القائمة الرئيسية

الصفحات

translation
English French German Spain Italian Dutch Russian Portuguese Japanese Korean Arabic Chinese Simplified

رواية جيران اخر زمن الفصل الخامس 5بقلم حبيبه منصور حصريه

 رواية جيران اخر زمن الفصل الخامس 5بقلم حبيبه منصور حصريه






 




 رواية جيران اخر زمن الفصل الخامس 5 بقلم حبيبه منصور حصريه



البارت الخامس.


فضلت ليل باصة لهم من غير ما تنطق، وعينيها بتتنقل بينهم كأنها بتحاول تفهم هما مين وإيه اللي جابهم عندها.

وفاء قربت منها خطوة، واتكلمت بصوت هادي:

- أنا وفاء يا ليل... جارتك، إحنا ساكنين في نفس العمارة.

ليل فضلت ساكتة، لا هزّت راسها ولا حتى ردّت عليها.

أم عبير حاولت تدخل في الكلام:

- وأنا أم عبير يا حبيبتي، انتي عارفاني كويس... إحنا كلنا جيرانك.

بصتلها ليل للحظات، وبعدها رجعت بعينيها للسقف.

آدم بص للدكتور بقلق:

- يعني إيه يا دكتور؟ هي مش فاكرة حد فينا خالص؟

الدكتور رد بهدوء:

- واضح إن عندها اضطراب في الذاكرة بعد الإصابة والعملية. وده ممكن يحصل في بعض الحالات، لكن لسه بدري نحكم إذا كان مؤقت ولا هيحتاج وقت أطول.

سيف كان واقف جنب السرير، ساكت من وقت ما ليل فتحت عينيها. قرب منها شوية :

- انتي بس ارتاحي دلوقتي، ومتفكريش في أي حاجة. إحنا مش هنسيبك.

ليل ماردتش، فضلت باصة قدامها بشرود، وإيديها متشبثة بطرف الغطا.

وفاء مسحت دموعها بسرعة وبصت للدكتور:

- طب هي هتفضل كده كتير؟

- صعب أحدد دلوقتي. محتاجين نتابع حالتها ونشوف استجابتها خلال الفترة الجاية، والأهم إنها ترتاح ومحدش يضغط عليها بأسئلة أو يحاول يفكرها بأي حاجة بالعافية.

آدم هز راسه:

- حاضر يا دكتور.

في اللحظة دي، سيف خرج موبايله وبص لآدم:

- أنا هتصرف في موضوع العلاج والحاجات اللي ناقصاها، وإنت خليك معاهم هنا.

آدم رد عليه:

- ماشي، بس متتأخرش.

خرج سيف من الأوضة، وفضل آدم ووفاء وأم عبير واقفين جنب السرير، مش عارفين يقولوا إيه ولا يتصرفوا إزاي.

أما ليل، فكانت ساكتة تمامًا... بتسمع كل كلمة بتتقال حواليها، وعينيها ثابتة على نقطة واحدة.

======================================

في الطريق للقاهرة...


العربية كانت ماشية على الطريق، توفيق سايق وخالد قاعد جنبه، وفي الكنبة اللي ورا سلوى وأحمد.


سلوى من وقت ما خرجوا وهي ماسكة موبايلها، كل شوية تبص عليه، وتفتحه تشوف لو فيه اتصال، وبعدين ترجعه تاني.


خالد بص لها من المراية:


- انتي كلمتي المستشفى تاني؟


- لأ، أنا كلمت سيف قبل ما نتحرك، قال لي إنها لسه تحت الملاحظة.


توفيق سألها:


- والدكتور طمّنك عليها؟


- قال إن حالتها مستقرة، بس محتاجة متابعة.


سكتت شوية، وبعدين قالت:


- أنا مش عارفة إزاي ده حصل كله وإحنا بعيد عنها... لسه من كام يوم كانت بتكلمني عادي، مكنش في بالي إن ممكن يحصلها حاجة زي دي.


خالد حاول يطمنها:


- الحمد لله إنها عدّت من العملية، وإن شاء الله الباقي يعدّي على خير.


سلوى هزت راسها، وسندت ضهرها، لكن عينيها فضلت على الموبايل.


توفيق قال بضيق:


- وأنا لسه مش فاهم الغفير ده كان فين! مش أنا قايله أول ما يحصل أي حاجة يكلمني؟ هو أنا لازم أعرف من بره؟


خالد رد عليه:


- يا توفيق، خلينا لما نوصل نبقى نشوف الحكاية دي.


- ماشي، بس الموضوع ده مش هعديه كده.


أحمد كان ساكت أغلب الوقت، لحد ما سأل:


- فاضل كتير ونوصل؟


- على حسب الطريق، بس إن شاء الله مش كتير.


سلوى فتحت موبايلها، دخلت على رقم سيف، وفضلت باصة له لحظات قبل ما تقفله من غير ما تتصل.

================================= 

في البيت...


نورا كانت قاعدة مع زينب في الصالة، وكل شوية تبص ناحية الباب.


- هو أحمد مردش عليكي؟


زينب هزت راسها:


- لسه، بس هما أكيد في الطريق دلوقتي.


- كنت عايزة أروح معاهم، مش عارفة ليه عمي توفيق أصر إننا نقعد.


- قال إننا نفضل في البيت، ومش عايزنا نتحرك لحد ما يطمن على ليل. وبعدين لو عرفوا حاجه هيقولولنا 


نورا سكتت، وبعدها قالت:


- ربنا يطمنهم عليها.


==============]=====

في العربية...


رن موبايل سلوى فجأة، فبصت للشاشة وردت بسرعة.


- أيوه يا سيف؟

كان صوته جاي هادي:

- إحنا كنا لسه عندها دلوقتي، وحبيت أبلغك إن فيه حاجة حصلت.

سلوى اعتدلت في قعدتها:

- خير؟ ليل مالها؟

- هي فاقت من شوية، والدكتور كان موجود، وخلانا ندخل نطمن عليها.

سلوى اتنفست براحة

- الحمد لله يا رب... طب هي كويسة؟ اتكلمت؟

سيف سكت لحظة، وبعدين قال:

- اتكلمت، بس .....

سلوى بتوتر: 

= بس ايه ؟؟ 

سيف ب حزن 

: مش فاكره اي حد 

سلوى ما ردتش، كأنها مستنية يكمل.

- الجيران حاولوا يعرفوها بنفسهم بس ليل فضلت باصة ومردتش. ولما الدكتور سألها إذا كانت فاكرة أي حد، قالت إنها مش فاكرة حاجة.

إيد سلوى شدت على الموبايل:

- مش فاكرة؟ يعني إيه مش فاكرة؟ طب هي... هي مش عارفاني أنا كمان؟

- لسه محدش يعرف، هي ماجتش سيرتك في الكلام، والدكتور قال إننا نستنى لما تشوفيها بنفسك، ومحدش يضغط عليها.


سلوى بصت قدامها، وعينيها بدأت تدمع:

- طب هي كانت بتتكلم إزاي؟ كانت خايفة؟ كانت بتعيط؟

- لأ، كانت ساكتة أغلب الوقت، ومش بترد غير على قد الكلام اللي بيتقال لها.

سلوى نزلت الموبايل شوية، وبعدين رجعته على ودنها:

- خليكوا جنبها لحد ما نوصل، أنا خلاص مش قادرة أستنى أكتر من كده.

- متقلقيش، إحنا معاها.

انتهت المكالمة، وسلوى فضلت باصة للموبايل، من غير ما تقول حاجة.

أحمد لاحظ دموعها:

- فيه إيه؟ قالك إيه؟

سلوى أخدت نفس طويل، وقالت بصوت واطي:

- ليل فاقت... بس مش فاكرة حد.

خالد لف ناحيتها:

- طب والدكتور قال إيه؟

- قال نستنى، بس... أنا خايفة لما أدخل عليها متعرفنيش. 

قلبي مش هيستحمل 

توفيق بص لها من المراية، ولأول مرة من ساعة ما خرجوا ملاقاش كلام يقوله.  

أما سلوى، ففضلت طول الطريق ماسكة موبايلها، وكل اللي بتفكر فيه لحظة دخولها أوضة بنتها... وهل هتلاقي نفس البنت اللي سابتها، ولا هتبقى غريبة عنها 

==================================

في المستشفى...


كان آدم ووفاء وأم عبير وسيف واقفين في أوضة ليل، وكل واحد فيهم متابعها من مكانه. ليل كانت ساكتة، عينيها مفتوحة لكنها مش بتشاركهم الكلام، وكل ما حد يحاول يكلمها تكتفي ببصة قصيرة وترجع تبص قدامها.

دخل الدكتور وهو بيبص في الملف اللي معاه:

- إزيك يا ليل؟ عاملة إيه دلوقتي؟

مردتش، فاكتفى إنه يراجع العلامات الحيوية ويسأل الممرضة عن آخر تطورات حالتها، وبعدها التفت للموجودين:

- يا جماعة، المريضة محتاجة راحة، ومش مسموح يكون فيه أكتر من شخص واحد معاها في الأوضة. الباقي ياريت يستنى بره، والزيارة تكون على فترات حسب حالتها.

أم عبير اتكلمت بسرعة:

- طب أنا ممكن أفضل معاها يا دكتور، أنا قريبة منها وبعرف أتعامل معاها.

وفاء اعترضت:

- وأنا كمان ممكن أفضل، أنا أكتر واحدة بتتعامل معاها في العمارة.

آدم قرب من السرير:

- خلاص يا جماعة، أنا اللي هفضل. إنتوا روحوا وأنا هبقى معاها لحد ما أهلها يوصلوا.

سيف رد عليه:

- إنت عندك شغلك ومش هتعرف تفضل طول الوقت، أنا أقدر أقعد.

وفاء بصت لسيف:

- ما هو إنت من أول الحادثة معاها، روح ارتاح شوية، إحنا ممكن نتقسم.

الدكتور قاطعهم بهدوء:

- يا جماعة، الموضوع مش محتاج كل ده. هي محتاجة حد واحد بس يكون موجود، ويفضل يكون شخص هادي ومش هيضغط عليها بالكلام. ولما أهلها يوصلوا نقدر نرتب معاهم الوضع.

آدم بص لوفاء وأم عبير:

- خلاص، أنا هفضل. إنتوا روحوا، وأول ما أهلها يوصلوا هبلغكم.

سيف فكر لحظة، وبعدها قال:

- أنا هفضل لحد ما أهلها يوصلوا، أنا اللي معاها من أول ما حصلت الحادثة، وعارف تفاصيل اللي حصل.

آدم هز راسه:

- ماشي، بس أول ما تحتاج أي حاجة كلمني.

الدكتور أشار لهم ناحية الباب:

- تمام، اتفقنا. ياريت الباقي يخرجوا دلوقتي ونسيبها ترتاح.

خرجت وفاء وأم عبير وآدم، وفضل سيف معاها في الأوضة.

قبل ما الباب يتقفل، وفاء بصت ناحية ليل وقالت بصوت واطي:

- سلامتك يا ليل، هنطمن عليكي بكرة.

ليل فضلت ساكتة، وعينيها تابعتهم لحد ما الباب اتقفل.

سيف رجع الكرسي اللي جنب السرير وقعد عليه، وبص لها:

- متشغليش بالك بحاجة دلوقتي، ارتاحي بس.

لكن ليل ما ردتش، فضلت باصة للسقف، وهو فضل قاعد جنبها مستني وصول أهلها 

==================================== 

كانت حنين واقفة وسطهم، لكن مع انشغال الكل بالكلام، استأذنت بهدوء:

- هروح الحمام وراجعة.

محدش اهتم، وكملت طريقها لحد آخر الطرقة، بعيد عن دوشة الاستراحة. وقفت في مكان هادي، وطلعت موبايلها، وبعد لحظات كانت بتتكلم بصوت واطي.

فضلت شوية، وبعدها قفلت المكالمة ورجعت تحط الموبايل في شنطتها.

في نفس الوقت، كان آدم واقف عند باب الأوضة، ولما لمحها ناداها:

- حنين!

لفّت ناحيته بسرعة، واتخضت من صوته، لدرجة إنها وقفت مكانها لحظة.

آدم استغرب رد فعلها:

- إيه يا بنتي؟ مالك؟ بنادي عليكي من بدري.

حاولت تلم نفسها وقالت:

- لا، مفيش... ماخدتش بالي.

- تعالي، إحنا هنمشي خلاص.

قربت منه وهي بتظبط شنطتها على كتفها:

- طيب، ثواني وجاية.

- ماشي

دخل آدم ناحية الباقيين، وحنين فضلت مكانها لحظة، أخدت نفس ورجعت وراه كأن مفيش حاجة حصلت.

==================================

كانت سلوى أول واحدة نزلت من العربية، حتى قبل ما توفيق يركنها كويس. دخلت المستشفى بخطوات سريعة، وأحمد وراها، وخالد وتوفيق بيحاولوا يلحقوهم.

أول ما وصلوا للاستقبال، سألت بلهفة:

- لو سمحت، أوضة ليل فين؟ ليل اللي جت هنا الحادثة.

سيف كان واقف بعيد شوية، وأول ما لمحهم اتحرك ناحيتهم.

- مامت ليل؟

لفت له بسرعة:

- سيف! هي فين؟ بنتي فين؟

- جوه، تعالي معايا.

ما استنتش يسمع منها رد، واتحرك قدامهم ناحية الأوضة. سلوى كانت ماشية وراه بسرعة، وقلبها بيدق من أول ما عرفت إن بنتها في المستشفى، وكل اللي في دماغها إنها تشوفها.

وقف سيف قدام الباب وفتحه، وسلوى دخلت قبله تقريبًا. 

أول ما سلوى دخلت الأوضة، عينيها راحت ناحية السرير، وهناك... وقفت الدنيا كلها بالنسبة لها.

ليل

بنتها.

كانت نايمة على السرير، جسمها ساكن بشكل يخوّف، ووشها الشاحب باين عليه التعب. فيه آثار كدمات متفرقة على وشها، وجنب عينها تورم خفيف، وشفتها فيها جرح صغير، وشعرها اللي كانت دايمًا تهتم بيه مبعثر على المخدة. إيدها كانت راقدة جنبها، متوصل فيها المحلول، وأجهزة المتابعة اللي جنب السرير بتطلع أصوات منتظمة وسط هدوء الأوضة.

قربت منها واحدة واحدة، وعينيها بتبص على كل تفصيلة في وشها، كأنها بتحاول تستوعب إن دي فعلًا بنتها اللي سابتها من كام يوم وخرجت من البيت على رجليها، ورجعت لها بالشكل ده.

طلعت منها شهقة موجوعة:

- يا ضنايا...

قعدت جنبها بسرعة، ومدت إيدها تلمس خدها، لكن أول ما شافت آثار الكدمات، إيدها وقفت في الهوا. كانت خايفة حتى لمستها توجعها.

- يا حبيبتي... إيه اللي عمل فيكي كده؟

نزلت دموعها، ومالت عليها تبوس إيدها:

- أنا جيت يا ليل... أنا هنا يا قلب أمك.

فضلت تبص لوشها، وبعدين مسحت بإيدها على شعرها بحنان، تحاول تبعده عن جبينها من غير ما تضايقها.

- افتحي عينك يا بنتي... بصيلي بس.

كانت بتتكلم وهي عارفة إنها مش هتقدر تاخد منها رد، ومع ذلك فضلت تحكيلها كأنها سامعاها:

- أنا كنت مستنياكي ترجعي البيت... كنت مستنياكي تدخلي عليّا وتفضلي تحكيلي زي عادتك... مش مستنياكي هنا يا حبيبتي.

قربت منها أكتر، وحطت إيدها على إيدها:

- طب أعملك إيه دلوقتي؟ أجيبلك إيه؟ أعملك إيه يريحك؟ قوليلي بس...

لكن ليلى فضلت ساكنة، مفيش غير صوت الأجهزة اللي جنبها، وده كان كفاية يخلي سلوى تحس بالعجز أكتر.

رفعت عينيها لوش بنتها تاني، وابتلعت غصتها بصعوبة:

- حتى لو مش قادرة تردي عليّا... أنا جنبك. سامعة؟ مش هسيبك 

عند الباب، كان توفيق واقف ساكت، وخالد جنبه، وأحمد عينه على الأرض. أما سيف، فكان واقف بعيد شوية، سايب لسلوى مساحتها مع بنتها.

سلوى فضلت ماسكة إيد ليلى، وكل شوية تبص لوشها وتمسح دموعها، كأنها بتحاول تخبي عنها وجعها حتى وهي مش عارفة إذا كانت حاسة بيها ولا لأ.

كانت نفسها تاخد عنها التعب كله، ولو للحظة واحدة... بس كل اللي قدرت تعمله إنها تفضل جنبها، وتمسك إيدها.

فضلت تبوس إيدها ووشها، وتمسح على شعرها وهي مش قادرة توقف دموعها

أحمد كان واقف عند الباب، متسمر مكانه، وعينه ما فارقتش ليل من ساعة ما دخل. حاول يقرب، لكن وقف لما لقى سلوى مش سايبة إيدها.

توفيق قرب من السرير 

وخالد وقف جنبه، مش لاقي كلام يقوله.

في اللحظة دي دخل الدكتور، وقال بهدوء:

- معلش يا جماعة، محتاج أتكلم معاكم بره شوية.

=================================

في مكان تاني..

- ها؟ خلصت؟

- أيوه يا فندم، حصل زي ما اتفقنا.

- ماتت؟

- لأ، للأسف... عملت حادثة واتنقلت المستشفى.

- يعني إيه للأسف؟!

- فاقت من شوية، بس الظاهر إنها فقدت الذاكرة... مش فاكرة أي حد.

سكت الرجل للحظات، ثم قال بنبرة غريبة:

- وفاكرة اللي حصل قبل الحادثة؟

- معرفش يا فندم، لسه محدش قدر يتأكد من حاجة.

- اسمعني كويس... أنا مش عايز أي حد يعرف إننا لينا علاقة بالموضوع ده. فاهم؟

- فاهم يا فندم.

- وخليك متابع أخبارها... خصوصًا لو بدأت تفتكر.


يتبع.........

تكملة الرواية بعد قليل 

تعليقات

التنقل السريع