روايه حارة البطل الفصل الاول والثاني والثالث والرابع والخامس للكاتبة جنات حصريه
روايه حارة البطل الفصل الاول والثاني والثالث والرابع والخامس للكاتبة جنات حصريه
»»الشخصيات««
شخصيات رواياتنا هينقسمو لقسمين
قسم هيكونو فى القاهرة
والقسم التانى فى احدى الحارات الشعبيه الموجوده فى اسكندريه
ـــــــــــــــــــــ★ــــــــــــــــــــــ
الشخصيات اللى عايشه فى القاهرة فى احدى المناطق الراقيه جداااا
عيله الصاوى
جمال الصاوى الابن الاكبر لعيله الصاوى
طيب جدا وبيحب الخير لكل اللى حوليه
عنده شركه خاصه بتصنيع الادويه ومستلزمات الطبيه وعنده مستشفى (مستشفى النور)
متجوز مريم بنت عمته وكانت حب حياته اللى بيعشقها وعاشو سواا احلى حياه مع بناتهم التؤام رهف ورغد وكانت عيله مليانه حب ودفى وماتو سوا فى حادث عربيه وهما راجعين من العمرة
ـــــــــــــــــــــ★ــــــــــــــــــــــ
التؤام بنات جمال ومريم (رهف ورغد) اللى عكس بعض تماما فى كل حاجه فى الشكل والطبع والصفات
رهف اللى مافيش فى طيبه قلبها وحنيتها ورغد القويه اللى مش بتسكت عن الحق
← رهف
ـ ٢٧ سنه
ـ خريجه كليه فنون جميله بتعشق الفن ورسم اللوحات
ـ هاديه جداا وجميله وحنينه فوق الوصف وخجوله جداا
ـ والدها عملها اوضه كبيرة جدا فى جنينه الڤيلا وكانت هى المرسم بتاعها اللى مليان لوح
ـ كانت متعلقه جداا بوالدتها اللى موتها اثر جدا فيها واللى عوضها وجود رغد اللى روحها متعلقه فيها وتقريبا مش بيبعدو عن بعض ويمكن الحاجه الوحيده اللى فرقتهم عن بعض هى دراستها لان كل واحده فيهم دخلت المجال اللى بتحبه
***************
← رغد
ـ ٢٧ سنه
ـ خريجه كليه طب قسم جراحه وكانت متفوقه جدا فى دراستها وكانت بتدرب فى مستشفيات كبيرة وهى لسه بتدرس على ايدى دكاترة كبار فى مجال الجراحه
ـ اسلمت ادارة مستشفى النور بتاعه والدها وقررت انها توظف معاها الشباب والبنات اللى لسه متخرجين من كليه الطب من جميع الاقسام وشاطرة جدا فى شغلها
ـ قويه جدااا ومحدش بيقدر يقف فى وشها ومش بتسكت عن الحق
ـ كانت متعلقه جدا بوالدها اللى كان صديقها ومش بتخبي عنه اى حاجه حتى هو كمان كان دايما بتكلم معاها فى تفاصيل يومه
ـــــــــــــــــــــ★ــــــــــــــــــــــ
فاروق الصاوى
الاخ الاصغر لجمال
ـ عكس شخصيه جمال تماماا شخصيته جشعه اهم حاجه فى حياته انه يجمع فلوس باى طريقه حتى لو عن طريق الخيانه والسرقه
ـ كان عنده شركه صغيرة لاستيراد والتصدير وافلست ودخل شريك مع جمال فى شركته بنسبه قليله جدا
ـ جمال ماكنش بيثق فيه لانه عارف عشقه وحبه للفلوس حتى لو على حساب عيلته كلها
ـ كان اسعد شخص لما عرف بوفاه اخوه ومراته فى حادث عربيه وهما راجعين من العمرة
ـ متجوز شهيرة عارفين المثل اللى بيقول الطيور على اشكالها تقع اهو ده المثل اللى بينطبق عليهم لان شهيرة بتمتلك نفس صفات جوزها وابنها كمان نفس صفاتهم
(عيله كلها واطيه من الاخر يبيعو بعض عشان خاطر جنيه)
*************
← مازن
ابن فاروق وشهيرة الوحيد
٣٠ سنه
شاب فاشل فى كل مراحل حياته وفى دراسته كان بيدرس فى كليه تجارة لو ماكنش والده بيدفعله فلوس عمره ماكان هيعدى ويخلص كليته
حتى فى شغله فاشل واوقات بياخد قرارات بدون تفكير وبيخسر الشركه ملايين وهو السبب الرئيسي فى افلاس شركه والده
بيسهر كل يوم مع شلته الفاشله وكل يوم مع بنت شكل
بيعشق رغد بنت عمه بس هى مش بطيق تشوف وشه اصلا وده معصبه ومضايقه جدااا
وامنيه والدته انه يتجوز رغد عشان فلوسهم
✍️الكاتبه جنات
ـــــــــــــــــــــ★ــــــــــــــــــــــ
مؤمن
ـ ابن خاله رغد ورهف واخوهم فى الرضاعه
والده رهف ورغد لما ولدتهم كانت تعبانه جداا ومقدرتش ترضعهم قامت خالتهم منى والده مؤمن رضعتهم لانها وقتها كانت والده بنت بس ربنا مارادش انها تعيش
وهو صديق البنات المقرب جدااا
ـ ٢٩ سنه
ـ درس ادارة اعمال
ـ كان بيشتغل مع جمال فى الشركه وناجح جداا ومتفوق فى شغله وجمال بيثق فيه جداا وبياخد رايه فى كل القرارات اللى بتخص الشغل
ـ اتجوز من تقى بنت عمته وده كان طلب من والده لان عمته اتوفت وسابت تقى وحيده وكانت وصيتها انها تتجوز مؤمن
اتجوزها وعاشو حياه هاديه يمكن ماكنش بيحبها وانه اتجوزها عشان والده بس كان بيحترمها جدا وبيقدرها وهى كمان كانت بتحبه جداا وعرفت انها حامل وكانت فرحانه بس للاسف عرفت ان قلبها ضعيف ومش لازم تكمل الحمل بس هى رفضت حتى انها تنزل البيبي ومعرفتش اى حد بتعبها وكملت الحمل وكانت تعبانه جداا واتوفت وهى بتولد ومؤمن كان حزين جدا على فراقها بس جابتله بنوته نسخه عنها (لارا) ودى اللى هو عايش عشانها عندها ٦ سنين
✍️الكاتبه جنات
&&&&&&&&&&&&&&&&
نروح بقي للقسم التانى من شخصيات روايه اللى عايشين فى حارة البطل
﴿ عيله البطل ﴾
←الحاج محمود كبير عيله البطل
شخصيه جاده جداا والكل بيخاف منه وبيعمله الف حساب وكمان الكل بيقدروه وبيحترموه لانه شخص حقانى جداا وميرضاش بالظلم
عنده ورشه نجارة كبيرة فى الحارة لتصنيع الموبليا والاثاث وعنده معرضين للموبليا فى اسكندريه واحده منهم فى نفس البيت اللى فيه الورشه يعنى جوا الحارة والتانى فى احدى مناطق اسكندريه
←الحاجه هدى زوجه الحاج محمود
ست مصريه على حق بتحب جوزها واولادها وعيلتها جداا
طيبه جداا وبتحب اهل حارتها والكل بيحترمها جداا لانها بتحب الكل وبتساعد المحتاج
عندها ولد وبنت
←ابنها الكبير حسن
٣٢ سنه
نفس شخصيه والده
هو اللى مسؤل عن ورش والده وكلمته مسموعه فى الحارة كلها
مكلمش دراسته بس راسه توزن بلد بحالها
بيحب الموتوسيكلات جدااا وممنوع حد يقرب من الموتوسيكل بتاعه
ـــــــــــــــــــــ★ــــــــــــــــــــــ
←بنتها الصغيرة حنين
٢٥ سنه
شخصيتها مرحه هى اللى منورة البيت والكل بيحبها وبيدللها وبالاخص الحاج محمود لانها نسخه عن والدتها
حسن بيعتبرها بنته مش اخته
درست فى كليه تربيه وخلصت دراستها وبتعطى دروس للاطفال اللى فى الحارة
ـــــــــــــــــــــ★ــــــــــــــــــــــ
حمزه
ابن عم حسن وصديقه الوحيد وزى الاخوات
٣٣ سنه
والده والدته متوفين وهو عايش فى شقه والده اللى فى بيت عيله البطل
واكله وشربه مع عيله عمه وهدى بتعتبره ابنها زى حسن لانها هى اللى ربيته بعد وفاه والدته وهو كان عنده ١٠ سنين
بيشتغل مع حسن فى ورش عمه
✍️الكاتبه جنات
تفاعل كتير ي قمرات يلااااا♥️♥️
#روايه_حارة_البطل
#الكاتبة_جنات
»»الفصل الاول ««
تبدا احداث روايتنا فى احدى المناطق الراقيه جدا فى القاهرة وتحديداا فى ڤيلا جمال الصاوى
الڤيلا اللى كانت مليان ستات وكلهم لابسين اسود وجاين يقدمو واجب العزاء فى وفاه جمال الصاوى وزوجته مريم اللى اتوفو وهما راجعين من العمرة فى حادث عربيه
وكان بناتهم رهف ورغد قاعدين جمب بعض ودموع نازله زى الشلال على خدهم مش مستوعبين اللى حصل كانو فى انتظار والدهم ووالدتهم بفرحه كبيرة وفجاه جالهم خبر ان عربيتهم اتقلبت وانهم اتنقلو المستشفى وحالتهم كانت خطيرة وللاسف اتوفو اول ما وصلو المستشفى .
والكل بيقرب منهم عشان يواسيهم وعيونهم عليهم فى منهم حزين على وفاه جمال ومريم اللى كانو بيتميزو بطيبه قلبهم وفى منهم اللى فرحان بموتهم
•• عوده من الفلاش بااااك ••
رهف فاقت من زكرياتها على صوت فتح باب اوضتها ودخلت رغد وقعدت جمبها:مالك يارهف؟
رهف:مش مصدقه ان عدى سنه بسرعه دى يارغد .... السنه دى عدت علينا وهما مش معانا بس وحشونى اوى يارغد.
رغد حضنتها:والله وحشونى اكتر يارهف بس اللى انا متاكده منه انهم فى مكان احسن من هنا مليون مرة وكفايه انهم سوا.
رهف:بس احنا مش معاهم ... احنا هنا لوحدنا يارغد.
رغد:بت بقولك ايه احنا هنقلبها غم من صباحيه ربنا كدا يلا قومى غيرى عشان هنروح نزورهم بس واحنا بنضحك زى مااتعودو علينا يارهف.
رهف:حاضر.
رهف ورغد غيرو وراحو زارو والدهم ووالدتهم فى المقابر
رهف اللى كانت منهارة ورغد بتحاول تواسيها وتكتم حزنها جواها عشان خاطر اختها
وقضو وقت كبير قدام المقابر واتكلمو معاهم كتير وبعدها رجعو على الڤيلا تانى .
قابلتهم دادا سلمى اللى عايشه معاهم فى الڤيلا من وقت ولادتهم تقريبااا وحتى بعد وفاه جمال ومريم فضلت معاهم
سلمى:جيتو ياحبايبى يلا اطلعو غيرو اكون جهزت الاكل.
رهف بحزن:ماليش نفس يادادا.
سلمى قربت عليها وخدتها فى حضنها ورهف عيطت:ادعيلهم ياحبيبه قلبي وبلاش توجعى قلبي كدا .... انتى كل مرة بتروحى تزوريهم تفضلى تعيطى كدا.
رغد:اهدى يارهف بقي واطلعى غيرى وانزلى يلا عشان ناكل سوا وكمان مؤمن ولارا جايين.
رهف:حاضر.
رهف طلعت وسلمى بصت لرغد وشايفه عينيها اللى بتلمع بالدموع:ماتكتميش جواكى يابنتى!
رغد:متخافيش عليا ياسوسو انا ميت فل وعشرة هطلع اغير على مايجى مؤمن ولارا.
سلمى:مش هتروحى المستشفى؟
رغد:لا هفضل هنا مع رهف النهارده.
سلمى:احسن بردو ياحبيبتى.
رغد طلعت وماصدقت انها دخلت اوضتها ودخلت الحمام وفتحت الميا ووقفت تحت الميا بهدومها وسمحت لدموعها تنزل وصوت عياطها كان عالى بس بتحاول تكتمه عشان محدش يسمعها لانها مش بتحب تبان ضعيفه قدام اى حد وكمان بتحاول تكون قويه عشان خاطر اختها رهف اللى متاثرة بوفاه ابوها وامها .
بعد شويا البنات نزلو وبصو لبعض ورهف قربت من رغد وحضنتها بقوة:على فكرة ممكن تعيطى فى حضنى احسن ماتعيطى لوحدك.
رغد:انا كويسه يارهف.
رهف بعدت عنها وبصتلها:يارب دايما تبقي كويسه لان انا بستقوى بيكى يارغد.
فى الوقت ده دخل مؤمن ولارا اللى جرت على رغد:دودو.
رغد شالتها:روح دودو ياناس اللى وحشانى موت موت.
لارا:وانتى كمان وحشتينى اوى ... انا قولت لبابي وهفضل معاكى هنا.
رغد:ده احلى خبر ده ولا ايه.
لارا نزلت وحضنت رهف:وحشتينى يارهوفه.
رهف باستها من خدها:وانتى وحشتينى يالولى اوى.
مؤمن شايف حالتهم:روحتو المقابر صح؟
رغد:روحنا زورناهم الصبح وجينا.
مؤمن:انتو كويسين يعنى؟
رهف:الحمدلله يامؤمن.
سلمى:ازيك يامؤمن يابنى؟
مؤمن:بخير ياسوسو.
لارا جرت على سلمى اللى حضنتها بحب
سلمى:يلا السفره جاهزه ياولاد.
الكل اتجمعو حولين السفره واكلو سوا وبعد ماخلصو خرجو يقعدو فى الجنينه ولارا كانت بتتمرجح على مرجيحه فى الجنينه
مؤمن:مش ناوين تغيرو الاسود ده بقي؟
البنات بصو لبعض
مؤمن:خالتو وعمى جمال اكيد مش مبسوطين بحالتكو دى وبعدين الحزن مش باللبس ولا ايه.
رغد:صح ... بس سبنا يومين كدا وهنغيره.
مؤمن:لما نشوف .... صح فاروق جالى النهارده تانى.
رغد بضيق:عشان الوصيه بردو؟
مؤمن:ايوا وكمان مجدى المحامى كلمنى.
رغد:مش فاهمه مستعجلين على ايه دول؟!
رهف:التأجيل مالوش اى لازمه يارغد النهارده او بكرة او بعد سنه الوصيه لازم تتفتح.
مؤمن:صح ... وبعدين ياستى عشان عمك فاروق يرتاح وتخلصى من زنه.
رغد:اللى انا متاكده منه انه الوحيد اللى مش هيرتاح لما الوصيه تتفتح.
رهف:هو انتى عارفه ايه اللى فى وصيه بابا يارغد؟!
مؤمن:هو عمو جمال اتكلم معاكى بخصوص الوصيه؟!
رغد:لا متكلمش بس اكيد عمك وابنه مش هيكون ليهم نصيب فى اى حاجه من تعب بابا.
مؤمن:لو الموضوع كدا بجد عمك مش هيسكت.
رغد:يورينى هيعمل ايه بقي.
مؤمن:طب ايه اقوله نجتمع امته ونكلم مجدى المحامى؟
رغد:بكرة باذن الله.
مؤمن:تمام هروح انا بقي اخلص شويا شغل وهكلمه واكلم مجدى.
رغد:تمام.
مؤمن نادى بصوت عالى:لولى.
لارا نزلت من على المرجيحه وجرت على حضن مؤمن اللى باسها بحب:همشي عشان ورايا شغل يالولى وخليكى مؤدبه وبلاش تتعبي رغد ورهف.
لارا:حاضر يابابي.
مؤمن باسها من خدها وركب عربيته وخرج من الڤيلا
﴿بقلم الكاتبة جنات﴾
ـــــــــــــــــــــ★ــــــــــــــــــــــ
فى ڤيلا صغيره ودى ڤيلا فاروق الصاوى اللى قاعد مع مراته شهيرة اللى ماسكه فونها ومركزه فيه اوى .
فون فاروق رن ورد بسرعه وكان مؤمن .
فاروق:ايوا يامؤمن..... بكرة تمام اوى هكون موجود على المعاد .... تمام.
فاروق قفل وشهيرة بصتله:معاد ايه ده؟
فاروق:بكرة هيفتحو الوصيه.
شهيرة:اخيرا الست رغد حنت عليكو ... انا هاجى معاك طبعاا؟
فاروق:لا انا بس اللى هروح.
شهيرة:وده ليه بقي؟
فاروق:رغد عايزانى انا وبس حتى من غير ابنك.
شهيرة:البت دى شايفه نفسها على ايه مش عارفه وعماله تتنطط على ابنى؟!!
فاروق:ليها حق تشوف نفسها دكتورة اد الدنيا ومديرة مستشفى كبيرة يعنى مستحيل تبص للفاشل ابنك.
شهيرة:خليك انت كدا دايما تحبط فيه.
فاروق:انتى عارفه ابنك خسر الشركه كام اخر مرة ... اكتر من ٣ مليون جنيه بسبب غباءه.
شهيرة:الناس كلها بتغلط محصلش حاجه يعنى
فاروق:خليكى انتى كدا عماله تدلعى فيه .... اومال هو البيه فين؟!
شهيرة مردتيش
فاروق:مرجعش ونايم برا كالعاده؟!
شهيرة:ده شاب صغير سيبه يعيش حياته يافاروق.
فاروق:انا همشي احسن.
فاروق خرج من الڤيلا وشهيرة كانت مضايقه منه ومن رغد جدااا
ـــــــــــــــــــــ★ــــــــــــــــــــــ
فى حارة البطل اللى بتتميز بطيبه قلوب الناس اللى عايشين فيها بس طبعاا لازم يكون مصدر لشر و الخبث فى اى مكان
"" تعالو نوصف حارة البطل ونتعرف عليها اكتر
حارة البطل اللى بتتميز بيوتهم بطابع القديم واول ماندخل الحارة بيكون فى قهوة الحاج عبده الطيب
وجمبه البيت اللى فيه ورشه البطل فى الدور الارضي والدور التانى معرض كبير لعرض الموبليا
وفيه كمان ام فرح الست الطيبه اللى بتشقى بعد وفاه جوزها عشان خاطر تفرح ببنتها فرح اللى مخطوبه من صبي من صبيان اللى بيشتغلو فى ورشه البطل وليها فرشه صغيرة بتبيع فيها خضار قدام بيت الشهاوى اللى مقفول من سنين ومحدش يعرف اصحابه ماتو ولا عاشين .
وفى كمان بيت المعلم منصور ومراته محروسه ودول بقي مصدر الشر اللى فى الحارة وابنهم جابر اللى مسجون وتحت البيت فى محل جزارة بتاع منصور .
وفى صالون حلاقه رجالى وسوبر ماركت صغير ومحل لبيع الفاكهه وكمان فى سايبر الشباب بيتجمعو فيه ويلعبو العاب الكترونيه على الكمبيوتر وجامع .
وكمان عربيه الفول اللى موجوده فى كل حارة .
وفى نص الحارة بيت عيله البطل
والحارة فيها بيوت كتير وناسها طيبين وكلهم اهل وعيله واحده فى الحزن قبل الفرح
واخر الحارة فى ارض فاضيه كبيره بيعملو فيها الافراح والمناسبات بتاعتهم""
ـــــــــــــــــــــ★ــــــــــــــــــــــ
تعالو نرجع سواا لاحداث الروايه
فى حارة البطل وتحديدا فى ورشه البطل الخاصه بتصنيع الموبليات والاثاث
حسن البطل قاعد على مكتبه وبيتابع شغله
دخل عليه حمزة وقعد على الكرسي:صباح الفل يابطل.
حسن:صباح الخير سلمت الشغل.
حمزة:اه يامعلم سلمنا كل الشغل للمعارض.
حسن مد ايده بورق:تمام ... ودى ورق الشغل اللى هيتسلم.
حمزه اخد الورق منه:الشغل خلصان مش ناقص غير يتشحن.
حسن:كويس.
دخل شاب من اللى بيشتغلو مع حسن:صباح الخير يابطل.
حسن:صباحك فل يامحمد.
محمد:فى حاجه حصلت ولازم تعرفها.
حسن وحمزة بصوله اوى!!
حسن:فى ايه؟
محمد:سمعت طراطيش كلام ان الواد محروس اللى كان شغال مع جابر ابن المعلم منصور هيسلم الهباب اللى بيوزعه على شويا شباب من الحارة.
حسن بعصبيه:وامته كلام ده؟
محمد:هيسلمه بليل الساعه ١٠ عند الارض الفاضيه اللى فى اخر الحارة.
حمزة:الواد ده زودها اوى.
حسن:وانا مش هسكتله على عمايله لانه زودها اوى .... روح انت يامحمد وعينك على الواد ده كويس.
محمد:حاضر يابطل.
محمد خرج وحمزة بص لحسن:هتبلغ الشرطه؟!
حسن:لا هروحله بنفسي.
حمزه:طب ماحنا نسلمه ونخلص من قرفه ياحسن.
حسن:لا جهز نفسك بليل هنروح سوا ... هو الظاهر كدا جابر وحشه ونفسه يشوفه وانا هنوله الشرف ده.
حمزة: دماغك سم يابطل.
حسن ضحك:يلا روح شوف شغلك ونتقابل بليل.
حمزة:هاخد المكنه بتاعتك اعمل بيها مشوار
حسن بصله بطرف عينه .
حمزة:ياعم مشوار عالسريع متخافش .
حسن من غير مايبصله:ابقي فكر تحط صابعك عليها بس.
حمزة:ده ايه هو ده ... تمام يامعلم هروح مشي.
حمزة خرج وحسن راح يمر على الورشه
﴿بقلم الكاتبه جنات﴾
ـــــــــــــــــــــ★ــــــــــــــــــــــ
بليل فى الارض الفاضيه اللى فى اخر الحارة
كان محروس واقف ومعاه رجالته وشويا شباب بيشترو منه مخــ****ــدرات .
وفجاة شافو نور عربيه قوى بيقرب منهم
محروس اترعب لما شاف حسن وصل وراكب الموتوسيكل بتاعه وحمزة نزل من العربيه ومعاهم عبده ومحمد وبيقربو منهم .
حمزة:بتعمل ايه يامحروس هنا مش الحاج محمود قال ممنوع حد يقرب من الارض دى.
محروس:لا ابدا احنا كان عندنا شويا شغل بس.
حسن بحده:اكتر حاجه تضايقنى وتحرق دمى ان حته عيل زيك يفكر يستغفلنى او يكسر كلمه الحاج محمود البطل.
محروس:معاش ولا كان اللى يستغفلك يامعلم حسن.
حسن قرب منه وبص على اللى فى ايده:وايه بقي الشغل اللى جمعكو هنا؟!
الشباب اللى واقفين كانو مرعوبين من حسن
حسن مد ايده وخد منه اللى فى ايده:الظاهر كدا جابر وحشك وعايز تروحله مش كدا؟
حسن ضرب محروس فجأه بالبوكس فى وشه وقع على الارض:ده عشان كسرت كلمه الحاج محمود.
حسن قرب وضربه بوكس تانى:ودى عشان فكرت تستغفلنى.
فجاه سمعو صوت عربيه الشرطه اللى قربو منهم وقبضو عليهم .
حسن بص لشباب:عشان تبقو تمشو ورا دماغه كويس .... حارة البطل كل اللى فيها رجاله مش حشاشين.
مراد الرائد امر العساكر تاخدهم على البوكس وبص لحسن:تشكر يابطل .
حسن:ده الواجب ياصاحبي .
حمزة:ونبي مش عيب عليك تبقي رائد وقاعد على مكتبك واحنا اللى بنشغلك.
مراد:شكل ابن عمك ياحسن عايز ينور التخشيبه النهارده ولا ايه؟
حسن ضحك.
حمزة:طب ابقي اعملها عشان الحاج محمود يعلقك.
مراد:واحنا نقدر نزعل الحاج محمود ... ياعم كان يوم اسود يوم ماسبت القاهرة وجيت اسكندريه والله.
حسن ضحك:طب يلا ياخفيف روح شوف شغلك.
مراد:مقبوله منك ياصاحبي.
مراد ركب البوكس واتحرك وحمزة ركب العربيه مع الشباب وحسن ركب الموتوسيكل بتاعه ورجعو على البيت .
البيت اللى كان عبارة عن ٥ ادوار
الدور الاول الشقه اللى بتتجمع فيها العيله طول اليوم .
الدور التانى شقه الحاج محمود ومراته هدى وحنين بنته الصغيرة .
الدور التالت شقه ابو حمزة بس طبعا هو ابوه وامه اتوفو وهو عايش فيها لوحده .
الدور الرابع شقه حسن اللى مجهزة من كل حاجه وهو عايش فيها .
اما الدور الاخير وهو السطح اللى موجود فيه انواع كتير من الزرع والورد اللى بتهتم بيه حنين اخت حسن لانها بتحب تزرع جداا وكمان بتدى دروس للاطفال الحارة فيه .
ـــــــــــــــــــــ★ــــــــــــــــــــــ
حسن وحمزة دخلو كانت الحاجه هدى قاعده مع حنين
حسن باس راسها:مساء الفل ياست الكل.
هدى:مساءك بيضحك ياحبيب قلبي.
حمزة:عملالنا عشا ايه ياهدهد الجناين؟
هدى ضحكت:عملالك الحواوشي اللى بتحبه ياواد ياحمزة.
حمزة:حبيبتى ياهدهد ياللى مدلعانا.
هدى:قومى ياحنين جهزى العشا لاخواتك.
حنين:حاضر من عيونى.
حسن شدها وباس راسها:تسلم عيونك يابسكوتايه البيت انتى.
حنين:حبيبي ياابوعلى.
حمزة:يعنى ابو على بس اللى حبيبك ... تصدقى يابت خسارة فيكى الشكولاته اللى جيبهالك!
حنين:مش تقول ان الموضوع فى شكولاته يازومه.
حمزة:كولى بعقلى حلاوة يابت.
حسن:سيبك من الواد ده بكرة يبقي عندك علبه من الشكولاته اللى بتحبيها.
حنين باسته من خده:حبيبي ياابو على.
هدى:يلا ياحنين اخواتك جعانين.
حنين:حاضر ياماما.
حنين دخلت المطبخ وهدى بصت لشباب:انتو عملتو ايه النهارده الحاج محمود سال عليكو يجى عشر مرات وشكله مضايق اوى؟!!
حمزة بص لحسن:اكيد الواد عبده اللى قاله قولتلك ده ميتبلش فى بوقه فوله.
حسن:طب تعالى نطلع نشوف الحاج الاول.
حسن وحمزة طلعو لحاج محمود فى شقته ودخلو .
حسن باس ايده وراسه:عامل ايه ياحاج؟
محمود:بخير يابنى.
حمزة باس ايده:مرات عمى قالت انك عايزنا ياعمى خير؟
محمود:ايه اللى خلاكو تروحو للواد محروس بنفسكو؟!
حسن:كان لازم نتاكد انه هيتقبض عليه ياحاج.
محمود:مراد كان هيقوم بالواجب ماكنش لازم النمرة دى ياحسن.
حسن:الواد كان مفكر انه يقدر يستغفلنا ياحاج وده درس صغير عشان محدش من الحارة يفكر يعمل زيه ولا يمشي الطريق ده زى الشباب دول.
محمود:ماشي ياحسن بس يابنى خليكو بعيد عن المشاكل.
حسن:حاضر ياحاج.
حمزة:هننزل نتعشي بقي ياحاج لان احنا واقعين من الجوع.
محمود:روحو ياولاد ربنا يحميكو لشبابكو يارب.
حمزة وحسن:تسلم ياحاج.
الشباب نزلو واتعشو وبعدها كل واحد طلع على شقته وهدى وحنين طلعو ينامو فى بيتهم......
✍️الكاتبة جنات
==========
#روايه_حارة_البطل
#الكاتبة_جنات
»»الفصل التانى ««
صباح يوم جديد فى ڤيلا جمال الصاوى
البنات نزلو لما مؤمن كلمهم وقالهم انه وصل مع مجدى المحامى .
رغد سلمت على مجدى:اخبارك ايه ياعمو.
مجدى:بخير ياحبيبتى انتى عامله ايه.
(مجدى مش بس محامى جمال لا ده كان صديقه المقرب واللى بيثق فيه جداا)
رغد:الحمدلله.
رهف سلمت عليه:وحشتنا اوى ياعمو.
مجدى طبطب على كتفها:والله يابنتى وانتو كمان وكل يوم بطمن عليكم من مؤمن حتى اساليه.
رغد:بيوصلنا سلامك والله ياعمو.
مؤمن:اومال لارا فين؟
رهف:لسه نايمه يامؤمن.
مؤمن:طب كويس.
فى الوقت ده وصل فاروق اللى دخل وسلم عليهم وقعد:معلش اتاخرت عليكم.
مجدى:متاخرتش كتير انا لسه واصل يافاروق.
فاروق:طب يلا اقرأ الوصيه.
رغد كانت مضايقه جدا من عمها:لحظه ياعمو مجدى لو سمحت.
مجدى:فى ايه يابنتى؟!
رغد:الوصيه هتتنفذ زى ماهى مافيش حرف فيها هيتغير واللى بابا الله يرحمه عايزه هو اللى هيحصل.
رغد بصت لعمها فاروق:والكلام ده للكل .
فاروق:اكيد يابنتى اللى جمال الله يرحمه عايزه هيحصل.
رغد:طب خليك فاكر كلامك ده كويس.
فاروق بصلها ومستغرب معقول هى عارفه الوصيه فيها ايه
مؤمن:اتفضل يااستاذ مجدى يلا.
مجدى طلع الورقه اللى جمال كاتب فيها وصيته:اقر انا جمال الصاوى وانا بكامل قوايا العقليه ان دى وصيتى ... اول حاجه وحشتونى ياحلوياتى مريم ورهف ورغد اكيد لما تسمعو الوصيه انا مش هابقي معاكو.
رهف ورغد بصو لبعض بحزن .
مجدى كمل قراءة:عايزكو تاخدو بالكو من بعض اوعو فى يوم تتخلو عن بعض يابنات ... انا عارف انك قويه يارغد هتكونى ضهر وسند لاختك ووالدتك من بعدى خدى بالك منهم رهف رقيقه واكيد هتتاثر بغيابي وكمان مريم اكيد هتكون حزينه ... اوعى تعيطى يامريم انا موجود معاكو وفى قلوبكو وبلاش تلبسو اسود عليا .... مريم حبيبه قلبي انتى عارفه
انى مش بحب اشوف الحزن فى عينيكو.
مؤمن بص لرغد بمعنى سامعه .
رهف بصوت مخنوق:بس ماما مش معانا يابابا مريم حبيبه قلبك معاك الوقت.
رغد مسكت ايدها:اكيد هما فرحانين وهما سوا يارهف لانهم مش بيقدرو يستغنو عن بعض صح؟!
رهف هزت راسها باه ومسحت دموعها.
رغد:كمل ياعمو مجدى.
مجدى:وصيتى انا جمال الصاوى .... المستشفى انا كتبتها باسمك يارغد زى ماقولتلك وانا متاكد انك هتحافظى عليها وانك اد المسؤليه ياحبييتى ومقابل ده كتبت نصيبى فى الشركه اللى بيتمثل بـ ٧٥٪ لرهف ومريم ولقدر الله بعد عمر طويل لو مريم حصلها حاجه الشركه هتبقي ليكى يارهف وانا عارف انك مش بتحبي شغلى ولا بتحبي الادويه والمستشفيات فعشان كدا اللى هيتولى الادراة مؤمن انا عندى ثقه كبيرة فيه .... اما الـ ٢٥٪ نصيب فاروق وابنه مازن لانه شريك معايا فيها وده نصيبك يافاروق انا مش بظلمك اكيد وكمان الارض اللى زايد انا عارف انك كنت عايزها عاشن تبنى عليها شركه لمازن انا كتبتها باسمك يافاروق والورق مع مجد المحامى ... والڤيلا والمصنع باسم البنات رهف ورغد .
فاروق كان هيتجنن كل حاجه بيملكها جمال لبناته هو عينه كانت على الشركه والمصنع .
مجدى كمل قراءة:ودى وصيتى يابنات ياريت تعملو بيها وتحافظو على تعبي.
رغد:هنحافظ عليه يابابا متقلقيش ياحبيبي.
مجدى:دى الوصيه وانا كدا وصلت الامانه ليكو والباقى عليكم انتو.
مؤمن:تسلم يااستاذ مجدى.
رغد:حضرتك هتفضل المحامى الخاص بينا ياعمو وهتكمل معانا زى ماكنت مع بابا الله يرحمه.
مجدى:اكيد يابنتى انتى مفكره انى هتخلى عن بناتى بردو.
رهف:حبيبى ياعمو.
رغد بصت لفاروق:مالك ياعمو ساكت ليه؟!
فاروق بضيق:ولا حاجه انا ماشي.
رغد:مع السلامه ياعمو.
فاروق خرج وهو مضايق من اخوه .
مؤمن:انتى كنتى عارفه ايه اللى فى الوصيه يا رغد؟
رغد:مش بتفاصيل بابا الله يرحمه كان قالى على موضوع المستشفى وانه فى المقابل هيكتب حاجه لرهف عشان نبقي زى بعض بس.
مجدى:جمال كان حقانى مع الكل ربنا يرحمه.
الكل:يارب.
ــــــــــــ★ـــــــــــــ
فى ڤيلا فاروق
شهيرة قاعده تلعب فى الفون بتاعها ومازن ابنها دخل الڤيلا وقعد جمبها ونادى بصوت عالى:بت يافتحيه انتى يابت.
فتحيه جت بسرعه:خير يابيه؟
مازن:اعمليلى فنجان قهوة بسرعه.
فتحيه:حاضر يابيه.
فتحيه دخلت المطبخ ومازن بص لامه اللى كانت بتبصله اوى:بتصيلى كدا ليه ياشوشو؟
شهيرة:مش مكسوف من نفسك وانت بتنادى على فتحيه اللى اكبر من امك وبتقولها يابت؟!
مازن:يعنى انادى عليها اقولها ايه ياست هانم مثلا ... وبعدين فكك منى انا جاى مصدع ومش فايق.
شهيرة:ماهو لازم تبقي مصدع من القرف اللى بتشربه يابيه.
مازن بملل:خلصتى .... اومال بابا فين؟
شهيرة:النهارده هيفتحو وصيه عمك وراح من الصبح ولسه مرجعتش.
مازن:بجد وماقليش ليه اروح معاه؟!
شهيرة:رغد هانم مش عايزة حد يروح غير فاروق وبس.
مازن بعشق:رغد.
شهيرة:مش عارفه البت دى عملالك ايه ... دى حته بت شايفه نفسها مش عارفه على ايه وكفايه لسانها اللى اطول منها هى شخصياا.
مازن:اسكتى ونبي ياشهيرة انا مش فايق .... انا طالع اوضتى وخلى فتحيه تجبلى القهوة فوق.
شهيرة:حاضر.
مازن طلع وبعد شويا فاروق دخل الڤيلا وكان مضايق جداا ومتعصب .
شهيرة:مالك يافاروق متعصب ليه كدا ؟
فاروق:جمال كتب كل حاجه لبناته وانا طلعت من المولد بلا حمص.
شهيرة:ازاى يعنى كتبلهم ايه؟
فاروق قالها اللى مكتوب فى الوصيه.
شهيرة:تلاقيها العقربه اللى اسمها رغد هى اللى قالتله يعمل كدا ولا يمكن مطبخاها مع مجدى ماهو تبعهم.
فاروق:لا الوصيه بخط جمال انا شوفتها بعينى.
شهيرة:طب ونصيبك فى الشركه؟
فاروق:لا طلع حقانى اوى فى دى وسابلى نصيبى وكمان الارض اللى فى زايد.
شهيرة:لا والله كتر خيره ... وانت ناوى على ايه الوقت؟
فاروق:هعمل ايه مش عارف افكر ... بس لازم افكر واشوف هتصرف ازاى ... انا هطلع اوضتى.
شهيرة:تمام.
فاروق طلع وشهيرة طلعت تحكى لابنها اللى حصل
بقلم الكاتبة جنات
ــــــــــــ★ـــــــــــــ
فى حارة البطل
حسن واقف فى الورشه بيتابع الشغل وبيقولهم يعملو ايه وراح على مكتبه وابتسم لما شاف الحاج محمود قاعد على المكتب .
حسن:منور الورشه ياحاج.
محمود:منورة بيك وبابن عمك يابنى ...انا كنت زهقان قولت اجى اقعد معاكو شويا.
حسن قعد على الكرسي قدامه:الورشه مكانك ياحاج تيجى وتنور فى اى وقت ... والله انا شايف انك تيجى كل يوم احسن من قاعده البيت.
محمود:سيبها على الله يابنى.
دخل حمزة:صباحو فل يابطل.
حمزة اتفاجأ بالحاج محمود:وانا بقول الورشه منورة ليه؟
محمود:تسلم يابنى ... اخبار الشحنه اللى هتتسلم للمعرض ايه؟
حمزة:خلال يومين هتكون جاهزة وهتتشحن ياحاج.
محمود:ربنا يعينكو ياولاد .... انتو هتفضلو قعدنلى كدا يلا روحو شوفو شغلكو.
حسن ضحك:دى فرصه ياحاج نقعد معاك وبعدين الشغل مش هيهرب ... انا هخلى الواد عبده يعملك احلى فنجان قهوة.
محمود:ماله نشرب قهوة .
حمزة:هروح اقول لعبده يعملنا القهوة.
حمزة خرج ومحمود بص لابنه
حسن:مالك ياحاج بتبصلى كدا ليه.
محمود:جابر قرب يخرج مش عايزك تحتك بيه ياحسن لا انت ولا ابن عمك سامعنى.
حسن:طول ماهو بعيد عننا هنقربله ليه ياحاج انت عارفنا مش بنحب نعمل مشاكل مع حد.
محمود:ربنا يحميكو لشبابكو.
حمزة دخل ومعاه القهوة:احلى قهوة للحاج محمود البطل.
محمود:تسلم يابنى.
والكل بدأ يشرب القهوة
محمود:انتو مش ناوين تفرحونى بيكو ياواد انت وهو؟
حسن:انت مش فرحان بنجاحنا ولا ايه ياحاج؟!
محمود:بلاش تلعب معايا ياواد انت فاهم قصدى.
حسن ضحك وشرب القهوة .
حمزة:والله ياحاج احنا مش هنقول لأ بس تيجى بنت الحلال الاول.
محمود:ربنا يرزقكو باللى تسعد قلوبكو ياولاد البطل.
باب المكتب خبط ودخل محمد:ازيك ياحاج محمود.
محمود:بخير يامحمد انت عامل ايه؟
محمد:بخير ياحاج.
حسن:فى حاجه يامحمد؟!
محمد:المعلم منصور جايب ناس ورايح ناحيه بيت الشهاوى.
محمود:ناس مين دول؟
محمد:الظاهر كدا ياحاج عشان موضوع العمارة اللى عايز يبنيها فى الحارة.
حمزة:احنا مش اتكلمنا فى الموضوع ده قبل كدا.
حسن قام وقف:الراجل ده مش عايز يجيبها لبرا لا هو ولا ابنه.
محمود:بالهداوة ياحسن خد كل حاجه بالهداوة.
حسن:اللى زى دول ياحاج ماينفعش معاهم هدواة.
محمود:بردو يابنى كل مرة اقولك مش بحب المشاكل.
حسن:حاضر ياحاج ارتاح انت وانا وحمزة هنروحله.
حسن وحمزة خرجو وراحو للمعلم منصور
(المعلم منصور ده عند محل جزارة فى الحارة راجل كل همه الفلوس متجوز محروسه وهى تقريبا نفس شخصيته وعنده ولد واحد وهو جابر مسجون بسبب حسن اللى بلغ عنه انه معاه ممنوعات وبقاله سنتين محبوس)
حسن قرب من منصور اللى كان واقف بيتكلم مع ام فرح اللى عندها فرشه خضار صغيرة فى الحارة قدام بيت الشهاوى .
منصور:انا قولتلك اللى عندى فرشتك تنقليها اى مكان تانى.
ام فرح:طب هروح فين يامعلم اهل الحارة كلهم ليهم مكانهم وانا ماليش وانت عارف ده اكل عيشي.
حسن:ايه اللى بيحصل هنا؟
ام فرح:تعالى يابنى شوف المعلم منصور عايزنى انقل فرشتى وانت عارف مافيش مكان فى الحارة.
حسن:لا ياام فرح مش هتنقلى فرشتك ده مكانك متخافيش من حد.
ام فرح:ربنا يسعدك يابنى يارب.
حسن بص على ٣ شباب اللى واقفين ورجع بص لمنصور .
حسن:خير يامعلم منصور ايه اللى بيحصل هنا؟
منصور:كل خير ياحسن ... دول المهندسين اللى هيشرفو على العمارة اللى هبنيها باذن واحد احد وانا بقول لام فرح تنقل من هنا عشان المكان خلاص ده هيتبنى فيه العمارة.
حمزة:هتبنيها على انهو ارض يامنصور؟!
منصور:على ارضى والارض اللى اشتريتها من فتح الله وكمان الارض بتاعه بيت الشهاوى.
حسن:وانت وصلت لاهل بيت الشهاوى واشتريت منهم؟
منصور:لا ماهما محدش يعرف طريقهم ياحسن وانا ههد البيت ولما اصحابه يظهرو هابقي اديهم الفلوس اللى يطلبوها.
حسن:مش هيحصل يامنصور لما يبقو صحاب البيت يظهرو وتتكلم معاهم وتشترى منهم بورق موثق وقتها هسمحلك تبنى العمارة بتاعتك .... لكن طول ماهما مش موجودين محدش هيقرب من البيت انت فاهم.
محروسه مرات منصور جت من وراهم:ماحنا دورنا كتير ياحسن ومحدش يعرف طريقهم حتى الڤيلا اللى نقلو فيها باعوها.
حسن بص لمحروسه ورجع بص لمنصور:علم مراتك يامنصور لما الرجاله تتكلم تحط لسانها جوا بوقها ومتتدخلش ... من امته والحريم بتتدخل فى شغلنا؟!
منصور بص لمراته:روحى المحل يامحروسه
محروسه مشت وهى مضايقه من حسن هى اصلا مش بطيقه لانه حبس ابنها الوحيد جابر .
منصور بص لحسن:بص ياحسن انا همشي فى امور البنا واوعدك لما يظهر اهل الشهاوى انا هدفعلهم الفلوس وفوقيهم بوسه كمان.
حمزة:لا البوس ده وفره لجماعتك يامنصور وزى ماحسن قالك محدش هيقرب من البيت لحد اصحابه مايظهرو ومتنساش انها اوامر الحاج محمود.
منصور:بس انـــ
محمود جه من وراهم:من غير بس يامنصور محدش هيقرب من البيت وكلمتى هتمشي على الكل ... ام فرح هتفضلى فى مكانك هنا ومحدش هيقرب منك.
ام فرح:ربنا يباركلنا فيك ياحاج محمود يارب.
محمود:تسلمى ياام فرح .... خد رجالتك وامشي يامنصور وانت ياحسن يلا ارجع انت وحمزة على الورشه.
حسن:حاضر ياحاج.
حمزة:خلينى اوصلك للبيت ياحاج.
محمود:شوف شغلك ياواد شايفنى عجزت ولا ايه؟!
حمزة:ده انت الشباب كله ياحاج محمود.
محمود ضحك:يلا ياض على شغلك.
حمزة وحسن ضحكو وراحو على الورشه ومحمود راح البيت ومنصور ومشي وكان مضايق من اللى حصل
بقلم الكاتبة جنات
ــــــــــــ★ـــــــــــــ
فى عربيه مؤمن اللى بيوصل رغد المستشفى ومستغرب سكوتها .
مؤمن:مالك يارغد ساكته ليه؟!
رغد:انا مستغربه هدوء فاروق معقول هيقبل كدا بالامر الواقع؟
مؤمن:هيعمل ايه يعنى؟؟!
رغد:لا لو هيعمل فممكن يعمل كتير اوى ده دماغه سم ومش هيرضي انه يطلع من المولد بلا حمص.
مؤمن:استاذ مجدى قال ان كل حاجه خلاص اتوثقت وعمى جمال عايش وكل حاجه بامضته يعنى مهما عمل مش هياخد حاجه منكو انتى خايفه ليه بقي؟ ... وبعدين ماهو اخد الارض اللى كان هيموت عليها.
رغد:انا مش خايفه على نفسي يامؤمن انا اقدر اقف فى وش ١٠ زيه .... خوفى كله على رهف.
مؤمن بصلها:ليه؟
رغد:لان هو كل اللى يهمه الشركه لكن المستشفى مش فى دماغه اصلا.
مؤمن:طب ما المصنع باسمك انتى ورهف؟!
رغد:مش عارفه بقي بس حاسه انه مش هيعدى الامور كدا من غير مايعمل حاجه وعايزاك تفتح كويس فى الشركه انت عارف انا ورهف ملناش فى شغل الشركه ولا المصنع .
مؤمن:من غير ماتقولى دول امانه عمى جمال.
رغد:عارفه يامؤمن انك ادها بس متنساش الحيوان اللى اسمه مازن والخساير اللى بيعملها كل شويا وكمان ابوه معاكو فخد بالك منهم كويس.
مؤمن:سبيها على ربنا.
رغد:ونعمه بالله.
مؤمن وقف قدام المستشفى:اهو ياستى وصلتك اى خدمه تانيه؟
رغد ضحكت:شكر ياباشا.
رغد نزلت دخلت المستشفى وقابلها دكتورة مها صاحبتها واقرب حد ليها فى المستشفى .
رغد:صباح القشطه يامها.
مها بصتلها بتوتر
رغد:مالك فى ايه فى حاجه حصلت وانا مش هنا؟
مها:الصراحه اه.
رغد:تعالى معايا على المكتب.
رغد ومها دخلو المكتب ورغد قعد مكانها:فى ايه يامها؟!
مها:امبارح جت ست كبيرة وشكلها على اد حالهم ومعاها بنتها حالتها صعبه ومحتاجه عمليه ضرورى.
رغد:طب وايه المشكله ماحنا علطول بنساعد الناس.
مها:ماهو دكتور فؤاد مشاها وقالها احنا مش فاتحنا سبيل.
رغد قامت وقفت بعصبيه:وهو مال امه كانت مستشفى ابوه.
مها:اهدى يارغد.
رغد:بلا اهدى بلا بطيخ انا مش بطيق الراجل ده من اساسه.
(فؤاد دكتور جراح عنده ٤٠ سنه بس شخصيه انتهازيه يعمل اى حاجه عشان الفلوس ... وهو صديق فاروق اللى لجأ لجمال عشان يشغله فى المستشفى وجمال اللى طلب من رغد انه يفضل فى المستشفى عشان عمها ورغم المشاكل اللى بيعملها فى المستشفى ودايما بيضايق الممرضات والدكاترة البنات بمعاكساته بس رغد مستحملاه عشان خاطر رغبه والدها)
رغد خرجت من مكتبها ومها وراها وراحت فتحت مكتب فؤاد بقوة من غير ماتخبط
فؤاد:فى دكتورة محترمه تدخل بالمنظر ده؟!
رغد بصوت عالى خلى الكل يتجمعو قدام مكتب فؤاد:لا بقولك ايه دى المستشفى بتاعتى واعمل فيها مابدالى مش هتيجى انت تعرفنى اتعامل ازاى فااااااهم؟!
فؤاد:فى ايه مالك داخله عليا كدا مش كفايه سايبه شغلك ومجتيش امبارح؟
رغد:وانت مالك اصلا اجى ولا ماجيش كنت بتدفعلى مرتبي من جيبك .... وبعدين الحاله اللى جت امبارح ازاى تمشيها من غير اذنى ازاى تتصرف من راسك اصلا؟
فؤاد:دى واحده شحاته ودى مستشفى محترمه.
رغد بعصبيه:انت مالك شحاته او غيره هى هتعمل العمليه على حسابك بعد كدا ماتتدخلش فى حاجه متخصكش ياما قسما بالله يافؤاد همشيك من المستشفى كلها ... انت قاعد هنا عشان خاطر بابا الله يرحمه فاهم غير كدا عمرك ماكنت هتخطى خطوة جوا المستشفى .... بس انا صبرى ليه حدود يافؤاد ومش ناويه اصبر كتير الصراحه.
فؤاد:عيب اسلوبك ده دانا راجل اد ابوكى يادكتورة رغد.
رغد:وياريتك بتحترم سنك يااخى لا انت عمال تضايق فى الممرضات وفى المرضي ومش سايب حد فى حاله.
فؤاد بصلها بصدمه
رغد:انت فاكرنى نايمه على ودانى ومعرفش عمايلك السودا ... لا انا عارفه كل حاجه كويس جدا بس بعدى وبسكت بمزاجى فاهم بمزاجى يعنى تحترم نفسك وسنك والمستشفى المحترمه اللى انت شغال فيها .
رغد خرجت من المكتب وبصت لمها:اخدتى رقم الست ولا لأ؟
مها:دكتور محمد اخده.
رغد:تكلميها وتجهزى كل حاجه وتتعامل احسن معامله هى وبنتها يامها فاهمه.
مها:حاضر يااحلى دكتورة.
رغد ضحكت وراحت مكتبها .......
بقلم الكاتبة جنات
#روايه_حارة_البطل
#الكاتبة_جنات
»»الفصل التالت ««
صباح يوم جديد فى حارة البطل .
حسن صحى ونزل من شقته ودخل الشقه اللى فى الدور الارضي.
حسن باس راس هدى:صباح الخير ياست الكل.
هدى:صباح الخير ياحبيب قلبي.
حسن:الحاج محمود لسه نايم ولا ايه؟
هدى:لا ياحبيبي صاحي وهينزل مع حنين.
محمود دخل الشقه مع حنين:السلام عليكم ورحمه الله وبركاته.
حسن وهدى ردو السلام .
حسن قرب منه وباس ايده:صباح الخير ياحاج.
محمود:صباح الخير يابنى.
حنين:صباح الفل ياابوعلى.
حسن:صباح ورد ياشكولاتيه البيت.
هدى:يلا ياحاج الفطار جاهز يلا ياولاد .... اومال فين حمزة ياحسن؟
حمزة دخل الشقه:حمزة موجود ياهدهد....صباح الورد.
الكل:صباح الخير.
الكل فطرو سواا .
حسن:انا وحمزة هنسافر النهارده القاهرة ياحاج.
محمود:هتروحو ورشه المعلم فتحى؟
حمزة:ايوا ياحاج هنتفق معاه على شغل وكمان احنا اتفقنا معاه اننا هناخد عمال من عنده ياحاج.
محمود:وليه ناخد من عنده هما الرجاله قصرو معاكو فى حاجه؟!
حسن:لا ياحاج الشباب دول هيشتغلو معانا فى الشغل اللى تبع المعلم فتحى وهيرجعو تانى مش هيفضلو معانا.
محمود:تمام وهتباتو فى القاهرة ولا هترجعو؟!
حسن:لا ياحاج هنتفق ونرجع علطول.
محمود:ربنا معاكو.
هدى:خدو بالكو على نفسكو ياحبايب قلبي.
حسن:سيبها على الله ياست الكل.
حنين:ابو على متنساش طلبى بقي.
حسن ضحك:من عيونى يانونه.
هدى:يابت هتفضلى تاكلى شكولاته لحد مايجيلك السكر.
حنين:بحبها ياهدهد اعمل ايه وابوعلى حبيبي قالى لما يروح القاهرة هيجبلى النوع اللى بحبه.
محمود:ربنا يخليكو لبعض ياولاد.
حسن:ويباركلنا فى عمرك ياحاج.
هدى:حسن اوعى تروح على الموتوسيكل بتاعك روح بالعربيه يابنى.
حسن:انتى عرفانى يا ست الكل ماليش فى ركوب العربيات.
محمود:عمرك ماهتتغير من وانت صغير وانت بتحب المكن.
حمزة:ده بيعشق الموتوسيكل بتاعه ياعمى يمكن اكتر منى شخصيااا
.
حسن:طب يلا ياخفيف عشان منتاخرش.
حمزة:يلا بينا.
حسن:عن اذنك ياحاج.
محمود:اذنك معاك يابنى.
الشباب خرجو وحنين وهدى بداو يشيلو الاكل.
ــــــــــــــــــــ★ــــــــــــــــــ
فى ڤيلا جمال الصاوى وتحديد فى المرسم الخاص برهف اللى قاعده ترسم وهى بتسمع موسيقى هاديه جدا .
ولارا قاعده جمبها وبترسم هى كمان وبتحاول تعمل زى رهف .
رغد دخلت:ياصباح الحلاوة.
رهف:صباح الخير ياحبيبتى.
رغد بصت على اللوحه اللى بترسمها رهف اللى كانت صورة مامتها وباباها:حلوة اوى يارهف بجد تسلم ايدك ... دى لما تخلصيها هنعلقها فى الڤيلا.
رهف:انا كنت ناويه على كدا بردو.
رغد بصت لـ لارا:بتعملى ايه يالولى.
لارا:برسم زى رهف ايه رايك فى اللوحه بتاعى.
رغد:هى الشخابيط دى لوحه يالارا.
رهف ضحكت ولارا كشرت.
رغد:خلاص ولا تزعلى نفسك خلصى لوحتك وانا هعلقها فى اوضه رهف.
رهف:وانا موافقه يا لولى.
رغد:انا هروح المستشفى يارهف.
رهف:خدى بالك على نفسك.
رغد باستها من خدها وباست لارا وخرجت ركبت عربيتها وراحت المستشفى .
بقلم الكاتبة جنات
ــــــــــــــــــــ★ــــــــــــــــــ
فى شركه الصاوى وتحديدا فى مكتب فاروق اللى قاعد معاه مازن ابنه .
مازن:وانت ناوى على ايه؟!
فاروق:لسه بفكر فى طريق اقدر اخد منهم الشركه.
مازن:والمصنع؟
فاروق:والمصنع اكيد.
مازن:بس رغد مهما عملت مش هتسمحلك تاخدهم.
فاروق:البت دى وقفالى زى العضمه فى الزور وانا لازم اخلص منها عشان اقدر اخد الشركه من رهف.
مازن بصدمه:تخلص من مين من رغد مستحيل يابابا.
فاروق:معلش نسيت انها حبيبه القلب.
الباب خبط ودخل مؤمن:فى اجتماع مهم يافاروق بيه ولازم تحضر.
فاروق:اكيد روح وانا جاى وراك.
مازن:تفتكر سمع حاجه؟!
فاروق:مستحيل.
مازن:طب يلا نروح الاجتماع.
فاروق:قوم.
بقلم الكاتبة جنات
ــــــــــــــــــــ★ــــــــــــــــــ
فى القاهرة وتحديدا فى ورشه المعلم فتحى اللى حسن وحمزة وصلو عنده واتكلمو فى الشغل وبعد كدا قامو يمرو فى الورشه وبيتفرجو على الشغل وبيتكلمو .
فتحى:الشباب من بكرة هيكونو عندكو فى حارة البطل ياحسن.
حسن:تسلم يامعلم فتحى وان شاء الله شغلك هتستلمه فى وقته.
فتحى:كلمتكو سيف يابطل وانا عندى ثقه فيكو.
حسن:تسلم يامعلم.
حمزة كان بيتفرج على المكن وعلى نوعيه الخشب اللى عجبته جداا وبص لحسن وباشارة منه حسن فهم انهم بيستعملو نوعيه نضيفه مش اى كلام .
حمزة واقف وساند على مكنه اللى بتقطع الخشب وكانت مطفيه بس ايده جت على المفتاح اللى بيشغلها بدون قصد والمكنه اشتغلت وايد حمزة جت عليها واتجرح فى كفه ايده من الجنب جرح عميق وكان بينزف جامد وحسن والكل جرو عليه وواحد من اللى بيشتغلو فى الورشه طفى المكنه بسرعه وقلع التيشيرت بتاعه وكتم الجرح لحمزة .
فتحى:فى مستشفى قريبه من هنا تعالو نروح نخيطله الجرح بسرعه.
حسن:يلا.
حسن وحمزة ركبو مع المعلم فتحى فى عربيته وراح على مستشفى النور .
بعد شويا وصلو والدكتور محمد خيط الجرح كويس جدا لحمزة .
محمد:الجرح كان عميق جدا واخد خياطه كتير والمفروض تريح ايدك على اد ماتقدر .
حسن:تمام شكرا يادكتور.
محمد:ده واجبي.
فجأه سمعو دوشه جامده فى المستشفى ومحمد خرج من الاوضه وحمزة وحسن وفتحى خرجو هما كمان لما صوت الزعيق على جامد وكان الدكتور فؤاد بيزعق لبنت جايبه والدتها تعمل عمليه ومش معاها تدفع الحساب كامل للمستشفى .
الدكتور محمد:فى ايه يادكتور فؤاد؟!
فؤاد:فى ان الحرس اللى هنا شغالين هنا مبقاش ليهم لازمه وبيدخلو اى حد المستشفى حتى المتسولين.
رحمه بنت الحاله:حرام عليك يادكتور انا بقولك اعمل العمليه لامى وانا هكملك المبلغ.
دكتورة اسراء واحده من المتدربين:حد قالك اننا بنعمل عمليات بالتقسيط يلا خدى امك وروحى شوفى مستشفى حكومى على اد فلوسك.
رحمه عيطت وامها قربت منها بتعب:خلينا نمشي يابنتى.
فؤاد:اسمعى كلام امك وخديها وامشي يلا.
رحمه بصت لفؤاد واسراء:حسبي الله ونعمه الوكيل فيكو.
فؤاد اضايق وزق ام رحمه بقوة وقعت على الارض ورحمه صرخت:ماامااا ... حرام عليك منك لله.
حسن اتعصب ولسه هيروحله حمزة مسكه:ملناش دعوة ياحسن هما احرار.
حسن:انت مش شايف بيعاملها ازاى.
فتحى:هما الدكاترة الكبار بيبقو كدا يابنى سيبك منهم.
دكتور محمد:دكتورة مها نادى لدكتورة رغد بسرعه.
حمزة ضحك وهمس لحسن:مش مكسوف من نفسه وهو واقف وبينادى على واحده ست تحل المشكله.
حسن:يعنى هى جت عليه ما كل الرجاله واقفين محدش بيدخل هاين عليا اقتل الراجل ده.
حمزة:ملناش دعوة ياحسن احنا جاين يوم وماشين.
بقلم الكاتبة جنات
بقلم الكاتبة جنات
ــــــــــــــــــــ★ــــــــــــــــــ
رغد قاعده فى مكتبها متعصبه جداا بعد مكالمه مؤمن ليها وقالها انه سمع فاروق وابنه بيخططو يتخلصو منها وياخدو الشركه من رهف .
كانت مضايقه جداا ومش قادرة تركز فى اى شغل وسمعت دوشه برا ولسه هتقوم باب مكتبها افتح ودخلت مها .
رغد:فى ايه برا؟!
مها:فؤاد عامل مشكله برا.
رغد بعصبيه:الله يخربيت فؤاد انا جبت اخرى منه.
رغد خرجت بكل عصبيتها من فاروق ومازن وفؤاد .
الكل كانو متجمعين حولين فؤاد ورحمه وامها تقريبا المستشفى كلها كانت بتتفرج على اللى بيحصل والكل بيهمسو وفجأه الكل سكتو لما سمعو صوت رغد:ايه اللى بيحصل هنا؟!
فؤاد بصلها اوى واسراء بصتلها بخوف .
فؤاد لسه هيتكلم قاطعته رغد بحده:مش عايزة اسمع نفس حد غير باذني انت سامع .... دكتورة مها ايه اللى حصل هنا بتفصيل؟
مها بدات تحكى لرغد كل اللى حصل بتفصيل ورغد كانت بتبص لفؤاد واسراء بغضب كبير .
رغد وقفت قدام فؤاد وربعت ايدها:انت ازاى تتصرف من دماغك وتاخد قرار يخص المستشفى من نفسك؟!
فؤاد:لان دى مستشفى محترمه وكبيرة المفروض الشحاتين دول ميدخلوش هنا.
رغد بصوت عالى وعصبيه:وانت مالك كانت مستشفى ابوك وانا معرفش ولا تكون بتعمل العمليات على حسابك مثلا .... انت اخرك هنا دكتور مالكش دعوة بقراراتى.
اسراء:بس يادكتوره رغـــ.
رغد بصتلها بغضب:انا سمحتلك تتكلمى .... لا ... يبقي تحطى لسانك جوا بوقك ومش عايزة اسمع نفسك غير لما انا اسمحلك ... ومتقلقيش دورك جاى .
رغد بصت لفؤاد تانى:بتقول عليهم شحاتين والمفروض ميدخلوش المستشفى مش كدا....ايه رايك بقي انت اللى هتعمل العمليه للحاله.
فؤاد:مستحيل ده يحصل واعلى ما فى خيلك اركبيه.
رغد:الكلام ده ليا .... طب ايه رايك بقي محدش هيعملها غيرك وده اخر كلام عندى.
فؤاد:بقي انا الدكتور فؤاد اعمل عمليه وببلاش انتى متعرفيش انا مين ولا ايه دانا احسن المستشفى يتمنو ابقي عندهم.
رغد:مستشفيات مين دول هو انت حد كان راضي يوظفك عنده عشان اخلاقك الزباله ... ادعى لبابا الله يرحمه اللى بسببه انت بتشتغل هنا .... واه هتعمل العمليه وببلاش كمان ياما هيكون ليا تصرف تانى معاك.
فؤاد:هتعملى ايه يعنى؟!
رغد:لا من ناحيه هعمل فانا هعمل كتير الصراحه ... وبتقرير بسيط منى اكتب فيه مسيرتك المشرفه فى المستشفى هنا واقدمه لنقابه الاطباء وقتها بدل مانت قاعد تضايق فى خلق الله فى المستشفى هتقعد فى بيتك زى اى واحد عواطلى ملوش اى تلاتين لازمه شوفت بقي اقدر اعمل ايه.
فؤاد بلع ريقه بخوف:ليه كدا بس يابنتى.
رغد:الوقت بقيت بنتك ... بس انا ميشرفنيش اكون بنت واحد زيك ماعندوش ضمير ... اتفضل جهز نفسك عشان تعمل العمليه فى اسرع وقت ودكتور محمد هيكون معاك عشان يشرف عليك ويقدملى تقرير عن العمليه اللى لازم تنجح بنسبه ١٠٠٪ ولو لقيت اى تقصير من ناحيتك متلومش غير نفسك ... اتفضل.
فؤاد مشي وهو نفسه يخنق رغد بسبب اللى عملته فيه .
حمزة همس لحسن:هى مين دى الكل مرعوب منها كدا ليه؟!
حسن عينه على رغد وشايف فيها قوة غير عاديه ومستغرب لانه اول مرة يشوف بنت بقوة دى .
رغد لفت وبصت لاسراء:وانتى مشيتى وراه ... قالك هيكتبلك تقرير كويس عشان تنجحى فى التدريب مش كدا ... بس انا المستشفى بتاعتى مش لازم يكون فيها متدربين زيك وعشان مافيش اى متدرب يعمل اللى عملتيه ويغلط غلطتك مرة تانيه ... هتروحى تلمى حاجاتك وتمشي ... ودكتوره مها تجهزى تقرير الدكتوره اسراء وتكتبي فيه اللى حصل النهارده.
اسراء:لا يادكتورة ونبي ارجوكى.
رغد:لالا متحوليش انا مبخرجش من عندى التقارير مزيفه التقارير بتخرج بتكون صحيحه وسليمه ١٠٠٪ ... وقبل ماتمشي اعتذرى من رحمه ووالدتها.
اسراء بصت لرحمه وامها:انا اسفه.
ومشت على طول .
رغد:دكتور محمد هتاخد رحمه ومامتها على اوضه كويسه جدا وهتعملو كل اللى عليكو بضمير ومش هيدفعو جنيه واحد حتى العلاج اللى هيجى من برا المستشفى احنا اللى هنتكفل بيه.
ام رحمه:بس ده كتير يابنتى.
رغد:لا مش كتير ولا حاجه واعتبريه اعتذار منى انا شخصيا على الموقف البايخ اللى حصل معاكو النهارده.
ام رحمه:تشكرى يابنتى ربنا يخليكى ويبارك فيكى يارب.
رغد ابتسمت:اه ونبي زودى من الدعوات الحلوة دى.
ام رحمه مشت مع دكتور محمد وهى بتدعى لرغد كتير .
رغد بصت للممرضات والدكاترة اللى واقفين:ايه ياجماعه انتو بتتفرجو على فيلم ولا ايه ... ولا تحبو كل واحد ياخدله تقرير سلبي من اللى بوزعهم النهارده.
كلهم ضحكو وراحو على شغلهم .
مها:انتى دايما كدا قادرة ومفتريه.
رغد بصتلها:انا ... طب ايه رايك انا بنفسي اللى هكتب تقرير فيكى يامها.
مها ضحكت:بس والله يابت رغد انتى جدعه خليتى فؤاد يتكتم.
رغد:انا كنت مضايقه وعلى اخرى وكنت محتاجه اطلع عصبيتى على حد وجت فى فؤاد وهو ابن حلال ويستاهل الصراحه.
مها ورغد ضحكوو.
رغد:فى حالات جت النهارده؟
مها:واحد بس ايده كان فيها جرح ودكتور محمد خيطه.
رغد:تمام انا هروح مكتبي.
مها:اوكى.
حسن وحمزة وفتحى كانو لسه واقفين
حمزة بص لحسن اللى عينه على رغد:مالك ياابو على؟!
حسن:هاا ولا حاجه يلا نمشي.
فتحى:يلا.
وخرجو من المستشفى واصرو انهم يمشو على طول وحسن طلب من المعلم فتحى يجى حد من الشباب يجيبله الموتوسيكل بتاعه بكرة عشان مش هيقدر يسيب حمزة يسوق وهو تعبان
بقلم الكاتبة جنات
ــــــــــــــــــــ★ــــــــــــــــــ
بليل رغد رجعت الڤيلا وقعدت مع رهف وحكتلها على كلام مؤمن.
رهف بخوف:يعنى ايه يخلص منك يارغد ... معقول عمو يفكر يقتلك؟
رغد:والله هو واطى ويعملها.
رهف عيطت:رغد تعالى نديله الشركه والمصنع احسن.
رغد:انتى عبيطه يارهف ده تعب بابا وشقاه نروح نديه لفاروق وابنه عديم المسؤليه ده.
رهف:مش احسن مايفكر ياذيكى.
رغد:وصيه بابا مش هتتغير يارهف وهو غصبن عنه هيرضي بيها.
رهف عيطت اكتر.
رغد:يعنى انا غلطانه انى قولتلك يارهف بطلى عياط بقي.
رهف:انا خايفه عليكى يارغد انا موت بابا وماما اثرو فيا بس وجودك هو اللى قوانى .... لكن انتى لو جرالك حاجه انا هموت من بعدك .
رغد حضنتها بقوة:محدش هيقدر يقرب منى ولا ومنك يارهف وبعدين احنا معانا اللى اقوى من فاروق وابنه ... معانا ربنا ياحبيبتى.
رهف:ونعمه بالله.
رغد:يلا قومى اغسلى وشك وروحى نامى وانا كمان تعبت النهارده وهروح انام .... اومال لارا فين؟
رهف:مؤمن اخدها النهارده.
رغد:تمام.
رهف:تصبحى على خير يارغد.
رغد:وانتى من اهله ياقلب رغد .
كل واحده راحت على اوضتها ونامو
بقلم الكاتبة جنات
ــــــــــــــــــــ★ــــــــــــــــــ
فى حارة البطل
هدى كانت سهرانه بتستنى الشباب يرجعو من سفرهم وكانت قلقانه لانهم اتاخرو .
الباب اتفتح ودخل حسن وحمزة.
هدى:حمدلله على السلامه ياولاد.
الشباب:الله يسلمك ياست الكل.
هدى خافت لما شافت ايد حمزة ملفوفه بشاش طبي:مالك ياحمزة لافف ايدك كدا ليه ؟!
حمزة:ده جرح بسيط ياهدهد متخافيش.
هدى:منين يابنى؟
حسن حكالها اللى حصل.
هدى:لا حول ولا قوة الا بالله مش تاخد بالك ياحمزة.
حمزة:نصيبى ياهدهد الحمدلله.
هدى:الحمدلله يابنى انها جت على كدا وانكو بخير ... هدخل احضلكو العشا.
حسن:متتعبيش نفسك ياست الكل احنا اكلنا فى الطريق.
هدى:بالف هنا ياحبايبى طب اطلعو ارتاحو يلا.
حسن:الحاج نام؟
هدى:انت عارفه بيصحى من بدرى مقدرش يسهر يستناكو وانا قولته هابقي اطمنك ... الوقت هطلع اطمنه انكو جيتو بسلامه.
حسن باس راسها:حاضر ياست الكل تصبحى على خير .
هدى:تصبحو انتو على كل خير ياولادى يارب .
الشباب طلعو كل واحد شقته وهدى كمان طلعت تنام .......
بقلم الكاتبة جنات
#روايه_حارة_البطل
#الكاتبة_جنات
»»الفصل الرابع ««
صباح يوم جديد على الكل .
فى مستشفى النور.
رغد قاعده فى مكتبها الباب خبط
رغد:اتفضل.
الباب اتفتح ودخل فؤاد واللى باين من لبسه انه لسه خارج من اوضه العمليات .
رغد:نعم؟
فؤاد:عمليه ام رحمه نجحت زى مانتى عايزة وممكن تطمنى عليها بنفسك.
رغد:تمام اوى ... انا بستنى تقرير دكتور محمد عشان اتاكد منه اتفضل على شغلك.
فؤاد خرج وهو مغلول من رغد ونفسه يقتلها .
رغد ضحكت:ناس ماتيجش غير بالعين الحمرة .
الباب خبط ودخلت مها:العمليات جاهزة يادكتورة يلا همى.
رغد:همى ... روحى ياختى وانا هاجى وراكى.
مها ضحكت وخرجت من المكتب ورغد قامت تجهز عشان تعمل العمليه للمريض.
ــــــــــــــــــــ★ــــــــــــــــــ
فى ڤيلا فاروق
شهيرة:وانت مفكر انك هتقدر تبعد رغد من طريقك تبقي غلطان ... البت دى ذكيه وقويه اوى انت ماسمعتش عملت ايه فى فؤاد امبارح دى فرجت عليه المستشفى كلها واهو راجل كبير بس ولا همها سنه .
فاروق:اومال نعمل ايه؟
شهيرة:احنا تركيزنا يبقي على رهف مش رغد ... وبصراحه انا عندى فكرة جنان.
فاروق:فكرة ايه دى؟
شهيرة:نطلب ايد رهف لمازن واهو نضحك عليها بكلمتين وهى عبيطه وهتوافق ولما تبقي مرات ابنك كل اللى بتملكه هيبقي ملكه وملكنا كلنا.
فاروق:فكرة حلوة بس اكيد رغد مش هتوافق حتى لو اختها وافقت.
شهيرة:خلينا نجرب ونشوف.
فاروق:المحروس ابنك هيوافق ده بيعشق رغد .
شهيرة:لا ماحنا مش هنقوله وهو هينفاجأ بالطلب.
فاروق:واحنا هنطلبها امته؟!
شهيرة:خير البر عاجله يافاروق انا هكلم رهف الوقت واقولها اننا جايين نتغدى معاكو.
فاروق:ماشي لما نشوف اخرة دماغك.
شهيرة وهى بتطلب رقم رهف:كل خير ياحبيبي.
ــــــــــــــــــــ★ــــــــــــــــــ
فى ڤيلا الحديدى رهف قاعده فى المرسم كالعاده بتكمل لوحه باباها ومامتها وفونها رن برقم شهيرة .
رهف استغربت لانها مش بتكلمها كتير:الو.
شهيرة:ازيك يارهف ياحبيبتى ؟!
رهف:بخير الحمدلله ياطنط حضرتك اخبارك ايه؟
شهيرة:انا بخير طول مانتى واختك بخير ... انتى فى الفيلا يارهف؟!
رهف:ايوا .
شهيرة:طب كويس انا بكلمك عشان اقولك ان انا وعمك ومازن هنيجى نتغدى معاكو النهارده لو مش هيضايقكو يعنى.
رهف سكتت شويا:لا طبعا ياطنط تنورو فى اى وقت .
شهيرة:حبيبتى يارهف اسيبك الوقت باى.
رهف:باى.
رهف قفلت وافتكرت كلام رغد:معقول عايزين يأذو رغد لما يجو.
رهف رنت على رغد بس مش بترد .
رهف:صح دى قالتلى ان عندها عمليه وهطول فيها انا اكلم مؤمن احسن.
رهف كلمت مؤمن وقالتله.
بقلم الكاتبة جنات
ــــــــــــــــــــ★ــــــــــــــــــ
فى حارة البطل
الشباب قاعدين بيفطرو ومعاهم الحاج محمود وهدى وحنين .
محمود:ايدك مالها ياحمزة؟!
حمزة:جرح بسيط من مكنه تقطيع الخشب ياحاج متشغلش بالك.
محمود:الحمدلله انها جت على اد كدا يابنى بعد كدا خد بالك على نفسك.
حمزة:حاضر ياحاج.
محمود قام:هطلع فوق شويا.
هدى:حاضر ياحاج .
حنين:ابو على.
حسن:نعم يانونه.
حنين:ممكن النهارده اروح مع صاحبتى نتمشي على البحر وهشترى شويا حاجات واجى؟
حسن:ماشي ياحنين روحى ممنوع تاخير.
حنين:حاضر ياابو على.
هدى:مش هتخرجى غير بعد الغدا ياحنين.
حنين:ليه ياماما؟؟
هدى:مرات خالك وعزة وعزت جاين النهارده بليل .
حسن:ينورو ياست الكل .
حنين:ياماما انا ماصدقت انى هخرج عشان اجيب كل اللى ناقصنى عشان هبدا دروس الاسبوع الجاى.
حمزة:الاجازة خلصت؟
حنين:اه كفايه عليهم شهر راحه .
هدى:هو انا قولتلك متخرجيش يابت انا بقولك اخرجى بعد ماتساعدينى فى تحضير الغدا.
حنين:حاضر ياماما.
هدى:حسن مرات خالك كلمتنى امبارح بليل وطلبت يعنى انك...
حسن:خير ياست الكل؟!
هدى:عايزاك تتجوز عزة بنتها هى البت حلوة ياحسن.
حسن بصلها ومردش وحمزة وحنين بصو لبعض .
حنين:مين دى ياماما اللى حلوة دى كلها فيلر يادودو.
هدى:اسكتى انتى يابت ... هى بس عيبها الوحيد يابنى انها غلاويه زى امها.
حسن ضحك:طب ترضيها لابنك ياست الكل يتجوز واحده غلاويه وبعدين ربنا يبعدهم عننا .... انا مش بفكر فى جواز الوقت.
هدى:اومال ناوى تفكر امته يابن بطنى لما يبقي عندك ٥٠ سنه وسنانك تقع.
حمزة وحنين ضحكو وحسن بصلهم نظرة خليتهم يكتمو ضحكهم .
هدى:طيب بلاها عزة نشوف بنت تانيه ماالبنات على قفا مين يشيل يابنى ... بس هقول لمرات خالك ايه.
حسن:متقوليش حاجه ياست الكل لو فتحت الموضوع هرد عليها انا.
هدى:بس بالادب ياحسن متنساش انها مرات خالك.
حسن:عارف ياست الكل وانا مستحيل اصغرلك واخلى حد يعيب فى تربيتك وتربيه الحاج محمود.
هدى:ربنا يبارك فيك ويبعتلك بنت الحلال اللى تسعدك يابن بطنى يارب.
حمزة وهو بياكل:ونبي ياهدهد ابنك عايزله واحده زى الدكتورة اللى شوفناها امبارح فى القاهرة قويه وقادرة زيه كدا بظبط.
حسن بصلها بغضب:تعرف تسكت .
هدى:دكتورة ... فين دى ياواد ياحمزة احكيلى شوفتها فين؟
حمزة ساب الاكل وحكالهم على الموقف اللى حصل فى المستشفى.
حنين:والله دى بنت بـ ١٠٠ راجل انها عملت فيه كدا .
هدى:ربنا يكتر من امثالها شكلها بنت اصول .... اسمها ايه ياحسن؟!
حسن:وانا مالى يااما اسمها ايه هو انا هعملها بطاقه وبعدين ده موقف وعدى خلاص.
حمزة:اسمها رغد ياهدهد .
حسن:انت صاحى رايق ومزاجك حلو وقاعد تيلت وتعجن زى الحريم قوم يلا ورانا شغل .
حسن خرج وحمزة بص لهدى وهمس:وحياتك عندى ياهدهد ماشال عينيه من عليها شكل البطل وقع على بوزه .
هدى:يارب ياخويا بس ملاقاش غير القاهرة مالهم بنات اسكندريه يعنى؟!
حنين:وبنات القاهرة حلوين بردو يادودو وبعدين بيقولك دكتورة .
هدى:واحنا هنفضل ممشورين نفسنا بين القاهرة والاسكندريه ايه الدوخه دى.
حمزة:انتى محسسانى انهم هيتجوزو بكرة ياهدهد!!
حسن زعق من برا:ماتخلص يابنى انت هتنام على السفرة!!
حمزة:جاى يابطل.
حمزة خرج وحنين وهدى دخلو المطبخ يجهزو الغدا عشان الضيوف اللى هتوصل بليل .
بقلم الكاتبة جنات
ــــــــــــــــــــ★ــــــــــــــــــ
بليل فى ڤيلا الصاوى
رغد ورهف قاعدين بيستنو فاروق ومراته وابنه ومؤمن ولارا وصلو هما كمان عشان يبقي مع البنات .
رهف:هما اتاخرو ليه؟!
رغد:يارب يكونو غيرو رايهم وبعدين دول قالو هيتغدو معانا مش يتعشو ايه الناس دى انا جوعت.
رهف:عيب كدا يارغد وبعدين متنسيش دول ضيوف عندنا وماما الله يرحمها علمتنا نحترم الضيف .
رغد:ضيوف ايه يارهف دول تقولى عليهم اعداء ياحبيبتى .
مؤمن:اهدو بقي فى صوت عربيه برا .
فاروق وعيلته وصلو ودخلو الڤيلا واستقبلهم مؤمن ورغد ورهف وقعدو كلهم فى الريسبشن
شهيرة:عاملين ايه يابنات ؟
رغد:بخير الحمدلله.
شهيرة:انا قولت نيجى نتغدى سوا ونقضي وقت مع بعض من زمان متجمعناش ... ربنا يرحمها مريم هى اللى كانت دايما بتجمعنا.
الكل:يارب .
رغد نادت على واحده من الخدم عشان يحضرو السفره .
بعد شويا خرجت دادا سلمى:اتفضلو ياجماعه السفرة جاهزة.
الكل راحة قعدو على السفرة ورغد كانت مضايقه من مازن اللى ماشالش عينه من عليها من وقت مادخل الڤيلا .
وبعد ماخلصو اكل قعدو كلهم فى الجنينه وسلمى والخدم كانت بيقدمو الضيافه .
شهيرة:بصراحه يابنات فى سبب تانى لجمعتنا دى .
رغد:خير؟
شهيرة:كل خير يارغودة ياحبيبتى ... اتكلم يافاروق .
فاروق:احنا يشرفنا نطلب ايد رهف لمازن ابنى .
مازن كان بيشرب العصير وفضل يكح جامد وبص لابوه واتفاجأ لانه ماكنش يعرف ورهف ورغد اللى اتصدمو واتفاجأو بالطلب ده ومؤمن زيهم .
رغد لاحظت ان مازن اتفاجأ بالموضوع .
شهيرة:قولتى ايه يارهف؟
رهف بصت لرغد ومش عارفه تقول ايه .
رغد:مش مازن كان طالب ايدى للجواز من بابا الله يرحمه قبل مايتوفى ؟
شهيرة:ماهو محصلش نصيب يابنتى .
رغد بسخريه:يعنى بلاها رغد ناخد رهف .
فاروق:لا يابنتى مش كدا بس انتى شايفه جمال الله يرحمه كتب حاجات كتير باسم رهف ولو اتجوزت حد غريب وعرف هيطمع فيها ووقتها فلوسها هتبقي فى ايده.
رغد:انت فكرت انك تجوزها لابنك عشان فلوسها تبقي فى ايده مش كدا؟؟!
شهيرة:صح يابنتى وبعدين مش دايما بيقولو البنت لابن عمها وكدا هنأمن على الشركه والمصنع وهى متجوزة مازن احسن ماتتجوز غريب عننا.
رغد:لا والله بالعكس.
فاروق:قصدك ايه؟
رغد:قصدى انى أأمن الغريب ومأمنش ابنك .
فاروق ومراته اضايقو من طريقه رغد .
شهيرة:ايه الاسلوب ده يارغد مش عيب تتكلمى مع عمك ومعايا كدا هى دى تربيه مريم ليكى.
رغد:لا مريم ربتنى كويس جدا وعملتنى اخد حقى وحق اختى ومخليش حد يلعب علينا او يفكر يضحك علينا ... احنا اسفين ياعمو طلبكو مرفوض.
شهيرة:بس احنا بنطلب رهف مش انتى عشان انتى اللى تردى.
رغد بصت لرهف:ردى انتى يارهف عشان يطمنو .
رهف:انا اسفه ياعمو واسفه ياطنط شهيرة بس مازن اخويا وانا مش بفكر فى الجواز الوقت.
شهيرة:ده اخر كلام عندكو .
رغد:ايوا .
شهيرة قامت وقفت وفاروق ومازن اللى لسه مصدوم من طلب ابوه اللى عارف انه بيعشق رغد وخرجو من الڤيلا .
مؤمن:رغد انا ماحبيتش ادخل لان ده موضوع يخصكو ... بس انتى المفروض متتعامليش معاهم على انهم اعداءك كدا لازم تكسبيهم فى صفك .
رغد:انت عارفنى يا مؤمن مش بعرف اجامل حد ده مش طبعى .
رهف:بس يارغـ...
رغد:بس ايه... كنتى حابه تتجوزيه مثلا؟!
رهف:اكيد لا .
رغد:يبقي اسكتى بقي وانا عملت كدا عشان يقفلو على الموضوع خالص وميفكروش يفتحوه مرة تانيه.
مؤمن:تمام يارغد انا همشي انا بقي وهسيب لارا معاكو بما انها نامت.
رغد:حاضر .
مؤمن خرج من الڤيلا ورغد بصت لرهف اللى مضايقه منها:عارفه هتقولى ان المفروض اكلمهم بطريقه احسن من كدا .
رهف:كويس انك عارفه .
رغد:رهف انا مخنوقه من عمك ومراته وابنه كويس انى مولعتش فيهم .
رهف قامت وقفت:انا عارفه مهما فضلت اتكلم معاكى مش هتغيرى اللى فى دماغك يارغد .... انا طالعه انام جمب لارا.
رغد قامت بسرعه وحضنتها:اوعى تزعلى منى انا ازعل الدنيا كلها بس انتى لأ يارهف .
رهف ابتسمت وحضنتها:وانا عمرى مازعل منك ابداا.
رغد:حبيبتى يارهف قلبي انتى .
رهف:يلا تصبحى على خير .
رغد باستها من خدها:وانتى من اهله ياروحى .
رهف طلعت ورغد قعدت مكانها تانى:انتى طيبه اوى يارهف ومش عارفه نوايا الكلاب دول ايه ... بس انا هحميكى لاخر نفس فيا يانصي التانى.
رغد قامت وطلعت اوضتها عشان تنام هى كمان.
بقلم الكاتبة جنات
ــــــــــــــــــــ★ــــــــــــــــــ
فى بيت الحاج محمود البطل الكل كانو متجمعين فى الشقه اللى فى دور الارضي بعد وصول أولفت مرات اخو هدى وبنتها عزة وابنها عزت واتغدو كلهم سواا وكان الشباب لسه فى الورشه .
اولفت:اومال حسن فين ياهدى ماشوفنهوش يعنى من وقت ماوصلنا؟؟!
هدى:حسن وحمزة فى الورشه .
اولفت:ربنا يعينه ويقويه ده شايل الشغل كله على كتفه.
محمود:حسن وحمزة بيشتغلو سوا وشايلين الورشه مع بعض .
عزت:بس فى الاول وفى الاخر الورشه هتبقي باسم حسن ولا ايه ياحاج؟!!
هدى:ربنا يطول فى عمر الحاج ياعزت والحاج محمود عمره ماهيفرق بين ولاده ابداا وحمزة زيه زى حسن بظبط عندنا .
اولفت بسخريه:طبعا اومال ايه .
عزة:اومال حنين فين ياعمتو من وقت الغدا وهى مش موجوده.
هدى:راحت تتمشي مع واحده صاحبتها وهنشترى شويا حاجات عشان هتبدا دروس الاسبوع الجاى وهتيجى.
اولفت:بنات اخر زمن دول ياهدى ... عزة بنتى مش بتخرج ولو حبت تجيب حاجه انا اللى بجيبها.
هدى:اه ياختى انتى هتقوليلى .
هدى نهت كلامها وحطت ايدها على بوقها اللى اتحرك يمين وشمال (ايواا زى مانتو عملتو كدا بظبط😂😂😂) .
محمود:عن اذنكو هطلع ارتاح فوق.
اولفت:اتفضل ياحاج .
فى الوقت ده دخل حمزة وحسن ومعاهم حنين .
حسن:السلام عليكم .
الكل:وعليكم السلام.
هدى:حمدلله على سلامه ياولاد.
حسن دخل وباس راس امه:الله يسلمك ياست الكل .
وحمزة عمل زيه وحنين باستها من خدها
حسن:ازيك يامرات خالى؟
اولفت:بخير يابنى.
حمزة:ازيك ياام عزت؟
اولفت:بخير ياحمزة.
حنين سلمت على اولفت وعزة وحضنتهم
حسن:عامل ايه ياعزت ؟
عزت:بخير يابطل.
حمزة:عاش من شافك ياجدع.
عزت:انت عارف انى اللى ماسك ورشه ابويا الله يرحمه.
هدى:ربنا يرحمه ويعينك يابنى .
عزة:اخبارك ايه ياابوعلى؟
حسن من غير مايبصلها:بخير يابنت خالى.
هدى:انتو جيتو سوا ازاى يابنى؟!
حمزة:احنا خلصنا شغل وروحنا قعدنا على قهوة قريبه من المكان اللى كانت قاعده فيه حنين وصاحبتها ولما خلصت جينا سوا.
هدى:ربنا يخليكو لبعض ياحبايبى يارب .... يلا روحو غيرو هدومكو على مااحضرلكو الاكل ياولاد.
اولفت:خليكى ياهدى انتى ... قومى ياعزة حضرلى الاكل .
عزة:حاضر ياماا.
عزة دخلت تحضر الاكل والشباب وحنين غيرو ونزلو واتعشو سواا وبعدها اتجمعوو وقعدو مع بعض وعزة عماله تشاور لامها عشان تفتح موضوعها هى وحسن .
اولفت:هو انت ياحسن لسه بتنام فى شقتك ؟
حسن:ايوا يامرات خالى.
اولفت:ومش أن الأوان بقي تجهزها؟!
هدى:ويجهزها ليه يااولفت الشقه جاهزة من كله وحلوة.
اولفت:لا ياهدى انا قصدى يجهزها عشان يتجوز بقي.
هدى فى نفسها:مش هتجيبها لبرا.
حسن:لا يامرات خالى مش بفكر فى الجواز .
اولفت:وهتفكر امته ياحسن؟؟!
حسن:لما الاقى بنت الحلال وقتها هابقي افكر .
اولفت:وانا عندى ليك عروسه حلوة .
حمزة حب يضايق حسن:هى مين يام عزت؟
حسن بصله بضيق وحنين بتحاول تكتم ضحكتها .
اولفت:عزة بنتى ياحسن ايه رايك؟!
حسن:قولتلك يامرات خالى مش بفكر فى الموضوع ده وبعدين عزة بالنسبالى اختى زى حنين بظبط.
اولفت بضيق:بس عزة مش اختك ياحسن وتجوزلك ... ولا بنتى مش عجباك؟!
حسن:مين قال كدا يامرات خالى عزة بنت حلال ربنا يبعتلها اللى يستاهلها ... لكن انا بعتبرها زى حنين اختى .
اولفت بضيق:احنا تعبانين وعايزين ننام ياهدى يلا ياعزة انتى وعزت عشان نطلع.
حسن:عزت هينام فى الاوضه اللى هنا يامرات خالى.
عزت:وده ليه بقي ؟!
حسن:انت ناسي ان حنين هتنام فوق ياعزت .
عزت:بس حنين زى اختى عزة.
حسن:لا مش اختك وتجوزلك ولا ايه يامرات خالى عرفى ابنك الاصول.
اولفت اضايقت منه:خلاص ياعزت نام هنا واحنا هنام فوق .
حسن:عن اذنكو هطلع انام لان اليوم كان طويل وتعبنا .
هدى:اطلع ياحبيبى ربنا يسعد قلبك يارب .
حمزة وحسن طلعو كل واحد شقته وعزت دخل الاوضه واولفت وعزة اللى كانو مضايقين من حسن طلعو مع هدى وحنين عشان ينامو ......
بقلم الكاتبة جنات
#روايه_حارة_البطل
#الكاتبة_جنات
»»الفصل الخامس ««
عدى اكتر من شهر
فاروق اللى هيتجنن وعايز ياخد الشركه والمصنع من رغد ورهف باى طريقه ومش عارف .
شهيرة اللى حاولت تانى وتالت مع رهف عشان توافق على مازن بس رهف مصممه على رايها .
رغد اللى خوفها بيزيد على رهف من فاورق كل يوم .
حسن وحمزة اللى كل همهم الشغل .
اولفت اللى اتحججت ان بيتهم هيقع وجالهم قرار بازاله عشان تفضل عايشه فى بيت البطل.
ـــــــــــــــــــ★ــــــــــــــــ
فى شركه الصاوى .
مؤمن راح على مكتب فاروق ووقف قدام السكرتيرة الخاصه بيه:فاروق بيه جوا ؟
السكرتيرة:لا يافندم فاروق بيه لسه على وصول.
مؤمن:طب هاتيلى فنجاه قهوة وانا هستناه على مايجى.
السكرتيرة:حاضر.
السكرتيرة مشت ومؤمن دخل المكتب وطلع من جيبه مايك صغير جدا وحطه تحت المكتب عشان محدش يشوفه وخرج بسرعه قبل السكرتيرة ماتوصل .
السكرتيرة جت ومعاها القهوة اخدها مؤمن:شكرا انا هشربها فى مكتبي لما فاروق بيه يجي عرفينى .
السكرتيرة:حاضر يافندم.
مؤمن راح على مكتبه وكلم رغد:كله تمام حطيت المايك فى مكتبه .
رغد:تمام يامؤمن لما نشوف اخرتهم ايه؟
مؤمن:طب افرض اتفقو فى اى مكان تانى .. فى ڤيلتهم مثلا.
رغد:معرفش بقي يامؤمن انا قولت نسمع اى حاجه عشان اطمن .
مؤمن:ان شاء الله يارغد اهدى انتى بس.
رغد:حاضر ... سلام بقي.
مؤمن:سلام.
ــــــــــــــــــ★ـــــــــــــــــ
فى حارة البطل .
حمزة وحسن فى الورشه بيتممو على البضاعه والخشب اللى كانت عبارة عن اوض نوم واطفال وسفره بكراسي وصالونات
قبل ماتتحمل عشان تروح معرض المعلم فتحى .
حسن:الله ينور يارجاله ولا غلطه .
حمزة:حسن انت مش شايف اننا المفروض نروح مع البضاعه ؟
حسن:لا الرجاله موثوق فيهم متقلقش والمعلم فتحى هيكون فى استقبالهم.
حمزة:اللى تشوفه .
البضاعه اتحملت والعربيات بدات تتحرك على القاهرة .
حمزة:طب كدا كله تمام .
حسن:تركيزنا بقي يبقي على اوض النوم اللى هتتعرض فى المعرض الجديد .
حمزة:الاوض كلها واقفه على التشطيب ياحسن .
حسن:طب تمام ... تعالى نرجع البيت لان ست الكل مبطلتش رن عشان نروح ناكل معاهم.
حمزة:لا روح انت اتغدى معاهم انا هفضل هنا مع الشباب.
حسن بصله:مالك ياحمزة غريبه اول مرة ترفض تاكل معانا ؟!
حمزة:مافيش حاجه ياحسن .... انا هفضل هنا اتمم على الشغل وهاجى لما اخلص.
حسن:مش عايز تروح عشان مرات خالى صح ؟
حمزة:وهى مرات خالك هتعملى ايه يعنى؟!
حسن:لا تعمل كتير ياحمزة مش كدا ياصاحبي انت مابتعرفش تكدب عليا.
حمزة:خلينى هنا احسن ياابو على.
حسن:طب ايه رايك هكلم الحاجه تبعتلنا الاكل هنا ومش هروح.
حمزة:بس كدا مرات عمى هتزعل منك ياحسن.
حسن:لا متقلقش انا هخليها تبعتلنا اكل لينا ولشباب كمان وناكل سوا من زمان معلمنهاش .
حمزة:تصدق فكرة حلوة والشباب ماهيصدقو ده الكل بيعشق اكل هدهد.
حسن ضحك وكلم والدته وقالها وهى رحبت جدا وبعد شويا بعتت الاكل مع محمد اللى بعته حسن عشان يجيب الاكل وقعدو حمزة وحسن وكل الشباب اللى فى الورشه اكلو سواا وضحكو وهزرو كتير وبعد ماخلصو اكل الكل رجعو على شغلهم تانى .
ــــــــــــــــــــــ★ـــــــــــــــــــــ
فى المستشفى رغد قاعده فى مكتبها والباب خبط .
رغد:ادخل.
الباب اتفتح ودخل مازن وقعد على الكرسي وحط بوكيه ورد احمر على المكتب كل ده . ورغد بتبصله:نعم!!
مازن:يعنى جاى وجيبلك ورد وتقوليلى نعم ... مافيش شكراا ياميزو.
رغد بسخريه:ميزوو !! ....لا مافيش شكرا ياميزو وخد وردك وامشي يلا مش فاضيه للعب العيال ده .
مازن:انتى بتسمى حبي ليكى لعب عيال يارغد .
رغد:حب ايه يابابا ... هو مش انت من يومين كنت جاى تتقدم لرهف ولا انت هتفضل ورانا واللى توافق اهلا وسهلا.
مازن:اولا انا ماليش دخل ولا كنت اعرف ان بابا هيطلب ايد رهف .... ثانيا بقي انا مش بحب حد غيرك يارغد انتى بس اللى فى قلبي .
رغد:مازن بص هما كلمتين وبس تسمعنى وتحطهم حلقه فى ودنك ماشي.
مازن:وانا كلى أذان صاغيه اتفضلى.
رغد:اذا كان انا ولا رهف مش هنكون ليك ولو فكرت تيجى هنا مرة تانيه وتعمل الفيلم العبيط ده وورد وحب وكلام فارغ هطلبلك الامن يرميك برا المستشفى ... فاتفضل اخرج بكرامتك احسنلك.
مازن بصلها وكان مضايق منها جدااا وقام عشان يخرج ووقف لما رغد نادت عليه ولف بصلها:نعم!
رغد:خد الورد ده اديه للى ناوى تسهر معاها النهارده .
مازن رجع اخد البوكيه بعصبيه وخرج من المكتب ومن المستشفى كلها ورغد ضحكت:قال حب قال تك وكسه ياميزو.
وكملت شغلها .
بقلم الكاتبة جنات
ــــــــــــــــــــــ★ـــــــــــــــــــــ
مازن راح الشركه ودخل مكتب ابوه وهو متعصب وقعد على الكرسي وفاروق بصله:مالك متعصب كدا ليه؟!
مازن بصله:انا موافق.
فاروق باستغراب:موافق على ايه مش فاهم.
مازن:نخلص من رهف.
فاروق:ورغد؟
مازن:لا ... احنا لما نخلص من رهف هنكون كسرنا رغد كسرة عمرها ومش هتقدر تقوم منها ووقتها هنقدر ناخد الشركه والمصنع والمستشفى كمان .
فاروق:تصدق فى دى انت صح .
مازن:ووقتها هتكون ليا غصبن عنها .
فاروق:خلاص سبنى افكر كدا عشان اعرف هنخلص منها ازاى .
مازن:اللى اعرفه ان رهف مش بتخرج من الڤيلا .
فاروق:حتى لو جوا اوضتها هخلص منها .
مازن:وياريت يبقي معاها البت الصغيرة بنت مؤمن عشان نبقي كسرناهم هما الاتنين وميقدرش يساعدها.
فاروق:ده ايه الدماغ السم دى ياواد.
مازن:تربيتك يافاروق باشا.
فاروق ضحك:بس بلاش امك تعرف باللى بخطط ليه.
مازن:ليه؟؟!
فاروق:لانها رافضه الفكرة وقال ايه خايفه يترد فيك .
مازن:ماهى كانت موافقه ايه اللى حصل؟
فاروق:غيرت رايها فجاه كدا وطلعت الامومه اللى جواها .
مازن:خلاص نبقي نتفق فى كل حاجه هنا بعيد عنها.
فاروق:تمام وانا هفكر واشوف هنوصل ايه .
مازن:وانا كمان هفكر معاك والحل الانسب ننفذه.
فاروق:حلو اوى.
مازن:انا همشي بقي .
فاروق:تمام .
مازن مشي وفاروق ضحك بخبث وكمل شغله تانى .
بقلم الكاتبة جنات
ــــــــــــــــــــــ★ـــــــــــــــــــــ
فى اخر اليوم.
حمزة وحسن رجعو البيت كان الكل متجمعين فى الدور الارضي .
حمزة وحسن:السلام عليكم.
الكل:وعليكم السلام ورحمه الله وبركاته.
هدى:حمدلله على السلامه ياولاد اتاخرتو ليه النهارده.
حسن:كنا بنحمل شغل ياست الكل .
محمود:ربنا يقويكو ياولاد ويعنيكو يارب .
اولفت:ربنا يقويك ياحسن وتحمى مالك ومال ابوك من اللى طمعانين فيه.
اولفت نهت كلامها وهى بتبص لحمزة اللى اضايق جدا منها والكل لاحظ نظرتها ليه .
حسن:متشغليش بالك يامرات خالى كل اللى بيشتغلو معانا بيخافو على مال الحاج محمود كأنه مالهم هما ومحدش طمعان فى ماله .
حسن بص لحمزة وشايفه مضايق وحط ايده على كتفه:وبعدين انا مستحيل اشيل هم ولا حمل الشغل لوحدى طول ما فى ضهرى اخ مستعد يفدينى بعمره كله .
حمزة بصله بامتنان:تسلم ياصاحبي .
محمود:ربنا يبارك فيكو ويخليكو لبعض ياشباب.
هدى:يارب ياحبيبي ويبعد عنكو ولاد الحرام وعيون الوحشه ... قومى ياحنين حضرى لقمه لاخواتك يلا .
عزة:انا موجوده هحضرلهم ياعمتى .
حسن:لا متتعبيش نفسك ياعزة ... ابقي طلعلينا الاكل فوق فى شقتى يانونه.
حنين:حاضر ياابو على .
الشباب طلعو كل واحد غير فى شقته وبعدها حمزة طلع لحسن .
حسن:اوعى تزعل من كلامها انت عارفها بترمى كلام وخلاص .
حمزة:لا مش زعلان ياحسن متقلقش .
حسن:وبعدين ياض هو انا اقدر استغنى عنك دانت اخويا وصاحبي وسندى فى الدنيا.
حمزة ضحك:ربى اللى يعلم انت ايه عندى يا
بطل.
حسن:حبيبي ياصاحبي.
الباب خبط وحسن قام يفتح وكانت حنين وشايله صنيه الاكل:احلى عشا لاحلى ابطال فى الدنيا .
حسن اخد منها الصنيه:تعالى بقي كلى معانا.
حنين:وانا اقدر اقول لا بردو .
قعدو كلهم اكلو سوا وضحكو وهزرو كتير .
حنين:اوعى تزعل من مرات خالى يازومه انت عارف طبعها بترمى طوب مش كلام .
حمزة:انا والله خايف فى مرة افقد اعصابي وقتها الحاج محمود ومرات عمى هيزعلو منى .
حسن:طنشها ياحمزة ولا كأنها بتتكلم يكون احسن.
حنين:اومال انا اعمل ايه طب انتو بتخرجو لكن انا فى وشها هى وبنتها طول اليوم وبسمع منهم كلام كتير وبرمى ورا ضهرى وماما تقولى معلش ضيوفنا نستحملهم ....دانا لما بطلع اعطى الدروس للولاد بنتها بتطلع ورايا لما زهقت ... بقولك ايه ياابو على ماتساعدهم فى موضوع البيت ده خليهم يتوكلو من عندنا .
حسن:البيت زى الفل مافيش فيه حاجه هى اخداها حجه عشان تفضل هنا مش اكتر .. وانا عرفت الحاج وقالى معلش نستحمل عشان خاطر ست الكل.
حنين:ربنا يصبرنا بقي على مايمشو .... قال صحيح ياابو على اخبار رغد ايه؟!
حنين غمزت لحمزة اللى كتم ضحكته .
حسن باستغراب مصتنع:رغد مين؟
حمزة:طب بذمتك عينك فى عينى كدا مش فاكر رغد مين ... الدكتورة ياابو على.
حسن:وانا هعرف اخبارها منين .
حنين:يعنى مسالتش عليها تعرف مرتبطه ولا سنجل كدا يعنى.
حسن:لا مسالتش ومش هسال وخفى على المسا بقي.
حنين:يوه بقي مافيش واحد فيكو عايز يفرحنى ويخلينى البس فستان سواريه فى فرحه .
حمزة ضحك:انتى كل طموحك تلبسي فستان سواريه يابت .
حنين:اه مانا هابقي اخت العريس بقي ... واللى هيبقي عريس فيكو هو اللى هيفصلى فستانى على حسابه انا بقولكو اهو .
حمزة:انا معنديش مانع بس تيجى بنت الحلال.
حنين:اسعى ياخويا وانت هتلاقيها ولا هى هتيجى لحد عندك مثلا .
حسن تفكيره راح لرغد وقوتها اللى تقريبا شاغله راسه من وقت ماشافها .
حنين شاورت لحمزة على حسن .
حمزة:اللى واخده عقلك يابطل.
حسن بصله بحده:انتو هتنامو هنا ولا ايه .
حنين:احنا اطردنا يازومه ...يلا انا هنزل انام بكرامتى تصبحو على خير .
حمزة ضحك:انا جاى معاكى سلام ياابو على .
حسن:سلام ياخويا .
حمزة نزل شقته وحنين كمان وحسن نام .
ــــــــــــــــــــــ★ـــــــــــــــــــــ
رغد قاعدة مع رهف فى المرسم .
رغد:انتى بجد مصدقه كلامك ده ... ده مؤمن سامعهم بودانه انهم عايزين يخلصو مننا.
رهف:ياستى مايمكن يكون فهم غلط وبعدين انتى شوفتى بنفسك رضي بوصيه بابا ومعلمش حاجه وعدى اكتر من شهر على الكلام ده .... طنط شهيرة كل يوم تتصل تطمن عليا ومابقيتش تجيب سيرة موضوع مازن خالص.
رغد:ماشي يارهف انا وانتى اهو والزمن طويل وهيبان مين فينا اللى غلطان .
رهف:يلا نطلع ننام بقي .
رغد:يلا .
كل واحده من البنات راحت اوضتها ورغد فتحت فونها عشان تسمع وتعرف فاروق كان بيعمل ايه فى مكتبه النهارده وقلبها دق بخوف لما سمعت كلامهم عن رهف ولارا وكانت هتجنن .
رغد:ياولاد الايه عايزين تكسرونى انا ومؤمن بموتهم .... ورهف تقولى فاهمين غلط والله انتى طيبه يارهف ....بس مش هاقبل ان شعره واحده بس منك تتمس وانا وانت والزمن طويل يافاروق الكلب انت وابنك .
رغد فضلت تفكر كتير وبعدها نامت من التعب .
بقلم الكاتبة جنات
ــــــــــــــــــــــ★ـــــــــــــــــــــ
تانى يوم رغد اول ماصحت كلمت مؤمن يجيلها وخرجو سوا عشان رهف ماتعرفش بكلام عمها وراحو قعد على النيل.
ومؤمن سمع كلامهم وكان مصدوم ومش متخيل انهم يدخلو طفله صغيرة فى خططهم الخبيثه .
رغد:هنعمل ايه انا خايفه اوى عليهم ؟!
مؤمن:مش عارف يارغد ... طب تيجو تعيشو فى الڤيلا عندى.
رغد:انت مش سامع بيقوله لو فى اوضه نومها هجيبها ... احسن حاجه انهم هيتفقو على كل حاجه فى الشركه عشان نعرف خططهم ايه ...عايزة اعرف ناوين على ايه عشان نقدر نتصرف.
مؤمن:اطمنى يارغد ربنا معانا وان شاء الله هيحمى رهف ولارا.
رغد:يارب يامؤمن.
مؤمن بتفكير:طب ماتمشو من الفيلا خالص وروحو مكان ميقدرش يوصلكو.
رغد:ازاى والمستشفى وبعدين انا مش عايزة اهرب يامؤمن انا مش جبانه.
مؤمن:عارف انك مش جبانه يارغد بس خافى على رهف وعلى لارا هما حطوهم فى دماغهم .
رغد:انت عندك حق بس هنروح فين .
مؤمن:ندور على مكان محدش يعرفه غيرنا .
رغد:تمام هفكر واقولك .
مؤمن:صح لازم تلمى اى حاجه مهمه او ورق يخص الشركه او المصنع او المستشفى وتاخديهم معاكى.
رغد:انا هبدأ اعمل كدا من دلوقتى ومش هعرف رهف حاجه.
مؤمن:ليه؟!
رغد:لان رهف ببساطه شايفه اننا ظلمينهم ... وانك فهمت اللى سمعته غلط وكمان انا مستحيل اخوفها واسمعها كلام فاروق .
مؤمن:طب ماتيجى نبلغ عنهم ونقدم التسجيل ده لشرطه.
رغد:الشيطان اللى زى فاروق مستحيل يقعد دقيقه فى السجن وهيخرج باى طريقه ووقتها شره وحقده هيزيد ناحيتنا .
مؤمن:عندك حق .
رغد:انا هروح المستشفى وانت روح الشركه وخليك مفتح تمام ... هى لارا فين؟
مؤمن:فى المدرسه.
رغد:تمام .
رغد ومؤمن كل واحد راح على شغله وجواهم خوف كبير اوى على اقرب حد ليهم .
ــــــــــــــــــــــ★ـــــــــــــــــــــ
فى حارة البطل .
المعلم منصور جايب ناس عشان يهدو بيت الشهاوى ومعاهم المعدات بتاعتهم.
حسن من وراه:انت بتعمل ايه يامعلم منصور ؟!
منصور:بص ياحسن انا هكمل مشروعى واوعدك لما يظهرو اصحاب البيت هابقي اديهم نصيبهم يابنى.
حسن:نفس الكلام بردو وانا هرد عليك نفس الرد طول مااهل البيت مظهروش مش هيتشال منه طوبه فاهم ... انا بتكلم معاك بالعقل يامعلم منصور المرة الجايه هيبقي بالقانون وانت عارف انا لو كلمت مراد هيجى وهيعمل ايه لانك عايز تهد عقار مش ملكلك ولا ايه.
منصور خاف من كلام حسن:يعنى انا هفضل موقف مشروعى لحد مايظهرو .... وبعدين ماهو لو عايزين البيت كانو باعوه لكن هما شكلهم ناسينه اصلا ده بقاله سنين السنين محدش قرب منه ولا فتحه.
حسن:مايخصناش يامعلم خلص الكلام اتفضل مشي الناس دى يلا وامشي من هنا.
منصور:ماشي يابطل .
منصور اخد الناس ومشو وحسن رجع على ورشته .
بقلم الكاتبة جنات
ــــــــــــــــــــــ★ـــــــــــــــــــــ
منصور دخل محل الجزارة بتاعه وكانت مراته محروسه قاعده:رجعت يعنى زى كل مرة بيمشي اللى فى دماغه هو.
منصور:هددنى هيكلم مراد صاحبه انتى عارفه وقتها هيحبسونى عشان عايز اهد حاجه مش ملكى ياوليه.... ووقتها هشرف مع المحروس ابنك فى السجن.
محروسه:حبيبي يابنى ياضي عينى اتحبس بسبب اللى مايتسمى حسن .. بكرة يطلع ويوريه المجدعه على اصولها.
منصور:يبقي عايزة ابنك يرجع التخشيبه تانى مش كدا.
محروسه:تف من بوقك ربنا مايكتبها عليه تانى.
منصور:يبقي تخليه يشيل حسن البطل من راسه احسنله.
محروسه:يطلع هو بسلامه ووقتها يحلها الف حلال.
ــــــــــــــــــــــ★ـــــــــــــــــــــ
فى بيت البطل .
حنين كانت على السطح خلصت دروس للاولاد وبتسقى الزرع بتاعها.
حنين حست بحد وراها وكانت مفكراها امها واتفاجأت بعزت ابن خالها:فى حاجه ياعزت؟!
عزت:كنت جاى اشم شويا هوا .
حنين:انت عارف ان مافيش خد بيطلع السطح غيرى ياعزت .
عزت:بصراحه كان فى حاجه عايز اتكلم معاكى فيه ياحنين.
حنين بصتله:حاجه ايه دى ؟
عزت:بصراحه انا معجب بيكى اوى وعايز اطلب ايدك لجواز وعايز اعرف رايك الاول .
حنين اتفاجأت بكلامه:انت زى حسن اخويا ياعزت وبعدين انا مش بفكر فى الموضوع ده ولو سمحت انزا بقي عشان مينفعش حد يجى ويلاقينا واقفين كدا واظن مترضهاش لاختك ولا ايه.
عزت بضيق:اكيد عن اذنك.
حنين:اذنك معاك .
عزت نزل وحنين كملت اللى بتعمله .
ــــــــــــــــــــــ★ـــــــــــــــــــــ
مرت الايام ورغد بدات تلم الورق والحاجات المهمه وحطيتهم كلهم فى شنط ونقلتهم لڤيلا مؤمن ومحدش كان يعرف ابدا حتى رهف .
ورغد كانت بتعمل كل ده بليل ورهف نايمه او بنهار وهى فى المرسم .
وكل يوم رغد ومؤمن بيسمعو خطط فاروق ومازن اللى مرة يخططو انهم يضربو رهف عن طريق قناص ومرة انهم هيولعو فى الڤيلا وهى فيها وفى كل مرة كل واحد بيقول رايه بيزيد الخوف فى قلب رغد ومؤمن على رهف ولارا .......
بقلم الكاتبة جنات
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق