مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

 

رواية وتبقي لي الفصل السابع والاربعون47 بقلم فاطيما

رواية وتبقي لي الفصل السابع والاربعون47 بقلم فاطيما

وتبقي لي .. ( الحلقة 47 )

فى بيت الحاجة هدى كانت رايحه رنا على المطبخ علشان تجهز عزومة الغدا لعبدالله لاقت الموبيل بيرن برقم احمد ...

رنا : ايوا يا حماده

الشخص : انا مش صاحب الموبيل صاحب الموبيل خبطته عربيه

رنا بصدمه وصرخه طالعه من القلب : ايه احمد .. حصله ايه .. هو فين .. انا جايه حالا 

ولسه بتلف تتحرك ناحية اوضتها لاقت هدى وقفه وحاطه ايديها على قلبها وبتقول : احمد جراله ايه يا رنا 

رنا ارتبكت بس ما قدرتش تقلقها اكتر : خبطته عربيه بس اللى معاه بيقولى خير انا هروح بسرعه واطمنك 

هدى : لا رجلى على رجلك انا هروح البس بسرعه 

وخرجوا ركبوا تاكسي وطول الطريق رنا بتحاول تهدى امها وهى نفسها جواه متوتره وميته من الخوف مش عارفه هتروح تلاقى اخوها حالته ازاى بس بتطمن نفسها وبتحاول تطمن امها معاها ..

رنا : ان شاء الله خير 

هدى : يارب ما يجعل يومى قبل يومكم انا لو حد فيكوا جراله حاجه اموت 

رنا : ما تقوليش كده يا ماما بعد الشر عليكى وعليه تفائلى بالخير مش دا كلامك دايما 

هدى : يارب ما تورينيش فيهم شر يارب انت اللى عالم انا مليش غيرهم 

كلامها كان بيوجع قلب رنا زياده وقالت : ربنا يجيب العواقب سليمه 

وفى الاستديو عمر قلق على احمد اتصل يشوفه مجاش لحد دلوقتى ليه ورد عليه نفس الشخص  وقاله اللى حصل نزل جرى يجرى على المستشفى وهو فى عربيته مسك موبيله واتصل على عبدالله ..

عبدالله : صباح الورد يا عموور 

عمرو بارتباك : صباح الخير يا عبدالله انا اسف انى بزعجك بس فى حاجه حصلت لازم تعرفها 

عبدالله : ايه يا عمرو خيرر

عمرو : .............................. حكاله اللى حصل 

عبدالله قام وقف : ايه انا جاى حالا 

وطلع يجرى عبدالله من المكتب سوكا اتخضت من شكله طلعت على زكى ..

سوكا : زكى الحق دكتور عبدالله خرج يجرى وشكل فى حاجه شكله ما يطمنش

زكى اتصل بيه لاقى الموبيل مشغول ..

اما عبدالله كان مع محمود على الموبيل بلغه باللى حصل وطلب منه يكون جاهز معاه على تليفون علشان لو حالته تسمح ينقله مستشفى الدكتور سليمان واول ما قفل معاه كلمه زكى وعرف منه اللى حصل وطلب منه عبدالله انه ما يقولش لسوكا لحسن تكون رنا لسه ما تعرفش وانه هيروح ويطمنه من هناك وقفل معاه ..

سوكا : خير يا حبيبي عرفت حاجه 

زكى : لا ابدا خير ما تقلقيش الا صح خلصتى التقرير اللى طلبته منك 

سوكا : لا لسه فاضل فيه شويه بالكتير نص ساعه وهيكون عندك عن اذنك وخرجت 

زكى خد نفس عميق وقال : يارب استر 

عبدالله وصل المستشفى قبل رنا وكان عارف دكاتره هناك ودخل شاف احمد واطمن عليه وعرف حالته من الدكاتره انه بيعانى من كسر فى الساق ورضوض فى جسمه من خبطة العربيه وطلب منهم يوقفوا كل حاجه واتصل بمحمود يبعت عربيه الاسعاف بسرعه وهو خارج من اوضة الكشف عنده لاقى رنا وهدى جايين قدامه ..

رنا اللى اتفاجأت بيه : عبدالله انت عرفت احمد فين 

هدى : طمنى يا بنى الله يرضى عليك 

عبدالله : والله يا امى زى الفل هو بس كسر فى رجله وانا علشان اطمن عليه زياده هوديه مستشفى الدكتور سليمان يجبس هناك ونعمله اشاعه على جسمه بالكامل 

وحضنها ومسك ايديها وهو بيقعدها على اقرب كرسى وبيقول : بس انتى استريحى كده  يا امى وروقى وانا هخليكى تشوفيه حالا 

هدى : بجد يا بنى هو كويس 

عبدالله : والله كويس هدخلك حالا بس اهدى شويه 

رنا شدت عبدالله وقربته منها بعيد عن امها وقالتله بهمس وهى بتعيط : عبدالله اوعى تكون بتقول كده 

عبدالله حوطها بدراعه وهو بيقولها : رنا ممكن تهدى وبلاش عياط انتى بتثقى فيه ولا لا 

رنا :  طبعا 

عبدالله : طيب والله كويس ممكن بقي تهدى وتهدى ماما وتسبينى اتصرف 

هزت راسها بالموافقه 

ونقلوا احمد مستشفى الدكتور سليمان وجبسوا رجله وكانوا بيعملوله اللازم 

 

ونقلوه على غرفه خاصة ودخلت هدى اطمنت عليه ورنا كمان ومعاهم عمرو و محمود وعبدالله ..

عبدالله :ها يا وحش ايه الاخبار 

احمد : تمام الحمد لله 

عبدالله : لسه حاسس بالم 

احمد : لا دلوقتى احسن كتيرر 

هدى لعبدالله  : ربنا يخليك يا حبيبي وما نتحرمش منك ابداا والله انا ما اطمنت الا لما شوفتك 

عبدالله راح باس على راسها : الف بعد الشر عليه الحمد لله جت سليمه 

محمود : الا قولى يا ابوحميد مين اللى كان واخد عقلك وانت معدى هاا

احمد : والله  تصدقوا ما كنت سرحان دا انا يدوبك نازل من العربيه وشايف الطريق كويس ماعرفش طلعتلى منين العربيه دى بس الحمد لله على كل حال 

عمرو : المهم انك بخير يا فنان 

رنا واقفه ساكته خالص ولا بتنطق لسه مش مستوعبه خضتها عليه وانها شايفاه قدامها سليم 

عبدالله موبيله رن : اووبس دا زكى نسيته خالص 

وكلمه وطمنه على احمد بس زكى فكره باجتماع البنك الخاص بالقرض وانه مش هينفع يتأجل عبدالله قاله لا انا جاى حالا ساعه وهكون عندك ..

عبدالله : معلش يا ماما معلش يا ابو حميد مضطر اسيبكم شويه جالى مشوار مهم هخلصه وارجع اطمن عليك 

هدى : اتفضل يا حبيبى ربنا يوفقك 

احمد : اتفضل يا دكتور ربنا يخليكى 

عبدالله بهمس لمحمود : محمود مش هوصيك 

محمود : فى عيونى يا ابو عبيد 

عبدالله قرب من رنا ومسك ايديها وبهمس : مش هتأخر عليكوا هاا

لو احتاجتى اى حاجه كلمينى ومن غير تفكير 

رنا بهمس : ربنا يخليك ليا يا حبيبى خلى بالك من نفسك 

وراح عبدالله على المجموعه واول ما شافه زكى ..

زكى : هاا ايه الاخبار

عبدالله : لا الحمد لله جت سليمه وهو زى الفل كسر فى رجله بس ورضوض بسيطه راحه وهيبقى زى الفل 

زكى : الحمد لله سوكا لو عرفت هتعملى مشكله

عبدالله : هههههههههه ما تخافش انا 

ودخلوا عليها ..

عبدالله : سوكينه جهزتى التقرير بتاع الاجتماع 

سوكا : اه يا دكتور جاهز 

عبدالله : طيب يلا بينا يا زكى سوكا ممنوع اى حد يدخل او توصليلى اى تليفون الا لو كانت رنا 

سوكا : هاا

عبدالله : فهمتى يا سوكينه 

سوكا : اه اه يا فندم ما تقلقش  اتفضل ..

سوكا ما تعرفش ليه حاسه بقلق لاقت نفسها بتكلم رنا بس لاقت موبيلها مشغول 

عبدالله : رنوشتى ايه الاخبار 

رنا : كله تمام يا حبيبى ما تقلقش انت نفسك ركز فى الاجتماع 

عبدالله : الحمد لله .. رورو لو سوكا كلمتك بلاش تعرف حاجه دلوقتى 

رنا : ماتقلقش يا حبيبى انا عارفه 

وبعد كده فعلا سوكا كلمت رنا ورنا كلمتها عادى جداا ومحسستهاش باى حاجه ..

وعلى الضهر كده احمد من التعب نام وهدى كانت قاعده جنبه برضو من التعب نامت على الكرسي وعمرو كان استأذن منهم ومشي مكنش فيه الا رنا بس اللى قعده تايهه فى افكارها قطع عليها تفكيرها شخص بيخبط على الباب قامت تفتح لاقتها دودى رنا ..

رنا باستغراب : دودى 

رنا اتفجأت من شكلها عيونها اللى مليانه دموع وكانت حالتها حاله 

دودى وهى بطلع الكلام بالعافيه : رنا احمد حصله ايه هو كويس 

رنا لاقت نفسها بتخدها فى حضنها وبتطبطب عليها : اهدى يا حبيبتى هو كويس الحمد لله ربنا ستر 

دودى بصت عليه : هو عبدالله عرف 

رنا : اه يا حبيبتى هو اللى نقله هنا وما سابناش الا لما اطمن عليه هو كسر فى رجله وشوية رضوض 

رنا وهى بتمسح دموعها : بس انت عرفتى منين بموضوع الحادثه 

دودى ارتبكت وسكتت رنا كملت كلامها : استنى اشوفه رايح فى النوم ولا لا علشان تسلمى عليه 

دودى : لا حبيبتى سبيه نايم مستريح انا ممكن اكلمك اطمن عليه منك 

رنا : طبعا انتى تتكلمى فى اى وقت 

دودى وهى بصه عليه من بعيد  : ربنا يخليكى يا رنوش انا همشي بقي 

رنا : استنى هاجى اوصلك 

دودى : لا حبيبتى خليكى ابقي سلميلي عليه لما يصحى  سلام

رنا : مع السلامه ياروح قلبي خلى بالك من نفسك 

رنا مكنتش مستوعبه حاجه وبتقول لنفسها طيب امتى وازاى معقول يمكن مشاعر من ناحيتها بس انا عمرى ما حسيت ان احمد فيه حاجه انا لازم اتاكد ..

وبعد فترة صحى احمد ورنا كانت مريحه على الكنبه سمعت صوته بينادى جريت عليه ..

رنا : ايوه يا حبيبي 

احمد : رنا لو سمحتى عايز اشرب 

رنا : حاضر ورفعته براحه وشربته 

احسن دلوقتى 

احمد : الحمد لله احسن 

رنا : على فكره كان فى ضيفه عايزه تشوفك بس انت كنت نايم 

احمد : ضيفه مين دى 

رنا : دودى 

احمد : ايه .. وما صحتنيش ليه يا رنا 

رنا وهى كاتمه الضحكه : هى ما رضيتش وقالتلى سبيه مستريح الا هو فيه ايه بالظبط ؟

احمد بارتباك : رنا هو موبيلى فين 

رنا : اتفضل 

احمد : رنا انا عايزه اقولك على حاجه هى سابقه لاوانها شويه بس لازم تعرفيها 

رنا : بخصوص دودى 

احمد : انا حاسس بمشاعر من ناحيتها انا عارف ان الموضوع دلوقتى ما ينفعش علشان انا لسه مشوارى فى اوله بس غصب عنى يارنا بحبها 

رنا : وهى 

احمد : احنا مقولنهاش صريحه بس هى ما صددتش مشاعرى ليها واحنا والله بتعامل صحاب بس انا بقولك مشاعرى انا ونيتى انى اعمل المستحيل علشان اكون جدير بيها وبس

رنا : زى ما انت قولت يا حماده انت مشوارك لسه فى اوله ويمكن مشاعرك مع الوقت تتغير خليكم كده اصحاب افضل والوقت هو اللى هيثبت اذا كانت المشاعر دى حقيقه هتفضل انا حسيت من خضتها عليك ودموعها وهى اتحرجت منى بس ماهماش وبرضو جت تسأل عليك ودا فى حد ذاته مؤشر خيرر بس خلى بالك يا احمد دودى تهمنى جداا دى روح عبدالله اوعى يا احمد تجرحها او تكسر قلبها انا بقولك كده وانا عارفه كويس ان مش اخلاقك بس الوضع حساس انت فاهمنى 

احمد: انت عارفه يا رنا بعيدا عن علاقتك بعبدالله والله انا بحبه جداا وبحترمه جدا جداا وانا لو مش واثق من مشاعرى مش هقرب منها واوعدك انى هفضل اتعامل اننا اصحاب لغاية ما اقف على رجلى واحقق اللى بحلم بيه علشان اكون جدير بيها 

رنا : برافو عليك يا حبيبي وانا متفائله خيرر ان شاء الله ربنا هيحقق لك كل اللى بتتمناه يلا كلمها 

وباليل الكل كان فى المستشفى عند احمد وسوكا كانت زعلانه من زكى وما بتكلموش ..

رنا : خلاص بقي يا سوكتى ما انا فهمتك ان عبدالله هو اللى قاله ما يقولش 

سوكا : لا يا رنا كنت لازم اكون معاكى كان لازم يقولى 

عبدالله لزكى  : انت يا بنى انت مش عندك ميعاد مع اهلها الساعه بقت 6 ما تهونا بقي 

زكى : انت مش شايف قلبه عليه ازاى ولا فى دماغها الميعاد اصلا 

عبدالله : رورو 

رنا : ايوا يا حبيبى 

عبدالله بهمس لرنا : ممكن تحلى المشكله دى زكى عايز ياخدها ويمشى علشان يقابل اهلها وبعدين عايز اخدك ونخرج شويه 

رنا : يانهار ابيض لا استنى دى بتستعبط 

وراحت جرت سوكا بعيد وبهمس : انتى يا زوفته اتفضلى قومى روحى واجهزى علشان ميعاد زكى مع عمك وجدتك ممكن 

سوكا : ومين قالك اصلا ان هخلى يجى النهارده انا مش فاضيه قاعده معاكى لما يبقى يرجع من السفر 

رنا : نعم ياختى ومين قالك انى عايزاكى اصلا انا خارجه مع خطيبى ومش فاضيالك واحمد وزى الفل يلا هوينا 

سوكا : كده يا رنا طووويب انا ماشيه 

رنا وقفت قدامها : سوكتى ليه مش عايزه تكملى فرحتى بيكى يعنى ينفع تنكدى فى يوم زى ده والنكد دا يبقى بسببى علشان خاطرى لو بتحبينى روحى وافرحى واتبسطى دا اليوم اللى كنتى بتتمنيه مش كده 

سوكا : طويب تفتكرى زودتها معاه قووى 

رنا : الصراحه اه 

سوكا : خلاص هصلحه بقي بس يخطبنى وهطلع عينه بعد كده 

رنا : ههههههههههههه يا خرب عقلك خلاص بس المهم يدبس الاول 

وضحكوا هما الاتنين وراحت سوكا عند زكى وبهمس : ممكن تروحنى لو سمحت علشان واحد جاى يتقدملى النهارده ومش عايزه اتأخر 

زكى بهمس لسوكا : والله اخيرا افتكرتى انا قولت اتكنسلت مع الزعله 

سوكا بهمس لزكى : انا زعلت مين قال كده انا مقدرش ازعل منك يا زيكوو 

زكى بهمس لسوكا : بقولك ايه يلا بينا قبل ما تغيرى رايك 

طيب معلش يا رنا هنستأذن انا سوكا والف سلامه على احمد وربنا يكمل شفاه على خير 

رنا : تسلم يا زكى ربنا يخليك ومبرووك مقدما 

زكى : الله يبارك فيكى 

عبدالله : مع السلامه يا زكى مع السلامه يا سوكا ربنا يوفقكم ان شاء الله 

زكى : ربنا يخليك يا بوص 

سوكا : شكرا يا دكتور .. سلام يا قطتى هكلمك باليل 

وهما خارجين قبلوا محمود ..

محمود : اهلا ازيك يا ابو الزيك ازيك يا سوكا 

زكى : الحمد لله يا محمود انت عامل ايه 

سوكا : الحمد لله ازيك يا صديقى 

محمود : بخير والف مبروك سمعت ان فى ارتباط قريب ربنا يتمم لكم بخير 

زكى : الله يبارك فيك يا محمود عقبالك

سوكا : الله يبارك فيك 

زكى : طيب نستأذن احنا مع السلامه 

وخرجوا واستأذنت رنا من مامتها تخرج مع عبدالله وخرجوا راحوا الجزيرة قعدوا على نفس الترابيزه بتاعتهم زى كل مره بس عبدالله حس بشرود رنا قربها منه اكتر وهو بيقول .. عبدالله : بعدتى عنى وروحتى فين 

رنا : انا معاك اهو يا عبدالله 

عبدالله : لايمكن عيونك مش معايا خالص مالك ياقلب عبدالله 

رنا سكتت شويه وبصتله بضياع وهى بتقول : خايفه يا عبدالله ومتسألنيش من ايه علشان مااعرفش بس حاسه ان قلبي مقبوض قووى

عبدالله بيسمع منها باهتمام وهو ضامم كفوف ايديها بين كفوفه : خايفه وانا موجود جنبك 

رنا : فى قربك بحس بأمان الدنيا كله ضهرى بيتشد بيك النهارده لاول مره احس انى مش وحيده لو فيه خوف يبقي خوفى انه يجى يوم وتكون بعيد عنى خايفه من اللى جاى من الظروف لانى بقيت مقدرش اعيش من غيرك .. وسكتت شويه وقالت بضعف هز قلب عبدالله هز : عبدالله خدنى فى حضنك 

وخدها عبدالله فى حضنه وضمها قوى وهو بيمسح على شعرها بحنان ...

ورن موبيل رنا اتفاجأت برقم ابو عبدالله وقالت : دا عمو 

رنا : الوو

عبدالعزيز: ازيك يا رنوش عامله ايه 

رنا : الحمد لله يا عمو تمام بخير ازاى صحة حضرتك وازاى طنط

عبدالعزيز : الحمد لله حبيبتى بخير .. والف سلامه على احمد انا كنت لسه عندوا فى المستشفى وعرفت انك خرجتى من الدكتور 

رنا : تسلم يا عمو ربنا يخليك تعبنا حضرتك والله 

عبدالعزيز : ايه يابنتى الكلام دا انا دلوقتى فى مقام والدك ولازم دايما تطمنينى عليك وعلى اسرتك ما اسمعش تانى من بره فاهمه 

رنا : حاضر يا عمو ربنا يخليك لينا 

عبدالعزيز : ويخليكى يا حبيبتى ويتملكم على خير يارب 

رنا لو فى اى حاجه او احتاجتى لشىء انا موجود اوعى تعملى تكليف علشان ما ازعلش منك 

رنا : ربنا يخليك ياعمو اكيد ما استغناش عن حضرتك تسلم 

عبدالعزيز :فى امان الله يا بنتى 

رنا : مع السلامه يا عمى 

بصت لعبدالله بفرحه وهى بتقول : انت ازاى عندك اب عسل كده 

عبدالله : ايه ده ايه ده من اولها كده يخونك الحضن اللى من شويه دا لسه ما بردش ابو شكلك 

رنا بدلع : خلاسي يا ناس على اللى بتغير  دا انت الحب كله يا روحى انا 

وكملوا السهره دلع ورومانسيه وهيييح الله يستر علينا من اللى جاى 

وفهم عبدالله رنا انه مش هيقدر يشوفها الصبح علشان الطياره 7 وهيكون معاه زكى يعنى هيودعوا بعض دلوقتى وبعد الوداع الرومانسي جداا مشي عبدالله وسافر هو وزكى تانى يوم الصبح بعد ما زكى اتفق مع اهل سوكا انه جاهز وشقته جاهزه وانه بعد ما يرجع من السفر يكتبوا الكتاب ويدخلوا عالطول ووافق عم سوكا بعد ما خد موافقتها وفرحت جدة سوكا بزكى لانها حست انه بيحب سوكا وانها هى كمان بتحبوا وهتبقى مطمنه عليها معاه ...

وفى نفس يوم سفر عبدالله الصبح قالوا الدكاتره لاحمد انه يفضل فى المستشفى يومين وبعد كده يكتبوا له خروج واصرت هدى انها تفضل معاه وان رنا هى اللى تروح علشان شغلها وسابتهم رنا بعد ما اطمنت على احمد وراحت على المجموعه كالعاده وقابلت سوكا اللى حكتلها على زيارة زكى واتفاقه مع عمها وكانوا فرحانين ومبسوطين وكل الاجواء كانت هاديه عبدالله وزكى كل واحد فيهم اول ما وصلوا كلم خطيبته ودودى كالعاده اتصلت اطمنت على احمد وعلى لسه مع والده فى المستشفى لخطورة صحته ومعاه ساره وسعاد اللى استأذنت من بيتى علشان تبقى جنب عم ساره واهله وقبل نهاية اليوم بالمجموعه فى نفس اليوم اتصل عم سوكا بيها يعزمها على الغدا زوجته واولاده عايزين يحتفلوا بيها واصر عليها انها لازم تحضر طبعا كانت عايزه تاخد رنا معاها بس رنا اعتذرت منها وقالتلها انها لازم تروح تشوف احمد وانها كمان تعبانه ومحتاجه تنام وانها تروح تفرح معاهم ومشيوا وراحت سوكا على بيت عمها ورنا على المستشفى اطمنت على احمد وطلبت منها هدى انها تروح تريح وتبقى تيجى الصبح علشان حست ان وشها مرهق وتعبان وافقت رنا بعد الحاح من والداتها واحمد وقامت تروح وقفت قدام المستشفى مستنيه تاكسي يوصلها لاقت فجأه عربيه وقفت قدامها ونزل منها شاب شكله مش غريب عليها ولما شال نضارته وهو بيقرب منها افتكرته وباستغراب قالت..

رنا : استاذ خالد 

خالد : ازيك يا انسه رنا عامله ايه الف سلامه على استاذ احمد 

رنا باندهاش : الله يسلمك متشكره بس هو حضرتك تعرف احمد 

خالد : الصراحه اعرف انه اخوكى لكن معرفوش شخصيا بس اى حاجه تخصك اعرفها وتهمنى 

رنا بعدم ارتياح : متشكره وعن اذن حضرتك 

وكانت هتسيبه ولفت ومشيت خطوه لاقته بيقول : لو سمحتى يا انسه رنا فى كلام مهم لازم تعرفيه وصدقينى مش هاخد من وقتك كتير بس نقعد ونتكلم فى اى مكان تختاريه وصدقينى مش هتندمى 

رنا بصتله باستغراب وبحده : هو انا اعرف حضرتك مين الاول ولا انت تعرفنى منين علشان اتكلم معاك وبعدين ايه الكلام المهم اللى ممكن يكون بين واحنا كل معرفتنا ببعض صدفه انك ساعدتنى وانا شكرتك وخلصنا 

خالد :لما تسمعى الكلام اللى هقوله هتعرفى ان نيتى خير وان الصدفه اللى حصلت بينا هى اللى هتحميكى من حاجات كتير ممكن تواجه حياتك انا بطلب بس انك تسمعينى 

رنا بعصبيه : مع انى مش فاهمه حاجه من كلامك اللى كله الغاز بس انا بشكر حضرتك جدا على زوقك وبقولك ملوش لزوم اى مكان لو فيه حاجه مهمه قولها دلوقتى يا تتفضل تسيبنى اكمل طريقى 

خالد : صدقينى مش هينفع فى الشارع كده طيب اتفضلى معايا اوصلك ونتكلم فى العريبه 

رنا : اسفه ولو سمحت تحترم رغبتى ولو فيه حاجه اقولها هنا وبسرعه علشان انا مش هنتظر اكتر من كده 

خالد : ليه خايفه ليكون حد بيصورنا ويروح يقول لبراهيم الزايد ويهددك زى ما عمل ساعة ما شوفتك 

رنا من صدمتها من كلامه حست انها اتسمرت فى مكانها وبحده : يبقى هو اللى باعتك علشان يكمل خطة القذره

وجت تسيبه وتمشي راح واقف قدامها وهو بيقول : والله ابداا انا ابعد شخص ممكن تفكرى فيه كده والدليل اسمى انا خالد الكاشف عمرك ما سمعتى فى المجموعه عن مجموعه الكاشف وعلاقتها بمجموعة الزايد 

رنا وهى مش مستوعبه وبعصبيه : لا ما سمعتش ولا عايزه اسمع انا عايزاكوا تسبونى فى حالى وبس 

خالد : والله انا كل همى احميكى ولو عايزانى اثبت حسن نيتى انا ممكن ابعده عن طريقك واخليه بقولهالك بنفسه 

رنا : وانت ايه مصلحتك ولا انا اهمك في ايه بس 

خالد : انا من اول ما شوفتك يا رنا وانا حاسس انك تهمينى اتصدمت لما عرفت انك خطيبة عبدالله فى الحفله بس غصب عنى مش هقدر اسيب حد يأذيكى واقف ساكت 

رنا وهى مش مستوعبه : ايه اللى انت بتقوله دا انت مجنون ممكن تبعد وتسيبنى دلوقتى 

خالد : همشي يارنا بس خدى الكارت دا فيه كل تليفوناتى صدقينى هتحتاجيلى وقريب جداا لو مكنش علشان ابراهيم يبقى علشان المحنه اللى هيقع فيها خطيبك وصدقينى محدش يقدر يخرجه منها غيرى 

رنا : عبدالله .. بجد حرام عليك لو انت قاصد تعمل فيه كده 

خالد : رنا صدقى كل كلمه بقولها انا مليش مصلحه علشان اخدعك الا لصالحك ولما تصدقى وترضى تسمعينى هتفهمى كل حاجه خدى الكارت مش هتخسرى حاجه 

رنا من غير شعور لاقت نفسها بتاخد الكارت وبتقول : ممكن بقى تسبنى امشي 

خالد : اتفضلى بس اعرفى انى تحت امرك فى اى وقت تحتاجى مساعدتى او تحتاجى تعرفى منى اى شىء يبعد عنك القلق من ناحيتى هتلاقينى موجود ومن غير ما اتردد لحظه 

وسبها تمشي وهى بتكلم نفسها وبتعيد كلامه وبتفكر فيه هى مش فاهمه حاجه بس كل اللى فاهماه ان فى مشكله هيقع فيها عبدالله والحل فى ايد خالد بس قصة خالد ايه هو دا المبهم بالنسبه لها 

روحت وكانت لسه طالعه قابلت ساره نازله ...

ساره : رنا حبيبتى عامله ايه 

رنا : الحمد لله يا ساره انتى ايه اخبارك واخبار طنط سعاد مش بينين ليه  

ساره : بخير الحمد لله بس اصل عمى تعبان فى المستشفى وعالطول معاهم هناك  

رنا : الف سلامه عليه ربنا يطمنكم عنه علشان كده على مجاش المجموعه 

ساره : اصله فى العنايه وهو قلقان عليه قووى 

رنا : طيب هو فى مستشفى ايه علشان لو حبنا نطمن عليه 

قالتلها ساره على العنوان 

رنا : ربنا يتم شفاه على خير ان شاء الله 

ساره : انا برضو مش بشوف طنط خالص 

رنا : اصل احمد خبطته عربيه امبارح بس الحمد لله جت سليمه رجله بس مكسوره وشوية رضوض 

ساره : يا نهار ابيض .. وسرحت ساره فى الكلام اللى سمعته من مصعب .. وفاقت من سرحها على رنا وهى بتقول : بس يا بكره يا بعده بالكتير هيخرج 

ساره : الف سلامه عليه يا رنا انا لازم ابلغ ماما 

رنا : مالوش لازمه حبيبتى كفايه اللى انتوا فيه وهو كده كده خارج تبقي تشوفه فى البيت يالا روحى انتى علشان ما تتأخريش 

وسبتها ساره وراحت على المستشفى واول ما شافت على خدته على جنب وقالتله على حادثة احمد ..

على : انا فعلا اتلهيت فى موضوع بابا بكره الصبح ان شاء الله هسيبهم واروح اكلم عبدالعزيز بيه وابلغه بكل شىء قبل ما يحصل حاجه ويفوت الاوان 

ساره : ربنا يستر 

وباليل قبل ما تنام كلمت رنا عبدالله كالعاده وحاولت تكون طبيعيه علشان ما تقلقوش بس سألته عن مجموعة الكاشف وطبعا استغرب عبدالله من سؤالها بس قالتله انها سمعت فى المجموعه عنها فقالت تستفسر منه وعرفت من عبدالله ان ملهومش اى علاقات مع المجموعه دى ولا صاحبها ودا من زمن بسبب خلافهم فى طريقة الشغل وان مجدى الكاشف من رجال الاعمال اللى بيستخدموا اساليب ملتويه وطرق مشبوهه علشان يكسبوا فى المناقصات او فى شغله بصوره عامه وان ابوه وعمه لما اكتشفوا الالعيبه فى مره من المرات اتقطعت العلاقات بينا وبينهم نهائي وكان دا سبب سجن واحد قريبهم كان مشترك معاه فى اذى ليهم ومن ساعتها اتقفل ملف الكاشف بالنسبه لمجموعة الزايد 

وبعد ما قفلت رنا فضلت تفكر وتقول يعنى فعلا كلام خالد صح طيب وقدام كده ايه اللى ممكن يكون فى ايد خالد يخلى ابراهيم يخاف يهددنى المفروض ان الزايد بعيد عن اى شغل مش نضيف انا خلاص تعبت من كتر التفكيرر ..

لاقت جرس الموبيل بيرن افتكرت انه عبدالله ومن غير ما تبص ردت ....

رنا : الووو يا حبيبى 

ابراهيم بسخريه : حبايبك كتيرر ولا ايه يا رنا 

رنا اتوترت : مين معايا 

ابراهيم : لا كده عيب تنسي صوتى بس هعذرك علشان اكيد دا من تأثير صدمتك من خبر حادثه احمد  .. الا الفنان عامل ايه دلوقت 

رنا بصوت خافت من الخوف : ابراهيم بيه 

ابراهيم : تصدقى صوتك قطع قلبي طيب وليه تخلينى ازعل المهم مش جت سليمه 

رنا مصدومه وبصوت مخنوق : انت اللى عملت كده 

ابراهيم : هههههههههه واضح ان استيعابك ضعيف انتى لسه هتسألى على العموم دى قرصة ودن بس لو ما نفذتيش هقرص برضو بس المره الجايه بالدم فاهمه وانصحك تتماسكى كده وتهدى وتفكرى كويس فى صحة والدتك ومستقبل اخوكى بيتهيالى تنازل بسيط علشانهم مش هيضرك الا بقى لو كنتى انانيه وعنيده ساعتها مش هرحمك  وهخليكى تبكى بدل الدموع دم 

رنا : انت ايه يا اخى اكيد انت مش بنى ادم حسبى الله ونعم الوكيل فيك 

ابراهيم : انا مش هقعد اسمع مهاتراتك دى كتير تنفذى اللى قولت عليه وبسرعه علشان انا مش هستنى اكتر من كده خدتى فرصتك وزياده وصدقينى لو هتاخديها عند مش هرحمك ودا اخر كلام ليكى عندى 

وقفل فى وشها السكه وسابها منهاره فى العياط لما عرفت انها السبب فى اذى اخوها وكانت مصدومه مش قادره تصدق ان عم عبدالله يوصل بيه الاجرام انه يحاول يقتل اخوها علشان يجبرها تسيب ابن اخوه بكت بحرقه وشهقات تبكى الحجر وقامت بضعف اتوضت وصلت ركعتين وهى على سجاده الصلاه قالت بصوت موجوع وهى بتبكى بحرقه : يارب انا مبقتش عارفه افكر ولا اتصرف ساعدنى يارب انا مقدرش اكون سبب فى اذى اخويا او امى ولا اقدر ابعد عن عبدالله مش عارفه اعمل ايه يارب ساعدنى انا مليش حد فى الدنيا غيرك ..........

تكملة الرواية بعد قليل 

لمتابعة باقى الرواية زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كاملة من هناااااااااا

مجمع الروايات الكامله 1اضغط هناااااااا

 مجمع الروايات الكاملة 2 اضغط هناااااا