كلنا هنقضي اليوم مع بعض وبابا فاتح ايديه ليك واهو بيقولك ادخل العيله،، انت دلوقتي اللي رافض
ادهم: انا مش رافض بس انتي اللي مش فاهمه حاجه
ليلي: علشان خاطري خلي بكره بتاعي واوعدك اننا هننبسط كتير مع بعض وهتشوف عيلتي بشكل تاني وتقرب من بابا اكتر
ادهم: حاضر يا ليلي هقضي معاكي بكره بس النتيجه هتبقي عليكي انتي
ليلي: اتفقنا واوعدك انه هيكون يوم ما يتنسيش
ادهم: ربنا يستر
وجه يوم الرحله واتحركو كلهم وبدؤا رحلتهم
للمتابعه اترك تعليق
الحلقة الثامنة من الجزء الثاني
المشوه
بدا يوم الرحله الكل صحي بدري وجهز نفسه
كانو المفروض هيروحو كلهم مع بعض في ميكروباص ووصلوا قدام بيت ادهم
ادهم: متقوليش ان احنا هنركب معاهم؟
ليلي: ايوه طبعا الكل مع بعض هتبقي لذيذه الكل بيهزر ويضحك ويغني يالا هنتاخر عليهم
ادهم: انا عايز اروح بعربيتي
ليلي: ادهم بقي يالا، يعني الكل مع بعض اشمعني انت؟
ادهم: لان انا غيرهم وانتي عارفه كده
بيخبطوا عليهم وينادوا
ليلي: ادهم علشان خاطري
ادهم: وماكس؟؟؟؟
ليلي: الكل بيحبه ومحدش هيعترض علي وجوده ولو اعترضوا ابقي ساعتها خد عربيتك اتفقنا! يالا بقي
خرجوا وادهم متحفز
العيله: اخيرا طلعتو يالا بقي عايزين نلحق اليوم من اوله
ليلي: طيب وماكس ولا ناخد عربيتنا
اخو ليلي: ماكس هنا جنبي... ماكس تعال
الكلب نط وركب وليلي ركبت ويدوب ادهم هيركب جنبها
عم محمود: ماتيجي جنبي هنا قدام علشان افرجك علي الطريق انت اول مره تروح
ادهم بص لليلي وهيا بصتله وكأنها بتقوله روح قرب منه شويه
ادهم ركب جنبه وحالة صمت سيطرت عليهم
ووري عند ليلي ضحك وغني وهزار وادهم سامعهم بس كانهم في عالم تاني
عالم بعيد عنه عالم عمره ما هيبقي جزء منه
وصلو ونزلوا وحطوا حاجتهم وادهم واقف بعيد عنهم
ليلي راحتله وقربت منه
ليلي: هاه مالك واقف بعيد ليه ما تقرب
ادهم: _______
ليلي: حاول تندمج معاهم وصدقني هتحبهم كلهم
ادهم: ليلي انا
قاطعه ابوها
عم محمود: خلوا بالكم ان احنا معانا عيال صغيره بلاش القرب ده قوي كده لانهم بيتفرجوا وبعدين ليلي روحي ساعدي اخواتك وجهزوا الفطار يالا جعانين
اخد بنته بلطافه ومشي
ادهم كان عارف ان اليوم ده هيقضيه لوحده..
يوم هيأكدله انه لوحده وانه هيفضل لوحده.. هو جه بس علشان مايندمش علي القرار اللي هياخده وانه يبقي عمل كل اللي يقدر عليه وان مفيش حاجة في ايده
فطروا ولعبوا وانتشروا وكل ما ليلي تقرب من ادهم حد بيشدها تاني بعيد سواء بقصد او من غير قصد
وابوليلي بعيد عن ادهم بس بيوجه الكل من بعيد لبعيد المحصله ان ادهم يفضل بعيد عن ليلي
ماكس كان هو الوحيد اللي بيشارك ادهم اخده وراحو يتمشوا وراح ناحيه المكان اللي اتحبسوا فيه
وقعد هناك يتامل كل اللي فات
ليلي جاتله
ليلي: قاعد هنا ليه؟
ادهم: عادي
ليلي: مش قاعد معانا ليه؟
ادهم: ماليش مكان معاكم
ليلي: تاني يا ادهم؟ علي فكره بقي الكل بيحاول يقرب منك انت اللي بتبعد
ادهم: يمكن
اخو ليلي: ليلي ادهم يالا الغدا جاهز
انتي روحتي تنادي عليه ولا جيتي تقعدي جنبه يالا الكل مستني
اخر النهار بيلموا حاجتهم علشان يروحوا وجه الميكروباص ياخدهم وبرضه ادهم ركب قدام
جنب حماه ونفس الصمت
لحد ماعم محمود قطع الصمت ده
عم محمود: عمرك ما هتكون جزء منهم ابدا... انا اهوه بعدت عنك خالص بس برضه معرفتش تقرب منهم، فهمت بقي ان مش انا السبب في بعدكم عن بعض،
ادهم مردش عليه بس من جواه عرف ان فعلا هو معرفش يندمج معاهم
وصلوا قدام بيت العيله والكل نزل واخوات ليلي
البنات: ليلي احنا كلنا هنبات هنا عند بابا ونسهر مع بعض تعالي بقالنا كتير قوي ما اتجمعناش
ليلي مترده: لا اسهروا بقي انتو وبعدين علشان ادهم
عم محمود: ماله ادهم؟ خليه يجي هو كمان واسهروا كلكم مع بعض ولا انت عندك اعتراض؟
ادهم: لا براحتها عايزه تسهر مع اخواتها براحتها بس انا اعذروني عايز اريح شويه
ليلي: يعني هتنام شويه وبعدها تيجي تاخدني ايه رايك؟
ادهم: براحتك روحي اسهري مع اخواتك
ليلي: وتيجي اخر الليل تاخدني او اخويا يوصلني او بابا
ادهم: ربنا يسهل سلام
مشي ادهم ووصل بيته او بالاصح بيت ليلي
فضل شويه يفكر وفي الاخر اخد قراره
كلبه كان معاه فقعد قدامه
ادهم: ماكس انت عارف انك اغلي حاجه ملكتها في حياتي وانك انت اكتر حد بثق فيه وعلشان كده عايزك تفضل مع ليلي تحميها وتخلي بالك منها اتفقنا يا صاحبي
كلبه كانه فاهمه لانه وهو ماشي محاولش يروح وراه وقف وبصله وكانه بيوعده ان حبيبته في امان طول ماهو عايش ولا ممكن حد يقدر يمسها
اخر الليل ليلي رجعت بيتها ولقت ماكس مستنيها
ليلي: صاحبك فين يا جميل
الكلب هوهو
ليلي: كالعاده مش بفهمك
طلعت اوضه نومها لقتها فاضيه وقلبها اتقبض
شافت علي مخدتها رساله راحت وقرتها
" رحلتك النهارده اللي اصريتي عليها اكدتلي اني عمري ما هبقي جزء من العيله دي ولا عمري هقدر اندمج معاهم
سامحيني اني مشيت بالطريقه دي بس مكنش قدامي اي حل تاني لاني تعبت، تعبت من كل حاجه، تعبت اجدف في مركب غرقانه، تعبت احافظ علي مشاعر من ناحيه واحده
تعبت منك في لحظه بتقوليلي وحشتك وماتبعدش عني واللحظه اللي بعدها تختاري كل الحاجات اللي تبعدنا عن بعض
تختار تفطري مع ابوكي بدل ما نبقي لوحدنا
تختاري يوم كامل مع عيلتك بدل ما تقضيه معايا
تختاري تسهري مع اخواتك بدال ما تسهري معايا
وعلي الرغم ان ابوكي وعيلتك واخواتك ممكن تشوفيهم بسهوله بعد ما اسافر بس برضه بتفضليهم عني
قولتلك اجازتي يومين واختارتي تقضيهم بعيد عني وبعدها تقوليلي بحبك
اي حب ده اللي بتتكلمي عنه وليه انا مش حاسه ابدا؟؟؟؟
ورايا شغل واتضطريت اسافر اتمني اشوفك قريب
ادهم "
قرت الرساله ومسكت تليفونها واتصلت بيه بس تليفونه مقفول
كل مره توعد نفسها انها هتصلح كل حاجه بس بتتعك اكتر
مش عارفه ازاي توفق بين عيلتها وبينه؟
مش عارفه ازاي ترضي كل الاطراف؟
ترضي ابوها وجوزها واخواتها واصحابها؟
ازاي توفق بينهم كلهم؟؟
بتعدي الايام وادهم لو كلمها بيرد عليها بالعافيه والاجابه علي قد السؤال
لحد ما في مره ادهم كان ماسك مهمه جديده وخلصها وقبض علي المجرم بس المجرم وعد ادهم انه هيخليه يندم
وهو في في اجتماع مع مديره دخل ظابط عليهم وبلغهم ان المجرم ده هرب وانهم مش لاقينه
ادهم: هرب؟؟ هرب امتي؟ ؟
الظابط: من الصبح
ادهم: ومحدش بلغني ليه؟ انتو اتجننتو؟؟
المدير: اهدي يا ادهم انا كلفت ناس كتير يدوروا عليه وهيا مسأله وقت مش اكتر
ادهم: وقت؟؟؟ انت مش فاهم
ادهم مسك تليفونه واتصل بمراته
ادهم: ليلي انتي فين؟
ليلي: وانت كمان واحشتني
ادهم بصوت عالي: مش وقته انتي فين؟
ليلي: انا في البيت مالك؟
ادهم: اطلعي بره البيت حالا وروحي عند اي حد من الجيران وخدي ماكس معاكي
ليلي: في ايه انت بتخوفني؟؟
ادهم: اطلعي بره البيت حالا اتحركي بسرعه
ليلي: _________
ادهم: ليلي ردي عليا؟؟؟؟؟ ليلي
ليلي بهمس: ادهم في حد بره الاوضه
ادهم: ليلي في الحمام هتلاقي مسدسي انتي عارفه مكانه استخدميه بسرعه
ليلي: لاااااااااااااااااااااااااااااااا
ليلي صرخت بصوتها كله
وبعدها الخط اتقفل
ادهم بقي عامل زي المجنون متكتف مش عارف يعمل ايه وزمايله حواليه
المدير: ادهم دقايق والبوليس هيبقي عندها هما في طريقهم انا بلغتهم
ادهم: كان لازم تقولولي بدري
سابهم وجري واتصل علي ابوها
ادهم: روح لليلي بسرعه
عم محمود: ايه ده؟ انت بتتكلم كده ليه؟
ادهم: روح لبنتك بسرعه في حد دخل عليها قوم واجري الحقها بسرعه اتحرك
قفل السكه وسايق زي المجنون بس الطريق طويل وطويل قوي كمان
قدامه ساعات علشان يوصل
وعلشان تكمل موبيله فصل شحن ومعهوش شاحن
حس بالعجز بالضعف بقله الحيله
حس بالخوف
الخوف اللي من يوم ماخرج من بيت ابوه وعد نفسه انه مش هيخاف تاني
بس النهارده خلف وعده واحساس الخوف ماليه
خوف علي حلم بيضيع
خوف علي بيت بيتهد
خوف علي وهم بيتبدد
خوف علي حبيبته
اخيرا وصل بيته طلع يجري ودخل بس البيت فاضي مفيش حد
صمت يشبه صمت الاموات وسكوت دخل اوضه نومه متبهدله ومتكسره وفي دم في الارض
هو شاف الدم وقع علي الارض رجليه مش شايلاه
مش قادر يتحرك او يفكر او ينطق
ممكن يكون خسرها؟؟؟؟؟؟
اعمل متابعه هنا👈 اضغط هناااااااا👉عشان يوصلكم كل الاجزاء الباقيه هتوصل للمتابعين فقط
تعليقات
إرسال تعليق