رواية صك الغفران الفصل الثالث عشر والرابع عشر بقلم الكاتبه فريده الحلواني حصريه
رواية صك الغفران الفصل الثالث عشر والرابع عشر بقلم الكاتبه فريده الحلواني حصريه
صباحك بيضحك يا قلب فريده
يا مرحبًا بتلك اللحظات التي ننهار فيها حتى نصير فراغًا…
لا نبكي لا نصرُخ... فقط نسقُط من الداخل قبل أن تسقُط أجسادنا
تخذلنا أقدامنا فتسندنا الأرض.
ونسند أرواحنا على ما تبقى من كبريائنا لا على كتف أحد.
هٌنا فقط....حين لا يبقى فينا شيء نخسره نكتشف أننا كنّا وحدنا منذ البداية وأنَّ الوحدة ليست عقابًا بل الحقيقة الوحيدة التي تأخرت أعيننا عن رؤيتها
داخل آسيا كانت النار تأكل كل شيء...لا تترك سوى رمادٍ أسود لكن حتى الرماد كان يؤلمها لأنه بقايا قلبٍ احترق بإسم الحب
انهارت وهي تستدعي تلك الذكرى الملعونة...سبب انفصالها عن الحبيب الذي لم يعرف يومًا معنى الرحمة
الذي كسرها… ثم مضى كأن شيئًا لم يكن
في الماضي كانت تخدع نفسها
تلتقط من الذاكرة لحظات ضحكٍ كاذب...تٌزيّن بها قُبح الحقيقة أمّا تلك الليلة…فكانت تدفنها حيّة داخل صدرها
تمنع نفسها من مجرد الاقتراب منها لأنها تعلم…لو فتحت ذلك الباب مرّة أخرى فلن تخرج منه كما دخلت.
لم تكن تخاف الذكرى…بل تخاف نفسها ...ذلك القلب الغبي الذي قد يغفر وقد يحن وقد يركع مجددًا أمام من ذبحه. ..لكنها الآن أُجْبرت على المواجهة
ستراه كل يوم وكل يوم ستضطر أن تقتل فيه بقاياها القديمة بيدها
لذا ...وجب عليها أن تعيش نفس الوجع مرّه اخرى حتي لا تضعف امامه حينما تراه
رنّ الهاتف…مرّة… ومرّات…
واسم هاجر يُضيء الشاشة
لكنها لم تعد تملك طاقة للرد حتي أصابعها خانتها
قررت أن تذهب لها بعد ان شعرت بالقلق علي اختها الصغيرة
وحين جاءت هاجر وجدتها جالسة كجثةٍ تتنفس....عينان جامدتان...وجه بلا دموع
لأن الدموع انتهت قبل أن تبدأ
قالت بصوت مرتجف
مالك يا قلب أختك… إنتِ معيطه؟
لكن السؤال جاء متأخرًا فالانهيار لم يبدأ الآن بل كان يتآكلها بصمتٍ منذ سنين
مفيش…
ردّت بصوتٍ مبحوح كأن الحروف تُنتزع من حنجرتها
نظرت إليها هاجر بعدم تصديق
مفيش!... وإنتِي قاعده بالشكل ده!... عينك تايهة كأن روحك مش هنا هو أنا مش عارفاكي يا آسيا؟
دمعت عيناها، وقالت بصوتٍ ميّت
روحي فعلًا مش هنا سبتها هناك يوم ما انكسرت ومحدّش سمع صوتها
شعرت هاجر أن الجرح القديم عاد ينزف من جديد
سألتها بحذر
إنتِي زعلانة عشان آدم معاكي في نفس الشركة... مش قادرة تشوفيه صح؟
أنا من رأيي تشوفي شغل تاني وتبعدي عن وشه.
كأن الكلمات لم تصل لها قالت بنبرة خاوية من الحياة
الشخص الوحيد اللي سلمته قلبي فَداس عليه برجله ومشي
الإنسان الوحيد اللي أمنتّه على روحي
مكُنتش عايزة أفتكر يا هاجر…اليوم ده بالذات كنت بدفنه جوايا
مكُنتش عايزة أعيش الوجع والدّبح مرّة تانيه
نظرت لها هاجر بشفقة ثم قالت:
لسه بتتوجّعي يا قلب أختك… كفاية وجع… ارحمي نفسك.
ابتسمت آسيا ببهوتٍ ثم قالت بقهر:
الوجع مش منُه الوجع مني أنا ...إني حبيته لحد ما نسيت أحب نفسي"
لما دبحني مهمنيش وجعي…
كنت خايفة على وجعه هوَ ... ولما كنت بتصل بيه مش عشان أحلف إني مخنتهوش
لأ…كنت حاسة إنه محتاجني و وحشته بس مش قادر يقول.
وفجأة…انهارت....صرخت كأنها تلد وجعها من جديد
أنا مخُنتهوش يا هاجر والله ما خونته.
أخونه إزاي وأنا مكنتش بشوف غيره مكنتش بنزل من البيت غير بعلمه
ولو مرضاش… مكنتش بنزل.
أمك كانت بتتخانق معايا قد إيه بسببه كانت بتقولي طول ما إنتِي في بيت أبوكي… ملوش حكم عليكي.
التقطت نفسها بصعوبة ثم أكملت:
دانا مكُنتش بتنفّس من غيره لو قالي ارمي نفسك في البحر…كنت هرمي نفسي من غير ما أفكر.
اتحملت ظروفه و مَهمنيش كلام أي حد.
اتقدملي الأغنى منه… والأحسن منه .....مشوفتش غيره.
أنا بعت الدنيا واشتريته يا هاجر.
بس هو…رماني حتى استخسر يبيعني
رماني في أقرب صندوق زبالة
انهارت هاجر في البكاء لكنها لم تقاطعها…فبعض الوجع لا يُشفى إلا إذا خرج كاملًا
رفعت آسيا رأسها و دموعها لا تتوقف
مَهَنش عليه يسمعني كنت عايزة بس يسمع وبعدها يسيبني ..كنت هقول خلاص… براحته لكن يعيّشني بذنب خيانة معملتهاش ده قتلني وأنا عايشة.
تنفّست بصعوبة ثم همست بصوت مكسور:
وأنا عرفت الحقيقة كلها لكن بعد إيه....بعد ما روحي كانت ماتت
نظرت لها بقهر وأكملت
وهو عمل إيه....راح اتجوز أكتر واحدة بكرهها في حياتي
عاش حياته يا هاجر بعد ما دمرني و خلاني عايشه ميته
أنا حياتي وقفت عند بنت بتعشق واحد ومش قادرة تتنفس من غيره
مسحت دموعها بعنف ثم اكملت بجنون
بقيت عايشة حياتين…حياة قدام الناس بمثل فيها إني قدرت أكمل من غيره و اتجوزت واحد زباله بس اضطريت اكمّل معاه عشان خاطر ولادي.
وحياة تانية جوايا…عايشه فيها مع كل ذكرى عشتها معاه.
كأني مش قادرة أكون غير البنت اللي هو عملها بإيده
حتى تعاملي مع الناس كان على أساس اللي علّمهولي…أو طلبه مني
ضحكت ضحكة مكسورة مليئة بالقهر والوجع ثم اكملت
بعد ما سابني…لما كان واحد يقولي بحبك كنت بتخنق
بحس إني بخونه بقول جوايا:
إيه القرف ده ...إزاي يقولي كلمة زي دي الكلمة دي ملكه هو مش من حق حد غيره يقولها
صرخت بكل ما تبقى فيها:
وبعد كل ده…جاي يقولي هنتقم منك عشان قلبه اللي مقدرش ينساني....يلعن ميتينك يا جاحد.
سكتت أخيرًا…كأن الصوت خرج ومعه آخر ذرة حياة
قالت هاجر بصوت مُرتعش
قومي…اقفي علي رجلك و انسيه…كفاية كده يا حبيبتي ميستاهلش دمعة منك
نظرت لها آسيا بذهولٍ موجع:
أنساه......ده أنا يومي كله بحاول إني مفتكرهوش!
بس إنتِي قوية…
لا…..أنا اتعلمت أبان قوية...
القوة الحقيقية إني منهرتش قدامه…لكن الحقيقة:
أنا انهرت بعد كل السنين دي…
بعد كل العذاب اللي عيشته في بُعده.
أنا عشت أتمنى عمري يطول…
عشان أقابله وأقوله الحقيقة بس للأسف لسه شايفني خاينة
سألتها هاجر بغضب مكبوت
وبعد كل ده…لسه قلبك بيدُقله
ابتسمت آسيا بمرارةٍ ثم قالت:
القلوب مش بتبطل تدق…بس بتتعلم تدق وهي موجوعة…مدبوحه…عشان تحس إنها عايشة...
سألتها بحزن
طب هتعملي إيه دلوقتي؟
في لحظة…..تبدل كل شيء
صوتٍ ثابت…عينٍ جافة…ملامح باردة كالموت.
هعيش بس مش عشان أفرح ولا عشان أحب ولا حتى أتمناه
هعيش عشان أثبت لنفسي
إني مَمُتش يوم ما هو سابني
اقتربت كأنها تُقسم ثم اكملت:
النار اللي حَرقتني بسببه…
هاخد من رمادها دافع يقويني
رمادي اللي كتمت بيه دمي…هو نفسه اللي هيتحرق هو بيه.
ثم أنهت بصوت منخفض… قاطع… مظلم
– أنا قررت أنساه يا هاجر مهما أتعب…
عمر تعب النسيان ما هيكون
قد وجع غدره.
هو يستاهل يتنسي.....ده اكبر عقاب ليه أنه يفضل مُتخيل اني لسه بتمناه و مستنيه منه كلمه و انا عايشه حياتي من غير ما افكر ابص في وشه او حتي افتكر ملامحه.
رفعت عينيها أخيرًا و كأنها تُعلن عن عوده شموخها و كبرياءها الذي دفنته بسبب شخص
لا يستحق اي شيء ثم قالت بقوه و عزم:
اليوم اللي تشوفيني فيه بضحك بصدق…
اعرفي إن دي آسيا الجديدة وإن القديمة…ماتت خلاص
ساد الصمت.....صمتٌ كثيف…
كأنه غطاء أسود أُسْدِل فوق الغُرفة فحجب الهواء وخنق الأنفاس.
لم تعد هناك دموع فقد جفّت منابعها.
آسيا تجلس بثباتٍ غريب كأنها أفرغت روحها لتوّها.
وبقي جسدٌ يؤدي واجبه في البقاء فقط.
هاجر أمامها....تَضُم كفيها إلى صدرها تقاوم انهيارًا آخر…
ليس انهيار آسيا…بل انهيارها هي وهي ترى أختها تُذبح أمام عينيها ولا تملك إنقاذها
لا صوت سوى نبضتين متسارعتين تتنازعان الحياة داخل صدرين موجوعين
آسيا ترفع يدها ببطء...تلمس وجنتها تتفاجأ أن دموعها توقفت…فتبتسم ابتسامة باهتة…ميّتة كأنها تقول لنفسها:
حتى البكاء تخلى عني.
مدّت هاجر يدها تضعها فوق يد آسيا.....لم تقل شيئًا....ولم تقل آسيا شيئًا
فبعض الصّمت أصدق من ألف كلمة.
في صباح اليوم التالي دلفت آيات إلى أمها فوجدتها تقف أمام المرآة تتجهز بعناية
كأنها لا تستقبل يومًا جديدًا…بل حياةً جديدة
اليوم مختلف كليًا عمّا سبقه عن سنواتٍ قضتها بين العذاب والانتظار
اليوم… قررت أن تكون آسيا تلك العنيدة القوية التي لم يهزمها أحد ولو انكسرت ألف مرة من الداخل
نظرت آيات إلى أمها بإعجابٍ صادق، وقالت بدهشة
يا لهوي على القمر إيه ده يا آسيا ....كنتِي مخبية ده كله فين
ابتسمت آسيا بهدوء وقالت بغرورٍ مازح:
طول عمري حلوة يا جزمة… بس إنتِو اللي مش واخدين بالكم
دلف عليهما ولدها الغالي ونبرة الغيرة تسبق كلماته:
ماما… إنتِي ناوية تنزلي كده؟
غيّري البنطلون… ضيق.
رفعت حاجبها الأيسر بغيظٍ مصطنع:
فين اللي ضيق يا ولا.... وبعدين الجاكيت طويل!
يا ماما… البنطلون شكله مُلفت… غيريه لو سمحتي"
تدخّلت آيات ضاحكة:
على فكرة مش مُلفت ولا حاجة…إنتَ اللي بتغير على أمك.
وبعدين البنطلون الأسود اللي لبسته أول امبارح كان أضيق من ده…اعترف بقى إن مامتك حلوة ومُزّة في الطقم.
التفت إليها بغضب طفولي:
مالكِيش دعوة يا بومة متدّخليش بيني وبين أمي
اقتربت آسيا منه....وضعت يدها على كتفه بحنانٍ محسوب
حتى لا تكسر رجولته:
إنتَ عارف يا حبيبي إني بحترم نفسي و بحترم سني…
وقبلهم بحترم إن معايا راجل أطول مني
فأكيد مش هلبس حاجة مُلفتة ولا هخلي الناس تتفرج عليّا خليك واثق في أمك…أنا ست بمليون راجل.
ابتسم رغمًا عنه ثم قبّلها و اخذ يتمازح معها ليصنع جو من البهجه بينهم.
دلفت إلى الشركة…لا أجد لها وصفًا.....
إلا....واثقة الخطوة تمشي ملكة.
ابتسامتها هادئة عينها ثابتة روحها مغلقة بإحكام لدرجه انها لم تلاحظ ذاك الذي سبقها إلى المصعد
لأول مرّة….لم تشعر بوجوده في نفس المكان.
أغلقت حواسها وأجبرت روحها
على عدم الإحساس به.
داخل المكتب… نهضت نِهال لاستقبال آدم
ألقى نظرة سريعة نحو مكتب آسيا
وحين وجده فارغًا قال بغيظٍ مكتوم
آسيا فين..لسه مجتش؟ ولا عند شريف جوّه
وقبل أن تجيبه نهال…تصلبت ملامحه فقد دلفت هي.
جميلة…مشرقة…كأن الزمن أعاد لها شبابها دفعة واحدة
ابتسامة هادئة على شفتيها…نظرة لا تحمل اهتمامًا…ولا ذكرى
ألقت تحية الصباح عليهما بلهجة جافة مُحايدة كأنهما غريبان تمامًا عنها.
في البداية... ظن أنها فعلت ذلك لتُثير غيرته لكن حين اصطدمت عيناه بتلك النظرة الباردة وتلك النبرة التي لا يعرفها شعر بشيءٍ مُريب.
قلبه خفقَ بعُنف ليس شوقًا هذه المرّة بل......رُعبًا
تجاوزته آسيا بخطوةٍ هادئة لا مُتعجلة ولا مُترددة.
كأن الأرض تعرف طريقها تحت قدميها دون أن تفكر.
مرّت بجواره والهواء بينهما لم يرتجف لا نظرة خاطفة ولا ارتباك….ولا تلك الرّعشة القديمة التي كانت تفضحها دائمًا.
لا شيء....وكأن سنواتٍ كاملة لم تكن.
استدار آدم ببطء…عيناه تتبعانها.
غير مصدّق هل هذه هي آسيا التي كانت ترتجف لمجرد أن تسمع صوته.
آسيا التي كان وجوده يكفي ليقلب عالمها.
جلست خلف مكتبها…ذلك الهدوء نفسه كان أشبه بصفعةٍ على وجهه.
اقتربت نهال بحذر ثم قالت :
تحب أجيب لحضرتك القهوة يا أستاذ آدم؟
لم يجب.....كان عقله مشغولًا بسؤال واحد يضربه بلا رحمة:
لماذا لم ارى صورتي داخل عيناها ....اين اختفى ذاك البريق ...و لما لم يصلني نبضها الذي يصرخ بعشقي
وضعت حقيبتها جانبًا…فتحت ملفًا عشوائيًا لكن يدها لم تكن ترتجف.
قلبها لم يتسارع ولا حتى ذكرى واحدة حاولت اقتحامها.
ابتسمت ابتسامة خفيفة…باردة…
منتَصرة كأنها تقول لنفسها:
ها أنا أمامه…ولم أمت!
و امامها ....آدم لا يزال واقفًا مكانه شيٍء ما انكسر داخله ...ليس غيرة…بل خوف
الخوف من فكرة واحدة
ماذا لو… لم تعد تحبه؟
ولأول مرة منذ عرفها…لم يكن هو من يتحكم في اللعبة.
اتجه نحو مكتبه دون ان يتفوّه بحرفٍ واحد امام نظرات نهال التي أيقنت أن الأمر به شيء ما و يجب عليها معرفته.
بمجرد أن اختفى وقفت أمام اسيا و قالت بجنون مما جعل الأخرى تضحك بزهول:
بقولك اااايه....انتي اه متعرفنيش بس انا واحده فضوليه لدرجه تموّت و تجيب جلطه
الجدع السقيل ده وراه حاجه تخصك و انا احساسي مبيكدبش !
بالله قوليلي في ايه.. و ايه الحرب البارده اللي دايره بينكم ....انا ممكن يجرالي حاجه لو معرفتش؟
رغم أنها تشعر بارتياح شديد لها إلا أنها قالت بحذر:
مفيش حاجه ...عادي و الله هو استاذ ادم طبعه صعب شويه.
ردت عليها نهال بغيظ :
بُصي انا اكتر واحده اعرف آدم من كتر ما دعاء صاحبتي بتحكيلي عليه .
ورغم اني قلتلها الجدع ده وراه قصه وقصه كبيره بس هي غبيه وما صدقتنيش .
واتجمعوا الحبايب قدام مني كده .. قريت كل واحد فيكم انتي وآدم في بينكم حاجه مش طبيعيه وشريف بيحاول يدخل على الخط ودعاء اغبى خلق الله بتمشي تحب على روحها فبالله عليكي فهّميني عشان مااقعدش ارسم في خطط وارسم في حكايات وفي الآخر تطلع حاجه ثانيه خالص .
سألتها باستغراب رغم تأكدها من الاجابه :
هي مدام دعاء بتحب آدم؟..... طب و استاذ شريف عارف ؟
زفرت نهال بحنق ثم قالت بجديه :
بُصي هو انا مش هينفع اقولك تفاصيل علشان مابعرفش حد يحكيلي حاجه حتى لو تافهه وانا أحكيها لحد ثاني .
الكلمتين دول لأني فهمت انك ذكيه واخذتي بالك من تصرفاتها امبارح .
بس في العموم ولا انا ولا استاذ شريف بنشجّعها على العتّه اللي في دماغها ليه..... عشان هو مش شايفها اصلا .
وهي عايشه على مجرد اوهام في دماغها .
تطلّعت لها بقوه ثم اكملت بيقين وكأنها تعرفها منذ سنوات :
مش زي ناس عايشه الحقيقه جوه دماغها بس بتحاول تظهر عكسها قدام الناس "
ساد الصمت بضع لحظات ثم قالت اسيا بصدق وجدّيه :
مش هَنكر اني مرتاحالك وانا مَليش صُحاب من زمان أوي يمكن
من 20 سنه مَصاحبتش حد .
سيبيها دلوقتي يا نهال يمكن نبقى اصحاب واحكيلك كل حاجه .
صفقت بمُزاح ثم قالت بغيظ شديد :
ايوه كده والمصحف كلها يومين وهتحبيني وهتحكيلي القصه كلها .
ساعتها بقى هخلي ابو الفصاد ده.. يرقص حوالين نفسه مش يلف بس عشان انا من يوم ما شُفته كده وانا حاسه ان انا مش طايقاه وتقيل على قلبي ابو شكل تقل دمُه يا شيخه.
لم يعود آدم الى مكتبها....لم يتحدث معها لم يفعل شيئًا… سوى أن يُراقب.
يُراقبها وهي تتحرك بين الموظفين بثقة....تبتسم بهدوء....توزّع المهام بحزم
صوتها ثابت…نظرتها لا تتعثر.
لم ترتبك مرّة واحدة ..لم تخفض عينيها لم تبحث عنه كأن وجوده…..أصبح تفصيلًا عابرًا في يومها
وكلما طالت المُراقبة…كان شيٍء ما يجعله يخاف داخله أكثر.
هل هذه هي نفسها؟....أم أن المرأة التي كانت تعرفه… ماتت فعلًا!
في الظهيرة…اتجهت آسيا نحو آلة القهوة.
ضغطت الزر…انتظرت الكوب.
وفي اللحظة التي استدارت فيها كان آدم أمامها..
مسافة خطوة واحدة تفصل بينهما.
في الماضي…كانت تلك المسافة كافية ليختنق قلبها من شده خفقانه.
الآن…..لم يحدث شيء رفعت عينيها إليه بهدوء نظرة قصيرة لا تحمل أي شيء ثم قالت
محتاج حاجه يا استاذ ادم؟
لا رعشة.....لا دفء....لا حنين!
ابتلع ريقه بصعوبة ثم قال بغلٍ شديد و غرور سيجعله يدفع الثمن غاليا :
ايه اللي عملاه في نفسك ده يا آسيا.....مُتخيله ان كده ممكن اشوفك يعني اوتلفتي انتباهي
مرّت ثانية ثقيلة لم تحاول ملأها ولم تهرب منها
تناولت كوب القهوة ثم قالت بجفافٍ قاطع رغم نبرتها الهادئه
لو محتاج حاجة تخص الشغل بلّغ نهال اوابعتلي ايميل.
الكلام الجانبي مش ضمن جدول يومي و لا هسمحلك بيه. ...ثم تجاوزته بخطوة واثقة هادئة قاطعة.
تركته واقفًا وحده…والكوب في يده.....يرتجف!
قابلت في طريقها قاسم الذي كان يراقب ما يحدث من بعيد بعيون صقريه وحينما وجدها امامه قال بمُزاح خفيف :
ايه البطل اللي هَلْ علينا في الشركه ده..... إنتي كده هتجنني امُه وانا مااضمنش رد فعله
تطلّعت له بغيظ لكنها ردّت بمُزاح ايضا :
على فكره انت شكلك مش سهل بس نصيحه منّي مَتركزش معايا عشان مَتتعبش .
ابتسم وقال بتملق :
ده انا لازم اركز معاكي ده انتي خاله الفرسه هركز مع مين غيرك؟
تطلعت له بغضب ثم قالت بجديه:
قاسم..... انا هقولك قاسم عشان انت تقريبا قد ولاد اختي اللي انا مربياهم :
بلاش رضوى..... ولا هي شبهك ولا انت هتنفعها "
خلي البنت في حالها عشان مش هسمحلك توجعها وبما انك عارف القصه انا مش هخلي الزمن يعيد نفسه ثاني .
تركته وغادرت لتُكمل يومها بشكل طبيعي وهدوء لم تحظى به منذ سنوات كثيره
لكن عقلها كان منشغلاً بما اخبرتها به اختها هاجر بالأمس بعد ان هدأت من انهيارها
قررت ان تساعد هؤلاء الشباب حتى يستطيعون بناء حلمهم وكلها ثقه انهم سينجحون فيه
خطرت ببالها فكره عبقريه وقررت ان تنفذها في الحال .
بعد ان استأذنت ودخلت مكتب شريف وقفت امامه وعلى وجهها ابتسامه بشوشه ثم قالت :
استاذ شريف من فضلك محتاجه منك خدمه صغيره لو تقدر تعملها يبقى كثر ألف خيرك
انتفض من خلف مكتبه ليتقدم نحوها وهو يقول :
اؤمريني يا اسيا اي حاجه محتاجاها قوليلي عليها على طول وانا مش هتاخر!
ولاد اخواتي ربنا كرمهم بقرشين وعايزين يفتحوا كافيه بيدوروا على اماكن مناسبه ويكون فيها شغل .
الصراحه انا فكرت ان هما يأجروا محل هنا بما ان حوالينا شركات كثير وده انسب مكان ليهم .
فلو حضرتك تعرف حد عنده مكان للإيجار هنا هَكون شاكرالك جداً لو كلمته وكمان يخلي السعر حنين شويه عشان يقدروا عليه انت عارف ان هُما شباب في بدايه حياتهم.
فكّر للحظات ثم قال بحماس :
وليه اسأل حد انا عندي مخزن مقفول على الشارع الرئيسي مساحته كويسه جداً وهينفع يبقى كافيه محترم ايه رايك ؟
ارتسمت الفرحه جليّه على وجهها وقالت بامتنان :
بجد.... يعني مش عارفه اشكر حضرتك ازاي لو مش محتاجُه يبقى انا هكلمهم يأجروه
بس حضرتك قولي اللي طالبه فيه علشان اشوف على قد امكانياتهم او لأ؟
ردَّ عليها سريعا دون تفكير :
انا هشاركهم مش هأجر.
نظرت له بصدمه فأكمل:
انتي بتقولي ان هُما شباب وفي بدايه حياتهم بدل ما يتكلفوا ايجار وحاجات كثير جدا وفي اخر الشهر مَيلاقوش مكسب لأ .. يعتبروه ملكُهم وانا هدخل معاهم بالنسبه اللي تريحهم فبكده هيكون المكسب افضل بكثير .
وقبل ما تسألي بعمل كده ليه انا بحب اساعد الشباب وبعدين مش هخسر ...كده كده مكاني موجود وكده كده ليا نسبه في الارباح .
ردّت عليه بفرحه جلّيه دون ان تعلم بالذي يستمع لما قاله شريف:
هيَ فكره حلوه جدًا وانا واثقه ان هُما هيتعلموا منك كثير لو مش شايف فيها ضرر انا عن نفسي موافقه واكيد هُما كمان هيوافقوا
اقتحمَ المكتب دون ان يستأذن ثم وقف امامهم وقال بغلٍ شديد وقد فشل في التحكم في غضبه........
اشوفكم علي خير بعد انتهاء المعرض
بعتزر عن توقف الروايه لمده اسبوع و هنرجع تاني باذن الله بعد حفله التوقيع
ادعولي
ماذا سيحدث يا ترى

صباحك بيضحك يا قلب فريده
البجاحة فعلًا ليها ناسها
وذلك المثل ينطبق حرفيًا على ذاك الحقير الذي يقف الآن متصنّمًا أمام شريف وآسيا بعدما التقط خيط الحديث عن الشراكة بينهما
لم ينطق... لم يعترض صراحة لكنه لم يحتاج
عيناه وحدهما كانتا كافيتين لفضحه شرارٌ من غضبٍ أعمى وحقدٍ قديم انطلق منهما حتى جعل شريف يلتفت إليه بدهشة
سأله باستغراب واضح وقد لاحظ جمود ملامحه غير المبرر:
في إيه يا آدم....مالك واقف كده ليه؟
جاءه الرد غليظًا مٌحمّلًا بغلٍّ مكبوت كأن الكلمات تُنتزع من بين أسنانه:
شراكة إيه اللي بتتكلموا عنها؟
إنت ناوي تشارك حد من غير ما تقولّي
تنهد شريف بخفة وهزّ رأسه كأنه يحاول احتواء الموقف ثم قال بنبرة هادئة:
آه... إنت سمعت!
طب كويس أنا كنت لسه هحكيلك.
أكمل بتلقائية غير مدرك للعاصفة التي تتشكل أمامه
ولاد أخت آسيا عايزين يفتحوا كافيه وكانوا محتاجين يأجروا محل كبير
وأنا عندي المخزن اللي على أول الشارع مش بستعمله.
فبدل ما يتكلفوا إيجار وبدل ما المخزن يفضل مقفول نستفاد إحنا الاتنين وندخل شراكة سوا.
هزّ آدم رأسه ببطء مصطنعًا التّفهم لكن داخله كان يغلي
قال بابتسامة باهتة لم تصل لعينيه:
طب حلو قوي... فكرة ممتازة أنا كمان هدخل معاكم شريك.
لااااااااا....
خرجت الصرخة من آسيا قوية حادة غير محسوبة كأنها كانت محبوسة داخل صدرها منذ زمن طويل تنتظر أي ذريعة لتنفجر.
ارتج المكان للحظة وتجمّد شريف في موضعه، ينظر إليها بذهول.
ذلك الانفعال لم يكن منطقيًا ولا يتناسب مع بساطة الموقف
أما آدم...فلم يُفاجأ
نظر إليها بغلٍّ أشد بعينين تعرفان الإجابة قبل أن تُقال وانتظر.
لم يسأل عن سبب رفضها.
لأنه كان يعرف...يعرف أن اعتراضها ليس على الشراكة.
بل عليه هو....يعرف أن وجوده في أي مساحة تخصها لم يعد مقبولًا
وأن اسمه وحده صار يضغط على جراحٍ لم تلتئم جراحٍ هو سببها الأول.
لم يتحرك....لم يرفع صوته لم يعترض ولم يُظهر أي انفعال صريح
لكن داخله كان ساحة حرب.
فكرة أن يكون هناك شيء يجمع آسيا بشريف من دونه كانت تخنقه
ليس الكافيه...ولا الشراكة...ولا المال
هي....هي فقط
منذ متى وهي تملك حق الرفض بهذه الحدة
منذ متى صار وجوده غير مرغوب فيه إلى هذا الحد
كان يرى في نفسه حقًا قديمًا اسمًا محفورًا في ذاكرتها
شيئًا لا يمكن شطبه بسهولة...
وها هي الآن أمامه تمحوه بجملة واحدة.....لااااا....
كأنها أغلقت بابًا كان يظنه ما زال مفتوحًا
الغيرة أكلت صدره ببطء ليس غيرة رجل يخشى منافسًا
بل غيرة رجل أدرك متأخرًا أنه خسر وأن الخسارة هذه المرّة نهائية
ومع ذلك...جزء قذر بداخله لم يتقبل الهزيمة
جزء ما زال يرى نفسه وصيًا عليها يحق له التدخل والرفض والفرض
ساد صمت ثقيل بعد اقتراح آدم
صمت لم يكن مريحًا... بل خانقًا
رفعت آسيا رأسها ببطء لم تصرخ هذه المرة حتي انها لم تنفعل
وكأنها تداركت نفسها في اللحظة الأخيرة
لأ....قالتها بهدوء قاطع
هدوء جعل الكلمة أثقل من أي صراخ
قطّب شريف حاجبيه بدهشة
ليه؟
هوَ مشروع حلو و مُربح وكل ما عدد الشركاء يزيد يبقى أحسن
التفتت إليه آسيا ملامحها متماسكة صوتها ثابت بشكل مريب
بعتذر منك استاذ شريف مفيش مكان لشركاء تانيين
ابتسم ادم ابتسامة جانبية باردة كأنه وجد ثغرة يتسلل منها ثم قال بخبث
يعني إيه....مش ده مشروع عائلي بما ان شريف معاكم
ولا أنا بقيت غريب قوي كده
نظرت إليه مباشرة
نظرة طويلة متحدية بلا خوف ولا ارتباك ثم قالت:
المشروع ده ليه حدود و انت برّه الحدود دي....مش عشان استاذ شريف بقى من العيله زي ما بتقول لأ ....عشان المشروع ده مش هيتحمل اكتر من طرفين.
الهواء توتر....شريف شعر بالارتباك ليس بسبب الكلام نفسه
بل بسبب النبرة....نبرة اشخاص بينهم تاريخ ليس مجرد اختلاف رأي
هو في حاجة أنا مش فاهمها؟
قالها شريف ببطء وعينه تتنقل بينهم
رفع ادم حاجبه صوته خرج ساخرًا
لا يا شريف مفيش حاجة.
بس واضح إن في قرارات بتتاخد من غير ما تتحسب كويس
ردّت آسيا فورًا، بنفس البرود:
القرار محسوب جدًا
ومش محتاج موافقة من حد مش معني بيه
هنا...بدأ الشك يتسلل إلى عقل شريف.
ليست شراكة....ليس مال ...هذا تحدّي...تحدّي شخصي قديم علي ما يبدو ظاهراً بوضوح
نظر لهما واحدًا تلو الآخر
وعلم أن بينهما شيئًا لم يُقال شيئًا أكبر من مشروع وأخطر من خلاف عابر
أما آدم...فشعر بالهزيمة للمرة الأولى
ليس لأنه رُفض كشريك بل لأنه رُفض كوجود
وآسيا....وقفت ثابتة تخفي زلزالًا كاملًا خلف ظهر مستقيم وتترك الشك يقوم بالباقي.
وقفت رضوى داخل مكتب قاسم تنتظر الأوامر التي اعتاد أن يلقيها عليها
أو حتى أن يبدأ في استفزازها كعادته الدائمة
لكن الصمت طال على غير المتوقع لم يتفوه بحرف.
لم يتحرك من خلف مكتبه كان يراقبها فقط...لأول مرّة بنظرات مختلفة
نظرات متفحصة، بطيئة كأنها تبحث داخلها عن شيء غامض
شيء لا يعرف هو نفسه ماهيته
لم تكن تلك نظرة سُلطة ولا نظرة تحدٍّ
بل نظرة رجل يقف عند مفترق داخلي
يُعيد حساباته دون أن ينطق
الشيء الوحيد الذي كان متأكدًا منه
أنه ....هذه المرة .... لن يكرر الخطأ لن يكون نسخة أخرى من عمّه
ولن يسمح لنفسه أن يؤذي امرأة
لمجرد أنه قادر على ذلك
تحذير آسيا...تلك الجملة العابرة التي قالتها له بنبرة جادة لم تفارقه منذ ان قالتها
جعلته يراجع نفسه كثيرًا ويعيد النظر في حدوده
وفي نوع الرجل الذي يريد أن يكونه
قطعت رضوى الصمت أخيرًا بنبرة حاولت أن تبدو طبيعية
هو... في حاجة ولا أنا واقفة غلط
رفع قاسم عينيه إليها ببطء
ثم قال بهدوء غير معتاد
لأ...واقفة صح
عقدت حاجبيها بدهشة خفيفة ثم سألته باستغراب
أمال ساكت ليه مش ده أسلوبك!
ابتسم ابتسامة خفيفة بلا سخرية هذه المرة
يمكن قررت أغيّره
ضحكت ضحكة قصيرة غير مقتنعة
لا مؤاخذة يعني...بس دي جديدة
تنحنح قاسم ثم قال بجدية مفاجئة
رضوى...إنتِي شغلك هنا مهم
وأنا مش ناوي أضيّع وقتك ولا طاقتك في شد وجذب مالوش لازمة
نظرت إليه باستغراب واضح ثم قالت:
ده اعتراف رسمي...ولا أنا لازم أقلق!
هز رأسه نفيًا و هو يقول بجديه:
ولا ده ولا ده اعتبريه إعادة ترتيب.
سكتت لحظة ثم قالت بحذر:
طيب... تحب أبدأ في ملف إيه
أشار إلى المقعد أمامه..
اقعدي الأول ونراجع الشغل سوا... بهدوء
جلست رضوى وعينها لم تفارقه
كانت تشعر أن شيئًا ما تغيّر
وأن هذا الرجل الذي أمامها
لم يعد يستمتع بالسيطرة كما كان
أما قاسم....فكان يدرك في داخله
أن هذه اللحظة الصغيرة قد تكون الفارق بين أن يصبح نسخة مكررة من ماضٍ مظلم
أو رجلًا تعلّم من أخطاء غيره قبل فوات الأوان
قامت بفتح الملف الذي أشار إليه
وبدأت تتحدث عن مضمونه بهدوء مهني
لكن قاسم لم يكن يسمع....عيناه كانتا معلقتين على حركة يديها
على هدوئها الزائد
على ثقتها التي لا تشبه الضعف الذي اعتاد أن يراه وذلك بالضبط ما أزعجه
فجأة.....أغلق الملف بحدة
انتفضت رضوى في مكانها ورفعت رأسها بسرعة:
في إيه....أنا لسه ما خلصتش!
وقف قاسم من خلف المكتب
دفع الكرسي للخلف بعنف مكتوم
وعاد صوته إلى تلك النبرة التي تعرفها جيدًا...
لكنها كانت مشوبة بشيء جديد
شيء مهتز:
خلّصي بعدين.
قالها باقتضاب
عقدت حاجبيها و سألته بصدمه:
حضرتك اللي قلت نراجع بهدوء
ضحك ضحكة قصيرة بلا روح:
وأنا غيرت رأيي!
وقفت هي الأخرى لم تتراجع خطوة وقالت بثبات:
هو أنا عملت حاجة غلط؟
وقف أمامها....قريبًا أكثر مما ينبغي
للحظة عاد الإحساس القديم...إحساس السيطرة لكنه لم يدُم
تراجع نصف خطوة كأن جسده نفسه رفض الفكرة:
لأ.
قالها بصوت أخفض
الغلط مش منك
نظرت إليه بتركيز
أُمال ليه العصبية دي
أدار وجهه عنها ثم مرر يده في شعره بعنف
قال كأنه يحدث نفسه أكثر مما يحدثها
ساعات الواحد لما يحاول يبقى غير اللي اتعود عليه بيفشل
ساد صمت ثقيل ثم قالت رضوى بحذر:
حضرتك مش مُطالب تشرح.
التفت إليها فجأة نظرة حادة متناقضة:
لا....أنا مُطالب عشان ما أطلّعش شخص أكره نفسي بسببه بعدين.
تقدمت خطوة دون وعي:
إنت مش شبه اللي فاكر نفسك شبهه مهما كان هو مين ....اللي لاحظته من وقت ما اشتغلت معاك انك ليك شخصيه مستقله ملهاش علاقه بأي حد حواليك
تجمد....تسللت جملة آسيا إلى رأسه كطعنة بطيئة
...خلي بالك مش هسمح الزمن يعيد نفسه....
أغمض عينيه لحظة ثم فتحهما وقد عاد الجدار إلى مكانه:
خليكِي في شغلك يا رضوى.
قالها ببرود مصطنع.
واعتبري اللي حصل ده محصلش.
حملت الملف نظرت إليه نظرة أخيرة مليئة بالشك والفهم في آنٍ واحد
تمام.
قالتها بهدوء ثم اكملت
بس مش ديما نقدر نقنع عقلنا أن اللي حصل.... محصلش.
خرجت وأغلقت الباب خلفها.
بقي وحده أسند كفيه إلى المكتب وانحنى قليلًا....لم يكن غاضبًا منها كان غاضبًا من نفسه من تلك المسافة القصيرة بين أن يكون رجلًا تعلّم من الألم
أو نسخة أخرى من تاريخ أقسم في سره ألا يعيده.
وللمرة الأولى...لم يكن متأكدًا أي الطريقين أقرب إليه
مرّ اليوم ظاهريًا عادي
لا شجار لا مواجهة لا كلمة زيادة
لكن شريف لم يكن من النوع الذي ينسى نظرة ولا نبرة
في نهاية اليوم وجده يقف وحده قرب المكتب
فتقدم نحوه وكأنه يفتح موضوعًا عابرًا
على فكرة:
قالها بابتسامة خفيفة
استغربت رد فعل آسيا شوية
آدم لم يرفع رأسه فورًا كان يعرف أن السؤال قادم لكنه لا يعرف من أي زاوية سيأتي.
استغربت ليه؟
رد بهدوء مصطنع:
عشان اسيا مش من النوع اللي يرفض كده من غير مبرر وبصراحة...النبرة ماكنتش نبرة شغل.
سكت لحظة ثم أضاف كمن يرمي حجرًا في ماء راكد:
إنتوا كنتوا تعرفوا بعض قبل كده، صح؟
رفع آدم رأسه أخيرًا نظر إليه نظرة سريعة حَذرة ثم قال ببرود مصطنع:
معرفة قديمة ولا تفرق دلوقت .
ابتسم شريف لكن عينيه لم تبتسما:
الغريب إن اللي ما يفرقش...
ما يعملش التوتر ده كله
اقترب خطوة صوته صار أخفض
أنا مش بحب أشتغل وسط حاجة مش واضحة.
ولو في مشكله قديمه بينكم يبقى لازم أعرف حجمها .
شدّ فكه بِغلٍ ثم قال بنبرة حاول أن يجعلها حاسمة:
الموضوع مش مستاهل يا شريف وآسيا واضحة... مش حابّة تتعامل معايا يبقي خلاص
هزّ شريف رأسه ببطء ثم قال بقوه:
تمام....بس خلّيك فاكر أنا بثق في إحساسي.
وإحساسي بيقولي إن في حاجة مستخبية.
ثم تركه ومضى تاركًا خلفه سؤالًا بلا علامة استفهام...لكنه بوزن جبل.
دخل آدم سيارته وأغلق الباب بعنف لأول مرة منذ زمن طويل شعر أنه مكشوف
ضرب المقود بقبضته....مرّة....ثم مرّة أخرى
ليييييه....؟
همس لنفسه:
ليه مش قادر انساها..؟
لم تكن آسيا مجرد امرأة خرجت من حياته كانت الشيء الوحيد الذي ظنَّ يومًا أنه يملكه بالكامل.
صوتها خوفها ضعفها القديم
كل ذلك كان يمنحه شعور القوة و الحياه
والآن.....الآن تقف أمامه ثابتة
باردة واضحة...وكأنها لم تُكسر يومًا
أشعل سيجارة بيد مرتعشة نفسه خرج حادًا
فاكرة نفسك قوية
قالها في الفراغ
فاكرة إنك كسبتي
لكن داخله كان يعرف الحقيقة
هي لم تنتصر عليه فقط...هي تحررت وهذا أكثر ما يخيفه
الخسارة عنده مقبولة أما أن يخسر السيطرة علي قلبها ....هذا جنون
مال برأسه للخلف أغمض عينيه
صور قديمة تسللت رغماً عنه
دموعها...صمتها...تراجعها خطوة حين كان يعلو صوته
فتح عينيه فجأة كأنه انتبه لشيء
لاااااااااا...
قالها بحدة ثم اكمل بغل:
الحساب لسه مخلصش ..
آسيا ظنت أن الصمت نجاة.....وشريف ظن أن الذكاء كفاية
أما آدم...فبدأ يشعر أن لديه ما يخسره
ومن لا يملك إلا الهزيمة...
يصبح أخطر مما يتوقع الجميع
كان شريف يراقبها منذ دقائق
لا بسبب ما قيل بل بسبب ما لم يُقل
ذلك الشحن الخفي الذي يملأ المكان كلما التقيا نظرات متحفزة
وتوتر لا يليق بزمالة عمل عادية
تنحنح بخفة ثم قال وكأنه يلقي حجرًا في ماء راكد
آسيا...
إنتِ تعرفي آدم من زمان؟
رفعت رأسها فجأة:
لم تتوقع السؤال بهذه المباشرة
ولا بهذه النبرة الهادئة التي لا تحمل اتهامًا بل يقينًا.
ليه بتسأل؟
قالتها محاولة التماسك.
عشان حاسس إن في بينكم معرفة سابقة الجو بينكم مش طبيعي... مش شغل ابدا !
سكتت آسيا و قد ارتسمت الصدمه و الحيره علي ملامحها.
طالت لحظة الصمت أكثر مما يجب....وحين أدركت أنها فشلت في الاختباء
تنهدت بعمق وكأنها تزيح حمل سنوات
آه...
قالتها بصوت منخفض:
نعرف بعض.
اقترب شريف خطوة و نبرة صوته صارت أكثر جدية
قد إيه تعرفو بعض؟
رفعت عينيها إليه أخيرًا وفيهما تعب قديم لا يحتاج شرحًا
آدم كان خطيبي.
تجمّد شريف في مكانه كأن الجملة سُحبت من تحت قدميه
إيه...؟!
قالها ببطء غير مصدق:
إنتِ بتقولي إيه؟!
ابتسمت آسيا ابتسامة قصيرة موجوعة:
كان حياتي كلها ....بس دمّرّني..
جلس شريف على الكرسي خلفه.
مرّر يده على وجهه وعيناه غارقتان في صدمة شديده
مستحيل...
قالها وهو يهز رأسه
إنتِي...إنتِي حبيبة آدم القديمة؟!
أومأت آسيا بهدوء فاكمل:
أنا وآدم صحاب من زمان...
قالها شريف بصوت مبحوح.
وكنت عارف قصته ....كنت عارف قد إيه اتوجع
وقد إيه الموضوع مأثر فيه بس عمري ما تخيلت إن إنتِي نفس الشخص!
ساد صمت ثقيل ثم قطعه و هو يكمل:
مكنتش أعرف اسمك وقتها ولا شفتك ولا تخيلت إن الدنيا تلف وتبقي قدامي بالشكل ده.
قالت آسيا بهدوء متماسك:
القصة انتهت من زمان.
بس هو...لسه عايش فيها
كانت نهال تستمع إلى تلك الألغاز المتناثرة التي لم تفهم منها شيئًا.
الكلمات تصلها مشوشة عبر الباب المفتوح.
لكن النبرة.....النبرة كانت كافية لتخبرها أن ما يحدث بالداخل
أكبر من مجرد نقاش عمل
وحين خرجت آسيا
لم تنتظر نهال ثانية واحدة
اقتربت منها بلهفة صادقة وفضول شديد ثم قالت:
أنا عايزة أعرف القصة كلها؟
قالتها بسرعة.
عشان الراجل ده أصلًا أنا مش طايقاه ولو اللي في دماغي طلع صح.....أقسم بالله أخليكِي تلعبيه على الشناكل.
ابتسمت آسيا ابتسامة باهتة لا تشبه الضحك بقدر ما تشبه اعتذارًا صامتًا ثم قالت بحذر واضح:
أنا مش قادرة أحكي دلوقتي يا نهال...بعدين هقولك.
وبمنتهى الصراحة إنتِي ودعاء صحاب.
وأنا ملاحظة إن في حاجة جواها ناحيه ادم
أنا مش عبيطة عشان مفهمش نظرات واحدة ست زيّي
لم تنزعج نهال بل ابتسمت بهدوء مختلف
ثم قالت بنبرة جادة على غير عادتها المرِحة:
بصّي....مش معنى إني ودعاء صحاب يبقى هقولها على اللي بيحصل في الشركة
انا نفسي أكون أنا وإنتِي صحاب وعشان ارتحتلك من أول مرة شفتك انسي أي حاجة هتقوليهالي تطلع مني ده وعد.
اقتربت خطوة وخفضت صوتها:
انت لسه ما تعرفينيش.
بس أنا عمري ما بتأمّن على سر وأطلّعه لحد حتى لو على رقبتي.
نظرت إليها آسيا بحيرة ..... شيء ما في داخلها ارتخى
كانت تحتاج إلى الحديث...لا لتبرير ولا للدفاع بل لسماع رأي جديد من شخص لم يعش القصة معها لم يتأثر بماضيها.
ولم يحمل عنها أحكامًا مسبقة
كانت تحتاج أن تتأكد...أنها تسير في الطريق الصحيح
تنهدت بعمق، ثم قالت بهدوء:
طب تعالي نقعد و انا هقولك كل حاجه يمكن ارتاح!
جلستا معًا....صمتت آسيا لثوانٍ قبل أن تبدأ
وكأنها تعيد فتح باب أُغلق منذ زمن
آدم...
قالت اسمه كأنه ثقل
كان خطيبي....مش بس كده كان محور حياتي فترة
رفعت نهال حاجبيها لكنها لم تقاطع
في الأول كان اهتمامه زيادة عن اللزوم غيرة باسم الحب
تحكّم باسم الخوف....كل ده قبلته لأني بعشقه مكنش فارق معايا حاجه
و بعد ما اديته قلبي و حياتي و دنيتي ....اتهمني بالخيانه
اتهام من غير دليل ولا حتى استعداد يسمعني
ابتلعت آسيا ريقها..
يوم ما قرّر يصدّق شكّه أكتر مني...خلّص كل حاجة
سابني أواجه الناس لوحدي وكأني المذنبة الوحيدة
شهقت نهال بحدة
ابن الكلب الواطي!
توقفت فجأة احترامًا لنظرة آسيا و التي تابعت بحزن و هي تقول:
أنا عمري ما قلت القصة كاملة .
بس اللي حصل كفاية يخليني أرفض وجوده في حياتي بأي شكل
ساد صمت قصير كانت نهال تغلي من خلاله
لم تعد المرِحة الخفيفة بل امرأة ترى الظلم بوضوح
لأ...
قالتها بحسم..
ده مينفعش يعدّي كده.....اللي حصلك و اللي لسه معرفش منه غير قشور مينفعش يعدي ابداااا
نظرت إلى آسيا بعينين مشتعِلتين واكملت بغل شديد:
الراجل ده مش بس أذاكِي ده فاكر إنك لسه ضعيفة وإنه يقدر يرجع يدخل حياتك من أي باب.
اقتربت منها أكثر ثم اكملت بمكر:
أوعدك أني هخليه يتجنن....هخليه يموت من الغيره
هخليه يحس إنه خسر السيطرة
من غير ما نغلط غلطة واحدة
نظرت آسيا إليها طويلًا ثم قالت بصوت منخفض لكن ثابت:
لو دخلت اللعبة دي...مش هرجع.
هزّت نهال رأسها بثقة:
وأنا مش داخلة ألعب أنا داخلة أخلّص حساب ست اتظلمت .
وفي تلك اللحظة لم تشعر آسيا بالذنب...بل بشيء أقرب إلى العدالة
مالت نهال ناحيتها
صوتها منخفض لكن واثق.
نبرة امراة خططت من قبل و لم تفشل:
اسمعي بقى إحنا مش هنهاجمه...إحنا هنسيبه هو اللي ييجي لحد عندنا.
نظرت آسيا لها باستغراب فسألتها الأخري بخبث:
آدم نوعه إيه...مريض سيطرة.....راجل ميستحملش فكرة إن حاجة كانت ملكه وبقت مش في إيده و لا حاسس نفسه الراجل الوحيد فالكون
صمتت لحظة ثم ابتسمت ابتسامة جانبية خبيثة:
أول ضربة إنك تتغيري من غير ما تقصدي قدامه
رفعت آسيا حاجبيها فاكملت:
لا تجاهل فج و لا استفزاز ...
بالعكس...
عدّلت نهال جلستها
هتكوني هادية زيادة عن اللزوم واثقة مش محتاجة تثبتي أي حاجة
ولا حتى باصة عليه كتير
ثم أضافت ببطء مقصود
وأهم حاجة...إنه يحس إنك مش شايفاه تهديد
همست اسيا بتوجس
- وده هيأذيه إزاي
ضحكت نهال ضحكة قصيرة بلا مرح:
لأنه متعود يكون محورك
فلما يلاقي نفسه مجرد شيء مش من ضمن اهتماماتك...
عقله هو اللي هيبدأ يشتغل ضدّه
اقتربت أكثر و هى تكمل:
بعدها بقى مش هنقربله مباشرة
هنخلي الناس تحترمك قدامه..
كلمة حلوة في اجتماع..
نظرة تقدير من شريف...
ثقة من شخص هو نفسه محتاج رأيه.
ثم قالت الجملة الأهم....
أول انتقام حقيقي إنه يشوفك ناجحة من غير ما يكون له أي فضل في ده
سكتت ثانية ثم أضافت بنبرة أخطر
وساعتها...هو اللي هيغلط
هو اللي هيكشف نفسه
وإنتِي....ولا في دماغك.
آسيا شعرت بشيء غريبة ليست شفقة...ولا خوف بل قوه لم تختبرها من قبل
يعني نبدأ بالهدوء؟
سألت بحظر؟
هزّت نهال رأسها ثم قالت:
- نبدأ بالهدوء ونسيبه يولّع لوحده.
وتلك كانت الضربة الأولى....ناعمة...لكنها تفتح باب الجنون
وقف معاذ أمام مكتب رئيس الجامعة
يحاول كتم غضبه المُتّقد الذي لو انفجر لربما أحرق العالم كله من حوله
حين أخبره رئيس الجامعة أن فهد سيتدرب في شركة شريف بناءً على طلب والده
الصديق الشخصي للرئيس والذي لم يستطع رفضه
لم يستطع معاذ إخفاء شعوره بالتهديد
انفجر بغضب.... صوته يمتلئ بجنون مكبوت:
يعني إيه يا دكتور....حضرتك كده بتلغي وجودي كده أنا اللي وزعت الطلبة على الشركات
كده كلامي مش هيتسمع؟
رد عليه الرئيس بهدوء محاولة لامتصاص شحنته لكن دهشة واضحة تملأ صوته:
كلامك مش منطقي يا دكتور... طبيعي جدًا إن أقبل طلب صديق ليا وأخلي ابنه يتدرب في شركة هو هيكون مرتاح فيها إيه اللي مضايقك في كده؟!
لم يجد معاذ ما يقوله استأذن وخرج من المكتب وداخله يغلي كالمرجل
فكر في كل ما يعنيه هذا القرار
حبيبته.... شيرين ستكون في نفس الشركة التي سيذهب إليها هذا "الحقير" كما لقب معاذ هذا الشاب في ذهنه
وبالتالي، يجب أن يكون حاضرًا هناك دومًا.يراقب يمنع أي احتكاك بينها وبينه ويقطع كل فرصة لأي تقارب مهما حدث
دخل معاذ إلى الشركة صباح اليوم التالي.
عيناه تبحثان عن شيرين بين الموظفين.
حين رآها شعر قلبه بشيء لم يستطع السيطرة عليه... غيرة غصب عنه شعور ملتهب بالامتلاك
اقترب منها محاولة إخفاء كل ما يشعر به لكن كل حركة كل ابتسامة صغيرة لها زادت حرارة الغيرة داخله
صباح الخير يا شيرين
قالها بهدوء صوت خافت لكنه مليء بالحدة
عامله إيه النهارده؟
صباح الخير يا دكتور. .. كويسه الحمد لله.
ردّت بابتسامة طبيعية غير مدركة للانفجار الداخلي الذي يحدث خلف عيناه
وقف بجانبها يحاول أن يبدو طبيعيًا لكنه كان يراقب كل تحرك لها كل نظرة، وكل كلمة
طب...
قالها فجأة نبرة صوته تنم عن سيطرة خفية
لو احتجتي أي حاجة كلميني...مش معنى اني بروح الجامعه يبقي مش هكون موجود هنا
التفتت له بدهشة خفيفة لم تعتد على هذا النوع من الحماية المستتره
حاضر... شكراً يا دكتور
قالتها وهي تحاول تخطي شعورها بالارتباك
أخذ نفسًا عميقًا محاولة تهدئة نفسه، لكنه شعر أن كل دقيقة معها تزيد من غليانه الداخلي
تحدث داخله بجنون
لازم أكون جنبها طول الوقت
مش هسيبه يقرب منها مهما حصل
كانت هذه المرّة الأولى التي يُظهر فيها معاذ غيرته بصراحة
غيرته المكبوتة التي تخرج بشكل غير محسوب
غيرته التي كانت سببًا في تحكمه بمشاعره وتصرفاته
لكنها الآن بدأت تظهر شيئًا فشيئًا أمام شيرين
دخل معاذ إلى الطابق الاوسط خطواته كانت ثابتة،كل حركة مليئة بالتحكم
رآى فهد عند مكتب أحد الموظفين يتعامل بطلاقة مع الفريق مبتسمًا بطريقة أثارت غضب معاذ فورًا
اقترب منه صوته منخفض لكنه يملؤه التهديد:
إيه اللي بتعمله هنا بالظبط؟
رفع فهد رأسه لم يُخفي انزعاجه لكنه شعر بالتيار المشحون من معاذ
أنا هنا عشان التدريب... زي أي حد من زمايلي.
تقدم معاذ خطوة،عيناه تحدّقان فيه ....كل كلمة خرجت منه كأنها جدار حديدي:
خد بالك الشغل هنا مش هزار و لا مكان تتعرف فيه علي بنات ...ركّز في تدريبك و بس بدل ماتوقع نفسك في مشاكل.
ابتسم فهد بسخرية يحاول تخفيف التوتر ثم قال بثبات:
مفيش داعي لكل ده يا دكتور معاذ... أنا بس بتعامل مع الكل باحترام ...و شرين الوحيده اللي معايا هنا من الدفعه بالنسبالي زميلة مش اكتر .
زميلة..
قاطعه معاذ بصوت هاديء لكنه مشحون بالغضب المكبوت
اسمع... أنا مش هسمح لأي حد يفتكر إنه يقدر يقرب من اي موظفه هنا سواء هي او غيرها... ولا بالكلمة... ولا بالنظرة... ولا بأي حاجة
توقف للحظة ألقى نظرة واحدة على فهد جمّده في مكانه:
دي فرصة ليك تحافظ على نفسك و علي مستقبلك
أي محاولة لخفه دم او تعمل نفسك الواد اللي مفيش منه
هتندم قبل ما تعرف ليه.
شعر فهد فجأة أن الجو كله ضده لم يكن يعرف إن الغيرة ممكن تظهر بهذا الشكل فقد كان يَشُك في أمره منذ فتره
نظرات معاذ لم تحوي غضب عشوائي...
كانت دقيقة مركّزة مدروسة... لكنها تصنع الرعب في كل حركة
ابتعد معاذ خطوة للخلف حافظ على هدوئه الظاهري لكنه ترك الرسالة واضحة
فاهم ؟
أنا موجود وبراقب كل حاجة
أومأ له دون ان يتفوه بحرف واحد يعلم أن هذه المواجهة ليست مجرد تهديد عادي...
معاذ لم يكن بحاجة ليصرخ أو يثبت شيء...
غياب الابتسام لرد الفعل الطبيعي كان أقوى من أي تهديد لفظي
غادر هذا المختل المكان خطواته هادئة لكنه يشعر بأن قلبه يغلي
كان يعرف أن المهمة الأساسية لم تنته بعد.... حماية شيرين بأي ثمن مهما حدث مهما كانت الطريقة
خرج معاذ من مكتب فهد لكنه لم يستطع ان يبعد عينيه عن شيرين
كانت جالسة على مكتبها تكتب في ملفاتها بهدوء غير مدركة لما حدث للتو
اقترب منها خطواته ثابتة وصوت قلبه يخبره أنه لن يسمح بأي تجاوز
صباح الخير...
قالها بصوت منخفض لكن كل كلمة مليانة حذر
رفعت رأسها ابتسمت له بطبيعتها المرحة
صباح النور... إيه أخبارك يا دكتور
ابتسم ابتسامة قصيرة لكنه لم يكن مبتسمًا من قلبه بل ابتسامة متحفظة، متوترة
وقف بجانبها نظراته تتفحص كل حركة لها وكأنها تقول:
أنا هنا... ولا حد يقدر يقرب منك
مش محتاجه حاجه... لو محتاجة أي حاجة
أي مساعدة أي معلومة...
أنا موجود
التفتت إليه بدهشة ثم قالت:
حاضر... شكرًا يا دكتور!
لم تستطع منع شعورها بأن شيئًا تغير شيء لم تفهمه بعد
جلس بجانبها حافظ على مسافة مهنيّة لكن كل جزء منه كان يراقبها يحميها بصمت
طب... خلينا نبتدي بالشغل على الملفات دي
قالها بنبرة طبيعية لكنه في داخله يغلي
في نفس الوقت فهد كان بعيدًا في ردهات الشركة
يخزّن إحساسه بالغضب والارتباك من المواجهة
لم تكن التهديدات المباشرة مجرد كلمات
كانت جدارًا واقعيًا حمى شيرين من أي اقتراب
شيرين لاحظت شيئًا في عينيه شيء لم تراه من قبل
دكتور .....هو في حاجه؟!
حاجه ايه؟
رد بسرعة محاولًا تهدئة أي فضول
كل حاجة تمام... ركزي في شغلك
لكن النظرة لم تختفِ
الغيرة المكبوتة الحماية الزائدة
كلها كانت واضحة... غصب عنه
كان يعلم أن هذا اليوم لن يكون الأخير
وأن كل دقيقة تقضيها شيرين بجوار فهد ستكون امتحانًا لغضبه وتحكمه في نفسه ورغبته في حمايتها مهما حدث
فليعينه المولى علي القادم.....
ماذا سيحدث يا ترى
سنري
انتظروووووني
بقلمي / فريده الحلواني
تكملة الرواية من هناااااااا
لمتابعة باقى الرواية زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كاملةمن هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هناااااا
تعليقات
إرسال تعليق