 |
👈الجزء الثالث والرابع 👉
اتصدمت اما شوفته منظره كده مغمي عليه ووشه لونه شاحب وجسمه متلج شوفت المنظر ده وجسمي اترعش من الخوف ونزلت لمستواه في الارض ودموعي بقت نازله في صمت خايفه انادي علي حد من بره ودول ناس معرفهومش وخايفه منهم حطيت راسه علي رجلي وفضلت أحاول افوقه ودموعي مغرقه وشه وبكتم شهقاتي عشان محدش يسمعني من بره وحاولت افوقه بكل حاجه جت قدامي سواء برفانات او ارش علي وشه مايه لغايه اما فين وفين بدء يفوق وبدء يفتح عيونه ببطئ وبيحاول ينظم نفسه .
دموعي بدئت تزيد اكتر واكتر اول ما فاق بصلي لفوق لان راسه كانت علي رجلي ودموعي كانت كلها بتتساقط عليه
بصوت اشبه بالمعدوم - متخافيش انا كويس
ساعتها بس طلع صوت لبكايا وبدئت اعيط واشهق وشهقاتي تعلي حاول يتعدل وهو حاسس بألم في صدره لسه وماسكه لكن مسك ايدي
- بس انا اهو كويس ليه كل ده
من وسط العياط قولتله - ا ا انت كنت تعبان اوي وكنت خايفه عليك اوي انا انا مليش حد غيرك
حاول يضحك عشان يهديني - والله اتلاقيكي كنتي خايفه ليجرالي حاجه و متعرفيش تروحي من هنا لوحدك
قال كده وانا عياطي زاد وبحركه تلقائيه مني اترميت في حضنه وهو ضمني عشان اهدي
- بس بس انا زي الفل اهو متقلقيش ارهاق السفر بس مش اكتر اهدي عشان خاطري
فضلت في حضنه وماسكه ايده اكني خايفه يهرب مني
قالي - طب تعالي نقعد علي السرير طب تعبت من الارض
مسكت ايده وقومنا قعدنا علي السرير ابتسم وقالي - انتي طيبه اوي يا خديجه
- عشان انت حنين اوي يا مروان
مسد علي شعري بحنان وفضلنا باصين لبعض شويه وبعدين قومت عشان انام علي الكنبه مسك ايدي وقال - خليكي
- ها
- أحم احم قصدي خليكي هنا جمبي عشان متقوميش تصرخي زي امبارح واحنا كمان في مكان جديد عليكي
- هنا هنا فين
- ع السرير هنا
- يالهوي
- بيقولو تقريبا اني جوزك وعادي تنامي هنا
- يالهوي أتصدق معرفش
ضحك- ظريفه
قومت وغطيته كويس وقولتله - تصبح على خير يا مروان
ضحك - يارب سعاد المحروقه تطلعلك
ضحكت - نام ياض
- خدتي عليا اوي
ضحكت وهو شويه ونام من التعب اللي باين علي وشه بس بيحاول يداريه عشان ميقلقنيش عليه.
فضلت طول الليل صاحيه وكل شويه اروح اطمن عليه معرفش ليه قلبي مش مطمن عليه بس لو مخوفتش عليه هخاف علي مين يعني ده مروان .
الصبح صحيت ملقتهوش في الاوضه خوفت وقومت ادور عليه لبست ولفيت حجابي ونزلت ادور عليه في البيت ده
قابلتني شغاله- في حاجه يا ستي
- لا ابدا مشوفتيش مروان
- سي مروان عند الفرسه بتاعته
- فرسه ليكون بيخوني
- لا يا ستي الفرسه اللي بيركبها
- ودي فين بقي
خدتني وودتني كان واقف بيأكل حصان وبيطبطب عليه حقيقي عليه حنيه مشوفتهاش علي حد .
قربت منه بصلي وقالي- ديجا صباح الفل
ضحكت- ياااه بقالي كتير اوي مسمعتهاش منك من واحنا عيال تقريبا
ابتسم وقالي - تركبي
رديت- بخاف منهم
- وانتي معايا ؟
ابتسمت - يلا نركب
حقيقي بقي الشخص الوحيد في العالم ده اللي بثق فيه كرهت الدنيا كلها ومحبتش غيره بعدت عن الدنيا كلها ومطمنتش غير في حضنه حنين بطريقه مختلفه انسان مش شبه العالم القاسي اللي حوالينا حقيقي لو هختار عوض ربنا ليا عن ايام وجعي اكيد مش هتردد وهختاره هو وهيكون نعم العوض 💙.
خدني قدامه علي الحصان وطلعنا نتمشي ييه وكان ماشي في هدوء وانا مش باصه لحاجه غير لي هو ياااه سنين وانا بتمني ابص كده لملامحه وابقي قريبه منه بالشكل ده دعيت من قلبي وانا باصه في عيونه انه يحنن قلبي عليا اكتر واكتر ويزرع حبي في قلبه لاني خلاص مبقتش حمل كسر بعد ما دوقت معاه طعم الجبر.
بعدها قضينا اليوم معاهم ومروان فرجني علي مناطق كتير حلوه وعلي بليل سافرنا عشان نرجع بيتنا .
واحنا في القطر راجعين بصلي وقال - ساكته ليه
- اممم تصدق ماما وحشتني مع انها كانت واقفه في صفه اكتر مني بس حنيت ليها
- اممم اكيد تحني ليها دي مامتك بس عايزك تروحي هناك تاني انا ماصدقت اقدر ابعدك عنه
ولا هقدر اجبهالك البيت ليعرف مكان بيتنا وينطلك وانتي لوحدك ومضمنش يهبب ايه معاكي صدقيني ده احسن ليكي بس كلميها في الفون واحكيلها كل اللي نفسك فيه .
هزيت راسي بحاضر .
روحنا بيتنا وحقيقي لو عشت اوصف في جمال اليومين اللي سافرنا فيهم سوا مش هوفيهم حقهم يومين كانو مخلينا قريبين جدا من بعض يومين طبطبو علي قلبي من القسوه اللي كان عايش فيها
___________________
تاني يوم بعد السفر هو رجع لشغله وانا رجعت لقعدتي لوحدي بالصدفه وانا معديه قدام مرايا شوفت نفسي لقيت نفسي واحده غير اللي متعوده اشوفها لقيت وشي نور بعد ماكان باهت الابتسامه رجعت تبتسم الكدمات اللي كانت ماليه وشي اثرها اختفي رجعت احس اني بني ادمه تاني مش حيوان كل حياته الضرب .
دخلت اروق الأوض بما فيهم اوضته وانا بروق بس ببص لقيت ادويه وبراشيم علي الكومدينو اللي جمب سريره استغربت لكن ملقتش غير اسمها عليها فا مسكتها قولت ادور علي استخدامها علي جوجل واشوف بتاعة ايه لكن عبال ما روحت اجيب الفون جرس الباب رن فا نسيت خالص حكايتها
- حمدلله على السلامة
- الله يسلمك مالك عامله زي الشغاله كده
- ولا اتلم انا غلطانه يعني اني بروقلك بيتك وبخلهولك يبرق كده
- بيتك انتي
ضحكت - مش هنختلف
- امسكي جدول امتحاناتك
- يا ساتر يارب
- يلا يا حلوه شدي حيلك عايز تقدير حلو السنه دي مش عايز حد يقول خدها خيبها
- لا متقلقش انا كده كده فاشله
- لا كده انا اقعدلك بقي ازاي فاشله
- زي ماسمعت انا السنادي معرفش كلمه في المنهج
- لا يبقي عايزالك قاعده من بتوع زمان
ضحكت اما افتكرت اما كان هو بيذاكرلي عشان هو الأكبر مني
- فنجانين قهوه حلوين وخرزانه سخنه واستنيني علي السفره بليل
- اااه يا قاسي هتمدني ولا ايه
ضحك - وهفتح دماغك كمان لو مش صحصحتي معايا لا ده انا شديد اوي
لوهله افتكرت ابراهيم اما فعلا عملها وفتح دماغي وجسمي اتنفض وتلقائي بعدت عنه
- مالك يا خديجه
- م م مفيش
- يالهوي انا اسف بجد مش قصدي اللي وصلك انا بهزر والله انا مستحيل امد ايدي عليكي خليكي واثقه من كده .
هزيت راسي وجريت علي اوضتي وقفلت عليا الباب وهو اتضايق انه خوفني وانا اتضايقت من رد فعلي معاه ده واني خوفت منه بس والله مكنش بايدي رد الفعل ده معرفش اكن مخي ربط اي حاجه فيها كلمه ضرب حتي لو كانت هزار بالخوف والهروب .
بعدها بشويه حاولت اهدا واسيطر على اعصابي واتسحبت من وراه وهو قاعد وقولتله - بخ
ابتسم - اتصدقي سبتي فراغ كبير الكام دقيقه اللي دخلتي فيهم أوضتك دول
ضحكت ونطيت قعدت جمبه - عشان تعرف قيمتي
- قيمتك كبيره اوي يا خديجه حقيقي انتي تستاهلي تتشالي على الراس حقيقي
- يالهوي علي كلامه يا ناس اللي هيغمي عليا منه
ضحك وبعدين مسك ايدي وقالي - انا اسف
اتنهدت - انا اللي اسفه اني انسانه مش سويه نفسياً.
- محدش فينا كامل يا خديجه
- لا في في ناس عايشين حياه هاديه ومطمنين ومبسوطين
- عايز اقولك حاجه عمر ما حد خده نصيبه من الدنيا كله فرح وسعاده في اللي خد جزء من نصيبه خوف ومعاناه وفي اللي خد جزء من نصيبه تعب ومرض وفيه اللي خد من نصيبه وحدة وفراق وكل واحد في الدنيا له نصيب من الأتنين من الحزن والفرح بس تأكدي ان مهما حصل ربنا عوضه جميل اوي عوضه بينسيكي قسوة نصيبك من الحزن عوضه اما بيجي بيطبب على القلب ويمحي اي وجع وكسر اتعرضله .
ابتسمت - كلامك مريح لدرجه متتخيلهاش كلامك بيطمن قلبي ان لسه في امل .
- طول مانتي عايشه يبقي في امل والدنيا لسه قدامك
ابتسمت وكان نفسي اقوله الدنيا دي مش عايزه منها غيرك .
ايام بتمر بقي بيذاكر منهجي عشان يذاكرالي ويسهر بليل يشرحلي مع انه بيكون تعبان وباين عليه التعب . رجعني بمذاكرته ليا لايام ابتدائي ونفس القاعده دي اللي حببتني فيه من وانا طفله .
ايام الامتحانات كان بيروح يوديني الكليه ويرجع ياخدني ويكون قلقان عليا وميستريحش غير اما اخرجله وانا بضحك .
- واخيرااا خلصت انت مفروض تشتغل معيد يابني انا لولاك كنت هضييع بجد
- عدي الجمايل
ابتسمت - لو علي الجمايل جمايلك عليا كتير كفايه احساسي بالامان اللي محستوش في عمري كله غير وانا معاك
ابتسم - نروح
- اممم نروح
__________________
ساعتها روحني وراح هو يزور مامته
- لحد امتي يا مروان هتفضل سايب نفسك كده حرام عليك يابني
- ماما انا تعبان ومش قادر اجادل دلوقتي ممكن
- طب قول لخديجه حتي اكون مطمنه ان حد جمبك وحاسس بيك وهيساعدك
- خديجه دي ممكن تروح فيها قبلي انا اغمي عليا شويه كانت هتموت وعياط بطريقه بشعه وتقوليلي اقولها اعقدها في حياتها اكتر ماهي متعقده منها
- طب يابني العمليه معادها تتعمل يابني كده خطر عليك
- يا ست اهو كده هموت وكده هموت واديني اتعودت علي التعب
خدته في حضنها - بعد الشر عليك وتسبني انا والبت الغلبانه لمين .
ضحك- كل واحد يشق طريقه بقي
- ولا متنكرش انك بتحبها من وهي قد كده
- وزمان بعدت اما لقيت انه مينفعش الحب ده ده حب ظالم ليها انها تعيش مع واحد مش ضامن حياته وكل شويه بيدخل عمليه شكل ده ظلم ليها وللاسف اتضطريت اظلمها اما اتجوزتها بس كان لهدف حمايتها واول ما اخلص الهدف ده هصلح كل حاجه وهديها حريتها .
- ايه هتطلقها !!!
________________________
كنت قاعده لوحدي زهقانه من ساعه ما وصلني ومشي لغايه اما سمعت الباب بيخبط فرحت قولت اكيد رجع ورايحه افتح وانا بضحك لقيت صدمه في وشي خلتني اتهته من الخوف تاني
- ا ا ا ابراهيم !!!!
......يتبع.
الجزء الرابع
- ا ا ا ابراهيم !!!!
لقيته جايب شعري كله في ايده - والله وليكي وحشه يا خديجه
صرخت من وجع شعري ومن وجع قلبي منه _ انت ايه يا اخي حرام عليك عايز ايه مني كسرتني وذلتني قدام العالم كله ومتكلمتش وبعدت عن حياتك بقالي شهور اهو حرام عليك ارحمني
- عايز اخد روحك تعرفي يا بت انتي عمري ما كرهت في حياتي كلها قدك انتي وابوكي بكرهك من قلبي
- حرام عليك انا ذنبي ايه قولي انا ذنبي ايه ان ابويا قسي عليك عشان انت ابن مراته ذنبي ايه انا اني اعيش مكسوره ومعقده وخايفه من الدنيا ذنبي ايه اتعامل زي الحيوانات ذنبي ايه قووولي
- ذنبك انك بنته ذنبك اني بكرهك .
وفاجأه لقيته طلع عليا مطوه وحطها علي رقبتي
وقال بزعيق - يلا يا حلوه طلعيلي كل الفلوس اللي معاكي واي حاجه دهب يلااا بدل ما اشقك نصين
صرخت - معييش حاجه وسبني في حالي بقي سبني حرام عليك سبني انا تعبت
- هسيبك علي قبرك يا خديجه لو مطلعتيش كل اللي معاكي دلوقتي يلاااا
- ايه فاكرني هخاف منك مبقتش اخاف يا ابراهيم مبقتش اخاااف من حيوان زيك ده الحيوان فيه رحمه عنك انا بكرهك من قلبي يا شيخ انا عمر ما قلبي كره حد غيرك اقولك عايز تقتلني اقتلني علي الاقل اترحم منك ومن أشكالك
- شوفو القطه المغمضه فتحت يا جدعان وبقت بترد ياترى حافظه الشهاده ولا تقولي ورايا
وفتح المطوه عليا في نفس الوقت اللي مروان دخل فيه صرخت بإسمه _ مروان
رد عليا بيحاول يطمني - خديجه متخافيش ..وانت سيبها احسن اندمك باقي عمرك صدقني هتندم لو لمست شعرايه منها
ضحك ابراهيم باستهزاء وقال - لا حنين يلا بقي يا حنين طلع اللي معاك واي حاجه تملكها عشان تنقذ ست الحسن بتاعتك
- طب سيبها الاول ونتفاهم
- اسيبها ضحكتني ده انا الود ودي ادبحها و اشوفها وهي سايحه في دمها
- انت ازاي كده بجد انت ازاي معندكش انسانيه كده
- يلاااا طلع اللي معاك هعد لغايه ١٠ لو مبقاش قدامي كل اللي حيلتك المطوه دي هتكون في رقبتها
- ماشي ممكن تعديني كده عشان ادخل اجبلك اللي انت عايزه .
مروان وهو بيعدي من جمبه عشان يدخل الاوضه جوا راح خابط ايده جامد موقع المطوه وزقني بعيد ومن هنا بدئت خناقه دمويه بينهم حقيقي كسرو البيت فوق بعض وانا مكنش عليا غير الصريخ و العياط عشان حد يلحقنا منه ومع كل خبطه بياخدها مروان كان قلبي بيتشال من مكانه الاتنين وشوشهم الدم سايل عليها والخناقه بينهم عماله تزيد وانتهت بخبط مروان لابراهيم علي دماغه بأقرب فازه جت قدامه وقام وهو بينهج بطريقه بشعه وصوت دقات قلبه عاليه جدا ونفسه يكاد يكون رايح اصلا جريت عليه وحضنته اوي وانا بعيط من خوفي من اللي حصل هو مكنش قادر يتكلم اصلا بس حاول يضمني ويطمني
بعياط قولتله - مروان مروان انت كويس
بصوت اشبه بالمعدوم - انتي كويسه
هزيت راسي بايوه ودفنت نفسي في حضنه بس قلبه بينبض بطريقه سريعه اوي وصوته واضح اووي لدرجه ان حسيت بده.
- مروان انت كويس
ملامحه كانت شاحبه جدا غير الدم اللي مغرق لكن حاول يطمني - انا كويس قومي نطلب البوليس قبل ما يفوق
قومنا وكلم البوليس وجم ومروان لبسه تهمة التهجم علي بيتنا وسرقه والشروع في قتلي فاكان كل ده قادر يسجنه نص عمره وده كان احسن خبر حصل في حياتي لكن مخدتش بالي من تعب مروان اللي بيزيد عليه .
________________________
بعدها كان بيروح الشغل ويرجع يقضي يومه في اوضته ومتجنبني ليه معرفش او يمكن ساعتها مجاش في بالي انه مش عايز يخليني الاحظ تعبه الزايد الفتره وملامحه الباهته لغايه اما في يوم خبطت علي باب اوضته ودخلتله كان قاعد حاطط وش بين ايديه قربت منه وقولتله
_ مروان
بصلي كملت وقولتله - يالهوي مالك وشك مخطوف كده ليه
ابتسم ابتسامه بسيطه عشان اتطمن - مرهق شويه متقلقيش...في ايه كنتي عايزه حاجه
- اممم بصراحه اه
- قولي
- اصل اصل هاجر صحبتي انهارده خطوبتها وكان نفسي اروح واشوفها وهي عروسه مليش غيرها وملهاش غيري بس بس لو هتضايق بلاش .
قام وجه ناحيتي واول ما قرب مني خرجت حركه تلقائيه مني من غير قصد وبعدت وشي الناحيه التانيه بسرعه وحطيت ايدي عليه.
- اهدي اهدي مالك فيه ايه
بتوتر- مش قربت عشان تضربني !
تقريبا صعبت عليه ايوه شوفت ده في عيونه بعدها مسك ايدي وابتسم وقال - في بنت بتضرب مينفعش بنت تضرب وانتي بقي ست البنات فمبالك بقي بست البنات دي تتشال علي الراس .
ياااه علي جمال كلامه بلسم بيطيب جروح القلب سكتت وفضلت بتأمل جمال عيونه زي البحر بيخطفوك ويغرقوك جواهم .
قطع سرحاني ده بصوته وقال- ها بقي هنروح الساعه كام
- ايه انت هتيجي معايا بجد
- تقريبا بيقولو اني جوزك
ضحكت وقولتله - انا مش عارفه اشكرك ازاي بجد
- يلا بقي قبل ما اغير رأيي
- لا تغير رائيك دانا هلبس فوريره
دخلت البس واما بصيت لنفسي في المرايا لقيت وشي بيضحك وملامحي بقت منوره عكس زمان وفضلت افكر فيه كتير لسه حنين عمر مالدنيا غيرته لسه نضيف متلوثش بقسوه الدنيا .
لبست فستان باللون الكاشير وطرحه من نفس اللون مع لمسات بسيطه من الميك اب عشان ينور ملامحي اكتر وخرجتله لقيته مستنيني ببدلة كحلي تحتها قميص ابيض حقيقي كان لايق مع لون عيونه وشعره ولا البرفيوم بتاعه اللي واصل لقلبي وعمري ما شوفت واحد الطف منه بطلته .
ضحكت وقولتله- ايه رايح تشقط عروسه يا عم ولا ايه لو عايز تخطب قول يابني متتكسفش
ضحك
ضحك- لا مرعاة لمشاعرك هنولك شرف انك تكوني عروستي انهارده في الفرح
ضحكت ولقيته مدلي ايده جريت اتشعلقت فيه ونزلنا روحنا الفرح وصلنا القاعه كانت هاجر واحمد بيرقصو اول رقصه سلو واحنا قعدنا نتفرج عليهم لوهله عيني دمعت كان نفسي اعيش اللحظه دي كان نفسي افرح بمروان قدام الكل واعيش تفاصيل العروسه بس النصيب بس كفايه عليا يكون مروان جمبي .
قطع شرودي وهو بيقول- مالك
ابتسمت- مفيش انا زي الفل هروح اسلم علي هاجر اهي خلاص قعدت .
قومت وسلمت علي هاجر - مبروك يا روحي عقبال الفرح كده ان شاء الله
قالتلي - بت مال صوتك انتي معيطه ولا ايه اوعي يكون ضربك يا بت هو كمان
- يضربني ايه انتي كمان مروان احن راجل ممكن تشوفيه علي وجه الارض ده بيخبيني من نسمه الهوا عشان متجرحنيش حتي هو اللي جايبني هو هناك اهو .
- طب امال مالك فيكي ايه
- مش عارفه يا هاجر قلبي مش مطمن خايفه مش منه لا عشان ده الانسان الوحيد اللي بطمن وانا معاه بس حاسه ان لسه نصيبي مليان وجع تاني وانا مبقاش فيا حيل لوجع القلب تاني.
سابت الكوشه والعريس وقامت خدتني في حضنها اوي ياااه علي الراحه اللي بحسها في حضنها دي مش صحبتي دي امي .
- خلاص يا بت ركزي في فرحك بقي
- مش عارفه افرح وانتي فرحتك ناقصه يا ديجا
- يا قلب ديجا انا مبسوطه والله عمري ما اتبسطت قد دلوقتي وانا مع الشخص اللي عشت سنين اتمناه وفي خطوبه اغلي واحده علي قلبي .
- هنشوف موضوع موضوع الانبساط ده بعد ماخلص الليله دي عشان انتي مش مطمناني
ضحكت وقولتلها - يا شيخه اتهدي وروحي اقعدي جمب عريسك وسبيني اروح للراجل بدل ما يطلقني .
ضحكت ورجعتله - اتأخرت عليك
- لا بس ايه كل الاحضان دي كلها
- دي هاجر نصي الحلو و صحبتي من اعدادي كانت معايا وقت اما الدنيا كلها سابتني
ضحك - شامم ريحة تلقيح
ضحكت من قلبي
راح كمل وقايلي_ ما تيجي نرقص زي اللي بيرقصو دول
- بجد انت بتتكلم جد
- ايوه يا بنتي فيها ايه
ابتسمت بفرحه - يلااا اكيد
كان شغال وقتها اغنيه واعمل ايه لحماقي ضحكنا ونسينا الدنيا وبدئنا نرقص ويلففني وحقيقي كان من اسعد اللحظات اللي عشناها سوا وضحكتي مكانتش مفارقاني وغنيت مع الاغنيه وبأعلي صوتي وانا باصه في عيونه قولت
_ ده بكلمه منه بنسي الدنيا كلها ده عشان عيونه مستعد اهدها ♥
كمل وهو بيضحك - اول ما شوفته وابتسم قلبي انتهي ده عيونه تسحر والبلاد تتفاتلها ♥
كنت بضحك اللي هو انا اول مره اشوف نفسي مبهجه كده فضلنا نرقص مع هاجر واحمد ومروان هو اللي فرفشهم وبقي بيرقصهم اكنه واحد منهم وده فرحني اكتر من اسعد ليالي قلبي حرفيا .
بعد ما خرجنا من الفرح صممت اننا نتمشي شويه ومن غير العربيه كنا بليل اوي والشوارع هاديه مفيش غير صوت اغاني بسيط جاي من بعيد بيقول _ " واحنا اتقابلنا وجة اوآنا شوفتك بقلبي اللي اتمنى وريتني ايام الجنه ومليت بحبك اوقاتي حلم حياتـــــــــــــي♥ "
كنا بنتمايل ونرقص عليها في نص الشارع مستغلين الفضا والهدوء اللي حوالينا عيوني وعيونه كانو قادرين يقولو كلام كتير مكتوم في قلوبنا كان شكلنا الطف مما تتخيلو كان بجد وكلام الاغنيه كان ينطبق علينا .
خلصنا وفضلنا نبص لبعض ونضحك لغايه اما جيت اتحرك كعب الهيليز اتكسر مره واحده
-لالالا مش وقتك
لقيت اللي شالني مره واحده - يالهووي انت بتعمل ايه
- ايه اسيبك تمشي تعرجي
- نزلني يا مروان
ضحك - ايه مراتي
ضحكت وفضلت بتأمل ملامحه وهو ماشي بيا كنت متبته فيه وسانده راسي علي كتفه ومركزه في كل تفاصيله مكنتش اعرف انه يمكن اكون بشبع منه .
روحنا وكانت بالنسبالي الطف ليله في العمر وكل واحد دخل علي اوضته ونام .
الصبح صحيت متأخر لكن مكنش لسه صحي وفضلت علي الوضع ده بتاع ساعتين لغايه اما زهقت وقومت اشوفه ايه النوم ده كله بس الصدمه اني لقيته مرمي علي الارض ولونه مخطوف ونفسه مقطوع وجسمه متلج حتي دقات قلبه مسمعتهاش كان شكله اصعب من المره الاولي حاله هستيريه تملكتني من الصريخ والعياط لما حاولت افوقه ولكن المرادي مفاقش !!!!!!!
كلمت طنط وقولتلها وانا بصرخ وطلبت منها تجيب دكتور وتيجي وانا فضلت جمبه اصرخ واهز جامد فيه - مروان قوووم مش هقدر يا مروان هموت يا مروان من غيرك قوم عشان خاطري يا مروان مروان انا خايفه مبطمنش غير بوجودك قوووم هتسبني تاني للدنيا تلطش فيا دانا ما صدقت الدنيا تراضيني بيك قوم عشان خاطري متكسرنيش يا مروان متكسرنيش بعد ما بقيت ضهري وحمايتي في على الدنيا وعدتني مش هتمشي ارجوك متمشيش
اخر جمله قولتها وانا ماسكه ايده وانا ببكي من قلبي وبصوت مهزوز من كتر الوجع اللي فيه - بابا انا خايفه متسبنيش
شويه ومامته جت وهي بتعيط والدكتور معاها وكشف عليه وبعدين قام كده وقال - للاسف ...!!
.....يتبع .......
تكمله بعد التفاعل
اذا اتممت القراءة علق ب 20ملصق وتفاعل حتي يصلك اشعار عند نشر الجزء التالي ملحوظه لن يصل الجزء الا للمتابعين والمتفاعلين
يلا عشان اكمل تعليقات كتيرة و متابعة لصفحتي
توقعاتكم ؟؟؟؟
البارت الخامس والسادس الأخير هنا
تعليقات
إرسال تعليق