سكريبت كامل روووعه وحصرى
= طب ينفع أعيده؟ أنا عارفاه… والله عارفاه.
الراجل اللي ورا الترابيزة بص للباب.
- شكرًا يا مريم. لو فيه جديد هنكلمك.
فضلت واقفة ثانية، لحد ما البنت اللي بتنادي على الأسماء فتحت للي بعدي.
خرجت والورق في إيدي متكرمش من العرق.
كنت مستنية من بدري، واقفة أراجع المشهد وأبعد عشان كل شوية حد يعدّي.
جوه، نسيت أول جملة.
افتكرتها وأنا نازلة على السلم.
قلتها بصوت واطي، وبعدها عيطت.
الدموع اللي كنت باحاول أطلعها قدامهم، طلعت وأنا ماسكة سور السلم، وباحاول أبعد عن الباب عشان ماحدش يشوفني.
ـــــــــــــــــــــــــــــــ
في البيت، ماما سمعتني باعيد نفس المشهد وأنا باغسل وشي.
- يا بنتي مش دي اللي رفضوكي فيها؟
= أيوه.
- طب ارحميها بقى.
ضحكت، والمية دخلت في مناخيري.
ماما دخلت تطمّن إني مش باعيط.
كنت باكح وباضحك، ومنظري ماكانش يقول إن حد هيختارني لحاجة قريب.
بالليل فتحت الورق تاني.
سماعاتي في ودني، والفيديو اللي فيه تدريب على المشهد واقف عند نفس الثانية.
أرجع.
أسمع.
أقوم أجرب.
ماما خبطت على الحيطة من أوضتها.
وطّيت صوتي، وكملت على همس.
كنت بذاكر التمثيل زي اللي بيحاول يفك حاجة مش راضية تتفتح.
ليه البنت سكتت هنا؟
وليه بتقول إنها كويسة وهي مش كويسة؟
أنا حافظاها، بس لسه مش فاهماها.
الفجر كان بيطلع، وأنا لسه بادوّر على طريقة أقول الجملة كأني بقولها لأول مرة.
ـــــــــــــــــــــــــــــــ
في التدريب، أستاذ عماد وقفني.
- إنتِ مستنية اللي قدامك يخلّص عشان تقولي اللي حافظاه.
= أنا سامعاه.
- طيب هو قالك إيه دلوقتي؟
بصيت للممثل اللي قدامي.
كنت عارفة الجملة اللي عليه.
بس ماكنتش واخدة بالي هو قالها إزاي.
عماد طلب نعيد.
المرة دي سمعته.
سكتُّ، ونسيت الجملة لحظة.
عماد ماوقفنيش.
استنى.
ولما اتكلمت، قال نكمّل.
رجعت البيت اليوم ده تعبانة، وحلقي واجعني، ومبسوطة بحاجة ماما ماعرفتش تشوفها.
قالتلي أخدتي دور؟
قلت لأ.
- أمال فرحانة بإيه؟
= المشهد طلع.
بصتلي شوية، وبعدين ابتسمت.
- طب الحمد لله.
ـــــــــــــــــــــــــــــــ
في كاستينج تاني، دخلت بعد انتظار طويل.
كنت خارجة من محاضرة، وواقفة في الحمام أراجع وأنا باربط شعري.
اللي قابلني سألني عن شغلي قبل كده.
قلت تدريب ومشاهد عملناها في الورش.
هز راسه، وخلّاني أعمل المشهد.
خلصت، واستنيت.
قال إنهم محتاجين حد الجمهور يعرفه.
خرجت وأنا بافكر إني لو كل دور محتاج حد معروف، أنا هاتعرف إمتى؟
على باب البيت، سمعت ماما بتتكلم مع خالتي.
بتعتذر عن غيابي عن اللمّة تاني.
دخلت، وقعدت جنبها بعد ما قفلت.
قالت:
- إنتِ ماوحشتكيش الناس؟
= وحشوني.
- طب تعالي معانا المرة الجاية.
= عندي بروفة.
بصتلي بتعب.
وأنا كنت عارفة إني باختار أغيب عن حاجات بحبها.
بس كل مرة أقول هابطل أجري شوية، ألاقي نفسي بادوّر على ميعاد البروفة اللي بعدها.
ـــــــــــــــــــــــــــــــ
كنت في السنة التالتة من التدريب لما أستاذ عماد ادّاني دور صغير في عرض.
سألته أنا هاطلع أقول الجملتين دول بس؟
بصلي، وأنا استعجلت أوضح إني مش باعترض.
- أنا عارف. إنتِ مستغربة إنك استنيتي كل ده عشان جملتين.
= لأ… أنا خايفة أضيّعهم.
بالليل، ماما مسكت الورق ووقفت قدامي تجرّب معايا.
كانت بتنسى الرد، وأنا أستعجل وأقول جملتي.
ترجع تقول استني، ده أنا لسه ماتكلمتش.
في التالتة ضحكت.
إحنا الاتنين كنا واقفين في الصالة، والساعة داخلة على اتنين.
ماما كانت نعسانة، بس مصممة تعمل المشهد مرة صح.
قالت الجملة.
سمعتها، وردّيت.
ابتسمت، وطوت الورقة.
- كفاية بقى. أنا لو كملت هاطلب دور في المسرحية.
حضنتها، وهي بتقول لي أبعد عشان شعرها دخل في بُقها.
ليلة العرض، وقفت ورا الستارة وركبتي بتتهز.
كنت بافرك صوابعي في بعض، وباتأكد إني فاكرة هادخل منين.
سمعت الجملة اللي قبل دخولي.
طلعت.
شافني واحد في أول صف، فرفعت عيني على الممثل اللي قدامي.
هو اتكلم.
أنا رديت.
ونسيت الناس ثواني.
لما خرجت، كنت باخد نفسي بسرعة، وباضحك.
ماما كانت بتصفّق وهي لسه ماسكة شنطتها على رجليها.
فضلت مستنية أطلع أسلّم مع الفرقة، وأرجع لنفس المكان تاني.
بعد العرض، نزلت على ركبتي ألمّ حاجة وقعت من الديكور.
ريحة الخشب والتراب كانت لازقة في هدومي.
ماكانش نفسي أغيّرهم.
بقعة النور اتقفلت.
عم سيد، الراجل اللي بيقفل المسرح، نده عليّا.
- هانسيبك تباتي هنا؟
= دقيقتين.
- الدقيقتين بتوعك بيبقوا ساعة.
نزلت، وأنا نفسي أرجع تاني يوم.
ـــــــــــــــــــــــــــــــ
في عرض جديد، كنت داخلة أجرب حركة في المشهد.
شدّيت باب الديكور، فالأكرة طلعت في إيدي.
صوت جه من ورا الحيطة الخشب:
- بالراحة، هو لسه ما اتعلّمش يفتح.
بصيت من جنبها.
لقيت واحد قاعد على الأرض، وفي إيده مفك.
مدّيت له الأكرة.
= أنا المفروض أدخل منه.
- وأنا المفروض أخلّيه يدخّلك. ادّيني فرصة.
المخرج نده من آخر القاعة:
- يا باشمهندس نديم، نقدر نجرب؟
نديم بص للأكرة في إيدي.
- بعد التحقيق مع المتهمة.
رفعت إيدي.
= أنا فتحت باب.
- بعزم شديد.
ضحكت.
ساعدته أمسك الجزء الخشب لحد ما خلّص، وأنا باعيد جملتي.
بعد شوية قال:
- هو الشخص ده زعّلك في إيه؟
= مين؟
- اللي إنتِ بتتخانقي معاه من ساعة ما جيتي.
بصيت للورق، وبعدين له.
= دي الشخصية.
- طيب، قولي لها الباب محتاج هدوء.
ـــــــــــــــــــــــــــــــ
بقينا نتقابل في البروفات.
هو بيعدّل في الديكور، وأنا باجرّب المشهد.
مرة حط حاجة في طريق خروجي، فخبطت فيها.
قولتله إني محتاجة المكان ده فاضي.
قام، وطلب مني أمشي الحركة.
جرّبت.
وقفت في النص عشان اتلخبطت.
استنى من غير ما يستعجلني.
وبعدين غيّر مكانها.
كنت باحب إنه بيسمع للي باقوله، حتى لما أكون متوترة وباشرح نفس الحاجة مرتين.
في استراحة، دخل بكوبايتين شاي.
حط واحدة قدامي.
- دي ليكي، والتانية ليا، عشان ماحدش يقول المهندس بيشتغل من غير توقف.
مسكت الكوباية، ولقيتها دافية في إيدي.
كنت بردانة من القاعة، ومشدودة من الصبح.
أول رشفة حرقت لساني.
نديم بصلي.
- هو فيه حد بيجري وراكي؟
= عندي مشهد.
- الشاي مش داخل معاكي.
ضحكت، وحطيته يستنى.
ـــــــــــــــــــــــــــــــ
ليلة العرض، وقفت ورا الستارة، وإيدي باردة.
كنت سامعة الناس بتتحرك بره، وعماد بينادي على آخر تعديل.
نديم خلّص شغله، بس ما مشيش.
وقف على مسافة، وسألني:
- إنتِ ناسية حاجة؟
= كل حاجة.
هز راسه كأنه سمع إجابة معقولة.
قال لي إن إيدي بتخبط في الورق من التوتر، فطويته وحطيته بعيد.
ماقعدش يشرحلي أعمل إيه.
فضل واقف.
ولما اتنده اسمي، قال:
- أنا هابقى بره.
دورت عليه بعيني وأنا خارجة أسلّم مع الفرقة.
لقيته بيصفّق، وبيضحك لي.
ابتسمت غصب عني، مع إني كنت لسه متأثرة بالمشهد.
ورجعت ورا الستارة حاسّة إن اليوم فيه حد مستنيني أخلص، عشان يسألني أنا عاملة إيه.
ـــــــــــــــــــــــــــــــ
في بروفة، لقيته قاعد لوحده، وحاطط قدامه رسمة.
كان بايمسح فيها بعصبية.
سألته مالك.
قال إن حركة الممثلين اتغيّرت، وهو محتاج يظبط مكان الباب من الأول.
قلت له أقول للمخرج يسيبه زي ما هو.
بصلي، وبعدين ضحك.
- وإنتِ هاتطلعي تدخلي في الحيطة بدل المشهد؟
قعدت جنبه، وطلبت أشوف.
شرح لي ليه حاطط الحاجات كده، وإزاي نفس المكان هيتغيّر قدام الناس من غير ما نقفل الستارة.
كنت شايفة حيطان لسه ناقصها دهان.
هو كان شايف ناس داخلة وخارجة، ونور هيتفتح، وحركة هتحصل.
كل ما أسأله، يشرح بإيده، وينسى إنه كان متضايق.
قلت له إني بحب لما يتكلم عن شغله.
سكت، وبصلي.
= إيه؟
- ولا حاجة.
رجع للرسمة، وأنا فضلت متابعة.
ساعتها كنت عايزة ألمس إيده.
ماعملتش حاجة.
بس لما قام يرجع للشغل، تمنيت يفضل قاعد شوية كمان.
ولقيتني بتطوع أجرّب كل حركة يطلبها، حتى وأنا تعبانة.
كنت عايزة أشوف الحاجة اللي فرحان بيها تطلع زي ما بيحكي عنها.
ـــــــــــــــــــــــــــــــ
في ليلة تانية، نسيت جملة.
غلطت، واتضايقت، وفضلت بعد العرض أقنع نفسي إني بوّظت كل حاجة.
نديم كان بيلمّ حاجته.
قلت له إنه أكيد أخد باله.
قال أيوه.
وشي وقع.
كمل:
- وأخدت بالي إنك كملتي.
= بصراحة؟
- أيوه. أنا كنت هاسيب الباب والديكور وأجري.
قعدت أضحك وأنا لسه على وشك العياط.
معاه، كنت أقدر أقول إني غيرانة من ممثلة خدت دور كنت عايزاه.
وإني تعبت، وإني ساعات باخاف أطلع عادية بعد كل ده.
ماكانش بيقول إني أعظم ممثلة.
كان يسألني الدور كان محتاج إيه، ويسمعني وأنا باحكي، وأتوه في الكلام، وأرجع.
ومرة لقاني ساكتة، فقال ممكن نقعد ساكتين.
قعدنا.
ولأول مرة ماحاولتش أعمل نفسي مبسوطة عشان اللي قدامي يفضل موجود.
ـــــــــــــــــــــــــــــــ
بعد شهور، سألته ليه لسه بييجي وهو سلّم الديكور خلاص.
بصلي، وبعدين للباب.
- بأطمن على الأكرة.
مدّيت إيدي أفتحها وأقفلها.
= سليمة.
ضحك، وسكت لحظة.
- طب ينفع أجي أقابل أهلك؟
فضلت ماسكة الأكرة، وباصة له.
ابتسم، ومستني ردّي.
قلت له ينورنا.
جه فعلًا.
يوم جه، كان بيتكلم مع بابا بهدوء، وأنا مستنية أي سؤال عن شغلي.
ماما هي اللي قالت إن مواعيدي صعبة.
نديم بصلي.
قال إننا هانحاول نظبط وقتنا.
بابا سأله هو فاهم مريم عايزة تعمل إيه؟
أنا رفعت عيني.
نديم قال إنه شافني باعيد بروفة لحد ما الناس كلها مشيت، وإنه فاهم إني باخد الموضوع بجد.
كنت بافرك طرف كمّي، فسيبته.
هو قال قدامهم حاجة أنا كنت كل مرة باحاول أشرحها، والناس تفتكرني متحمسة وهاتزهق.
في قعدتنا، اتكلمنا عن الزيارات، وعن طريقتنا لما نزعل.
قال إنه ساعات بيسكت شوية لحد ما يعرف يتكلم.
قلت له مايسيبنيش أخمّن لو زعلان مني.
هز راسه.
وقعدنا نضحك على إننا لسه في أول قعدة رسمية، وبنتفق هانتخانق إزاي.
اتخطبنا، وكنت فرحانة بيه فرحة مخوفاني.
بقيت أحكيله تفاصيل اليوم قبل ما أعرف أنا حاسّة بإيه فيه.
وصوته في آخر الليل كان بيخلّيني أفك كتافي، وأرجع أتنفس عادي.
ـــــــــــــــــــــــــــــــ
لما جالي كاستينج فيلم سينما، قعدت أذاكر المشهد على الأرض.
نديم كان عندنا، وماما دخلت له بالشاي.
لقاني باعيد، فقال أجرب معاه.
مسك الورق، وقرا الرد بغلطاته.
اتنرفزت.
- أنا مهندس يا مريم، مش جاي أخد الدور منك.
ضحكت، وشرحته له.
المرة دي، لما دخلت الكاستينج، عرفت أسمع.
خرجت من غير ما أعرف النتيجة.
ولما اتصلوا بعد أيام يقولوا إني اتاخدت، فضلت أقول «حاضر» لحد ما المكالمة خلصت.
اتصلت بنديم.
- مالك؟
= أخدوني.
سكت ثانية، وبعدين سمعته بيضحك.
كنت باعيط، وهو كل شوية يقوللي:
- بجد؟ طب قولي تاني.
حسيت إنه فاهم إن الجملة دي وراها سنين، مش مكالمة واحدة.
ـــــــــــــــــــــــــــــــ
الدور المرة دي ماكانش جملتين.
كنت أخت البطل، وليا مشاهد في أول الفيلم وآخره.
قعدت أبص للورق، وأقلّبه، كأني باتأكد إنهم ما اتصلوش بواحدة تانية بالغلط.
أول يوم تصوير، صحيت قبل المنبّه، وخلّيت ماما تجرّب معايا مشهد وأنا بافطر.
لما خرجت، نادت عليّا:
- ماتنسيش إنك أكلتي، عشان لو حد سألك اسمك ماتقوليش جبنة.
ضحكت، ونزلت.
بس التصوير ماكانش كله الفرحة دي.
أوصل بدري، وأستنى.
أعمل المشهد، وأعيده، والإضاءة تتغيّر، ونبدأ تاني.
في ليلة، خلّصنا مع الفجر.
نديم كان صاحي، ومستني أطمنه إني روّحت.
- كل ده تصوير؟
= آخر مشهد اتعاد كتير.
- طب ادخلي نامي. نتكلم لما تصحي.
نمت وأنا سامعة صوته.
ماكنتش أعرف إن نفس المكالمة هتتكرر، وكل مرة يبقى فيها حتة ناقصة.
ـــــــــــــــــــــــــــــــ
كنا متفقين ييجي عندنا يوم مافيش فيه تصوير.
ماما جهزت الشاي، وأنا لبست، ومستنية.
مساعدة المخرج اتصلت.
محتاجة أروح أكمّل لقطات ناقصة قبل ما يغيّروا المكان.
اتصلت بنديم، واعتذرت.
قال ماشي.
سألته زعلان؟
- إنتِ عايزاني أقولك إيه؟
= قول اللي إنت حاسّه.
- كنت محتاج أشوفك.
الكلمة وجعتني.
أنا كمان كنت محتاجاه.
قلت هاروح وأرجع بسرعة.
ما رجعتش بسرعة.
لما خلّصت، لقيت الساعة عدّت واحدة، ومسدج منه:
«بلاش تيجي تعبانة. نشوف يوم تاني.»
قريتها كذا مرة، ومش عارفة هو بياخد باله مني، ولا بيقفل الكلام.
اتصلت.
ردّ وهو نايم.
قلت آسفة.
- عارف إنه مش بإيدك يا مريم. نامي.
كان أهون عليّا يزعق.
كنت هاعرف أرد.
ـــــــــــــــــــــــــــــــ
في اليوم اللي اتقابلنا فيه فعلًا، قعد يحكيلي عن مشكلة في شغله.
موبايلي رن.
استأذنته.
قفلت، ورجعت أسأله:
= كنت بتقول إيه؟
قبل ما يرد، مسدج نورت، فقريتها.
بص للكوباية اللي قدامه.
حطيت الموبايل في شنطتي.
= خلاص، أنا معاك.
قال بصوت هادي:
- أنا حاسس إني مستني دوري.
وشي سخن.
ماكنش عندي رد يخلّيني أطلع مش غلطانة.
اعتذرت، وطلبت منه يكمل.
حكى، بس مش بنفس النفس اللي بدأ بيه.
وأنا رجعت البيت زعلانة من نفسي.
فتحت الموبايل أبعت له إني كنت مبسوطة بشوفته، لقيت تعديل جديد في جدول التصوير.
قفلته، من غير ما أرد على حد.
ـــــــــــــــــــــــــــــــ
لما نزلت أول صورة ليا من الفيلم، فضلت أبص عليها.
اسمي مكتوب تحتها.
ماما ورّتها لخالتي، وبعدين رجعت تسألني تعرف تبعتها لعمتي إزاي.
وسط التعليقات، واحد ماعرفوش كاتب إنه بيحبني من دلوقتي.
نديم سألني أعرفه؟
قلت لأ.
- طب بيكلمك كده ليه؟
= وأنا هاعرف منين؟
حسيت إنه متضايق مني أنا.
قال إنه مش متعوّد يشوف الناس بتتكلم عني بالطريقة دي.
قلت له إن الكلام ده مش معناه إنهم يعرفوني.
سكت، وبعدين سأل:
- وإحنا هانفضل مستحملين كده؟
إحنا.
كانت أول مرة أحس إن نجاحي جايب له حاجة محتاج يستحملها.
ـــــــــــــــــــــــــــــــ
خلصنا تصوير.
قلت هنلحق نتنفس.
بس كان فيه دوبلاج، وبروفة للعرض اللي لسه باشارك فيه، وميعاد اتحدد للكلام عن الفيلم.
لما اتبعتت دعوة العرض الخاص، أول واحد فكرت أكلمه كان نديم.
قبل ما أفرح له، خفت يكون عندنا اتفاق أنا ناسياه.
قعد عندنا بالليل.
كنت باحاول أحكيله عن الدعوة، وهو مستني أخلص.
قال:
- مريم، إحنا عايزين حياتنا تبقى عاملة إزاي؟
حطيت الموبايل.
قال إنه نفسه يبقى لينا وقت، وإنه يرجع يلاقيني، ومايصحاش كل شوية يشوف روّحت ولا لسه.
قلت إني عايزة نفس الحاجة.
بصلي بتعب.
- أنا مش شايف ده.
= طب نرتّب.
- بنرتّب، وبعدين كل حاجة بتتغيّر.
سكتُّ.
كان عنده حق في حاجات.
استنيته يقول نعمل إيه.
قال إنه عايزني أبعد عن التمثيل.
ـــــــــــــــــــــــــــــــ
بصيت له، ومستنية يوضح إنه يقصد راحة.
بس كمل:
- أنا مش هاعرف أكمل بالشكل ده.
= إنت عرفتني وأنا باعمل إيه يا نديم؟
- عارف.
= وقلت لبابا إيه يوم ما جيت؟
حكّ وشه.
قال إنه كان فاكر الموضوع هيبقى أبسط.
وإنه قلقان من السهر، ومن الناس، وإنه بيغير، وحاسس إنه بقى آخر حاجة بافتكرها.
قلت له إني غلطت يوم قعدتنا، وعارفة.
= بس ده معناه إني أسيب شغلي كله؟
- أنا باقولك اللي أقدر أعيش معاه.
= طب واللي أنا أقدر أعيش معاه؟
صوته فضل واطي.
وده كان مخوّفني.
ماكانش كلام غضب وهيعدّي.
- أنا وحياتنا الهادية… ولا الشغل ده يا مريم.
فضلت باصة له.
الجملة كانت قصيرة، بس أنا شفت فيها طوابير الكاستينج، والمرات اللي رجعت أعيط في الحمام، وماما وهي ماسكة الورق وبتنعس.
وشفته هو كمان.
واقف ورا الستارة، ومستني أطلع.
= إنت اللي كنت بتطمني قبل ما أدخل.
- ولسه عايز أطمنك.
= إنت دلوقتي بتقولي ما أدخلش أصلًا.
سكتنا.
كنت نفسي يقول إنه مش قصده يخيّرني.
قال إنه مستني أفكر.
هزيت راسي.
= أنا مش هابطل.
- يبقى إحنا هنفضل نوجع بعض.
= عشان كده لازم نبعد.
رفع عينه.
أنا نفسي اتخضّيت من الجملة.
بس كملت، وصوتي بيتهز:
= مش هاعرف أرد عليك كل يوم وأنا خايفة تكون مستني مني أقولك بطلت.
نديم قام.
فضل واقف ثانية، وبعدين قال إنه هيمشي.
وصلته للباب.
ماكنتش قادرة أبصله، وهو بيقول لماما تصبح على خير.
قفلت، وفضلت واقفة مكاني.
ماما سألتني حصل إيه.
قلت لها:
= لو حد سأل… إحنا وقفنا.
ـــــــــــــــــــــــــــــــ
أول يوم، كل شوية أمسك الموبايل.
أخلص مشهد، وأطلّعه من الشنطة.
أفتكر، فأرجّعه.
في طريق الرجوع، شفت باب محل متعلّق على جنب، وافتكرت الأكرة.
ضحكت ثانية.
وبعدين عيطت، وأنا باحاول ألف وشي ناحية الإزاز.
ماحدش عمل حاجة.
اليوم كان ماشي عادي، وأنا مش عارفة أروح بضحكتي لمين.
تالت ليلة، سمعت صوت عربية تحت البيت، فقمت من السرير.
ماكانش هو.
رجعت قعدت، وحسيت إني زعلانة منه عشان ماجاش، ومن نفسي عشان كنت مستنياه.
ماما خبطت.
- آجي أقعد معاكي؟
= تعالي.
قعدت على طرف السرير.
قلت لها يمكن أنا باجري زيادة، ويمكن لما نتجوز حاجات كتير هتختلف.
سمعتني لحد ما خلّصت.
- إنتِ عايزة تبطّلي؟
= أنا عايزاه يرجع.
ماما ماعرفتش ترد.
قرّبت مني، وسندت راسي عليها.
كنت محتاجة أقول الجملة دي لحد، من غير ما يقولي يبقى ابطلي.
ـــــــــــــــــــــــــــــــ
في يوم، قعدت قدام الموبايل، فاتحة رقم أستاذ عماد.
كنت هاقوله يجيب حد مكاني في العرض الجديد.
أجرب أقعد شوية.
أهو الفيلم خلص، ويمكن أهدى، ونديم يطمن.
رنيت.
أول ما ردّ، سألني على مشهد البروفة.
لقيتني باشرح له الحركة اللي مش راضية تظبط.
سألني عندي اقتراح؟
قمت من مكاني، وجرّبت وأنا باكلمه.
لما قفلت، كنت واقفة في نص الأوضة.
الموبايل في إيدي، ونفسي سريع.
ماعرفتش حتى أفتح سيرة إني أمشي.
قعدت على الأرض.
لو رجعت لنديم وأنا عاملة نفسي عايزة أبطل، هاعرف أفضل مبسوطة قدامه قد إيه؟
ولو كملت، هافضل كل يوم عايزة أحكيله، ومش باحكيله؟
ماكنتش فخورة بنفسي، ولا حاسّة إني كسبت حاجة.
كنت وحيدة، وواخدة قرار بيوجعني.
ـــــــــــــــــــــــــــــــ
تسع أيام عدّوا من غير مكالمة.
ليلة العرض، ماما دخلت تساعدني أقفل الفستان.
بصت لي في المراية.
- حلوة.
ابتسمت، ودوّرت على حلق كان جنب المشط.
ماما لقيته تحت الورق.
- حتى النهارده مش سايبانا من البروفات؟
= ده مشهد بكرة.
- طب بكرة يعرف يستنى، أنا عايزة أشوف الفيلم.
ضحكت.
في القاعة، سمعت اسمي، واتصورت، واتسألت عن الدور.
جاوبت، وبصيت ورا اللي بتسألني.
ماشوفتوش.
قعدت، وكل ما الباب يتفتح أبص.
لما مشهدي جه، بطلت ألف.
شفت نفسي على الشاشة.
افتكرت سقعة الليلة اللي اتصور فيها، والمرة اللي المخرج قال نعيد فحسيت إني مش هاعرف.
ماما مسكت دراعي.
بصيت لها، لقيتها بتضحك وبتعيط.
- أهي الجملتين كبروا.
ضحكت، ودموعي نزلت.
كان نفسي نديم يسمعها.
ـــــــــــــــــــــــــــــــ
اتصل تاني يوم.
بصيت للاسم لحد ما الموبايل قرب يفصل.
ردّيت.
- إزيك؟
= الحمد لله.
سألني ينفع نتقابل؟
قلت:
= عشان إيه يا نديم؟
سكت شوية.
- عشان عندك حق تسمعيني وأنا باقول إني غلطت.
اتفقنا في المسرح، بعد ما يخلّص شغله هناك.
عم سيد كان موجود، وفي القاعة كراسي متكومة، وستارة مفتوحة من ناحية.
نديم قام لما دخلت.
قال مبروك.
عينيا دمعت قبل ما أتكلم.
= أنا كنت مستنياك.
- كنت موجود.
قال إنه دخل متأخر، وقعد في الآخر.
شافني وأنا باعيط جنب ماما، وفضل مستني الناس تهدى عشان ييجي.
لما خرج، كنت مشيت.
قلت إن غيابه وجعني.
ماشرحش لي تاني ليه اتأخر.
قال:
- كان لازم آجي أسلّم عليكِ.
قعدنا على كنبة قديمة جنب مدخل القاعة.
كنت حاطة إيدي بين ركبتي عشان مايبانش إنها بتترعش.
= أنا لسه مش هابطل.
- عارف.
رفعت عيني.
قال إنه في أيام بعدنا شاف لقاء ليا عن الفيلم.
المذيعة سألتني عن أول دور، وأنا فضلت أحكي عن ماما وهي بتحفّظني.
- افتكرتك وإنتِ واقفة ورا الستارة، مش عارفة تمسكي الورق. وبعد العرض مش راضية تروّحي.
ابتسمت غصب عني.
كمل:
- أنا كنت عارف إنتِ بتحبي إيه. ولما الموضوع كبر وخفت، اتعاملت كإنك لازم تسيبيه عشان أنا أرتاح.
حكّ إيده في بنطلونه.
- كنت أناني معاكي.
= كنت حاسّة إنك زعلان إني وصلت.
- أنا فرحان بيكي… بس خوفي خلّاني ماعرفتش أفرّحك معايا.
عيطت.
قلت له إني فكرت أسيب العرض الجديد.
وشه اتغيّر.
- ليه؟
= عشان وحشتني.
سكت، وعينه احمرّت.
فضّل يبصلي، وبعدين قال بصوت واطي:
- أنا آسف إني وصّلتك لكده.
ـــــــــــــــــــــــــــــــ
فضلنا ساكتين شوية.
سألته:
= وإحساس إنك مستني دورك؟ راح؟
هز راسه.
- اللي حصل وجعني. بس أنا بدل ما أقولك محتاجك تسمعيني ونشوف وقتنا، قلتلك سيبي الحاجة كلها.
= أنا فعلًا قصّرت في قعدتنا.
- عارف إنك عارفة.
= وكان لازم أقولك إني مفتقداك، بدل ما كل كلامي يبقى شرح ليه اتأخرت.
بصلي.
أنا لأول مرة ماكنتش باحضّر رد وأنا باسمعه.
كنت عايزة أفهم الراجل اللي بحبه، من غير ما أخاف إن فهمي له معناه أوافق على طلبه.
قلت له إن مواعيدي ممكن تتلخبط تاني.
وإنه ممكن يفضل قلقان.
- هافضل أقلق. بس أقدر أتعلم ما أطلّعش القلق ده عليكِ.
سألته هيعمل إيه لما حد يقوله إزاي سايبها ترجع متأخر.
- هاقوله إننا متفقين، ومش هاجي أحاسبك على كلامه.
= وإحنا لما نزعل؟
- نتكلم قبل ما نوصل لتسع أيام.
بلعت ريقي.
= مش هاعرف أستحملهم تاني.
مد إيده على الكنبة بيننا، واستنى.
حطيت إيدي فيها.
مسكها، ونفَسه طلع كأنه كان حابسه من ساعة ما دخلت.
ـــــــــــــــــــــــــــــــ
قعدنا نتكلم عن مواعيدنا، وعن المكالمات اللي بتتساب، وعن الوقت اللي أنا محتاجة أبقى فيه لوحدي بعد التصوير.
هو كمان كان محتاج يحكي، ومش كل قعدتنا تبقى عن يومي.
اتفقنا لو الجدول اتغيّر، أقوله أول ما أعرف.
ولو يومنا ضاع، نختار غيره سوا، وأحاول أحافظ عليه.
وهو بطل يقول إن الحل إن كل الأيام تفضى.
سألته لو جالي دور تاني.
قال:
- هاتقرري إنتِ. وأنا عايز أسمع عنه.
كنت خايفة أصدّق بسرعة.
قلت له.
هز راسه، ومازعلش.
- فاهم. خلّينا نجرّب نعمل اللي بنقوله.
قبل ما نمشي، افتكرت إني ما سألتوش عن شغله.
رجعت قعدت.
= المشكلة اللي كنت بتحكيلي عنها خلصت؟
بصلي، وبعدين ابتسم.
قال لسه.
حكى.
الموبايل رن من جوه شنطتي.
طلعته، لقيت ميعاد بروفة بكرة اتبعت.
قريته، وردّيت إني عرفت، وحطيته بعيد.
= كمّل.
كمّل، وأنا سامعاه.
ـــــــــــــــــــــــــــــــ
عند الباب، نديم مسك الأكرة، وبصلي.
- بالراحة على الباب بكرة.
ضحكت.
= إنت لسه فاكر؟
- ده أول بلاغ اتعمل ضدك عندي.
عم سيد نده من آخر القاعة:
- هو الكلام خلص؟ أنا عايز أروّح!
قلنا له خلص.
نديم خرج معايا، وإيده في إيدي.
كان لسه عندي بروفة الصبح، وهو عنده يوم طويل.
ماكنش فيه حاجة اختفت من حياتنا عشان نعرف نرجع لبعض.
بس وأنا نازلة على السلم، كنت باحكيله عن المشهد اللي باحاول أظبطه، وهو بيسألني.
ورجعت أحس إنه مستنيني أطلع.
الحب اللي طمّنّي بجد، خلّاني أقدر أبص لبكرة وأشوفني باكبر… ونديم لسه جنبي.
#ZiadMohamed
تعليقات
إرسال تعليق