رواية خادمة الصقر الجزء الثاني البارت الثامن والأربعون 48بقلم يوستينا سامي
رواية خادمة الصقر الجزء الثاني البارت الثامن والأربعون 48بقلم يوستينا سامي
رواية خادمة الصقر الجزء الثاني البارت الثامن والأربعون 48بقلم يوستينا سامي
#خادمة_الصقر
#الجزء_التاني
48
يا حبايبي مرسي جدا علي سؤالكم عليا بس انا كنت بمتحن
و طبعا انا عارفه ان في كتير فيكم نسي اخر بارت وصل لحد فين فتعالوا ناخد نظره عن اخر جزء في حلقة 47 💪
قدام مصنع القطع الغيار اللي كانت لارا بتتعلم فيه خرجت و اول ما بقت في الشارع شافت عاصي قاعد على العربيه بتاعته ومستنيها
لارا قربت منه بستغراب/ ايه ده ..انت بتعمل ايه هنا يا ابني وبعدين انت موجود هنا من الساعه كام اصلا
عاصي / انا هنا من الساعه 12علشان عارف انك هتخرجي الساعة 1 بس حضرتك اتاخرتي ساعه ونص ممكن اعرف بقى ..ايه التاخير ده
لارا ابتسمت باستغراب / يا سلام انت هتحاسبني مثلا وبعدين لو فهد او عساف عرفوا ان انت جيت تاخدني من الشغل ..هيزعلوك اوي
عاصي بدا يقلد طريقتها في الكلام / طب لو قلتلك اني عساف نفسه قالي روح هاتها ..هتعملي ايه
لارا ضحكت / اموت و اعرف ازاي قدرت تخلي عساف يعزك كدة .. عموما ريح نفسك
انا معايا عربيتي وهروح لوحدي
عاصي / ايه ده هو انا ما قلتلكيش ماهو انا كلمت السواق يجي ياخد العربيه و يروحها عشان تركبي معايا يا عسل
لارا رفعت حاجبها/ اه .. ده لوي دراع بقى مش كده
عادي خالص هكلم فهد وهو هيجي ياخدني اصلا الشركه قريبه من هنا .
عاصي بصلها بغيظ وبدا يكلم بجديه /طب لو قلتلك اني عايزه اتكلم معاكي شويه لوحدها
وان انا همشي بعد يومين من الفيلا ومش عارف
انا وانت ممكن نتقابل تاني ولا لا
لارا اتوترت وقالتله / تمشي من الفيلا ليه هو في حد زعلك ..ده والله العظيم بابا حتى بدا يحبك ..و
عاصي حس بتوترها اللي بياكدله انها فعلا بتحبه بس هي بتحاول تتقل ومد ايده ومسك ايديها بحب / طب اهدي طيب اتوترتي ليه كده
لارا شدت ايديها منه باحراج / ما توترتش ولا حاجه هتمشي ليه بقى يا عاصي
عاصي ببتسامه/ علشان وعد وتامر هيجوا من امريكا نقضي مع بعض اخر عشر ايام في رمضان وبعدها هيبدوا يجهزوا لفرحهم ... وكمان الفيلا خلاص جهزت
لارا بحزن / اه طيب ماشي... عموما براحتك انا عايزه اروح عشان انا بجد بدات ادوخ و عايزة ارتاح
عاصي قلق عليها قرب منها / انت كويسه لارا صح طيب تعالي اركبي العربية نتكلم جوا ..
و دخلت لارا العربية و هي زعلانة اوي من كلامه
في العربيه
لارا بتكلم نفسها/ برده ثاني يا عاصي عايز تبعد عني انا بجد مش هقدر اقرب منك و انا حاسه بعدم الامان
عاصي بص ليها و حسها سرحانة و قال في سره/ ياه لو اقدر انسيكي كل اللي فات يا لارا و نبدا انا و انتي حياه جديدة
________________________________________________
في فيلا الحديدي .. بعد مرور حوالي 20 يوم علي رمضان ..
في الجنينة يزن كان بدا يتعافي بشكل كبير اوي حتي حركته بقت احسن من الاول .
يزن كان ساند علي عصاية و مستني عز يوصل
و ميرا واقفة جمبه زعلانة
يزن ببتسامة / ايه مالك مبوزة كدة ليه .. هوحشك
ميرا بزعل /يعني انت عايز تنزل و تسيبني و كمان مبقاش مبوزة ... يا يزن انت لسه تعبان خليك قاعد معايا و النبي
يزن بملل / يا خرابي علي الزن .. بقالي تقريبا شهر مش بتحرك من وشك المفروض تزهقي مني و تكرهيني كمان
ميرا بتسرع / بس انا عمري ما هزهق منك
و قربت منه و حضنته جامد و يزن ابتسم و لف ايده حواليها و بعد لحظات بعدها عنه / يا بنتي اتقي الله بقي و ارحميني انا صايم مش عايز اكسر صيامي عليكي
ميرا قربت مسك لياقة القميص بتاعه بدلع / اعمل ايه طيب ما انت واحشني اوي اوي
يزن ابتسم بخبث / اه ..ما انا عارف الحركات دي بتعمليها بس و انا صايم لكن ساعة الجد بتهربي يا ميرا.. صح
ميرا لفت ايديها علي رقبته / تؤتؤ المره دي مش ههرب علشان انت واحشني اوي اوي بقولك
وفاجاه سمعوا صوت عز و هو واقف جمبهم و لسه واصل
و بيقول / في رمضااااان ... والله عيب اللي انتوا بتعملوه ده .. عيب راعوا ان في سناجل
ميرا اتكسفت اوي و كانت لسه هتدخل الفيلا بس يزن مسك ايديها و قربها ناحيته و حط ايده علي كتفها بتملك و قال بتريقة / مراتي و واحشها انت مالك اهلك بقي يا مفسد الاجواء الرومانسيه و بعدين يا حبيبي لو متغاظ مننا قلدنا و لا انت متعرفشي
عز بهزار / معرفشي طبعا . دي كارمن قفلاها عليا ماية و نور والله يا يزن.. ما تكلمها تفتكرني ببوسة ولا حتي حضن كدة
يزن مسكه من هدومه بغشومية / باسك حنش يا حيوان .. الكلام ده لما تتجوزها .. ده انت حتي
ما جبتش امك علشان تتقدم يا بجح
عز اتوتر و قاله/ انا كنت بهزر يا يزن علفكره .. اوعي ايديك يا عم انا هستناك برا
و خرج عز من الفيلا يستني يزن في العربية بتاعته اما ميرا بصت ليزن بستغراب / ليه كدة يا زيزو هو ميقصدشي علفكره
يزن/ عارف بس برضو حرق دمي .. و بعدين يعني ايه بيحبها مش عايز يجي يتقدملها ما معاذ رايح بكره عند اهل سيلين علشان يطلب ايديها
ميرا / اقعد معاه براحة و علي رواقة كدة و اساله
يزن بصلها بحب و باس راسها / حاضر .. ادخلي انتي ارتاحي شوية
و خرج يزن و راح مع عز للقسم و هما مش بيتكلموا مع بعض تماما
________________________________________________
في الشركه 🔥
ادهم كان قاعد على مكتبه ووبيتابع شعل على اللاب توب ومركز قوي و في الوقت ده دخل فهد وهو متعصب وخبط على مكتب ادهم
فهد بعصبيه / انت بتعمل معايا كده ليه .. بقى انا يطلع عين امي عشان اظبط ميعاد الاجتماع وتقوم انت بكل سهوله تلغيه يا ادهم
ادهم قفل اللاب توب/ ممكن تهدى كده وتقعد
فهد باستغراب/ هو انت بتعزمني ما انا لو عايز اقعد هقعد ما هي شركتي زي ما هي شركتك
انا سؤالي واضح بتلغي الصفقة ليه يا متخلف
ادهم ببرود /علشان ما حبتهاش
فهد بغيظ /يا صلاه النبي ما حبيتهاش هو بمزاج اهلك انت عبيط يا ادهم بقولك ايه انا لساني بياكلني وايدي كمان وانا صايم ومش عايز اتغابي عليك
ادهم ببرود / طب انت ايه مزعلك دلوقتي .. صفقة و راحت فكر في غيرها
فهد بغيظ/ يا مصبر الوحش علي الجحش .. الصفقه دي احنا شغالين بقالنا فيها فتره وخلاص كان الاجتماع بكره وهنمضي العقود
ادهم خبط بايده علي المكتب بعصبيه وقاله / وانا ما عنديش استعداد اني اتعامل مع واحد كان في يوم من ايام ليه عداوه مع ابويا جاسر الحديدي هو اه مات بس ابنه لسه عايش وانا بقى مش هحط ايدي في ايده سامع
فهد باستغراب/ طب انت بتزعقلي انا ليه ... انا محدش قالي عن العداوة دي والله
ادهم ابتسم / علشان لسه مستجد هنااا .. اقعد احكيلك
فهد / لا بعدين بقي الوقت اتاخر اوي و انا عايز اروح اوصل نسمة للدكتور قبل الفطار .. سلام
و لسه فهد هيخرج من المكتب بص لادهم و قاله/ متزعلش مني يا ادهم انا اسف
ادهم ضحك / امشي يا فهد و بعد كدة ابقي راعي اني اقدم منك هنااا . غور يلا و ابقي طمني عليك
و خرج فهد و اخد نسمة و راح عند الدكتوره اللي فجاتهم بخبر فظييييييييع.
________________________________________________
في الفيلا كلهم كانوا متجمعين بيكلوا مع بعض كالعادة .
صقر / خلاص يا جماعة كلوا مجهز نفسه علشان هنروح عند جده سيلين .
قمر/ اه متقلقشي كل حاجة تمام .. و ربنا يتمم بخير يا رب ..
ادهم غمز لمعاذ/ يا بختك يا عم بقي هتتجوز
معاذ / انت هتقر عليا من قبل ما يحصل . اهمد بقي
ايه ده صحيح اومال فين فهد و نسمة
ميرا بزعل / و يزن كمان ماجاش .. قالي انه عنده شغل كتير و مش هيقدر يجي
كريم حط ايده علي راس ميرا بحب / حقك عليا انا لما يرجع انا هربيهولك
ميرا بزعل / مش بيتربي يا عمو و مش ببتغير ابدا
و قامت ميرا و سابت الاكل اللي تقرببا مكلتش منه اي حاجة و دموعها كانت علي خدها و كله كان مستغربها
عساف / اي ده هو في ايه .. كل ده علشان ماجاش ياكل معانا النهاردة
ياسمين / لا طبعا مش علشان كدة .. علشان انا مخلفة عيل قليل الادب مش بيعرف يتكلم حلوو
البت لسه بتقوله تعالي علشان نفطر قالها مش فاضي
قامت قايلاله اجيبلك انا الاكل و ده اتعفرت و بدا يشتم و يزعق ... تربية زبالة
نغم بضحك / ما هي تربيتك يا ياسمين .. خليني ساكتة
ياسمين/ لا خليكي ساكته فعلا ...و بعدين مالها تربيتي .. ما الواد زي القمر اهوو عليه لسان مشاء الله اطول من برج ايفيل نفسه
و قعده يضحكه و خلصوا الفطار و كان فهد و نسمة لسه ما جوش و بعد تقريبا ساعة و صلوا و كانت نسمة زعلانة و فهد مبسوط اوي و ببتنطط
في الجنينة 🌹
صقر بستغراب / اي ده مالكووو .. و بعدين اتاخرتوا ليه كدة
عساف بتريقة / مالهم ايه بس .. ده واحد فرحان
و التانية زعلانة ... انتوا ايه بتلغبطونا يعني
نسمة / لا انا تمام يا اونكل .. بعد اذنكوا انا هطلع ارتاح شوية
و اول ما طلعت نسمة فهد جري حضن خالد بفرحة / انا مش مصدق نفسي انا هبقي اب يا خالد ...هبقي زي زيك كدة بالضبط و ازعق و اشخط و اعمل كل اللي انا عايزة
عساف / حاسب ابوك هتفطسه يا اهبل .. وبعدين ايه الجديد ما احنا عارفين
فهد قعد بتناكة و حط رجل علي رجل / بس اللي متعرفهوش بقي ان نسمة حامل في تؤام هيبقي عندي اتنين مره واحدة يا خالد
خالد بصدمة/ يخربيت فقرك . تؤام يا فهد ده انا معملتهاش يا ابن الفقرية
عاصي دخل وسطهم و قعد / بس دول تربيتهم هتبقي صعبة اوي و خصوصا لو ولاد . ربنا يقويك
يا فهد
فهد بصله بغيظ / اولا هيبقوا بنات مش ولاد و بعدين انا مش بربي يا حبيبي انا ببوظ بس .. ثانيا بقي و ده الاهم بطل تطلعلي كدة فاجاه و تدخل في الكلام و كلنه من حقك
عاصي رمي عليه المخدة / اموت و اعرف انت بتكرهني ليه يا ابني انت
فهد رمي عليه نفس المخده / و احبك ليه ياض
صقر / بس بس انت و هووو بقي خناق ايه مش بتزهقوا ابدا .. و انت يا فهد مبروك يا ابني
عساف بتريقة / اه هو مبروك و كل حاجة بس نسمة مضايقة ليه كدة
فهد / علشان الجامعة شايفة انها كدة مش هتعرف تكمل دراستها بسهولة ..وانا بقولها طظ في الدراسة المهم عيالك و جوزك و خصوصا اني مش هخليها تشتغل
صقر / لا طبعا دراستها مهمة و بطل تنشر طاقة سلبية و اعمل حسابك انت اه مدخلتش امتحانات السنة دي لكن السنة الجاية انت هتلتزم و الا مش هتدخل الشركة دي تاني
فهد / ايه الغلاسة دي يا عمي و بعدين انا ماليش في الدراسة و الجو ده
صقر بصرامة / غلاسة في عينك .. ايه عايز حفيد الحديدي يطلع فاشل.. فهد اخر مره اسمعك تقول الكلام ده تاني .. سامع ولا لاء
فهد / خلاص يا عمي حاضر ...حاضر
عاصي بص لفهد بغلاسة و قال / يسلام يا ولاد يعني الواحد هيلعب بعيلين تؤام .. الله بجد
فهد اتغاظ منه / هو انت هتفضل معانا لحد ما مراتي تخلف و تلعب بعيالي كمان .. ولااا انا مش طايقك و مش هتكلم علشان متهزقش فهروح اكل اي حاجة
جاتك الهم ..
و دخل فهد الفيلا ياكل و صقر و خالد برضو دخلوا الفيلا ..
و اتبقي عساف و عاصي
عساف كان بيحاول يتصنع عدم الاهتمام / هو انت فعلا هتمشي من هنا بجد ..
عاصي ابتسم / هي لارا اللي قالتلك يا عمي مش كدة
عساف بحده / بطل تقولي يا عمي دي بتعصبني سامع .. انا عساف عادي و بعدين هتمشي ليه بقي
عاصي / كفاية كدة اديك شايف محدش قابلني حتي لارا بتعاملني كانها متعرفنيش
عساف/ مين قال ان محدش بيحبك .. عموما براحتك بس كنت عايز اقولك ان انا بجلالة قدري بدات اتقبلك
و قام عساف علشان يدخل الفيلا بس عاصي جري وراه و لحقه / استني بس . بجد يعني هتساعدني ولا ده اي كلام
عساف/ مين ده يالا اللي بيقول اي كلام .. ما تظبط كدة .. و بعدين اساعدك ليه .. اسمع يلا انا اتقبلك
اه لكن اجوزك بنتي لاااا
عاصي بستغراب / الله هو انت بتقلب ليه كده مرة واحدة علفكره بقي انت مش مضمون
عساف / طب غور بقي علشان ماضربكش بالبوكس في وشك .. جاتك الهم
و سابه عساف و دخل الفيلا .
عاصي / ده ايه العيلة اللي محتاجة تتعالج دي .
________________________________________________
في الشارع .. 🎁
سيلين كانت بتتمشي مع معاذ و بتاكل ايس كريم
معاذ خبطها في كتفها بخفة / اي بقي يعني جايبلك ايس كريم اهووو و مدلعك و مع ذلك برضو مكشره
سيلين / ايوة علشان حقي اضايق منك .. قولتلك تعالي نفطر برا مع بعض و بعدها نتفسح
شوف دلوقتي مخرجني بعد الفطار شوف الساعة كام معاك
معاذ / طيب يا روح قلبي اعمل ايه .. صقر بيرفض تماما ان اي حد فينا ياكل برا و لازم كلنا نتجمع علي السفره دي اوامر صقر الحديدي انا مقدرش اكسرها
سيلين/ بس تقدر تزعلني انا مش كدة . و بعدين انا كان نفسي افطر معاك
معاذ مسك ايديها و هما بيتمشوا / ما احنا جايين بكره اهو نفطر معاكوا و نقضي اليوم كمان .. عقبال ما تبقي في بيتي و في حضني
سيلين اتكسفت اوي و شدت ايديها / احم احم .. الوقت اتاخر اوي انا لازم اروح يلااا
معاذ ضحك / لا متستهبليش انا مستاذن جدتك اني هفسحك شوية انا عارف ان فتره الامتحانات كانت صعبة و انتي تعبتي اوي مع الطلبة
سيلين / اووي متفكرتيش .. طب اقولك تعالي وديني الملاهي
معاذ بتفكير / امممم تعالي انا هوديكي مولد كمان
و معاذ اخد سيلين و راحوا يتفسحوا مع بعضو كانت حاسة ان ده اخيرا بقي العوض بتاعها
________________________________________________
في اوضة لارا 👀
كارمن كانت عندها و عمالة تروح و تيجي بغيظ
لارا بارهاق / بس بقي يا كارمن انا عيني زغلتت في ايه مالك قاعدة مش علي بعضك يعني
كارمن/ عز يا لارا بيقولي انه مش هيقدر يجي بقابل بابا الفتره دي .. و انه مش مستعدو كلام عبيط كدة
لارا بتريقة/ هو طلع منهم ولا ايه
كارمن / اي ده يعني ايه قصدك .. انا مش فاهمة
لارا/ يعني كان بيتسلي و اول ما حس انه ادبس قال يخلع .. و ده حال كل الرجالة دلوقتي
كارمن اتوترت و قعدت علي السرير/ لا طبعا اكيد مش هيعمل كدة انتي عبيطة ولا ايه.. عز بيحبني و بيحبني اوي كمان ..
و سكت كارمن بنحاول تستوعب الكلام و قالتلها / لا والنبي ما تكرري الكلام ده تاني.. انا بجد بحب عز اوي و عمري ما هتخيل حياتي من غيره
لارا/ ما انا زيك مش قادرة اتخيل حياتي منغير عاصي ..
و مش قادرة امنله تاني لو اتكسرت المره دي كمان هتبقي النهاية يا كارمن ليا
_______________________________________________
في اوضة فهد و نسمة 🌼
فهد واخد نسمة في حضنه/ ما كفاية عياط بقي .. انا مش فاهم انتي ايه مضايقك من فكره التؤام طب دي اي واحدة في مكانك كانت هتتحمس اوي و تتبسط كمان
نسمة/ انا فرحانة والله .. بس خايفة اوي يا فهد هو انا هتخن اوي مش كدة
فهد بتريقة / اوي اوي يا نسمة هتبقي دبة متحركة
نسمة بعياط / يا ماما .. وانت هتحب واحدة عليا و تتهمني اني مش واخدة بالي من نفسي و مهملة
فهد شدها لحضنه / لا يا روحي انا عمري ما هحب واحدة عليكي ابدا .. انا هتجوز بس
نسمة بعدت عنه بسرعة و قالتله بصدمة / تت .. ايه
و بتقولها في وشي يا فهد .. طب انا بقي مش عايزة اخلف .. روح للدكتورة قولها تاخد واحد و انا واحد
و بدات تعيط / بس دول عيالي ..وانا عايزاهم هما الاتنين انا بحبهم
فهد ضحك جامد و اخدها في حضنه و بدا يطبطب
بحب / انا بحبك اوي يا نسمة .. اوي فوق ما تتخيلي
حب ده وصل معايا لمرحلة اني مش بتخيل نفسي منغيرك انتي
نسمة و هي بتمسح دموعها / علشان عايز تتجوز عليا يا فهد
فهد قرب منها و باسها / طب بذمتك انا اقدر ابص لواحدة غيرك ولا احضن واحدة غيرك ولا ..
نسمة حطت ايديها علي بقه بسرعة / اخرس و لم نفسك هااا ...و بطل كلامك ده عيب
فهد شال ايديها و ابتسم بخبث / الله ده انتي عارفة انا كنت هقول ايه ...لا واضح اني مش لوحدي اللي قليل الادب
نسمة / انت بتعمل ايه نزل ايدك ميصحش كدة ..
و بعدين هو انت ازاي قليل الادب كدة طالع لمين
فهد بتريقة / لابويا .. يعني أنتي شايفاه محترم اوي يعني .. يا بت هاتي بوسة بقي خلي عند امك دم
نسمة ضحكت و بتحاول بزقه بعيد عنها / بقولك ايه ريح نفسك كدة لان اللي بتفكر فيه مينفعش اصلا
فهد بخبث / اسكتي مش طلع ينفع .. تعالي بس ده احنا هنتناقش في موضوع مهم اوي انا و انتي حالا
نسمة ضحكت علي طريقته/ والله ما هينفع اسمع بس مني .. فهد ابعد شوية
فهد قرب و باسها من خدها / مش باعد انا حر مراتي و اقرب منها زي ما انا عايز .. ولا اقولك تعالي نطفي النور
و قفل فهد النور و هنسيبهم مع بعض 😜
________________________________________________
في الجنينة🤍
دخل يزن لقه نور اوضة عاصي مفتوح فدخله الاوضة وخصوصا ان اخر فتره علاقتهم بقت كويسه قوي مع بعض لان يزن وعاصي دماغهم متشابهه
عاصي بستغراب/ ايه ده يا ابني ايه اللي اخرك قوي كده انت لو فطرت معانا ولا حتى اتسحرت
يزن بتفكير / معلش كان عندي شغل الا قولي يا عاصي هو انت عمرك شفت مختار قاعد مع لواء او اي حاجه او حد اسمه حمدي مثلا
عاصي بتفكير / صدقني لا ..اصل مختار ما كانش بيخليني اتقابل مع حد تماما من تبعه
ما فيش غير خيري وانت عارف انه شغال تبع مختار مش كده
يزن / عرفت من الورق اللي سلمه عساف ان خيري شريك مختار والاثنين ليهم صفقات مشبوهه بس كان نفسي اعرف مين اللي كان بيداري عليهم ومش هرتاح لما اعرف برده
عاصي/ طب يا ابني واستنى لما تتعافي وتبقى بصحتك كامله وحاول توصلهم
يزن / انا مش هستنى لحد لما ابقى كويس عموما تصبح على خير انا هطلع الاوضه
وطلع يزن الاوضة و لقه ميرا نامت فغير هدومه و نام جمبها في هدوء
________________________________________________
في اوضة عساف 💪
همس كانت قاعدة بتقري رواية بستمتاع و عساف قرب و نام جمبها علي السرير
عساف بستغراب / مالك ماسكة الموبيل كدة ليه
و بتضحكي ...هو انتي بتكلمي مين وريني كدة
همس/ اي ده بتشد التليفون ليه كدة .. انا مش بكلم حد والله انا بقرا رواية . حلوة اوي يا عساف البطل بيحب البطلة برغم انها حرامية
عساف ابتسم بتريقة / يسلام و ده طبيعي اوي يا اختي .. كل ده وهم في وهم
همس سابت التليفون و قربت من عساف و حطت ايدها علي صدره و اتكلمت بصوت ناعم و هادي/ ليه عساف.. هو مين كان يصدق ان انا و انت ممكن نتجوز او ان بابا ممكن يوافق بعد كل الي حصل زمان
عساف سرح في كلامها و ايديها و قرب ايده و اخدها في حضنه / انا كنت واثق انك هتبقي بتاعتي انا يا همس .. و بقيتي بتاعتي و ام بنتي كمان
همس بحب / و جبت الثقة دي منين
عساف / منك .. اه والله منك انتي .. لما كنتي بتبصي في عيني كنت بحس بحبك ليا حتي لما قولتيلي ابعد عني .. كنتي بتقوليها من ورا قلبك
همس / اممم يعني انا اللي حبيتك الاول .. مش كدة
عساف بتفكير / ممكن .. مش مشكلة مين حب التاني الاول المهم اني دلوقتي بقيت بحبك اكتر ما انتي بتحبيني بكتييير
همس بدلع / والله ...ازاي بقي عندك إثبات
عساف / شقية انتي يا هموسة والله .. كبرتي مهما كبرتي هتفضلي زي ما انتي
همس قربت منه و اتكلمت بخبث / انا مش بكبر ابدا ..اتكلم انت عن نفسك بقي
عساف ضحك / عندك حق فعلااا .. طيب تعالي نشوف مين اللي كبر ..
و سبحانك يارب هنسيبهم برضو و نمشي 😛
و عدي اليوم و اليوم التاني راحوا كلهم بيت سيلين
و فطروا معاهم
______________________________________________
في بيت سيلين بعد الفطار 🌷
سيلين باحترام / اتفضلوا الشاي و العصير
فهد / الله يكرمك يا بنت الاصول ..انا كنت محتاج احبس الاكل بكوباية شاي بس يسلام لو في حتة كنافة
عساف كان قاعد جمب فهد ضربه في كتفه / ايه اللي انت بتقوله ده يا حيوان
فهد بصوت واطي / ايه معندهومش كنافة طب فيه بسبوسة ولا ايه
عساف / ده انا اللي هخليك هريسة لو متلمتش . احترم نفسك بقي
فهد / ايه معندهومش ولا ايه . طب انزل انا اجيب والله نفسي فيها يا عساف
و في الوقت ده خرجت كارمن و لارا بصواني الحلويات
جده سيلين / اتفضل يا حبيبي كل اللي انت عايزه كله
صقر باحراج/ معلش اصل فهد بيحب يهزر شويه عموما ادينا اكلنا و هنحلي .. اي رايك ندخل في الموضوع يا حجة
ولسه صقر هيكمل كلامه فهد قاطعه في الكلام بحماس وقال / الله بجد الكنافه دي فظيعه جايبينها منين انا دايما باكل من العبد . بس دي حقيقي مميزة
عساف ضربه بالكوع في كتفه / هجيبلك منها لما ننزل بس اخرس شوية...كمل كلامك يا صقر.
صقر بغل / معلش قطع كلامنا عموما .. انا كنت جاي طالب من حضرتك ايد
وفجاه قبل ما يكمل صقر كلامه موبايل يزن رن بصوت عالي وملامح وشه واتغيرت وقال/ معلش يا جماعه انا مضطر استاذن بعد اذنكم
صقر باستغراب بص ناحيه كريم بس لقاه هو كمان متفاجئ وقطع سكوتهم ده صوت معاذ وهو بيقول / في ايه يا بابا ما تكمل كلامك انت نسيت ولا ايه ده
ده ايه ام الجوازه اللي مصر كلها بصالي فيها دي
كارمن لقت برده ان هي كمان تليفونها بيرن وقالت/ طب معلش يا عمو قبل ما تكمل كلامك انا هنزل بس عشان معايا مكالمه مهمه وهطلع تاني بعد اذنكم
خالد استغرب جدا اللي بيحصل وبص لصقر قاله/ كمل كلامك انت يا صقر علشان انا زهقت
صقر / عندك حق والله... بصي يا حاجة احنا جايين نطلب ايد بنتك لمعاذ ابني وزي ما حضرتك عارفه ان هو شغال معيد في الجامعه وبيحضر للدكتوراه وانه باذن الله هيحافظ علي سيلين
جدة سيلين/ بصراحه يا استاذ صقر انا اعرف معاذ وهو فعلا ونعم التربيه والادب واكيد موافقه ده كفاية سمعة العيلة .. الله يرحمه والد سيلين مكنش بيحب حد زيك
صقر بتاثر / الله يرحمه هو كان راجل محترم اوي و ربنا وحده اللي يعلم معزته عندي
معاذ بتسرع / الله يرحمه طبعا بس ايه رايك نقراء الفاتحة يا حاجة
كلهم ضحكوا على طريقه معاذ وجدتها وافقت وفعلا قروا الفاتحه ومعاذ كان جايب خاتم الماظ بمناسبه قرايه الفاتحه ليها كهديه وقالها ان ده بعيد تماما عن شبكتها ..
______________________________________________
تحت بيت سيلين 🔥
عز كان واقف بعربيته مستنيها و كارمن ركبت العربية معاه
كارمن بعصبيه / هو انا لو ما كلمتكش قلتلك لازم اشوفك ما تجيش ممكن افهم بقى انت ايه اللي غيرك من ناحيتي كده وكانك بتتهرب مني وانا اللي برمي نفسي عليك
عز / لا ما قلتش كده طبعا يا كارمن انت غاليه وعزيزه بس بصراحه انا لما فكرت لقيت ان انا وانت عمرنا ما هننفع لبعض وده اللي خلاني اجي دلوقتي واقولك كده انا اسف
كارمن بصدمة و عدم فهم / مين... مين دول اللي مينفعوش مع بعض يا عز
عز / انا و انتي يا كارمن... صدقيني الحل ده وصلتله بعد تفكير كتير ..و علفكره احنا اكيد هنفصل صحاب مش كدة
كارمن بصتله بصدمة و حست ان كرامتها في الوقت ده اداس عليها و عملت ....
تفتكروا كارمن هتعمل ايه بقي .....
تكملة الروايه اضغط هناااااااا
ا كتب ف بحث جوجل موسوعة_القصص_والروايات
الرواية كامله من 👈(رواية خادمة الصقر الجزء 2)
اضغط على اسم الروايه ☝️☝️☝️
تعليقات
إرسال تعليق