روايةكشف حقائق وأسرار الفصل الرابع 4 للكاتب احمدحسن حصريه في مدونة موسوعة القصص والروايات
روايةكشف حقائق وأسرار الفصل الرابع 4 للكاتب احمدحسن حصريه في مدونة موسوعة القصص والروايات
سمعت لامؤاخذة المواشي بتزعق وأنا عشان عيشت في وسطهم 11 سنة فبقيت عارفة تفاصيلهم وعارفة إن عمرهم ما يعملوا كده غير لما يكون في حد دخل الزريبة وهما مش متعودين عليه
بصراحة قلقت وقلت أشوف مين اللي في الزريبة
أتسحبت واحدة واحدة وبصيت من ضهر الزريبة شفت حاجة خلتني ثبت في مكاني وبقيت مش مصدقة عنيا !!!
القاضي .. شفتي إيه ؟!!
أصيلة .. ( شفت سماح واقفة مع أخويا )
القاضي .. سماح وأخوكي ؟!!!
أصيلة .. ايوة يابيه والأغرب من كده اللي سمعته
القاضي .. سمعتي ايه ؟
اصيلة .. سمعت سماح زعلانة وبتقوله ..
------- #كشف_حقائق_وأسرار_بقلم_احمد_حسن
سماح .. وبعدين معاك ياعامر هو أنت كل يوم والتاني هتنطلي هنا !
عامر .. اعمل إيه مش قادر على بعادك ياسموحتي
سماح .. سموحتك في عينك ياخمورجي ، اسمع ياد انت دي أخر مرة رجلك تعتب اهنه تاني احسن ورب العزة ..
عامر .. ايه؟! هتعملي ايه ! هتروحي تشتكيني لأمي ولا هتقولي لحامد أبو حفيدك بيغلس عليا ههههه
سماح .. لالالا اسمعني كويس وفوق من الهباب اللي انت طافحه ، انت عارف كويس لو حامد وأهلي عرفوا إن ولدي يبقا إبنك مش إبن صالح هيخلصوا عليك قبلي فلو فاكر إنك كده بتهددني لا ياشاطر روح ألعب غيرها
عامر .. كده ؟! طيب , انا هطلع في الشارع دلوقتي واقول على كل حاجة واشوف انا ولا انتي
سماح .. استغفر الله العظيم ، قولي انت عايز ايه دلوقتي ؟!
عامر .. مزنوق في قرشين قلت أميل عليكي لحد ما ربنا يفرجها
سماح .. في إيه ياض !! انت طلعتلي منين !! هو أنت مش لسه واخد مني فلوس المرة اللي فاتت واللي قبلها ؟!!
ـــــــــــــــــــــــــ ( الفصل الرابع قبل الأخير )
في اللحظة دي دخلت عليهم
وسماح اول ما شفتني عنيها كانت هتطلع منها من الصدمة
سماح .. انتي هنا من إيمتا ؟!!
أصيلة .. من أول سموحتي
سماح .. أبوس إيدك ياأصيلة أستري عليا أهلي هيقتلوني
وأنتي عارفة انا معايا عيل أبوس أيدك أستري عليا
أصيلة .. مش عارفة أتصدم منك ولا من أخوي اللي مشفتوش من سنين وأول ما أشوفه أشوفه مسطول وفي إيده إزازة زفت وجاي يبتزك عشان ياخد فلوس
عامر .. اصيلة انا ...
اصيلة .. أنت إيه بس حرام عليك حزنتي على عمري اللي راح هدر ودفعته في تمن لحريتكم ، ياريتني سيبتكم لعيلة وهدان كانوا خلصوا عليكم واحد ورا التاني ولا إني كنت أشوفكم بالمنظر ده
سماح .. أصيلة يااختي طمنيني وقوليلي مش هتجيبي سيرة لحد والنبي
في اللحظة دي المواشي زعقت واصيلة بسرعة بصت من الزريبة لقت حامد جاي على الصوت
أصيلة .. كده كملت حامد جاي
ـــــــ
حامد .. مين عند المواشي ؟
أصيلة .. دا انا ياعمي
حامد .. بتعملي ايه يابت السعادي في الزريبة ؟! إيه ده ؟!! مين ده ؟!!!
أصيلة .. دا دااا ده عامر أخويا جاني يبلغني إن أمي طالبة تشوفني فجيبته في الزريبة زي ما كنتم بتعملوا مع خالي زمان لما كان بييجي يزورني ، بصراحة خفت أدخله جوة تروح أنت تزعل ، فجبته الزريبة وسماح قلقت عليا لما اتأخرت وجت ورايا
حامد .. سماح قلقت عليكي ؟!!! سماح قلقت عليكي انتي ؟!! ومالوا عالعموم خدي أصيلة وادخلي البيت وأنت ياد أنت عارف لو دخلت بيتي من غير إذني تاني هعمل فيك إيه ؟! غور يلا من هنا
دخلنا البيت وحامد نظرته ليا كانت رعباني وكأنه راجع كلام امه في دماغه لما قالتلته إنها شاكة فيا انا وإخواتي في موضوع قت،ل صالح
المهم في الأخر رحت على أوضتي وسماح جت معايا
ـــــــــــــــ
اصيلة ،، منكم لله ، اقول ايه لحامد وأمه لما تعرف اللي حصل، هما أصلا شاكين إني قت،لت جوزي انا واخواتي
سماح .. ميهمكيش ياختي انا هقف جنبك بس اوعي تضعفي وتحكيلهم حاجة من اللي شوفتيه يااصيلة
اصيلة .. رغم إني عمري ما شفت منك لحظة حلوة بس متقلقيش انا مشفتش حاجة بس تحكيلي على كل حاجة حصلت من الأول
سماح .. ربنا يخليكي ليا ياغالية طول عمرك احسن مني ياأصيلة
اصيلة .. قوليلي تعرفي اخوي من إيمتا ياسماح وإيه اللي وصلك ليه
سماح .. بداية معرفتي كانت قبل الصلح اللي تم مابين العيلتين بشهر ، في يوم جه عندنا عمي حامد وقال لابوي إن سمع إن الواد عامر إبن عوض بيتمحك في سماح وهي بتملى ميه من البحر وزي ما انتي عارفة إننا في الوقت ده محدش كان كل الناس بتملا المية من البحر قبل المية ما تدخل البيوت ، ابوي قام وقف واتعصب بس عمي حامد هداه وقاله
دي فرصة وجت لحد عندنا عشان بتار ولدنا اللي قتله عوض ابوه ، ابوي قاله كيف يعني ، رد عليه حامد وقاله هنخلي البت تستدرجه لحد ما نتملك منه ونخلص عليه
وبالفعل فضلت أسايس عامر لحد ما خلاص كنت هسلمه لأهلي عشان يقتلوه بس للأسف كنت وقعت في حبه وكل ليلة أطلع لأهلي بحجة شكل عشان الموضوع يطول لحد ما حسيت إن أهلي بدأو يشكوا فيا وممكن الموضوع يوصل لقتلي انا كمان ، فخدت القرار وقلت لعامر يجيني بالليل عند الطاحونة القديمة واتفقت مع أهلي إنه جاي ، بس عشان الأعمار بيد الله ربنا يسوق علينا شيخ البلد وكبار العائلات اللي جم لعمي حامد في نفس اللحظة اللي كان خارج يقتل فيها عامر اللي كان مستني عند الطاحونة ، يعني المشايخ لو أتأخروا دقيقة واحدة كان زمان عامر اخوكي في خبر كان
أصيلة .. طب والواد ياسماح ؟!
سماح .. بصراحة بعد ما صالح دخلك البيت وشفت إهتمامه بيكي عشان حملك النار قادت في جتتي وخناقتنا انا وهو كترت وكان كل شوية يعايرني بيكي ويقولي نفسي تكوني زي أصيلة سمعت منه كتير لحد ما طفح الكيل وقلة الإهتمام من الراجل يااصيلة ممكن تخلي الست تعمل أي ، وجودك في حياته خده مني لحد ماساب فراغ كبير والست بطبعها ضعيفة والشيطان سيطر عليا وخلاني ارجع أفكر في عامر اخوكي تاني خصوصا إني حبيته وجوازي من صالح زي ما انتي عارفة كان جواز تقليدي بأمر من عمي وأبوي
المهم إني رجعت فتحت موضوع عامر من جديد
بس للأسف مكنتش أعرف إنه أتغير عن زمان وبقا بيشرب وأخلاقه اتغيرت ، اتقابلنا أنا وهو كام مرة في الزريبة اللي كنتي بتنامي فيها لحد ما وقعنا في المحظور وحصل اللى حصل
أصيلة .. وايش عرفك إن الواد ابن عامر ماهو ممكن يكون ابن صالح
سماح .. لا ياأصيل ماهو في الفترة دي قعدنا انا وصالح بعاد عن بعض بتاع شهرين هما دول اللي حصل فيهم الحمل
أصيلة .. استغفر الله العظيم يارب دبرني يعني عشان أنقذك أنتي والخايب أتحطيت في مشكلة ما يعلم بيها الا ربنا
وشكله اللي جاي هيبقا سواد عالكل
سماح .. كفايا كمادات للواد عندي دوا سخونة هجيبهولك تديله منه
اصيلة .. ما انا كنت خارجة اجيبله الدوا وحصل اللي حصل
سماح .. اوعديني يااصيلة متجبيش سيرة لحد
اصيلة .. ابنك لما كان ابن جوزي كنت بخاف عليه قيراط
بس دلوقتي بقيت بخاف عليه 24 قيراط عشان دا طفل ملوش ذنب في اللي حصل وبعدين الموضوع ده لو اتعرف فيه كذا روح هتزهق وانا مش قد الد،م ياسماح
سماح .. كان ليه حق صالح يعايرني بيكي يااصيلة يعني عيشتي 11 سنة متجوزة على الورق بس وعايشة في الزريبة برة البيت وحافظتي على نفسك وانا اللي عايشة في البيت الكبير مقفول عليا كذا باب وبعت نفسي بالرخيص
ياريتني كنت قربت منك من زمان مكانش حصل اللي حصل
ــــــــــ
القاضي .. وبالنسبة لحماتك وحامد علاقتك بيهم كانت ازاي بعد الموضوع ده ؟
اصيلة .. تاني يوم حامد دخل عندي الاوضة وفي إيده سماح وقعدنا جنب وقالنا
( اسمعي منك ليه لو واحدة منكم جابت خبر للحاجة او أي مخلوق باللي حصل عشية بالليل هخلص عليها بيدي فاهمين ؟!)
ردينا بصوت واحدة ( فاهمين )
حامد .. بالنسبة لموضوع صالح ياأصيلة طبعا انتي عارفة اني دافعت عنك قدام الحاجة لما قالت انها شاكة إنك ليكي يد انتي واخواتك في قت،ل صالح وكانت عايزة تاخد الواد وتطردك لحد الحقيقة ما تظهر ، بس أقسملك برب العرش لو ثبت فعلا إنك ليكي يد في الموضوع لأدفن،ك صاحية اتفقنا ياأصيلة ؟!
أصيلة .. قلتهالك ياعم حامد قبل سابق انا كنت بعشق التراب اللي كان بيمشي عليه صالح ولو عرفت ان اخواتي ليهم يد في الموضوع انا اللي هق,تلهم بيدي
حامد .. وانتي ياسماح مستغربلك قوي ايه اللي حنن قلبك مرة واحدة على أصيلة دا انا عمري ما شفتك بالعالها كلمة !!
سماح .. ربك بيولف القلوب على بعضيها ياعمي وبعدين ما انت كمان كنت مبطيقش تشوفها وانت اللي استكترت عليها تعيش في وسطينا من الاول وعيشتها سنين تحت رجلين البهايم
ودلوقتي بقيت بتسأل فيها وفي ابنها اكتر من بنت اخوك!!
أسألك انا بقا انت ليه اتغيرت معاها كده !!
حامد ..كلامك حلو بس مش راكب في دماغي ياسماح عالعموم ربنا يصلح الحال ( وخرج )
سماح .. معلش يااصيلة ياختي كان لازم اعاتبه بإهتمامه بيكي اكتر مني عشان يحس إننا تمام اه بس القلوب مش صافية
اصيلة .. منك لله دا انتي يتخاف منك
ـــــ
ومرت السنتين في ود وهدوء وبحث من ليل نهار من حامد عن اللي قت،ل صالح
القاضي .. والسنة الأخيرة حصل فيها ايه قبل الواقعة ؟
اصيلة .. اتوفت أم صالح في أولها ومن بعد وفاة الست دي حسيت إن ربنا كان ساترها على كل اللي في البيت ده عشان طيبة قلب أم صالح ، البركة اتقطعت من كل حاجة وحتى حامد كان طفح بيه الكيل من كتر ما دور على اللي قت،ل ابنه ومش عارف يوصله
القاضي .. احكيلي بقا ياأصيلة عن الواقعة بدأت ازاي ؟
اصيلة .. الواقعة بدأت من يوم ما إبن سماح كان مع جدو حامد في الأرض اصله كان جده معوده ياخده معاه دايما
قبلها بليلة حامد نده عليا وانا قاعدة مع سماح في اوضتها
وخدني وخرجنا قعدنا قدام البيت وقعدتنا طولت بتاع ساعة تقريبا وبعد كده دخلت نمت والصبح اتفجعت بخبر مو،ت إبن سماح بسبب تعبان قرصه وهو مع جدو في الأرض
اليوم ده انا مش ناسية تفاصيله سماح اول ما سمعت الخبر انهارت وكانت بتخبط في كل حاجة وانا وحامد وابوها وإخواتها حتى ام حامد نفسها بنحاول نهديها
وفي لحظة كده سكتت شوية وبعد كده بصتلي وبصت لحامد وجدتها وقالت ..
سماح .. ايوة ايوة انا افتكرت انتي مطبخينها مع بعض من امبارح وجريت عليا مسكت في رقبتي كانت بتخنقني وتقولي قت،لتي ابني يابنت الكلب انا كنت عارفة إنك هتغدري بيا وتحكيلهم على حاجة انتي لازم تمو,تي زي ما موتي إبني !
كنت هموت في ايدها وهي بتخنقني ولحقوني على اخر نفس
وبعد كده بصت لحامد وقالتله قتلته ياحامد عشان مش من نسلك ! والله ما هرحمكم ولاقتلكم واحد واحد
في اللحظة دي يابيه البيت كله وقف مصدوم حتى جدتها ام حامد قامت وايدها بتترعش وبتبرقلها مفجوعة من الكلمة اللي سمعتها ومسكت سماح من شعرها وهي في ايد ابوها واخواتها قالتلها ..
ام حامد .. يعني ايه مش من نسلنا يابت ابني !!!
سماح .. على اساس انك مش عارفة ومش انتي اللي مدبرة لقت,له ولدي ياجدتي !! بس عالعموم معادش عندي حاجة اخسرها انا هقولهالك تاني ..
في اللحظة دي جريت عليها حطيت ايدي على بقها وقلتلها بلاش ياسماح وياجماعة سماح بتقول كده من قهرتها على ابنها محدش يلومها ..
راحت ام حامد ضرباني بالقلم وزعقت فيا وقالتلي سيبيها تحكي !!
وحامد شدني من دراعي وقعني عالأرض وقال لسماح احكي يافاجرة الواد ابن مين ، خنتي ابني مع مين وضربها قلم وشها نز,ف د,م !!
سماح بعصبية وبإستفزاز لحامد قالتله .. ولدي يبقا حفيد عدوك
حامد .. ابن عامر ولد عوض !!!!!!!!؟
ابوسماح .. ابن عامر !!!!!!! طب كيف !!!! انطقي يابت قولي إن ولدك مش ابن عامر !!
سماح .. لا ابن عامر ولد عوض عبدالله اللي قتل ولدك الكبير وحسرك عليه ياحامد ، يلا موتوني مستنيين ايه ؟!!
أصيلة لطمت على وشي وقلتلها .. ليه ياسماح إكده ليه !؟
سماح .. عشان ترتاحي ياأصيلة ويخلالك الجو انتي وولدك
مش هو ده اللي انتي عايزاه وبتتمنيه يااصيلة عالله تكوني ارتحتي ، ها يابوي انت وعمي حامد مستنيين ايه كلها عيارين وتريحوني وترتاحوا
ابوسماح .. طلبتيها وهتنوليها ياسماح ( ومسك البند،قية من يد ولده وشد الأجزاء ولسه هيقت،لها راح حامد مسك منه البندقية وقاله لا ياخوي اللي زي دي خسارة تروح فيها اللومان ( يقصد الس،جن ) اللي زي سماح بتك ياخوي لو مو،تها تبقا ريحتها من اللي هيحصل فيها وكده كده محدش غريب في وسطينا يعني محدش هيعرف بالموضوع ( وبص ليا وهو بيحط ايده على السلا,ح وقالي) مش كده برضو يااصيلة .
( يقصد يهددني لو جبت سيرة لحد هيبقا فيها رقبتي )
ابوسماح .. خلينا نموتوها ونموت الواد ابن المحروق ونغسل عارنا ياحامد هنرفع راسنا كيف قدام الخلق لو حد عرف ؟!!!
حامد .. انا هنا الكبير ولما اقولك محدش هيعرف يبقى محدش هيعرف ولو على الواد اللي اسمه عامر متقلقش انا عارف هعمل معاه ايه ، اما دلوقتي ياست سماح فاكرة المكان اللي كانت بتنام فيه اصيلة ، فاكرة الزريبة ياسماح ؟!
اهو انتي بقا مش هتنامي هناك بس لا دا انتي هتتربطي معاهم زيك زي البهيمة بالظبط ولو ان البهيمة عمرها ما بتعض الايد اللي اتمدتلها
سماح .. لا الزريبة لا انا قلتلكم موتو،ني لو عندكم نخوة وكرامة انا خنت ولدك مع ابن عوض اللي قهرك ياحامد وحرق قلبك ياجدتي ولو عندكم ذرة نخوة وكرامة اقتلوو.ووني
ام حامد .. لو بكيفي كنت انسرك نساير نساير ياخاين،ة ياوس..خة والحمدلله ابن الحر،،ام راح حر،،ام
حامد .. متخليهاش تستفزك ياامي انا فاهمها كويس بس برضو مش هناولها اللي في بالها ودوها على الزريبة وكل يوم ياأصيلة وظيفتك توديلها الأكل اللي هو هيبقا بواقي عيش حاف من اللي بنرميها للكلاب وميه من أي خرارة
ـــــــــــ #كشف_حقائق_وأسرار_بقلم_احمد_حسن
في مثل بيقولك ( ميردش الشجرة غير فرع منها )
المثل ده بيطبق على حامد وسماح بنت اخوه
فاهمين بعض اوي وفعلا اللي عمله حامد اصعب على سماح كتير قوي من مو،تها ، بس اللي زعلت منه إن سماح كانت بتضغط على حامد عشان يقت،لها بأصعب كارت وهو المعايرة بعوض ابويا الله يرحمه ، عشان كده برضو حامد حرق دمها بنفس الفكرة لما قرر يعيشها في اسوء مكان انا عيشت فيه
في الزريبة ويخليني اشوفها وهي مربوطة في الزريبة اجباري كل يوم وانا بجيبلها الأكل والهدف من فكرة حامد هي ضربها في حتت الغيرة بكسر نفسها قدامي
القاضي .. يااااه ياأصيلة سبحان الله كما تدين تدان بالأمس كنتي في المكان السيئ ده وهي كانت بتذلك
يقوم يلف الزمن وتبقي انتي مكانها وهي مكانك في الزريبة
سبحان الله الحكم العدل ، كملي ياصيلة
اصيلة .. فضلت سماح على هذا الحال بتاع شهر ونص لحد ما في يوم لقيت حامد بيخبط عليا فتحتله الباب لقيت وشه مقلوب وقالي سيبي ابنك هنا والبسي لبس خروج وتعالي ورايا عالزريبة
في اللحظة دي قلبي اتقبض وخصوصا لما رحتلهم لقيت ابو سماح واخواتها وحامد وامه كلهم متجمعين!!
لا وكمان سماح مش مربوط وبتبصلي بضحكة صفرة كده مش فهماها وبعد مانشف ريقي حامد قال ..
حامد .. اسمعي يااصيلة انا كان قدامي حلين ملهمش تالت الحل الاول هو اني اخلص من سماح وعامر اخوكي والموضوع ينتهي
والحل التاني هو اني اجوزهم فترة قصيرة قدام الناس وبكده ابقا خلصت من موضوع العار والفضيحة انتي ايه رأيك ؟
اصيلة .. اي حل غير الد،م هيبقا صح ياعم حامد
حامد .. طيب دلوقتي انا كنت هخ،طف عامر واجيبه اخليه يكتب عليها غصب عنه ،بس لما فكرت شوية قلت اجيبها ودي الأول وابعتك انتي ليهم اقعدي معاهم وعقليهم وخدي منهم قرار وبكده ابقا ابقا مشيت بالأصول معاكي ومع اخواتك ولا ايه يااصيلة ؟!
اصيلة .. عداك العيب ياعم حامد بس استئذنك اروح بإبني انا مش هتنقل خطوة من غيره انت عارفني متعلقة بيه قد ايه وخليك واثق في كلامي ياعم حامد انا رايحة وراجعة بيه
حامد .. انتي اتخبلتي ولا ايه ابنك مش هيتحرك من اهنه مش عشان مش واثق فيكي لا خالص بس انا خايف على الواد اكتر منك وعارف الصالح فين وبعملوا
اصيلة .. اسمعني ياعم حامد انا مش هسيب ابني نهائي ومش هتخاف على ابني اكتر مني اتطمن حفيدك بأمان طول ماهو مع امه
ام حامد .. خلاص خليها تغور بيه ياحامد خلينا نخلص بس عارفة يااصيلة الواد لو حصل ليه حاجة هعمل فيكي ايه ؟!
اصيلة .. متقلقيش دا ولدي وانا عارفة انا بعمل ايه
ـــــــــــــ #كشف_حقائق_وأسرار_بقلم_احمد_حسن
بالفعل بعد غياب طال 17 سنة دخلت بيتنا من جديد
أمي واخواتي الاربعة سليم وعبدالله وحجازي وعامر اوس البلاوي وحريمهم بعيالهم محدش سلم عليا وانا داخلة في وسطهم من كتر ماهما مش مستوعبين اني رجعت تاني , تقريبا هما كانوا فعلا اعتبروني مت
رغم اني من بعد ماعرفت اني رايحة بيت ابويا وكنت بعد بالثانية لحد ما ادخل البيت الا إني مكنتش حاسة إن ده بيتنا! وروايح بيتنا اللي كنت عارفاها مبقتش موجودة وحسيت إني جيت عند ناس أغراب مش هو ده بيتنا ولا دول اخواتي ولا دي أمي اللي رغم قلة سؤالها عني بس كنت متوقعة تاخدني في حضنها وتبكي من شوقها عليا
كل حاجة اتغيرت حتى صورة جدي مع ابويا اللي كانت متعلقة على الحيطة إتشالت ..واحدة من حريم إخواتي متعرفنيش ومشافتنيش قبل كده سألت حسين اخويا الكبير مين دي ياحسين ؟
رديت قلتله .. قولها مين ياحسين ولا مكسوف تقول
حسين .. ازاي ياأصيلة عيب متقوليش كده وبص للحريم وقالهم دي أصيلة أختنا وسع ياد انت وهو تعالي ياختي اقعدي
اصيلة .. مالك ياامي باينك مش مبسوطة بشوفتي
الأم .. لا ليه ياأصيلة قوليلي الولد ده يبقا ابنك مش كده برضو
اصيلة .. ايوة ياامي قوم ياوهدان سلم على جدتك
عبدالله .. ملقتيش غير الاسم ده وتسميهوله
اصيلة .. ابوه صالح الله يرحمه هو اللي سماه
عامر .. هاتي من الأخر ياأصيلة وقولي سبب مجيتك دي ايه
حجازي .. مالك ياواد الشرب لحس نفوخك ولا ايه ..
اصيلة .. سيبه ياحجازي هو أكتر واحد فاهم كل حاجة وانا بحب اللي بيقصر ويجيب من الاخر وعالعموم شكك طلع في محله ياعامر انا جاية فعلا بخصوص اللي في بالك بس بكلام جديد يااخوي
حسين .. مالكم بتتكلموا بالألغاز ليه حد يفهمنا في ايه !!
أصيلة .. طب هو هينفع كده نتكلم قدام الكل ؟! الكلام اللي هقوله معايزاش حد غيرنا يسمعه
مرات حسين .. إحنا مش بنخبي حاجة على بعض ياأصيلة هتتكلمي أتكلمي قدام الكل
أصيلة .. وأنتي بقا مرات مين فيهم
حسين .. دي مرتي ياأصيلة ، معلش عشان خاطري قومي خدي الحريم والعيال وادخلي جوة
مرات عامر .. الكلام يخص جوزي وانا مش منقولة غير لما اعرف في ايه !
أصيلة .. هو في ايه !! مالكم يااولاد عوض الستات هنا هي اللي بتحكم ولا ايه ؟! ماتخشي جوة ياست انتي وهي عايزة اخواتي في موضوع !! الله يرحمك ياابوي كانت تتهزله شناب لو عاش لدوقيت وشاف اللي انا شايفاه كان دفن،كم صاحيين
حجازي .. خلاص ياأصيلة أدينا بقينا لوحدنا احكي في إيه ؟
حكيت لإخواتي وامي على كل حاجة وعلى العرض اللي بيقدمه حامد بجواز عامر من سماح والموضوع يتقفل
لقيت الكل هاج عليا وصوتهم علي عليا وأمي كانت بتطردني
وعامر اللي كان هيموت على سماح بقا بيقول انا عمري ما اتجوز واحدة غلطت معايا بكرة وبعده تغلط مع غيري
الوحيد اللي يعني اقتنع عبدالله وقدرنا انا وهو بطلوع الروح نقنع عامر بجوازه من سماح بإتفاق ما بينا وهو إنه يطلقها بعد ما يتجوزها بشهر واتحدد ميعاد الفرح بعد اسبوع
ده طبعا خلاف المشكلة اللي حصلت ما بيني وبين الحريم اللي ودانهم مكانتش مفارقة الباب وكل شوية يدخلوا
وبعد ما كنت متفقة مع حامد إني هقعد اسبوع عند اهلي بصراحة حسيت إني مخنوقة من البيت ومن اخواتي وحسيت إن بيتي ومكاني هو وسط عيلة وهدان
وروحت في نفس اليوم بس وانا في وسط الطريق اتضرب طلقتين عليا انا وابني وربنا ستر مجتش في حد فينا
روحت البيت وانا مرعوبة وواخدة ابني في حضني واعيط
وحامد كان عمال يلوم فيا عشان خايف عالواد
الليلة دي منمتش وموضوع ضرب النار كان بداية الشرارة
جوايا لما حسيت إن إبني محطوط عليه النص بس من مين مش عارفة فقدت الثقة في كل الناس ومش عارفة ابني مقصود من أهلي ونظراتهم للواد وهو معايا مكانتش مطمناني وفي نفس الوقت كنت بقول ماهي ممكن تكون سماح او أهلها هما اللي ورا الموضوع وجايز تكون الولية العقربة اللي اسمها أم حامد رغم إنه حفيدها الوحيد بس عمرها ما كانت بتطيقه وهي وافقت بسهولة ان الواد يروح معايا عند اهلي وممكن يكون حد تاني بعيد عن العيلتين يكون ليه عداوة قديمة مع بيت وهدان
حاجات كتير كانت بتدور في دماغي وبالنسبالي كل الناس أعدائي أنا وإبني لدرجة إن كنت بنام واقوم مفزوعة على ابني ومش عارفة ليه كنت خايفة على ابني وقلبي مقبوض من الفرح بتاع عامر سماح حساه مش هيعدي عادي
عدى الاسبوع وجه يوم الفرح الصبح وكان لازم اكون في أهلي عشان كان شوية رسايل من حامد لإخواتي بخصوص الفرح وتأمينه وإن العريس لازم يدعي المشايخ وكبار العائلات اللي حضرت الصلح بتاع العيلتين زمان عشان يضمن إن مفيش حاجة تحصل
بالفعل وافقت وقعدت اروح بإبني حامد قالي انتي متعلمتيش من المرة اللي فاتت؟!! ابنك هتسيبيه معايا لحد ما ترجعي ولما نيجي نتحرك من هنا هيبقا في وسطينا والرجالة هتحميه
في اللحظة دي دخل ظابط من برة المحكمة وعطى ورقة للقاضي اللي بمجرد ما شافها قام وقف وبعد كده قعد في مكانه وقال لأصيلة كملي ياأصيلة
أصيلة .. رحت عند أهلي ظبطت كل حاجة ورجعت على البيت وأول ما رجعت لقيت حامد قاعد في الصالة ومعاه ضيوف دخلت على أوضتي لقيت إبني في السرير بكلمه وانا داخلة مش بيرد عليا جيت جنبه بصحيه واكلمه لقيته مش بيرد عليا بصيت على رقبته إكمنه كان ابيضاني شوية لقيت صوابع معلمة على رقبته مخنوق ومقتو،ل يابيه ... يتبع
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق