رواية جماره الجزء الثاني ( مليكة بكر) الفصل العاشر10بقلم ريناد رينووو

رواية جماره الجزء الثاني ( مليكة بكر) الفصل العاشر10بقلم ريناد رينووو

جماره الجزء الثاني من البارت العاشر

خلص حكيم وكل وطلع هو وبكر علي المصانع والمعامل يشق عليهم ويسلم علي العمال القدام اللي بقاله سنين مشافهمش من ساعة ماتميم اتولي كل حاجه وهو بطل يندلي القاهره..

اما تمره ومليكه فبعد مامشي بكر وحكيم ابتدو يشيلو السفره ويغسلو الاطباق وبعد ماروقو الموطبخ عملولهم اتنين نسكافيه وخدو طبق مكسرات ودخلو اوضة تمره عشان تمره تشبع فضولها من ناحية مليكه وبكر وتعرف ايه اللي حصل فالفتره اللي فاتت بالظبط بينهم..

مليكه ابتدت تحكي لتمره اللي ملامحها مع كل حاجه تقولها مليكه تتبدل مابين الذهول، والاستغراب، للشفقه، للقهر مره عليها من عمايل اخوها ومره علي اخوها من عمايل مليكه وكلامها معاه، وهي عارفه ان بكر روحه فمناخيره ومعيتحملش نص كلمه زايده واتعجبت كيف اتحمل كل دا من مليكه وسابها حيه ترزق لحد دلوك!! ودلوك بس عرفت سر حديد الشبابيك واحتارت ياتري هو عمل اكده خوف عليها ولا خوف من جنانها وتهورها.

اما تمره فهي كمان ابتدت تحكي لمليكه كل اللي حصل معاها ورفضها لراغب اللي استغبتها عليه مليكه،

وخصوصا انها شافته وشافت كد ايه هو انسان مؤدب ومحترم وعينه معتترفعش من الارض، وواضح عليه الطيبه ناهيك عن شكله ووسامته اللي تخطف القلب قبل العين ويمكن يقارب علي بكر وتميم فالجمال كمان..

تمره : قولتلك صليت استخاره واستخرت ربنا وهو اداني اشاره اني ارفض وقلبي اتقبض ومقدرش ابدا طول مااستخرت اخالف اشارة ربنا ليا يامليكه، دا حتي لو كانت روحي فيه ههمله افهميني..

مليكه :ونعم بالله، بعد الاستخاره محدش يقدر يتكلم عاد خلاص الامر اتحسم من فوق.

تمره : عليكي نوووور، ودلوك جهزيلي حالك عشان نندلو المول بس يعاود بكر عشان هشتريلي ادنائين جداد للكليه وانتي قلي بكر انه هيشتريلك كام طقم لما كلمني فالتليفون..

مليكه : له معاوزاش معاي هدوم جديده كتير ملبستش حاجه منهم.

تمره : بكر عيقول كلهم بلاطين مينفعوش..

مليكه بضحكه : يابوي بلاطين ايه دول طقمين بنطلونات اشتريتهم مخصوص قبل مااتجوز عشان افرس بيهم اخوكي وافهمه انه وهو عيلهو اهنه وسايبني كنت علهو فالصعيد علي حسه وممرمته كرامته فالتراب.

تمره بضحكه مماثله : الله يعين قلب اخوي عليكي يابت عواد ياملعبه يافاجر علي قول جدي بشندي.. طب اقولك قومي فرجيني اللي جايباه تروحي بيه الكليه عشان اقولك ينفع ولا مينفعش.

مليكه قامت وابتدت تطلع الهدوم اللي فالدولاب وتفرج عليهم تمره اللي اعجبت بكل طقم فيهم وشافت فيهم زوق مليكه الرفيع وتناسق الالوان مع احتفاظها بالحشمه واتعجبت ان وحده مطلعتش من الصعيد كيف يكون زوقها بالمستوي ديه لكن السبب ابطل العجب.. (الانترنت)

تمره مسكت بنطلون جينز ابيض من الاتنين اللي جايباهم مليكه وراحت علي دولابها وطلعت منه بضي احمر ديق ربع كم مع فتحة صدر واسعه وادتهم لمليكه وهي مبتسمه بخبث

قيسي دول ياملوكه عايزه اشوف الطقم عالعود هيكون عامل كيف

مليكه مسكت الفانله ورفعتها باستغراب : ايه ديه ياتمره عتعملي بيه ايه ديه انتي عتنحرفي بينك وبين نفسك ياك؟!

تمره قعدت علي السرير واتسندت علي كوعها وابتسمت وبصت بعيد وهي عترد عليها : اني كل مااشوف حاجة مشخلعه وتعجبني عشتريها واشيلها عشان لما اتجوز البسها وازغلل عنين جوزي بيها وماحرمهوش من حاجه،

طب داني جايبه حاجات تحل من حبل المشنقه وحتي لما اشوف حاجه لابساها وحده من صاحباتي تعجبني كنت عخليها تشتريلي اختها

مليكه : واه ياتمره واه دانتي طلعتي مش هينه!

تمره : امال ايه فاكراني هقعدله بالنقاب ياك ولا بطرحتي كيف مانتي عامله ومداريه الشعر الغجري اللي ربنا عاطيهولك يرقق قلب الجاحد من جماله..

مليكه وهي عتقلع طرحتها وتخلي شعرها ينزل علي كتافها :

ايوه ماديه لو كنت متجوزه صوح ولا جوزي عيأثر فيه الجمال مش صنم من اصنام قريش عايز اللي ينحنيله طاعه وهو لا يسمع ولا يري!

تمره : فيش راجل مهما كانت قوته وصبره هيصمد قدام الجمال للابد يامليكه، ايوه صوح قوة الصبر والصمود عتتفاوت لكن فالاخر لابد من دولة الصمود ان تسقط امام الجمال.. لكن لو اتوظف بالطريقه الصحيحه..

مليكه : اني خابره زين ان جمال الوحده ياتمره لازمن تخليه جايزه يحصل عليها اللي يجتاز مضمار عقلها وقلبها وتشوف فعينه الاصرار علي انه يفوز بيه وصدقيني الجايزه اللي الواحد عيكسبها بعد التعب والصبر وكتير من المحاولات عيعملها رف مخصوص فبيته وتقعد باقي عمره قدام عنيه وكل مايبصلها يحس بالفخر وانها اكبر انجازاته ،،

تمره : ايوه بس خدي بالك الوحده برضك متخليش جمالها سلاح تستعمله فاذلال الراجل واخضاعه ليها، لانه حتي لو خضع مره عشان يطولها اول مايشبع منها هيرميها ويدور عاللي تحفظله رجولته ويحس قدامها بكبريائه محفوظ وكرامته متصانه حتي لو كانت اقل فالجمال.. فهمتي حاجه؟

مليكه : عحاول

تمره : واشك انك هتقدري.. اني واي، روحي غيري قوام وتعالي فرجيني قبل ماابوي وبكر ياجو عايزه اشوفك تنفعي كيف بنات بحري ولا له.. واني كمان هلبس طقم من اللي مشترياهم واوريلك تيما في حلة التمدن..

مليكه ضحكت وابتدت تفك زراير جلابيتها وخلاص هتقلعها لكن تمره زعقت فيها : هتعملي ايه بوه انتي؟

مليكه : ايه هغير خلجاتي امال من الصبح عتقولي ايه؟

تمره : قدامي!

مليكه : ايوه فيها ايه مش بنات زي بعض ولا ايه؟

تمره : يبت استحي ياحزينه داني عستحي اغير قدام امي!

مليكه بضحكه : اني معستحيش مستحيه انتي دوري وشك متفلقينيش.. قالتها ورفعت جلابيتها قلعتها وفعلا كانت لابسه تحتها بجامه برموده والتوب بتاعها وابتدت تلبس البنطلون وفوق منه الفانله وبعد ما خلصت بصت للمرايه وابتدت ترتب شعرها،

وكل دا تحت انظار مليكه المذهوله من اللي واعياه قدامها.. مليكه لفت لتمره وابتدت تاخد اوضاع عارضات الازياء وهي عتسألها :

هاه ايه رأيك مع اني مش محتاجه اسمعها باين علي وشك ههههه

تمره وهي عترمش بعد ماجابت مليكه من فوق لتحت بعنيها قصتها قص : ياويل قلبك يابكر ياخوي لو شفت اللي اني شايفاه ديه..

مليكه بصت بعيد وابتسمت : هيتأثر يعني؟

تمره : مليون فالميه هيتأثر.. لكنه يبين تأثره وتلاقي خشمه دلدل وعنيه طلعت قلوب دا اللي مش هتشوفيه من بكر لو وقفتي علي رموش عنيكي ههههههههه

اقرا ايضارواية شظايا قلوب محترقة الفصل الواحد والاربعون 41بقلم سيلا وليد

اقرا ايضارواية نار غيرتي وانكسار قلبي الفصل السادس والسابع والثامن للكاتبة اميرة الشربيني

اقرا ايضارواية نار غيرتي وانكسار قلبي الفصل الأول والثاني والثالث والرابع والخامس للكاتبة اميرة الشربيني

اقرا ايضارواية مابين الضلوع الفصل التاسع 9 بقلم امانى سيد

مليكه بصت لتمره بغيظ لكنها متكلمتش وتمره مسكت تليفونها ووجهته علي مليكه :

خدي وضع التصوير يلا هنخلد اللحظه وان تو ثري..

ومليكه ابتدت تغير اوضاعها وتضحك وتمره تصورها وبعدها تمره قامت غيرت ولبست هي كمان زيها وطلعت التانيه برنسيسه بالعيون الزرقه والشعر الطويل الاحمر المايل للنحاسي مش فطول شعر مليكه لكنه طويل لحد ما والجسم الممشوق المتناسق وخدت مليكه وضع التصوير وتمره ابتدت تصورها فمختلف الاوضاع وفالاخر اتصورو مع بعض كام صوره سيلفي وبعد ماقضوا وقت ممتع بين التصوير والضحك والهزار قامو قلعو اللي لابسينه وكل وحده لمت شعرها ورجعو لهيئتهم الاولى

بكر وحكيم رجعو بعد جولتهم علي المصانع وكانت الدنيا ليل وبكر جاب معاه بيتزا عشان عارف ان تمره بتحبها وانها ليها فتره فالبلد ماكلتهاش،

وكان هيجيب لابوه لكن ابوه رفض عشان مش بياكل حاجه من بره ابدا طالما فيه اكل بيتي متاح..

دخل بكر وتمره اول ماشافت البيتزا راحت عليه بفرحه وخطفت منه علبتين وجريت علي اوضتها وقفلت الباب عليها وابتدت فافتراسهم بنهم..

بكر : يا مفجوعه هتاكلي اتنين لحالك دول حجم كبير!

تمره من جوا الاوضه : ولو ٣ بحجم اكبر من دول هقوم بيهم برضك..

بكر ابتسم وبص لمليكه وراح ناحيتها ومدلها العلبه اللي فأيده : خدي بتاعتك

مليكه : لا دي بتاعتك انت وبعدين اني معاوزاش شبعانه

بكر : لا مش بتاعتي انا هتعشي مع ابوي من اللي هياكله واني اصلا جايب لتمره ٢ عارفها مفجوعه مهتكفيهاش وحده.

مليكه رفعت عنيها عليه وبرضو ممدتش ايدها الا لما قالها حكيم : مدي يدك يامليكه للي واقف وماددلك يده عيب عليكي متناهديش كتير.

مليكه خدت العلبه ودخلتها الموطبخ وابتدت تحضر فعشا لحكيم وبكر ونسيت امر البيتزا خالص..

طلعت الاكل علي السفره والاتنين قامو يتعشو ومليكه دخلت الموطبخ تعملهم رز بلبن عشان عارفه ان الشيخ حكيم عيحبه كانو مره عاملينه فبيت ابوها ولما قدمتله منه عجبه وقالها انه عيحب الرز بلبن وان جماره لازمن متخليش التلاجه تخلي منيه وعياكله فأي وكت بين كل وجبه والتانيه..

خلصت الرز وغرفته فاطباق وزينته بمكسرات بس بعد ماطحنتها عالخلاط حرصا علي سنان الشيخ حكيم وبعدها سابتهم علي رخامة المطبخ وطلعت تدخل فالوكل اللي عالسفره بعد ما حكيم وبكر شبعو وقامو..

اخيرا بعد ماقربت تخلص لم السفره طلعت تمره من اوضتها ماسكه علبتين البيتزا فاضيين وراحت بيهم علي سلة الزباله رمتهم ورجعت شافت مليكه عتشيل فاخر طبقين علي السفره قالتلها بضحكه :

يديكي العافيه يامرت اخوي كنتي فين من زمان دالواحد هيأنتخ على حسك انتخه معتبره.

حكيم : التقاله عفشه ياتمره يدك بيدها فكل حاجه انتي روح وهي روح زيك متتحامليش.

تمره : مش تحامل يابوي بس هي دلوك صاحبة البيت وهي المسئوله عنه بما انها مرت اخوي يعني اني عمتها والعمه خدمتها واجبه.

مش اكده يابت يامرت اخوي ولا ايه.. قالتها وراحت علي مليكه حاوطت رقابتها بيدها ودخلت معاها للموطبخ ومليكه همست بصوت مسموع لتمره : يارب صبرني علي مابليتني دا طلعت البت واخوها معجونين بمية الغتاته عجن.

تمره ضحكت وهي عتشدها تميلها عليها : يبت عيب العمه ميغلطوش فيها ياقزينه..

مليكه مردتش ودخلو التنين الموطبخ وبمجرد ماتمره شافت الرز عالرخامه سابت مليكه َجريت ناحيته :

واه وكمان رز دانتي تَجَليتي النهارده تجلي يابت يامليكه..

مليكه بابتسامه : اصلي عرفت ان ابوي حكيم عيحبه قوي عملتهوله

تمره : هو ابوكي بس اللي عيحبه داني كمان عموت عليه وبكر عيعشق حاجه اسمها رز بلبن بس من ايد امي بس بصراحه.. معرفش هيكون رد فعله ايه عاللي انتي عاملاه.. هاتي معلقه من الدرج عندك هاتي..

مليكه باستغراب : ياباي.. يبت بعد البيتزا عاد فيه فبطنك موطرح لرز!!

تمره : لافيني انتي بس وليكيش صالح اني بطني عتتوسع وتنبسط وتتمدد قدام الوكل اللي بحبه متشغليش بالك..

مليكه ناولتها معلقه وتمره ابتدت تاكل ومع اول معلقه همست : امممم كيف رز امي ياقرده، دا بكر هيحبك بين عنيكي النهارده بس يدوقه هههههه

مليكه ابتسمت وابتدت تغسل فالصحون وتمره خلصت طبق الرز وابتدت تشوف هي كمان حال الموطبخ مع مليكه مسحت البوتاجاز ومسحت التلاجه والرخامه بعد مانقلت الرز للتلاجه وبعد ماخلصو مسحو الارضيه

وخدت تمره الرز وطلعت بيه وهملت مليكه تنشف فالارضيه وبعدها ترص كل حاجه فموطرحها تاني

خلصت مليكه المطبخ ونشفت اديها وراحت علي علبة البيتزا فتحتها واخدت منها مثلث وقطمت منها قطمه وهمست بصوت مسموع : ياخساره بردت عتوبقي حلوه وهي سخنه..

خلصت جملتها وسمعت صوت من وراها : ومكلتيهاش وهي سخنه ليه اصلا البيتزا مبتتاكلش بارده

مليكه ردت من غير ماتلتفت : نسيتها وانا بعمل الاكل ليك ولابوي عشان تتعشو

بكر : متشكرين لتضحيتك المغفلقه.. واتقدم وحط الصحون الفاضيه فالحوض وراح علي التلاجه فتحها واخد طبق رز تاني وخرج ومليكه ابتسمت وكملت اكل البيتزا من سكات

طلعت مليكه بعد ماخلصت ملقتش غير بكر بس فالصاله كان مشغل لابتوب قدامه على عمليه جراحيه وقاعد يتفرج بتركيز شديد،

قربت بخطوات بطيئه ووقفت ورا الكرسي اللي قاعد عليه وبصت معاه فاللاب توب وابتدت تشوف اللي الدكاتره بيعملوه وشويه وسمعت صوت بكر اللي كان شايف انعكاسها فالشاشه قدامه من اول ماوقفت :

متعبتيش من الوقفه لفي واترزعي لو عايزه تتفرجي متقفيش فوق دماغي كيف العمل الردي اكده

مليكه وهي بتلف من ورا الكرسي لكنها مراحتش تقعد جمبه اتوجهت علي اوضة تمره :معايزاش اقعد اصلا لما يجي وكت الحاجات دي هبقي اتعلمها لحالي

بكر بسخريه :معاشان عامله نفسك هتطلعي جراحه هتتعلميها، انتي اخرك اطفال يمه افتح بوقك اقفل بوقك وتقيسي حراره وبس اكده

مليكه : والله الحاجه دي مش بكلامك الحاجه دي اني اللي احددها وعلي حسب التخصص اللي هلاقي نفسي فيه،

وحتي لو اطفال مالهم دكاترة الاطفال عينقذو ويعالجو ارواح بريئه متعرفش تتكلم ولا تقول دي واجعاني ولا دي بتألمني..

مش لازمن اكون جراحه عشان الناس تقول الجراحه راحت الجراحه جات، بس الظاهر ان كل حاجه حداك ليها حسابات تانيه طبقيه حتي فتخصصات الطب

خلصت جملتها ودخلت حدا تمره وقفلت الباب وراها وهملت بكر باصصلها ومستغرب من قدرتها لتحويل كل كلامه لقضايا قوميه وتقف بعد اتهامه تلقي عليه محاضره طويله عريضه تخليه يصدق بعدها انه مذنب فعلا...

وللحكاية بقية....

بقلم صاحبة السعادة / ريناد يوسف

تكملة الرواية من هناااااااا