 |
شغلتى حرامي جثث كامله
يقول صاحب القصة
أيوة!!
انا مبهزرش
انا فعلا بستمتع وأنا بسرق الجثث من المقابر
انا عارف ان إللى بعمله ده حرام بس هعمل ايه؟ الظروف الصعبة إللى عشتها هى إللى خلتنى أوصل بكده
مبدايا قبل ما ادخل ف اى تفاصيل اعرفكم بنفسي الأول
انا اسمى زين عندى 37 سنة منفصل وعندى طفل عنده 4 سنين
و بصراحة هو ضميرى إللى بيانبنى طول الوقت ويمكن هو خلانى اتشجع واكتب الكلام ده
حكايتى بدأت من زمان أيام والدى الله يرحمه ماكان عايش
كنت بشتغل معاه ف تكفين وتغسيل الاموات من سن 9 سنين وده اللي خلانى مكملش تعليمى رغم اني كنت شاطر جدا مش هنكر ان مهنه ابويا كانت هى السبب في انى سيبت الدراسة لكن انا مش ندمان ولا زعلان كميه التريقه من صحابي كل م اعدى قدامهم كانت بتخلينى دايما فخور جدا انى ابن الراجل ده وان المهنه دى مهمة جدا رغم أنها مخيفة
أيوة احنا اللي بنريح الناس الراحة الأبدية ديتها لفتين قماش ابيض حوالين الجثث وتزف على الاخره عدل
فى الاول زى اى طفل كنت حاسس بخوف ودايما اتعودت اسال بنعمل ايه ؟ وبنعمل كده ليه؟ وكان الرد لما تكبر هتعرف وتتعلم وهتعرف ان شغلتنا دى محدش يقدر يستغنى عنها
وكبرت وبقيت شاب عمره 18 سنه واتعلمت وحفظت كل اللى قلهولى بالنص لكن ربنا ماارادش انه يكمل معايا المشوار
مات وانا لسة محتاجله واتحطيت ف اختبار حقيقى لاول مرة بغسل جثة ابويا
الموقف مرعب ومش سهل عليا وانا لسه ببتدى حياتى ف السن ده
وانا موجود ف اوضة مخصوصة لغسل الموتى كنت لوحدى معاه كشفت وشه وبدات اتأمله
كانت الجثة مغمضة عينيها ولما بدأت أجهز الميه وهشتغل الجثة فتحت عينيها ولفت وشها ناحيتى وابتسمت برعب
حسيت اني بحلم واكيد كل ده هلاوس
وبدات أغسل ابويا قلعته هدومة اللى فوق وبدات اسمى الله واغسل الجمب اليمين
لكن فجأه .....!!
لما وصلت لدراعه اليمين لاقيت صباعة بيتحرك لوحده تماسكت ومحطتش الموضوع ف دماغى وكملت اللى بعملة وبدات اغسل الجزء الشمال وانا بسمى ف سرى واقرى قران طلب منى زميلي انى اخرج من الأوضة غطيت الجثة لثوانى وخرجت
لكن حصل اللى مكنتش متوقعه
لما رجعت الاوضة وقربت من جثة ابويا وكشفت الجثة علشان اكمل لاقيت جسمه ازرق بشكل مش طبيعى ووشة شاحب كملت تغسيل عادى كان محصلش اى حاجه
منكرش انى كنت مرعوب واللى خوفنى اكتر ان جثة ابويا كانت بتتنفض طول مانا بغسلها وتخيلت أنها تحركت من مكانها وف هدوء ترجع لوضعها الطبيعى
ولما قربت اخلص لاقيت ايد متلجه مسكت ايدى وكهربا ضربت ف جسمى كله صرخت ووقعت ع الارض مغمى عليا قدام الجثة و...
(2)
الجزء الثاني مصطفي المهدي
شغلتي حرامي جثث
جيت التفت علشان اخرج من الأوضة إيد متلجة مسكت ايدى فضلت أقاوم واشد نفسي منها لغاية ما سابتنى بدأت أرجع لورا كام خطوه لكن اتهيالى ان جثه ابويا اتحركت من مكانها وجيه ناحيتى
صرخت والدنيا لفت بيا ووقعت على الأرض قدام الجثة مغمى عليا
مادريتش بحاجة بعدها ده انا حتي معرفش فضلت غايب عن الوعي اد ايه فوقت على صوت حد بينده عليا كان زميلى إللى ببدل معاه الشغل كان بيخبط بايده على وشى وبيقولى
زين ي بنى فوق ايه إللى حصل؟ ايه إللى موقعك كده
قلت له بفزع مممين!! هو فيه ايه ؟ انا ايه إللى جابنى هنا؟
بصيت فى وشه وقلت له مممرزوق؟
رد قالى باستغراب أيوه مرزوق ي عم صرختك رجت الشارع بره
رديت وقلت له انا مش فاكر حاجه
قالى- مش انت اللي طلبت منى اسيبك مع جته ابوك ورفضت انى أساعدك اش حال ان مكانتش اول مرة كنت فاكر ان قلبك جمد ع واتعودت ع الشغلانة
قلت له ابويا عايش مماتش صدقني!!
- قالى باستغراب سلامة عقلك ابوك مات وشبع موت تلاقى انت بس بتهلوس
ياللا قوم معايا نكمل شغلنا انا هساعدك متخافش
وقمت معاه فعلا بصعوبة كنت حاسس بتقل ف دماغى ومشيت معاه عند خشبة الغسل وتمم ع الجثة الغربية ان ابويا كان جسمه طبيعي ومكانش في حاجة غريبة م إللى شفتها
وقال لي ياللا كده تمام إيدك معايا بقى علشان نكفنه
قولتله: انا خايف ومش عارف اتلم على اعصابى
قالى : بس شيل معايا ساعدنى
شال معايا الجثة براحة ونقلناها لسرير حديد ف الاوضة وبدانا نكفن ابويا
انا كنت عرقان جدا وف موقف لا احسد عليه وبعد ماخلصناه خرجناه م الاوضة و جبنا تاكسى اجرة لغاية البيت لان مكان شغلنا بعيد عن البيت بمسافة
وصلنا البيت ودخلت ابويا بمساعده مرزوق لاوضته وقفلت الباب ومرزوق استاذن يروح فوصلته لاخر الشارع ورجعت البيت علشان ابقى لوحدى لتانى مرة بعد ما امى ماتت وانا لسة مكملتش 6 سنين وعشت مع ابويا واتعودت على وجوده ف حياتى فضلت قاعد قدام صورته اللى على الحيطة ابص فيها وافتكر ذكرياتى معاه
- نمت معاه ف نفس الاوضة ف اخر ليلة لينا سوا
تانى يوم جم زمايلى وقرايبى علشان ندفنه بعد صلاه الظهر رحنا المسجد وصلينا عليه ونزلت الترب ادفنه وطلعت ادعى مع الامام والناس اللى كانوا موجودين ف المقابر وروحت البيت بعد ماودعته الوداع الاخير
بعد ماخلص العزا والدفنة بفترة كنت بطلت اروح الشغل وغرقت ف الحزن والوحده يمكن شهر او اكتر بس مرة وانا قاعد لاقيت الباب بيخبط
قمت افتح لاقيت مرزوق كانت الساعة حوالى 12 بالليل اتخضيت لانه مش من عادته يجيلى ف وقت متاخر كده قولتله
- خير يامرزوق مش عادتك تيجى متاخر كده ؟
= ايه ياعم زين هتسبنى واقف ع الباب ولا ايه؟ طب قولى اتفضل
فضلت ابحلق فيه شويه وانا مستغرب من شكله ولبسة وبعدين قاللى : ايه ياعم سرحت ف ايه ومالك باصص لى كده ليه هتصورنى ولا اية ؟ هتدخلنى ولا اخد بعضى من قصيره وامشى
قولتله - اتفضل ياسيدى
ودخلته وقفلت الباب
وقعدنا نتكلم سوا ولاقيته ف وسط الكلام بيقولى : وبعدين هتفضل حابس نفسك كده كتير؟
الحاج الله يرحمه واتكل على الله بقاله شهر او اكتر دلوقتى مينفعش اللى انت بتعمله ده لو كان عايش مكانش هيرضي بحبستك دى انت مش وليه هتقعد حاطط ايدك على خدك تندب طول النهار الحى ابقى م الميت ي صاحبى
قولتله : مش قادر ارجع الشغلانه دى تانى كل ماهدخل اوضة التغسيل هفتكر ابويا
فكر شوية وحك راسة وقالى : خلاص على رايك الشغلانة دى مبقتش تجيب همها انت مسيرك هتتجوز وتخلف هتقول لاهل مراتك ف المستقبل ايه ؟ البيه مغسل اموات اقولهالك بالبلدى حانوتى يعنى مين هيرضى يديك بنته؟ وهتاكلها منين؟ خليك ناصح زيي
قولتله قصدك ايه؟
سكت شويه وبعدين قاللى : بقولك ايه ماتيجى تشتغل معايا شغلانة مضمونة وفيها مكسب كبير اكتر من اللى كسبناه اضعاف
قولتله باستفسار : هو انت طول الوقت ده كنت مختفى فين؟ وايه الابهه اللى ظهرت عليك فجاه دى ؟وبتشتغل ايه ؟
قاللى : ماهو ده اللى جاي لك علشانه انا ي سيدى مسلكاتى
قولتلة اية ؟ وضحكت
قالى : بتضحك على ايه ؟ انا مبهزرش وبرضة مرحناش بعيد ف نفس الدايره
- مش فاهم
قالى : افهمك : مش فيه ناس كتير بيحتاجوا كلية او زرع قلب او طلبه طب بيذاكروا على الجثث
قولت له باستغراب ايوة
انا بقى شغلتى انى بسلك الجثث دى م المقابر ولا من شاف ولا درى
قولتله بتقول ايه انت مجنون هنسرق جثث على اخر الزمن ؟
لا مش ممكن الاموات ليهم حرمه لايمكن اعمل كده ابدا
صحيح اسمع عن ناس بياخدوا اعضاء اموات بس ده بيبقى رسمى وبموافقه الطرفين اهل الميت واللى بيتبرعوله لكن سبهلله كده لا افرض حد كشف الموضوع هنروح انا وانت ف ستين داهية
قاللى ماتخافش احنا مجرد مسلكاتية بناخد الجثث وفيه حد بيتفق معانا وبناخد عموله عن كل جته وبياخدوها هما يتصرفوا فيها بمعرفتهم واحنا دورنا بيخلص على كده
قولتلة : يعنى مافرقناش عن تجار الكيف
ابتسم وقاللى : تجاارة مشروعة وعمل خير بس بطريقة اسرع ومكسب مضمون فكر ورد عليا استاذن انا
سلمت عليه ومشى !!
ومشى وسابنى محتار وبفكر ف اللى قاله وبصراحة لاقيتها فرصة ومكانش عندي اختيار ورحت له بعد كام يوم وبدأت أسهل معاه الشغل وفعلا بعد اقل من 10سنين الفلوس جريت ف ايدى من الشغلانة دى وبعت البيت وخدت بيت ف مكان ارقى واتقدمت لبنت جارتى-اسمها مروه كنت مفهمها انى رجل أعمال واتجوزنا جواز تقليدي وخلفت بعد معاناه مع الدكاترة جة( يوسف) بعد 6 سنين جواز وفرحت بيه انا وامه جدا بس كان عنده مشكله ف القلب ومحتاج زرع قلب ضرورى والعملية هتتكلف كتيرفقررت انقذه وباى طريقة ده ابنى الوحيد اللي حيلتى م الدنيا
رحت المقابر الساعة 12 بالليل علشان اسرق جثة عيل لسة ميت جديد علشان ابيعها و بفلوس الجثة اعمل له العملية
وفجاه!! حصل اللى مكنتش متوقعه
يتبع مصطفى المهدي
(3) شغلتي حرامي جثث كما وعدتكم
الجزء 3 قبل الأخير
كان لازم اتصرف وانقذ ابنى اللى حيلتى م الدنيا فكان القرار انى اروح اسرق جثة من المقابر وابيعها وبتمنها اعمل لابنى العملية
مكنش قدامى اختيار تانى روحت هناك الساعة 12 بالليل وحصل اللى مكنتش متوقعه
حارس المقابر كان صاحى لسوء حظى وشافنى وزعق فيا
الحارس انت مين ي استاذ !! رايح فين ؟ هى وكاله من غير بواب؟
اتلجمت ومعرفتش ارد وقولتلة أنا انا انا...؟ انا جي عشان...!
الحارس بانفعال: انطق جاى ليه ممنوع الدخول هنا من اصله
حسيت انى وقعت ف شر اعمالى ومعرفتش اتصرف فقولت له بتوسل ارجوك ياحاج دخلنى القبر محتاج ادخل ضرورى
بص لى الحارس من فوق لتحت وقاللى : انت شكلك مش مريحنى وموردش عليا قبل كده من غير لف ولا دوران قول جاى عاوز ايه بدل مالم السكان اللى هنا عليك ويدوك الطريحة التمام مايخلوش فيك حته سليمة
قولت له : اهدى بس ياحاج فيه ايه ؟
زعق اكتر وقال : مفيش دخول يعنى مفيش دخول
قربت منه وقلت لة بخبث وانا بطلع فلوس من جيبى / طب وكده؟
الراجل فرح اول ماشاف الفلوس وكرمشت 200 جنية واديتهم له ف ايده
لهجته اتغيرت فى تانية وقالى تمام ياباشا اتفضل معايا
ودخل ومعاه الكشاف وقالى هتدخل ف ايه الاول ؟عايز جثة لابن اختك يزاكر عليها ولا ايه ؟ بس الجثث دى ليها زباينها ومش ف الوقت ده النهار له عينين
قولت له وانا برتب حجة : محفظتى وقعت لما كنت بدفن ابنى الصبح وانا راجع اخدها
بص لى باستغراب وسكت
فقلت له : متخافش الفلوس اللى اديتهالك كانت احتياطى معايا فى جيب الجاكت
فقال لى بابتسامة صفراء الله يرحمه ياباشا اتفضل متتاخرش وسابنى وهو بيطلع قالى انا مستنيك برة
دخلت وكنت خايف جدا من الظلمة وقلبى اتقبض نزلت سلالم القبر لغاية ماوصلت لاقيت كفن طفل صغير لسة نازل من ساعة تقريبا قربت منه وحاولت ارخى عنه الكفن شويه بس اتشجعت و كشفت وش الطفل لاقيت فى ملامح من ابنى كان فيه صوت ف ودنى بيحركنى وبيمنعنى انى انفذ المره دى تراجعت ف اخر لحظة بعد ما رجعت الجثة زى ماكانت وبدات اطلع من القبر
وناديت على الحارس اللى اول ماشافنى ساعدنى اخرج وقفل القبر وسالنى باستغراب
الحارس : ها لاقيت اللى بتدور علية ياباشا؟
جاوبت بارتباك : ا..ايوة انا متشكر جدا استاذن انا اتاخرت ولازم اروح
الحارس : مع السلامة ياباشا هبقى اقرا له الفاتحة
وركبت عربيتى ورجعت البيت ولما وصلت ع الساعة 12 ونص بالليل كان مفيش حد فافتكرت ان مراتى عند اهلها من الصبح وانا اللى موصلها هى ويوسف ابنى بنفسى قعدت ارتاح ع الكرسى اللى ف الصالة وسرحت شوية قطع تفكيرى تليفونى الارضى بيضرب فرفعت السماعة وقولت الوو مين معايا ؟
فقالى :ازيك ياصاحبى نسيت صوتى ؟ بس معلش انا عازرك علشان ظروفك
فقولت ببرود : مزروق ؟؟!! ايوة يا اخر صبرى خير؟ ولو انك ميجيش من وراك خير ابدا
مرزوق : بلاش اسال عليك يعنى ؟ معلش انا اللى استاهل مانا اللى بسال كل مرة ماللى على على ياسيدى
فرديت وانا مخنوق منه : لخص وهات م الاخر عايز ايه؟ انا مش فاضيلك
انا تعبان وعايز انام
فقالى : اخبار الامور الصغير ايه ؟ انا سمعت انه هيعمل عملية بكرة ربنا يطمنك عليه
فقولت له اه بكرة بس لسة محدش بلغنى ميعادها امتى مروة عند امها م الصبح
فقالى : اكيد دبرت فلوس العملية انت مش قولتلى انك كنت هتروح المقابر علشان تخلص الليلة
قلتله :بزعيق مقدرتش مقدرتش انت معندكش دم يابنى ادم انت ايه شيطان ؟ حرام عليك بقى كفايه اللى احنا بنعمله عايز اعيش بنضافة يااخى
فقالى : شكرا ياصاحبى بقى دى اخرتها ده جزائى بعد اللى عملته معاك ؟ دلوقتى ضميرك بينقح عليك ونسيت ان الشغلانة اللى مش عاجبك دى هى اللى اكلتك الشهد
فقلت بعصبية بتعايرنى ياواطى ياقليل الاصل طب اقفل ومش عايز اشوف وشك ولا اسمع صوتك تانى الله يلعن ابو دى معرفه سوده روح ربنا لايسامحك
مرزوق : مع السلامه ياصاحبى
رزعت التليفون بعصبية ودخلت الاوضة خدت هدوم من الدولاب ودخلت اخد دوش علشان ارتاح
قلعت هدومى ودخلت تحت الدوش ودقايق وطلعت م البانيو ولبست الروب ووقفت قدام المراية
لاقيت وش يوسف ابنى بيضحك لى فى المراية وبعدين اختفى وظهرت صورتى تانى ف المراية
سميت ف سري وكملت لبس وخرجت م الحمام ودخلت الاوضة انام
شفت كابوس عمرى ماهنساه
حلمت انى نايم وجمبى الطفل المتكفن اللى شفته ف القبر وانا برخى الكفن عن وشه رقبته اتحركت وفتح عينه فجاه وبص لى وعينية ابيضت بشكل مرعب صرخت....!!
وبعدين اختفى
وفضلت بعدها ف دوامة كوابيس مبتخلصش واخرها انى ف القبر بدفن يوسف بايدى
صحيت مفزوع على ادان الفجر اتوضيت وصليت بخشوع ووفقت ادعى ربنا بسلامة ابنى ودخلت اكمل نوم
صحيت ع الظهر على رنة موبايلى ومراتى بتصرخ : الحقنى يازين احنا ف المستشفى تعالى حالا ابنك بيموت
يتبع....«4» والاخير بقلمي مصطفى المهدي
شغلتي حرامي جثث
صحيت ع الظهر لاقيت الموبايل جمبى ع الكوميدينو وعمال يعمل اهتزاز واكتشفت انى كنت عاملة صامت ولما فتحت الرسايل لاقيت اكتر من 10 missed call كلهم من مراتى حطيت الموبايل مكانة ودخلت الحمام لثوانى وطلعت على رنه الموبايل
فقلت : الوو
وسمعت مراتى بتصرخ : الحقنى يازين احنا ف المستشفى تعالى حالا ابنك ببيموت
فقلت وانا مش مصدق ببتسامه بلهاء ودموعى نزلت : بتقولى ايه يامروه ابننا جراله ايه؟ لا .. انتى اكيد بتهززى صح؟
كل اللى سمعته صوتها بعدها وهى بتعيط فزعقت ف التليفون الوو الو ردى عليا وبعدها الخط قطع
رميت الموبايل على اخر اخر ايدى وروحت الاوضة و لبست بسرعة ونزلت زى المجنون وركبت عريبتى باقصى سرعة
****************************
ورحت المستسشفى ف اقل من عشر دقايق ولما وصلت لاقيت مراتى واهلها وافقين قدام الاستقبال وكلهم فى حاله يرثى لها ومراتى جريت عليا ومسكتنى من ياقة القميص وصرخت فيا بانهيار :ابنى لو جراله حاجة هيبقى ذنبه ف رقبتك يازين مش هسامحك انت فاهم وقعدت تعيط وراحت اترمت ف حضن امها
وبعد ساعة م القلق طلع الدكتور بوش جاد جدا بيحاول يدارى بيه انزعاجة
مروة جريت عليه وقالت له دكتور ابوس ايدك ابنى جراله ايه؟
رد الدكتور : للاسف ياجماعة انتو اتاخرتوا كان لازم العمليه تتعمل ف ميعادها والقلب البديل اللى كان جابهولنا اهل الطفل اللى مات ف حادثة امبارح للاسف جسم ابنكم رفضه احنا فوجئنا بعد ماخلصنا العملية انه دخل ف كومة وهو دلوقتى ف العناية بقاله اكتر من اربع 4 ساعات وياعالم هيفوق ولا لا
صرخت : يعنى ايه ؟ اأأبنى هيموت خلاص ؟ لا مش ممكن مستحيل!!
وكل اللى موجودين انهاروا م العياط فالدكتور قال : ربنا معاه هو دلوقتى بين ايدين ربنا ومفيش حاجة دلوقتى ممكن تعملوها الا الدعاء له
وبعدين جت الممرضة تصرخ الحق يادكتور بسرعة
فدخل الدكتور العناية ودخلت وراه ولاقيته بيقولى : ممنوع يااستاذ
فقلت وانا بانهار : هو اية اللى ممنوع ده ابنى حرام عليكم
ودخلت لاقيت اجهزة وخراطيم متوصلة فى جسمة كله وسمعت الممرض المساعد بيقول للدكتور خلاص كده يادكتور مفيش فايده ؟
رد قاله : ايوة مفيش حل قدامنا غير كده و كده احسن بدل مايتعذب حرام الطفل المسكين ده يعيش ميت ف الدنيا واهله هما اللى يموتو بحسرتة
- انا كنت واقف بسمع كل الكلام ده عن ابنى ومش قادر اتكلم وعاجز انى انقذه ودموعى عماله تنزل
فالدكتور بدا يشيل عنه الاجهزه قربت عليه ومسكت ايده وحاولت امنعه وانا بصرخ لا انت بتعمل ايه ابنى مستحيل يموت ...ابنى لازم يعيش
فالممرض اللى كان واقف جمبى مسك ايدى وحاول يخرجنى رفضت وفضلت واقف ورجع الدكتور يكمل لعند ماشال كل الاجهزة ف جسم ابنى
وصفاره الانذار اشتغلت والجهاز اللى قدامة رسم خط مستقيم فراح الدكتور مغطى ابنى وقرب منى وقالى وهو بيطبطب على كتفى البقاء لله شد حيلك انت راجل مؤمن يااستاذ زين فصرخت لاأأأأأأ انت كداب ابنى لا
وجريت ناحيته وكشفت وشه وانا بعيط بحرقه وبوست راسه وخدوده لكن الدكتور قومنى بصعوبة وغطى جثة ابنى تانى وخرجت وانا منهار من اوضة العناية
مروة بصتلى بحرقة وهى بتعيط وسالتنى : فيه ايه؟
هزيت راسى بان خلاص كده ابننا مات
فصرخت وقربت منى وفضلت نزله ضرب فيا بالاقلام انا زى المتخدر مش حاسس بوجع ف جسمى اد ماكان الوجع ف قلبى جريت من المستشفى ف ذهول ركبت عربيتى ورجعت البيت وقعدت وحيد وحزين بعد ماضيعت ابنى ايوة انا اللى ضيعته
**********
وفضلت مراتى معايا لغايه ما ابنى رجع البيت وانا اللى غسلته بايدى صلينا عليه واتدفن وخلصت ايام الحداد وبعدها لمت هدومها وراحت عند اهلها وقبل ماتمشى طلبت منى الطلاق وقالتلى انها عرفت كل حاجة عن شغلى الشمال وانها متقبلش تعيش مع واحد غشاش زيي وف خلال 3 ايام نفذت لها طلبها وبعت لها ورقة الطلاق على بيت اهلها
************************
عدى كام شهر بعد كده ولاقيت الباب بيخبط فتحت لاقيت مرزوق فقولتلة
خير يازفت اية اللى جابك تانى ؟ انت البعيد ايه ؟ عديم الاحساس
قالى بكل برود : جيت اعزيك ف ابنك ولا مكنتش عايزنى اجى البقيه ف حياتك ياصاحبى
فرديت وقولتله البقاء لله وحده وشكرا واتفضل بقى من غير مطرود
فرد وقاللى : كلمتين واسمعهم منى قبل مامشى البيت اللى انت قاعد فيه ده بيتى وانا كنت سايبك فيه جدعنه قدامك اسبوع وتمشى تشوفلك بيت تانى انا نقلت العقد باسمى تانى تقدر تروح تعيش ف بيت الحج نعمان والدك الله يرحمه الراجل المبروك اللى له كرامات اللى انا نفسى كنت من خدامة
فقلت له : مشى مش همشى ماصدق انك واطى وقليل الاصل فعلا
فضحك وقاللى : برضة مش هرد عليك علشان انت الغالى ابن الغالى الله يرحمه
فقلت له وانا ابرد م التلاجة : ياسلام ع النبل والانسانية عملت ده كله في صاحبك والاخر عمال اعتبار لابويا انت ناسى ان كل اللى حصللى من تحت راسك
فقالى : غصب عنى ي صاحبى الافة ام ودنين بيشيلوها اتنين مش كده ولا ايه؟ انا مكنتش هقدر اسد ف الشغل ده من غيرك
فتعصبت عليه وهزيته بعنف وقلت له وانا منهار وابنى اللى مات وبيتى اللى اتخرب وكله بسببك
رد ببرود : قضاء وقدر ياصاحبى محدش له فى نفسه حاجة
فقلت له : انت خليتنى مديون لطوب الارض حتى ايجار البيت ده مش قادر ادفعه ومش لاقى شغل
فرد وقالى : مش انت اللى عملت فيها نزهى ولبست وش الامانه والشرف اشرب بقى
وبعدين سكت شويه
وقالى بمسكنه هديلك فرصة اسبوع كمان علشان انت صعبت عليا وهخليك تعيش ف البيت بس بشرط ؟
فقلت له :ايه هو ؟
فرد وقال :طول الاسبوع ده تبقى دراعى اليمين وتكمل معايا الشغل والاتفاقات ووقت ماعوزك الاقيك
قلت بغضب : انت بتلوى دراعى بقى لا مش هشتغل مش هكمل القذارة دى
فقالى : انت حر ياكده ياههد المعبد على دماغك فكر ورد عليا
مع السلامه ياصاحبى
وخرج وقفلت الباب وراه وانا بلعن اليوم اللى شفته فيه
-----------------------------------------
وبعد الاسبوع المتفق عليه وبعد ماشتغلت معاه ونفذت كل اللى طلبة من سرقة جثث واتفاقات مع تجار اعضاء وقبضت عمولتى وبعد ماتودكت ف الشغلانة وحبيتها تانى لكن صوت ضميرى نقح عليا وخوفى من ربنا واحساسى انه بيعاقبنى على اللى عملته ف حياتى فكرت وقررت ابلغ عنه وعن رجالته البوليس وللاحتياط رجعت تانى بيت ابويا علشان ميشكش فيا
لكن لاقيت مفاجئه تانية مستنيانى بعد موضبت البيت وبقيت ابات فيه بقيت احس بحاجات غريبة واسمع اصوات بالليل وهمس حواليه وانام واقوم على كوابيس وحس بوجع ف جسمى واجهاد غير مبرر واقعد اصرخ واتطوح زى السكارى كل مااسمع قران ونفس اللى كنت بشوفه بعد مادفنت ابويا مكنتش لاقى مبرر للى بيحصل وفضلت الاعراض دى لمده شهر ملازمانى كوابيس مبتخلصش بالليل وخيالات واوهام بالنهار
ف يوم رحت لصاحبى وانا منهار قلت له / الحقنى انا بدمر مش قادر اعيش ف البيت انا بموت كل لحظة شوف لى حل
مرزوق : بمنتهى البرود ماكنش يتعز ياحبيب اخوك عارف ليه علشان انت غبى
فقلت له : يعنى ايه؟
قاللى مفاجئه مكنتش اتوقعها : انا كنت صبى من صبيان الحاج نعمان الله يرحمه قصدى سيدنا نعمان كان اشهر دجال ف المنطقة ومفيش بيت ف منطقتنا مشفش كرامته وبرضة ماتكواش من ناره وكانت لدعته والقبركان خبير ف السحر بكل انواعة لغايه السحر الاسود واذيه الناس اكبر عشائر الجن المؤذى( وقاللى اسمائهم) كانوا بيخدموه ياما خد فلوس من ناس مقابل خدمات بيعملها
بس لما كبر الزمن هده وبطل شغل الدجل وكمل حانوتى لغايه مامات وانت عندك 18 سنه وانا كنت عندى 25 سنة وقتها
كنت مذهول وانا بسمعه وقولت له : طب وانت ايه اللى بتستفاده من كل ده؟
فرد عليا رد صدمنى اكتر : انا استفدت اكتر لما بقى مغسل انا كنت بساعده واقف على ايده وهو بيغسل ويكفن الميتين واشوفه وهو بيحط الاعمال ف بوقهم قبل مايكفنهم وينزل الترب يحط احجبة واعمال مع الجثث
فقلت له بعصبية : انت بتخرف بتقول ايه؟
قاللى : ايوة زى مابقولك كده كل اللى ابوك كان بيعمله انا كنت بساعده فيه واللى انت شفته يوم ما غسلت ابوك كان عمله الاسود واقولك حاجة كمان
السرير اللى انت بتنام عليه مليان حاجات من دى وانا مش هكدب عليك انا اللى حطيتهم ليله مانقلنا ابوك ع البيت بعد ماغسلناه مع بعض لما سيبتك لوحدك معاه دخلت اوضتك ونفذت خطتى
فاكر الاسبوع اللى اختفيت فيه بعد ماتخانقت معايا اخر مرة انا كنت هناك ف البيت ومشيت الجيران بعد ما اقنعتهم بان البيت مسكون واديتهم اللى ف النصيب علشان تبقى لوحدك ف البيت واكمل لعناتى معاك وانفذ اللى اتعلمته من سيدى نعمان عليك علشان الصراحة انا مش طايقاك زى مانت مش طايقنى
رديت قولت له : عملت كده ليه ياصاحبى ؟
قاللى :علشان انا واطى وندل زى مابتقول ومكنش ينفع اسكت وانت عايز تهد كل اللى انا بنيته وتبلغ عنى الحكومة
*********************
مشيت من عنده قبل وقت صلاة العشا وانا مذهول من كل اللى قاله ومش مصدق وانا ماشى ف الشارع سمعت الادان كنت بكابر وجسمى بيتقطع وحاسس بصداع غريب ومرضتش ادخل اصلى استنيت لما الشيخ خرج قاللى
-مدخلتش ليه تصلى معانا يابنى ؟
-انا تعبان ياسيدنا الشيخ
احكى لى بتحس باية
حكيت له كل حاجة بتحصل لى وقاللى انه معالج بالقران
اتفق معايا يزورنى علشان يرقينى ويحصن البيت
جالى الساعة 8 بالليل تانى يوم وقعد يقرا قران بدا الصداع يهاجمنى لحد ماختم بعد ساعة رقية شرعية وبعدين دخل اوضة النوم وقطع حشو المرتبة والمخدات وطلع منها الاحجبه وحرقهم على موقد فحم (المنقد) وجاب ميه مقرى عليها قران وطلب منى اشربها
ورش ميه مقرى عليها ف اركان البيت وبعد اسبوع انتهى كل شىء ورجعت حياتى طبيعية جدا ومبقتش اشوف حاجة وبدات انتظم ف الصلاة بعد ماكنت هاجرها وانتظمت ف شغل تانى والحمد لله بكسب منه بالحلال
اما صاحبى (مرزوق ) الله يرحمه ويسامحه مات محروق هو بيته ومحدش يعرف سبب الحريق لحد دلوقتى
بس اكتشفت يمكن متاخر ان طريق ربنا هو النجاه من شر لو قربنا من ربنا هنكون احسن ناس ف الدنيا
عدت سنتين
انا دلوقتي عندى 39-سنة
انا فين دلوقتى انا قاعد مع الشيخ ف بيته بقالى سنتين اصلى دلوقتى متجوز بنته رقيه ومخلف منها توأم
ولد وبنت زى القمر مسميهم (يوسف) وخديجة عايش مع عيلتى الجديده ف سعاده ف طاعة الله
وبكده انتهت حكايتى على خير ******
تفاااااااااااعل لايك 👍
تعليقات
إرسال تعليق