 |
الجزء الخامس والسادس
الزوجه التانيه
نام عمر وفضلت طول الليل أفكر، كل اللي بيحصلي ده سببه إيه، فكرت في اصحابي لكن كنت عارفة ان محدش منهم هيصدقني، فضلت باصة لعمر وبفكر، هو ليه بيعمل كده، قمت ونزلت الدور الأرضي فضلت أدور في مكتبه، فتحت اللاب توب، أكيد هلاقي حاجة، فضلت ادور لكن مفيش فايدة مش عارفة أوصل لحاجة، وفجأة لقيت عمر قدامي مكنتش عارفة أقول له ايه ولا عارفة أبرر وجودي في المكتب في الوقت المتأخر ده واني بفتش في اللاب توب بتاعه،
- منال انتي بتعملي إيه هنا.. بتدوري على إيه؟
- بدور على الحقيقة يا عمر، انت عارف كويس اني مش تعبانة.
- لا.. انتي تعبانة.. فاهمة يعني ايه، مريضة، ومجنونة كمان
- اسكت يا عمر
- اسكت ايه، مش هسكت، لولا اني اتجوزتك كان زمانك في مستشفى المجانين
- بس ارجوووك
- لا لازم تعرفي كويس، انتي مريضة، وانا اتجوزتك واتحملت كل التعب والهم ده، وفي الاخر يكون ده جزائي، انا خلاص مبقتش قادر.
- أنا اسفة يا عمر.. اهدا طيب.. انا عايزة افهم!
- من عشر سنين، كان عندي ٣٤ سنة وانتي كان عندك ٣٢، جميلة ومحترمة ودمك خفيف، اتعرفت عليكي في القاهرة، كنت مستغرب، ازاي وحدة بالمواصفات دي متجوزتش لسه ولا ارتبطت ولا مرة، سألت كتير ومعرفتش السبب، فضولي وتعلقي بيكي خلاني من غير تفكير اروح لبيت باباكي واطلب ايدك منه، لقيته اتردد.. واتخض، كنت فاهم انه هيفرح، وبعد كام يوم رد عليا بالرفض!
مبقتش عارف أعمل إيه لكن ميأستش، روحت له وقعدت معاه.. فهمته اني بحبك، وعايز اعرف سبب الرفض!
كان متفاهم، قعدنا و أخد عليا عهد، ان الكلام اللي هيقوله عمره ما يطلع لحد، حكالي قصة مرضك:
منال من ساعة ما اتولدت وانا ملاحظ عليها تصرفات غريبة، يوم ما اتولدت ماتت امها، وعيشت معاها لوحدي، فكرت كتير اتجوز علشان اللاقي حد ياخد باله منها، لكن كل مرة بعد ما كنت ببقى خلاص متفق مع العروسة.. كانت حاجات غريبة تحصل، وكل مرة الجواز يبوظ، منال كانت بتبقى بتبص لي نظرات غريبة، كأنها مش طفلة، ساعات كنت بخاف منها. فكرت احطها في دار ايتام لكن خفت من غضب ربنا، قلبي مكنش بيطاوعني، كانت ساكتة، حتى وهي رضيعة لسه مكانتش بتعيط زي باقي الاطفال، عاشت طفولة وحيدة بسبب خوف الاطفال منها.. السكوت دايما بيخوف، كبرت منال وبدا الموضوع يتطور اكتر، بدأت تضحك وتتكلم وتعرف ناس.. فكرت اني هرتاح لكن كنت موهوم!
كانت قاعدة معايا في يوم بالليل، كانت بتتكلم وبتضحك، وفجأة لقيتها بتصرخ صراخ رهييييييب حاسس اني لسه سامع صداه، استمرت كده لحد الصبح.. سبتها وروحت اجيب لها الإسعاف.. رجعت لقيت وشها كله دم!
الحلقة 6
وقفت قدامها منهار، ومرعوب مش عارف اعمل ايه ولا فاهم ايه اللي بيجرالها، اخدتها على المستشفى قالولي معندهاش حاجة، محدش عارف ايه مصدر الدم ده إطلاقا، عيشت معاها سنين طويلة مكناش بنتكلم وكنا زي الاغراب، لدرجة انها كانت بتوحشني، لكن كنت كل ما احاول اقرب منها تبعدني، ومن ساعتها محدش اتقدم علشان يتجوزها، برغم ان محدش عرف السر ده، لكن سبب ان محدش اتقدملها فضل هو كمان سر ولغز معرفتش احله! وعشان كده انا مستغرب انك بتطلب ايدها مني!
بصراحة كلامه خوفني مش هنكر، لكن مكنتش عارف اخفي انجذابي ليكي، كنت متعلق بشكل مرضي، لدرجة ان هو نفسي قالي بلاش، بس أنا صممت يا منال، اتجوزنا وكانت أول ٤ سنين كويسين جدا، جبنا ولادنا، وبعدهم بقيتي إنسانة تاني، كل حاجة بتنسيها! انتي تعبانة يا منال ولازم اخدك لمستشفى، انتي ضربتي البواب بتاع العمارة لما حاول يمنعك قبل كده من الخروج لوحدك، كان ممكن يموت، حاولتي قبل كده تقتلي ولادنا، انتي تعبانه!
- اسكت يا عمر اسكت خالص.. انت كداب وانا مش تعبانة.. بتعمل كده ليه
- اهدي ارجووكي
- مش هاهدا، عايز تحبسني في المصحة ليه، انا معنديش ولاد منك انت كداب، انا لسه عارفاك من شهور بس!
- فوقي بقا، احنا متجوزين من عشر سنين!
مكنش قدامي أي حل ولا اي دليل على كلامي، كان لازم اسكت، اقنعت عمر اني اقتنعت بالعلاج، كنت بحاول اكسب وقت، لكن مفيش فايدة، معرفتش أعمل حاجة، لحد ما في لحظة خطر لي فكرة، حاجة مهمة جدا كنت ناسياها.. عقد جوازنا، انا عارفة مكانه كويس، عدى النهار ببطء، جه الليل وكنت مفهمة عمر اني هنام وبكرة هنروح المستشفى، ادالي منوم بس ماخدتوش، حطيته في الشاي بتاعه، وبمجرد ما نام نزلت!
الدنيا مكركبة جدااا، قلبت الاوضة، لازم يكون في حاجة.. لازم في حل، لو فقدت الامل هموت.. هنتحر!
بعد تفتيش كتير جدا اخيرا لقيتها، قسيمة جوازي انا وعمر، بتاريخ ٥ شهور فاتوا!!.. انا صح.. انا مش مجنونة، انت اللي مريض، لازم اخرج من هنا في اسرع وقت!
- كنت متأكد والله انك هنا
- امشي من وشي يا عمر.. ابعد عني.. انت مريض
- لا يا منال.. مش هسيبك تخرجي لوحدك، انتي تعبانة ولازم ترتاحي!
- أقسم بالله هقتلك يا عمر وخليها جنان بجنان.
- برضو مش هسيبك غير في المستشفى، انتي لازم تتعالجي!
- انت عملت كده ليه.. ليه بتعمل كل ده.. دخلت حياتي وخليتني احبك.. ودلوقتي عايز تجنني ..
- تعالي اوضتك دلوقتي وبعدين نتكلم
- ابعد عني. هقتلك
- عرفتي بقا انك مجنونه؟ و بسهولة بتهدديني بالقتل!.. انتي لازم تتعالجي يا تبقي في المستشفى.. ومتقلقيش على بيتك.. هاخد بالي منه.. ومن ولادنا يا منال
- انا معنديش ولاااااد..انا معرفكش.. انا معرفكش غير من ٥ شهور... قسيمة الجواز اهي، وانا هخرج حالا على القسم
- مش هتخرجي ولا تروحي مكان!!!!
مسك ايدي وحاول يشدني غصب عني، ليه كل ده بيحصل.. عايز مني ايه، عمر كان مريض، اه هو كان.. كان وانتهى!
لما مسك عمر ايدي كانت ايدي التانية بتضربه بالسكين!.. السكين اللي أنهى حياته وخلى حياتي تبدأ، مكنتش عارفة اتصرف ولا اتحرك.. كان قدامي على الارض غرقان في دمه، سبته زي ما هو بعد ما اتاكدت انه مات، فكرت اخرج بسرعة من البيت بس افتكرت كاميرات المراقبة، اللي ببساطة هتكشف مدة خروجي ولما تتقارن بوقت موت عمر هيتعرف اني انا اللي قتلته!
مش لازم اتسجن فيك يوم واحد يا عمر
جه في بالي حاجة، كاميرات المراقبة.. أكيد كل حاجة عليها.. أكيد هعرف كل اللي حصل منها!
اخدت الشريط ودخلت الاوضة بتاعتي وقررت مش همشي من البيت غير الصبح.. خليت الشريط معايا.. ونمت من غير ما احس.. ولما صحيت الصبح لقيت وشي وجسمه كله دم!!!!
علقوا ب 10 ملصقات
تفااااعل لأنى بكمل معاكم الاجزاء اهو 🤣
الجزء السابع
( ما قبل الاخيره)
الزوجه التانيه
إيه الدم ده، جه ازاي، مش عارفة وبترعش، قمت من مكاني بسرعة، دخلت الحمام اخدت دش وحاولت اللاقي اي مكان لاي جرح في جسمي ملقتش.. ومعرفتش سبب الدم ده إيه، غير هدومي وخرجت بسرعة ادور على الشريط بتاع كاميرات المراقبة!...
لقيته، وياريت ما لقيته، كذا مرة بصرخ في البواب ومرة ضربته.. فعلا زي ما قال عمر، شفت نفسي مع الولاد!! وكانت ماسكة ايديهم! يعني هما فعلا ولادي؟؟ طب ازاي.. ازاي وقسيمة الجواز اللي من خمس شهور بس!!
أنا فعلا مريضة؟ وقتلت عمر كمان! يارب لأ.. أعمل إيه دلوقتي!
اخدت موبايل عمر، فتحته وفضلت ادور في الاسماء لحد ما لقيت اسم متسجل ب (دكتور منال) مترددتش لحظة، كلمته بسرعة وطلبت اقابله ف اسرع وقت ممكن لكن مكنش ممكن لانه كان مشغول بمؤتمر، اتكلمنا وطلبت منه يساعدني وينقذني من الضياع اللي انا فيه، رد عليا الدكتور وقالي
من عشر سنين جالي جوز حضرتك عمر... حكالي على الأعراض اللي عندك واللي والدك كان حاكيهاله، وطلب مني اتابع حالتك، كنتي من أصعب الحالات اللي انا قابلتها في حياتي.. كنتي بتنامي وتصحي مش عارفة نفسك مين.. وكان عمر كل مرة بيدخل حياتك من تاني، لدرجة انه اضطر يطلقك علشان تتجوزوا من تاني وده حصل في فترة قريبة من حوالي ٥ شهور، كان شايف انه لازم يعمل كل حاجة عشانك حتى لو هيضحي بكل اللي في ايده، اولاد حضرتك موجودين في القاهرة عند اخته علشان ميتعرضوش لاي ضغط عصبي بسبب حالتك، ده كل اللي اقدر اقول لحضرتك عليه.. صحيح هو فين عمر!
معرفتش ارد عليه.. قفلت السكة!.. الكلام ده معناه اني مريضة بجد.. وقاتلة كمان... قتلت اكتر انسان ساعدني في الدنيا، اعمل ايه.. مش عارفة اعمل إيه.. سامعة دوشة كبيرة في دماغي، بسس بقا حد يوقف الصوت ده، انا خلاص مش قادرة.. يعني أنا منزلتش مصر.. ولا شفت الست والولاد.. كل ده كان ايه. وهم؟
نزلت بسرعة على اوضة المكتب.. يمكن عمر لسه عايش، يارب يكون لسه، لكن ملقيتوش، كنت هتجنن راح فين!!.. مفيش اثر لدم ولا اثر لحد مشي من هنا.
خرجت من البيت للشارع، اخدت العربية وفضلت ادور عليه، راح فين انا مش عارفة، اتصلت بالدكتور وقالي ان عمر راح عنده البيت وحالته صعبة جدا.. قالي انه بيموت، وقالي كمان أن عمر مقالش مين اللي ضربه وبيسالني اذا كنت اعرف، قلبي اتقبض ومقدرتش انطق، اخدت العنوان من الدكتور وجريت بأقصى سرعة، كان لازم اشوفه... لازم يعرف اني بحبه واني اسفة على كل اللي حصل. واني تعبانة جدااا.
وصلت لبيت الدكتور، بيت متطرف في مكان بعيد جدا، الدنيا كانت ضلمة وتخوف، فكرت ارجع.. فكرت ان مفيش حد هنا، لكن لقيته بعتلي رسالة بيقولي اطلعي، طلعت بسرعة ورنيت الجرس، محدش بيرد، وفجأة الباب اتفتح ولقيت عمر هو اللي فتح!
يتبع
ادعموني بعشر ملصقات ليصلكم الحلقه الاخيره
تفاااعل علشان انزل الاخيره اهو بكمل الاجزاء تابعونى يا قمرات
الحلقة الثامنة(الأخيرة)
الزوجه الثانيه
- إيه ده!! عمر؟.. أنت كويس صح.. عمر رد عليا.. انا عرفت كل حاجة، انا آسفة!
- ادخلي
- عمر انا اسفة والله.. كان عندك حق انا تعبانة، وانت لازم تساعدني انا مليش غيرك، ساعدني.. الدكتور فين!
- بقولك ادخلي بقااا
فجأة عمر شدني من ايدي وفضل ساحبني لحد اوضة ف اخر البيت، البيت اللي كان ساكت وضلمة ومليان تراب كأنه بيت مهجور، اخدني لحد اوضة فيها كرسي قعدت عليه وقفل الباب!
- يا عمر فيه ايه.. فين الدكتور
- مافيش دكتور هنا..
- لا فيه.. انا لسه مكلماه.. اهو شوف الموبايل.. هو اللي ادالي العنوان ده
- اللي كلمك هو انا، ايه.. بعرف اغير صوتي ولا انتي ايه رايك!
- يعني ايه.. عايز مني ايه.. ابوس ايدك بقا انا مش قادرة خلاص.. انت مين!
- كان مفروض الاول انك تسالي انتي مين!
- انا مين.. انا مين يعني ايه..
- انتي مين يعني انتي مش منال اصلا.. انتي مش منال
- انت مجنون.. بتقول ايه.. اه.. انت عايز تجنني.. بتعيد تاني القصة بس السيناريو مختلف صح! يا عمر كلمني.. ارجوك وقف المهزلة دي.. عايزة افهم وبعد كده اعمل اللي انت عايزه!
- عالم الأرواح غريب أوي مش كده؟
- مش فاهمة!
- هتفهمي، لكن اعرفي حاجة.. بعد ما هتفهمي هتكون نهايتك.. الاختيارات مش كتير.. تختاري تعيشي متغمية وتايهة.. ولا تفهمي وتنتهي!
- انت اكيد مجنون!
- بالعكس.. انا واقعي جدا.. بصي حواليكي..شوفي العالم.. الناس اللي قرروا انهم يفهموا ماتوا.. لكن اللي عايزين يعيشوا قرروا انهم يفضلوا طول عمرهم اغبياء مش فاهمين.. حتى لو فهموا.. بيفضلوا وبيختاروا الغباء والجهل!
- الاختيار مش بين الغباء والموت.. الاختيار بين الجنون والموت.. وانا عمري ما هختار الجنون!
- تمام.. جوابك وصل..
منال كانت طفلة غير كل الأطفال.. يمكن كان هيكون عندها توحد.. يمكن مرض نفسي فصام.. محدش كان عارف.. كانت لوحدها.. وضعفها كان أفضل شيء فيها!
- ازاي الضعف يكون ميزة
- ميزة بالنسبة لينا!! احنا بندور على الضعاف.. وممكن نطلعهم من وسط كل البشر!
- انتم؟ انتم مين!
- احنا اللي هما احنا.. العالم الحقيقي، انتو بتسموه العالم الاخر.. لكن الحقيقة ان احنا العالم الاول.. الاساسي..
- انا....
- متقاطعنيش.. لمصلحتك... اكملك.. منال كانت ضعيفة ووحيدة وساكتة.. ودي المواصفات اللي كنت محتاجها، كبرت وبقيت زي ما هي، فاهمة ان قراراتها ب ايدها. فاهمة انها رافضة الارتباط.. لكن متعرفش ان احنا اللي كنا رافضين.. انا اللي كنت رافض!
كانت شبهها بالظبط.. نسخة منها!
- نسخة من مين؟؟؟
- حبيبتي.. مراتي، اللي راحت وسابتني.. عشان كده قررت اني لازم اجيب واحدة مكانها.. مش اي واحدة.. لازم واحدة تشبه لها بالظبط... ومن هنا بدأت!
ظهرت في حياتك.. حبيتيني ودي كانت أصعب خطوة، كان لازم اعمل المستحيل عشان تحبيني.. وبعدها.. وبارادتك هتنزلي معايا.. هتروحي معايا لعالمنا.. او هبقى معاكي هنا!!
لكن حصل حاجة مكنتش متوقعها ابدا.. بدأتي تدوري.. تفكري.. تسألي.. روحتي القاهرة ودخلت البيت اللي كنت معاها فيه.. كان لازم اوقفك عند حدك!.. اللي شفتيهم هناك دول اهلي، وانا اللي سبت صورتك هناك.
كل خطوة كنتي بتخطيها كنت راسمهالك.. وانتي كنتي بتنفذي.. شريط الكاميرا اللي شفتيه انا اللي كنت حاطه.. واللي شفتيها فيه دي مكانتش انتي.. كانت هي!
مفيش دكتور كلمك ده كان انا.. واوعي تفتكري ان الهبل اللي عملتيه بالسكينة اللعبة بتاعتك ممكن يقتلني.. مهما عملتي عمرك ما هتقدري تاذيني.. انتي قدري.. وأنا قدرك... ودلوقتي بعد ما فهمتي.. تفتكري هعمل ايه!!
انتي ضعيفة.. كان سهل اقناعك بكل حاجه.. بسهولة حطيت عربية عطلانة بدل عربيتك.. وبشوية تفكير بسيط كان ممكن تفهمي.. ببساطة لانك دلوقتي جيتي بالعربية!!
خلاص فهمتي!!
- فهمت....
فجأة الدنيا ضلمت... صراخ رهيب..
تاني يوم: تم العثور على جثة سيدة اربعينية في منزل مهجور، وكانت الجثة مشوهة الملامح ولم يستدل عليها. وتم تقييد الحادثة ضد مجهول!!!!
تمت
ادعموني بعشر ملصقات اذا كانت الروايه نالت اعجابكم
يلا تفاااااااااعل علشان انزلكم القصص كامله
تعليقات
إرسال تعليق