سكريبت ثانوى عام كامله بقلم حور حمدان
سكريبت ثانوى عام كامله بقلم حور حمدان
ليه سواق يعمل كده؟
ويعمل كده في طفل قدّ دور عياله ليه؟
بجد معنديش غير تفسير واحد: أغلب السواقين بقوا كده أصلًا،
مش كلهم طبعًا، إلا من رحم ربي.
كنت تحت شات صاحبتي، لقيتها باعتالي صورة كرسي في عربية ميكروباص،
مكتوب عليه: ادعولي بالنجاح واسم الشخص.
هو فعل غلط؟ أيوة.
بس مش لدرجة الضرب يعني!
نزلت بعيني على الرسايل اللي بعد الصورة،
كانت باعتالي وبتقولي:
تتخيلي السواق ضرب الشاب ده عشان كتب مجرد جملة زي دي؟
وبعدها مسدچ تانية:
حقيقي الواحد مش مستوعب ليه مبقاش حد يحب الخير للتاني؟
ليه بجد الناس بقت وحشة أوي كده؟
بقينا في زمن الكلمة الحلوة فيه بقت مستفزة،
والدعوة الصادقة بقت جريمة.
بدل ما نقول ربنا يفرّحك، بنمد إيدينا نوجّع.
مش كل حاجة تتاخد بعنف،
ومش كل غلط يتحل بالضرب.
الإنسان بقى ناقم على أي حد عنده أمل،
كأن الوجع بقى مُعدي،
والقساوة أسهل من الرحمة.
ربنا ينجّي ولادنا من القلوب القاسية،
ويزرع فيهم حب الخير،
عشان ما يكبروش وهم فاكرين إن العنف هو الحل الوحيد.
قفلت شات ملك من غير ما أرد.
قلبي كان تقيل، ومش قادرة أعدّي اللي سمعته كده عادي.
فتحت فيسبوك، وإيديا بتترعش، وكتبت بوست من اللي بيطلعوا من الوجع مش من الدماغ.
حكيت فيه عن الولد اللي كتب على كرسي الميكروباص
ادعولي بالنجاح
ولا سبّ، ولا أذى، ولا قلة أدب.
دعوة بس… حلم صغير.
وإزاي السواق بدل ما يعدّي الموضوع
مد إيده وضرب.
ضرب طفل قد عيالُه،
عشان كلمة حلوة.
البوست انتشر.
والكومنتات بدأت تنزل زي المطر،
بس مش كلها شبه بعض.
فيه ناس كتبت:
هو غلطان، ما يكتبش على العربية
يتربّى الأول وبعدين يحلم
ده يستاهل عشان يتعلم الأدب
قريت الكومنتات دي وقلبي وجعني أكتر،
إمتى بقى الغلط مبرر للضرب؟
وإمتى بقينا قضاة بإيدينا؟
وفيه كومنتات تانية
شدّت ضهري وخلّتني أحس إن لسه في خير:
حسبنا الله ونعم الوكيل
ده طفل مش مجرم
ربنا يعوّضه خير ويكتبله النجاح
الرحمة بقت عملة نادرة
واحدة أم كتبت:
لو ده ابني، كنت عملت أكتر من بوست
وواحد تاني قال:
إحنا بقينا نخوّف ولادنا من الحلم
قفلت الفيس بعدها،
بس الدعاء فضل مفتوح في قلبي.
اللهم انصر كل مظلوم حتى لو كان حلمه صغير
اللهم قوّي قلوب ولاد الثانوية
واكتب لهم فرحة تداوي خوفهم
اللهم اشفِ كل مريض
واحنن القلوب على بعضها
وما تجعلش العنف هو اللغة السهلة بينا.
#تمت
#ثانوي_عام
#حكاوي_كاتبة
#حور_حمدان
تعليقات
إرسال تعليق