رواية خيانة الروح الفصل الخامس والسادس بقلم دينا رافت
رواية خيانة الروح الفصل الخامس والسادس بقلم دينا رافت
(خيانة الروح) الفصل الخامس بقلمي# دينا رأفت
*****!🤩
عمر وأخواته وصلو البيت عنده ولاقوه نازل ليهم بكل بجاحة وقال بترحيب مزيف اهلا بيكو يا شباب ،ياه من زمان ماجيتوش ليا هنا .
،عمار بغضب ه-جم عليه وض-ربه بكل قوته لحد ما كان هيطلع في الروح .
وقال بتوعد وبصوت هز المكان ،قسما بالله لهوريك اسود ايام حياتك ،هخليك تتمنى الم-وت يا واطي وكل الخير اللي شفته معانا هطلعو بلى ازرق على دماغك ،.
تامر حاول يتكلم بتعب وبقوة مزيفه ،ماتقدرش تمسني بحاجه ،اخرك تخرج فيا غ-ضبك ،بصلهم التلاتة باستفزاز ،انا عارف انكو مبتعرفوش غير التطاول بالأيد بس ،ضحك وكمل بتحدي ،انا مامن نفسي كويس اوي وعامل حسابي على كل حاجة وانتو بقيتو على البلاطة وده اللي بسعى ليه من زمان .
،بص ل عدي بسخرية وقال باستهزاء ،جرى ايه يا حكيم زمانك مشتشوف حل لهمجية الشخص ده ،يرضيك وشي بقى عجينة ومشهعرف امشي بيه وسط الناس وانا مسافر ،تحامل على وجع جسمه وقال بشماتة ،ماهو انا قررت اني اهاجر من مصر للابد ،وكويس اني شفتكو ،يلا ابقو بلغو نوجا سلامي .
،عدي شاور لعمار يسكت وميردش على كلامه ،عمر كان مذهول من اللي شايفه ،ودارت في دماغه اسئلة كتير وكان لازم يلاقي لها أجوبة ،قرب منه ببطء وفضل يبصله اوي عشان يشوف فين صاحبه وعشرة عمره .
،مكنش عارف يسأله في ايه قبل ايه ،حس في اللحظة دي بعجز مالوش مثيل ،اتمنى من ربنا ياخد روحه عشان يتخلص من العذاب ده ،.
حاول يتماسك عشان ميضعفش اصاده وقال بجمود رغم نزيف روحه ودمار قلبه ،ليه عملت كدا يا تامر؟. ،صوته اتهز غصب عنه وقال بقهر شفت مني اي وحش عشان تدمرني اوي كدا ،ده انا كنت بعتبرك كل حاجة .
،لما تعبت في ثانوي وجاتلك حمة انا فضلت اذاكرلك لحد اخر يوم قبل امتحانك وبسببك شيلت السنة عشان ماكنتش مذاكر .
،اخد نفس طويل وقعد لأن خاف رجليه تخونه وقال بوجع ،ساعتها اقسم بالله مازعلت وقلت اهم حاجه أنه نجح ماهو اخويا الكبير وعديت الموضوع رغم ضيق امي وخناقتها معايا ،بس كل ده مهمنيش بس انت عمرك ما كنت جانبي في وقت شدة أو فرح .
،فاكر لما طلبت منك مساعدة وقت ما كنت مسافر لشغل عشان كنت مضغوط في تجهيز فرحي وكان نفسي تبقى معايا ،زعقتليا وقلت بغضب ما تبطل شغل التفاهة ده بقى ،هو انت شايفني بلعب انا بشتغل لشركتكو فمن الطبيعي تبقى مقدر تعبي ده ،مشتقولي فرحي وعايزك تكون جنبي وشغل الاطفال ده ،وبعدين اخواتك معاك هتعوزني في ايه ،.
سكت وافتكر الف موقف ليه كلهم ندالة وقلة اصل ،الحقيقة ظهرت اصاده بوضوح واحدة واحدة ودماغه لقتله ألف تفسير لكرهه اللي اكتشفه لما ركز دلوقتي بس ،زعقله وقال بصدمة واستفهام انطق بقولك .
،تامر بكره عايز تعرف ليه؟." ،بصله بغضب وقال بحقد ،عشان بكرهك يا عمر وبحقد عليك في كل حاجه ،بصلهم كلهم وكمل بجحود ،انا شمتان فيكو بشكل عمركو ماهتتخيلوه .
،كنت بتمنى اي فرصة عشان اقضي عليكو ،كنت بتمنى ليكو الأذى في كل لحظة ،كمل بضيق حاولت افرق بينكو الف مرة بس معرفتش ،بستغرب انتو ازاي عندكو انتماء لبعض اوي كدا .
،رجع بنظراته لعمر وقال بغل ،انت بقى كنت اكتر واحد بحسدك ،كنت بسال نفسي كتير ،ليه تبقى احسن مني ،ليه الكل بيحبك انت وبيحترموك ،ليه تاخد كل المدح وتبقى ظاهر في الصورة دايما ،ليه تبقى الكل في الكل ومتحكم في ابسط الامور وانا لا ،كمل بعصبية ،اشمعنا انا اهلي يموتو وانت تعيش مع أهلك ويبقى عندك اخوات وانا قاعد وسطكو زي الغريب ،ليه العيال يتريقو عليا ويفضلو يفكروني اني يتيم وان امي ميتة وان امكو مش امي .
،عدي بصدمة بس ماما عمرها ما قصرت معاك ،دي بتقول في كل مكان أن عندها اربع عيال ،عمرها مافرقت بينا في المعاملة ،وعمر بيحرص انك تبقى جانبه في كل لحظة ،كمل بذهول انت ازاي جواك كل الشر ده؟ ،مستحيل تبقى شخص طبيعي زينا .
كمل باستنكار ،انت شايل كل ده في قلبك طول الوقت وبتبتسم في وشنا عادي .
،اخد نفس طويل وقال باستياء ،بجد انا مشعارف ارد على كمية السواد اللي مالياك دي بايه ،حاسس أن اي رد هقوله هبقى بح-رق دمي على الفاضي. ،جحودك خلاك تصدق الكذبة وتعيش فيها ،بصله بقرف ،وقال بنفور ،انا كنت بحاول التمس ليك ألف عذر لما كان بيصدر منك اي تصرف مشين في حقنا .
،كنت بقول يمكن مايقصدش ،ده بيحبنا وعمر الأذى ماخطرله على بال ، بس الواضح ليا دلوقتي أن كل ده كان مجرد تمهيد لضربتك الكبيرة اللي عملتها ،عمر كان مصدوم ومشقادر حتى يتكلم ،معقول الضربة تيجي من اقرب حد ليه ،طب هو ليه فكر كدا ،هو من امتا حد فيهم حسسه باليتم اللي قال عليه ،حاول يفهم منه اكتر وقال بوجع ،طب انا وبتكرهني اوي زي ما بتقول ،طب ليه دمرت الشركة اللي تعبنا فيها رغم انك عارف أن ماما هتزعل وه-تنهار لو عرفت؟.
،سكت شويا وقال باستفهام قولي مجاش في بالك وانت بتخطط انك تقضي علينا تفتكر لها حاجه كويسة عملتها ليك؟. ،دي كانت بتسهر تخدمك وانت بتذاكر أو تعبان ،بتحبك زينا ،يبقى ليه عملت كدا؟.،تامر بغضب ،عملت كدا عشان تكفيكم شري ،قالت لنفسها يا عيني ده محروم ويتيم اهو نعطف عليه ون-كسر سمه عشان ميبصش لولادنا في عيشتهم .
،وابوك أن كان ساعد في دراستي فكان عنده سبب مقنع ،قالك نطهر مالنا وبدل ما نخرج زكاة للفقرا ده اولى اهو يتيم وهناخد فيه ثواب .
،كمل بكره ،انا بكرههم كره العمى وفرحت من قلبي لما ابوك مات ،وبدعي على امك تحصله قريب ،.
عدي بغضب قرب منه ورفع أيده ونزل بيها على وشه بكف وقعه على الأرض ورفعه بالقوة وقال بشر اخرس يا حقير ،واياك تجيب سيرة اهلي بأي كلمة ،انت اللي ضميرك ميت وقلبك حجر عشان كدا ظنيت فيهم السوء ،ومستغرب اوي أن عمر محبوب والأول في كل حاجه ،ضحك بسخرية ،طب ما ده شيء طبيعي ،ببساطة لانه طيب وقلبه مليه الخير ونيته صافية وعمره ما انكر خير عمله حد فيه ،مشواطي وقظر زيك عض كل ايد اتمدت له بخير ،لو شبهتك بالكلب هبقى بظلمه عنك ،تامر مكانش عارف ينطق من كتر الدم اللي نازل من وشه بس قرر أنه لازم يوجع عمر باخر كارت ،رفع عينه وقال بتشفي ،ماهو طيب لدرجة العبط ،والدليل فضيحته اللي ام طليقته عملتهاله في البلد ،سكت شويا وقال بضحك رغم وجع جسمه ،وده بعد معرفتها انه معيوب ومطلعش راجل ومشهيقدر يجيب عيال خالص ،مشبس كدا ،ده انا فرحت فيه من قلبي لما عرفت انها اخدت كل حاجه وكان ناقص تخلع الشبابيك لو قدرت ،.
اخد نفس طويل بفرحه وقال بشماتة ،انا انهارده حسيت اني اتولدت من جديد ،عشان حققت كل اللي نفسي فيه ،الشركة انهارت وانا اخيرا خرجت كل اللي كان كاتم على نفسي من سنين ،.
عدي باشمئزاز انت مريض بداء الحقد وصدقني اكيد هتتحاسب كويس على كل اللي عملته ،مسك عمر اللي استسلم ومبقاش فيه حيل يسمع اكتر من كدا ،وقبل ما يمشي قال له بسخرية يارب تكون مبسوط بافعالك دي انا همشي وهنتقابل تاني وساعتها هشوف جحودك هيوصلك لفين ،وفعلا اخد عمر ومشي واستغرب أن عمار ساكت طول القعدة ،وصل اخوه للعربية ورجع لقاه لسه على وضعه ونظراته متوجهة لتامر بطريقة مريبة ،وبدون سابق إنذار قام وشده وفضل يضرب فيه بطريقة وحشية .
،ومع أنه ضربه اول ما جه بس المرة دي كانت مختلفه ،كان بياخد حق إهانة أهله وشكه فيهم بالباطل ،شماته في اللي حصل لأخوه وحقده عليه ،شركتهم اللي دمرها وضيع تعبهم ،كره ليهم وسعيه لتفرقتهم باي شكل ،كان بيهزي زي المجنون ،هقتلك يالا ،انت عارف ده مين ده عمر السعدني اللي ضافره برقبة الف من عينتك والله لهخرج كل طاقتي عليك ،هخليك تتمنى الرحمة عشان تخلص من اللي هعمله فيك .
،تامر اتاكد في اللحظة دي أنه ميت ميت ،كان مرعوب من غضب عمار ،كان بيدعي ربنا تحصل حاجه تبعد شيطانه عنه ،عدي معرفش يوقفه عشان لو عمل كدا ممكن عمار يعاند وينهي عليه فورا ،بس حمد ربنا لما شاف عمر جاله بسرعه وشده بعنف من عليه وهو تقريبا شبه بيق-تله ، زعق بصوته كله بلاش يا عمار عشان خاطري ،انا مشهقدر اتحمل انك تدخل السجن في واحد زيه سيبه يغور بشره ،عمار حاول يهدى وبعد شويا خرج فونه وكلم كذا واحد عشان يجو ياخدوه لانه لسه مصفاش حسابه معاه ،وفعلا في خلال فترة قصيرة جم اخدوه لمكان بعيد ،ولما عدي سأله باستغراب ،هو انت ناوي على ايه يا عمار؟. ،قرب منه وهمس بخفوت ،بلاش نتكلم دلوقتي يا عدي ،انا ماصدقت اني أقنعت اخوك اني جبت الرجالة دول عشان ياخدوه يعالجوه ،عدي سكت لأن عمر مشمستحمل اي ضغط عليه خالص
،ركبو ومحدش قدر يفتح بقه بحرف ،
ولما وصلو عمر دخل اوضته وعمار رجع الشركة عشان يجمع أغراضهم قبل ما ياخدو المقر ،وعدي شرح لامه كل حاجه ولما سمعت فضلت تصرخ لحد ما أغمي عليها ،فوقها واداها دواها ونيمها في سريرها
،عمر بمجرد ما عرف قعد جنبها بسكوت تام ،عيونه متعلقة بيها بدموع رافضة تنزل
وقال باعتذار انا اسف ليكي يا ماما ،انتي تعبتي كتير وقلبك وجعك عشاني ،مسك أيدها وقال بضياع ،انا مشعارف اتنفس حتى ،انا مبقتش حاسس بروحي وقلبي من كل الالم اللي بقى معششش فيهم ،.
قومي عشان تاخديني في حضنك ،انا محتاجلك اوي تواسيني واهرب من كل الدنيا معاكي ،.
فتحت عيونها وقالت بوهن انا كويسة ماتقلقش عليا يا ضي عيني ، .
حاو يبتسم وقال بفرحة مزيفه ،انا كدا هطمن وهرمي كل حاجه ورايا طالما انتي بخير يا ست الكل ،.
فردت أيدها بدون كلام كدعوة منها أنه يقرب ،عمر فضل جامد شويا وبعدين رمى نفسه في حضنها وسمح لدموعه انها تنزل بغزارة ،.
ضمته بقوة وفضلت تمسد على رأسه بحنان وهي بتتحسبن على كل اللي اذوه ودمرو روحه ،صرخاته عليت بشكل يقطع القلوب ،جسمه بيرتجف بطريقه صعبة جدا ،عمال يهزي بكلام مش مفهوم من كتر الصدمة ،كل البيت جم على صوته وعيونهم كلها دموع عشانه ،.
عدي سحبه من حضن أمه اللي مقدرتش تتحمل انهياره واغني عليها تاني والبنات عملو ليها اللازم ،.عدي حضنه وفضل يهدي فيه وقال بدموع ،عشان خاطري متعملش في نفسك كدا ،صدقني ربنا بيحبك وبيكشف ليك اعداءك عشان متفضلش عايش مخدوع فيهم وهما بيكرهوك وعاملين حبايبك ،.
بص لعيونه وقال بدعم ،احنا معاك وعمرنا ماهنسيبك ابدا ،.
اخد نفس طويل ومسح دموعه بعنف ،وهزه بقوة ،عمر انت مينفعش تضعف كدا انت قوي وهتعدي من المحنة دي كمان ،دي ابتلاءات من ربنا عشان يختبر صبرك ،عمر بانهاك عدي عايز ابقى لوحدي إذا سمحت ،.
دخله أوضته من سكات وقال برجاء وهو ضمه اوي ومحاوطه ،انا خلاص هسكت خالص ،صوته اتهز ،بس بالله عليك خليني جنبك ،عمر هز دماغه بموافقة ورجع حطها على كتف اخوه ،عدي جاب مصحف وفضل يقرء بصوت عالي لحد ما اتاكد أنه راح في النوم ،.
عدله وفضل معاه مفارقهوش ولا لحظة واحدة ،
بعد فترة عمار عالج فيها تامر من كل جروحه وخلاه يمشي ،تامر استغرب جدا من تصرفه ده ،بس بمجرد ما وصل بيته وقعد فيه يومين يرتب أوراقه من جديد عشان يحط خطة يهرب من عمر وأخواته ،لقى البوليس بيخبط عليه ودخل فتش البيت كله ،
كان مذهول بس مقدرش ينطق بحرف ،واتصدم حرفيا وقلبه وقع في رجليه لما شاف العساكر مطلعين من خزنة مكتبه كمية مخ-درات وكوك وهر-وين وكافة الأنواع من الحبوب الغير قانونية ،
صرخ بكل قوته عشان يثبت ليهم أن كل الممنوعات دي مشبتاعته ،بس الظابط ضربه كذا كف واهانه بافظع الألفاظ
،وخرج معاهم ذليل ومتكلبش ،عمار اخد نفس طويل وبص لإخواته اللي إقنعهم بالعافية يجو معاه يشوفو بعينهم انتقام ربنا ،قال بجبروت اخد الحق حرفه ومكانش ينفع اعدي كل جرايمه في حقنا من غير ما اندمه الف مرة عشان يتربى ،قرب من عمر وقاله بوجع ،اوعى تكون فاكر أن ضعفك وانهيار ماما اللي مبقتش قادرة تقوم من السرير ده كان سهل عليا ،
كمل بحقد أقسمت بالله اني لازم ادمره بطريقه تجيب مناخيره الأرض ،زعق بحدة ،فوق مينفعش تفضل طيب تاني ،الدنيا دي زي الغابة واللي زيك هيتهرسو فيها ،عدي زقه بعنف اخرس متقولش كدا ،عمر مش سازج ابدا ولا ضعيف هو مصدوم شويا وهيبقى كويس ،
كمل بنصح اوعى تتغير ابدا يا عمر خليك رؤوف وعندك رحمة وخد من كل اللي حصل دفعة تبدء بيها من جديد ،هدي وبص ل عمار ،انا مشمعترض ابدا على كل اللي عملته ،بس طمني انت ممكن تتكشف
،عمار بثقة ماتقلقش عليا ،انا جبت الحرز ده من ظابط صاحبي واللواء بتاعه لما حكاله موضوعي اضايق جدا وقرر أنه يساعدني في كل الإجراءات ،
عدي بذهول طول عمرك عبقري ودماغك سم ،عمار بمرح بص انا هعتبره مدح عشان مزعلكش ،
عمر اخد نفس طويل وقال بهدوء ،انت صح في انتقامك ده يا عمار ،سكت شويا وقال بخبث ودلوقتي خلينا نروح نزور العريس بعيش وحلاوة ،عمار ضرب كفه بكف عمر وقال بصياح ايوا بقى يا كبير خليك معايا على الخط ،
وفعلا بعد يومين راحو له وبمجرد ما شافهم بص في الأرض وقال بغيظ ،اكيد انت السبب يا عمار ،عشان قلبك حديد ومستحيل تسيب حقك ،عمار صقف بايده وقال بشماتة برافو عليك طلعت زكي وفاهمني كويس ،شده بعنف وقال بشر ،انا ممكن كنت خلصت عليك وقتي ومشهاخد يوم واحد ،بس لقيت أن الموت رحمة لاشكالك ،خليك هنا عشان تعفن في السجن واحنا ،بص لعمر وعدي وقال بيقين وحسن ظن كبير بالله ،صدقني هنطخطى كل ده وهنبدء تاني وهنرجع بقوة أكبر من اللي ممكن خيالك يصورهولك ،.
عمر بعده عن ايد اخوه وقال بقرف ،انا همشي ومشهعبرك بولا كلمة ،شكلك مهزوم وعلامات الضرب على وشك تغنيني عن كل اللي كنت هقوله ،
عدي بكره روح ربنا لا يسامحك دنيا ولا آخره ،خرجو التلاتة وقررو يروحو البيت يطمنو على امهم ،كانت فترة صعبة جدا على عمر اللي الدنيا عمالة تهد فيه بكل قوتها ،كان مستعد يعدي كل ده بس اللي كسره وقتل روحه بدل المرة مليون هو مرضه اللي اكتشفه،
واللي فضل يتعالج منه اكتر من سنتين ،السرطان قضى على كل ذرة تحمل عنده ،اخد كيماوي بشكل مكثف عشان المرض اللعين ده مينتشرش في باقي أجهزة الجسم ،امه وأخواته كانو مقهورين عشانه ،معقول في واحد تجيله كم الابتلاءات دي ورى بعضها ،الكل زعل جدا عشانه واهل البلد جم زاروه ،
وكان في دكتور أورام كويس اوي هو اللي بيتابع معاه والغريب أنه كان بيبقى رافض يكمل جلسات بس هو بيقدر يقنعه بطريقته وكان ليه التأثير الاقوى عليه ،
وبمرور الوقت عمر اتعافى من المرض وبقى كويس ،في الفترة دي عمار وعدي قدرو يبنو اسمهم من جديد ولأن في رجال أعمال بيحبو عمر جدا دعموهم بكل اللي يقدرو عليه ،وفي خلال سنة واحدة بقت شركتهم علامة تجارية وصيطها مسمع في مصر كلها ،
عمر قرر أنه يعافر في الدنيا وياخد سعادته منها بالعافية ،وطالما ربنا مد في عمره هيشتغل بكامل تركيزه عشان يثبت لكل اللي اذوه وشمتو في أزماته أنه يقدر يفوت في الحديد ،هيحفر اسمه في الصخر وكل اللي مر بيه هيحطه كحافز يكبر بيه اكتر واكتر ،وبالفعل حقق انجازات كتير في مدة قصيرة جدا والكل بقى مافيش على لسانهم غير اسم المهندس عمر وحش الالكترونيات في البلد كلها ،ومن اللحظة دي هيبدء ينول كل مكافاءت صبره وعوضه من الدنيا هيجي لحد عنده وبدون أدنى مجهود ،العصر الذهبي في حياته بدء بعد آخر جلسة كيمو ،
عمر السعدني ودع كل أحزانه عشان ياخد نصيبه من كل السعادة
#يتبع بقلمي # دينا رأفت
*****!🤩
(خيانة الروح) الفصل السادس.
بقلمي # دينا رأفت
******!🥰عمر طلب تعيين مساعدة ليه على شرط أنها تبقى مهندسة عشان تشيل معاه الشغل خاصة أن التوكيلات اللي اخدوها بقت كتير وده مسبب ضغط زيادة عليه ،.
وفعلا اتقدم للوظيفه دي ناس كتير جدا ومن ضمنهم كنزي اللي اعجب جدا بذكاءها ولباقتها ،كانت شاطرة جدا وملفها بياكد أنها هتبقى إضافة كويسة للشركة ،.
وافق عليها واكتشف أنها موهوبة بشكل مش طبيعي ،بتعرف ازاي تدمج ما بين الهندسة وإدارة الأعمال بشكل منظم ،وغير كدا هي محترمة جدا وفي حالها ،الكل بيحبها لرقي اخلاقها وطيبتها وتدينها ولأنها بتساعد الناس بدون مقابل ،مشطماعة ابدا ولا بتهتم بالمظاهر بتشتغل بتفاني بغض النظر عن العائد المادي هيكون كام ،.
كانت بريئة جدا وشفافة ،عمر كان منبهر بيها ،حس بشعور مبهم بيزيد كل شويا جواه ومكنش لاقي ليه تفسير ،كان بيحب يشوفها كل الوقت ،بيفضل يتحجج بأنه عايز يتناقش معاها في الشغل عشان يقدر يشوفها ويتكلم معاها ،بس دايما بيحس أن في وجع مخفي ورى مرحها وخفة ظلها .
،عيونها رغم سحرها بس كان فيهم حزن كبير ،وبمرور الوقت قربت منه هي كمان ،كانت منجذبة ليه كتير وحست أنها عايزة تعرفه عن قرب .
،بتفضل تسأله في نقاط كتير عشان يفضل اصادها ،اكتشفت انها وقعت في غرام الشاب المهذب واللي رغم ابتسامته الجميلة بس هي حاسة أن الشخص ده عانى كتير في حياته ،.
ام عمر فرحت اوي لما عمار لمح ليها عن وجود كنزي وابتسم وهو بيقول لها أن عمر ميال ليها بس لسه معترفش ،نجلاء ربطت المواضيع ببعض ولقت أن ابنها كان بيجيب سيرة البنت دي كتير وبيمدح فيها معظم الوقت اصادها ،ضحكت وقررت انها هتحاول تقرب بينهم بطريقة متقللش ابدا من قيمة عمر لأن كرامته عندها فوق كل اعتبار ،.
عملت عيد ميلاد لابن عمار وخلت عمر يعزم الموظفين اللي يحب أنهم يجو ،.
وطبعا كنزي كانت أول واحدة ،ومع أنها كانت مترددة شويا الى أنها حسمت ترددها فورا لما حست أنه ممكن يزعل ،وفعلا وصلت الحفلة وكانت ملاك بفستانها الفضفاض وحجابها اللي مخليها أميرة في عيون الكل ،.
نجلاء والبنات استقبلوها بترحيب حار وقعدوا معاها .
وهي فرحت جدا معاهم ،وحست أنها وسط عيلتها اللي اتحرمت منهم بدري ،.
حبت الجو ده اوي واكدت ليهم أنها مش هتبقى اخر مرة تشوفهم فيها ،.
عمر كان مذهول من جمالها ورقتها ،مقدرش يشيل عينه من عليها ،فضل مراقبها طول السهرة وسط مشاكسة عمار ليه وتلميحات عدي المخفية ،.
زعل جدا أنها هتمشي وقرب منها وقال بتكشيرة معقول جه وقت انسحاب الأميرة اللي بمجرد دخولها خطفت الأضواء ببراءتها؟.
،كنزي بكسوف احم انا اتاخرت جدا وكمان زهقت طنط من رغيي ،.
عمر هز دماغه بنفي بالعكس ماما حبتك موت وزي ماشفتي فضلت مضايقة مني عشان مقدرتش اقنعك تقعدي شويا زيادة ،.
كمل بثبات كلهم حبوكي جدا ،.
كنزي بتوتر من نظراته انا اللي حبتهم جدا وفرحت معاهم من قلبي ،هما طيبين اوي وروحهم جميله ،كملت بصدق ، اكتر حاجه شدتني فيهم علاقة نور وفريدة مع بعض وبالأخص مع طنط ،حسيتهم بيخافو عليها من الهوا ،.
ابتسمت وكملت باستفاضة ،انا صراحة استغربت جدا لما شفت نور اخدت لينا وراحت تغيرلها ،.
نظرتها وهي بتبص لفريدة وهي بتقولها بكل حب ،انتي تعبانة طول اليوم مع ادهم ومشغولة في التجهيزات اقعدي ارتاحي انتي وانا هتعامل بجد نظرة خطفتني من حنانها ،.
اخدت نفس طويل وقالت بحب ،حقيقي انا وقفت ادام كل الرحمة والمودة دول ومعرفتش اقول ايه ،.
عمر ابتسم وقال بفخر ،البنات دي متربية كويس وبيحبو بعض جدا وماما روحها فيهم ونهاره اسود لو حد من اخواتي فكر يزعلهم بتتحول تماما وبتزعقلهم وبتقف في صفهم دايما ، .
كنزي ابتسمت ربنا يخليهم لبعض وليها ،.
فضل باصص ليها كتير من غير كلام ،قلبه دق بدقات عنيفه ،عيونها رمت سهمها في نص روحه ،.
همس بدون وعي انتي حلوة اوي ،مش بس من برى بس جمال روحك خطفني بجد ،.
كنزي بخجل مكنتش لاقية صوتها عشان ترد عليه ،كانت سرحانة وهيمانة فيه ،اد ايه هو وسيم جدا وجذاب ،.
كانت نفسها الزمن يقف بيهم عند اللحظة دي ،.
فاقت على اللي قاله وحست بفراشات بتطير فوق معدتها ،معرفتش تنطق من الكسوف ووشها بقى احمر جدا ،اكتفت بضحكة رقيقة وهو اخد نفس طويل وقال باستفهام ،هشوفك بكرة بدري عشان نورد أجهزة لشركات النعماني ،الدكتور يزيد طلب مني الأجهزة عشان الشغل عطلان بسبب تهنيج الكمبيوترات عشان كدا غير السيستم كله وده بعد ما في أعداء ليه قدرو يخترقو النظام فقال يجيب أجهزة جديدة وصراحه هو صبر علينا كتير واستحمل ظروفنا طول الفترة اللي فاتت فياترى الحاجه اتظبطت ولا لسه؟.
،كنزي بعملية ماتقلقش انا تممت على اللابات وكل حاجه تمام وبكره هنسلمه الطلبية وكمان هنعوضه عشان اتاخرنا عليه وهنعمل دسكاوند على كل جهاز بنسبة ١٠٪ لانه كلاينت تقيل جدا وكون أنه يستنى علينا فده ذوق منه ويستحق الشكر بطريقة عملية ،
عمر بمشاكسة يعني قمر وروحك جميلة وعبقرية في مجالك؟،ده انا محظوظ بيكي بقى ،.
كنزي بحرج احم انا اتاخرت جدا ولازم امشي ،.
عمر بحنان ماشي يلا اركبي عربيتك وخلي بالك من نفسك وإذا سمحتي ابعتيلي رسالة نصية بس عشان اطمن انك وصلتي ممكن؟.
،كنزي بفرحة حاولت تداريها ،حاضر اشوفك الصبح ،.
عمر وهو مجبر شال عيونه من عليها وقال بحب تصبحي على خير ،مشيت واخدت قلبه معاها ،.
فضل سهران طول الليل ورغم فرحته بوجودها في حياته إلى أنه لام نفسه كتير غصب عنه ،طب ليه سمح لقلبه يدق تاني ،هو مشناقص جرح جديد ، طب روحه ليه ارتاحت وحست أنها لقت شبيهها ،ازاي روحه اطمنت ليها رغم كل وجعها ، .
انب نفسه بدل المرة الف بس لقى قلبه بيدق بجنون وكأنه بيثور على إحساسه السيئ ده حتى عقله نهره كتير .
وظهرله حقيقة مشاعره وهمس ليه بكلام اقنعه ، اخرج من نطاق وجع ندى ده بقى ،دي مرحلة وعدت بكل اللي فيها واستفدت كتير منها ،كنزي مش زيها ابدا ولو عملنا مقارنة بينهم هتبقى بتظلم كنزي لانك متاكد أن ندى ملهاش وصف في حقارتها وانحطاط اخلاقها ،انت اتسرعت واخترتها بعيونك ،لكن كنزي انت حبيتها بكل جوارحك وده ببساطة لأنها جميلة قلبا وقالبا ،الكل بيشكر فيها وبيحترموها ،عندها طموح وعايزة تثبت نفسها في الشغل باي شكل ،اوعى تضيعها من ايدك لأن العوض مبيتعوضش تاني ،
اتمسك بفرصتك دي بكل قوتك ،حارب آلامك وأهزم خوفك بانك تفاتحها في ارطباتكم في اسرع وقت ،فوق بقى وبطل تعيش في وهم انك مشهتقدر تحب تاني واكبر دليل قلبك اللي عشقها مش بس حبها ،طرح سؤال مباشر ،هل انت حبيت ندى؟.
، ببساطة الجواب لا ،يمكن حبيت شكلها حسيتها هتبقى مناسبة مع أن ده مكانش صحيح ،ده حتى حب العشرة مادقش قلبك وده لأنها معملتش حساب لا للعشرة ولا للعيش والملح ،مافيش فيها اللي كان ممكن يشفعلها ،افتكر أنها خانت كل شيء حلو قدمته ليها ،ياريت تخرج نفسك من دوامة الذكريات دي وتبص للحاضر بفكر جديد وبايدك تقدر تبني حياة تانية ولو خايف براحتك انسى كل مشاعرك والتعامل كان محصلش حاجه وخليك في سجن الوحدة مع جروح الماضي ،.
فضل يهز دماغه برفض لآخر جملة وقال بلهفة ،لا مقدرش اتجاهل كل اللي حسيت بيه ،اخد نفس وطلعه بسرعه وقال بحسم ،انا هبدء من جديد مع كنزي وهنسى كل شيء ،وقرر أنه هيحدد معاها ميعاد عشان يتكلم معاها بصراحة وهيعرفها عن حياته وهيعرض عليها الجواز ،كفاية كل السنين اللي ضاعت عليه في صراعاته مع مرضه ومع كل الناس اللي دمروه 🥰 .
اما كنزي فبمجرد ما دخلت بيتها الكئيب اللي حيطانه بتخنقها ،قلعت طرحتها واختفت كل معالم السعادة اللي كانت على وشها وبصت لصور أهلها وقالت بحنين وحشتوني اوي وحاسة بضياع ووحدة بتنهش في روحي من وقت غيابكو ،
انا عمري ما نسيتكم كلكم وعقدة الذنب بتقتلني ،بس اللي مريحني أن اللي حرمني منكو اخد جزاءه واتعدم ،
بصت لصورة تانية بوجع واخدتها ودخلت اوضتها وقالت بعياط ،انت وحشتني اوي ومشقادرة احكيلك كالعادة ايه حاصل معايا بقالي فترة عارف ليه ،اخدت نفس طويل وقالت بلوم لنفسها ،عشان حاسة اني خنتك يا كريم ،انا مشاعري اتحركت لحد تاني ،مش بس كدا ،انهارت من العياط وقالت وهي باصة لعيونه الجميلة ،انا عشقته بجنون مش بس حبيته ،
سامحني عشان خاطري انا عارفة اني وعدتك من زمان ماكونش لغيرك بس والله غصب عني ،انا فضلت عايشه على ذكراك سنين وحاولت اقاوم الحب ده بكل قوتي بس قلبي لسه عايز يعيش رغم كل اللي حصل فيه ،
عاهدت نفسي اني افضل معاك بروحي ،شهقاتها عليت وملت المكان ،انا اسفه الف مرة ،بس انا مش عارفه اعمل ايه ،قلي اقتل مشاعري وافضل لوحدي باقي عمري واتجنن ،
كانت مشتتة ومشقادرة تاخد قرار ،في صراع داير جواها ،قلبها عشق من تاني وضميرها بيلومها وبيتهمها بخيانة العهد ،
اخدت كام نفس ورى بعض ومسحت دموعها بعنف وقالت بقوة انا مشهسيب نفسي للوحدة تاكل فيا ،انا بموت من القهر في كل لحظة وانا قاعدة هنا ،كملت بوجع وانهزامية دبرني وقولي اعمل ايه ،
مشانت كنت صاحبي وانا اهم واحدة عندك ،كملت بعتاب بس انت ضحكت عليا ومشيت بسرعه حتى من غير وداع ،
طب ليه ماخدتنيش معاك انت وبابا وماما وكارمن ،انا تعبانة اوي ومشقادرة اعافر في الدنيا اكتر من كدا ودعيت كتير أني اموت عشان اجي ليكم بس كنت برجع استغفر واصلي كتير ،
فضلت تصرخ من قلبها وقعدت على الأرض وغصب عنها افتكرت كل حاجه حصلت
#فلاااااش باااااك #كانت بنت جميله جدا عندها اخت واحدة ،اسرة مترابطة وكلهم بيحبو بعض جدا ،كنزي طول عمرها متفوقة في الدراسة وبمجرد ما دخلت الجامعة بقت معروفة بين الطلبة والدكاترة بسبب اجتهادها وطموحها أنها تبقى اشهر مهندسة في مجال الهاردوير والالكترونيات بشكل عام ،
كانت نفسها تفرح حبيبها بيها ،هو اللي كان بيشجعها تبقى زيه ماهو عبقري في المجال ده ،كان بيعشقها من صغره وده لان أهله واهلها كانو جيران الروح بالروح وكان بيفضل قاعد طول الوقت معاها ،علمها كل حاجه ،اعتبرته صاحب مشبس حبيب ،عشقه ليها عدى الحدود ،وفي مرة لقت دكتورها بيطلب أيدها للجواز ،من صدمتها معرفتش تنطق وتقول انها مكتوب كتابها وهتتجوز قريب ،ولما هديت راحت وفهمته ،هو اتصدم بس ما ظهرش كدا ،كل اللي عمله أنه ابتسم ليها وقالها بغموض ربنا يوفقك وهي خلاص محطتش الحوار في دماغها تاني ونسيت الموضوع ،
لحد ما لقت كريم متعصب في يوم وده عكس طبعه معاها ولما ضغطت عليه قالها أن في دكتور جاي بيطلب منه أنه يبعد عنها ولو مش بالذوق هيبقى بالعافية ،كنزي كانت مذهولة وميتة من الرعب طب هو ليه عمل كدا ،ازاي يتجرء ويتصرف بأسلوب مهين زي ده ،كريم طمنها وأكد ليها أنه زعقله وضربه وطرده من الشركة بطريقة مهينة بس الدكتور ده مسكتش ،فضل يضايق كنزي بطرق كتيرة ،لدرجة أنه حاول كذا مرة يتعرض ليها بأنه يخوفها ويبعتلها صور لكريم وهو متصوب عليه رصاص ،قرب منها وحاول يقتحم منطقتها المحظورة ،اجر رجالة وضربو كريم عشان يخوفوه ويجبروه يسيبها بس هو بيفضل يقاوم للنهاية وكان مافيش على لسانه غير لو هتاخدها مني هتعدي على جثتي الاول ،حتى أهلها مسلموش من شره ،قتلهم كلهم أدامها وهي من الذهول متحركتش من مكانها ،
ومن جبروته بعد عن كريم شويا عشان هو عارف أن هو الوحيد اللي هيقدر يخرجها من اللي هي فيه ،وفعلا اختفى من الصورة تماما وكريم حاول بكل قوته يطلعها من الحالة دي ،اخدها لدكتور نفسي وعالجها ولما خفت وبقت كويسة إلى حد ما ،ظهر الدكتور هيثم تاني وبمنتهى الجحود وجمود القلب ويوم فرحهم قتله وهي في حضنه بفستان الفرح .الكل صرخ من هول الصدمة ،حاولو يبعدوه عنها بس هي مرضيتش تخرجه من حضنها ،فستانها الابيض اتحول للأحمر من كتر الدم ،كريم كانت روحه متعلقة بروحها ،قاوم وفتح عيونه وهمس بضعف وصوت متقطع ،عشاني متنهاريش ،انا مشهعرف اهديكي يا حبيبي ،شهق ببطء وقال بوهن ،انا اسف عشان لأول مرة مشهنفذ وعدي معاكي ،انا قلتلك اني هفضل معاكي لاخر العمر بس انتي عارفه مين السبب ،بس انا مشزعلان عشان هموت واخر عيون هاشوفها هي عيونك يا اغلى من روحي ،انا حاربت لاخر نفس ليا وحافظت عليكي فعشاني اجمدي وعيشي واتجوزي ،متوجعيش روحي عليكي ،اخد نفس اخير وقال بوجع ،هاتي حقي وحق أهلك يا كنزي ،انتي هتقدري يا حبيبتي وعايز منك طلب اخير ،عشان خاطري اوعديني انك تقفي من تاني ومتسمحيش لحد يسرق سعادتك ،افرحي وحققي كل اللي بتتمنيه ،اختاري واحد يشبهك ويكون عوض ليكي ، ،ضغط على أيدها وبص لعيونها وكان مستني ردها ،حاولت تحرك لسانها عشان تخلي روحه تطلع بسلام وقالت بقهر وانهيار اوعدك هعمل كل اللي قلتلي عليه ،عايزاك تتأكد اني هاجيب حقكم لو كانت دي اخر حاجه هعملها ،بمجرد ما خلصت كلامها كريم اتشاهد وروحه فاضت لرب العالمين .
،كنزي فضلت ساكتة تماما والكل حاول يخليها تتكلم لكن فضلت على وضعها البوليس لما فتش الكاميرات لقى شاب مأجور واقف وكان موجه السلاح ناحية كريم ،ولما بحثو عرفوا أن ملفه الإجرامي عندهم وفي خلال كام ساعة جابوه وبعد ضغطهم عليه اعترف على هيثم وباقي الرجالة ، .
وفعلا قبضو عليهم كلهم وكنزي طلبت منهم يفتحو ملف قضية قتل أهلها والكل اتفاجء أن هيثم اعترف بكل حاجه ولما سألوه ليه اعترفت بسرعه ومانكرتش ،قالهم أنه مبقاش فارق معاه حاجه ،اهم شيء أنه خلص من كريم وأنه بقى متاكد أن كنزي عمرها ما هتبقى ليه ويمكن لو كان غصب عليها تاني بعد اللي حصل كانت قتلت نفسها وهو هيتحرم منها بردو ، .
الظابط بصله باحتقار وأمر بحبسه فورا وصدر حكم الاعدام ،ويوم الحكم كنزي جات المحكمة وفضلت تعيط بالدموع فرح ووجع في نفس اللحظة عشان المجرم اخد عقابه ،.
وبعدها راحت تعيش مع خالها برى مصر ،وحاولت تتخطى أزمتها بأنها دفنت نفسها في الدراسة والشغل ،اولاد خالها دعموها بكل قوتهم عشان ترجع زي الاول ،وبعد سنين طويلة قررت ترجع القاهرة ،.
وخالها اشترى ليها بيت جديد وقدم ليها في شركة السعدني ،حبت شغلها جدا واتعاملت مع الكل بطيبة وحسن نية وبردو بحذر ،ومن غير ما تحس عشقت عمر ،.
حبها ليه كان مختلف ،كل ما بتقاومه بيهزمها وبيسيطر على كيانها اكتر واكتر .
،فاقت من ذكرياتها على صوت رسالة من معشوقها اللي بتحلم أن القدر يديها فرصة معاه ،فتحتها ولقت نفسها بتبتسم من بين دموعها ،قرات الكلام بقلبها مش بس بعيونها ،
انا حبيت اقولك انك كنتي اجمل حاجه حصلت ليا من لما بدءت اشتغل من جديد
،عارفك مذهولة وبتقولي لنفسك هو اتجنن ولا ايه ،ازاي يقولي كلام زي ده ،بس معلش خلي اجابات كل الاسئلة دي بكره بعد الشغل ،اذا سمحتي طبعا عايز اقابلك في المكان اللي تحبيه وتحدديه ،عشان اوضحلك كل حاجه ،وده لاني راجل دغري وماليش في اللف والدوران ،.
لو موافقه ابعتي وش بيضحك ،اما لو مشحابة فتمام ابعتي وش بيعيط ماشي ،تصبحي على اجمل حاجه تستاهل قمر زيك.،مسكت الفون وفضلت تفكر شويا بحيرة ،بعدها قامت تصلي يمكن ربنا يهديها للقرار الصح ،ولما خلصت لقت قلبها بيدق بعشق عمر وبيشجعها تروح له وتسمعه ،وعقلها ايد راي قلبها ولقت نفسها بتضحك بسعادة لأنها شبه متأكدة أن عمر بيقولها بشكل مستتر أنه عايز يرتبط بيها ،ماهي مش غبية وحاسة بعشقه اللي باين في اهتمامه ونظراته وطريقته معاها اللي واضحة من زمان ،
يمكن هما الاتنين معترفين لبعض بالعشق بس من خلال لغة عيونهم ،فضلت صاحية تفكر للصبح واخيرا قررت انها هتقابله ،فتحت الشات بتوتر وارسلت الوش المبتسم ،بعدها خرجت طقم رقيق ولبسته وفعلا بعد الشغل لقاها بتقوله بحرج أنها هتروح اي مكان على ذوقه عادي ،.
ولما وصل طلب لها عصير ولقاها بتقرب منه على استحياء ،وقعدت وفضلو ساكتين فترة لحد ما هو قطع الصمت وقال بهدوء ،عجبك العصير ولا اطلبلك حاجه تانية؟.
،كنزي بتوتر لا انا بحب الرمان جدا وقليل لو شربت اي مشروب غيره ،عمر بخبث طب مانا عارف عشان كدا طلبته ليكي ،كنزي بخجل قلتلي انك حابب تتكلم معايا برى الشغل اتفضل انا جاهزة اسمعك ،
عمر ابتسم طب مش ناكل الاول اديكي شايفه كنا مشغولين طول النهار وماكلناش اي حاجه من وقت الفطار ،
كنزي بحنان مقدرتش تخبيه يا نهار ابيض لا خلاص كل ونتكلم بعدين ،
اخد نفس طويل ومسح وشه بايده وهمس لنفسه بعشق لو تعرفي حبيتك اد ايه ،نفسي اكون معاكي في اسرع وقت ،عايزك تشفي جروحي بطيبتك ونقاء قلبك ،اتنهد وفعلا طلبو غدا وعمر أصر أنها تأكل معاه والغريب انها وافقت بهدوء واتفاجءت أنها كانت جعانه جدا ،خلصو اكل وعمر بدء كلامه بدون مقدمات ،
كنزي انا عايز اتجوزك ،عايز اكمل حياتي معاكي طول العمر ،كمل بحب ،انا معرفش انتي احتليتي قلبي ازاي ولا امتا ،بس اللي اعرفه كويس اني بحبك بجنون وأقسم بالله هتبقي معايا سعيدة انا بوعدك بكدا قلتي ايه؟.
،كنزي مكانتش عارفه ترد بايه ،قلبها فرح وعقلها خانها من جديد واستنكر الفرحة دي وفضل يفكرها ،معقول هتنسي كريم ده مات بسببك ،دموعها نزلت بوجع من غير صوت ،جسمها بقى بيرتجف ،عمر بذهول وحزن انا زعلتك طب اهدي عشان خاطري وامسحي دموعك ،
اداها منديل وهي حاولت تسيطر على نفسها وقالت بصوت حزين وضعف ،انا تعبانة اوي وموجوعه بطريقه بشعة ،كملت بعياط ،انا بعتذرلك عشان عيطت بس انت متعرفش عني اي حاجه ،عمر بعشق انا عارف ده كويس يا كنزي ،انا كمان محكتلكيش حاجه عني ،كل اللي عرفتيه عني اني كنت متجوز قبل كدا ،كنزي بهدوء ايوا انت غامض جدا بالنسبة ليا ،عمر اخد نفس طويل وقال بحزن ممكن اطلب منك طلب ،كنزي بموافقة اتفضل ،عمر بثبات عايز اعرف منك هل في اي مشاعر جواكي تجاهي ولا لا؟.
،كمل برجاء عشان خاطري قولي ،هل نظراتك اللي بشوف فيها حب كبير ليا لما ببص جواهم بتقول انك عايزاني وبتحبيني؟.
،كنزي اتكسفت وحطت وشها في الأرض ،وقالت بصوت واطي ،افهم الرد من عيوني ،عمر بحب طب مش ترفعيهم عشان اقدر افهم كويس؟.
،اخدت نفس طويل ورفعت عيونها بخجل وعمر غاص فيهم حرفيا ،كانت مذهلة ،نظراتها فيها حب وكسوف وخوف ودموع وحزن ووجع ،مكانش عايز يبعد نظره عنها ،
همس بدون وعي ،انا بعشقك يا كنزي ومستحيل هاسيبك تضيعي مني ،قلبها دق بعشق كبير وغصب عنها لقت نفسها بتهمس برقة انا موافقة اتجوزك ،.
عمر بحنان اوعدك هحكيلك كل حاجه ،وهسمع كل حرف منك بس وانتي على اسمي وجوى بيتي عشان نقدر نحتوي بعض كويس ويبقى ليا الحق اني اخدك في حضني وأبكي على كتفك وانا بحكيلك ،كنزي باستغراب يعني هنفضل غامضين لبعض ومخبيين اسرارنا لحد الجواز ،.
عمر بخبث وفيها ايه يا حبيبي طالما الفرح هيبقى بعد شهر من دلوقتي؟.
،كنزي شهقت بصدمة ايه بالسرعة دي طب ازاي ده احنا مشهنلحق نعمل اي حاجه ،عمر ببساطة اطمني يا قمر ،كل حاجه هنرتبها سوى واول شيء مطلوب منك انك تكلمي خالك وتعرفيه اني عايز اتقدم ليكي ،كنزي بتردد بس هو مشغول جدا ويمكن ميعرفش ينزل دلوقتي ،عمر بابتسامة انا هقنعه بطريقتي متقلقيش ،كنزي باستفهام ،طب فين البيت والعفش وكل ده؟.
،عمر بلهفة انا هاخدك انتي وفريدة ونور وماما وهفرجك على الڤيلا اللي لسه شاريها من كام شهر ،والعفش انزلي اختاري اللي يعجبك ،كنزي ضحكت برقة للدرجة دي مستعجل؟.
،عمر بزعل انا نفسي اغمض عيني وافتحها الاقيكي بقيتي في بيتي ،عشان عايز اعرف مالك وايه اللي طافي روحك اوي كدا ،
كنزي بفضول انا بردو نفسي تحكيلي عنك كل حاجه مخبيها ،عمر بتنهيدة يبقى قرار الجواز ده جه في وقته ،
كانو حاسين أنهم مغيبين وقلوبهم هي اللي بتحركهم ،عشقهم كان فريد من نوعه ،كان عشق مولود من رحم الوجع والخذلان ،
كنزي قررت انها هتعيش من جديد وهتثق في عمر عشان يخليها تنسى كل اللي مرت بيه ويرمم شقوق روحها ،كلمت خالها وفرح جدا وفاجءها بأنه نزل هو وأولاده يقضو معاها الشهر ده ويفرحوها ،عمر عرف أهله وكانو طايرين من السعادة ،امه فضلت تزغرط لحد ما صوتها راح واخواته مكانوش عارفين ازاي يعبرو عن فرحتهم باخوهم الصغير ،
خال كنزي قابل عمر وحبه جدا واتفق معاه على كل حاجة وفي يوم كانت كنزي بتعيط جامد وعمر ماكانش فاهم مالها ،قعد اصادها وسأل للمرة اللي ميعرفش عددها ،حبيبتي قوليلي بس فيكي ايه؟.
،طب انا زعلتك في حاجة؟.
،كنزي بدموع ،انا حاسة اني خاينه يا عمر ،كملت بخزي ازاي هقدر افرح من تاني وهو مات عشان يدافع عني واتحرم من حياته بسببي ،عمر بعدم فهم ،قال بتوتر انتي تقصدي مين ارجوكي اهدي يا حبيبتي لأن دموعك بتوجعني ،كنزي حاولت تهدى وقالت باعتذار ،حقك عليا بس مش هقدر استنى لبعد فرحنا عشان احكيلك ،كملت بتيه وضياع ،انا عايزاك تاخد بايدي وتخرجني من الضلمة اللي انا محبوسة فيها ،نفسي تدلني على الصح انا ماشية بخبط في الزحمة ومشعارفة اعمل ايه ،همست بحب انا بحبك اوي وفي نفس الوقت مشقادرة افرح من قلبي ،طمني بوجودك وحسسني بالأمان ،انا هقولك كل حاجه ،عمر مكانش نفسه يفتح في اي شيء يخص الماضي دلوقتي لكن حاليا هو لازم يفهم منها ايه الظروف اللي مشقادرة تتخطاها ،بصلها وقال بثبات حبيبتي اهدي احنا هنتكلم في كل حاجة انتي عايزاني اسمعها ،وانا هقولك عن الماضي بتاعي وهنقفل السيرة دي للابد ،كمل بحنان ها ياروحي انا سامعك بس اهم حاجه تمسحي دموعك وتهدي ،وفعلا حكت ليه كل شيء بالتفصيل من وسط عياطها ،كان موجوع اوي عشانها ،ساعتها حس أن كل اللي مر بيه كان اهون بكتير من تجربتها المريرة ،خلصت كل كلامها وهو فضل ساكت شويا ومعقبش بأي كلمة وغصب عنه حس أنه لازم يحكي ليها عن ظروفه يمكن ده يخفف ولو جزء من معاناتها ،اخد نفس طويل وقال بوجع ،بصي انا مشعارف ارد عليكي بايه ،بس كل اللي عايزك تفهميه اني روحي فيكي واوعدك باني هنسيكي كل وجع شفتيه ،هعوضك على اد ما اقدر ،كمل بغيرة معرفش يداريها ،احم بس ياريت سيرة كريم متتفتحش تاني ،انا والله مشوحش بصلها بعشق ،انا عايز اكون انا اللي جواكي ،لسانك مينطقش غير اسمي ،روحك وقلبك وكل ما فيكي يكونو ليا وملكي انا ،كنزي بتفهم حاضر ده حقك وزي ما قلتلك انت بقيت كل حياتي ونفسي اكمل عمري معاك وفي بيتك ،كملت بفضول يلا افتح صندوق ذكرياتك خلينا نقفل اليوم النكد ده بقى ونبدء على نضيف ،عمر بدء يحكيلها كل حاجه من وهو صغير لحد لحظتهم دي ،كانت بتسمعه بذهول وصمت تام ودموعها نازلة بتأثر مكانتش عارفه تقوله ايه ،حست في الوقت ده أن كل اللي مرت بيه كان نقطة في بحر الامه ومعاناته ،اما هو فحاول يهدى ويفكر نفسه أنه خلاص عدى من كل ده وقلبه اهو دق من جديد وروحه اتعافت من كل جراحها ،اخد نفس وقال بصوت حزين انا ات-وجعت من ناس كتير ،اتنهد بتعب ،شفت كتير في حياتي ،وكل اللي هطلبه منك سكت شويا وهمس برجاء عايزك تداويني وانا هحطك في عيني وهمحي كل جراحك ،وعمري ابدا ما هحملك ذنب اي حد قابلك ولا هسمح لنفسي اني ازعلك حتى ،ابتسم وبصلها بعشق عارفة ليه عشان انتي غيرهم وانا متاكد وده ببساطة لانك اتظلمتي زيي حتى لو اختلفت الاسباب بس في النهاية احنا قلوبنا اتقهرت وبمنتهى القسوة ،كنزي قاطعته بدموع اوعدك اني اكون ليك البنت اللي تستاهلك ،انا كمان عايزة انسى كل اللي فات بيك ومعاك ،احنا انسب عوض لبعض ،وده لأننا متشابهين في كل شيء ، عمر بابتسامة وتفاؤل اكيد هنقوى وهنتخطى كل اللي اتعرضنا ليه ،عيونه لمعت ببريق عشقها وكمل بفرحة ،ربنا له حكمة اننا نشوف بعض دلوقتي تحديدا عشان نكمل باقي عمرنا سوى ،ضحكت من بين دموعها وقالت بعشق ربنا بيحبني لانك كنت مكافءتي بعد كل الأذى اللي شفته ،قام وقف جنبها وقال بارتياح ،حبيبتي انتي احلى حاجه حصلت لي في حياتي وبوجودك الدنيا ضحكتلي من جديد .
،همست بسعادة ربنا يخلينا لبعض ،.
انا خلاص هكمل تجهيز البيت عشان نعمل اجمل فرح ،عمر بضحك احلى كوكو والله ،وقومي بقى عشان ماما مستنياكي على الغدا ،كنزي بحب دي قلبي وهروح بس عشانها ،ضحكو وهزرو ومر الوقت وهي بتحضر كل حاجه بروح مختلفه وبقلب نفسه يدوق طعم الهنا .
وفي خلال شهر فعلا اتجوزو ،والمرة دي كانت مختلفه ،هي حاولت تنسى الذكرى المشؤومة لليوم ده ،وهو خرج من دماغه اي حاجه ممكن تزعله في وقت زي ده ،كان فرح رائع بمعنى الكلمة ،الاتنين عشقهم لبعض فاض من عيونهم ،قلوبهم كانت مليانة بالفرحة الحقيقية ،وخلص الفرح اللي خطف قلوب الناس من جماله .
،وبمرور الوقت اتعلقو ببعض بجنون ،عشقهم كان بيزيد كل لحظة ،نسيو كل الوجع وبدلوه بالسعادة والفرح ،قضو احلى شهر عسل في بلاد كتير ،كنزي عشقت أمه وقررت انها مشهتسيبها تقعد لوحدها تاني ،ونجلاء اعتبرتها زي نور وفريدة ،حبت لمتهم وترابطهم ،وبقت بتستنى كل تجمع ليهم بفارغ الصبر ،كبرت الشغل مع عمر وبقى بيعتمد عليها في كل حاجه ،قربت من البنات وهما بحبهم وبنقاء قلوبهم خلوها ترجع لشغفها للخروج والسفر والشوبينج من تاني ،كانو خير عوض عن اختها اللي القدر حرمها منها ،.،ولان ربنا كريم وعشان العوض بجد جه لعمر بمجرد ما شاف كنزه ودخلت حياته ومسحت على قلبه وملته بالفرح ،.
كنزي عرفت انها حامل بسرعه جدا وفي خلال ٩ شهور من جوازهم ،ربنا رزقهم بطفلين توام سموهم اسيل وياسين ،الكل كان مذهول وعمر سجد في الأرض من كتر فرحته ، معقول ربنا عوض صبره ونصره وجبر بخاطره ،ادام الناس بعد كل السنين دي!.
،قرر يعمل العقيقة والسبوع في البلد وعزم كل الناس اللي طارو عشانه من الفرح .
،كنزي عشان فاهمة كل حاجه كانت متضايقة جدا خاصة لما جم الناس يباركوله ،وفضلو يقولو ،ربنا كرمك وعوض صبرك خير عشان رقية وبنتها اتهموك بالباطل وخاضوا في سيرتك وسط الناس وطلعوك مبتخلفش وشوهو سمعتك بالكذب .
،عمر طمنها أن كل ده فات وخلص وهو مبيفتكرش منه اي حاجه ،ربنا عوضه بيها وبولاده ومبقاش عايز اي حاجه تاني
#يتبع بقلمي # دينا رأفت
*****!🥰
 الفصل الخامس بق…){kind=link}
تعليقات
إرسال تعليق