 |
رواية كابوس مرسوم كامله وحصريه في موسوعة القصص والروايات جميع الفصول كامله وحصريه بقلم محمد محمود قبل خطوبتي بثلاث أيام سمعت صوت طالع من تحت السرير وأنا نايمة .. قولت عادي تهيؤات ما قبل النوم ..بس في حاجه عماله تتحرك لسه.. والصوت بيزيد فقومت بصيت تحت السرير بالراحه ..لقيت أكثر من ايد لونها اسود بأظافر طويله عماله تحاول تزحف عشان تطلع من تحت السرير |
وفي أكتر من أيد حاولت تمسك رجلي وتشدها .. ولما أيد مسكت رجلي حسيت بأيديهم سخنة ولزجة جدا ..سحبت رجلي بسرعه وصرخت جامد بكل قوتي .. لقيت نفسي صحيت من النوم بنهج وبعيط ..بصيت حواليا كل حاجه زي ما هي بصيت تحت السرير بحذر مالقتش حاجه.. كل يوم بنام بحلم بكابوس ..مافيش أوحش من انك تخاف تنام بقيت بفضل سهرانه باليومين ومش عايزه انام لحد ما النوم يغلبني
المصيبه ان في مثل بيقول اللي يخاف من العفريت يطلعله وانا بخاف وطول النهار بفكر فيهم مهما حاولت انساهم ..ومن كتر خوفي وكوابيسي نقلت سريري وبقيت انام مع اخويا في غرفته عشان ما يحصلش حاجه
وبليل كنت ممدده جسمي عالسرير واخويا كان نام على سريره في نفس الغرفة .. لقيت شعر طويل جدا بينزل من السقف .. عمال ينزل من نص الغرفه .. فجأة ظهر وش واحده عينيها بيضا ووشها رمادي ونحيف جدا .. فتحت بقها لقيت دم بيسيل منه
وعمال ينزل على الارض ووشها كله اتغرق دم ..انا مش عارفه اصرخ ولا اتحرك حاسه في حاجه مكتفاني .. وفجأة بدأت أرفص واحوال اتحرك والست دي عماله تنزل من السقف ووصلت لحد نص جمسها متعلق وبدأت تمد إيديها ناحيتي وقامت بصالي وصرخت جامد قومت مصرخه هنا
لقيت نفسي بصحى من النوم وعرقانه وبنهج واخويا صحي واتخض وفضل يطبطب عليا وانا بعيط جامد .. قالي اهدي انتي بس متوتره ومضغوطة عشان خطوبتك بعد بكره مافيش حاجه والايام اللي جايه كلها فرحه وسعاده
بس أنا ماكنتش قادره اهدى فضلت صاحيه تاني يوم لحد ما كان فاضل يوم على خطوبتي .. صحباتي جم بليل وفضلنا نرقص ونغني وقضينا وقت حلو جدا لأنهم أقرب صحاب ليا وكانوا دايما بيجيوا يباتوا معايه وصحاب جدا من أيام المدرسة لحد بعد التخرج ..بعدها خلصنا متأخر وهما روحوا
وكان بقى لي كتير مانمتش ومش قادره وفضلت قاعده عالسرير وصاحيه اخويا دخل ينام لقاني لسه صاحيه قعد جنبي وفضل يطبطب عليا ويبوس راسي ويباركلي وبعدها قام مدد على سريره .. فضلت سرحانه شزويه وبعدها لقيته نام
بعدها خطيبي أتصل وفضلنا نتكلم لقيت اخويا صحي يدخل الحمام كنا قبل الفجر تقريبا فجأة لقيت باب الاوضه اتهبد جامد وهوا بيتقفل بقوة والنور طفى اتخضيت وقلبي كان هيقف.. ولقيت السرير بتاعي بيتسحب لنص الاوضه بسرعه الموبايل طار من ايدي لدرجه اني كنت هقع أنا كمان من السرير
ولقيت الدولاب اتفتح وفي اصوات كتير بتتحرك جوه أصوات ناس مش قادره تتنفس وصوت حشرجه وطلعت الست اللي بشوفها دايما من الدولاب وقامت مسكاني من دراعي ولقيتها بتشدني لجوة الدولاب فضلت اصرخ واحاول اجري ما عرفتش وهي عماله تصرخ في وشي والسرير بيقرب من الدولاب وعماله تشدني لحد ما صحيت لقيت اخويا ماسكني من ايدي بيحاول يصحيني وطلع كابوس ببص في دراعي لقيت خرابيش وعلامات حمرا على ذراعي
ماقدرتش امسك نفسي ساعتها من العياط ساعتها اخويا صمم اننا نروح لشيخ ويعرف بابا وماما..وفعلا كلم كام حد في الجامع لحد ما دلونا على شيخ ووالدي ووالدتي برده قعدوا يسألوا مع اني ماكنتش عايزة اخضهم عليا بس فعلا ما بقتش عارفه انام .. والمصيبه ان خطوبتي بليل وانا مش عايزة اضيع اليوم ده بس اهلي اصروا نروح للشيخ دلوقتي فالصبح قبل الخطوبه عشان يطمنوني
وصلنا للشيخ انا واخويا وبابا وقعدنا معاه وأنا قلبي مقبوض وخايفه من المكان اللي احنا قاعدين فيه ومخنوقه من ريحة البخور اللي ماليه المكان ..وأول ما شافني قالي انتي مابتناميش يابنتي.. فضلت بصاله وانا مندهشه وبصيت لاخويا ..بعدها قال انتي معمولك عمل يصحيكي طول الليل جسمي قشعر من كلامه قولتله ومين هيعمل فيا كده ؟!!
قالي ناس كتير مش بتحبلك الخير عشان بتحكي كل حاجه حلوة بتحصلك للناس والصح أنك تداري على شمعتك تقيد قولتله طيب أيه الحل؟ قالي العمل دا موجود عندكم في البيت وبعدها فضل ساكت ما بيتحركش.. بصيت لاخويا ولبابا لقيتهم مستغربين برده وبيبصولي !! قولتله يا شيخنا انت سامعني؟ وهوا ساكت ما بيتحركش خالص كانه اتثبت وفجأة حصل حاجه كانت هتوقف قلبي من الخضة والخوف....
يتبع ...
كابوس مرسوم
كابوس مرسوم الجزء الثاني
لقيت الشيخ عينيه بصت لفوق جامد لدرجه ان عينيه اتقلبت بيضا وظهرت العروق الحمرا في عينيه وفتح بقه على الاخر وفضل يشهق كانه مش قادر ياخد نفسه بابا طبطب عليه وقاله انت كويس ؟ وهوا مستمر على حالته دي وفجأة سمعنا صوت بيتكلم طالع من بقه بس هوا فاتح بقه على أخرة ومش عارفه بيتكلم ازاي ؟
بس واضح ان مش هوا اللي بيتكلم .. لان الصوت كان غليظ جدا ..وعمال يقول مرسوم مختوم حابسك جواه .. والشيخ بعدها بدأ الدم ينزل من عينه وودانه .. ساعتها طلعت بسرعه أنا وبابا وأخويا وبلغنا المساعدين بتوعه وبعدها فضل يترعش كده لحد ما بطل وهدي خالص الناس قربت منه قالوا انه عايش واغمى عليه
ساعتها مشينا بسرعه ورجعنا عالبيت وانا منهاره جدا .. ودايخه من كتر ما فضلت صاحية وبابا واخويا عمالين يهدوني ويقوليلي مافيش حاجه خلاص وانسي اللي حصل وانتي خطوبتك بليل ولازم تجهزي بقى .. وفعلا روحت وصحباتي كانوا جم البيت وقعدوا معايه وبصراحه هونوا عليا حاجات كتير
الخطوبة كانت عندنا في البيت لبست واستعديت وبعدها خطيبي وصل هوا وأهله والجو العام كان جميل جدا وهادي وفجأة وسط الناس اللي قاعدين ببص في الطرقه اللي بتبص على غرفتي وأنا كنت قافله الباب لقيت باب الاوضه بيتفتح براحه انا شايفاه ومش عايزة اشتت تركيزي .. فضلت أبص عالناس واكلم خطيبي عشان ما اسرحش في حاجه .. بس مش قادره عيني جت على باب أوضتي اللي لقيته مفتوح وست طويله واقفه شعرها مغطيها وعينيها بيضه .. فضلت بصالها شويه وانا مش مصدقه هوا انا في حلم دلوقتي مش حقيقه !
بعدها لقيتها بترجع براحه وبتدخل لاوضتي لحد ما اختفت في الضلمه .. ببص لصحباتي وقرايبي ماحدش مركز غيري قلبي كان بيدق جامد من الخوف وعيني بدات تدمع ماما خدت بالها وجاتلي حضنتني .. وبعد ساعات الخطوبه كانت انتهت واخر حد من المعازيم مشي .. وانا مش عارفه ازاي شوفت حاجه زي كده وانا صاحيه
دخلت الاوضه بتاعتي بعدها عشان أغير واروح انام في اوضه اخويا .. بفتح باب اوضتي ما بيفتحش فضلت اخبط جامد عالباب مش راضي يفتح دورت على موبايلي مالقتوش نسيته في الصله .. قومت فضلت انده واخبط عالباب .. الغريب ان ماحدش بيرد عليا
فجأة لقيت الدولاب بتاعي بيتهز وفي صوت طالع منه بدات اترعب وبدات اخبط عالباب واحاول افتحه بقوة اكتر الصوت بدأ يزيد وفجأة لقيت من مكان فتحة مفتاح الدولاب حاجه بتطلع حشرة صغيره ولقيتها بتطير وجت وقفت قدامي عالباب كانت خنفسه سودا فضلت احاول افتح الباب ولقيت كمان واحده طلعت من الفتحة وبدأ كتير يطلعوا ورى بعض وانا مرعوبه وخايفه واحده تيجي عليا
وسمعت صوت حاجه بتتقشر او بتتاكل مع صوت زن لحشرات كتير بدات اسمع صوتها فجأة لقيت الدولاب بيظهر فيه فتحه من عند الباب وخنافس كتير بدات تظهر وتطير في الاوضه المنظر كان مفزع جدا لدرجه الفتحه دي كبرت أوي وكميه رهيبه طلعت مره واحده وهما بيزنوا وبيتجمعوا حوالين لمبه الاوضه اللي تقريبا خلوا الاضاءه في الاوضه منعدمه اذا ماكنتش ضلمه خالص وبدات الحشرات تيجي عليا وانا بحاول انفضها وانا بصرخ وبدات تدخل جوه هدومي لحد ما صرخت جامد ووقعت على الارض واغمي عليا
لقيت بابا وماما بيصحوني وبيقوليلي ايه منيمك على الارض في اوضتك ؟! صحيت وانا مخضوضه وببص حواليا وببص عالدولاب مافيش حاجه ظاهره .. فضلت اعيط كالعاده وبابا قالي انا هجبلك شيخ كويس الحته كلها بتشكر فيه .. وهوا اللي هيكون سبب في شفاء الي بيحصلك ده
دخلت الاوضه عند اخويا وفضلت قاعده على سريري مش عارفه انام .. وبعدها قومت اشغل نفسي باي حركه عشان مانامش دخلت الاوضه وقربت من دولابي بحذر وبعدها فتحت فتحه صغيره وبعدها فتحته ورتبت هدومي وفضلت اتفرج عالهدايا اللي جاتلي وماقدرش افضل صاحيه اكتر من كده وخصوصا ان الشمس طلعت ودخلت أنام
بعدها صحيت على صوت دوشه بره ولقيت ماما داخله تديني اسدال البسه وبتقولي بسرعه عشان الشيخ جه طلعت بره لقيت راجل كبير فالسن ومعاه شاب ولقيت ماما حطاله طشت فيه مياه وطشت تاني الشاب بيحط فيه ملح وبدأ الشاب ياخد من المياه دي بكوبايه ويرش في اركان الشقه كلها ودخل الاوضه عندي وبدأ يرش في كل ركن وفجأة لقيت الشاب واقف كده وقام طالع بسرعه وموشوش الشيخ في ودنه....
يتبع ...
كابوس مرسوم الجزء الثالث
قام الشيخ قام وخد كوبايه مياه وفضلت يقرا عليها ويقول كلام مش كلنا سامعينه وقام داخل على اوضتي وكلنا روحنا معاه بس وقفنا من بره وقم حط شويه مياه في كف ايده ورش عالدولاب .. بدأت استوعب حاجه انا كل كوابيسي تقريبا فيها دولاب .. حاجه بتطلع منه او ست تسحبني لجوة في حاجه مش مزبوطه فيه
الشيخ طلب مننا بعدها نفضي الدولاب كله وبدأ يبص على علب الهدايه والدباديب .. وقام طلب من الشاب واخويا يزيحوا الدولاب ويحركوه بعيد وكانت صدمه أول ما شوفت اللي ورى الدولاب
لقيت كميه ورق ملزوق عالحيطه غير طبيعية رسموات وارقام وكلام غريب وورق محروق وورق متغرق دم المنظر كان مرعب لاي حد ؟؟ ازاي عايشه كل ده وفي بلاوي ورى الدولاب بتاعي .. الشيخ قام جاب كوبايه المياه اللي معاه وفضل يرش على الورق اللي ملزوق عالحيطه وطلب كيس اسود وقام مجمع فيه الورق
وفضل يمسح بايده الحيطه بالمياه .. وقام بصيلنا وقالنا في جنية ساكنة في الشقة دي من زمان .. زي ما كل مكان ليه سكانه من الجن مافيش قطعه في الارض مافهاش جن .. بس المكان لما بيكون مهجور بقى له فتره الجن بيجي يسكن فيه ومش اي جن بيبقى الجن اللي مش عايز يحتك بحد وبيفضل انه يعيش لوحده ..فرد عليه بابا وقاله بس احنا ساكنين هنا من زمان وماكنش في اي حاجه بتحصل
قاله فعلا في جن منهم لما حد بيجي يسكن معاهم بيتعودوا عليه .. بس في تعاويذ تانيه لو اتعملت بتدايق الجن فبتخليه مش عارف يعيش معاك وبتكون انت سبب أذى ليه ؟ فبيضطر يطفشك من المكان بأنه يطلعلك في أحلامك ويتجسدلك على أشكال مختلفه لان لحد دلوقتي ماحدش فينا يعرف شكل الجن الحقيقي
انا ساعتها كنت بعيط من اللي شوفته وبسمعه وسالته قولتله والرسومات دي هي اللي استفزت الجنيه اللي عايشه هنا ؟! قالي أيوه في حد عمل التعاويذ دي وحطهالك ورى الدولاب .. وبما ان دولابك كبير قد يكونوا اكتر من حد عملوا كده
مابقتش مصدقه اللي بسمعه وبعدها بابا اداله فلوس وكان رافض لحد ما والدي اصر ياخدها ومشيوا هما الاثنين وانا منهاره وكلمت خطيبي وحكيتله على كل اللي كان بيحصل وزعل اني ماكنتش بحكيله مع انه كان ملاحظ عليا التعب وسواد تحت عيوني ومش راضيه اعرفه في ايه
بس انا قعدت افكر مين ممكن يعمل معايه كده .. انا دماغي هتفرقع من كتر التفكير اكيد مش بابا ولا ماما ولا اخويا اكيد حد تاني بيدخل اوضتي ..؟ بس صحباتي هتعمل كده ليه .. بدات ارجع بالتفكير لورى اكتشفت ان في اتنين من صحباتي هما صحاب مع بعض جدا واتخانقت معاهم من شهر خناقه كبيرة وصحابنا صالحونا ببعض عشان خطوبتي وما ينفعش ما يحضروش يباركولي مع اني لحد دلوقتي كنت بشوف نظرات حقد وغل منهم بس كنت بطنش عشان صحابي التانين وصحباتي الاثنين دول كانوا بيفضلوا قاعدين معايه وانا ممكن اسيبهم واجهز اكل او ادخل حمام لا ما ينفعش اطردهم لما يزوروني
ساعتها اخويا وبابا نقلوا سريري لاوضتي تاني بعد ما طلبت منهم ده .. وبابا قالي ان الشيخ قاله يتخلصوا من الورق ده ساعه اذان المغرب بانه يحرقه في حله ألمونيوم وجه يشيل الكيس قولتله لا خلاص خليه انا هتصرف فيه بنفسي .. قالي خلاص المهم انتي كويسه قولتله انا تمام
كلمت صحباتي الاتنين وطلبت من الاولى ازورها كمان ساعتين اقعد اتكلم معاها والتانيه طلبه نفس الكلام .. ولاتنين رحبوا جدا .. وقومت جايبه كراسه وفاتحه الكيس اللي فيه الورق وقومت نقلت نسخه تانيه من الورق معايه وقطعتها على نفس الشكل والكتابات وشيلت كل ورق في كيس ولبست ونزلت وجيبت لزق من السوبر ماركت وروحت لاول واحده قعدت معاها شويه وقولتلها عايزة ادخل الحمام وبعدها....
يتبع ...
كابوس مرسوم الجزء الرابع والاخير
دخلت لقيت المرايه بتاعة الحمام في مساحه وراها قومت شايلاها بحذر لانها مريه مسنوده بمسامير .. وقومت ملزقه الورق وراها وقومت مرجعه المرايه قعدت مع صحبتي شويه ومشيت وروحت لصحبتي التانيه
ودخلت الحمام وقومت محركه الغساله بالراحه وبصعوبه عشان واصله بخرطوم في الحيطه وقومت ملزقه الورق ورجعتها مكانها لان المرايه كانت ملزوقه في الحيطه وطلعت بعدها قعدت معاها شويه وروحت لواحده كمان من صحباتي ماعملتش عندها حاجه بس عشان لما صحباتي الاتنين هيعرفوا ان زورتهم اليوم ده هما الاتنين ممكن يستغربوا بس ساعتها هقولهم اني قابلت صحبتنا التالته برده
يومها نمت مرتاحه وصحيت مبسوطه جدا وعدى يوم والتاني والثالث .. وانا هموت واعرف حصلهم ايه لحد ما قابلتهم بعد اربع ايام مع صحابنا وبصيت في عيونهم لقيتهم تقريبا ما ناموش بقى لهم يومين ساكتين ووشهم مطفي وعيونهم حمرا جدا من السهر ..
صعبوا عليا بصراحه بس هما اللي ابتدوا الاذية .. وبعد أسبوع لقيت صحبتي بتكلمني ان الاتنين ماتوا امبارح في نفس الوقت في غرفتهم بسكته قلبيه .. سمعت الخبر ده وكان زي ما يكون طلقه دخلت في صدري انا اللي عذبتهم لحد ما جاتلهم سكته قلبيه .. انا اللي اذيتهم وخليتهم يموتوا من التعب والفزع
بس انا مش عارفه اللي انا عملته صح ولا غلط مهوا لما حد يجي يئذيك لازم تردله الاذية ولا كان المفروض اسامح واسيبهم يئذوني وما اتخذش اي رد فعل انا تعبت الايام اللي فاتت جامد ومش عارفه اعمل ايه لدرجه اني معرفتش احضر عزاهم الموضوع صعب اوي
وقلب معايه اكتئاب لاني مش هقدر احكي همي لحد مهما كان لانه مش هيفهم انا مريت بايه في حياتي وايه خلاني اوريهم العذاب اللي انا شوفته اي حد ممكن يدي حكم هيحكم من بعيد مع اني ما عملتش حاجه غير اني سقيتهم من نفس الكاس بس هما ما استحملوش ..ومع ذالك أنا لسه بسأل نفسي هل اللي انا عملته ده كان صح ولا غلط
تمت
مجمع الروايات الكامله والحصريه اضغط هناااااااا
تابعى صفحتنا على الفيسبوك عشان تبقى اول واحدة تقرأ البارت اول ما ينزل
صفحتنا على الفيسبوك اضغط هناااااااا
تعليقات
إرسال تعليق