******* لعنة الحب *******
****** الجزء الخامس والسادس *****
فى بيت زياد تانى يوم الصبح
ام زياد بتتكلم فى التليفون
- الو .. ازيك ياعمتى
= اهلا يا نجوى ازيك
- الحمدلله .. انا عايزة احكيلك على حاجة غريبة حصلت امبارح
= خير .. انا حاسة ان صوتك مخضوض
- امبارح بالليل حسيت فجأة ان فيه روح غريبة فى البيت .. ولما خرجت من اوضتى قلبى اتقبض اوى من ناحية اوضة زياد .. ولما ادخل الاوضة لقيت ان الباب مقفول .. بس لما قريت عليه اتفتح معايا
= وبعدين شوفتى حاجة لما دخلتى الاوضة ؟
- حسيت بتقل كتير فى الاوضة ولما فتحت النور حسيت ان اللى كان موجود اختفى
= شوفتى بعينك حاجة ؟
- لا حسيت بس
= وعملتى ايه بعد كده ؟
- زى ماقلتيلى لما احس باى روح غريبة .. عملت كل اللى كنتى قايلالى عليه وحصل حاجة تانى ؟
- لأ .. بس انا قلقانة اوى على زياد
= متخافيش .. لو حسيتى بأى حاجة تانى ابقى قوليلى .. بس خلاص انتى كده بيتك اتحصن ومش هيدخله اى جن
- اللهم احفظنا .. والنبى ياعمتى ماتقوليها كده صريحة
= ماتخافيش .. بس ابقى ابعتيلى زياد ارقيه واتطمن عليه
- حاضر ياعمتى .. هجيلك انا وهو النهارده
= تعالوا .. بس زى ماانتى عارفة تيجوا وتمشوا قبل المغرب
- حاضر حاضر .. انا عارفة
= خلاص هستناكم .. مع السلامة
اتصل زياد بهالة وقال : ها ياهالة .. كلمتى باباكى ومامتك ؟
هالة : ايوة يا زياد .. وبيقولوا لو يوم الخميس يناسبكم ؟
زياد : اكيد طبعا يناسبنا .. احنا مستنيين انكم تحددوا ميعاد من زمان ولولا اللى حصل لهيثم كان زماننا اتخطبنا
هالة : خلاص يوم الخميس ان شاءالله
فى اللحظة دى اشتعلت عيون هالة .. وابيضت... ورجعت لطبيعتها تانى زياد : طيب مش هشوفك قبل الخميس ؟
هالة : لأ .. كفاية يوم الخميس .. واشتعلت عين هالة تانى .. وابيضت ورجعت تانى
فى ميعاد المقابلة كان زياد فى اسعد حالاته
راح زياد ووالده ووالدته بيت هالة .. وبرغم الحزن الواضح جدا فى بيت هالة على الام والاب الا انهم كانوا بيرحبوا بزياد وبأهله
دخلت الام لهالة وقالت لها :
يالا ياهالة .. تعالى عشان تسلمى على الناس
"هالة : طيب
الام : انتى مش فرحانة ياهالة ليه زى كل البنات ؟
هالة : عادى
الام : مش انتى بتقولى زميلك ؟ يعنى تعرفيه والولد من كلامه باين انه بيحبك .. يبقى فيه ايه ؟
هالة : مفيش .. انا جاية اهو
مشيت الام ووراها هالة .. واول ما دخلوا على الناس انتفضت ام زياد وبصت لهالة .. ارتبكت هالة وبصت لام زياد
قامت ام زياد وقفت وهالة ثابتة فى مكانها والاتنين بيبصوا لبعض وكل الموجودين مستغربين وقوف هالة وام زياد بالطريقة دى قصاد بعض
ام زياد : يالاااا .. احنا لازم نمشى من هنا
ابو هالة : خير يا حاجة .. فيه ايه؟؟
ام زياد : مفيش حاجة .. يالا يا زياد
قام ابو زياد وراها وزياد حاول يخليها تستنى .. لكنه فشل قصاد اصرار الام فى بيت زياد :
زياد : ايه اللى حصل ياماما .. اول ما شوفتى هالة ايه اللى حصلك ؟
ام زياد : مش هينفع تتجوزها
زياد : ليه ياماما .. انتى عارفة انى بحبها
الام : مستحيل .. مش ممكن
زياد :ليه بس ياماما مستحيل ومش ممكن ؟ .. انتى تعرفى عنها حاجة ؟
الام : هالة دى مش طبيعية .. انا شوفتها
زياد : يعنى ايه ياماما الكلام اللى بتقوليه ده .. يعنى ايه مش طبيعية ؟
الام : يعنى مش من الانس
زياد : انتى بتخوفينى عشان متجوزهاش .. صح ؟
الام : لالالا .. انا خايفة عليك .. دى عايزة تأذيك
زياد : تأذينى ازاى .. وعشان ايه ؟
الام : معرفش .. كل اللى اعرفه انها مش من الانس .. دى روح شريرة
فى اوضة التربى
وهو قاعد مع مراته قالها :
على فكرة .. انا ضميرى مش مستريح
الزوجة : ليه بس .. وانت ايه ذنبك ؟
التربى : الراجل اللى كانت بنته وقعت فى القبر .. قلبى وجعنى عليه اوى وهو بيدفن ابنه
الزوجة : واحنا مالنا .. ده قدر
التربى : بس لازم كنت اقوله اللى اعرفه من اول مرة
الزوجة : اللى حصل حصل
التربى : لا انا ضميرى مش مستريح .. هو بييجى كل جمعة يزور ابنه .. بكرة لما ييجى لازم اقوله
********** لعنة الحب ***********
****** الجزء السادس والاخير *****
فى بيت زياد
تانى يوم على التليفون :
- ايه رأيك فى اللى حكيتهولك ده ياعمتى ؟ .. زياد مش مصدقنى وزعلان منى
= هو فين ؟ .. هاتيه وانا اكلمه
- لسة مجاش من الصلاة .. لما يجى هخليه يكلمك
وقبل ماتخلص جملتها سمعت صوت زياد بيفتح الباب
- اهو جه ياعمتى اهو .. زياد .. عمتى عايزة تكلمك
جه زياد واخد التليفون من والدته
- ازيك يا عمتو عاملة ايه؟
= ازيك انت ياحبيبى .. مزعل ماما ليه ؟
- انا برضه اللى مزعلها ياعمتو ؟ .. هى اللى بتقول كلام غريب عن البنت اللى بحبها
= انت بتثق فيا والا لأ ؟
- طبعا ياعمتو
= ايه رأيك اجى انا معاك واشوف البنت ؟ .. بس اللى اقولهولك تعمله بعد كده .. ماشى ؟
- ماشى ياعمتو .. انا موافق
= طيب كلمهم النهارده وخد منهم ميعاد تانى واعتذر عن اللى حصل وقول ان مامتك افتكرتها واحدة تانية تشبه لها كان حصل بينهم مشكلة قبل كده وان مامتك لما رجعت عرفت انها اتلخبطت .. وقولهم ان عمة ماماتك جاية معانا عشان تعتذر
- حاضر ياعمتو
وكعادة ابو هالة راح يزور قبر ابنه بعد صلاة الجمعة وجه التربى قرب منه وقال : ازيك يااستاذ
ابو هالة : الحمدلله
التربى : انا عايز اقولك حاجة وندمان انى مقلتهاش من زمان
ابو هالة : خير .. قلقتنى
التربى : بص يابيه .. القبر اللى بنتك وقعت فيه ده ملعون
ابو هالة : ملعون ازاى يعنى ؟
التربى : من كام سنة كان في بنت انتحرت بانها ولعت فى نفسها وماتت محروقة واتدفنت فيه .. ومكانش حد ابدا بيزورها .. وبعد سنة جات واحدة قعدت جنب قبرها تعيط كتير وزى طبع الستات مراتى راحت قعدت جنبها وقعدوا يتكلموا ويحكوا مع بعض .. عرفت ايه بقى؟
ابو هالة : ها .. كمل
التربى : الست دى كانت خالة البنت المنتحرة وكانت لسه راجعة من السفر كانت مع جوزها برة من سنين .. المهم البنت دى ابوها وامها ماتوا قبل انتحارها ب 5 سنين وكانت عايشة مع اخوها الكبير .. اللى كان بيعاملها وحش اوى بحجة انه راجل وهى بنت .. ضرب وبهدلة وخدمة ليه ومفيش اى حاجة هى عايزاها يعملهالها .. كانت بتشتكى لخالتها ومع ذلك مكنتش قادرة تعملها حاجة .. واللى زاد بقى انها حبت واحد صاحب اخوها اوى وكان بيعاملها كويس وفضلت مدة طويلة بتحبه فى صمت وكل املها اليوم اللى هيطلبها من اخوها .. لحد مااتفاجئت يوم انه هيتجوز .. مقدرتش تستحمل الصدمة وحرقت نفسها
ابو هالة : طيب كل ده ماله ومال بنتى ؟
التربى : احنا كنا بنسمع اصوات فى القبر ده .. وبعد فترة لقينا غطا القبر مكسور وكل مانصلحه يتكسر ف سيبناه .. ومرة حصل نفس اللى حصل لبنتك .. واحدة وقعت فيه وبعدها بقوا اللى حواليها يتأذوا واهلها جابوا حد وخرجت الروح من بنتهم من يجى سنة .. لما بنتك وقعت انا خوفت اقولك وقلت بلاش اقلقك يمكن ميحصلش معاها اللى حصل قبل كده .. بس لما عرفت ان ابنك مات ضميرى عذبنى وقلت لازم اقولك
بعد ماخلص التربى كلامه .. وقف ابو هالة مش مصدق اللى سمعه .. معنى كده ان هالة هى اللى حرقت ادم وهيثم .. طب يتصرف ازاى .. ويقول لمين؟؟؟
اول ما دخل بيته .. كان هيحكى لمراته بس خاف وفضل انه يستنى لما يسأل عن حد من اللى بيفهموا فى الارواح وهو اللى يتصرف
اتفاجئ ابو هالة بميعاد زيارة زياد واهله .. وفضل السكوت وهو خايف وقلقان
لما وصلوا اهل زياد ومعاهم عمة والدته .. استقبلوهم اهل هالة بالترحاب واعتذرت الام زى ماعمتها قالت .. ودخلت ام هالة تنادى عليها
اول ما وصلت هالة وقفت قدام العمة وكانت العمة قاعدة فى مكانها تبص عليها .. اشتعلت عيون هالة .. وابيضت واشتعلت عيون العمة .. وابيضت حطت هالة ايدها على وشها وكانت هترجع اوضتها تانى لكن قامت العمة بقفزة واحدة وكأنها بصحة شاب فى العشرين ومسكتها من ايدها قبل ماتدخل اوضتها وبصت العمة للموجودين وقالت : سيبونى مع العروسة شوية
خرجوا كلهم من الاوضة وعلى وشهم تعابير مختلفة .. ام هالة وابو زياد مش فاهمين حاجة لكن ام زياد وزياد فاهمين .. اما ابو هالة فكان محتار ومش عارف هى تقصد ايه؟
تحولت هالة الى واحدة محروقة .. وتحولت العمة لشابة قوية بعيون حادة النظرات وكانت مازالت ماسكها من دراعها وقالت لها : انتى مين؟ .. وفين هالة ؟
انا هنا عشان انتقم من كل الرجالة
العمة : ليه ؟
الروح : اللى حبيتهم أذونى .. يعنى مفيش حب واى حد بيحب يبقى لازم يتحرق
العمة : اشمعنى هالة اللى اختارتيها ؟
الروح : انا مختارتش حد .. هى اللى قربت من مكانى وانا كنت مستنية اى حد عشان ألبس جسمه واقدر انتقم من اللى أذونى وكل اللى زيهم
العمة : ارجعى مكانك .. ومتخرجيش تانى لاى حد
الروح : لا .. لازم انتقم
العمة : اسمعى الكلام واخرجى من هالة
لأ ..انا مش هخرج غير لما انفذ انتقامى
مسكها الشابة المتلبسة العمة بقوة وبصت فى عينيها وتمتمت بكلمات غير مفهومة واشتعلت العيون .. صرحت الروح المحروقة واشتعلت نار كبيرة بلعت الروح المحروقة وهالة وقعت على الارض والعمة رجعت لشكلها الطبيعى ... نادت على ابو هالة وقالت له : شيل هالة نيمها .. ولما تصحى هتلاقيها ناسية كل حاجة عن الشهور اللى فاتت .. قولولها انها كانت فى غيبوبة ومحدش يحكى لها اى حاجة عن اللى فات لانها مش هتفتكر حاجة ولا تعرف حاجة خالص عن اللى كانت فيه لانها مكانتش هى
ام زياد : والروح اللى كانت لابساها ؟
العمة : خلاص مبقتش على الارض خالص .. راحت عالم الارواح
ام هالة وهى بتعيط : روح ايه؟ .. انتوا بتقولوا ايه ؟
ابو هالة : انا هبقى احكيلك اللى عرفته النهارده .. بس انا مش فاهم حضرتك عملتى ايه ياحاجة ؟ لكن انا متشكر ليكى جدا
العمة : الحمدلله انى قدرت اريح الناس من الروح دى لانها كانت هتفضل تحرق فى الناس
بعد شهر .. كانت خطوبة زياد وهالة وكل اللى تعرفه عن الشهور اللى فاتت ان وقعتها فى القبر سببت لها اصابة فى المخ دخلتها فى غيبوبة وان هيثم وادم ماتوا فى حريق قضاء وقدر وطبعا ابو هالة ومامتها .. فى اسرع وقت نقلوا لشقة فى منطقة تانية لاكتر من سبب منها يحاولوا يبعدوا عن الشقة اللى بتفكرهم بهيثم ومنها ان هالة متعرفش من اى حد من الجيران حكاية حريق ادم وهيثم الغريبة جدا
******* النهاية
روعه وجميله جدا
ردحذف