اعقلى يابنت الناس كامله
اعقلى يابنت الناس كامله
حكايه ايه انا اسمي ايه متجوزه وعندي ولد وبنت انا و عمر جوزي عيشنا قصه حب طويله قبل منتجوز وواجهنا مشاكل كتير قبل منعرف نتجوز ويجمعنا بيت واحد واخيرا اتجوزنا وبعد سنه ربنا رزقنا بولد وبعد سنه تانيه ربنا رزقنا ببنوته.. كنا عايشين متفاهمين ومفيش بينا اي مشاكل زي الي بتحصل في اي بيت .. ويوم عن يوم الحب الي بيني وبين عمر بيكبر ويزيد عدت السنين وولادي كبرو دخلو الاعدادي وانا بقيت حاسه بفراغ وفي نفس الوقت مصاريفنا زادت فقررت بيني وبين نفسي اني اشتغل علشان اشغل وقتي وكمان ازود دخلنا واساعد جوزي في مصاريف البيت وفعلا قعدت مع جوزي وقولت له اني عايزه اشتغل بس هو رفض وقال لي انا من بوم معرفتك واتجوزتك وانتي عارفه اني رافض مراتي تشتغل انتي عارفه شخصيتي وعارفه رايي علشان كده انسي الموضوع ده ومتفكريش فيه تاني طبعا انا معجبنيش كلامه وقولت لازم اضغط عليه علشان يوافق اني اشتغل وعملت نفسي مقموصه واخدت ولادي وروحت عند اهلي قولت انه مش هيحمل زعلي. وهيجي يصالحني ويوافق وخلاص مكونتش عامله حساب كل الي حصل من وقت ما روحت عند اهلي والمشكله كبرت والعيلتين اتدخلو من الموضوع وكل طرف غلط في الطرف التاني والموضوع وصل للطلاق..مكونتش متخيله انه ممكن يفكر يطلقني .. يطلقني ازاي وهو حب عمري ويطلقني ليه علشان مشكله هايفه زي دي .. فضلت مصره علي رايي ومتمسكه بيه علشان اخليه يندم بس واضح انه مندمش.. وصلنا للطلاق وطلقني بمنتهي السهوله فضلت عايشه في بيت اهلي انا وولادي فتره بس اهلي ناس علي اد حالهم مش حمل مصاريفي انا وولادي وقتها قررت اني ااجر شقه اقعد فيها انا وولادي وانزل اشتغل.. وفعلا اشتغلت ومرتبي مع النفقه الي عمر كان بيدفعها ليا وللولاد كنا عايشين كويس بس ع الاد وفضلت عايشه مع ولادي بسطول الوقت مستنيه جوزي يرجع لي.. كنت شايفه ان مفيش حاجه حصلت لكل ده وانه بعد فتره لما يهدي اكيد هيراجع نفسه ويرجع لي. انا وولاده.. كنت بستنا رجوعه علي احر من الجمر بس كرامتي منعتني اني اكلمه او احاول ارجعه ليا.. فات علي طلاقنا تلات سنين وانا لسه مستنيه لحد ما في يوم حصل الي مكونتش اتوقعه ولا عمري تخيلت انه يحصل .. عمر اتجوز.. وجاب واحده غيري تشاركه حياته معقول انا كنت عايشه في وهم كنت عايشه بتخيل انه هيرجع لي بس خلاص اهو اتجوز وعايش حياته… في اللحظه دي قررت انا كمان اني اتجوز واعيش حياتي علشان انتقم منه وارد له الضربه واثبت له ان انا مرغوبه وفي ناس تتمتي تتجوزني واني نسيته خلاص وفعلا كان في واحد زميلي في الشغل معجب بيا من فتره بس انا مكونتش مدياله وش علي امل اني ارجع لجوزي بدات اتجاوب مع الشخص ده وفعلا طلب يتجوزني قولت له اديني فرصه اقول لولادي الاول.. وفعلا قعدت مع ولادي وقولت لهم اني هتجوز .. ولادي رفضو وقالو لي مستحيل تجيبي لنا راجل غريب يعيش معانا قولت لهم ده مش غريب ده هيبقي في مقام ابوكم .. قالو لي لا مستحيل .. قولت لهم ايش معني ابوكم اتجوز قالو لي علشان هو اتجوز احنا عايشين معاكي انتي بسلو اتجوزتي انتي كمان هنروح لمين.. فضلت اتكلم معاهم واقنعهم ايام كتيره وفي الاخر وافقو بس كانو زعلانين .. قولت لنفسي بكره يتعودو
وفعلا اتجوزت وجوزي طلع راجل طيب وكان بيعامل ولادي كويس جدا بس هم كانو مش متقبلين وجوده وكانو دايما شايفينه جوز الام الۏحش الي اخد مكان ابوهم واخد امهم منهم وبعد فتره ولادي قررو يسيبوني ويروحو يعيشو مع ابوهم في البدايه انا
مرفضتش وقولت خليهم يروحو يعيشو مع مرات ابوهم علشان يعرفو قيمتي وفعلا اول مراحو عند ابوهم مراته عاملتهم وحش وبقت طول الوقت تقول لهم كلام جارح .. المهم قعدو فتره هناك وبعدين متحملوش ولا مرات ابوهم اتحملتهم .. رجعو يعيشو معايا تاني وفضلو فتره طويله علي الحال ده شويه عندي وشويه عند ابوهم وانا لما بيروحو لابوهم بكون مطمنه عليهم بعد فتره بدات الاحظان ولادي اتغيرو بعد مكانو متفوقين وبيطلعو من الاوائل درجاتهم بقت ضعيفه جدا ومش مهتمين بالدراسه. ومهما اتكلمت معاهم ونصحتهم مفيش نتيجه وفي يوم اكتشفت ان ابني بيشرب سجاير ومصاحب شلة ولاد صايعين قعدت معاه ونصحته وقال لي مش هعمل كده تاني انا وابوهم مكانش بينا اتصال كل شويه الولاد رايحين عند ابوهم راجعين من عند ابوهم و خلاص لحد ما في يوم ابوهم اتصل عليا وقال لي الحقي ابنك اتمسك هو وصحابه قولت له ازاي هو مش معاك.. قال لي لا انا بقي لي اسبوع مشفتوش من وقت ما مشي من عندي وجالك .. قولت له والبنت فين قال لي البنت عندك.. قولت له عندي ازاي.. دي اخدت هدومها وراحت لك من اسبوع هي كمان المهم اتصلت بيها وسالتها انتي فين قالت لي انا عند بابا.. وقتها عرفت ان البنت مخبيه حاجه عليا… قولت لها طيب هاتي هدومك وتعالي علشان عيزاكي وفعلا جابت هدومها وجت .. دخلت معاها الاوضه وقفلت الباب وسالتها كنتي فين قالت عند بابا .. قولت لها ابوكي لسه مكلمني وقال انه مشافكيش من اسبوع كنتي فين .. وقتها اعترفت لي ابني اتحكم عليه بالسجن ودراسته ضاعت ومستقبله ضاع بقي صاحب سوابق وبنتي كمان بطلت تروح المدرسه وقعدت في البيت.. في الوقت الي انا كنت عايشه حياتي مع جوزي وعمر عايش حياته مع مراته .. ولادنا ضاعو .. كل واحد فيهم الشيطان لقي فرصه انه يغويه واحنا غفلانين عنهم انا وابوهم باقي حكايه ايه انا خسړت ولادي وحبيب عمري واستقراري علشان سبب هايف ومشكله تافهه.. بس كل واحد فينا اتمسك برايه ومفكرش في الاسره الي بتتهد والعيال الي بيضيعو ولادنا الي تعبنا وشقينا علشان نكبرهم ونربيهم وفي الاخر ضاعو. من ايدينا في غمضه عين بسبب انانيتنا وحتي لما اتطلقنا كل واحد فينا فكر في نفسه عمر راح اتجوز وعاش حياته وانا علشان ارد له الضريه اتجوزت اول واحد لقيته قدامي ومحدش فينا فكر في الولاد ومصلحتهم كان ممكن تحصل بينا مشاكل اكبر من كده بس نتحمل ونيجي علي نفسنا علشان خاطر ولادنا لحد منوصلهم لبر الامان انا حكيت لكم حكايتي علشان اقول لكل ام وكل اب لو عندك بنات تعالي علي نفسك وفكر فيهم وعيش علشانهم لغايه متجوزهم وتكمل تعليمهم .. ولو عندك ولاد ركز معاهم لغايه ميخلصو دراستهم ويشنغلو ويشقو طريقهم في الحياه احنا مش بنخلف العيال علشان نرميهم في الشارع .. واجب علينا زي مخلفناهم وجبناهم في الحياه اننا نراعيهم لحد منوصلهم لبر الامان متغلطوش غلطتي واصبرو وخلو العش ملموم وضحو علشان ولادكم وقبل متفكرو في الطلاق وهدم البيت فكرو في ولادكم وحياتهم ومصلحتهم تمت
تعليقات
إرسال تعليق