رواية ضيف جديد كامله وحصريه بقلم محمد محمود في موسوعة القصص والروايات جميع الفصول كامله وحصريه رعب
 |
رواية ضيف جديد كامله وحصريه بقلم محمد محمود في موسوعة القصص والروايات جميع الفصول كامله وحصريه رعب
في اللحظة اللي بتطفي فيها نور الغرفة في عيون تانيه بتفتح عشان تبص عليك
كائنات بتبقى عايشة معانا وحوالينا في كل مكان مش بنشوفهم بعنينا بس ساعات بنحس بيهم
أنا أتاكدت من وجودهم بعد ما نقلنا شقة جديده عشان بابا غير الشغل بتاعه وروحنا نسكن جمب الشغل
الحته شكلها راقي جدا والشقه تمنها تحفه بس اللي بيحصل في البيت بليل مش طبيعي والمشكله اني برجع من الشغل بدري وبابا وماما بيتأخروا في شغلهم .. بسمع صوت وساعات أصوات ناس كتير في الصاله قولت مره دول الجيران بس عرفت بعدها ان مافيش جيران ؟!!
أنا روان 25 سنة .. عايشه مع والدي ووالدتي نقلنا في الشقة اللي سمسار جابها لبابا وكان سعرها تحفه بالنسبه للمكان ومساحتها والديكورات اللي فيها بيقول صاحبها عايش في لندن وبياجرها من زمان ومش فارق معاه الفلوس على قد ما فارق معاه تدخل اي حاجه في الشهر
في يوم روحت من شغلي تاني يوم ناخد في الشقة دي ودخلت وحطيت حاجتي وغيرت هدومي ودخلت اخد شاور وطلعت اتفرج على التلفزيون وحطيت الشيبسي وكوبايه العصير قدامي انا من النوع اللي بيحب ياكل وهو بيتفرج بعدها سمعت صوت حاجه بتهبد في اوضتي .. اتخضيت وقومت بالراحه مولعه انوار الشقه كلها ومشيت ناحيه الاوضه بالراحه وانا ماسكه الموبايل في ايدي وبتصل بماما
وصلت الاوضه وبصيت بطرف عيني لقيت الشباك مفتوح والهوا مخليه يخبط جامد قومت رايحه وقفلته كويس قولت جايز انا نسيته رجعت قعدت مكاني وماما ردت عليا اخيرا قولتلها انتي فين ؟؟
قالتلي خلاص ساعه وراجعه وقفلت معاها .. الاهل لما بتسمع صوتهم بتطمن حتى لو هما بعيد عنك في اخر الدنيا كملت فرجه على التلفزيون وجيت اشرب العصير لقيته خلصان ؟!!
انا متاكده اني ماخلصتوش انا ماشربتش غير بُق واحد بس منه .. بصراحه هنا جسمي كله قشعر .. قعدت افكر اعمل ايه ؟ قولت بلاش قعده الصاله وقولت اخش قوضتي اتغطى واحاول انام ..وخصوصا الجو برد قوي اليومين دول وفعلا دخلت الاوضه ونمت على سريري واتصلت بابا ورد عليا قولتله بابا انا مش مرتاحه في البيت ده .. قالي اهدي يا حبيبتي مالك قولتله في حاجه مش طبيعيه بتحصل في طاقه سلبيه حاساها مش مرتاحه
قالي اهدي وانا جاي خلاص ما تقلقيش انتي بس متوتره عشان مكان جديد .. قفلت معاه وفجأة الكهربا قطعت جسمي كله اتنفض .. فضلت منوره بالموبايل حواليا وسامعه صوت الكلاب في الشارع وفجأة الشباك فتح جامد لوحده .. انا جسمي كله اتنفض من مكانه
بصيت وانا قلبي بيدق وبحاول اهدي نفسي بعدها سمعت صوت حاجه بتخروش حواليا وصوت حاجه بتشحر بتاخد نفس بحشرجه قومت وقفت على السرير وخليت ضهري للحيطه ونورت الاوضه كلها بالموبايل الصوت عمال بيزيد وانا بحاول احدد مكانه لحد ما عرفت انه جاي من ...
يتبع ...
ضيف جديد
ضيف جديد الجزء التاني
وانا بحاول احدد مكانه لحد ما عرفت انه جاي من الدولاب .. صوت خروشه واضح فضلت مسلطه الضوء على الدولاب ومركزة جدا في الصوت لحد ما لقيت باب الدولاب بيتحرك هنا حسيت كان الدم اللي في جسمي اختفى واطرافي بتترعش بشكل مبالغ فيه الدولاب جمب باب الاوضه وانا خايفه اتحرك من مكاني
فضلت ادعي واقول يارب بابا يوصل دلوقتي .. بعدها لقيت صوابع طالعه برة الدولاب هنا عيني برقت وشهقت وكنت حاسه ان نفسي بيروح الايد دي مسكت الباب وفتحته لقيت بنت بشرتها رمادي وعينيها سودا مافهاش ابيض وشعرها طويل جدا نازل على الارض
بعدها فوقت لقيت ماما بتصحيني وانا مرميه على سريري قالتلي ايه اللي انتي عاملاه في نفسك ده سايبه الشباك مفتوح ونايمة من غير ما تتغطي .. بصيت حواليا واكتشفت انه اغمى عليا حضنتها وفضلت اعيط .. فضلت تهديني وتمسح على شعري بايديها وقالتلي مالك يا حبيبتي ؟
وبعدها بابا وصل برضه وماكنتش عارفه احكيلهم ايه ؟ ولا ايه بس لما حكيتلهم فضلوا باصينلي باستغراب وقالولي دا كابوس يا حبيبتي ومافيش حاجه من الحاجات دي فضلت قاعده شوية .. وقولت جايز يكون حلم فعلا بس انا متاكده ان ده ماكنش حلم مستحيل يكون حلم !!
رجعت على اوضتي وفضلت باصه للدولاب وقومت بسرعه وفتحته مالقتش حاجه غير هدومي شيلت كل الهدوم اللي متعلقه جواه ورميتها على الارض بعصبيه .. مافيش حاجه فعلا انا شكلي بتوهم ..تاني يوم روحت الشغل وكان يوم صعب مش قادره اركز في اي حاجه بتتقال او بعملها لحد ما خلصنا وماكنتش عايزة اخلص عشان ما ارجعش البيت
بس للاسف كنت مضطرة ارجع البيت .. روحت البيت وغيرت هدومي وفضلت قاعده في الصاله وانا منورة نور الشقة كلها .. وكنت مكلمه ماما قالتلي ساعة وراجعه .. سمعت صوت حاجه بتحصل في الطرقة اللي عند الحمام واوضتي وبعدها قومت معليه صوت التلفزيون ومش عايزة اركز في اي حاجه
وبعدها لقيت الصوت بيزيد سامعه صوت مية في الحمام كتمت صوت التلفزيون سمعت صوت الدش ماعرفتش اعمل ايه ؟ بس قومت بالراحة وانا ماشية ناحية الحمام ايوه ده صوت الدش بتاعنا قربت لقيت البانيو مليان والمية على الارض مغرقها وفي شعر طالع بره البانيو وفجأة....
يتبع ...
ضيف جديد الجزء الثالث
وفجأة لقيت واحده طالعه من تحت المية ..نفس البنت اللي شوفتها في الدولاب .. هنا طلعت اجري على باب الشقة فتحته ونزلت اجري زي المجنونه لحد باب العمارة لقيت باب العمارة الحديد مقفول من تحت
وبعدها سمعت صوت خطوات بتنزل وبتقرب مني ماعرفتش اروح فين ؟! فضلت باصه ناحية السلم لقيت جارتي اللي تحتينا بتقولي مالك ؟ هنا قولتلها مافيش وخوفت احكيلها بس قولتلها سامعه اصوات غريبه في الشقه عندي خدتني وطلعت معايه وفلضت تقولي انتي مغرقة الدنيا كده ليه ؟
قفنا حنفية البانيو وفضلت قاعده معايه لحد ما ماما وبابا جم .. وحكيتلهم اللي حصل هنا بابا اتصل بواحد صحبه يعرف شيخ .. وفضلنا متجمعين في الصاله لحد ما الشيخ جه ..اول ما دخل فضل يقول اذكار ويبص حواليه وبعدين الشيخ فضل يبص في الشقه كلها وقام داخل على اوضتي من غير ما اقوله حاجه
وفضل يبص عليها وطلب فوطة عليها مية بملح جبناله اللي هو عايزة قام فضل يمسح على الحيطه بالفوطة دي لحد ما لقينا الطبقه بتاعت الدهان طلعت كانها مش دهان والحيطه اللي وراها صفراء عليها كتابة محفوره بارقام وحروف واسماء منظر مقرف جدا ومقزز
فضل يمسح في الدهان واكتشفنا ان في حيطه كامله محفور عليها الطلاسم وبما انها محفوره كان لازم نجيب حد يشيلها او ينقش الاجزاء بتاعة التعويذة وندهنها تاني .. ساعتها بابا شكر الشيخ جدا وخدت حاجتي من الاوضه وقفلناها لحد ما نجيب حد بكره الصبح ودخلت انام على الكنبة اللي موجوده في اوضه بابا وماما
فضلت تقريبا طول الليل صاحيه بفكر في الشخص اللي عمل كده .. ومين هيعمل حاجه زي دي .. بعدها سمعت صوت غريب طالع من بابا وهو بيكح قلقت عليه وبصيتله لقيت راجل تاني مش بابا !! خوفت جدا ورجعت لورى لقيت الست اللي جنبه مش ماما ؟!
حسيت اني في مكان غريب وديكور المكان اتغير نفس الاوضه بشكل تاني ..لقيت الراجل قام وبيزعق مع مراته وقام جري على اوضتي وفتح باب اوضتي لقيت بنت تقريبا في سني قاعده على السرير والراجل دخل يضرب فيها .. وبعدها لقيته جاي نحيتي وانا مش مستوعبه ايه اللي بيحصل
بس لما قرب مني عدى مني كانه شبح لا لمسني ولا لمسته حسيت ان في حاجه بتتجسد قدامي .. روحت للبنت اللي قاعده لوحدها وكان شكلها صعبان عليا لانه ضربها جامد .. بعدها لقيت البنت منهاره وجريت على المطبخ جابت سكينة انا هنا مش عارفه اطلع بره ده ازاي ؟
لقيتها جابت ورقه من تحت السرير و فتحتها....
يتبع ...
ضيف جديد الجزء الرابع
لقيتها جابت ورقه من تحت السرير و فتحتها وبتنقش حاجه على الحيطه بالسكينة بتبص على الورقه وتنقش لحد ما خلصت وطلعت الطلاسم اللي لقناها مرسومه وبعدها بصت في صوره لقيت فيها البنت ومعاها راجل وست شكلها باباها ومامتها ؟!
بس لو دي باباها ومامتها يبقى مين الاتنين اللي برة دول ؟ وليه الراجل دخل ضربها ؟ ساعتها البنت حضنت الصوره وهي بتعيط وبعدها عملت حاجه جسمي قشعر منها فضلت تقرأ حاجه من على الورقه وبسرعه قامت ساحبه السكينه على رقبتها عند الزور
لقيتها وقعت على الارض وفي حنفيه دم فتحت من رقبتها وفضلت تتحرك وتتشنج على الارض والاوضه غرقت دم .. لحد ما بطلت حركه ساعتها الست دخلت بصت عليها وصرخت وجابت جوزها بص عليها وكان في صدمه
بعدها لقيت ماما بتصحيني بتقولي مش هتروحي الشغل ..بصيتلها وانا مخضوضه وقلبي كان بيدق جامد فضلت تسالني مالك انتي كويسه ؟ قولتلها ايوه ياماما انا تمام .. نزلت وماعرفتش اروح الشغل قعدت في كافيه لوحدي مش قادره اشوف الناس ولا اتكلم مع حد الحلم ده مش قادره انساه من خيالي فضلت قاعده لحد ما اطمنت ان بابا وماما راجعين
رجعت عالبيت ساعتها قبلهم ووصلت لباب الشقه ولسه بحط المفتاح .. لقيت الباب فتح لوحده قلقت شوية بس لقيت الفضول بياخدني لما شوفت البنت امبارح في الحلم حسيتها مظلومة دخلت وسيبت الباب مفتوح ووقفت في نص الشقه وقولت لو انتي سمعاني اقفلي باب الشقه !!
...
...
...
ماحصلش حاجه !!
رجعت اقفل الباب لقيته قفل لوحده فضلت واقفه هنا خوفت لقيت باب اوضتي بيتفتح والنور نور جوة بعدها .. قولتلها هما كانو بيضربوكي ليه ؟ مالقتش رد اتحركت بالراحه على اوضتي وقعدت افكر انا بعمل ايه ؟ خايفه وفي حاجه بتقوي كملي مش عارفه هل الانسان سهل حد يستدرجه بالعاطفه ؟!
هل احنا ممكن نتعاطف مع حاجه بنخاف منها لمجرد اننا اتعاطفنا معاها حتى لو ممكن تئذيك ؟ العاطفه دي حاجه تخوف فعلا قطع تفكيري لما لقيت كراستي المحطوطه على المكتب بتتفتح لوحدها وبيتكتب عليها
قربت عشان اقراء الكلام لقيتها كاتبه .. انا دي شقة بابا وماما والاتنين اتوفوا في حادثه وعمي وعمتي جم يعيشوا معانا وبعدها قالولي انها شقتهم لان ورث جدها كان فلوس والشقه وباباها خد الشقه وعمي خد الفلوس لانها كانت نفس المبلغ وهما كانوا الابنين اللوحدين لجدها
بعدها بطلت كتابه انا هنا بدات اخاف....
يتبع ...
ضيف جديد الجزء الخامس والاخير
وجيت اطلع من الاوضه لقيت الباب اتقفل في وشي وقفت لقيت الكتابه بدات تاني رجعت في خطوات بطيئة لقيتها كاتبه وانا ماكنش ينفع اسيب حقي وخصوصا ان عمي ومراته كانو بيطفشوني من البيت بالعافيه وبيمسكوا في كل غلطه بعملها ويبكروها
والوسيله الوحيده اللي تخليني اضمن حقي هي القوة فلجأت للسحر .. اني اعيش في بيتي بروحي بس لان روحي مربوطة بالمكان ده جوة الطلاسم دي وهي الحاجه اللي هتخليني عايشة .. انا هنا بدات دموعي تنزل لوحدها ماقدرتش امسك نفسي من الخوف والتوتر .. سالتها وانا صوتي بيقطع من العياط وقولتلها طب عملتي ايه مع عمك لما بقيتي روح بس ؟
كتبت انها حبتسهم فالشقه وفضلت تعذب فيهم لانها في العالم ده تقدر تتجسد باي شكل فكانت بتتجسد على صورهم وهما بيقتلوا نفسهم .. لحد ما الاتنين انتحروا من التعذيب ومن ساعتها محدش قادر يعيش في البيت ده
وانتوا اول ناس تيجي تعيش في بيتي ..
...
...
وبعدها سكتت انا هنا قلقت وكنت خايفه جدا .. مش عارفه اتصرف ازاي انا ماكنش ينفع ارجع البيت لوحدي من غير بابا وماما ..ساعتها سمعت صوت باب الشقه بيفتح وصوت بابا وفي صوت عمال معاه عشان يشيلوا الطلاسم اللي محفورة على الحيطه ..
ساعتها طلعت الموبايل وفضلت واقفه وقطعت الورقه اللي كتبت عليها وحطيتها في جيبي .. باب الاوضه فتح بابا شافني اتخض قالي انتي بتعملي ايه هنا ؟؟
بحسبك لسه ما روحتيش قولتله مافيش كنت بجيب حاجتي .. قالي انتي كويسه قولتله أه ..
وبدات الرجاله تشتغل والشيخ موجود معاهم وطلعت قعدت في الصالة .. وبعدها حطو معجون ودهنو الحيطه من جديد وانا وماما كنا دخلنا اوضتها .. بعدها كلهم مشيوا وبابا قالي نامي معانا النهارده بلاش تنامي في اوضتك ..
فضلت نايمة وانا بفكر ايه اللي ممكن يحصل؟ خلاص الطلاسم اللي كانت مخلياها عايشه اختفت هل هتظهر تاني ؟
نمت وصحيت مافيش حاجه حصلت بليل فطرت ونزلت الشغل ورجعت قبل بابا وماما فضلت اتمشى في الشقة ودخلت اوضتي قولت لو انتي هنا افتحي الدولاب !!
...
...
...
ماحصلش حاجه .. فضلت قاعده لحد ما بابا وماما جم .. وعدى يوم واتنين وتلاته ومافيش اي حاجه ظهرت معرفش ليه لا اراديا حسيت بالوحده .. مش عارفه انا اكيد مش انسانه طبيعيه بس انا ماعنديش صحاب كتير فالشغل .. وحاسه اننا ظلمناها
مسكت موبايلي وفتحت الصور كانت اخر حاجه عملتها اني صورت الطلاسم اللي على الحيطه عشان دي الوسيلة الوحيده اللي ممكن تخليها عايشة تاني
تمت
...انضم لجروب التليجرام ( هينزل فيه الرواية كاملة )اضغط هنا
مجمع الروايات الكامله والحصريه اضغط هناااااااا
تابعى صفحتنا على الفيسبوك عشان تبقى اول واحدة تقرأ البارت اول ما ينزل
صفحتنا على الفيسبوك اضغط هناااااااا
تعليقات
إرسال تعليق