مجمع الروايات الكامله والحصريه فقط اضغط على اسم الروايه موجوده كامله في موسوعة القصص والروايات جميع الفصول مع البرنس محمد السبكي قصص وروايات كامله يسعدني تواجدكم معنا في المدونه

جه اتصال في منتصف الليل لبابا من عمتي وهي بتقوله

 

"" انا خايفه ، خايفه ياسعيد ، البيت في شيء غريب !! "" بابا بعد  بالتليفون شوية وفضل يتكلم  ، مكنتش فاهم بابا بينفعل ليه .. اخد معاه بندقية الصيد وقالي لازم ننزل البلد دلوقتي حالا ياعبدالعزيز ، ولما سالته ايه السبب كان بيقولي 

-- مش عارف ، مش عارف ياعبدالعزيز بس عمتك بتشتكي من جوزها وائل  وان فيه حاجة غلط .

- طيب انت واخد البندقية ليه ..؟ 

-- هحكيلك واحنا ماشين ياعبدالعزيز ..

ركبنا العربية وسكت شوية .. وبعد كده بدا يقول ! 

- هربت من البلد وانا صغير ياعبدالعزيز .. هربت بعد موت ابويا علي طول بحجة الشغل وان عايز اكون نفسي ، ابويا كان طبعه حامي ، كنا كلنا لازم نبقي تحت طوعه ، تصدق لما مات حسيت اني حر واني همشي بعد جنازته علي طول ! 

-- اشمعني يابابا ، وليه عمرك منزلتنا البلد  واشمعني هنروح النهاردة كل دي اسئلة عايز اسالها واتمني تجاوبني ؟

- منا جايلك في الكلام ، اتولدت في بيت طيني مكون من دورين ، الدور السفلي كنا عايشين في ، بس الدور العلوي عمرنا مطلعنا ، كنا مسمينه بيت الطير ، بنحط في حمام وبط ، مكنش حد بيطلعه غير امي والصبح بدري ، غير كده عمرنا مفكرنا نطلعه .. كنا ديما واحنا بنلعب في الحوش بحس ان في حد بيرقبنا من الدور العلوي ، حد بيبص علينا .. الاحساس ده مكنش بيراودني لوحدي ده كان بيحس البيت كله ، واحيانا كمان امي بتمنعنا من اللعب في الحوش بعد المغرب ..

ديما كانت بتحصل في البيت عندنا حاجات غريبة ، حاجات مش مفهومة بس مش مهمة ، زي اختفاء مفاتيح اختفاء عملات ، وبنلاقيها في اماكن مستحيل تخطر علي بال اي حد انه يحطها فيها ..

كل ده كان عادي ياعبدالعزيز لحد مبقينا نحلم كلنا احلام زي بعض ، لحد مبقينا نخاف ننام ، عرفنا ده لما حكيت الحلم لاخوايا الاكبر وقالي ده حلمي !! .. وامي قالي ده حلمي ، كلنا مكناش مصدقين بعض ! 

-- الحلم كان عبارة عن ايه !

- كانت ناس شبهنا ،ناس شبهنا بالظبط بتبص علينا من فوق !! .. بتراقبنا ..

- وعملتوا ايه ! 

-- والدي ساعتها كان بيلف ورا الموالد ، ونظرا للتخلف بتاع قريتنا .. عملنا حاجة اسواء ، عملنا حفلة زار في البيت ..

- ايه ال زار ده ..

-- في الحقيقة هو انت في الاول تحس انها كانها حضرة ، بس هي مش كده ! هو طبل وزمر وانك بتترجا اي شيء وحش في البيت انه يخرج ! بس الطريقة دي غلط .. وبتمكنهم اكتر ! ..

-- ث .. ثواني هو انت ليك اخ ؟  انت مش ليك عمتي وبس ؟ 

- عمك حسن .. عمك حسن انا مبذكروش ، مات وهو صغير ..

- ازاي ..

-- طلع الدور العلوي ومرجعش ياعبدالعزيز ، اختفي .. تصدق انا معرفش هو عايش ولا ميت ، ولا هرب من البلد اصلا ! .. بس هرب ازاي ؟ ده هو قالي ساعتها انا طالع ومتطلعش ورايا وكنا بنتراهن علي ال قلبه اشجع !! ..

- طيب يابابا انت راجع ليه وواخد بندقية صيد ليه ..

- بعد ماجدتك ماتت .. اختي عاشت في البيت ، واتقدملها ابن خالي وائل ، وقراروا يعيشوا في نفس البيت.. بتقولي دلوقتي ان وائل في شيء غلط وانه مجاش بقاله ٣ ايام بس هي بتسمعه في الدور العلوي ولما تتصل في تليفونه بيرن فوق  !!

- يعني احنا هنروح نكتشف الدور العلوي !!!

- لا انا هاخد عمتك وولدها ونمشي من البيت ده ..

.

ده كان كلام والدي .. وصلنا البلد الساعة ٢ الفجر ، والدي خبط علي البيت وهو ماسك البندقية ، فتحله وائل .. والدي استغرب  .. 

-- يااااه سعيد عاش من شافك .. اتفضل !

- اختي فين ياوائل 

- طيب مش تدخل الاول وبعدين ايه ال شايله في ايدك ده !! 

والدي مهتمش ودخلنا !! .. وبعدها سال علي اخته تاني ..

وائل ده قفل الباب بالمفتاح ، وعمتي خرجت تسلم علي بابا وتسلم عليا ، بس هنا لقيت ابويا بيقولي خش الحمام واقفل نفسك ومتخرجش ، مكنتش فاهم بس انا خايف ، سمعت الكلام .. !! فضلت اتصنت عليهم عشان اسمع كلام اول مرة اسمعه من ابويا وانا في الحمام كان بيقولهم ..

-- وائل واختي وولدهم فين !! 

- امال احنا مين ياسعيد ..

-- هاهاها .. الحاجات دي تعملوها عليا لما كنت طفل ، كنتوا تطلعوا كانكوا اخويا حسن ابويا امي .. بس دلوقتي انا عرفكوا كويس .. وائل في وحمة تحت عينه !! نستوها صح ؟ اما اختي .. سنتها اليمين مكسورة !! .. هما فين ؟؟...

ساعتها انا خوفت .. خوفت وسمعت ضرب نار وزعيق !! .. كان في اصوات مرعبة وغريبة !! .. لقيت  حد بيخبط علياا وهو بيقولي ..

-- عبدالعزيز افتح ... افتح بسررعة !!! 

كان والدي .. شداني من ايدي ومتكلمش ولا كلمة !! ركبني العربية .. وهو بيقول فلت .. فلت باعجوبة ! ..

كان غريب وتصرفاته غريبة ..  ماشين في طريق اسود حالك شكله طريق مقابر ..

-- بابا ده مش الطريق ال جينا منه !!

- ده طريق اسهل ياعبدالعزيز ..

وهنا ركزت .. ده مش بابا !! بابا كان صباع ايده الصغير في الايد اليمين مقطوع ..! انا بابا في البيت .. ؟ انا مع مين !! ..  

The end