 |
(عاشقة الرجال )
الجزء الثالث ...
للكاتبه / مي علي
ظبطت الفرح وكل حاجه بقت تمام
الساعه جت تسعه وتسعه ونص وعشره إلا عشره وانا ف الكوافير والبيه لسه موصلش وتليفونه مقفول
فجأه تليفوني رن ، وكان مع مرات أبويا وجاتلي جري بيه
لقيته رقم غريب رديت بسرعه
لقيت واحد بيقولي ....
_ الو سلام عليكم
- وعليكم السلام مين معايا
- حضرتك مدام سماح
_ايوه ياخويا في اي
- المحل بتاع حضرتك اتسرق
-انت بتقول اي يا جدع انت؟
-والله يا ست المحل بتاعك اتسرق واتساب مفتوح وانا والرجاله دخلنا لقينا الخزنه علي البلاطه فبلغنا الحكومه
وصبي من صبيانك هو اللي عطاني الرقم
- يالهوي يا نهار اسووووود طب انا مسافة السكه وجيالك ياعم
وقفلت معاه بصتلي مرات ابويا وقالت...
- اي يابت في اي
- اتسرقت يا لوزه اتسرقت... ألعيني الزفت ده بسرعه
- يابت طب والفرح
- يندعق انتي شايفاه جه يعني... انا شامه ريحت غدر ف الموضوع
وفعلا غيرت الفستان ونزلنا جري
وروحت ع المحل كانت الحكومه وصلت
عملو اللازم وطلعت معاهم ع القسم عشان المحضر
وجابو شهود وأمرو انهم يفضو الكاميرات
الظابط قبل ما اسمع شهادة حد او اشوف الكاميرات قالي ان المحل اتفتح بالمفتاح ومفيش اي كسر ف القفل
والخزنه كمان مفيهاش اي محاولة فتح
معني كده ان اللي عملها حد من صبياني
انا توقعت هو مين بس قولت يابت اصبري يمكن ظالماه
لكن الشهود دخلو وقالو
انهم شافو عبدالله داخل هو وواحد معاه
واستغربو انو جاي والنهارده فرحه
ولما سأله الراجل اللي ف المحل اللي قصادي
قالو ان في حاجه مهمه انا طلبت منه يعملها ويمشي
ومشفهوش وهو خارج
بس عدي وقت والمحل مفتوح والناس وقفت علينا ومفيش حد جوه
فدخلو يشوفوه
والكاميرات لما اتفضت لقوه خارج بشنطه هو والواد اللي معاه وسابو المحل مفتوح
انا سمعت الكلام ده وشوفت بعيني وفضلت اصرخ
- يعني اي... سرقني وهرب
يخربيتي دول 50 ألف جنيه
واحد قال...
هو في حد يسيب مبلغ زي ده ف خزنة المحل... معلش بقي يعوض عليكي يا ست
- يعوض عليا ده... لازم تلاقوه دي فلوسي شقايا
ويمين بالله لأخرب بيتو
سبتهم ف القسم وانا عارفه اني لا هاخد منهم حق ولا باطل
جريت علي بيت اهلو
وطلعت أرزع ع الباب
واحده جارتهم فتحتلي..
- بقولك اي يا ست... هما الناس اللي هنا فين راحو فين
- محدش ساكن هنا ياختي
- نعم ياعنيا يعني اي... عبدالله وابوه وأمه وأخواته... مفيش واحده هنا اسمها ام عبدالله
- ياست بقولك الشقه دي فاضيه مفيهاش حد يجيلها سنتين
- انتي مجنونه يا وليه ولا اي انا جيت هنا بنفسي وكان في ناس هنا
- امتي الكلام ده يابنتي طيب
- من ايمت شهرين
- من ايمت شهرين... ااااه با حبيبتي دول مش ساكنين دول اجروها مفروش يومين ومشيو عشان الحلفان يوم بليله
اصل الشقه دي صاحبها بيأجرها مفروش بعيد عنك واحنا بنحاول نمشيه من هنا
- مأجرها مفروش هههههههه
هههههه هههههههه
- مالك يا حبيبتي بتضحكي ليه
مردتش عليها وسبتها وخرجت
فضلت ماشيه ف الشارع تايهه وبفكر
يعني اي... كل ده كان بيخطط عشان يسرقني وضحك عليا
طب واللي حستو ناحيته وثقتي فيه
والناس اللي سمعتي وسطهم هتتندغ زي اللبانه
وفلوسي... يعني ايييي
طلعت تاني ع القسم وحكيتلهم اللي حصل
قالولي روحي ولما يحصل جديد
هنكلمك
شهر بحالو مفيش جديد
مرات ابويا قالتلي استعوضي ربنا فيهم
وهو اختفي زي ماتكون انشقت الأرض وبلعته
ده النيله السوده دي بس يارب
فضلت متابعه الحكومه والموضوع فتره لحد ما زهقت
قفلت محلات كلها وبعتها
سبت محل واحد بس تحت إدارة ابويا
اشتريت ارض وكام عماره
وقولت أجرهم وهيجيبولي فلوس حلوه
مفيش احلي من الإيجار اليومين دول
ولا حسابات بقي ولا وجع دماغ
قصرو
ابتديت فعلا ف الموضوع وجيبت سمسار ودفعتله فلوس ورسيته ع الحوار
ومعداش خمس شهور وكانت نص العماير سكنت
حتي انا نقلت ف عماره منهم تشرح القلب ووضبت شقه وقعدت فيها
كان في قدامي واحده ست مبقلهاش سنه متجوزه
وقاعده هيا وجوزها
كانو ساكنين ف الشقه اللي قصادي
كانو عارفين طبعا اني صاحبة البيت
انا كنت شوفت الست بس مقابلتش جوزها
وف يوم وانا خارجه وبفتح باب الشقه لقيت جوزها كمان خارج
اول ما عيني جت عليه قلبي انخطف معرفش ليه
وحسيت احساس جميل
بصراحه هو اللي كان جميل اوووي
كان جسمه مفرود وملامحه تشد
زي الولا مهند التركي كده
نسخه منه
ركبت انا وهو الاصانصير
هو قال صباح الخير دوبت اكتر
ونزلنا وانا عيني ما اتشالتش من عليه
بس استفزني اوي انو مبيبصليش
بقي واحده بالحلاوه دي والجمال ده ويطنشها
ده انا حتي احلي من مراته المقيحه
قلبي اتخطف بيه وبقيت براقبو وبفكر فيه ليل نهار
واقف قدام الباب ابص من العين السحريه عشان اشوفه
وبتعمد اخرج وهو خارج
بس هو كان بردو مطنشني
لحد مافيوم
الباب خبط وفتحت لقيتو هو
تنحت قصادو اصل انا بضعف وهو قمرررر
قولتله...
ايوه
قالي...
معلش كنت بستأذنك بس تستني عليا ف للأيجار بس الشهر ده... اصل المدام حامل وكده وانا يعني حضرتك مقدره الظروف
طبعا لقيتها فرصه حلوه
رديت وقولتله...
ولا يهمك متقولش كده خالص عادي تحت امرك احنا جران يعني مفيش حاجه
- الف شكر ربنا يكرمك
- ويكرمك
كنت بتكلم معاه بحنيه وصوت واطي وحسيت اللمعه ف عينيه
من بعدها بقي في كلام بنا وانا نازله
او وانا واقفه ف البلكونه بقي يصبح عليا
ولاحظت انو بقي معايا ومتابعني بعينيه
منا بردو عينيا جابتو علي ملي وشو
لحد ما فيوم خبط عليا ومراته كانت تعبانه
بصراحه صعبت عليا فجريت انا وهو واخدنها علي المستشفي
لقينها سقطت
فضلت تعيط وهو فضل ساكت
انا عمري مجربت الاحساس ده
بس شوفت منو حنيه عليها اتمنيت اخد واحد زيو
وروحناها ودخلها ترتاح
انا طبعا فضلت معاهم ف الشقه قال يعني بتطمن عليها
بس لاحظت ان هو مشلش عينيه من عليا وانا كمان كنت ببصله من تحت لتحت
وضايفني حاجه وفضل قاعد ساكت وباصللي وانا مشلتش عيني من عليه
وف اليوم ده اخدت رقم تليفونو
ورجعت علي شقتي
لا واي انا ومراته بعد كده بقينا حبايب اوي
وأصحاب
قولت خير وبركه أن انا وهيا كويسين مع بعض
عشان هو عاجبني وعارفه اني عجباه
فقلت ازود العيار حبه وبدل نظرات ممكن ضحك وهزار
اتصلت بيه اول مره بحجة اني بسلم عليه
بعدها هو اللي بقي يوماتي يكلمني
وعلي طول الصبح قبل ما ينزل يبقي عاوز يشوفني
بصراحه وقع ع الاخر وخططت اني هوقعه لحد مانتجوز
ومراته صحبتي يعني لو بقيت ضرتها مش هنتشاكل
وقربنا من بعض اكتر واكتر
وبقينا نقعد ونتكلم
وعزمتهم مره علي الغدا عندي
وهو مشالش عينيه من عليا
بس ف اليوم ده مراته ابتدت تلاحظ اوي
وبقت عينيها علينا
وعليا انا بالذات
بس هو مبعدش عني
وبقينا بنتقابل بره
وصارحني انو بيحبني وعوزني
بس انا قولتلو ف الحلال طبعا
وعدي شهور واحنا كده
بس اي انا محافظه علي نفسي اه
وعشمت نفسي خلاص اني هتجوزو
لكن حصل حاجه غيرت خطتي دي كلها
وصحيت الصبح لقيت .....
يتبع .. تفاعل ورأيكم
للكاتبه / مي علي
( عاشقة الرجال )
الجزء الرابع ...
تفاعلو بعشر ملصقات لو سمحتم عشان توصل لناس أكتر فضلا وليس أمرا
للكاتبه / مي علي
صحيت الصبح لقيتهم لامين حاجتهم ومشيو
وسايبينلي شهر الإيجار المتأخر
مع واحده ف العماره اسمها شوشو
طلعت خبطت عليا ولاقيتها بتقولي ..
خدي يا سماح الظرف ده سابهولك الناس اللي كانو ساكنين قدامك
خدت منها الظرف وانا بسألها وقولت ..
هما راحو فين
- ياختي مش عارفه والله من النجمه وفي رزع وخبط وبيشونو العفش
والست خبطت عليا اديتهولي من سكات ومشيو
- طيب يا شوشو شكرا
ونزلت وانا دخلت جري ع الاوضه
ومسكت تليفوني ورنيت عليه
لقيت اللي بترد وراحت قايله...
- عاوزه اي يابت يا ناقصه انتي بترني علي جوزي ليه يا بتاعت الرجاله
مش عيب عليكي يا زباله لما تشاغلي راجل متجوز
- انتي بتقولي اي انا مش فاهمه حاجه
- استعبطي يابت واعمليهم عليا بقي
فكراه هيخبي عليا ولا هيجري ورا عيله ذيك
اسمعي يابت أما اقولك
إيجارك ووصلك .. وشقتك وفضيناها ورقمك ده مشفهوش علي تليفون جوزي جتكو البلاوي نسوان قذره
وقفلت السكه ف وشي
الدم غلي ف عروقي ورنيت تاني عشان امرمط بكرامتها الأرض .. بس لقيتها حطاني علي البلاك ليست
انا زعلت اوي واتحرق دمي
واتخطيت الموضوع بصعوبه بس عادي كله بيعدي
راجل يروح راجل يجي كلهم جزم ف رجلي
انا اتجوزت خمس مرات بس بين كل راجل وراجل دسته ... مترمين ف كل حته
اصل الرجاله دي مزاج
وانا بقي مزاجي عالي اوي بس حظي فقر
جوزي التاني بقي
كان صايغ ..وقتها كان عندي اربعه وعشرين سنه
وكان ف المنطقه وعينيه رايحه جايه عليا ف الراحه والجايه
وطبعا انا لقطته
فروحتلو مره اشتري دهب
وكانت معاملته زبده علي عسل
يالهوي عليه يخطف الكحل من العين
بقيت اروحلو بحجة اشتري أو ابدل
وكده
واخد رقمي وبقينا نتكلم وفتحلي قلبه
بس المصيبه انو كان متجوز تلاته
بس قولت وماله ما الشرع حلل اربعه وبكره ابقي بيهم كلهم
معداش شهر وعرض عليا الجواز وف يومها روحنا للمأذون وهوب طاخ
فرش شقه وقعدنا فيها
كان قايلي أن مراتاته عارفين
بس اللي حصل لقيت نساوينه التلاته جاينلي الشقه وهو مش موجود ونزلو فيا ضرب
وسابوني ومشيو
ولما جه قولتله اللي حصل . لقيته سلبي كده ومش فارق معاه اللي حصلي
لكن أنا مسكتش وأجرت ناس دخلو جابولهم الشقق التلاته عاليها واطيها وقلب منهم كل حاجه
وكنت مدياهم فلوس كويسه
وجابولي الحاجه اللي سلكوها من الشقه وفص ملح ودابو
هو بقي توقع أن انا اللي ورا الحكايه
كان عدي علي جوازنا يجي ست شهور
طلبت منه الطلاق ومعرفتوش لا حق ولا باطل بس مرضيش يطلقني
رحت خلعاه ومخدش محامي ب ٥٠٠ جنيه
ومتطلعتش منه بحاجه قولت حرام كفايه الصيغه والفلوس اللي خدتها من شققو التلاته
وكفايه عليه المرمطه ف الاقسام عشان يجيب حقه
مسكين .. ده انا بقالي سنه ونص اهو ويمكن اكتر ومسروق مني خمسين ألف جنيه
ومرجعوليش لحد دلوقتي
نخش ع اللي بعدو
كان موظف ف شركة عقارات وروحتله ف مصلحه خاصه بالعماير بتاعتي
ورحب اوي وعينيه كانت صناره تصطاد اي واحده
وبقي بيكلمني بحجة المصلحه اللي هيقضيهالي
وانا كنت مظبطاه من ناحية الفلوس
بس جه ف يوم وقالي ..
- بصي انا مش عاوز فلوس
- اومال عاوز اي يا طارق ؟!
- عاوزك انتي
- اللي هو ازاي يعني
- اللي هو انتي
- عاوز نتجوز قصدك
- اممم مش بالظبط بس
- بس اي يا عين امك لا أظبط كده بدل ما ارزعك كف يتولك
- اهدي بس متفهميش غلط
- فهمني ياروح الماما
- انا متجوز انتي عارفه ومراتي يعني زي مانتي عارفه كل حاجه بأسمها
- اه ولية نعمتك يعني
- يا سوسو بلاش الكلام ده .. هيا معاها الفلوس والمستوي الكويس وأبوها يبقي مدير الشركه اللي بشتغل فيها ..بس هيا مش بتديني احتياجاتي .. طول الوقت مش فاضيه
وانا عاوز واحده تدلعني وتعيشني يومين حلوين
- اه وجايلي انا بقي ادلعك واهشتكك يومين
- يا سوسو انا عاوزك بس مش هقدر اتجوزك ف العلن
- اومال اي ف السر ؟!
- ده احسن حل ليا وليكي وانا هدلعك بردو متقلقيش
قولتي اي !!
انا سكت شويه وقولت لنفسي اهي جوازه تفوت ولا حد يموت ومحدش هياخد خبر بيها
ده عاوز احتواء زيي بالظبط
المهم قولتلو ...
موافقه بس بشرط
- شرط اي
- شيك ب ٥٠ الف جنيه تمضيه بأيدك الحلوه دي
- يا سوسو بس ...
- اي يا عين سوسو ..مش انت عاوزني يبقي تدفع مش كفايه هتكسر فرحتي وكدته بقي
سكت وفضل باصللي
رحت قايله...
ها قولت اي انجز
- قولت موافق هاتي الشيك امضيلك عليه
وفعلا كتبنا ورقتين عرفي وف السر ومن غير ماحد بدري
وعشت معاه ايام حلوه اوي
كان بيجيلي من ورا مراته طبعا
وشاف معايا اللي عمرو ما شافه وكنت بدلعه وده اللي مبتعملوش ستات اليومين دول
بس بصراحه زهقت بقي ومليت
كنا بقالنا بتاع سنه مع بعض
الواحد لازم يغير .. ولا هفضل كده يعني وبعدين ده حيالله جوازه ف السر
قررت ف يوم اروح البنك وسحبت الشيك واخدت الخمسين الف وحولتهم ف حسابي
جه هو ف نفس اليوم بليل ومتظرن اووي اول ما دخل قال...
- انتي روحتي البنك انهارده
- اه يا حبيبي
- وسحبتي الشيك
- ايووون
- طب وليه
- هو اي اللي ليه . الفلوس دي بتاعتي
- بتاعتك منين
- الله انت شكلك نسيت انك انت اللي كتبهولي
- لا فاكر بس بردو اتفقنا انك هتاخديه لو اتطلقنا
- وهو احنا يا بيبي ننفع نتطلق ... اااه قصدك علي الورقتين يعني ... متقلقش يا بيبي قطعتهم قبل مانزل البنك وكده نبقي اتطلقنا
- انتي شيطانه خسيسه
- لا خليك مؤدب عشان لو قليت ادبك في خبر مني لحد محترم زيك مسافة السكه يوصل لمراتك وحماك ويتهد المعبد علي دماغك ف خليك مؤدب
- حسبي الله ونعم الوكيل فيكي يا شيخه
- حسبن علي نفسك .. انت اللي مراتك مش ماليه عينك وداير ترمرم روح بقي استسمحها متجيش تقرفني
وخرج ورزع الباب وراه
هو انا جيت جمبه ما هو اللي تفص
ده اي البلاوي دي
الفتره اللي بعد كده ف حياتي اهتميت بشغلي شويه وفتحت مجال الملابس وكده
وبقيت بشرف عليه بنفسي واتبسطت اوي بالموضوع
والمحل بقي شغال
وكان ف حتة مول تحفه ومحل فخم زيي كده
وف يوم كنت ف المحل باخد الإيراد
دخل علينا راجل سعودي إنما اي فخم
شكلو يقطع الخميره من البيت
دخل اشتري نص المحل وكيش
وعرف طبعا من البت اللي شغاله اني صاحبة المحل وسألها عليا
وانت كنت لابسه ومتشيكه ومغريه يعني مش اي كلام
كان عندي وقتها تسعه وعشرين سنه
دفع السعودي ده الفلوس
وزياده ف ظرف واداهولي ف ايدي
بفتح الظرف لقيت في رقم تليفونه
الراجل متريش اوووي يعني حاجه خطيييره
ضحكت واخدت شنطتي ومشيت
وروحت وكتبت الرقم بس كل اما اجي اتصل أقول لا يابت اتقلي
وفعلا تقلت عليه اسبوع يجي كل يوم المحل وانا بقيت بروح كل يوم بس مبعبروش
لحد ما جه ف وشي وقال...
- شو مابدك تحني عليي يعني ولا ايش
قولتله بمياصه ..
- نعم
قال ..
- ابغي احكي معك يا جمر لو تحبي
- اممم تحكي معايا ف اي بقي
- تعي بس تعي نقعد بشي مطرح ونقعد ونحكي
- طااايب وماله اتفضل
واخدت شنطتي وروحت معاه علي كافيه ف المول
وقعدنا وطلبلي حاجه اشربها
وبصلي وقال..
سبحان الذي خلقك انتي جميله جمال ما وصفه واصف والله
- كلمني بالعاميه يا خويا
- شوفي شو رح جولك ..انا صريح جدا وما بحب اللف والدوران ..انا بدي ياكي علي سنة الله ورسوله
- حلو ومالو انا موافقه
- اسمعيني بس للأخر الله يرضي عنك وبدك تسمعي شروطي
- شروط ؟! من اولها كده هتشرط
- شروط بسيطه مانها معجده
- قول ياخويا شروطك وسمعني
- انا رح اتزوجك ولكن بعجد محدد المده
- عقد محدد المده ؟! ازاي فهمني
بصلي وقال ...
( عاشقة الرجال )
الجزء الخامس .. تفاعل لو سمحتم
للكاتبه / مي علي
عقد محدد المده يعني اي فهمني ؟!
قال ..
يعني أنا بدي اتزوجك علي سنة الله ورسوله
بس بمده محدده سنه مثلا وبعدا كل واحد يروح لحاله
- ااااه فهمت
- اي منيح .. وكل اللي بدك ياه مجاب بس ننزل رضا الجمر
- من حيث الرضا فأنا راضيه وانا هلاقي أحسن منك فين ... طيب ياخويا موافقه بس المده هتبقي اد اي مثلا
- مثلا نجول سنه .. أو ستة أشهر شو رأيك
- دي حاجه حلوه اوي سريع سريع
- ورح حججلك كل اللي تتمنيه ورح أخدك افسحك في كل مطرح شوي بس اتركيلي حالك
- موافقه .. تحب نروح للمأذون امتي
- دلوقتي لو تحبي
- لا ياخويا انا ليا أهل لازم اقولهم الاول
اديني يوم بس اظبط اموري
- خلص ماشي واكون انا اخذت شجه نجعد فيها
- بس تكون شرحه وبرحه حاكم انا بحب البراح
هي هي
- اموت انا بهل الدلال .. بدك تتوصي فيني ها
- طبعا ياروحي وهو انا عندي اغلي منك
وبالفعل رحت لأهلي وقولتلهم
ابويا رمي طوبتي وقالي اعملي اللي انتي عايزاه
رحت ويومين وكنا متجوزين
مفيش واحد اتجوزتو الا أما خدت منو مصلحه
اخدت من ده دلع ونغنغه وفلوس
والمقابل اديتلو اللي ناقصو
مهو حرام بردو يبقي عندي الإمكانيات دي وتبقي لواحد ميقدرهاش
وخلصت المده وكان علي عيني أنه هيطلقني
بس كانت إقامته خلصت وعاوز يرجع لبيته وولاده
ورجعت تاني لوحدي بس كنت ماليت حسابي ف البنك اوي
قصرو نخش علي اللي بعدو
ده بقي حكايتو حكايه
ده متجوز ومخلف وبيشتغل ومعاه فلوس ومراته ست محترمه ومهنياه بس هو اللي تفص
كانت جارت مرات ابويا
ولما اتطلقت وروحتلهم ف زياره
لقيت الست دي عندها
وقاعده تشتكي من جوزها ده انو داير ورا النسوان ومخلص فلوسه اول بأول عليهم
لدرجة أن بتها مفيهوش اكل ليها وللعيال
قولت ف نفسي يا حبيبي ده انت جيت ف ملعبي
وعرضت عليها المساعده وانا واثقه اني هجيب رجله ف الخيه
واتفقت معاها فيوم يكون هو موجود فيه وانا اروحلها البيت بحجة اني اشوفها وكده
وفعلا ده اللي حصل وروحتلها بس هو كان بره
بس كانت عارفه انو راجع بدري
جه ودخل وانا قاعده
واول ما عينو اتقابلت بعيني كان هيريل وهو واقف
وعرفتو بيا وهو بقي الابتسامه من هنا لهنا
وكدته
انا طبعا كنت برمي لقدام وعملت اني انا كمان مش شايله عيني من عليه
بعد ما كنت فهمتها اللي ف دماغي كلو
وقومت مشيت وهو خرج يوصلني
فاتلحلحت وطلبت منو رقم تليفونو
وهو يعني ما صدق
وبقينا نتكلم بالساعات
وهو كان من نوع الرجاله اللي جريو ورا الحريم يخليه يصرف فلوس
فانا بقي اديتو سكه ولعبت عليه صح وبقي بيجيلي ونقعد ونتضحك واخر دلع
وكنت باخد منو فلوس طبعا
بس لأول مره ماخدهاش لنفسي
كنت بروح اديها لمراتو وعيالو
وكنت ماليه عينيه لدرجة ميبصش لحد غيري
وفضلت شغاله ف الخطه دي ومقشطاه اول بأول
لحد ما عرض عليا الجواز
طبعا انا لا يمكن اتجوزو
وروحت وقولت لمراته ونصحتها نصيحه لوجه الله انها تشوف واحد يصونها عشان ده مش هيتعدل
وفضلت مثبتاه كده وبسحب منو بالفلوس
لحد ما مراته طلبت الطلاق
والعيال هتاخدهم عشان لسه صغيرين وعرفتو اللي كان بيحصل بمعرفتي بس بعد ما كان طلقها
وجه يحسبن عليا ويقولي خربتي بيتي
قال انا اللي خربت بيته قال
طب ومبصش لبيته ده ليه وهو داير يرمرم علي حل شعره
الله ماهو البني ادم مننا طفس وعينيه فارغه
واتخانقت معاه خناقه ااد كده ورفع عليا السكينه وكنت هحبسه
لولا بس انا قلبي طيب
روحت زحلقته ومن ساعتها مسمعتش عنه غير
إنه رجع يتمسح ف رجلين مراته عشان ترجعله بعد ما اطمرمط علي ايدي اخر مرمطه
طب بذمتكو انا السبب
ولا هو
انا كان قصدي خير
المهم يعني سمعتي بعد الموضوع ده بقت علي كل لسان
يعني أنا طول المده ده وفكل الرجاله اللي عرفتها محدش فتح بوقو
والمره اللي كنت بعمل فيها خير سمعتي بقت علي كل لسان
بس انا مبيهمنيش تحت رجلي شبشب يبلع اي واحد اي كلمه هيقولها اه
بس انا بعدها حسيت اني لازم اقرب من ربنا واهدي بقي شويه
واعيش لوحدي
وفيها اي
وفعلا قررت اتظبط ف تصرفاتي
اي نعم الأمر ميسلمش وكنت بشوف حاجات حلوه تشرح القلب الحزين بس كنت بسكت واعدي وكدته بقي
لحد ما وقع ف سكتي جوزي رقم تلاته
والله ماعرف اتحدف عليا من انهي داهيه
بس هو كان مناسب للفتره دي
كان شيخ ومقيم لوحدو ف الشقه اللي قدامي
اه .. مهي سكنت وسكن فيها عبعال
الشيخ عبعال
وكان دقنو طول اي والزبيبه علي قورتو ولا ختم النسر
والجلبيه التلت تربع والصندل والعمه
واول مره قابلته فيها ع السلم يقعد يبصلي ويقول
استغفر الله العظيم
استغفر الله العظيم
انا مبقتش فاهمه هو في اي هو انا فيا حاجه غلط
مره ورا التانيه ورا التالته
قولت لا ده لازم يتأدب وقفت ع السلم وقولتله..
اي يا عم الشيخ ف الراحه وف الجايه تشوفني تروح ظارفني استغفر الله العظيم
اي شايفني قالعه قدامك
فضل بردو ميردش وعمال يبرطم رحط صارخه ف وشو
- مترد ولا لسانك كلتو القطه
رح قايل ..
تحشمي يا امرأه
- ياخويا لما تتحشم انت ابقي اتحشم انا ده اي اصلو ده
- لا اريد سماع صوتك .. أنه عوره
- نعم يا روح امك
- انكي كاسية عاريه متبرجه فاسقه
- لا ده انت عاوز تتربي بقي
وروحت جايباه من عمته علي الارض وهاتك يا عض
والناس تحوش وانا ماسكاه ونازله في ضرب
وف الاخر حاشوني عنه وقعدو يصالحونا علي بعض
بصراحه اتغبيت اوي الراجل طلع متشلفط
واتصافينا
وقابلته كمان مره ع السلم بس اي المره دي اتظبط
وابتسم ف وشي وهو بيقول
السلام عليكم
- وعليكم السلام يا شيخ .. والنبي اوعي تكون لسه زعلان
- لا لست كذلك ولكن اعذريني يا أختاه فأنني كنت احدثك بأسلوب غير لائق ولكن يشهد الله أن غرضي كان النصيحه
- نصيحة اي .. والنبي كلمني عربي
- عليه الصلاه وافضل السلام.. سأحدثكي بطريقه بسيطه ... انا كنت اراكي ترتدين ملابس فاضحه لجسدك والرائحه تفوح منكي وصوتك العالي دائما
- طب اعمل اي ده طبعي
- انا اريد مساعدتك قبل أن يأتي يوما لا ملجأ فيه من الله وستحاسبين علي كل ذلك
- طب انصحني يا شيخ ربنا يسترك
- انني متأخر الان علي الدرس
- درس ؟! رايح درس زي العيال
- يا أختاه انا معلم في أمور الفقه والسنه .. يمكنك انت تأتي ستستفيدين جدا ولكن دعيني اولا احضر لك ملابس تناسب حلقه الذكر
- خلاص ياخويا اللي تشوفه
- في رعاية الله وسنتقابل ثانية
- مع السلامه يا شيخ
وفعلا مشي وعلي بعد العصر لقيته بيخبط عليا وبيقولي ..
اسف لإزعاجك ولكني أردت أن اعطيكي هذه الملابس لإرتدائها
جلباب واسع فضفاض وملابس مريحه تستركي يا أختاه وغدا ستأتي معي الي الحلقه وبإذن الله خيرا
- شكرا يا شيخ .. طب بكام دول
- اعتبريهم هدية مني بمناسبة هدايتك انشالله
- شكرا يا شيخ
- عفوا .. سأذهب انا عن اذنك
ومشي وقفلت الباب ودخلت اقيس الهدوم لبستها
اي ده يابن الهبله جايبلي عبايه سته اكس لارج
دي يلبسها معايا سبعه
واي الطرحه دي
طرحه دي ولا كفن
لا ده اي اللبس ده جتك نيله
وعدي اليوم عادي
وتاني يوم خبط عليا ف نفس المعاد
فتحتلو بي كنت لابسه يعني ...
احم انتو فاهمين طبعا
اول ما شافني تنح وبعدين لف وشو الناحيه التانيه
- اتفضل يا شيخ
- يا أختاه هذا لا ينبغي أن تخرجي هكذا أمام رجل غريب
- ما غريب الا الشيطان ياخويا ادخل
- يا أختاه اذهبي لترتدي الملابس التي احضرتها لكي بالأمس واسرعي لكي لا نتأخر علي الحلقه
- يالهوي تصدق نسيت . اه ياخويا حاضر هلبس اهو .. طب اتفضل عبال ملبس
- لا لا سأنتظركي هنا
طيب ياخويا
ودخلت بسرعه بس ملبستش اللبس اللي جابه ده
طلعت عبايه كنت شارياها بس اي بترتر وحلوه
ولفيت الطرحه تلت تدوار وحطيت برفن خفيف وخرجت له
اول ما شافني صرخ ف وشي وقال...
- ما هذا ما هذا
- اي ياخويا مالك
- لماذا لم ترتدي الملابس التي احضرتها لكي
- دي احلي ياخويا
- لا لا هكذا لم نفعل شيئا ولا يجوز أن تذهبي هكذا ... وما هذا الحجاب الكاشف لشعرك وكأنه سنام الجمل... اتسمين هذا حجابا
- ماله ياخويا يعني
- ارجوكي ادخلي وابدلي ملابسك بسرعه
بصتله بقرف ودخلت جبت العبايه اللي جبها وكانت بزراير وقولتله ..
بص انا هنزل كده ولما نوصل ابقي البس العبايه دي فوقيها
بصلي وسبني ونزل
قفلت باب الشقه ونزلت وراه وبقي ماشي بعيد عني مترين
ووصلنا الدرس وهو دخل وانا لبست البتاعه دي
ودخلت ف قسم الحريم وفضلت اسمع الدرس بس مفهمتش ولا كلمه
وبعد ما خلصنا خرجت بره استناه
وبعد شويه خرج وقالي ...
اتمني أن تكوني قد استفدتي
- ها ؟! ... اه اه ياخويا اومال ايه
فبصلي بحنيه ومشي وانا مشيت جمبه
وبقي علي طول يكلمني واروح الدروس بتاعته وبقي واحده واحده يتكلم بالعاميه
وهو شخصيه حلو اوي بصراحه وحكالي عن أهله ف البلد وكده
وعدا بتاع خمس شهور واحنا مع بعض وبعدين لقيته بيفاجأني بعرضه عليا بالجواز ...
انا اتفاجئت بس قولت وماله يمكن ده يبقي الأخير
وفعلا جهزنا كل حاجه وجاب أهله وطلبني من ابويا وعملنا فرح اسلامي
ودخلنا ف الشقه اللي هو مأجرها مني وفضل بعدها يديلي إيجارها عادي وكنت بستغرب منه بقي
زي ماكنت بستغرب من حاجه تانيه
إن الشقه تلت اوض
اوضه منهم هو قافلها ومن اول يوم جواز وهو محرج عليا مدخلهاش
وأوقات كان يدخلها بليل ويقفل علي نفسه
انا الفار ابتدي يلعب ف عبي
وحاولت ادخل الاوضه
بس المفتاح مكنش بيفارقه
لحد ما فيوم نسيه ف جيب الجلابيه ومشي
وكنت بلم الهدوم عشان احطها ف الغساله
وبطلع اللي ف الجيوب كالعاده
هوووب لقيت المفتاح
رحت اخدته جري وانا فرحانه مش عارفه لي
وروحت علي الاوضه
ودخلت لقيت ....
 الجزء الثالث ... للكاتبه / مي علي ظبطت الفرح وكل حاجه بقت تمام الساعه جت تسعه وتسعه ونص وعشره إلا عشره وانا ف الكوافير وال…){kind=link}
تعليقات
إرسال تعليق