 |
=ع فكرة أنا موافقة أتجوزك.
-ده خبر هايل.
=بس مش عشانك!
-شفقة مثلًا و لا زكاة!
= أنا مش بهزر.
-اُمال هتتجوزيني ليه!
=عشان فيه حاجات ناقصاني و عايزة أحققها.. و الحل الوحيد إني أتجوز عشان أحققها.
-و هي ايه!
=ناقصني إني حد يشاركني فـ أنت مُطالب إنك تبقي جاهز للمشاركة معايا طول الوقت.
-يعني أعمل ايه!
=يعني لما أجيب لك صورة فُستان و أقولك ايه رأيك لو عملته بس هغير فيه كذا و كذا تتخيل و تقولي رأيك.
-و أنتِ مش بتلاقي حد يقولك رأيه!
=أنا مش بلاقي حد أوري له صورة الفستان أصلًا.. أنا عندي صور كتير قوي عايزة أتناقش فيها.. هتناقشني فيهم!
-و هجيب لك صور زيادة عشان نتناقش تاني.
=ماشي
=ناقصني كمان إن حد يسهر معايا.
-أنتِ بتسهري!
=بحب أسهر و كُل اللي حواليا بيناموا بدري فـ مش بلاقي حاجة أعملها فـ بعيط.
-عايزاني أشاركك عياطك!
=لأ مش كده.. عايزاك تحكي معايا طول الليل عشان ما أحسش اني لوحدي و أعيط.
-و ايه كمان!
=أما تلاقيني بعمل حاجة حلوة تقولي براڤو.
-براڤو.
=مش دلوقت أما أعمل حاجة حلوة.
-ناقصك حد يقولك براڤو!
=ناقصني حد يصقف لي ع كُل حاجة بعملها.. أفهمك الموضوع من أوله!
-ياريت.
=بُص أنا ثقتي فـ نفسي قليلة فـ أنا بحتاج تشجيع ع أقل حاجة بعملها ده بيعوض لي ثقتي فـ نفسي و ماعنديش حد يشجعني.. فـ أنت هتشجعني عشان تعالجني.
-عشان ثقتك بـ نفسك تزيد!
=براڤو عليك بدأت تفهم.
-ناقصك ايه كمان!
=قولي تعليقات حلوة ع لبسي.. مش عندي حد يفرح لي لما أجيب بلوزة جديدة.. أما تشوفني لابسة حاجة ناقشني فيها.. قولي اللون ده عليكِ أحلي من ده و المنقوش أحلي فيكِ من المقلم و كده.
-مش هتزعلي لو قولتلك اللون ده أحلي من ده عليكِ!
=مش هزعل عشان أنت كده بتشاركني و أنا بحب اللي يشاركني بس أنت كمان تقولها بـ ذوق.
-طب بـ المُناسبة اللون ده اللي لابساه..
=أحلي من لون الفُستان اللي لبسته فـ المقابلة الأولي!
-لأ الأتنين حلوين!
إبتسمت.
=أكمل لك!
-سامعك.
=اوعي تهيني أبدًا أبدًا!
-ليه!
=نعم!
-أقصد ايه خلاكِ تقولي كده!
=عشان أنا ع طول بسمع تعليقات عليا و ع تصرفاتي و شكلي، مُهينة ليا فـ أنا ناقصني حد يحترمني و يقدرني.
-حاضر.
=ع طول!
-يعني ايه!
=يعني حتي لو فـ يوم عملت حاجة تضايقك.. ماتحاولش تهيني عشان تعرفني إني غلطانة.. عقب ع تصرفاتي بـ تعليقات حنينة تخليني أتعلم مش أزعل!
إبتسم.
=بتضحك ليه!
-عشان أنتِ طيبة قوي.
رفعت صوباعي فـ وشه.
=اوعي تضحك عليا!
-و ده ايه علاقته!
=أصلي بسمع الكلمة دي كتير و بعدها بيستغلوا طيبتي دي و بيضحكوا عليا.. ماتعملش زيهم.
-مش هعمل أكيد.
=حتي لو ماحبتنيش.. حتي لو حبيت إنك تمشي فـ يوم.. أمشي بـ طريقة تخليني أحكي عنك و أقول إنه ماستغلش سذاجتي و طيبتي و ضحك عليا!
إبتسم بـ زيادة.
=بتضحك ليه تاني!
-أصلي أكتشفت إنك بريئة قوي.
=جايز.. جايز مش بفهم خُبث الناس و لوئمهم عليا بس بحس! و لو أنت فـ يوم حاولت تستغل برائتي دي هحس و هبعد عنك.
-هتبعدي بس! مش هتنتقمي مثلًا!
=لأ.. هبعد أكتر عقاب عندي لما ألاقيك بتأذيني إني هبعد.
-كمان هادية و مُسالمة!
=مش هأذيك لما تأذيني.. بس بُعدي عنك هيأذيك.. لـ إنك هتبقي جربت حاجات مش هتلاقيها فـ حد تاني و هتفضل طول عُمرك بتدور عليها فـ كُل بنت تقابلك و مش هتلاقيها!
من بعد ما وافقت عليه و أتخطبنا.. كان بيعمل كُل التصرفات اللي طلبتها منه، ماكُنتش بحس إن بيعملها عشان يرضيني لأ، كُنت بحس إنه بيعمل كده عشان من جواه شخص جميل.
-أقدر أسألك سؤال!
=إتفضل.
-ليه أنا! ليه وافقتي عليا! سمعت إني مش أول عريس أجي هنا و إنك بترفضي دايمًا فـ ليه أنا!
=عشان أنا كُنت بدور ع شخص مُعين هيقدر يعوضني اللي ناقصني و.. و لقيته.. لقيته لما لقيتك!
-ايه اللي لقتيه فيا خلاكِ توافقي!
=هقولك سري بس اوعي تستخدمه ضدي
الثاني والاخير
-أقدر أسألك سؤال!
=إتفضل.
-ليه أنا! ليه وافقتي عليا! سمعت إني مش أول عريس أجي هنا و إنك بترفضي دايمًا فـ ليه أنا!
=عشان أنا كُنت بدور ع شخص مُعين هيقدر يعوضني اللي ناقصني و.. و لقيته.. لقيته لما لقيتك!
-ايه اللي لقتيه فيا خلاكِ توافقي!
=هقولك سري بس اوعي تستخدمه ضدي!
-فهميني واحده واحده.
أخدت نفس و غمضت عنيا، عشان حسيت إني هكون مُحرجة و أنا بتكلم عنه.. فـ حبيت أقول كُل اللي جوايا من غير ما إنكسف، فـ غمضت..
=أما دخلت بيتنا أول مره، أنت اللي كُنت شايل الأكياس و والدتك فـ نُص الكلام قالت إبراهيم دايمًا يصمم يروح معايا السوق عشان يشيل عني.. ده معناه إن قلبك حنين و هتشاركني!
=و أما الكوباية إتكسرت من أختي و رغم إنك ضيف فـ بيتنا وطيت ع رجليك و لميت الإزاز كُله بـ إيدك معناه إنك مُتواضع و دي صفة تحمسني عليك.
=لما أخوك حكي قدامنا إنكم دايمًا تسهروا سوا بتسمعوا أفلام.. فرحت يعني اللي يخليك تسهر تسمع فيلم مع أخوك، أكيد هتسهر معايا!
=و عرفت إنك هتشاركني أذواقي و إختياراتي عشان والدتك كانت بتفرجني صورة العباية اللي جبتها لها فـ عيد الأم و بتقولي إن ذوقك أحلي ذوق.
-عجبتك العباية!
فتحت عنيا و إبتسمت و بصيت فـ الأرض.
=عرفتني إني هلاقي ذوق غير ذوقي و رأي حلو يساعدني فـ أي إختيار.
-كمان لماحة و ذكية!
إبتسمت.
- و جميلة.
=المهم تشاركني فـ كُل حاجة.
-هشاركك.
=و تقدر كُل كلمة هقولها.
-كُل كلامك جوه قلبي.
=ماتتعصبش عليا!
-بحبك.
=و تقولـ... ايه!
-بحبك.
=احنا ماتفقناش ع كده!
-حصل ايه!
=أنا ماقولتلكش تخوفني.
قرب مني.
-و هي بحبك بتخوف!
=اااا.. قوي!
مسك إيدي.
-كده عشان ماتخافيش.
=أنا كده خوفت أكتر.
شدد ع إيدي و كأنه بيحضنها.
-يبقي هتخافي ع طول.
"و كأن قلبي كان يعلم بـ موعد لقاءنا، كان يستقوي أمام الجميع، و استضعف حين رأك"
تعليقات
إرسال تعليق