رواية جيران اخر زمن الفصل الثاني 2بقلم حبيبه منصور حصريه
رواية جيران اخر زمن الفصل الثاني 2بقلم حبيبه منصور حصريه
الفصل التاني
=مصيبة ايه
ادم ب نبره سريعه :
- تعالي بسرعه يا ليل
و قفل ف وشها السكه من قبل ما يسمع ردها
ليل بصت ل امين الشرطه بنفاذ صبر
= حتى المحضر مش عارفه اعملوا منو من كتر المصايب اللي بتنزل عليا منهم
الامين بص لها ب ضحك و قال:
- طب المصيبه بقى تستدعي انك تاخدي المباحث ولا لا
ليل ب قلة حيله
= معرفش ، بس عموماً هما اي حاجه بيعملوها محتاجه أمن الدوله مش مباحث بس
الامين بص لها و سألها :
- طب هتعملي المحضر ولا ايه
= اما اشوف المصيبه الجديده عشان يبقى محضر واحد بقى
خرجت ليل من القسم ، و ركبت تاكسي يوديها ل هذه العماره الملعونه ، اللي مشافتش فيها راحه من ساعة ما جت
===============================
« في عمارة 4 »
التاكسي وقف على أول الشارع، وليل نزلت وهي بتدفع الأجرة وبتنفخ بزهق، بس أول ما رفعت عينها ناحية العمارة، خطواتها اتجمدت مكانها!
كان في عربية بوليس واقفة قدام الباب وأم عبير ومدام وفاء وباقي الجيران واقفين في المدخل بيتكلموا بصوت عالي وإيديهم بتتحرك بهستيريا قدام شاب طويل وعريض، لابس تيشيرت أسود وبنطلون جينز وواقف حاطط إيده في جيبه بمنتهى البرود
ليل بلعت ريقها وقربت بسرعة، وأول ما آدم شافها جاية، جري عليها وهو ماسك قطته "مشمش" في حضنه ووشه مخطوف:
– أخيراً جيتي يا دكتورة! الحقينا، العمارة اتقلبت بقى فيها عصابات! وحراميه
ليل بصت للشاب الغريب ورجعت بصت لآدم بذهول:
– في إيه يا بني آدم؟ مين ده؟ وإيه اللي جاب البوليس؟
آدم همس برعب:
– ده واحد غريب جاي من بره، جايب كراتين وشنط سودة كبيرة ومعاه رجالة شكلهم يخوف، وطلع يكسر باب الشقة التالتة اللي في الدور التالت! أم عبير شافت معاه شنطة تقيلة أوي، وبيخبط و يكسر الشقه فصوتت وقالت ده حرامي أو بلطجي وجاي يسرق حد من العمارة، ومدام وفاء طلبت البوليس فوراً!
ليل بصت للشاب الغريب بتركيز.. ملامحه حادة و فيها نوع من البرود ، عيونه فيها ثقة غريبة ومستفزة، ومش مهزوز نهائي من صوت زعيق أم عبير اللي جايب آخر الشارع!
أم عبير أول ما شافت ليل، جريت مسكت في دراعها:
– شوفتي يا دكتورة؟! شوفتي المصيبة اللي جت لنا من بره؟ بيجيبولنا مجرمين يسكنوا معانا! ده أنا قلبي هيقف من الخوف!
في اللحظة دي، أمين الشرطة اللي نزل من البوكس قرب من الشاب وقاله بجدية:
– بطاقتك يا أستاذ لو سمحت، السكان هنا مبلغين إنك مقتحم العمارة وبتحاول تتهجم على الشقه
الشاب ابتسم ابتسامة جانبية خفيفة، ومد إيده في جيبه وطلع محفظته، بس بدل ما يطلع بطاقة، طلع "كارنيه" وفتحه قدام أمين الشرطة.
الأمين أول ما شاف الكارنيه، اتنفض وضرب تعظيم سلام في ثانية:
– تمام يا سيف باشا! آسفين جداً يا فندم، إحنا منعرفش إن حضرتك اللي بتنقل هنا!
المدخل كله سكت في لحظة واحدة! صوت نفس مبقاش مسموع.
أم عبير فتحت بقها بذهول:
– سيف... باشا؟!
سيف بص لأمين الشرطة بهدوء:
– ولا يهمك يا باشا، شوف شغلك واتفضل انت.
أمين الشرطة مشي وركب البوكس، وسيف لف وبص لسكان العمارة واحد واحد بنظرة خلتهم كلهم يبلعوا ريقهم ويرجعوا لورا خطوة، وبعدين قال بنبرة هادية بس كلها تحذير:
– أنا الرائد سيف.. رئيس مباحث القسم، وده سكني الجديد في الدور التالت. والشنط اللي شفتوها دي فيها كتبي وأجهزتي .
بص ل ام عبير
- يعني ولا سفاح!
و رجع بص ل وفاء
- ولا حرامي
وياريت بعد كده محدش يركز مع شنط حد عشان منعملش لبعض محاضر إزعاج!
عم صابر البواب جري عليه وهو بيضحك بتوتر:
– يا أهلاً وسهلاً بسعادة الباشا! منور العمارة كلها يا فندم، ده إحنا في أمان ربنا ثم أمان حضرتك!
سيف هز راسه ، ولسه هيلف عشان يطلع السلم، عينه وقعت على "ليل" اللي كانت واقفة على جنب بتتفرج على المسرحية دي كلها وهي رافعة حاجبها وبتضحك بسخرية على منظر الجيران.
سيف وقف لحظة وبصلها باهتمام.. ملامحها الهادية ونظرتها الذكية لفتت انتباهه وسط الزحمة والهيصة دي كلها. قرب منها خطوتين وقال بنبرة أهدى بكتير:
– مساء الخير.. حضرتك من سكان العمارة هنا؟
ليل ردت ببرود وهي بتبص لشنطتها:
– للأسف أيوة.. دكتورة ليل، جارتك في الدور التالت.
سيف ابتسم ابتسامة خفيفة وهو بيبص لأم عبير اللي بتبصلهم بفضول:
– أهلاً يا دكتورة.. واضح إننا هنشوف أيام لطيفة أوي في العمارة دي.
ليل بصتله من فوق لتحت وقالت بسخرية:
– لو قدرت تكمل فيها أسبوع من غير ما تروح القسم تعمل محضر فيهم، ابقى قولي!
سابتهم وطلعت على السلم، وسيف فضل واقف مكانه بيبص عليها وهي طالعة وابتسامته بتوسع، حاسس إن الجيرة في الدور التالت مش هتكون مملة أبداً!
===================================
صباح تاني يوم في عمارة 4، الهدوء كان مسيطر على السلم لأول مرة من تلات أسابيع.. السكان كلهم تقريباً لسه تحت تأثير صدمة إمبارح، ومحدش جرؤ يطلع حس بعد ما عرفوا إن الدور التالت بقى فيه "رئيس مباحث"
ليل كانت نازلة من شقتها بدري، لابسة لبس عملي بسيط وشعرها مرفوع بعشوائية لطيفة، وماسكه في إيدها شنطتها وبتبص في ساعتها بتركيز عشان متتأخرش على المشرحة.
لسه بتقفل باب شقتها بالمفتاح، سمعت صوت باب الشقة التالتة اللي في الوش بيتفتح، وطلع منه "سيف" وهو لابس بدلة رسمية وبيظبط ياقة قميصه بتركيز. أول ما شافها وقف ثانية، وبصلها بنظرة سريعة فيها هدوء ورسمية:
– صباح الخير.
ليل لفت وبصتله، رفعت حاجبها باستغراب من هدوء العمارة ومن روقانه:
– صباح النور.. واضح إنك نمت كويس، محدش خبط عليك الساعة اتنين بالليل يسألك عن قطته؟
سيف ابتسم ابتسامة جانبية خفيفة وهو بيقفل بابه بالمفتاح:
– لا والله، الظاهر إن وجودي عمل مفعول السحر.. العمارة كلها عاملة وضع الصامت من إمبارح.
ليل ابتسمت بسخرية خفيفة ومشيت ناحية السلم:
– متفرحش أوي، ده هدوء ما قبل العاصفة.. بكرة يتعودوا عليك وتلاقي جارتك اللي في التاني في مطبخك بتطمن إنك مش حرامي!
سيف ضحك بهدوء ومشى جنبها وهما نازلين السلم، بس فجأة سمعوا صوت باب شقة أم عبير اللي وراهم بيتفتح بالراحة وتقفل تاني بسرعة أول ما شافتهم نازلين سوا. سيف بص لفوق بطرف عينه باستغراب، وبعدين بص لليل وقال بنبرة فيها فضول :
– هما السكان هنا طول الوقت مراقبين بعض كده؟ ده أنا حسيت إني في كمين إمبارح.
ليل ضحكت بسخرية:
– إمبارح ده كان استفتاح بسيط، إنت لسه مشفتش حاجة.
نزلوا لأول السلم، وسيف وقف لحظة وبصلها باهتمام وهو بيعدل ساعته:
– بس غريبة شوية، دكتورة تجميل ونازلة الساعة 7 الصبح؟ هي العيادات بتفتح بدري أوي كده اليومين دول؟
ليل اتوترت ثانية من جواها، بس رسمت البرود فوراً وبصت قدامها وهي بتكمل نزول:
– أصل عندي... مؤتمر طبي النهاردة الصبح بدري، تحضيرات وكده.
سيف هز راسه بتفهم وهو لسه باصص عليها بفضول خفيف:
– بالتوفيق يا دكتورة.
سابته ليل وسبقته للشارع وهي بتتنفس براحة إنها عرفت تهرب من سؤاله، وسيف نزل وراها وركب عربيته وهو حاسس إن الجارة الهادية اللي في الوش دي وراها حاجة غامضة مش مفهومة!
=============================
في مشرحة زينهم
ليل كانت واقفة قدام ترابيزة التشريح، مركزة في الجثة اللي قدامها، والمساعد واقف جنبها بيسجل كل ملاحظة بتقولها.
ليل وهي بتراجع الصور:
= طيب، قولي إيه اللي اتسجل معانا لحد دلوقتي؟
المساعد:
- آثار ضغط حوالين الرقبة، كدمات متفرقة في الذراعين، وخدوش في إيديها، خصوصًا اليمين.
ليل:
= والعينات اللي اتاخدت من تحت الضوافر؟
المساعد:
- اتبعتت المعمل، ولسه مستنيين النتيجة.
ليل هزت راسها وهي بتقرب من الجثة:
= تمام... عايزة كل إصابة تتصور لوحدها، ومش عايزة أي تفصيلة تتساب من غير ما تتوثق
المساعد:
- حاضر يا دكتورة.
ليل فضلت تفحص الدراع اليمين، لحد ما وقفت عند منطقة الرسغ (اول كف الايد) ، وطلبت منه يقرب الإضاءة.
ليل:
= استنى شوية... شايف العلامة دي؟
المساعد قرب وبص:
- أيوه، دي كدمة؟
ليل:
= غالبًا، بس محتاجة تتفحص كويس. مكانها وشكلها ممكن يكون ليهم دلالة، خصوصًا مع باقي الإصابات اللي عندنا.
المساعد:
- يعني ممكن تكون اتعرضت للشد أو المسك؟
ليل:
= ممكن، بس مش هنفترض حاجة قبل ما نكمل الفحص.
رجعت تبص للملابس، ووقفت عند الجزء المقطوع من الكم.
ليل:
= هو الجزء ده اتصور قبل ما نبدأ؟
- أيوه يا دكتورة، واتحفظت الملابس زي ما هي.
= كويس. عايزة نفحص مكان القطع ونشوف إذا كان فيه ألياف غريبة أو أي آثار ممكن تفيدنا.
سكتت لحظة، وبعدين بصت للمساعد:
= وبالنسبة للغرق، لسه مش عايزة حد يكتب إنه سبب الوفاة قبل ما نخلص فحص الأعضاء ونراجع كل النتائج.
- مفهوم يا دكتورة.
ليل رجعت لملف الحالة، وكتبت ملاحظاتها قبل ما تقفله.
= ابعتوا التقرير المبدئي للمباحث، واكتبوا بوضوح إن سبب الوفاة النهائي لسه تحت الفحص.
---
في نفس الوقت – مكتب رئيس المباحث
سيف كان قاعد ورا مكتبه، قدامه ملف القضية وصورة المجني عليها، بيقلب في الأوراق بتركيز.
دخل أمين الشرطة وخبط على الباب.
سيف من غير ما يرفع عينه:
- اتفضل.
الأمين:
= جمعت لحضرتك تفاصيل عن المجني عليها.
سيف رفع عينه:
- قول.
= اسمها مريم عادل، عندها 24 سنة، وكانت ساكنة مع والدتها، ووالدتها بتقول إنها خرجت من البيت من يومين ومارجعتش.
سيف:
- وبلغت عن اختفائها؟
الأمين:
= لا يا فندم.
سيف رفع حاجبه:
- يعني بنت غايبة عن البيت يومين، وأهلها مستنوش حتى يحرروا محضر؟
الأمين:
= الأم بتقول إنها متعودة تتأخر، وإنها كانت فاكرة إنها عند واحدة صاحبتها.
سيف رجع بص للصورة اللي قدامه:
- طب وصاحب البلاغ؟
الأمين:
= الصياد اللي لقاها، أقواله الأولية إنه كان بيصطاد وقت الفجر، ولاحظ حاجة طافية في الميه، ولما قرب اكتشف إنها جثة.
سيف:
- عايز أقواله بالتفصيل، ومش عايز الكلام اللي اتكتب في المحضر وخلاص. عايز أعرف تحركاته من وقت ما نزل يصطاد لحد ما بلغ.
الأمين:
= تمام يا فندم.
سيف رجع يتأمل صورة المجني عليها، وبعدين قال:
- وفي حاجة تانية... عايز أعرف آخر شخص اتكلم معاها، وآخر مكان ظهرت فيه قبل اختفائها.
الأمين:
= حاضر.
سيف بص له
ـ وانا هروح بقى عشان فصلت كده
====================
ليل كانت قاعدة على الكنبة في الصالة، لابسة بيجامة وشعرها مرفوع بتوكة، ماسكة مج شاي بالنعناع وبتكلم مامتها في التليفون وهي بتضحك من قلبها:
– والله يا ماما ما ببالغ! العمارة دي محتاجة يتعمل عليها دراسة نفسية.. تخيلي إمبارح السكان طلبوا البوليس عشان افتكروا الساكن الجديد حرامي وبيكسر الشقة، وفي الآخر طلع رئيس مباحث القسم بحاله!
مامتها (مدام سلوى) بضحك:
– يا ساتر يا بنتي! إيه العمارة اللي كلها أكشن دي؟ طب والظابط ده طلع كويس ولا عامل زيهم؟
ليل ابتسمت تلقائياً وهي بتفتكر وقفته الهادية وبروده قدام صريخ أم عبير:
– لا، ده شكله هادي وعاقل أوي، ووجوده بصراحة جاب نتيجة والعمارة هديت شوية من إمبارح.. بس يا عالم هيستحملهم لقدام ولا هيطفش هو كمان.
مامتها قالت بنبرة دافئة:
– ربنا يكفيكي شر المشاكل يا حبيبتي، المهم خلي بالك من نفسك ومتتأخريش بره لوحدك، و عمك و ستك بيسلموا عليكي وبيقولولك لو احتجتي أي حاجة كلمينا علطول.
قفلت ليل مع مامتها وهي حاسة براحة، ولسه بتقوم عشان تدخل أوضتها تنام، سمعت فجأة صوت خبط رزع جامد على باب شقتها، وصوت "آدم" جاي من بره وهو بيصرخ بلهفة:
– يا دكتورة ليل! افتحي بسرعة أرجوكي!
ليل غمضت عينيها بنفاذ صبر وتنهدت بعمق:
– يارب الصبر.. ما لحقتش أقول العمارة هديت!
فتحت ليل الباب بغيظ، فلقيت آدم واقف شايل قطته "مشمش" اللي بتتنفض من الخوف، ومعاه مدام وفاء وأم عبير واقفين على السلم بيتكلموا بصوت عالي!
ليل بصتلهم بذهول:
– خير في إيه تاني الساعة 1بالليل؟!
آدم مد إيده بالقطة ناحية ليل وهو وشه مخطوف:
– الحقيني يا دكتورة! مشمش نط من البلكونة على سور المنور واتخبط في راسه، وشايف جرح صغير فوق عينه.. إنتي دكتورة تجميل، أرجوكي خيطيهوله عشان ميسبش أثر في وشه ويبوظ شكله!
ليل بلمت وبصت للقطة وبعدين بصت لآدم كأنها مش مصدقة اللي بتسمعه:
– أخيط إيه؟! يا بني آدم أنا دكتورة بني آدمين مش دكتورة بيطرية! إيه الجنان ده؟!
أم عبير نطت في الكلام بحماس:
– جرى إيه يا دكتورة ليل، ما هو كله تجميل وغرز! اعملي ثواب في الحيوان الغلبان ده بدل ما يتشوه!
مدام وفاء هزت راسها بموافقة:
– أيوة صحيح، وبعدين إنتي أصلًا مبتعمليش حاجة هنا، ورينا شطارتك!
في اللحظة دي، باب شقة "سيف" اللي في الوش اتفتح بهدوء، وطلع سيف ، عاقد حواجبه باستغراب من الدوشة اللي قدام بابه:
– في إيه يا جماعة؟ الصوت واصل لآخر الشارع، في خناقة ولا إيه؟
أول ما الجيران شافوا سيف، سكتوا في ثانية وبلعوا ريقهم بتوتر!
سيف بص لليل اللي واقفة على باب شقتها وشعرها منكوش شوية ووشها أحمر من كتر الغيظ، وكتم ضحكته بالعافية وهو بيبص للقطة اللي في إيد آدم:
– خير يا أستاذ؟ مالك واقف بالقطة كده ليه؟
آدم رد بتوتر وهو بيرجع لورا خطوة:
– مـ.. مفيش يا سيف باشا، أصل مشمش اتعور وكنت بطلب من الدكتورة ليل تعمله غرز تجميل.
سيف رفع حاجبه بذهول وبص لليل اللي كانت بتبصله بنظرة معناها "شايف الناس اللي عايشة معاها؟!"، فحاول سيف يمسك نفسه من الضحك وقال بجدية مصطنعة وهو بيبص لآدم:
– غرز تجميل لقطة؟! يا أستاذ في عيادة بيطرية على أول الشارع فاتحة 24 ساعة، روح هناك فوراً وسيبوا الدكتورة ترتاح شوية!
وبص لأم عبير ومدام وفاء بنظرة هادية بس حازمة:
– وإحنا اتفقنا إمبارح إننا مش هنعمل دوشة في العمارة تاني، صح؟
مدام وفاء وأم عبير هزوا راسهم بسرعة:
– طبعاً يا باشا، تصبحوا على خير!
كل واحد جري على شقته في ثواني، والسلم فضي تماماً في لحظة واحدة!
ليل بصت للسلم الفاضي بذهول، وبعدين بصت لسيف اللي واقف حاطط إيده في جيبه وبيضحك بصوت هادي وهو بيبصلها:
– إيه رأيك فيا؟
ليل ضحكت غصب عنها وسندت على باب شقتها وقالت بسخرية:
– والله إنت وجودك في الدور ده رحمة من عند ربنا.. أنا بقالي تلات أسابيع بحاول أفض التجمعات دي لوحدي ومبعرفش!
سيف ابتسم وبصلها باهتمام لطيف:
– أي وقت يضايقوكي أو يطلبوا منك غرز تجميل للحيوانات الأليفة، إديهم رنة على بابي بس.. تصبحي على خير .
ليل ابتسمت بهدوء:
– وإنت من أهله
==============================
دخل سيف شقته، وليل دخلت شقتها وقفلت الباب وراها، ولسه بتتحرك ناحية أوضتها...
قطع الهدوء صوت صرخة عالية جاية من شقة أم عبير!
– ااااااااااااه!!!!
ليل اتنفضت مكانها وبصت ناحية الباب:
= هو مفيش يوم يعدّي على خير في العمارة دي؟!
وفي ثواني، باب شقة أم عبير اتفتح، وخرجت مدام وفاء من شقتها وهي بتجري، وآدم فتح بابه وبص في الطرقة بقلق، وعم صابر طلع من تحت وهو بيجري على السلم.
و باقي الجيران خرجوا
سيف خرج من شقته بسرعة، وليل خرجت وراه.
سيف:
– في إيه؟! إيه الصوت ده؟!
مدام وفاء وهي بتجري:
– معرفش يا باشا، الصوت جاي من عند أم عبير!
ليل:
= طب يلا نشوف فيها إيه بدل ما نفضل واقفين!
الكل اتجمع قدام شقة أم عبير، وسيف خبط على الباب بقوة:
– يا مدام أم عبير! افتحي، في إيه؟!
مفيش رد، لحد ما الباب اتفتح فجأة...
وظهرت أم عبير واقفة قدامهم، وشها مخطوف وعينيها مليانة دموع، وإيديها بتترعش وهي بتشاور لجوه الشقة.
يتبع.........
#جيران_اخر_زمن
تكملة الرواية بعد قليل
تعليقات
إرسال تعليق