رواية زوجاتي كامله وحصريه في موسوعة القصص والروايات جميع الفصول كامله وحصريه بقلم محمد محمود
رواية زوجاتي كامله وحصريه في موسوعة القصص والروايات جميع الفصول كامله وحصريه بقلم محمد محمود
رواية زوجاتي كامله وحصريه في موسوعة القصص والروايات جميع الفصول كامله وحصريه بقلم محمد محمود
أنا راجل شايف أني أقدر أعول أكتر من واحده ..عشان كده متجوز ثلاثة
وبفكر حاليا في الزوجة الرابعة .. هي السكرتيرة بتاعة مكتبي وبصراحه شايفها انسانه مناسبة جدا
نسيت اعرفكم بنفسي .. أنا ياسر عبدالقوي .. 48 سنة .. خريج كلية التجارة
بدأت حياتي مرتاح عن غيري لان والدي كان رجل اعمال كبير.. وساعدني في بداية مشواري كالعاده
بس انا اعتمدت على نفسي وبدأت شغل خاص بيا في الاستيراد والتصدير وحققت ارباح كبيرة وبدات اشتري اراضي وابني عليها مولات وعمارات ..واشتريت اراضي في مناطق ساحليه وعملت عليها قرى سياحية كتيرة
الحمدلله فضل ونعمة من ربنا .. انا معايه حاليا ثروة تعادل ثروة والدي .. بس نيجي للسؤال المهم اللي دايما الناس بتسألهولي انت ازاي متجوز 3 ؟؟!
انا قبل ما اتجوز مراتي الاولى وانا مقرر اني هتجوز 4 .. وقولتلها ده قبل ما نتجوز .. وهي فضلت تفكر كتير وبعدها قالتلي اعمل اللي انت عايزة ودا شرع ربنا بس تعدل بينا احنا الاربعه
قولتلها ودا حقك عليا اني اعدل بينك وبين اي واحده تانيه .. الموضوع صعب على اي بنت بس لو فكروا فيه من زاويه تانيه هتلاقوا مميزات كتيره .. طبعا دوري هنا اختار الزوجه الصالحه في كل مرة
عشان ما فيش واحده تدايق التانيه .. او تنكد عالباقي وتبقى عايش في بحر المشاكل
انا مقعدهم كلهم في قصر في منطقه حلوة وفي حمام سباحة وفي 6 عربيات بسواقينها جاهزين لاي مشوار ليهم وللعيال
في طباخين وفي شغالات بيعملوا كل حاجه .. انا موفرلهم كل اللي اقدر عليه عشان يعيشوا مبسوطين .. وبحاول اخلي ولادي يحبوا التعليم عشان يطلعوا اشطر مني
مافيش أب في الدنيا يكره ان ابنه يكون احسن واحد في الدنيا واحسن منه هوا شخصيا
بس المرة دي اللي مخوفني .. ان فرق السن بيني وبين مريم كبير .. مريم دي السكرتيرة بتاعة مكتبي
انا مش خايف من ناحيتي .. انا خايف من ناحية زوجاتي لان اغلبهم اكبر منها في السن بفرق مش كبير اوي بس كلهم عندهم عيال .. فخلاص عدوا فترة المراهقه وعايشين دور الامومه كتفكير
انا كان لازم اتجوز الرابعه بدري عشان يكونوا متقاربين من سن بعض .. بس مالقتش انسانه مناسبه ساعتها فنسيت الموضوع فترة كبيرة و مافكرتش فيه بس لما شوفت مريم الموضوع رجع تاني في دماغي
بس كالعادة قبل ما اكلم مريم لازم اعمل اجتماع مع زوجاتي التلاته واخد رايهم اني هتجوز واحده اصغر مني في السن بكتير .. بس اتوقع انهم مش هيعترضوا على الموضوع ده لانهم عارفين اني مش هقصر معاهم مهما حصل ..
بس المهم دلوقتي افرد بلغتهم وخدت رايهم ومريم أصلا ما وافقتش على الزواج مني .. يبقى لازم اعرف راي مريم الاول قبل ما افتح الموضوع في البيت وافتح على نفسي فاتحه ملهاش لازمة
قررت فعلا اني ابلغ مريم النهارده .. طلبتها تيجي مكتبي وقولتلها عايزك في موضوع مهم جت وهي متوتره فاكره في حاجه فالشغل قولتلها ما تقلقيش دا موضوع بره الشغل قعدت قدامي في المكتب
وقولتلها مريم انا راجل بحب أمشي صح في كل حاجه عشان كده انا شايفك زوجه مناسبه ليا وعايز اروح البيت اتقدملك .. عارف اني فاجئتك بالموضوع بس مش عايز منك رد دلوقتي ..دي ورقة كتبتها فيها كل التفاصيل اللي هتحتاجي تعرفيها عني بالكامل وضعي الاجتماعي والاقتصادي وتفاصيل شخصيتي بحب ايه وبكره ايه
عايزك تروحي تقريها كويس واعتبري نفسك اجازة من الشغل وبعد ما تقرري هستنى منك رساله الصبح بدري عالموبايل تقوليلي فيها موافقه او غير موافقه وانا هحترم قرارك .. ولو قررتي انك غير موافقه هعتبر ان احنا ما اتكلمناش في الموضوع ده من اساسه
فمتقلقيش من حاجه انتي انسانه شاطره ومجتهده في شغلك وانا محتاجك فالشغل ..ومش هخلي اي حاجه تأثر على وظيفتك .. فتقدري تروحي دلوقتي وتفكري وتاخدي راي والدك ووالدتك ومستني منك رسالة الصبح ..لو مش حابه تسالي اي حاجه تقدري تتفضلي على مكتبك
فضلت باصالي شويه وبصت في الارض وخدت الورقه اللي كتبتهالها وطلعت بره المكتب خدت شنطتها وروحت وانا كمان قولت اخد النهارده اجازة .. وروحت على شقتي اللي عالنيل اقعد فيها لوحدي دي الشقه اللي بشتغل فيها بعيدا عن اي دوشه
فضلت افكر في الموضوع وانها ممكن ترفض ولا توافق كنت حاسس بقلق زوجاتي التلاته لما اتقدمتلهم كلهم وافقوا رغم الشروط اللي بحطهالهم .. وهما بيحطولي شروط بنتفق عليها ونلتزم بيها عشان حياتنا تمشي بشكل مستقر بدون مشاكل وبدون ما حد يظلم التاني
فضلت في الشقة لحد بليل افكر بعدها رجعت عالقصر ..وروحت ممدد عالسرير وانا بفكر ودماغي بتجيب وبتودي وعمال اتقلب ومش جايلي نوم حاسس اني رايح امتحان بكره مش متعود حد يرفضني رغم سني بس الموضوع هيبقى صعب عليا .. لحد ما اخيرا صحيت على المنبه بتاعي تاني يوم
قومت جهزت نفسي ولبست وسمعت صوت رساله على موبايلي جسمي كله قشعر كانه اتكهرب وسام صوت ضربات قلبي ..مشيت في خطوات بطيئة وانا بتخيل سيناريوهات كتيرة ..
لحد ما مسكت الموبايل وفتحت الرساله لقيتها مريم اللي بعتاها وبتقول انها ...
يتبع ...
زوجاتي
زوجاتي الجزء الثاني
لقيتها باعته انها موافقة .. حسيت بفرحة شديدة جدا .. فرحة ماحستهاش بقى لي كتير
جايز عشان حققت حاجات كتير في حياتي ففقدت احساس الشغف اني احصل على حاجه بتمناها
قومت مغير اللبس واتشيكت اكتر وعديت على محل هدايا وعملت صندوق هدايا فيه برفانات وميك أب
ونضارة شمس وسلسله ألماظ .. وشكولاتات كتير جدا وغلفتها بالورد في محل بتعامل معاه دايما وخدتها معايه ولما وصلت مكتبي لقيتها برده جايه ومتشيكه وقولتلها اتفضلي دي هديه بسيطه واقدر اقابل والدك امتى؟؟
حددت معايه معاد على اخر الاسبوع عشان اروح اتقدملها
انا كنت في قمة السعادة وفي نفس الوقت بفكر هبلغ زوجاتي ازاي ؟
وبالفعل وصلت البيت وطلبت من الطباخين يجهزوا اكل حلو وطلبت زوجاتي كلهم عشان يتجمعوا عالعشا ضروري
والولاد خليتهم ياكلوا في جنينة القصر .. قعدت مع زوجاتي واحنا بناكل وقولتلهم اني نويت بعد ما صليت استخارة اني اتقدم لبنت طيبه واصيله في الشغل والمفروض هروحلها اخر الاسبوع عشان اتقدملها
واتمنى انكم تساعدوني وتساعدوها عشان تتأقلم معانا .. الغريب انهم كلهم كانوا بياكلوا حتى مافيش واحده وقفت وقطعت اكلها بس كنت حاسس انهم بيبصوا لبعض وساكتين كلهم
قولتلهم عالعموم انا حبيت اخد رايكم برضوا لو في حاجه .. برضه نفس الصمت فسكت انا كمان وخلصت اكلي وطلعت انام ..وانا بفكر في رد فعلهم الغريب دا كان اخر حاجه اتوقعها توقعت كالعاده هيبقى في سين وجيم
وورينا صورها وهي مين وتفاصيل كتير وخناقات .. لحد ما خلاص نتفق على حلول وشروط بس ده ماحصلش ماشغلتش دماغي كتير قولت جايز خلاص بقوا فاهمين النظام وكده كده انا معرفهم قبلها
بعدها لقيت مكالمة من مريم قومت رديت عليها بدت اعجابها بالهدية وقعدت تشكرني وتبدي فرحتها الشديدة وانا كمان كنت سعيد انها فرحانه بقى لي كتير ماحدش شكرني على اي حاجه بقدمهاله حتى زوجاتي بجبلهم هدايا كتير بس ماعدش في شكرا والفرحة دي
اكيد دا طبع البشر انهم لما بيتعودوا على حاجه بيغفل ان كلمة شكرا مازالت مهمة وذات تاثير كبير في النفس عشان كده اللي بيجيب هديه بيفرح بيها احيانا اكتر من الشخص اللي تلقاها بسبب معرفته ان الشخص ده هيفرح جدا بالهديه دي
تاني يوم روحت المكتب ومريم طلبت انها لازم تقابل زوجاتي وتقعد معاهم وتتعرف عليهم قبل ما اتقدملها وبالفعل طلبت من زوجاتي اننا نخرج ومريم وامها هيكونوا موجودين ووافقوا كلهم وجم معايه
قعدنا في معطم كبير كنت حاجز فيه تربيزة وزوجاتي سلموا عليها ورحبوا بيها وهي رحبت بيهم وماتكلموش تاني طول القعده بيبصوا عليا وعليها واحنا بنتناقش قعدنا حوالي 4 ساعات وبعدها روحنا
بس لما روحت لقيت زوجتي الاولى بتقولي انها عايزة تقولي حاجه .. وقالتلي انها مش مبسوطة بالجوازة دي وانها هتكون مختلفه جدا عنهم قولتلها بالعكس هي انسانه طيبه جدا وهتحبيها لما تعرفيها
قالتلي انا بعرف الناس من اول نظره وعمري ما حكمت على حد وطلع توقعي غلط .. قولتلها جايز المرة دي اتسرعتي صدقيني هتحبيها لما تتعاملي معاها
بعدها سابتني ومشيت وانا عارف انها زعلانه لان دي من المرات القليله اللي ما نتفقش انا وهي على نفس القرار تاني يوم روحت الشغل لقيت مريم دخلت وقفلت الباب وقالتلي عايزة اكلمك في شوية حاجات
قولتلها طبعا اتفضلي .. قالتلي انا مش حاسه اني هكون مرتاحه لو قعدت في القصر معاهم و....
يتبع ...
زوجاتي الجزء الثالث والاخير
قالتلي انا حاسه اني هكون مرتاحه لو قعدت معاهم وانت عندك عيال كبيرة انا حابة اقعد في مكان لوحدي حتى لو هتجيلي يومين في الاسبوع بس .. انما قعدتي معاهم هتبقى صعبه جدا
قولتلها انتي بتقولي كده عشان ما شوفتيش القصر كبير ازاي وهيبقى ليكي مكان فالقصر اكبر من شقة .. ومحدش هيضايقك اكلك هيجيلك وهتقعدي معززة مكرمة
سكتت شوية وقالتلي طيب لو لا قدر الله حصلك حاجه هضمن حقي ازاي وهما كلهم ممكن يتفقوا عليا وعندهم عيال هحس انهم هيطردوني بره .. عشان كده عايزة مكان ملكي انا بعيد عن القصر
قولتلها هجبلك شقه باسمك وتيجي تسكني معانا وبكده نحل المشكله لو حصل اي حاجه .. قالتلي يعني في احتمال يطردوني .. قولتلها انتي مستعجله على موتي ولا ايه ..؟؟
لقيتها اتربت ووشها احمر وقالتلي انا مش قصدي كده وازاي تقولي حاجه زي دي وقامت معيطه .. صعبت عليا هديتها وقولتلها انتي عايزة ايه طيب ؟
قالتلي اقعد في شقة او فيلا اي حاجه وانت تجيلي مش عايزة اقعد معاهم وعايزة اضمن حقي لو حصل اي حاجه مش عايزة اترمي في الشارع .. قولتلها ماشي هشوف كل ده سهل باذن الله
بعدها روحت وفضلت افكر في الكلام بتاعها .. كلامها بقى يقلق الواحد ممكن تكون فعلا مش معجبه بيا عشان كبير في السن وطمعانا في فلوسي زوجاتي التلاته طيبين وعمر ماحد شافهم غير لما حس بامان اصلا
هي ليه حاسه بالغدر من ناحيتهم بس اللي بيخون دا او واحد بيخون ... الموضوع بقى مقلق جدا عايزة تضمن حقها من دلوقتي وانا عايش مافيش ولا واحده من زوجاتي طلبت ده
الموضوع عشرة مش سباق من هياكلني لما اموت .. نكدت عليا الله يسامحها .. ليه مافيش واحده من زوجاتي قالتلي هضمن حقي ازاي ؟؟
أسئلة كتير بتدور في دماغي دلوقتي لحد ما قررت افكر تاني في الموضوع بزاوية اكبر .. واكتشفت اني في فعلا مافيش حاجه تستاهل التعب والهم والقلق اني ادخل واحده مش واثق فيها حياتي .. رغبتي فيها انعدمت لما حسيت كلامها كله بيدور حوالين نصيبها ونصيب زوجاتي
زوجتي الاولى كان عندها حق .. زي مادايما بيكون عندها حق .. في حاجه مش مزبوطه في الموضوع ده جايز مريم قالت لامها وامها قالتلها وافقي دا ياسر عبدالقوي وهتورثي وهيغرقك فلوس.. عشان كده بدات كلامها بشقه ونهته بشقه او فيلا اقعد فيها لوحدي .. شكلها بترمي لبعيد اوي.. انا قلبي دليلي في حاجات كتير
ومش عيب اني اقول اني اتسرعت بس انا قلبي اتقبض جامد حاسس اني داخل على فخ ناس بتدبرهولي وبيستغبوني وانا ماحبش حد شغل دماغه عليا ..صليت استخاره ونمت
وتاني يوم بالفعل مريم جاتلي وقالتلي خلاص فكرت في اللي اتفقنا عليه .. مع اننا اتكلمنا ما اتفقناش على حاجه لسه ..قولتلها مريم انا صليت استخاره وخدت راي زوجاتي وقالولي انهم مارتحوش معاكي لما اتقابلتوا وانا بثق فيهم .. انا بعتذرلك انا فكرت كويس وشايف اننا نستمر في الشغل بدون ما نفتح سيرة الموضوع ده تاني
لقيتها فضلت بصالي وفضلت تعيط .. سبتها لحد ما تخلص خالص وجيبتلها لمون وقولتلها كل شئ اسمة ونصيب وننسحب دلوقتي احسن ما ناخد خطوة مش مدروسة ونندم عليها في المستقبل
بعدها سابتني وروحت وهي بتعيط وانا محتار بس مؤمن من جوايا اني خدت قرار صح ومامتها كلمتني وفهمتها ان الموضوع لحقناه بدري عشان ما حدش فينا يظلم التاني ومن طريقه كلام امها ان امها هي اللي سوحتها من الاول بس المكالمه طولت اوي وانا بدات اتعصب حاسس حد عايز ينصب عليك بالعافيه فاتعاملت رسمي جدا معاها لحد ما هي كشت وقفلت السكة
بعدها روحت بلغت زوجاتي بقراري وبالي حصل بالظبط لقيت وشهم نور كلهم .. وفرحوا جدا ولقيت منهم معاملة مختلفه واهتمام غير مسبوق .. بصراحه حسيت ان اللي حصل ده درس ليا اتعلم منه اني ما اتسرعش تاني واني لازم اخد راي زوجاتي الاول في حاجه زي كده
وان طالما الوقت مناسب للانسحاب ما تخافش تنسحب احسن ما تكمل والمشكله تكبر وتقول يارتني كنت انسحبت والمشكله لسه في اولها وكانت ماتت واتقفلت
واكتشفت اني مش محتاج اتجوز تاني ربنا رزقني بثلاثه زوجات صالحات مش لازم اتجوز اربعه عشان الشرع محلل اربعه بالعكس انا حسيت بالسعاده والاستكفاء معاهم المشكله دي قربتني من زوجاتي تاني وخصوصا اني اعترفتلهم بغلطي وهما عارفين ان دي حاجه كبيره ومقدرين ده كويس
في نعم كتير معانا مش واخدين بالنا منها .. وممكن في طمعك بالزياده تضيع حاجات كتير كانت عندك لو كنت ركزت عليها كان هيبقى احنسلك بكتير أوي.
تمت
تعليقات
إرسال تعليق