رواية على حافة الثأر الفصل الثامن عشر 18 بقلم زينب ماجد حصريه
رواية على حافة الثأر الفصل الثامن عشر 18 بقلم زينب ماجد حصريه
#على_حافة_الثأر
( بقلم زينب ماجد )
#الحلقة_18
دخلت ورا ماما واني بس اتبعها بدون ما اشغل عقلي .. حطتلي ملابس عملية بأيدي : شنو هذا
- البسي ؟
- شلبس ؟
- ملابس العملية ماما
- اسوي عملية هسه !
- اي مشمعتي الدكتورة دا تكول عندج حصى بالكلى ولازم عملية فوراً
- بس عباس مموجود
- عجيب !! انت بعدج تنتظري وتتأملين منه ؟
- هو مسمعني
- وليش منتظر منج تبربر حتى يقدر حالتج الما وكف وياج بشدتج لتفكرين وياه ماما ميستاهلج ؟
هي تحجي اني ادور بالجنطة طلعت تليفوني ..
وهي تكولي : دلبسي يا بنتي عوفي التليفون
- بس اشوفه
-شتشوفين فضيها يا بنتي البسي
طلعت رقمه .. ما رد
حجت : ها ؟ شكلت .. البسي بنتي بسرعة لتنتظرين منه هذا واحد ميسوى
- بس هذا مو اسلوب عباس !
- مو اسلوبه شنو بنتي مدا تشوفي ميرد عليج !؟
- جان رد وكال اني ما اريدج بس من وقت متعارك ويا بابا الله عليم بابا شنو كايله وشمهدده حتى عباس مديرد عليه
- راح تكعدين تبرريلا بهالوقت !
- اني رايحة اشوفه
- يا عزا العزاني لج عيني عندج عملية شتروحين
- ماما ما اكدر ادخل العملية واني محاجيتله اللي بداخلي .. لازم اعرف بابا شنو مسويلا ..
كمت من مكاني وهي لزمتني من ايدي ..
فيان دا احجي وياج فيان .. انت مريضة احاجيج مو وحدج تروحين تعااااي
امشي وهي تمشي ورايا ..
دخت واحس الكاع صارت تتحرك جواية والدنيا تفتر ..
وكفت وسندت ايدي ع الحايط واني اكمش راسي .. لزمتي : لج ماما لويش دا تعاندين صحتج مو تمام ارجعي
- ما اكدر لازم اروح احجي وياه
كملت مشي وهي كامشتني ..
خابرت ع الحارس .. جاب السيارة وصفها كدامنا .. صعدت وهي صعدت ورايا كعدت يمي .. اخذت ايدي : ليش هلكد دا تنزلين نفسج اله
- استحق اسمع تبرير
- بس هو ميستحق تسمعي او تلتفتين اله ماما هو مو مستواج
- ماما كافي تحجون بالمستويات راسي حيفجر كافي
كمت اتلوى وابجي وهي تهدي بيه ..
طول الطريق واني كامشة راسي وافكر شراح يكولي وبيش راح اقنعه صح تأخرت ومكلت لبابا على زواجنا بس اني مسمحتلا ولا الي علم باللي راد يسويه اني محتاجته يوكف ويايا بهالمحنة ميتركني
وصل السايق لمنطقة الحرية
ماما دلته المكان .. كلت اللها : من وين اندليتي بيته ؟
- اندليته مو هذا المهم المهم الدكتور اللي عفناه ورانا وصحتج اللي دا تروح وانت دا تركضي ورا واحد ميسوى اظفرج بنتي
- انت تعرفين الدار بين بابا وبينه لما تعاركوا ؟
- لا ما اعرف وما عندي اي علم عنه ابدا ومسالت ابوج عليه ابد لانه ميهمني واتمنى الساعة اليفك من عدنا ويروح مو اسال عنه
وصل لمنطقتهم صف كدام الفرع مالهم
فتحت باب السيارة .. نزلت ماما : لتنزلين لبيت اهله امه متنجرع وتروح اتأذيج وانت مريضة
- اني بس رايدة احجي وياه مرايدة منهم شي
- ولو .. اتركيني اني اطلبه
مشت كدامي واني على كيف امشي كوا راسي كلش مأذيني ..
دكت الباب امي .. اني وكفت يمها .. طلعت اخته باوعت النا : خير شعدنا بعد جايين تاخذونه خليتوا على حالنا حال وجيتوا تكملون شرايدين من عدنا بعد
حجيت : رايدة عباس اذا موجود صيحيلا
ماما : لحظة فيان
جاوبتني وهي تقاطعها : انت ستالينه على عباس لو احنه وين اخذتو بيا كاع دفتووووه والله والحسين لو صار على اخوي شي بالعباس بيتكم نهجمه فوك روسنا
حجت امي : انت شنو دا تهددينا احترمني نفسج واحجي عدل
حجيت : ليش عباس وين ؟ عباس مو يمنا
- اسالي الخلفج عنه .. بس بحيل الله عمامي يطلعون حقنا من عينج وعين ابيج النكس البايك نص خير العراق وجاي على وليدنا
- اني ما ادري عن شي احجيلي بالعقل عباس وين مدا افتهم راسي
- لج انت متستحين بايكين فلوسج دماغ سز احترمي نفسج لتخليني والله اخليهم يشوفون شغلهم وياج
- وانت جاية لنص بابنا تهددينا والله والحسين هسه اخابرهم لا اسويها كربلة فوك روسجن طايحات الحظ
دخلت علياء وطلعت امها تواجهن هي وامي ..
امه ترفع وامي تكبس بالصياح والعياذ
اني كعدت على بلوكة صايرة على صفحة والزم براسي
كمت ابجي اريد استوعب شديصير بابا مكالي ولا حجى ويايا بموضوع زواجي رغم عرف .. معقولة هو ماخذ عباس .. يا الله راسي عباس وين
كمت من مكاني امشي باتجاه معاكس وهم يتصايحون ..
طلعت بغير فرع مو الفرع الثاني .. مقفول متفوت سيارات وماما بقت ورايا منتبهتلي من مشيت ..
طلعت اجر بروحي كوا
واتجى واريد الشارع يخلص ومدا يخلص
وكفت واني احر نفس .. لعب نفسي كمت اتقيء بس مماكلة شي غير مي فقط .. العصارة المرة مال معديتي كلها تقيئتها احس روحي دا تطلع من جسمي ..
مرت مرة جبيرة وهي تساعدني وتكلي : على كيفج حبيبة ارتاحي ارتاحي
مديت ايدي اطمنها
واحاول ابتعد وصلت الشارع حطيت ايدي على سيارة .. ولازمة خصري وبطني تفور من اللعبان نفس .. احس اريد اتقيء روحي من جسمي .
صفت سيارة .. ركبت ورجعت راسي والسايق يسالني : وين ؟
- المنصور
ساق بيها .. اني التلوى من معدتي ..
كوا ادلي فروع المنصور دخلت شارعنا .. سيارات كومة بالباب .. صف كدامهم .. نزلت الحرس ركضولي اشرتلهم ع السايق ..
وكمت امشي على كيفي ..
ناس كومة ومن اقاربنا وسياسيين جاين لبيتنا ..
زجاج مكسر بالكاع البيت هوسه .. ضابط شرطة واثنين منتسبين وياه طلعوا من الصالة وبابا وراه ..
شافني واشرلي افوت من المطبخ
نزلت من كدام الصالة افتريت للمطبخ مقفول الباب .. دكيته طلعتلي ام غيث بسرعة لزمتني وهي دا تساعدني ادخل وتكعدني .. مقبلت اكعد ..
كلتلها : عمام عباس هم اللي دكو البيت
- اي
- عباس وين
- والله يا داده ما ادري اشتعل البيت فوك روسنا من رحتوا الدنيا التمت
عفتها ومشيت دخلت البيت ..
دخل بابا .. حجيت : عباس وين ؟ شسويت بيه احجيلي وييييييين
ركض عليه بسرعة حط ايده على حلكي وكال : هشششش لا تحجين ولا تفكين حلكج كرابتنا موجودين لا تفضحيني كدامهم فوتي
بعدت ايده واني اكوله : مهامك غير نفسك مهامك غير سمعتك وكرايييييبك .. اتركني
حجيتها واني دا ابتعد منه عثرت بيه ووكعت للكاع
دخلت امي وهو يصم بحلكي ويكولها : بنتج هاي اذا مسكتت وخيطت حلكها راح ادفنها واخليها بصف اختهااااا اخذيها منا يلااااا
كمت من مكاني واني اكوله :ما اروح منا كبل لتكولي عبااااس وين
تقرب عليه لزمني من شعري : كافي سكتت على فضحتج هاي ودا اسعى اطمها من ننفضح اغسل عارج بيدي وما يرفلي جفن لججججججج
كمت اصرخ بيده
وامي تدفع بيه وتضربه : وخر منها كل الصار بيها منك وتضربها عووووفها
دفع امي وهو يكوللها : اخذي بنتج واطلعي براااااا
وكفت واني ابعد شعري من وجهي واكوله : ما راح ابتعد اذا متولي عباس وين احجيييي وين اخذته
اصيح وهو يتعارك ويا ماما
كالتله : دقيقة مابقى عندك .. لا العب الدنيا فوك راسكم والله .
كامت تسحب بيه واني ما اقبل اذلع اريد اعرف عباس وين ماخذه .. هي تصيح وتكولي : وج كومي شلعتي لكلبي باقية الهم لويش بحاجتهم يكطعهم ويكطع شكولهم تعيشين عندي ولا منيته وعيشته السوووودة امشي
- ما راح امشي كبل لا اعرف عباس وين خلي كولي وينه ما اريد منه شي بس خل يتركنا بحالنا
- امشي هنا ونعرف عباس وين امشي
- ولو ماذيني لو قاتله لو متعرضله اني شسوي بروحي .. ماما فدوة اذا تعرفين عباس وين كوليلي
- واني شعرف بنتي
طلع مرة ثانية وهو يصيح ويطلب من ام غيث تجرنا وتطلعنا من باب المطبخ .. حجت امي : بنتك اعند منك احجيلها النكس وينه وخلي تعرف
- اهله هسه يجون نتفق وياهم .. من يجون اني اكلج الصار بس امشششششن .
مقبلت امشي صعدت بغرفتي فوگ ..
صعدت ماما يمي تلوم وتحجي واني متوترة وابجي واريد بس اعرف خبر عنه ..
لزمت تليفوني ..
وكمت اخابر مدير الحماية مال ابويه
كتله : مشرق بس كولي عباس وينه
- اسف والله ست مو من ضمن صلاحياتي ما اكدر
- طيب لتكولي بس طمني الله يخليك هو بخير
- ان شاءالله بخير
- ان شاءالله يعني وضعه مو زين مشرق لتعبني وكولي هو وين مراح ابلغ بابا انت كلتلي بس كولي
- ست زين هو عايش وراح يطلعه الوالد باقرب وقت والله ارتاحي .
- هو وين جاوووووبني
- اسف اعتذر من حضرتج جدا ما اكدر اني اتأذى لو حجيت
- لو صار شي على علاس لو متأذي والله انت من الدنيا حصتي مراح اعرفكم بحالكمممممم افتهمتتتتتت
قفلت الخط بوجهه وكمت الوب
احتركت حرك لما عرفت هو ماكو .. ومدا يكلولي مكاني
مبقيت احد من اللي اعرفهم الهم ايد لابويه مخابرته ومقبل ينطي بمكانه وامي تحجي وترزل وتحاول تردني .
صعد بابا ..
فتح الباب وكال الها لامي : اسمعي هذه السز اني مالي كلام وياها تسيطرين عليها كان بها متسيطرين عليها بالله الكريم اذيها اذيه كل عمرها ابجيها ع اللي تشوفه
الكلب اللي معاشرته من ورا ظهرنا وبدون علمنا .. تنساه ومتجيب طاريه ابد .. والا والله اكتلها واكتله وامحي اساميهم من الوجود
حجت امي : هو عايش
-عايش بس راح اتفاهم ويا عمامه على صورة حل .. بس كبل هذا رايد اعرف شوكت صار كلشي بينهم
كاعدة على قنفه ودايره عنه
وماما تجاوبه : لما كانوا بالامارات البنية محبت تغلط بالحرام وخدعها بكلام معسول واهتمام بوكت هي ضايعة بيني وبينك صدكته وعقدت وياه زواج مسوت شي حرام
حجيت : هو مخدعني انتم اللي خدعتوني عمر بكامله .. وانتم تصطنعون المحبة والاهتمام واني مشايفتها .. اني مرايدة منكم غير تعرفوني بحالي
صاح ابويه : تسكتيها والا والله اسكتها
حجت امي : لتسمعلها هي مريضة وانت الوها سوي اللي تشوفه مناسب الها
حجيت : انت شدا تكولين .. اني مو طفلة حتى تقررون حياتي .. اتركوني بحالي مرايدة منكم غير تعرفووووني
- ليش رجعتيها كبل لا تكملين اللي كتلج عليه
خزرته
حجيت : شنو اللي تكمله .. انتم شدا تحاولون تسوون ورايا اني بشر يا بشر مو معقول كاعدين تقررون حياتي عني .. كافي
حجه ابويه : نخلص من موضوع عباس بعدين ننتقل لحساب شوان واهله .
- مو انت اللي راح تحاسب شوان اني قدمت تقاريرها لمحامي
- اي محامي انت تعرفين وضعي من اوراق اغصتاب بنتي توكع بيد احد اني انفضح انت شنو رايدة فضيحتييي
- هذا محامي مو سياسي .. اكيد وصيته يحافظ على سرية القضية
- اي محامي وكلتي ؟
- القضية مراح اتنازل عنها اذا حاول تنهر المحامي اشوف غيره
- ماكو اي قضية تنرفع واني موجود .
- مثل ما انت ابوها اني امها .
- خليج ملتهية باكرم وجفينا شرج
وكفت مستغربة بينهم .. يقررون ويحجون وكأني طفل عمره ٨ سنوات مو امرأة بعمر ٣٥ سنة !
تركتهم وطلعت من الغرفة
كام يصيح ورايا .. جرني وهو يكولي : اقاربنا محمد منهم يعرف بموضوع زواجج كلتلهم الموضوع ويايا متفكين حلكج كدامهم ولا باي حرف
سحبت ايدي من عنده
ونزلت طلعت من باب المطبخ وماما ورايا تصيح ..
كلتلها : كافي تتحكمون بيه .. اتركووووني
اشرت على احمد وطلعت مشيت من كدام الحارس مال بابا ..
افتح بباب السيارة .. الباب مينفتح انداريت واحمد يطلبه منه مفاتيح
يكوله : اعتذر عدنا اوامر
تقربتله : اوامرك مو عليه انطيني مفاتيح السياررررة فوراً
- اسف ست و.... كبل لينطقها
رفعت ايدي وضربته راشدي لزم اديه احمد وهو يكولي : اعصابج ست اني اخذهن بس اعصابج
طلع المفاتيح بسرعة
اخذهن احمد واني اخزره .. فتحلي الباب ..
طلع ورايا ابويه .. وكف احمد كاله : وين رايحين
- والله ما اعرف استاذ
باوعلي على جامتي مظللة ورافعتها ضرب عليها باصبعه منزلتها حجيت : اطلع احمد
حجه ابويه : اي مكان تروحله تبلغني والا احملك كافة المسؤلية لو نا صار عندي علم مفهوم
- تأمر سيدي
داس من كدام بيتنا طلع الشارع .. دخل ع الاميرات .. كتله : عندك
- امريني ست
- انزل من السيارة
- انت مريضة ست
نزلت من ورا وفتحت الباب واشرتله براسي : العفو ست
- ارجع كله نزلتني .. فضني
- ست ميخالف بس والله انت مريضة مراح تكدرين تسوقين .
- انزل واحترم نفسك
نزل منها اني صعدت وهو حاول يصعد ليورا ..
دست بالسيارة وبابها مفتوح كبل ليصعد ..ابتعد منه وكفت انداريت سحبت الباب هو لحكني .. رجعت دستلها وطلعت كبل رحت على بيت بابا ..
اذا حاط حماية واحد او اثنين معناها الوضع طبيعي
بس اذا مكثر حماية معناها اكو شي ابيته ..
اول ما وصلت لكيت مشرق موجود .. و٦ من الحماية واكفين عند الباب .. فتحلي باب سيارتي : اهلا ست
تركت السيارة مفتوحة ونزلت حتى يحير بيها
ودخلت للبيت .. صعدت للبيت وهم خابروا بابا .. وصاروا يبلغوه بمكاني ..
طلعت بيداء كبالي ..
رحت على الغرف الجوا .. كلهن مفتوحات
صعدت الفوك وهي لحكتني : شتريدين فيان احاجيج
كمت افتح ابواب الغرف كلها مفتوحة ..
اكو غرفة مخزن فوك .. بالطابق الثالث بيها قفل ومفتاح ..
صعدت مشرق عرضلي : ست ممسموح
- ابتعد من طريقي لا اهينك اهانة وجهك متشوفه لاحد بعدها
- ست اسف والله الاوامر هاي
ضربته راشدي لزم ايده وحاول يرفعني يريد يشيلني ..
بعكس ايدي ضربته بوجهه تركتي بسرعة .. دفعته مني حيل وكتله : لو حاولت تمنعني راح اندمك والله .
صعدت ع الدرج كامت تلزم بيه بيداء .. ضربت ايدها وبعدتها لزمت بملابسي .. لابسة بلوزة عريضة وجواها كيمونة .. واريد اصعد مدا تخليني والحرس عرضلي ومشرق يريد يلزمني
سحبت روحي ودخلت راسي من البلوزة بسرعة نزعتها
الحرس انداروا كلهم من عندي .. دفعته بايدي من ظهرهم بسرعة وهي تريد تلزم بيه صعدت فوك للمخزن مقفول
كمت اضرب بالباب حيل واحاول افتحه مدا ينفتح ..
كمت اصيح : عباس انت هناااا .. عباااااس اذا موجود بس حاجيني
صعد مشرق وهو داير وجهه عني ويكولي : ست ارجوج بس انزلي والله تأذينه بهذا الفعل
- انطيني المفاتييييح
- ست الله يخليج احجي لوالدج حتى ننطي احنا ما نكدر
- عباس هنا
- لا مو هنا
- افتحلي الغرفة اشوف
بيداء : انت شنو مالج رداد متستحين لج شنو من عين فوك ملاعبة لعب انت اللي تضربين وتصيحين .. امشي طلعي منا يلا
- افتح باب الغرفة
- ست ارجوج والله تأذينه
- طز بيك .. انطيني مفاتيح الغرفة .
احجيها واني اضرب ع الباب ادفع بيه ميفتح
كمت اصيح : علاس اذا موجود بس حاجينييييي .. عباسسسس
احط راسي ع الباب واريد اسمع وارجع اضرب بيه وهم يصيحون
بنص صياحهم حسيت اكو ضربات جوا .. لزكت اذني بالباب .. اسمع دفرات بالحايط
سحبتني بيداء
نزلت جوا فورا كمت اركض ع الدرج وهم يتراكضون ويايا
رحت ركض لورا البيت عند السخان المعدات الاحتياطية كلها .. سحبت جاكوج وطبر
بس الطبر ثكيل
شلته باثنين اديه .. ومشيت اريد اصعد ..
طلع كدامي مشرق وهو يدور وجهه عني حتى ميباوعلي .. يمد ايده بسرعة يريد ياخذ مني الطبر سحب الطبر من ايدي بقوة
شلت الجاكوج خليته داخل الكيمونة بجسمي
وهو يصيح : ست لا تسببيلنا مشاكل هالموضوع ممكن يضر الوالد
- انجب ووخر من كداااامي وخررر
صعدت وبيداء تحاول تجرني وتسحب من جسمي
لزمت شعرها شكلت بيها وكمت اجر بيها كامت تصيح بكل صوتها
شكد جنت مريضة وخاوية
بس ما اعرف من وين اجتلي القوة بحيث صرت مثل الريشة بيناتهم وروحي طايرة من جسمي بس اريد اصعد
وكفت كدام الباب طلعت الجاكوج وكمت اضرب ع اليدة مال الباب حيل .. انعوجت بس مكاعد تنكسر
كمت اضرب مباشر على مكان القفل ..
محد منهم صعدلي ولا احد منهم اعترضلي بعد بقيت بس اكسر بالباب واحاول افتحه ..
ضربت ضربة قوية فلت الجاوچ من ايدي
اجا على اصبع رجلي الجبير .. فزيت من الالم ...
كمت اروح منا واجي منا وانكث برجلي احس اصبعي اشتعل نار ..
دمعت عيني من الالم
رجعت لزمت الجاكوج وبحركة من الالم كمت اضرب حيل حيل .. كسرت القفل .. انفتح .. دفعته .. شفت عباس كبالي متجتفه اديه ورجليه ومعصمه عيونه وحلكه .
كمت ابجي واني اركضله .. ارفع بيه من الكاع .. وثكيل مينرفع .. ورجلي ذبحتيني من الالم .. اصبعي كانما انكص على كد الالم
انحب وابجي وارجع ارفع بيه وهو يطلع صوت بمعنى فتحيني ويحرك بنفسه .. جريت من عيونه وسحبت من حلك كام يحرك براسه وهو يكلي: ايدي .. فتحي ادي
: بس اكعدددد
كوا رفعته بحيله وتجيت نص ع الحايط
كمت احاول افتح بايده بس شادين الوصلة قوي
ودموعي تجري مدا اركز بالوصلة . كمت من مكاني : اييييييدي فتحيها
- مدا اشوف بس اخل افتح ضوا
.. ادور باكتاري مفاتيح الضو وين .. لكيت النقطة يم الباب دستها وغلت ضوا المخزن
ورجعت اريد اكعد صارت على رجلي ..
شهكت بصوت عالي .. واتنفس قوي من الالم وامسح بوجهي واحاول اركز بالشدة وهو يكلي : على كيفج فتحيها .. اخ يابويه
- مدا اكدر افتحها كلش قوية مشدودة
- ذيج حديدة باوعي .. ديج
يحجي ويلفظ انفاسه مختنك وتعبان
ضليت ادور وين ياشر براسه .. لكيت حديدة لهناك ما اعرف مال شنو ستيل وبيها حافة طالعة اخذتها وكمت احاول اشك الوصلة بيها ..
حسيت بحركة وراي وهو شال راسه وكلي : اجا وخري ..
باوعت وراي .. بابا بمجرد ما انداريت لزم راسي ورفعني من الكاع : تعالي هنا بنت الكلبببببببببة .. كومييييي
جرني من شعري عباس فلت ايده من القماش .. وابويه سحبني .. وكفت كدامه وكمت اصيح : شتريد مني بعد شنو الخليته بيه ومدمرته ورايد بعدددد شرايييييد
ضربني راشدي
كام عباس وذب حيله على ابويه .. ولزمه من ركبته وجلب بركبة ابويه .. صرت بيناتهم والحرس على صوت ابويه صعدوا دخلو .. اني صرت كبال عباس وهو يجرني وراه ويكلي؛ لبس هدومج بت الكلب لبسيييييي
جرني من كدامه دفعني وراه وابويه اجا تلازم وياه والحرس يلزموه .. كمت ابجي بصوت عالي واصرخ واحط اديه على راسي ..
وعباس يكله : صير زلمة وواجهني بدون جلااااابك ..
ابويه كام يمسح بركبته تجرح وهو يصيح عليهم : اخذوه
كمت من مكاني بسرعة اريد اجر عباس سحبني ابويه من ايدي وسطرني راشدي : لج انت صايرة متكدريييين ولج
- متأذي متاخذه .. عووووفه
ضربني :- اسكتي لج
كمت اصرخ - مراح تأذي اكولك عوووووفه
رجع ضربني اقوى .. دا اريد الزم بالغراض .. بس بادت ايدي للحظة واختل توازني من قوة الضربة وصارت الوكعة قوية اجتي براسي ..
الضربة الاجتي براسي حسيته انفجر
فز ابويه وهو يشيلني من الكاع .. واني ابعد بيه بدون وعي اريد اكوم بس احس بالدنيا صارت تفتر بيه شديصيح وشديحجي مدا افتهم
غير اريد اطلع ورا عباس ..
اسحب بروحي وابويه يجرني .. ما اعرف شصار بعدها
حسيت وكاني شايليني مدا استوعب شكو
شعور غريب وكأن احد ديسحب بروحي من داخل اسطوانة ضيقة .. اشعر لكن عيوني مدا تشوف وعقلي مدا يستوعب استيعاب كامل للموقف .
انحطيت بمكان واكو صوت صياح .. وشوشرة مدا افهم شوية شوية كمت افتح بعيوني ..
كمت اشيل براسي اريد اكعد ..
وكأنو راسي ثقيل جدا .. مدا اكدر احركه .. وديأذيني
كمت لحيلي على كيف واني الزم براسي حسيت ايدي تبللت بشي
سحبت ايدي اشوف بيها دم ..
دخلت بيداء كدامي : دكافي بليتينا بلوة كافي .. فد مندلة انت دكعووودي
: لتلزميني
- ما الزمج شنو وهو ديوصيني عليج اكعدي
كمت اجر خطواتي واريد اطلع
وهي تكولي : اووي يطبج مرض اني شعليه
طلعت واني اسمع صياح ابويه
توجهت للأستقبال وهم لازمين عباس ..
مردته يشوفني .. بس حطيت راسي ع الحايط استمع وكوا اسحب انفاسي ..
وهو يكوله : بس هالمرة راح اعوفك تنفذ بدمك وتروح تبلغهم لعمامك مرة اللخ دمك مهدور لو حاولت توكف بوجه بنتي لو تواصلت وياها وكدامك ٢٤ ساعة تجيب عمامك وتطلقها فورا ووجهك ما اريد اشوفه والا والله .. ورا الشمس ارميك واخفيك من الوجود افتهمتتتتتت... اخذوه.
من مكاني كعدت بالكاع
حطيت راسي بين رجليه وكمت ابجي ..
بالم تعب قهر خسارة .. ما اعرف شلون اوصف كمية الالم الاشعر بيه من داخلي ولا من راسي وله من رجلي وله من ابويه .. وله من الانسان اللي خليته يتعرض لكل هذا .. وتسببت باذيته .
طلع من الاستقبال ابويه بعصبية اندار وراه دنك
شافني دا ابجي .. صاح على بيداء كاللها : اني مو كتلج ابقيييي يمها .. دماااااغ سز
- واني شعليه اذا هي متنرد تروح وترجع عليييه
- وقز القرط .. جيبي ملاااااابس
حجاها ودنگ عليه ..
انت شوكت تنردين لج تعبتيني .. لج ما تهنين بفوزي من وراج لج حولتي ايامي سود فوك رااااسي .. بيش قصرت وياج اني حتى تروحين تتزوجين من ورااااي لج انت متاخذين عبرة من الصار متكولين والدييي تعب متكولين نص حيلي راح ويا اختج تهدين حيلي وياها ليييييييش .. ولكم منو البيكم على كلبيييييي اختجججججج النزلت راسييييي لو اخوج العافني وحدي وما كال ابوي وعاش حياته ويا النسوان باورباااااا .. لو امج الدايرة وتتمعشك لو انتتتتتتتتتتت
لكم تعبت كلبي راح يوكف منكممممممممم تعببببببت
تلزمت بالحايط ووكفت على حيلي واني اكوله : طلعوا كلهم صح بس اني غلط الضيعت عمري يمك حتى تخلي واحد مثل شوان يتعدى عليييه ويكسرني
- لح اني ابوووووووووج ما اسويها فياااان
- بلي سوووووويتها وشوان لو ما انت ما يتجرأ يشيل عينه بعيني مو يتعدى عليييه انت الرضيتلي كل هالسنين ابقى وحيدة وبدون عائلة وانت تعرف اني مرايدة شوان
ووكفت حياتي وخليتني ع الاطلال اختار لو اموت بالحياة واتزوجه .. لو يوكف بيه الزمن ويوم ورا يوم ينعاد نفسه والعمر يمر .
اني صرت اقرف منك واكرهك ومتندمة ع اليوم اللي طاوعت وبقيت وياك جان المفروض اتبع اخوية واروح اعيش مثل معاش بس اني اللي سويت بروحي هشكل وخليت امري بيدك تتحكم بيه ..
اني اكرهك بابا .. كلش اكرهك
ومستحيل اكدر اسامحك يوم ع اللي سويته بيه .
- تكرهيني ما تكرهيني يطبج مرض .. طلعن منا ماكو حتى البيت ذاك ممنوع عليج توصلي هنا تكعدين يمي وكدام عيني .. لو تحركتي رجلج اكسررررررها افتهمتي .
- لتحلم اعيش عندك بعد .. خلي شوان وغيره ينفعوك
احجي واشهك ودموعي تجري مديت ايدي لعيني .. امسح
واسحب بنفسي اريد اطلع ..
لزم ايدي بقوة وصار يسحبني للغرفة ..
متمنعت ولا حاولت اسحب نفسي .. دخلني الغرفة ..
كتله : احبسني شكد متكدر وقت الاطلع ما راح ارجع .
دفعني من خدي وهو يكلي : ادفنج لج .. اني ابوج مينحجي ويايا هيييييج
سحب الباب وحبسني بالغرفة ..
كعدت بمكاني .. اريد ارجع راسي ياذيني ..
تمددت بصف الباب .. وراسي ع الارض .. احسها وكأنها تهتز جواية .. كلش دياذيني
متاذية جدا ودموعي صارت تجري ..
رجلية كايلة صفح ورجعت ظهري صرت اباوع للسكف .. وانحب بصوت مسموع وموجوع .
رجع فتح الباب .. دخل وهو يدور بسرعة باوع وراه تفاجئ بوضعي واني نايمة هشكل وابجي .. صاح ع الحراس وكام يصيح بقوة تراكضوا كدامه ودخلوا كاللهم : شيلوها فوراً
شالني الحارس من الكاع ونقلني للسيارة .
نومني ورا وهو كاله : اتوجه بيها للمستشفى فورا وراح ابلغ امها توصلكم متفاركها ابدا وممنوع تخلي امها تاخذها وامنعها حتى لو اضطريت ان تضربها وتبعدها من طريقك .. وابقى وياي على اتصال .
- تأمر استاذ
نقلني للمستشفى .. دخلني طبابة
استلموني الاطباء والممرضين .. شي يفح وشي يعلكلي مغذي
كاله : راسها لازمه خياط فورا .. بسرعة
كام يرفع بوجهي ..
ويفتح بعين .. حطولها مغذي وسوللها فحص دم بسرعة ..
ممرضة ركبتلي مغذي والممرض الثاني يفتح بشعري ويحاول يشيل الشعر الداير مداير الجرح .. وينظفه .. بنج المكان كله .. وهي تاخذ من ايدي دم بالسرنجة ..
والحارس واكف كدامي ..
احس طاقتي نفذت كلش مدا اكدر انطي اي ردة فعل
كام يخيط براسي .. والدكتور وكف اشرف ع الحالة وكاللها : لما يفك البنج منها راح تتأذى من راسها .. انطيها مسكن الم ويا المغذي .
- حاضر دكتور
رجع راسي للسرير
احس روحي وسط دوامة
رغم صار هدوء تام بس اكو هوسة وضوضاء داخلي كلشي بيه .. يأن ..
اجتي الممرضة كالتلي : انت حامل ؟
فتحت عيني باوعتلها .. رجعت عادت السؤال
نطقت : لا
- بس طالع عدنا بالتحليل اكو حمل .
بقيت مركزة بوجهه
جان خبر مثل الهبة الباردة بنص هالدخان والنار المشتعلة بية .. زخة مطر طفت لهيبي المشتعلة بيه .. ضليت مفتحة عيني .. اني حامل !
- اي حامل متدرين ؟
ابتسمت
حجت : بس عندج فقر دم لازم نحطلج بطل دم حتى ترتاحين
مدا تاكلين
- لا
- ميصير .. اللي بداخلج يموت متفكرين بنفسج فكري بيه حرام شصاير بيج رجلج راسج ما اعرف شنو صاير وياج بس شكلج بنت خير .. محاولة تنتحرين
- لا بس وكعت
- الله يساعدج هسه تاخذين المغذي والدم حيل راح ترتاحين
دا تحجي ..
دخلت امي .. ابتسمت بوجه ماما بتعب
لزمت ايدي : ها شصار وياج لج شلعتي لكلبي ادري وين رحتي متكوليلي وين
- ماما اني حامل
صفنت بوجهي : منو كلج
- الممرضة
- ها .. اي ادري
عقدت حاجبي : تدرين ؟
- اي من لما صار الحادث
- وليش مكلتيلي
- كلت تعبانة ومو وكته
اخذت نفس ورجعت راسي وغمضت عيوني .. اتذكرت وفتحت واني اكولها :بالسونار ليش مبين اليوم ؟ معقولة ما بين عدها طفل وهي فحصت منطقة الرحم
- لا درت بس اني كلتلها متكول
- وشلون لعد اسوي عملية واني حامل هيج مو مضر !
هم زين ربج طلعت ومجازفت ذولة الاطباء هنا من صدك الواحد ملازم يث..... قطعت كلامي واني اباوعلها
- جانت عملية مرارة ؟
- طبعاً
- الورقة مال دخول العملية عندج بالجنطة اشوف
- ما اعرف ضيعتها بالبيت ..
- ضيعتيها ؟
- تركتها
- ضيعتيها لو تركتيها
- اوووه هو حساب فيان ترا اني كلبي راح عليج من الصبح لهسه اركض وراج بنتي تعبتيني صارلي ايام تاركة المصرف وشغلي ومهامي ومكابلتج كومي لحيلج عاد
- ماما جنتي دا تريدين تسقطين الطفل اللي بداخلي
- اي ردت ودا اريد ولازم تنزلي ميبقى
- هذا هم ابنكم وتقررون مصيره مثلي .. هذا ابني انتم مالكم دخل بيه كافي تقررون عني حياتي وحياة الحواليا اتركوني انتم ليش مدا تعوفوني بحالي
- لان انت معايشة بهالدنيا لوحدج
لو احد سمع انت حامل شنكول ها من وين حبلت ؟ وهي بلا زواج اني انفضح وابوج ينفضح .. كافي مثل منفكر بيج فكري بينا
- بلا زواج ! انت حكمتوا على اللي ابطني بالحرام ودا تريدون تقتلوه وتقتلوني حتى لتنحرجون كدام الناس وتكولون اتزوجت واحد ميناسبا ومو مستوانا !
اني يوم عن يوم دا اكرهج واكره ابويه واكرهكم كلكم من صدك
انتم دمرتم حياتي شرايدين من عندي بعد اتركوني
-اصحي احنا مكاعدين بايطاليا ولا بامريكا حتى تتزوجين بكيفج وتحملين هالقرار مو انت وحدج تقرري افتهمتي احسبي احسابنا كافي حاطتنا ورااااج قدري
- ليش حسبتي حسابي لما اتزوجتي اكرم واني مموافقة بيه مكلتي شنو شعور بنتي وهي تشوفني ويا غير ابوها ! اتزوجتي ورا طلاك بابا باشهر مفكرتي بالكلام لو بس يحقلكم تحاسبوني وتحكموني ؟
- اني امج متحكميني ومتزوجت بالسر العالم كله يدري بزواجي وزوجي ابن ناس واوادم واله وزنه وثقله بالمجتمع مجايبتلي زبالة الدنيا وتكوليلنا هذا زوجي تعالوا ارضوا بيه منرضى ولا نقبل .. واللي ابطنج تنزلي .
- جنت معتقدة وكفتج ويايا حبا بيه وخوفا عليه طلعتي دا تحاولين تلمين سمعتج خاف يكولون المديرة بنتها اتزوجتلها واحد حافي .. خيبت امالج متزوجتلي واحد تاجر يخرخر فلوس تتباهين بيه كدام موظفاتج !؟
- مو غلط اذا تختارين واحد زين واتباها بيج وباللي تاخذي مو جايبتلي واحد متدرين كرعة ابوه من وين ودا تريدينه نقبله لا اني ولا ابوج نقبل مستحيل .
رجعت راسي .. واني احط ايدي على كصتي افرك بيها .. ومدا اتخيل حجم الانانية اللي ديعاملوني بيها .. مو مهم اني راضية او لا سعيدة او لا عمر مثل الشمعة اذوب وانطفي كدامهم محد منهم حاول يطفيني وساعة اللي لملمت نفسي انتفضوا وهم يحجولي بنصلحتي اللي ضيعوا عمري وهم يدوروها بمكاني .
دمعت عيني ..
شالوا المغذي وحطولي دم
واني ممباوعتلها ولا بودي اشوفها .. خلص المغذي ..
اجا الممرضى لف اصبعي عدل وحطله مسند بقدمي ..
والحارس وكف وياه ..
كتبلي خروج ..
راح جابلي كرسي الحارس وحطه كدامي رادت تساعدني امي .. بعدت ايدها من عندي وكتله : ايدك
سندني وكعدت ع الكرسي كتله : بلا زحمة اطلب من الوالدة تاخذ راحتها .. بيتها وعملها بحاجتها اكثر مني .
حجت : فيان كافي بنتي .. ترا تعبتيني و الله بالي كله يمج
- امشي
دفع بيه الكرسي وطلعني .. وهو ديمشي بالممر
ابويه والحماية مالته اثنين وراه .. صاروا كدامي باوع لامي وكاللها : شلوونها ؟
- شلونها وانت ابوها اعند من وايبس من راسك اني مليت منك ومنها اثنينكم شلعتوه لگلبي .. كابل بنتك انت وشوفها شلونها
عافتنا ومشت كام يباوع وراه ..
تنهد ورجع للحارس : شكالوا
- تعبانة استاذ عدها فقر دم وصحتها مو تمام خيطوا راسها وحطولها مسند بقدمها مكدروا يسوللها اشعة بسبب وضعها .. وكالوا لازم ترتاح راحة تامة
- طيب .. انقلها لبيتي اكمل شغل واجي واحرص على مراقبتها ولو طلعت وتعدت الباب انطيك كامل الصلاحية بردها بالقوة .. افتهمت ؟
- تأمر استاذ
نقلني للبيت جان الدنيا لليل
المساعدة رافقتني جهزتلي مكاني ..
انطتني ادويتي .. اخذتهم ورحت بنوم كلش ثقيل من الالم والامور الصعبة اللي واجهتها من الصبح وللأن .
كعدت ثاني يوم العصر
على ايد ابويه وهو يحط ايده كدام انفي .. ويتفحص
عباله صارلي شي .. بحركة نشيته من وجهي .. وباوعتله واني عاقدة حاجبي وكوا افتح
- انت ميتة اكو احد ينام هلكد
اجيت من الشغل وانت نايمة ونمت وكعدت واشتغلت ورجعت وانت على فد نووووم
اريد احرك جسمي كله مأذيني
كمت اسحب بيه .. دخلت المساعدة كاللها : جهزيلها اكلها لازم تصحين حتى نسولف .
كعدت من مكاني واني احاول احك راسي مأذيني نسيت مضمد .. مديت ايدي على مكان الجرح .. انجر الشاش باظفري .. فزيت واني اسوي .. اسسسسسس اااااه
بسرعة وكف هو وصاح : وج بابا شبيج انت مو راسج مخيط انت عااااقلة مو تعبتيني .
حجاها وكام يحاولي يرجع الضماد بس مدا يعرف شلون جان ملفوف .. صاح لبيداء كاللها : الزمي بس خل اروح اوصي الحارس ينده لمضمد ويجيبه ليروح يتجرثم الحرح ونبتلي .
لزمته هي واني ابعد براسي كامت ترجع بيه وتلفه صاحتله : هاي سويته ميحتاج .
نزلت رجليه واني احاول اكوم على حيلي ..
رحت للحمام ساعة يلا كدرت اغسل واكمل كلش متألمة
طلعت .. المساعدة محررتلي الشوربة
- ما اريدها بالغرفة .. اخذيني للمطبخ
اخذتها ورجعتلي تساعدني
مشتني للمطبخ وكعدتني صبالي الشوربة ماصخة .. واني مماكلة .. كلبت معدتي كمت بسرعة دا اريد اطلع من المطبخ ملحكت تقئت بباب المطبخ .
وكف ورايا ابويه : اكعدي اكعدي .. هنا
بيداء : بسرعة جبيبي الماسحة وسطل مي .. ركضي ريحة الزواع عطت
صاح بابا : عوفي الماسحة جيبي مي بسرررعة .. اتحركي
راحت المساعدة تجيب ادوات التنظيف وهي جابتلي مي ..
اخذته شربت منه شوية رجعت اتقي بس مي ومرار .. كامت روحي تطلع واصرخ اااااه بصوت عالي ..
كاللها : بلغي الخراس يجهزون السيارة خلي ناخذها .. مشررررق
كعدت واني انزل راسي احس روحي طلعت ..
دمعت عيوني ومشرق يجاوبه وبابا يكوله : جهز السيارة جيبلها شي تحطه على ملابسها امشييي
بعدت ايده من عندي واني الزم راسي ..
ما اروح ما بيه شي بس اريد ارتاح
- اي راحة انت نايمة صارلج يوم بطوله .. راح تمووتين
- وشيفرق انت اموتني بالحياة واني عايشة وفر خوفك ما اريده
كمت من مكاني واني اطلع من المطبخ ..
كعدت بالصالة .. اجا وراي واكف ويتحسب .. حطيت راسي على طرف القنفة كال : كعدت ويا عمام هذا المعتوه اليوم واتفقنا
باوعتله ..
كمل : يطلكج وبحياته ميوصلج او يتواصل وياج وهم وافقوا وهو وافق .. وموعد الطلاق باجر .. يطلق شيخ وبعدها ناخذ موعد حتى نخلص من البلوة اللي بليتي نفسج بيها .. حتى نصفي كلشي ونرتاح بعد تعبنا ..
شلت راسي اباوعله : اني ما اريد الطلاق
- مو على كييييفج ، يكفي نزلتي راسي كدام اليسوى والما يسوى .. لج ما بقتلي عين كدام اخواني وعشيرتي وهم يعرفون انت متزووووووجة بالسرررررر عني
- ومع هذا موافقين تطلكني .. وتشمر اللي ببطني وتنطيني لشوان ممستعرين مني اهم شي مصلحتك ومصلحتهم تمشي .. اني لو ما مصلحتكم ارتبط بشوان كان قتلتوني من زماااان بس اعمامي قابلين لان مصلحتهم تصب بهالمووووضوووع
اني كرهت الحياة وياكم
كرهتكمممممم .. وطلاق ما اتطلق وطفل ما اجهض .. وحياتي ما راح تمشي على كيفك.. ولو ما عاجبك اتبرى منيييييي اتركني اعييييش اني مو لعبة ولا اني راس حاااااااجة اني بشرررر كافي تفر حياتي حسب مصلحتتتتتتك
اني الاعتدوا عليها ما اعتديت على احد بدل متروح تحاسب اللي اعتدى عليه دا تحااااسبني .. بس انت وياه واحد وانت الرضيت الهالشي يصير حتى تجبرني ومااااا راح انجبر والله ما انجبر .
- كلشي راح يصير غصبا ما عليج .. بامكانج تروحين لغرفتج وتبجين كد متكدرين مراح امنعج ولا راح اوكفج اخذي راحتج .. انتهى .
- ما انتهى وتشووووووف .
ديروح .. من كلت هيج
رجع وكف كدامي : دا تهدديني انت ؟
- انت كلت اللي عندك واني كلت اللي عندي
راد يمد ايده يلزمني نزلت راسي واني ارفع ايدي ادافع عن نفسي توقف وهو يصرخ بقوة : تعرفين لو ما راسج مضمد كان فجرته دماغ سزززززز ماكو بنت محترمة تهدد ابوووووها حيوااااانة
صرت ابعد بنفسي منه وهو يصيح
رحت لغرفتي واني متألمة من راسي واصبع رجلي ..
كمت افتر بغرفتي واحاول افكر بمخرج يطلعني من هذا كله .. كمت الزم براسي من الالم وابجي
دخلت المساعدة وهي تجيبلي نفس ماعون الشوربة الماصخ .. صرخت بيها : اخذي من وجهييي بسرعة .
كمت ابجي بقوة
وكعدت بطارف السرير انحب بالم
ادور تليفون ماكو .. اريد مسكن الم مدا الكى ..
كمت طلعت من الغرفة وتوجهت للخارج
جان مغرب صاحت بيداء : ترا راح تطلع
احا بابا ورايا : لج انت شلوووون وياج طبي جوا
- راسي ديأذيني راح اموت .. دا اريد اجيب علااااج اتركني
- اي ادخلي واني اخليهم يجيبولج علاج
- ما اريد منك شي عوووفني بحالي ..
لزم ايدي واخذني غصب سحبني للداخل وكام يصيح: جيبوا بندول بسرعة ..
كعدني ع القنفة .. واني الزم براسي احسه يريد ينفجر
كمت ابجي بقوة .. رجعت راسي للتخم واني ابجي من كل كلبي مو بس من الم .. بس من كد قهري اللي بكلبي شعور جدا مؤذي واني مو ملك نفسي ..
صار يباوعلي واني ابجي بقوة وهو يكلي : انت اللي اتسببتي بهالالم بنفسج اني ردتلج حياة كريمة وانت اللي كتبتي لنفسج الاهانة
لج كسرت ظهري عليج
شنو الردتي وما وفرته بيوت ما حطيتلج سيارات محرس خدم فلوس شنو المنعتج منه وتقللين مني كدام الناس وتتزوجين من ورايا كتلج بنتي اني اثق بيج انت شسويتي .. رحتي خنتي ثقتي بيججحج ابعثج للامارات حتى تغيرين نفسج وحتى تشاركين ببعثات دولية وينعرف اسمج وينرسم مستقبلج وانت شسويتي .. بدل متفيدين نفسج هنتيها بواحد شايفج درج لاحلامه ويتمنى يوم من عيشتج ..
انت قوية واني كل عمري افتخر بيج
تخلين واحد مهتلف يلعب على مشاعرج ويهووون عليج ابووووج
لج اعقلي بابا تعبتيني ..
- اني التعبت منك انيييي
بنفسي اصير امممم من حقي تصير عندي عائلة وشوان ما احبه ما احبه .. يمتى تفهمني اني مرايدة فلوس ولا رايدة بيوت اني رايدة عمررررري .. اريد اعيش مرتاحة اني ممرتاحة .. لتسويلي فضل ما اريد منك شييي اخذ كلششيييي وانطيني حياتي انطيني عمممممري.
- لانج دماغ سز ومتعرفين تقررين مستقبلج
شوان مستعد يصيرلج خادم مثل الكلب انت اللي ما ردتي
- لانو ما اريده افهمني ما ارييييده
- شوان مصيرج سواء ردتي اوووو ما ردتي والهوسة الحاطة نفسج بيها كلها تنتهي مفهووووم .
اخذ المسكن من ايد المساعدة وكلاص المي : اشربي
بعدت ايده من كدامي وكمت للغرفة
سديت الباب وزويت نفسي بالزاوية ابجي .. كلش تعبت وانتهيت حطيت راسي ع الكاع اون .. ساعة واني على هالوضع واني اغفي .
رجع دخل ابويه للغرفة
صاح : لج بابا انت عاقلة شصاير لعقلج
شدا تسوين بنفسجججججج .. انت فيان اللي لو صحتي صيحة وحدة بالموظفين تخليهم يترادمون كدامج ومن كبيرهم لصغيرهم يحسبلج حساب ويهابج وتنزلين بنفسج هيج ليش .
راد يرفع راسي دموعي نزلوا ويا ما رفعني : بنتي تخبلتي
- احبه بابا .. احبه لتطلقني منه ارجوووك بابا
حجيتها وبجيت بقوة
- مو كلشي تحبي يناسبج لو زين الح واوافقلج بيه .. وجع يوم ولا معلعلة دوم .. كومي
- ما اريد اتركه .. اني ما اريد شوان اريده هو زوجي بابا اعرف غلطت مكتلك وجنت ناوية اكولك بس خفت بس اني ما اكدر اعيش بدونه اموووت
- ممنوع هذا مخادع وكذاب وديخدعج باسم الحب وانت مصدكة .. اصحي وارجعي لوعيج
- انت شوهتني دمرتني .. من جهة تخلي شوان يسوي بيه السواه ومن جهة تكولي اريد مصلحتج .. اتركني اشوف حياتي مثل ما كلكم شفتوها اعتقني .. اخذ مني كلشي واتركني
- ميهونلي .. ما باقيلي غيرج .. انت الوحيدة البقيتيلي من هالعالم بعد امج واخوج والمرحومة اختج ما اكدر انطيج لاي بشر غير اللي اثق بيه .. ما اخلي خلك واحد محتال يغريج ويلعب عليج .
- لو حاولت تجبرني على شي ساعتها والله اقتل نفسي
- انت عاقلة وهالامور المريضة ميفكر بيها غير المريض اني منتظر تتقلدين منصب مستشارة وزير تربطلي نفسج بحارس معتوه اصحي لج بنتي اصحييييي .
- اني اريد يصير عندي بيت وعائلة ما اريد اصير مستشارة ما اريد شي منك عوفني .
- كومي كافي من تصرفات هالجهال .. انت جبيرة كووومي
رفعني واخذني للسرير ..
دخلت المساعدة كاللها : جيبليها الاكل
بقى كاعد واني نمت صفح وانطيته ظهري
جابت الاكل .. حجه : الياكل بضرسه ينفع نفسه .. واذا متاكلين تسهلين عليه عملية الاجهاض .. وهذا المسكن .. تصبحين على عقل بابا .
كام وهو يكول للمساعدة : خليج حواليها
طلع اني كعدت من مكاني
كلتلها : اطلعي وسدي الباب ما تريد اشوف احد
طلعت باوعت الاكل ..
سوب دجاج اصفر وقطعة فخذ دجاج .. شربت السوب وهو حار ريحلي معدتي .. واخذت من الدجاجة شوية اكلت .. واخذت حباية المسكن شربته ..
وكمت غسلت ..
وبقيت كاعدة لوحدي .. ساعات طويلة بصفنتي وافكر شلون وباي طريقة اطلع واتواصل ويا عباس .
كمت من مكاني ..
باوعت البيت كله مطفي ونايم ..
اخذت كب شتوي ولبست نعال ابو الاصبع خفيف وميطلع صوت .. باوعت من الجام .. الحراس ماكو ..
فتحت الباب وامشي واني اترقب ..
تقربت للباب الخارجي اسمع صوت .. باوعت من زوف الباب الحراس برا منتجين ع السيارة ويشربون جاي ويسولفون
فتحت الباب وصرت وراه
انتبهوا وباوعوا ع الباب انفتح اعتقدوا الهوى فتح الباب
بقيت اترقب لحد ما التهو بالسوالف وهم دايرين ظهرهم
دنكت وكمت امشي على كيفي صرت ورا السيارة ..
شوية ودست الها مشيت بسرعة من وراهم
وصلت شوية عنهم حسوا وتراكضوا ورايا : ست ست وين ست
انداريت الهم : نعم
- ست بالقران نتحاسب
- مو مشكلتي
- ست الله يخليج لا تجبريني ارجعج بالقوة واحنا مامورين نرجعج بطيب او قوة
- جرب تمد ايدك وشوف شلون راح اخليك تحلم تشوفها بجسمك بعد
مشي وواحد راح جوا .. والثاني وراي يركض ..
طلعت للشارع العام .. سيارات ماكو ع الشارع اريد سيارة تكسي توكف ماكو وهو يزن براسي ست ست
الثاني جاب السيارة واجا .. وكف كبالي
واني ابتعد ..
وكفت سيارة ثانية رجال جبير اعتقدهم ديتحرشون بيه
صعدت بالسيارة الثانية بسرعة واني اكوله : الله يخليك امشي
- منو ذولة الاعترضوا طريقج
- كلاب سائلة الله يخليك وصلني لبيتي ..
كام يسوق بس الحرس ما خلوه كاموا يكسرون وطلعوا سلاح
الرجال حيل خاف كتله : اطبك على صفحة عمو
مكال لا بسرعة طبك
نزلوا الحرس بسرعة يريد يتعرضوله
صحت : عنه ما تووووصلون .. ابتعد
ضرب الحارس ع السيارة وهو يخزره
حجيت : شوفوا اذا رايدين متتحاسبون بعملكم رافقوني للمكان اللي اريد اروحله لانو اذا ممشيتوا بامري راح تنهانون مني وترجعون بابا يهينكم وراح افصلكم هماتين وجربوني
- ست وين متريدين ناخذج بس احنا وياج والله عدنا اوامر اذا طلعتي وحدج ننفصل
- معناها تفضلوا كدامي
فتحلي الباب الوراني صعدت
وهم صعدوا ليكدام .. كتله : اطلع للحرية
- تامرين ست
طلع بيه لبيت عباس .. صفوا السيارة واني نزلت للفرع مالتهم .. رافقني واحد منهم والثاني بقى بالسيارة .. دكيت الباب هو رجمها رجم بالدك ..
بس محد طلع .. حط رجله ع الباب وباوع من فوك : ست البيت يمكن فارغ !
كمت اباوع من الزرف
هو بادر وطفر للبيت باوع .. حجه : ست البيت فارغ والله ؟
- وين يرحون !
- ما اعرف والله
- امشي
- نرجع للبيت
- سد حلكك وبس
مشى وصعدنا والسايق يكله : ها
- اطلع للسيدية
- هسه
- بلا لغوة وسوق
طلع بيه لبيتنا اللي اجرنا ... جان في بالي اريح وارتاح هناك لان تعبت من المحيط الداير مدايري بس وصلنا طلبت من الحارس يكمز ويفتحلي الباب من جوا ..
صدك سواها وكمز ..
وفتحلي الباب .. فتت واني اتوجه لمكان المفاتيح جوا الطابوكة
اجاني صوت علياء اخت عباس من جوا : منووووو هنا
شافت الحارس مشافتني فزت بسرعة وصرخت : يممممه حرامي
وركضت جوا .. حجيت : اطلع برا اوك
- تامرين ست
طلعت ام عباس بوجهي وهي تكلي : دخيلك ربي ولج انت شعدج ويانا بهالليل
- منو جابكم لهنا ؟ عباس
- وانت شلج غرض شرايدة من عدنا بعد ما خليتي على حالنا حال هدينا بتي واستحي على روحج كاافي
- عباس موجود
- شخليتي بعباس انت .. روحي منا الله لا يوفقج ان شالله روحي
طلع عباس بسرعة : يمه يمه اني احل الموضوع فوتي .
- لا مالك وكفة ويا هاي الما بيها حيا ولا ضمير طب عنها ولا تحاجيها
- يمه بس فوتي
- ما افوت واخليك الها والامير علي طب يمه ولا تشلع افادي
جايبه جلابها بهالليل وهادة علينا يمممممه
- علياء اخذي امي جوا
- عباس اطردها ولا تحاجيهاا
- علياااااااااء
سحبت امها تصيح وسدت الباب ..
حجه : شرايدة
- اني ردت بس اطمن عليك
- اطمنتي بعدني ما ميت ؟
- عباس
- عوفيني فيان والبيناتنا انسي
- انسى! انت دا تكولي انسى
يعني كلام بابا حقيقي لما كالي انت موافق ع الطلاق !
- اي حقيقي وباجر بحيل الله اجيب الشيخ وانهي كلشي
- ووعودك وكلامك وعمري ما اعوفج .. طلعت جبان مجرد مخوفوك عفتني
- اي هيج اني جبان ونذل وخذلتج واني كلهن ..
اختنك .. امشي منا فيان واعتبري البيناتنا انتهى
- ما انتهى .. عباس الي منك ابطني روح .. اني حامل عباس لتسوي بيه هشكل الله يخليك .
حجيتها ودمعت واني اتقرب منه دا اريد الزمه
ابتعد وهو يكولي : حامل من منو بالضبط ؟
فتحت عيوني ممستوعبة اللي يكوله ردد الكلمة وهو يشد عليها : منيييي لو من منوووووو ...... يتبع
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملة من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق