 |
ست تعشق الرجال
الجزء الخامس😋😍💃
عقد محدد المده يعني اي فهمني ؟!
قال ..
يعني أنا بدي اتزوجك علي سنة الله ورسوله
بس بمده محدده سنه مثلا وبعدا كل واحد يروح لحاله
- ااااه فهمت
- اي منيح .. وكل اللي بدك ياه مجاب بس ننزل رضا الجمر
- من حيث الرضا فأنا راضيه وانا هلاقي أحسن منك فين ... طيب ياخويا موافقه بس المده هتبقي اد اي مثلا
- مثلا نجول سنه .. أو ستة أشهر شو رأيك
- دي حاجه حلوه اوي سريع سريع
- ورح حججلك كل اللي تتمنيه ورح أخدك افسحك في كل مطرح شوي بس اتركيلي حالك
- موافقه .. تحب نروح للمأذون امتي
- دلوقتي لو تحبي
- لا ياخويا انا ليا أهل لازم اقولهم الاول
اديني يوم بس اظبط اموري
- خلص ماشي واكون انا اخذت شجه نجعد فيها
- بس تكون شرحه وبرحه حاكم انا بحب البراح
هي هي
- اموت انا بهل الدلال .. بدك تتوصي فيني ها
- طبعا ياروحي وهو انا عندي اغلي منك
وبالفعل رحت لأهلي وقولتلهم
ابويا رمي طوبتي وقالي اعملي اللي انتي عايزاه
رحت ويومين وكنا متجوزين
مفيش واحد اتجوزتو الا أما خدت منو مصلحه
اخدت من ده دلع ونغنغه وفلوس
والمقابل اديتلو اللي ناقصو
مهو حرام بردو يبقي عندي الإمكانيات دي وتبقي لواحد ميقدرهاش
وخلصت المده وكان علي عيني أنه هيطلقني
بس كانت إقامته خلصت وعاوز يرجع لبيته وولاده
ورجعت تاني لوحدي بس كنت ماليت حسابي ف البنك اوي
قصرو نخش علي اللي بعدو
ده بقي حكايتو حكايه
ده متجوز ومخلف وبيشتغل ومعاه فلوس ومراته ست محترمه ومهنياه بس هو اللي تفص
كانت جارت مرات ابويا
ولما اتطلقت وروحتلهم ف زياره
لقيت الست دي عندها
وقاعده تشتكي من جوزها ده انو داير ورا النسوان ومخلص فلوسه اول بأول عليهم
لدرجة أن بتها مفيهوش اكل ليها وللعيال
قولت ف نفسي يا حبيبي ده انت جيت ف ملعبي
وعرضت عليها المساعده وانا واثقه اني هجيب رجله ف الخيه
واتفقت معاها فيوم يكون هو موجود فيه وانا اروحلها البيت بحجة اني اشوفها وكده
وفعلا ده اللي حصل وروحتلها بس هو كان بره
بس كانت عارفه انو راجع بدري
جه ودخل وانا قاعده
واول ما عينو اتقابلت بعيني كان هيريل وهو واقف
وعرفتو بيا وهو بقي الابتسامه من هنا لهنا
وكدته
انا طبعا كنت برمي لقدام وعملت اني انا كمان مش شايله عيني من عليه
بعد ما كنت فهمتها اللي ف دماغي كلو
وقومت مشيت وهو خرج يوصلني
فاتلحلحت وطلبت منو رقم تليفونو
وهو يعني ما صدق
وبقينا نتكلم بالساعات
وهو كان من نوع الرجاله اللي جريو ورا الحريم يخليه يصرف فلوس
فانا بقي اديتو سكه ولعبت عليه صح وبقي بيجيلي ونقعد ونتضحك واخر دلع
وكنت باخد منو فلوس طبعا
بس لأول مره ماخدهاش لنفسي
كنت بروح اديها لمراتو وعيالو
وكنت ماليه عينيه لدرجة ميبصش لحد غيري
وفضلت شغاله ف الخطه دي ومقشطاه اول بأول
لحد ما عرض عليا الجواز
طبعا انا لا يمكن اتجوزو
وروحت وقولت لمراته ونصحتها نصيحه لوجه الله انها تشوف واحد يصونها عشان ده مش هيتعدل
وفضلت مثبتاه كده وبسحب منو بالفلوس
لحد ما مراته طلبت الطلاق
والعيال هتاخدهم عشان لسه صغيرين وعرفتو اللي كان بيحصل بمعرفتي بس بعد ما كان طلقها
وجه يحسبن عليا ويقولي خربتي بيتي
قال انا اللي خربت بيته قال
طب ومبصش لبيته ده ليه وهو داير يرمرم علي حل شعره
الله ماهو البني ادم مننا طفس وعينيه فارغه
واتخانقت معاه خناقه ااد كده ورفع عليا السكينه وكنت هحبسه
لولا بس انا قلبي طيب
روحت زحلقته ومن ساعتها مسمعتش عنه غير
إنه رجع يتمسح ف رجلين مراته عشان ترجعله بعد ما اطمرمط علي ايدي اخر مرمطه
طب بذمتكو انا السبب
ولا هو
انا كان قصدي خير
المهم يعني سمعتي بعد الموضوع ده بقت علي كل لسان
يعني أنا طول المده ده وفكل الرجاله اللي عرفتها محدش فتح بوقو
والمره اللي كنت بعمل فيها خير سمعتي بقت علي كل لسان
بس انا مبيهمنيش تحت رجلي شبشب يبلع اي واحد اي كلمه هيقولها اه
بس انا بعدها حسيت اني لازم اقرب من ربنا واهدي بقي شويه
واعيش لوحدي
وفيها اي
وفعلا قررت اتظبط ف تصرفاتي
اي نعم الأمر ميسلمش وكنت بشوف حاجات حلوه تشرح القلب الحزين بس كنت بسكت واعدي وكدته بقي
لحد ما وقع ف سكتي جوزي رقم تلاته
والله ماعرف اتحدف عليا من انهي داهيه
بس هو كان مناسب للفتره دي
كان شيخ ومقيم لوحدو ف الشقه اللي قدامي
اه .. مهي سكنت وسكن فيها عبعال
الشيخ عبعال
وكان دقنو طول اي والزبيبه علي قورتو ولا ختم النسر
والجلبيه التلت تربع والصندل والعمه
واول مره قابلته فيها ع السلم يقعد يبصلي ويقول
استغفر الله العظيم
استغفر الله العظيم
انا مبقتش فاهمه هو في اي هو انا فيا حاجه غلط
مره ورا التانيه ورا التالته
قولت لا ده لازم يتأدب وقفت ع السلم وقولتله..
اي يا عم الشيخ ف الراحه وف الجايه تشوفني تروح ظارفني استغفر الله العظيم
اي شايفني قالعه قدامك
فضل بردو ميردش وعمال يبرطم رحط صارخه ف وشو
- مترد ولا لسانك كلتو القطه
رح قايل ..
تحشمي يا امرأه
- ياخويا لما تتحشم انت ابقي اتحشم انا ده اي اصلو ده
- لا اريد سماع صوتك .. أنه عوره
- نعم يا روح امك
- انكي كاسية عاريه متبرجه فاسقه
- لا ده انت عاوز تتربي بقي
وروحت جايباه من عمته علي الارض وهاتك يا عض
والناس تحوش وانا ماسكاه ونازله في ضرب
وف الاخر حاشوني عنه وقعدو يصالحونا علي بعض
بصراحه اتغبيت اوي الراجل طلع متشلفط
واتصافينا
وقابلته كمان مره ع السلم بس اي المره دي اتظبط
وابتسم ف وشي وهو بيقول
السلام عليكم
- وعليكم السلام يا شيخ .. والنبي اوعي تكون لسه زعلان
- لا لست كذلك ولكن اعذريني يا أختاه فأنني كنت احدثك بأسلوب غير لائق ولكن يشهد الله أن غرضي كان النصيحه
- نصيحة اي .. والنبي كلمني عربي
- عليه الصلاه وافضل السلام.. سأحدثكي بطريقه بسيطه ... انا كنت اراكي ترتدين ملابس فاضحه لجسدك والرائحه تفوح منكي وصوتك العالي دائما
- طب اعمل اي ده طبعي
- انا اريد مساعدتك قبل أن يأتي يوما لا ملجأ فيه من الله وستحاسبين علي كل ذلك
- طب اانصحني يا شيخ ربنا يسترك
- انني متأخر الان علي الدرس
- درس ؟! رايح درس زي العيال
- يا أختاه انا معلم في أمور الفقه والسنه .. يمكنك انت تأتي ستستفيدين جدا ولكن دعيني اولا احضر لك ملابس تناسب حلقه الذكر
- خلاص ياخويا اللي تشوفه
- في رعاية الله وسنتقابل ثانية
- مع السلامه يا شيخ
وفعلا مشي وعلي بعد العصر لقيته بيخبط عليا وبيقولي ..
اسف لإزعاجك ولكني أردت أن اعطيكي هذه الملابس لإرتدائها
جلباب واسع فضفاض وملابس مريحه تستركي يا أختاه وغدا ستأتي معي الي الحلقه وبإذن الله خيرا
- شكرا يا شيخ .. طب بكام دول
- اعتبريهم هدية مني بمناسبة هدايتك انشالله
- شكرا يا شيخ
- عفوا .. سأذهب انا عن اذنك
ومشي وقفلت الباب ودخلت اقيس الهدوم لبستها
اي ده يابن الهبله جايبلي عبايه سته اكس لارج
دي يلبسها معايا سبعه
واي الطرحه دي
طرحه دي ولا كفن
لا ده اي اللبس ده جتك نيله
وعدي اليوم عادي
وتاني يوم خبط عليا ف نفس المعاد
فتحتلو بي كنت لابسه يعني ...
احم انتو فاهمين طبعا
اول ما شافني تنح وبعدين لف وشو الناحيه التانيه
- اتفضل يا شيخ
- يا أختاه هذا لا ينبغي أن تخرجي هكذا أمام رجل غريب
- ما غريب الا الشيطان ياخويا ادخل
- يا أختاه اذهبي لترتدي الملابس التي احضرتها لكي بالأمس واسرعي لكي لا نتأخر علي الحلقه
- يالهوي تصدق نسيت . اه ياخويا حاضر هلبس اهو .. طب اتفضل عبال ملبس
- لا لا سأنتظركي هنا
طيب ياخويا
ودخلت بسرعه بس ملبستش اللبس اللي جابه ده
طلعت عبايه كنت شارياها بس اي بترتر وحلوه
ولفيت الطرحه تلت تدوار وحطيت برفن خفيف وخرجت له
اول ما شافني صرخ ف وشي وقال...
- ما هذا ما هذا
- اي ياخويا مالك
- لماذا لم ترتدي الملابس التي احضرتها لكي
- دي احلي ياخويا
- لا لا هكذا لم نفعل شيئا ولا يجوز أن تذهبي هكذا ... وما هذا الحجاب الكاشف لشعرك وكأنه سنام الجمل... اتسمين هذا حجابا
- ماله ياخويا يعني
- ارجوكي ادخلي وابدلي ملابسك بسرعه
بصتله بقرف ودخلت جبت العبايه اللي جبها وكانت بزراير وقولتله ..
بص انا هنزل كده ولما نوصل ابقي البس العبايه دي فوقيها
بصلي وسبني ونزل
قفلت باب الشقه ونزلت وراه وبقي ماشي بعيد عني مترين
ووصلنا الدرس وهو دخل وانا لبست البتاعه دي
ودخلت ف قسم الحريم وفضلت اسمع الدرس بس مفهمتش ولا كلمه
وبعد ما خلصنا خرجت بره استناه
وبعد شويه خرج وقالي ...
اتمني أن تكوني قد استفدتي
- ها ؟! ... اه اه ياخويا اومال ايه
فبصلي بحنيه ومشي وانا مشيت جمبه
وبقي علي طول يكلمني واروح الدروس بتاعته وبقي واحده واحده يتكلم بالعاميه
وهو شخصيه حلو اوي بصراحه وحكالي عن أهله ف البلد وكده
وعدا بتاع خمس شهور واحنا مع بعض وبعدين لقيته بيفاجأني بعرضه عليا بالجواز ...
انا اتفاجئت بس قولت وماله يمكن ده يبقي الأخير
وفعلا جهزنا كل حاجه وجاب أهله وطلبني من ابويا وعملنا فرح اسلامي
ودخلنا ف الشقه اللي هو مأجرها مني وفضل بعدها يديلي إيجارها عادي وكنت بستغرب منه بقي
زي ماكنت بستغرب من حاجه تانيه
إن الشقه تلت اوض
اوضه منهم هو قافلها ومن اول يوم جواز وهو محرج عليا مدخلهاش
وأوقات كان يدخلها بليل ويقفل علي نفسه
انا الفار ابتدي يلعب ف عبي
وحاولت ادخل الاوضه
بس المفتاح مكنش بيفارقه
لحد ما فيوم نسيه ف جيب الجلابيه ومشي
وكنت بلم الهدوم عشان احطها ف الغساله
وبطلع اللي ف الجيوب كالعاده
هوووب لقيت المفتاح
رحت اخدته جري وانا فرحانه مش عارفه لي
وروحت علي الاوضه
ودخلت لقيت ...
ست تعشق الرجال
الجزء السادس😱🤔👇😲
دخلت الاوضه لقيت...
يانهاااار اسود ومنيل
إرهابي
اي كل الأسلحه دي
واي ده
يا خرااابي متفجرات
يا ليلتك السوده يا سماح متجوزه ارهابي
واي كل الصناديق دي
روحت فتحتها
يانهار ابيض كل دي فلوس
ده اغني من عادل إمام
اه يا فضحتي يا مصيبتي
ببص علي المكتب بتاعه لقيت لابتوب
وورق كتير محطوط ع المكتب
حاولت افهم اي اللي فيه
وياريتني ما فهمت
خرايط لعمليات تفجير ف مناطق كتير اوي
كنايس ومساجد وعماير
يا ولاد اللذينه عاوزين تفجرو مساجد ربنا
روحت جبت تليفوني بسرعه وصورت الورق ده
وجبت شنطه وأخدت فيها حبة فلوس من اللي ماليه الصناديق وصورت كمان الأسلحه وكل العك ده
وقفلت الباب بالمفتاح وخرجت
جبت العبايه من الغساله ورجعت المفتاح مكانه وعلقتها
وفضلت قاعده لحد ماهو جه وكنت فكرت كويس هعمل اي
من ضمن الورق اللي صورته اسماء الناس اللي هتقوم بالعمليه
وكان اسمو مكتوب ف عمليتين هو اللي هيقوم بيهم
وكان في معاد عمليه بكره
وفضلت مستنيه اما اشوف اي اللي هيجري
ولاحظت انه فضل ف البيت قاعد قدام التليفزيون علي قنوات الاخبار رايح جاي
وهووب لقيت الخبر ف التليفزيون
واخدت بالي من ملامح وشو كويس اوي
كان مبتسم
ولما قربت منه وعملت نفسي مشفتوش قولتله ..
يا ساتر يارب اي ده اي اللي حصل ده
راح رد وقال يعني متعصب اوي وراح قايل ...
كفره فجره شوفتي ضيعو ارواح كتير اوي منهم لله
- عندك حق منهم لله
- انا هقوم اصلي العصر واريح حبه وانزل عشان عندي درس وعلي ما اصحي تكوني حضرتي الغدا
- وماله انشالله حاضر
ودخل وانا بقول ف نفسي
ربنا يجحمك قال بتصلي وتعرف ربنا ده انت عاله علي الشيوخ والله
وكنت فكرت وعرفت هعمل اي
وجبت مفك وفتحت وفضلت احاول اكسر الباب ده بعد مانام طبعا
وفضلت أعافر لحد ما اتفتح
روحت رافعه الصناديق واحده واحده وحولتهم علي شقتي
عشان لما ابلغ عنو البوليس هيحرز الفلوس دي وحرام يروح كل ده ع الفاضي
روحت بعدها نازله وخاطفه رجلي لحد القسم اللي جمبنا
وروحت مبلغه عنه وورتلهم الصور
وبعتو معايا عساكر وبوكس
وروحنا طالعين ع الشقه
دخلو جابوه من قفاه وهو نايم
ودخلو الاوضه ولمو كل اللي فيها
واخدوه وهو خارج كان بيبصلي وهو مش فاهم في اي
قلب امه ميعرفش اني بلغت عنه
والحكومه حرزت الحاجات دي كلها
واخدوه وهما بقي كملو الباقي
انا بقي أستنيت اما الدنيا هديت شويه
وروحت بايعه العماره دي باللي فيها
وكل العماير اللي هو عارف مطرحها
اصل الدنيا دي اوضه وصاله ووارد يخرج يدور عليا
عملت كل ده وانا معرفش هو جراله اي
وروحت اشتريت فيلا ف حته حلوه وغيرت استايل لبسي كلو
عرفت بعدها انو اتحكم عليه بالاعدام هو وتلاته من اللي قدرو يوصلولهم
خير وبركه يلا ريح وارتاح
بس سبلي فلوس اعيش بيها احلي عيشه
وحمدت ربنا اني من كل واحد اتجوزتو
مخلفتش عيال
كنت محافظه ع الموضوع ده
قصرو
نخش ع اللي بعدو ولا زهقتو مني
ههههه معلش انا عارفه ان هما كتير
اللي بعد ده بقي كان عندي يجي بتاع ٣٣ سنه
وهو كان عندو ٣٥سنه
كان من طرف مرات ابويا
وكان مسافر امريكا بقي وبتاع
ويبقي اخو جوز اختها
وعرضت عليا أشوفو وكده
وانا وافقت
وروحت وقابلته وكان حتة واد يالهوووي علي جماله
أمريكاني امريكاني يعني مش اي كلام
وهوب طاخ اتجوزنا
وياريتنا ما اتجوزنا
شهر بالظبط واتطلقنا
أصل البيه مكنش له ف الستات
كان عندو افكار متحرره
واتجوز بس عشان يرضي امه
وطلع ملوش ف الستات وانتو فاهمين طبعا
اعوذ بالله يعني
والله مانا عارفه بيتحدفو عليا منين
بعد الموضوع ده عدي عليا فتره طويله اوي
وابويا مات
وانا تعبت اوي من بعدو
ولوزه رجعت لبيت امها
بس الدنيا بتمشي ومحدش بيموت ورا حد
شغلت فلوسي وعشت لوحدي
وبقي عندي شركه كبيره اووووي
وموظفين وشكلي اتغير
كل حاجه ف حياتي اتغيرت
وكملت الاربعين سنه
ومازال الرجاله بتتحدف عليا زي الرز
بس انا مشغلتش دماغي
لحد ما جه جوزي رقم خمسه
بصراحه جوازي منه كان عشان اثبت لنفسي اني حلوه ولسه مرغوب فيا من شاب
مش راجل مكحكح واكبر مني
كان عندو ٢٩ سنه
وكان موظف عندي ف الشركه
وبصراحه لفت انتباهي
واحده واحده بقي السكرتير بتاعي
وكان حنين اوي
وحبيته
لأول مره احب ف حياتي
بس حاجات كتير كانت مانعه ارتباطي بيه
مش هياخد واحده اد امه
بس هو كمان حبني
وحب حنيتي
ومبقيناش نقدر نستغني عن بعض
بس كان خاطب بنت خالتو وامه عاوزاه يتجوزها
بس انا بقي اخدت جمب عشان يسيبها وانا عارفه انو ميقدرش يستغني عني
وفاتحني ف الجواز
قولتله لازم كل الناس تعرف وبالذات اهلك
بالعافيه عبال متلحلح وقالهم
بس طبعا انا متوقعه الرد
رفضو تماما
محدش وافق
حتي الحيطان كانت هتنطق وتقول لا
بس هو مرضيش يسبني
واتجوزنا غصب عن الكل
بس مكنتش قابلت اهله لأنهم كانو رافضني تماما
وامه كان هيجيلها جلطه لما عرفت
ودخلت المستشفي
وهو فضل جمبها الفتره دي
وقدر يقنعها انو بيحبني وانها كمان لو شافتني هتحبني
وخرجت من المستشفي وقالتلو يجبني عشان تشوفني
هو كان هيموت من الفرحه وانا كمان
واخيرا اتجوزت واحد بحبه وهو كمان بيحبني
والمشكله اللي كنا فيها واهلو اللي كانو رافضني كل ده عدي
وفعلا جه واخدني ولبست وروحت معاه
علي بيت اهله
وطلعت ودخلني
وقعدني ف الصاله
وجت سلمت عليا أختو ورحبت بيا
أبوه مكنش موجود وامه كمان مجتش رحبت بيا
هو راح داخلها وخرج هو وهي
وانا مستنيه اتعرف عليها بفارغ الصبر
خرجت وقربت مني
وببص لقيتها ....
يا جماعة مش تخسرو حاجة لو علقتم اكثر هذا حقنا عليكم انا اتعب ومفيش ولا تعليق في المدونه
تعليقات
إرسال تعليق