رواية جواز مسيار البارت العاشر الأخير بقلم حنان حسن في موسوعة القصص والروايات جميع الفصول كامله وحصريه
رواية جواز مسيار البارت العاشر الأخير بقلم حنان حسن في موسوعة القصص والروايات جميع الفصول كامله وحصريه
رواية جواز مسيار البارت العاشر الأخير بقلم حنان حسن في موسوعة القصص والروايات جميع الفصول كامله وحصريه
جواز مسيار
الجزء العاشر
والاخير
بعدما اكتشفت الحقيقة
..وعرفت حقيقة مكتب الجواز
الي كان ستار
لتجارة الاعضاء
فضلت ابكي علي نفسي
لاني دلوقتي
هدفع عمري ثمن
نتيجة لاكتشافي الحقيقة
وفي اخر لحظة في حياتي
شوفتهم وهما بيكتفوني
وبعدها...حسيت
بشكة السرنجة
الي بيدخلوها في دراعي
واول ما بدء البنج يشتغل..
بدات اغيب عن العالم ..
ومبقتش سامعه ولا دريانة بحاجة
وبدات كمان الرؤية تتحجب
لكن...اثناء ما كانت عنيا مزغللة..
شوفت وجه محمد ادامي
وسمعتة بيقولي..
متخافيش
وكنت عايزة اصرخ
واقولة...
الحقني يا محمد
لكن..الدنيا اسودت ومدرتش بنفسي بعدها
وبعد فترة..
معرفش اد ايه
رجع الضوء لعنيا تاني
فا فتحت عنيا اكتر
وشوفت ادامي امراة غريبة
ملابسها تشبة ملابس الممرضات
فا سالتها..
قلت...
انا فين؟
وبدل ما ترد عليا
سمعتها وهي بتنادي علي واحده معاها
وبتقولها..
قولي لحضرة الضابط
ان المريضة فاقت يا ابتسام
فا ردت ابتسام
وقالتلها..
حضرة الضابط جاي من نفسة اهوه
فا حاولت استعيد تركيزي
وسالت الممرضة
هو انا نجيت من ايد فريال ازاي؟
وجيت هنا امتي؟
ومين الي انقذني
وقبل ما الممرضة ترد عليا تساؤلاتي
سمعت صوت محمد
بيقولي...
انا الي جيبتك هنا
فا سحبت الممرضة كرسي
وقدمتة لمحمد
وهي بتقولة..
اتفضل يا باشا
فا استغربت من الي بيحصل
وسالت محمد
وقلت..باشاء
الجن العاشق بقي باشا؟
فا رد محمد
وقالي..مفيش جن عاشق
انا الضابط هشام
قلت..ده بجد؟
يعني انت مش محمد العفريت ؟
فا ابتسم محمد
وقالي...
لو كنتي ركزتي شوية
كنتي عرفتي...
اني بني ادم
فا عيدت سؤالي تاني
وقلت..
يعني انت طلعت ظابط؟
فا هز راسة
وقالي..ايوه يا عبير
انا ظابط..
وكنت مكلف بالقبض علي فريال وباقي اعضاء الشبكة
قلت..شبكة ؟
قال..
ايوه العصابة كانوا مكونين شبكة
وكانوا تابعين لمنظمة كبيرة
لتجارة الاعضاء
والحمد لله
قدرنا نقبض علي فريال وشركائها هما متلبسين
وهما دلوقتي بيتحقق معاهم
بس الاهم من ده كلة
اننا انقذناكي..
انتي... و اخر عريس
اتجوز عن طريق المكتب
من ايديهم
قلت..يعني انت فعلا
الي كنت بتقولي متخافيش
قبل ما اغيب عن الوعي؟
قال..ايوه
فا بصيتلة بحيرة
وقلت.. انا كدة قربت اتجنن
قال..
عارف اني تعبتك معايا
وحيرتك كمان
وكيد انتي دلوقتي عايزة تسالي
عن حقيقة الجن العاشق؟
قلت..بصراحة ايوه
قال..حاضر
بس عشان تفهمي
لازم الاول اسردلك قصة الظروف
الي اجبرتني علي اني اخدعك...واوهمك
بان في جن عاشق في بيتك
قلت..طيب ممكن تفهمني ارجوك
فا رد حضرة الضابط
وقالي..حاضر
وفعلا بدء في سرد الحقيقة
وقال..
القصة بدات من فترة
لما جالنا بلاغ من مواطنة اسمها غادة
كانت بتبلغ عن اختفاء صديقة لها اسمها عزة
وقالت في البلاغ
ان عزة ارسلت لها رسالة قبل ما تختفي
قالت فيها...
انها عملت مشكلة مع صاحبة الشغل
الي بتشتغل معاها
وصاحبة الشغل دي تدعي (فريال)
وده ادي لتعدي فريال علي عزة بالضرب
وسرقة فلوسها
فا قامت عزة بتهديد فريال
با انها هتفضح امرها
وهتفضخ حقيقة المكتب الي بتشتغل فيه
فا هددتها فريال
بانها لو اتكلمت هتقتلها
وعشان كده
قلقت عزة من تهديدها
ونبهت عزة في الرسالة
علي صديقتها
انها لو جرالها حاجة
يبقي فريال هتكون هي الي قتلتها
ولازم تبلغ عن فريال
ومن هنا
بدانا نعمل تحرياتنا عن المكتب
واصحاب المكتب
لكن للاسف
مقدرناش نوصل لشيئ
لانة كان مكتب جواز عادي
فا اتصل بالمكتب واحد من رجالنا..
وادعي بانة عريس
وبعدما كتب الكتاب ودفع العمولة..
اخذ منهم عنوان الشقة هنا
ولما عملنا تحرياتنا عن الشقة الي انتي فيها
عرفنا ان الشقة مفيهاش غير بنتين
منهم عزة الي اختفت
والبنت التانية..كانت انتي
واكتشفنا عملية النصب الي بيقوم بيها المكتب
والاخطر من كده
اننا اكتشفنا من خلال التحريات...
ان اي عريس...
بيتقبل في المكتب
ويكتب كتابة
بيختفي بعدها
ومحدش بيسمع عنة تاني
وفي الوقت ده ...
كان في بلاغات كتير باختفاء كثير من الشباب
وخصوصا ان تكاليف الزواج اصبحت باهظة
والشباب ما بيصدقوا يلاقوا جواز سهل ..ومش مكلف
المهم...
عرفنا ان الموضوع كبير
وشكينا في اصحاب المكتب
بس كان لازم نمسك اول الخيط
وبصراحة...
في الاول
..انتي كنتي واحدة من المشتبة فيهم
وزاد شكنا فيكي
لما شوفنا لبس التنكر الي انتي كنتي عاملاه
وكنا طبعا متاكدين ان وراكي
ناس تانية
وكان مفروض ساعتها اننا ناخدك ونحقق معاكي
عشان توصلينا ليهم
لكن ...
لقينا ان من الاحسن
اننا ناخدك وسيلة للوصول للحقيقة
فا استغلينا انك عايشة لوحدك في الشقة
وركبنا كاميرات واجهزة تصنت
عندك هنا
وبعدها...
جيت هنا علي اني محمد العريس
انا وصاحبي اشرف
واخدناكي باليل لبيت مهجور
وعملنا تمثيلية الاحتجاز
وحبسناكي في غرفة في الدور الارضي
ووكنا قبلها جهزنالك غرفة البواب
وبعدها
جيبنا بنت تشبة لصورة عزة
الي اخدناها من صديقتها وهي بتبلغ باختفائها
المهم
لبسنا البنت الشبيهة لبس عزة
وطلبنا منها تقعد في العربية
وتبص في الموبيل بتاعها
ومتردش عليكي مهما ناديتي عليها
ويومها
كان... كل الي احنا عايزينة...
انك تتاكدي انك شوفتي عزة
وشوفتي البيت الي في المعادي
و كنا عارفين انك هترجعي
عشان تتاكدي ان كانت البنت الي شوفتيها
عزة فعلا ولا لا؟
عشان كده
قبل ما ترجعي للبيت
نزلنا علي البيت ...
ستاير ...وورق حائط اسود مفحم علي جدران البيت
تبين ان البيت كان محروق من فترة
وطبعا رجالتنا قاموا بالواجب..
وفهموكي ان صاحب البيت مات محروق في البيت
قلت..
وانت عرفت ازاي مكان دفن عزة؟
قال..
منا قولتلك اننا ركبنا كاميرات مراقبة
عندك في الشقة
وشوفناكي وانتي نازلة تتاكدي من وجود جثة عزة
قلت..وليه مقبضتوش عليا يوم ما عرفتوا مكان جثة عزة؟
قال..اولا..
احنا سمعنا كل محادثاتك مع فريال...
واتاكدنا ساعتها انك بريئة من قتل عزة
ومكنتيش تعرفي انها اتقلت اصلا
وثانيا..
عرفنا ان فريال هي الي قتلتها وبتهددك
بالورقة الي مسكاها عليكي
لكن احنا ساعتها المشكلة
بالنسبالنا
مكنتش مقتل عزة بس
لا..
دا كان في شباب كتير بيختفوا بعدما بيوصلوا للمكتب
وكان لازم نعرف بيروحوا فين وازاي
وفعلا عرفنا حقيقة الامر
بعدما ركبنا اجهزة تصنت
في موبيلات فريال وزوجها الجراح
وعرفنا انهم بيتاجروا في الاعضاء البشرية
وكان ناقص بس اننا نقبض عليهم متلبسين
لكن...الي عطل المهمة
اننا عرفنا من خلال المكالمات المسجلة...
ان الدكتور.... وفريال مراتة
اتصابوا بكورونا..وهيوقفوا الشغل لمدة اسبوع
ومكنش فيه حل
غير اني افضل معاكي في الشقة الاسبوع ده
علي اني الجن العاشق
عشان يبقي الوضع تحت
السيطرة
وميحصلش اي لخبطة في الخطة
وهنا وقفتة
وقلت..
انت كنت بتسمع مكالمتهم
دلوقتي انا فهمت ..
انت ازاي عرفت مين المتصل بدون ما تشوف الموبيل
وازاي كمان عرفت مضمون المكالمة
الي كانت هتعملهالي فريال
بس في اكتر من حاجة برضوا نفسي افهمهم..
قال... ايه هما؟
قلت..
انا لما حاولت المسك...
واتاكد
ان كنت جن ولا بني ادم
شوفت اشخاص لونهم ازرق
بيخرجوا من الحيطة
وشوفتهم كمان
وهما بيولعوا فيك...
فهمني بقي ايه الي انا شوفتة ده وحصل ازاي؟
في اللخظة
ابتسم حضرة الضابط
وقالي..
في اليوم ده
انا لاحظت انك عايزة تلمسيني
عشان تتاكدي ان كنت جن ولا بني ادم
وحاولت ابعد عنك ...
واهرب منك
عشان متلمسنيش
لغاية
ما ادعيتي انك مريضة
وطلبتي مني انام في غرفتك
فا يومها عملت اني مصدق انك مريضة
وحطيتلك حبوب هلوسة في العصير
الي شربتية قبل ما تنامي
ساعتها...
انا معرفش انتي شوفتي ايه
بس كنت عارف
ان اي هلاوس هتشوفيها ..
كانت هتاكدلك اني
جن عاشق فعلا
قلت..تمام..
سؤال تاني بقي
قال..اسالي...
قلت..
ازاي جيبت موبيل فريال
لما كنت عايزة امسح الرسالة؟
قال..في اليوم ده
فريال كانت بتكلمك وهي نازلة من الشقة الي جنبك
وكانت تقريبا علي السلم
وطبعا انا كنت مهكر موبيلك وموبايلها
وكنت شايف محادثتكم انتوا الاتنين
وشوفت الرسالة قبلها ..
فا طلبت من مرشدة تبعنا
انها تدخل البيت وترمي منديل علي وجه فريال وتخدرها
وتاخد منها الموبيل..
وفعلا اخدت منها الموبيل بتاعها
وخليتك انتي بنفسك تمسحي الرسالة
وطبعا... عشان انتي مكنتيش تعرفي
بامر الشقة الي جنبك
ولا تعرفي ان فريال كانت فيها
فا صدقتي ساعتها... وبصمتي
بالعشرة
اني جن عاشق فعلا
المهم..
جيت بعدها واخدت منك الموبيل بتاع فريال تاني...
ورجعتوهولها ...قبل ما تفوق
قلت..طيب وعنتر؟
قال..مالة؟
قلت..
سؤال تاني معلش
قال..
اسالي
قلت..
ليه طلبت مني انام في السرير واقولك زوجتك نفسي..
وليه صحيت لقيت هدومي متبدلة بالعباية السودة
واية الي حصل بينا ليلتها
قال...
محصلش بينا اي حاجة
الحكاية وما فيها...
انك لما قابلتي عنتر بشكلك العادي
بدون ما تلبسي ست عجوزة
..بوظتي الدنيا
وعملتي لينا لخبطة
بدون ما تقصدي
لاننا كنا عاملين حسابنا..
اننا هنقبض علي فريال.. وجوزها
وهما بيخطفوا عنتر...
بعدما يخرج من عندك
لكن...لما عنتر دخل عندك وشاف ادامة عروسة حلوه
مخرجش تاني
ومقدروش يخطفوه
وكان ممكن كمان تحصلك مصيبة يومها
فا كان لازم اعمل اي حاجة..
تخليكي تلتزمي بلبس الست العجوزة
فا وهمتك اني هثبتلك باني جن عاشق....
فا طلبت منك تنامي ع السرير عشان اعرف اخدرك
وبمجرد ما نمتي..
كتبتلك علي المراية ..
نصيحة مني بانك ترجعي تاني ست عجوزة
قلت وايه الاصوات الغريبة الي كنت بسمعها في الاوضة
قال..
دي اصوات كان مصدرها
سماعات في الاوضة..
احنا ركبناها ...
عشان المؤثرات الصوتية
قلت..
تمام فهمت
لكن فاضل حاجة اخيرة
نفسي افهمها
عشان اعرف انا مصيري ايه دلوقتي؟
قال..حاجة اية؟
قلت..
بما اني قتلت عنتر
يبقي انا ممكن ..حبل المشنقة يتلف حوالين رقبتي..
صح؟
فا ابتسم الضابط مره تانية
وقالي..
اطمني..عنتر ممتش اصلا ..
قلت...
بجد والنبي؟
يعني عنتر لسة عايش؟
لكن..
ازاي ده؟
قال..
انا كنت معاكي في الشقة ساعتها
و لما عنتر كان بيحاول يتحرش بيكي
انا كنت بتابع الي بيحصل
بس مكنش ينفع اتدخل
فا ملقتش ادامي ساعتها غير اني احقنة بحقنة مخدرة
عشان ينام
و لما يقع علي الارض...
انتي تعتقدي انه مات والجن العاشق ساعدك وخفاه
وبعدما طفيت النور
خرجناه انا ورجالتي من الشباك...
واخدوه للعربية بتاعتنا بهدوء
بدون ما حد ياخد بالة من حاجة
قلت..
يعني انا ...
بريئة من قتل عزة ...
وعنتر كمان
وانا كده مقتلتش حد؟
الف حمد وشكر ليك يارب
فا رد عليا
وقالي..
ايوه طبعا...
انتي مقتلتيش حد
ده كمان عنتر هيتحاكم
ودلوقتي مقبوض عليه بتهمة محاولة الاغتصاب
قلت...يعني انا دلوقتي مش متهمة باي جريمة؟
قال..
هو كان مفروض اننا نوجهلك
تهمة التستر علي مجرم
لانك كنتي عارفة بقصة دفن عزة وعارفة مكانها
لكن ..
نظرا لتفهمي لموقفك
وانك كنتي ضحية
زيك
زي كل الي راحوا
فااعتبرتك مجرد شاهد
وانا اثبت في التحقيقات
بانك انتي الي ارشدتينا عن فريال وعصابتها
م الاخر...
انتي فعلا مش متهمة باي حاجة
فا فرحت جدا بالي قالة
وسالتة
وقلت..
يعني انتوا خلاص قبضتوا علي فريال وعصابتها؟
قال..ايوه
قلت..
وقفلتوا المكتب؟
يعني خلاص مفيش عرسان هتروح المكتب
ولا شباب هتتقتل تاني؟
فا رد الضابط باسف
وقالي..
للاسف احنا قفلنا المكتب الخاص بفريال
وفعلا قبضنا علي عصابتها
وقدرنا كمان ننقذ اخر عريس من القتل
لكن..
طول ما في تربة خصبة للجريمة
هيبقي في مكاتب تانية
وعصابات تانية
ومنظمات تانية كتير
وطول ما الشباب ظروفة المادية صعبة..
والضغوط عليه في طلبات الزواج اصعب
فا المجال للنصابين هيبقي اكبر واوسع
وهتستمر الدوامة
فهمتي حاجة؟
قلت..بصراحة لا
بس اهم حاجة اني فهمت
اني بريئة...
ومش عليا اي تهمة
ودي اهم حاجة كنت عايزة اعرفها
الحمد لله..
اني طلعت من كل الي فات ده علي خير
وبصيت لحضرة الضابط بامتنان
وقلتلة..
بجد شكرا انك انقذتني
فا لقيتة بيبصلي وفي عنية كلام
فا سالتة
قلت..يعني انت مطلعتش
جن عاشق؟
(يا خسارة)
فا بصلي الضابط بتعجب
وسالني
وقالي..يا خسارة لية؟
مفروض تفرحي اني بني ادم..
لاني دلوقتي هقدر اقرب منك فعلا
قلت...
تقرب مني علي اساس ايه؟
انا دلوقتي
فهمت انك مكنتش جن عاشق
ولا حتي كنت قاعد معايا عشان بتحبني
دنتا كنت مضطر تفضل معايا عشان تنفذ خطتك
دنا حتي معرفش انت مين؟
فا ابتسم حضرة الضابط
وقال مازحا..
اه صحيح...
احنا لسة لغاية دلوقتي
متعرفناش علي بعض
انتي كل الي عرفتية عني..
اني ظابط...
وكنت بنفذ خطة
لكن ..الي متعرفيهوش
اني اتعلقت بيكي يا عبير
انا صحيح
مش جن عاشق
لكن..انا بني ادم...
حبك و حس بيكي
لما قرب منك
و وقع في عشقك
اكتر من ...
(اي جن عاشق)
ودلوقتي عايز ارتبط بيكي
اه صحيح نسيت اكمل تعارف واقولك..
اني لسه عازب...
وبدور علي عروسة
في اللحظة دي
ابتسمت بمرارة
وقلتلة..
انا سمعتك للاخر
لوسمحت اسمعني انت كمان بقي
انا واحدة لقيطة ...ومجهولة النسب
ومليش بيت.. وفقيرة ..ومعدمة
م الاخر
انت من عالم ...
وانا من عالم تاني خالص
دا يمكن لو كنت طلعت جن عاشق
كان يبقي فية امل اننا نفضل مع بعض
لكن دلوقتي...
مبقاش ينفع
قال..يعني ايه؟
قلت..
يعني انت حد رائع
وانا بتمنالك ان ربنا يسعدك
لكن ...
مع واحده مناسبة ليك
في اللحظة دي
وقفني حضرة الضابط عن الكلام
وهو بيبص علي موبيلة
الي كان بيرن
وقالي...هشششش
اجلي كلام في الموضوع ده
لغاية ما تشوفي المفاجئة الي
انا عاملهالك
قلت..مفاجئة ايه؟
قال..في شخص كان بيدور عليكي
بقالة اكتر من عشرين سنة
واول ما ولاد الحلال دلوه علي مكانك
مصدقش نفسة...
و جه لغاية هنا طاير عشان يشوفك
وياخدك في حضنة
قلت..مين الشخص ده؟
قال..
هقولك بس امسكي اعصابك
فا قلت..
قول بسرعة ارجوك
قال..
فاكرة لما حكيتيلي حكايتك؟
وقولتيلي انك كنتي مع امك
في القطر..
وامك قابلت الست الحاجة وقالتلها
انها كانت رايحة تزور خالتك نرجس ؟
وتركتك معاها في القطر
ونزلت تجيب مية؟
قلت...ايوه
قال..
انا بقي....
من يوم ما قولتيلي..
كتبت كل الكلام ده في بوست
ونزلتة علي جميع مواقع التواصل الاجتماعي
ده غير اني كلفت ناس معارفي بالبحث عن امك
في البلد الي امك كانت راكبة منها
والحمد لله
ربنا قدرني
وقدرت اوصل لامك فعلا
ومن فترة قابلتها..
ولقيتها جايبة معاها
شهادة ميلادك
وعلي فكرة
انتي فعلا اسمك عبير
عبير محمد المغازي
عارفة يعني ايه عيلة المغازي ؟
يعني حضرتك طلعتي بتنتسبي لعيلة كبيرة جدا
بعدما سمعت الرواية الي اشبة بالقصة الهندي دي
بصيتلة بحزن
وقلتلة..
انت بتقول كده ..
عشان صعبت عليك
بسبب الكلمتين الي قولتهملك من شوية .....صح؟
وفي اللحظة دي
رد حضرة الضابط بحسم
وقالي..الكلام ده مفيهوش جبر خواطر
والدليل علي كلامي
ان امك موجودة فعلا
وهتموت من الفرحة
من ساعة ما قولتلها...
اني اعرف مكانك
ورفع حضرة الضابط الموبيل علي وجهة
وكلم شخص كان منتظر علي الباب
وقال..
اظهر وبان وعليك الامان
اتفضلي يا ست الكل
ادخلي
وفي اللحظة دي
دخلت من الباب
امراة وقورة
يبدوا عليها الرقي ..
والثراء فعلا
ولما دققت النظر فيها
لاحظت ...
ان فيها شبة قريب مني
والغريبة انها كانت في شدة التاثر
لدرجة ان دموعها كانت نازلة وهي بتبصلي
واول ما شافتني
قربت مني وهي بتبكي
وقالتلي..
عبير ؟
اخيرا رجعتيلي يا نور عيني
الف حمد وشكر ليك يارب
فا بصتلها وانا مذهولة ومش مصدقة نفسي
وقلت..
هو الموضوع بجد ولا ايه؟
وبالرغم من ان..قلبي كان مرتاح..
وفرحت اول ما شوفتها
لكن...
شكيت بيني وبين نفسي
ان يكون حصل لبث في الموضوع
والست دي فاهمة اني بنتها بالغلط
وكنت عايزة اسالها كام سؤال
عشان قلبي يطمن
واتاكد انها امي فعلا..
بس قبل ما اوجة لها اي سؤال
لقيت الضابط هشام
بيعرفني عليها بكل ثقة
وقالي...ايوه
الي انتي فيه ده حقيقة فعلا
و الي ادامك دي... امك يا عبير
فسالتها
وقلت..
هو انتي يوم ما سيبتيني في القطر
سيبتيني مع مين بالظبط؟
قالت..تركتك مع واحده ست كبيرة
اسمها الحاجة
قلت..كانت لابسة ايه؟
قالت..عباية ...وطرحة سودة
قلت..
كان معاها حد في القطر؟
والي معاها كانوا كام؟
يعني .. كام راجل ؟
او....كام ولد ؟
او....كام بنت ؟
قالت..مكنش معاها حد
كانت مسافرة لوحدها
وفعلا لقيت كلامها كان مطابق..
للكلام
الي قالتهولي الحاجة
في اللحظة دي
اتاكدت انها امي
فا قلتلها..
انا كده اتاكدت انك امي
لكن..
عايزة اسالك سؤال
ايه الي مخليكي انتي متاكدة اني بنتك؟
وفي اللخظة دي
مدت ايديها في شنطتها وخرجت صورتها
وقالتلي..
الي مخليني مصدقة
هو احساس قلبي
والصورة دي
دي صورتي وانا في سنك تقريبا
فا بصيت في الصورة
ولقيتها ..شبهي جدا...
لدرجة...
ان الصورة كانت تقريبا صورة طبق الاصل مني
وفي اللخظة دي
عيطت وقولتلها..
انا كمان...
قلبي حاسس انك امي...
وحتة مني
وقبل ما اقرب منها واخدها في حضني
لقيت امي جريت عليا ...
و شدتني لحضنها
وانا كمان لقيت نفسي بترمي في حضنها في نفس الوقت
وفضلنا نعيط انا وهي
وكنت حاسة اني مش عايزة اخرج من حضنها تاني
لغاية ما
حضرة الضابط قطع علينا
اللحظة المؤثرة دي
وقال..
الدكتور قال ان عبير كويسة
ومفيهاش حاجة
وكتبلها علي خروج
فا ردت امي
وقالت...الحمد لله يا حبيبتي انك بخير
تعالي يلا معايا عشان تروحي بيتك
وتتعرفي علي عيلتك
فا رد الضابط هشام
وقالها
بعد اذنك يا طنط
انا كنت عايز اجي انا ووالدتي نزوركم في البيت
فا ردت امي
وقالتلة..
اهلا بيكم يا ابني تشرفوا
فا استاذن من امي
وقالها..
بعد اذنك هكلم عبير دقيقة علي انفراد
وبعد ما بعدنا عن امي
لقيتة بيقولي..
ياتري حضرتك هتوافقي تتجوزيني دلوقتي؟
ولا هتقوليلي..اني مش قد المقام؟
قلت...
ممكن سؤال؟
قال اسالي
قلت..
هو انت ايه الي مخليك متاكد كده
ان الست الي واقفة هناك دي تبقي امي؟
مش يمكن انا ماجراها مثلا
عشان اثبتلك اني بنت ناس
وليا عيلة كبيرة؟
واغرر بيك واتجوزك
فا رد عليا بغيظ
وقالي..
يا بنتي هو انا مقاول انفار؟
انتي ليه
ديما بتنسي اني ظابط؟
وبعمل تحرياتي
قلت..
اه...تقصد تقول انك عملت تحريات عن امي؟
قال..
انا معملتش تحريات... وبس
لا...
انا عملتلكم انتوا الاتنين تحليل حمض نووي
عشان كده
انا واثق انها امك
وبصلي حضرة الضابط بحب
وقالي..
وحتي لو مكنتش الست دي امك...
انا مش فارق معايا
وهفضل احبك
حتي لو كنتي ايه
م الاخر
انا لازقلك و مش هحلك
غير لما اتجوزك
فا احسنلك توافقي...
بدل ما اخرجلك الجن العاشق الي جوايا
وفي اللحظة دي
افتكرت كدبة الجن العاشق
الي كان مخترعهالي
فسالتة..
وقلت...بمناسبة الجن العاشق صحيح
بزمتك في جن عاشق بياكل مكرونة وبانية؟
ايه الخيال السازج ده؟
فا رد عليا بغيط
وقالي..
السازج هو الي يصدق ..
ان في عفريت اسمة (محمد) اصلا
و الي تعدي عليةحاجة مهمة
زي دي
فا اكيد مش هينتبة بقي
ان كان العفريت
ياكل مكرونة ...وبانية
ولا ...
رز ....وملوخية
فا بصتلة بخجل..
بعد قصف الجبهة ده...
وضحكت
وبعدها..
ضحكنا احنا الاتنين
وضحكتنا دي ...
كانت بداية الابتسامة..
والفرح
الي شوفته مع حضرة الضابط
هشام
بعد ما اتجوزنا وعيشنا في سعادة .
كده الرواية خلصت
بس قبل ما اقفل
عايزة اقولكم حاجة..
وهي..
فكرة الرواية
انا اخدتها من جريمة تمت بنفس الكيفية
والجريمة دي للاسف راح فيها اكتر من شاب ...
كانوا نفسهم يتجوزوا بالحلال
والسبب كان..
المغالاة في تكاليف الزواج
فيها ايه ياجماعة
لو كل اب سهل شوية في طلبات الزواج لبنتة..
فيها ايه يا بنات
لوجيبنا الضروريات فقط
وبعدنا عن التقليد والفشخرة الكدابة
يا ريت يا جماعة تراعوا
(السعار)
الي اصاب اسعار الذهب
والاسعار الي بقت نار
م الاخر
الجواز اصبح لمن استطاع الية سبيلا
وقابلوا بقي
زيادة نسبة العنوسة..
وزيادة حالات الاغتصاب والتحرش
وكل ده ...
لانكم بقيتوا
بتصعبوا الحلال؟
وبتدفعوا غالبية الشباب للجؤ للحرام؟
ادعوا من الله عز وجل..
انه ييسرها علي كل شاب
طالب الحلال
وييسرها علينا جميعا
في تلك الظروف الصعبة
باذن الله
لو عجبتك الرواية..اعمل انضمام من هناااااا علشان توصلكم كل رواياتي
تعليقات
إرسال تعليق